३२ लाख लाइसेन्स छाप्नेदेखि हुलाक टिकटसम्म सोझै खरिद
काठमाडौं । सुरक्षण मुद्रण केन्द्रले सवारी चालक अनुमतिपत्र र हुलाक टिकट छपाइका लागि आवश्यक विभिन्न सामग्री तथा उपकरण सोझै खरिद गरेको छ । केन्द्रले सार्वजनिक खरिद ऐन, २०६३ र सार्वजनिक खरिद नियमावली, २०६४ को व्यवस्थाबमोजिम स्मार्ट सवारी चालक अनुमतिपत्र छपाइका लागि आवश्यक कच्चा पदार्थ, हुलाक टिकट छपाइका लागि विशेष कागज, सुरक्षा प्रणालीसम्बन्धी सफ्टवेयर तथा छपाइ मेसिनका लागि आवश्यक मसी र अन्य सामग्री खरिद गरेको जनाएको छ । केन्द्रले सवारी चालक अनुमतिपत्र छपाइका लागि टेस्लिन, पीईटीजी इनले, ओभरले, स्टिल प्लेट, सिलिकन र ल्यामिनेसन प्याड खरिद गरेको छ । यसअन्तर्गत २४ लाख थान अनुमतिपत्रका लागि आवश्यक सामग्री खरिद गर्न २०८२ माघ २१ गते र थप ८ लाख थान अनुमतिपत्रका लागि सामग्री खरिद गर्न २०८३ वैशाख १६ गते सम्झौता गरिएको छ । यी सामग्रीको आपूर्तिकर्ताका रूपमा खाद्य व्यवस्था तथा व्यापार कम्पनी रहेको छ । त्यस्तै, हुलाक टिकट छपाइका लागि आवश्यक यूभी डल पेपर पनि खरिद गरिएको छ । उक्त खरिदको सम्झौता मिति २०८२ फागुन १५ गते रहेको छ भने आपूर्तिकर्ताका रूपमा खाद्य व्यवस्था तथा व्यापार कम्पनी नै रहेको छ । सवारी चालक अनुमतिपत्र छपाइका लागि जुरा सेक्युरिटी सफ्टवेयर लाइसेन्स, डिजाइन फाइल तथा प्राविधिक सहयोग सेवा पनि खरिद गरिएको छ । केन्द्रले जुरा जेएसपी जिएमबिएचको आधिकारिक बिक्रेताबाट सोझै खरिद गरेको जनाएको छ । यस खरिदको सम्झौता मिति २०८२ फागुन १५ गते भएको छ भने आपूर्तिकर्ताका रूपमा जेएन एक्सपोट्र्स, हङकङ रहेको छ । यसैगरी, एचपी इन्डिगो ६ के सेक्युर प्रेस मेसिनका लागि मसी तथा अन्य उपभोग्य सामग्री पनि खरिद गरिएको छ । केन्द्रले हेवलेट प्याकार्डको आधिकारिक बिक्रेताबाट सोझै खरिद गरेको जनाएको छ । यस खरिदको सम्झौता मिति पनि २०८२ फागुन १५ गते रहेको छ । उक्त सामग्रीको आपूर्तिकर्ता फुजिटो प्रालि, सिंगापुर रहेको छ ।
गोदावरी फूलको प्रदर्शनीमा डेढ करोडको कारोबार
काठमाडौं । फ्लोरिकल्चर एसोसिएसन नेपालको आयोजनामा ललितपुरको जावलाखेलमा सम्पन्न १९औँ गोदावरी फूलको प्रतियोगितात्मक प्रदर्शनीमा १ करोड ४६ लाख रुपैयाँभन्दा बढीको कारोबार भएको छ । प्रदर्शनीको अन्तिम दिन बुधबार ६ हजार ५८१ जनाले अवलोकन गरेका छन् । उक्त दिन २४ लाख ९० हजार रुपैयाँभन्दा बढीको कारोबार भएको फ्लोरिकल्चर एसोसिएसन नेपालको सचिवालयले जनाएको छ । प्रदर्शनी अवधिमा मौसम प्रतिकूल रहे पनि कारोबार र अवलोकनकर्ताको उपस्थिति अपेक्षाअनुसार नै भएको मेला संयोजक सुमन महर्जनले बताए । उनका