हल्लाका भरमा कांग्रेसको महाधिवेशनमाथि प्रश्न नउठाउन विश्वप्रकाशको चेतावनी
काठमाडौं । नेपाली कांग्रेसका वरिष्ठ उपसभापति विश्वप्रकाश शर्माले पार्टीको महाधिवेशनमा आर्थिक चलखेल भएको भन्दै सामाजिक सञ्जालमा भइरहेका प्रचार आधारहीन भएको बताएका छन् । सोमबार नेपाली कांग्रेस काभ्रेपलाञ्चोक जिल्ला कार्यसमितिले आयोजना गरेको कार्यक्रममा बोल्दै शर्माले कुनै विचौलियाले भनेकै भरमा करोडौं रुपैयाँको लेनदेन भएको निष्कर्षमा पुग्न नहुने बताएका हुन् । उनले गगन थापा र आफूले पार्टीको नेतृत्व परिवर्तनका लागि करोडौं रुपैयाँ बुझाएको भन्ने आरोपप्रति प्रश्न उठाउँदै पटक/पटक सत्तामा पुगेका नेताहरू र आफूहरूबीचको राजनीतिक तथा आर्थिक हैसियत तुलना गर्न आग्रह गरे । कुनै आपराधिक घटनामा पक्राउ परेको व्यक्तिले कसैको नाम जोडेर अभिव्यक्ति दिँदैमा त्यसलाई अदालत वा कानूनले प्रमाणका रूपमा स्वीकार गर्छ कि गर्दैन भन्दै उनले सामाजिक सञ्जालमा हुने प्रचारको पछि नलाग्न आग्रह गरे । शर्माले कांग्रेसको विशेष महाधिवेशनदेखि १५ औं महाधिवेशनसम्मका सम्पूर्ण प्रक्रिया पार्टीको विधि, विधान, पद्धति र संविधानअनुसार सम्पन्न भएको दाबी गरे । महाधिवेशन प्रतिनिधिहरूको निर्णय कार्यान्वयन भएको भन्दै पार्टीभित्रका निर्णयलाई लिएर अनावश्यक भ्रम सिर्जना नगर्न उनको आग्रह छ । उनले बदलिएको राष्ट्रिय परिस्थिति र आवश्यकताअनुसार काँग्रेसलाई नयाँ ढङ्गले अघि बढाउनुपर्ने बताए । पार्टीलाई चुस्त, व्यवस्थित र योजनाबद्ध रूपमा सञ्चालन गर्दै देशको विकास र समृद्धिका लागि काम गर्ने उनको भनाइ छ । शर्माले भने, ‘राष्ट्रिय आवश्यकता र बदलिँदो परिस्थितिअनुसार नेपाली काँग्रेसलाई नयाँ सोच, ऊर्जा र दिशासहित अघि बढाउनुपर्ने समय आएको छ । पार्टीको विशेष महाधिवेशनदेखि आगामी १५ औं महाधिवेशनसम्मका प्रक्रिया विधि, विधान र पद्धतिअनुसार अघि बढेका छन् । अपुष्ट आरोप र हल्लाभन्दा तथ्य, प्रमाण र विवेकलाई प्राथमिकता दिनुपर्छ । अब काभ्रे काँग्रेसले गाउँ, टोल र जनताको घरदैलोसम्म पुगेर संगठन बलियो बनाउनुपर्छ । अनुभवी नेतृत्व र युवा पुस्ताको सहकार्यमा जिल्लामा नयाँ उत्साह, विश्वास र ऊर्जा जगाउनुपर्छ । हामी अध्ययन, मेहनत, एकता र योजनाका साथ पार्टी तथा देशको समृद्धिका लागि अघि बढ्नुपर्छ ।’ काभ्रे कांग्रेसलाई संगठन विस्तार र सुदृढीकरणमा केन्द्रित हुन आग्रह गर्दै शर्माले पार्टीको जग बलियो बनाउन कार्यकर्ताहरू गाउँ तथा समुदायसम्म पुग्नुपर्ने बताए । कार्यकर्तामा आशा र आत्मविश्वास जगाउन सके मात्रै समाजमा नयाँ विश्वास स्थापित गर्न सकिने उनले उल्लेख गरे ।