अनुसार प्रदर्शनीको पहिलो दिन ८ हजार ९००, दोस्रो दिन ४ हजार २००, तेस्रो दिन १० हजार ७००, चौथो दिन ७ हजार २५० र पाँचौँ दिन ६ हजार ७५६ जनाले प्रदर्शनी अवलोकन गरेका थिए । प्रदर्शनीको पाँचौँ दिन २१ लाख ५० हजार रुपैयाँको कारोबार भएको थियो । बुधबार छैटौँ तथा अन्तिम दिन कारोबार बढेर २४ लाख ९० हजार रुपैयाँभन्दा बढी पुगेको एसोसिएसनले जनाएको छ । प्रदर्शनीको समापनका अवसरमा सहभागी पुष्प व्यवसायीहरूलाई प्रमाणपत्र वितरण गरिएको थियो । साथै, आउँदै गरेको शुभदीपावलीको अवसरमा एसोसिएसनका सदस्य पुष्प व्यवसायीहरूबीच सांस्कृतिक कार्यक्रम आयोजना गरी शुभकामना आदानप्रदान गरिएको थियो ।
एनपीएलमा आज लुम्बिनी-जनकपुर र विराटनगर-काठमाडौं भिड्दै
काठमाडौं । नेपाल प्रिमियर लिग (एनपीएल) क्रिकेटअन्तर्गत आज दुई खेल हुँदैछन् । कीर्तिपुरस्थित त्रिवि अन्तर्राष्ट्रिय क्रिकेट मैदानमा दिउँसो साढे १२ बजे हुने पहिलो खेलमा लुम्बिनी लाइन्स र जनकपुर बोल्ट्सबीच प्रतिस्पर्धा हुनेछ । लिग तालिकाको शीर्ष स्थानमा रहेको लुम्बिनीले तीन खेल खेलेकोमा दुई खेलमा जित निकालेको छ । वर्षाका कारण एक खेल रद्द भएपछि लुम्बिनी र प्रतिस्पर्धी टोलीले अंक बाँडेका थिए । यस्तै, जनकपुर बोल्ट्स चार खेलबाट दुई जित र दुई हारसहित तालिकाको चौथो स्थानमा छ । आजै दिउँसो साढे ४ बजे हुने दोस्रो खेलमा विराटनगर किङ्स र काठमाडौं गोर्खाज आमनेसामने हुनेछन् । अंक तालिकाको दोस्रो स्थानमा रहेको विराटनगरले चार खेल खेलेकोमा दुई जित र दुई हार बेहोरेको छ । काठमाडौं गोर्खाज भने दुई खेलबाट एक जित र एक हारसहित सातौँ स्थानमा छ । आजका दुवै खेलले लिग तालिकामा टोलीहरूको स्थान र आगामी यात्रालाई थप प्रभाव पार्नेछन् ।
आजदेखि सुन र चाँदीका सिक्का बिक्री गर्दै राष्ट्र बैंक
काठमाडौं । नेपाल राष्ट्र बैंकले तिहार पर्वलाई लक्षित गर्दै आजदेखि सुनको असर्फी तथा चाँदीका सिक्का (मेडालियन) बिक्री सुरु गर्ने भएको छ । राष्ट्र बैंकको बबरमहलस्थित टक्सार महाशाखाबाट बिहान ११ बजेदेखि दिउँसो ३ बजेसम्म सिक्का बिक्री गरिनेछ । बैंकका अनुसार सिक्का बिक्री आज र भोलि (कात्तिक १९ र २० गते) दुई दिनसम्म सञ्चालन हुनेछ । यस वर्ष राष्ट्र बैंकले लक्ष्मी र गणेश अंकित चाँदीका मेडालियन बिक्री गर्ने जनाएको छ । साथै, वाणिज्य बैंकहरूबाट ३५ किलो सुन खरिद गरी त्यसबाट असर्फी तयार पारेर सर्वसाधारणलाई बिक्री गर्न लागिएको हो । राष्ट्र बैंकले तोकेको व्यवस्थाअनुसार एक जना व्यक्तिले २.