भाइटीकामा के दिने उपहार ? यी बन्न सक्छन् उपयुक्त विकल्प
काठमाडौं । नेपालीहरुको दोस्रो महान चाड तिहार सुरु भइसकेको छ । आज तिहारको चौथो दिन गाईँको पूजा गरी मनाईँर्दछ । तिहारमा आफन्त, साथीभाइ तथा नजिकका व्यक्तिलाई उपहार दिने चलन छ । विशेषगरी तिहार दिदी बहिनी र दाजु भाइबीचको आत्मियताको पर्व हो । धार्मिकरुपमा दाजुभाइको दीर्घ जीवनका लागि दिदीबहिनीले पूजाअर्चना गर्ने पर्व तिहारको टीका यसपटक बुधबार परेको छ । सप्तरंग दाजुभाइ र दिदीबहिनीलाई लगाउने प्रचलन रहेको छ । टिका पछि दिदीबहिनीले दाजुभाइ र दाजु भाइले दिदीबहिनीलाई दक्षिणा(पैसा) र उपहारहरु दिने गरिन्छ । मरमसला, सेलरोटी, मिठाइसहितका परिकारसँग सँगै उपहार एक अर्कालाई दिएर खुसी साट्ने गरिन्छ । तिहारमा दिदी बहिनी वा दाजु भाइलाई के ‘गिफ्ट’ दिने सोचिरहनु भएको छ भने यहाँ त्यस्ता केही उपहारबारे चर्चा गरिएको छ । उपहार दिनेभएसँगै त्यस्ता चिजले दैनिक जीवनमा पनि काम दिन सक्यो भने त्यसले फाइदा पुग्छ । राम्रो उपहार दिन हजारौँ रुपैयाँ खर्च गर्नुपर्छ भन्ने छैन । थोरै बजेटमै आकर्षक, उपयोगी र सम्झनलायक उपहार दिन सकिन्छ । घर सजावटका सामग्रीदेखि व्यक्तिगत सम्झनासँग जोडिएका उपहारसम्म धेरै विकल्प छन् । गरगहना तथा फेसन ज्वेलरी दिदीबहिनीलाई उपहार दिनका लागि गरगहना पनि राम्रो विकल्प हो । बजेटअनुसार सुनको औँठी, सिक्री वा अन्य गहना उपहार दिन सकिन्छ । बजेट कम छ वा तपाईं विद्यार्थी हुनुहुन्छ भने दिदीबहिनीको रुचिअनुसार फेसन ज्वेलरी पनि दिन सक्नुहुन्छ झुम्का, हार तथा अन्य आकर्षक गहनाले दिदीबहिनीलाई खुसी बनाउन सक्छ । हेयर स्टाइलिङका सामग्री दिदीबहिनीलाई उपयोगी उपहार दिन चाहनुहुन्छ भने हेयर स्टाइलिङका सामग्री छनोट गर्न सकिन्छ । हेयर ड्रायर, हेयर स्ट्रेटनर, स्ट्रेटनर कम्ब, हेयर रोलर वा हट एयर ब्रस उपहारका विकल्प हुन सक्छन्। यस्ता सामग्री व्यक्तिगत सजावटमा रुचि राख्ने दिदीबहिनीका लागि उपयोगी हुनुका साथै लामो समयसम्म प्रयोग गर्न सकिन्छ । मेकअप तथा स्किन केयर किट मेकअप र सौन्दर्य सामग्रीमा रुचि राख्ने दिदीबहिनीका लागि मेकअप किट राम्रो उपहार हुन सक्छ । आफ्नो बजेटअनुसार राम्रो ब्रान्डका मेकअप सामग्री, स्किन केयर प्रोडक्ट, क्रिम तथा अन्य सौन्दर्य सामग्री समावेश भएको सेट दिन सकिन्छ । तर सामग्री छनोट गर्दा दिदीबहिनीको छालाको प्रकार र व्यक्तिगत रुचिलाई ध्यान दिनुपर्छ । ग्याजेट्स प्रविधि तथा नयाँ ग्याजेट्समा रुचि राख्ने उपहार दिन सकिन्छ । यस्ता उपहारले