५ ग्राम तौलको एउटा सुनको असर्फी र १० ग्राम तौलका बढीमा दुईवटा चाँदीका मेडालियन खरिद गर्न सक्नेछन् । चाँदीका मेडालियन लक्ष्मी र गणेश अंकित एक–एक थानका दरले उपलब्ध गराइनेछ । असर्फी तथा मेडालियनको मूल्य बिक्री हुने दिन बिहान करिब ११ बजे निर्धारण गरिनेछ । सुनचाँदीको दैनिक बजार मूल्यका आधारमा मूल्य तोकिने भए पनि सिक्का उत्पादनमा लागेको खर्चसमेत जोडिने भएकाले बजार मूल्यभन्दा केही महँगो पर्ने राष्ट्र बैंकले जनाएको छ । मूल्य निर्धारण भएपछि मात्र बिक्री सुरु हुनेछ । सिक्का खरिद गर्न चाहने व्यक्तिले नेपाली नागरिकता, राष्ट्रिय परिचयपत्र वा नम्बर खुल्ने अन्य परिचयपत्रको प्रतिलिपिसहित स्वयं उपस्थित हुनुपर्नेछ । खरिदकर्ताले नगद वा क्यूआरमार्फत भुक्तानी गर्न सक्नेछन ।
युनिलिभर नेपालको आम्दानी २.२४ अर्ब पुगेपनि नाफा १६ प्रतिशत घट्यो
काठमाडौं । युनिलिभर नेपाल लिमिटेडको खुद नाफा चालु आर्थिक वर्ष २०८३/८४ को पहिलो त्रैमासमा १६ प्रतिशतले घटेको छ । कम्पनीले समीक्षा अवधिमा २५ करोड २३ लाख रुपैयाँ खुद नाफा आर्जन गरेको छ । गत आर्थिक वर्ष २०८२/८३ को पहिलो त्रैमासमा कम्पनीले ३० करोड रुपैयाँ खुद नाफा कमाएको थियो । गत वर्षको तुलनामा चालु आवको पहिलो त्रैमासमा कम्पनीको नाफा ४ करोड ७७ लाख रुपैयाँले घटेको हो । कम्पनीले चालु आवको असोजसम्म २ अर्ब २४ करोड ३६ लाख रुपैयाँ सञ्चालन आम्दानी गरेको छ । गत आर्थिक वर्षको सोही अवधिमा कम्पनीको सञ्चालन आम्दानी २ अर्ब ३७ लाख रुपैयाँ थियो । यसअनुसार कम्पनीको सञ्चालन आम्दानी १२ प्रतिशतले बढेको छ । समीक्षा अवधिमा कम्पनीको अन्य आम्दानी २ करोड ६ लाख रुपैयाँ रहेको छ । गत वर्षको सोही अवधिमा यस्तो आम्दानी २ करोड ६२ लाख रुपैयाँ थियो । कम्पनीले चालु आवको पहिलो त्रैमासमा कच्चा पदार्थ उपभोग खर्च १ अर्ब ३० करोड २० लाख रुपैयाँ गरेको छ । गत वर्षको सोही अवधिमा यस्तो खर्च १ अर्ब ७ करोड १ लाख रुपैयाँ थियो । त्यस्तै, समीक्षा अवधिमा कर्मचारी खर्च १८ करोड ३८ लाख रुपैयाँ पुगेको छ । गत वर्षको सोही अवधिमा कम्पनीको कर्मचारी खर्च १७ करोड ५८ लाख रुपैयाँ थियो । कम्पनीको अन्य खर्च ३४ करोड १३ लाख रुपैयाँ रहेको छ । अघिल्लो वर्षको सोही अवधिमा यस्तो खर्च ३२ करोड २१ लाख रुपैयाँ थियो । कम्पनीको कुल खर्च चालु आवको असोजसम्म १ अर्ब ९२ करोड २९ लाख रुपैयाँ पुगेको छ । गत आर्थिक वर्षको सोही अवधिमा कुल खर्च १ अर्ब ६६ करोड १ लाख रुपैयाँ रहेको थियो । ९ करोड २१ लाख रुपैयाँ चुक्ता पुँजी रहेको कम्पनीको सञ्चित नाफा ५ अर्ब २७ करोड ५६ लाख रुपैयाँ रहेको छ ।
बैंकिङ छोडेर पुँजी बजारमा