दाजुभाईलाइ खुसी बनाउनुका साथै दैनिक कामकाजलाई पनि सहज बनाउन सक्छन् । दाजुभाइका लागि इलेक्ट्रोनिक सामग्री पनि राम्रो उपहार हुन सक्छ । बजेटअनुसार मोबाइल फोन, वायरलेस इयरफोन, ब्लुटुथ स्पिकर वा अन्य उपयोगी ग्याजेट्स हुन सक्छ । स्मार्टवाच उपहार दिन सक्नुहुन्छ । यो आकर्षक देखिनुका साथै दैनिक जीवनमा उपयोगी हुने उपहार पनि हो । स्मार्टवाचबाट समय हेर्नुका साथै फोनमा आएका सूचना, कल तथा दैनिक गतिविधिबारे जानकारी लिन सकिन्छ । त्यसैले यो तिहारमा दाजुभाइलाई केही फरक र उपयोगी उपहार दिन चाहनुहुन्छ भने स्मार्टवाच राम्रो विकल्प हुन सक्छ । व्यक्तिगत तस्बिर राखिएको फोटो फ्रेम दिदीबहिनीले दाजुभाईलाई वा दाजुभाईले दिदीबहिनीलाई व्यक्तिगत तस्बिर राखिएको फोटो फ्रेम राम्रो विकल्प हुन सक्छ । परिवारका सदस्यसँग खिचिएको सुन्दर तस्बिर राखेर उपहार दिन सकिन्छ । त्यस्तै, फ्रेममा नाम वा मायालु सन्देशसमेत लेखाउन सकिन्छ । यस्तो उपहारले भावनात्मक सम्बन्धलाई अझ प्रगाढ बनाउन मद्दत गर्छ। ड्राइफ्रुट्सको आकर्षक ह्याम्पर तिहारमा दाजुभाईलाई ड्राइफ्रुट्सको आकर्षक ह्याम्पर दिन सकिन्छ । यसमा बदाम, काजु, पिस्ता, ओखर र किसमिस समावेश गर्न सकिन्छ । आकर्षक बाकस वा टोकरीमा प्याकिङ गरेर दिँदा उपहार थप विशेष देखिन्छ । तर उपहार दिने व्यक्तिको खानपानसम्बन्धी रुचि र कुनै खानेकुराबाट एलर्जी भए÷नभएको विषयमा पनि ध्यान दिनुपर्छ । इन्डोर प्लान्ट्स अर्थात् घरभित्र राख्न मिल्ने बिरुवा यो विशेषगरी दाजुभाईले दिदीबहिनीलाई दिन सकिन्छ । दिदीबहिनीहरु यस्तोमा बढी रुची हुने भएकाले पनि यो उपहार उपयुक्त विकल्प बन्न सक्छ । पछिल्लो समय उपहारका रूपमा बिरुवा दिने चलन पनि लोकप्रिय हुँदै गएको छ । तिहारमा भाइटिकामा मनी प्लान्ट, लक्की बाँस, स्नेक प्लान्ट वा अन्य सजावटी बिरुवा उपहार दिन सकिन्छ । आकर्षक गमलामा राखिएको सानो बिरुवा घर तथा कार्यालय दुवै ठाउँमा सजाउन उपयोगी हुन्छ ।
घोप्टेभीरमा पहिरो, सडक खुल्न ३ घण्टा लाग्ने
काठमाडौँ । चितवन सडक खण्डको पृथ्वी राजमार्गको मलेखु-मुग्लिन अन्तर्गत घोप्टे भीरमा सुक्खा पहिरो गएको छ । सोमबार बिहान ५ बजे गएको पहिरो कारण सडकमा यातायात अवरुद्ध भएको छ । चितवन जिल्ला प्रहरी कार्यालयका अनुसार पहिरो हटाउन अरु ३ घण्टा लाग्ने भएको छ । प्रहरीका अनुसार पहिरो हटाउन ३ वटा मेसिन उपकरण परिचालित भएका छन् । काठमाडौंबाट लामो दुरीमा निस्केका सवारीसाधन थानकोट र काठमाडौं भित्रिने यातायातका साधनहरू चितवनमा अड्केका छन् ।
चिनियाँ जासुसको जालमा एनभीडीया प्रमुख !