काठमाडौं । बैंकिङ क्षेत्रमा जीवनको लामो समय बिताएका प्रताप सुवेदी अब नेपालको पुँजी बजारको नेतृत्वमा पुगेका छन् । नेपाल स्टक एक्सचेन्ज (नेप्से) को प्रमुख कार्यकारी अधिकृतमा नियुक्त भएसँगै उनको यात्राले नयाँ मोड लिएको छ । कृषि विकास बैंकको उच्च व्यवस्थापनदेखि कर्जा, सञ्चालन, संस्थागत सुशासन र वित्तीय व्यवस्थापनसम्मका जिम्मेवारी सम्हालेका सुवेदीका लागि नेप्सेको नेतृत्व नयाँ कार्यक्षेत्र भए पनि वित्तीय क्षेत्रको अनुभव भने पुरानो छ । अर्थ मन्त्रालयले गठन गरेको छनोट समितिको सिफारिसमा मंगलबार बसेको मन्त्रिपरिषद् बैठकले उनलाई नेप्सेको प्रमुख कार्यकारी अधिकृत नियुक्त गर्ने निर्णय गरेको हो । नियुक्तिपछि अर्थमन्त्री डा. स्वर्णिम वाग्लेले सुवेदीलाई नियुक्तिपत्र प्रदान गर्दै इमानदारीपूर्वक जिम्मेवारी निर्वाह गर्न निर्देशन दिएका छन् । बैंकिङ क्षेत्रको अनुभवलाई अब पुँजी बजारको विकास र व्यवस्थापनमा उपयोग गर्ने जिम्मेवारी सुवेदीको काँधमा आएको छ । पर्वतको कुश्मा नगरपालिका-११ स्थायी ठेगाना भएका सुवेदीको जन्म २०२८ माघमा भएको हो । उनले सन् १९९६ देखि २००० सम्म राष्ट्र बैंकमा सहायक पदबाट जागिर सुरू गरेका थिए । सुवेदी त्यसपछि कर्मचारी सञ्चय कोषको भैरहवा शाखामा केही समय शाखा अधिकृतका रूपमा काम गरे । उनी सन् २००० देखि कृषि विकास बैंकमा आबद्ध भएका थिए । कृषि विकास बैंकमा विभिन्न क्षेत्रीय तथा केन्द्रीय जिम्मेवारी सम्हाल्ने क्रममा उनले कर्जा व्यवस्थापन, निक्षेप परिचालन, योजना निर्माण र सञ्चालन सुधारका क्षेत्रमा काम गरेका छन् । सन् २०१८ देखि २०१९ सम्म काठमाडौं क्षेत्रीय कार्यालयको प्रमुख तथा निमित्त उपमहाप्रबन्धकका रूपमा कार्यरत रहँदा उनले काठमाडौं र चितवन क्षेत्रका ६५ भन्दा बढी शाखाको व्यवस्थापन गरेका थिए । सन् २०१९ को मेदेखि सन् २०२४ को मार्चसम्म उनले कृषि विकास बैंकको प्रमुख कर्जा अधिकृतका रूपमा काम गरे । यस अवधिमा वार्षिक योजना तथा बजेट निर्माण, कर्जा फाइल स्वीकृति, कर्जा नीतिको परिमार्जन र निष्क्रिय कर्जा व्यवस्थापनमा उनको भूमिका थियो । त्यसपछि सन् २०२४ को मार्चदेखि सन् २०२५ को मार्चसम्म उनले उपमहाप्रबन्धक तथा प्रमुख सञ्चालन अधिकृतको जिम्मेवारी सम्हाले । यस क्रममा कर्जा प्रशासनसम्बन्धी कार्यको केन्द्रीकरण, कर्जा स्वीकृति समितिको सक्रियता, ग्राहक पहिचान विवरण अद्यावधिक तथा नयाँ निक्षेप योजना विकासमा उनले नेतृत्व गरेका थिए । यसअघि सन् २०२२ मा उनले केही समय कृषि विकास बैंकको निमित्त प्रमुख कार्यकारी अधिकृतका रूपमा समेत काम गरेका थिए । बैंकबाहिरका वित्तीय तथा अन्य संस्थामा सञ्चालकका रूपमा काम गरेको अनुभव पनि सुवेदीसँग छ । उनी २०८० कात्तिक १४ देखि नेको इन्स्योरेन्सको सञ्चालकका रूपमा कार्यरत थिए । यसअघि २०७९ चैत २३ देखि २०८० कात्तिक १३ सम्म फन्ड म्यानेजमेन्ट कम्पनीको अध्यक्षको जिम्मेवारी सम्हालेका थिए । त्यस्तै, २०७६ चैत २१ देखि २०७९ चैत २२ सम्म साना किसान विकास लघुवित्त वित्तीय संस्था र २०७५ फागुन १० देखि २०७६ चैत २० सम्म डिप्रोक्स लघुवित्त वित्तीय संस्थाको सञ्चालक रहेका थि । कृषि विकास बैंकको कर्मचारी अवकाश कोषको सञ्चालक समितिमा पनि उनी २०७६ जेठ १८ देखि आबद्ध छन् । बैंकमा कर्मचारी भर्ना प्रक्रियाको नेतृत्व गरेको अनुभव पनि उनीसँग छ । कर्मचारी भर्ना समितिको अध्यक्षका रूपमा उनले आन्तरिक प्रतिस्पर्धा तथा खुला प्रतियोगिताबाट कर्मचारी छनोट, पाठ्यक्रम निर्माण, लोक सेवा आयोगबाट स्वीकृति, विज्ञापन प्रकाशन, अन्तर्वार्ता र नियुक्तिसम्मका प्रक्रियामा काम गरेका थिए । उनी नेपाल चार्टर्ड एकाउन्टेन्ट्स संस्था (आईक्यान) बाट दर्ता प्राप्त प्रथम श्रेणीका लेखापरीक्षक पनि हुन् । त्रिभुवन विश्वविद्यालयबाट सन् १९९५ मा मार्केटिङमा स्नातकोत्तर गरेका सुवेदीले बैंकिङ क्षेत्रमा प्रवेश गर्नुअघि अध्यापनसमेत गरेका थिए । उनले पर्वतस्थित जनता सुदर्शन बहुमुखी क्याम्पसमा पूर्णकालीन सहायक प्राध्यापकका रूपमा अध्यापन गरेका थिए । त्यस्तै, कीर्तिपुरस्थित शहीद स्मारक कलेज र मीनभवनस्थित नेपाल कमर्स क्याम्पसमा आंशिक सहायक प्राध्यापकका रूपमा काम गरेका थिए । उनले आईकम, बीबीएस र एमबीए तहमा लेखा, बजार व्यवस्थापन, बैंकिङ तथा बिमा विषय अध्यापन गरेका थिए । फिलिपिन्स, अस्ट्रेलिया, सिंगापुर, भारत, इन्डोनेसिया, श्रीलंका, थाइल्यान्ड, बहराइन र इजरायललगायतका देशमा आयोजित तालिम तथा अध्ययन भ्रमणमा उनी सहभागी भएका छन् । सन् २०२५ डिसेम्बरमा अस्ट्रेलियाको मेलबर्नस्थित भिक्टोरिया विश्वविद्यालयमा आयोजित नेतृत्व विकास कार्यक्रममा सहभागी भएका सुवेदी सन् २०२६ फेब्रुअरीमा बहराइनमा आयोजित १२औँ प्रोटेक्सन रिइन्स्योरेन्स सेमिनारमा पनि सहभागी भएका थिए । यसअघि सन् २०२२ मा फिलिपिन्सको मनिलामा आयोजित उन्नत बैंकिङ व्यवस्थापन तालिममा उनले भाग लिएका थिए । उनले एसियाली विकास बैंकको प्राविधिक सहायता कार्यक्रमअन्तर्गत सन् २००६ मार्च १२ मा योग्य प्रशिक्षकको प्रमाणपत्रसमेत प्राप्त गरेका छन् । कृषि विकास बैंक, राष्ट्रिय वाणिज्य बैंक तथा विभिन्न तालिम संस्थामा प्रशिक्षकका रूपमा काम गरेको अनुभव पनि उनीसँग छ ।
नवनियुक्त आईजीपी केसीलाई गृहमन्त्री गुरुङले लगाइदिए फुली
काठमाडौं । नेपाल प्रहरीका महानिरीक्षकलाई गृहमन्त्रीले दज्र्यानी चिह्न लगाइदिएका छन् । बुधबार गृह मन्त्रालयमा नवनियुक्त महानिरीक्षक मनोजकुमार केसीलाई गृहमन्त्री सुधन गुरुङले दज्र्यानी चिह्न लगाइदिएका हुन् । यसअघि गृहसचिवले दज्र्यानी चिह्न लगाउने गरेका थिए । सरकारले आजै केसीलाई प्रहरी महानिरीक्षक नियुक्त गरेको थियो । मन्त्रिपरिषद्को आकस्मिक बैठकले दानबहादुर कार्कीलाई हटाएर केसीलाई महानिरीक्षक बनाउने निर्णय गरेको थियो । मन्त्रिपरिषद् बैठकले कार्कीलाई प्रधानमन्त्रीको सुरक्षा सल्लाहकारको जिम्मेवारी दिएको छ ।
नेपाली उत्पादनलाई विश्व बजारसँग जोड्न 'नेपाल प्रत्यायन केन्द्र' सञ्चालनमा
काठमाडौं । सरकारले नेपालको औद्योगिक विकास र व्यापार सहजीकरणका नेपाल प्रत्यायन केन्द्र स्थापना गरेको छ । त्रिपुरेश्वरस्थित केन्द्रको आज एक कार्यक्रमका बीच उद्योग, वाणिज्य तथा आपूर्तिमन्त्री ई. दीपककुमार साहले उद्घाटन गरे । उनले उद्योगको लागत घटाउने, उपभोक्ताको विश्वास बढाउने र नेपाली उत्पादनलाई विश्व बजारसँग जोड्ने दिशामा यस केन्द्रको सञ्चालन कोशेढुङ्गा सावित हुनेमा विश्वास व्यक्त गरे । नेपाली उद्योगलाई प्रतिस्पर्धी बनाउने, उपभोक्ताले गुणस्तरीय र सुरक्षित वस्तु तथा सेवा प्राप्त गर्ने सुनिश्चितता बढाउने र नेपाली उत्पादनलाई अन्तर्राष्ट्रिय बजारमा स्थापित गर्ने उद्देश्यले केन्द्रको स्थापना गरिएको हो । मन्त्रालयका अनुसार केन्द्रको सञ्चालनबाट अब प्रयोगशाला, मेडिकल ल्याव, निरीक्षण तथा प्रमाणीकरण गर्ने संस्थाले नेपालमै प्रत्यायन सेवा प्राप्त गर्ने आधार तयार भएको छ । यसले उद्योगी तथा व्यवसायीको परीक्षण र प्रमाणीकरणसम्बन्धी समय र खर्च घटाउन, गुणस्तर सुधार गर्न तथा विदेशी निकायमाथिको निर्भरता कम गर्न सहयोग पुग्नेछ । साथै केन्द्रको स्थापनापछि खाद्य पदार्थ, औषधिजन्य उत्पादन, निर्माण सामग्री, विद्युतीय उपकरणलगायत वस्तुको गुणस्तर परीक्षण गर्ने संस्थाको विश्वसनीयता अभिवृद्धि हुँदा आम उपभोक्ताको स्वास्थ्य, सुरक्षा र हित संरक्षणमा समेत सकारात्मक योगदान पुग्ने अपेक्षा गरिएको छ । “नेपालको निर्यात व्यापारलाई सहज बनाउन अन्तर्राष्ट्रिय प्रत्यायन तथा पारस्परिक मान्यताको व्यवस्था विकास गर्न केन्द्रले महत्वपूर्ण भूमिका खेल्नेछ । यसबाट नेपाली उत्पादनको गुणस्तरप्रति अन्तर्राष्ट्रिय विश्वास बढाउन र निर्यातकर्ताको लागत तथा प्रक्रियागत झन्झट घटाउन समेत सहयोग पुग्नेछ“, मन्त्रालयद्वारा जारी गरेको विज्ञप्तिमा भनिएको छ । नागरिकले सुरक्षित वस्तु पाउनुपर्छ, उद्योगीले अनावश्यक खर्च र झन्झटबाट मुक्ति पाउनुपर्छ र नेपाली उत्पादनले विश्व बजारमा सम्मानजनक स्थान बनाउनुपर्छ भन्ने विषयलाई आत्मसात् गर्दै केन्द्रको स्थापना गरिएको हो ।