काठमाडौं । विश्वकै प्रमुख प्रविधि कम्पनीमध्ये एक एनभीडीयाका प्रमुख कार्यकारी अधिकृत (सीईओ) जेन्सेन हुआङ चिनियाँ जासुसी सञ्जालसँग जोडिएको आशंकापछि विवादमा तानिएका छन् । चिनियाँ गुप्तचर निकायसँग सम्बन्ध रहेको आशंका गरिएकी एक महिलासँग हुआङको निकट सम्बन्ध रहेको समाचार सार्वजनिक भएपछि उनी विवादमा मुछिएका हुन् । कम्पनीको सञ्चालक समितिले उनीमाथि स्वतन्त्र छानबिन सुरु गर्ने निर्णयसमेत गरिसकेको छ । कम्पनीको सञ्चालक समितिले आइतबार जारी गरेको वक्तव्यमा हुआङ विदेशी गुप्तचर निकायको निशानामा परेको भन्ने पछिल्लो समाचारलाई गम्भीरतापूर्वक लिएको जनाएको छ । घटनाबारे अनुसन्धान गर्न स्वतन्त्र सञ्चालकहरूको समिति गठन गरिने र उनीहरूलाई बाह्य कानुनी परामर्शदाताले सहयोग गर्ने कम्पनीले जनाएको छ । जेन्सेन हुआङ । कम्पनीका अनुसार अनुसन्धानले राष्ट्रिय सुरक्षा वा एनभीडीयाको गोप्य व्यावसायिक सूचनामा कुनै असर परेको छ कि छैन भन्ने विषयसमेत समेट्नेछ । यद्यपि, अहिलेसम्म राष्ट्रिय सुरक्षा वा कम्पनीका गोप्य सूचना चुहिएको कुनै प्रमाण आफूहरूसँग नरहेको सञ्चालक समितिले स्पष्ट पारेको छ । हुआङले पनि छानबिनलाई पूर्ण समर्थन गर्ने र अनुसन्धानमा सहयोग गर्ने प्रतिबद्धता जनाएका छन् । विवाद सार्वजनिक भए पनि उनले तत्कालका लागि सीईओ पदबाट राजीनामा दिनुपर्ने अवस्था नरहेको कम्पनीले जनाएको छ । एनभीडीयाका सार्वजनिक नीति तथा सञ्चार प्रमुख जोन रिजोले हुआङले सीईओका रूपमा निरन्तर काम गर्ने बताएका छन् । कम्पनीले उनको नेतृत्वप्रति विश्वास कायम रहेकोसमेत जनाएको छ । को हुन् हुआङसँग जोडिएकी एलिस हुआङ ? यो विवादको केन्द्रमा रहेकी महिला हुन् एलिस हुआङ । उनी चिनियाँ नागरिक हुन् । अमेरिकी गुप्तचर निकायहरूले उनलाई चीनको गुप्तचर निकायका लागि काम गर्ने व्यक्तिका रूपमा शंका गरेको विभिन्न अमेरिकी सञ्चारमाध्यमले जनाएका छन् । द न्युयोर्क टाइम्सले अक्टोबरको अन्तिम साता सार्वजनिक गरेको समाचारअनुसार एलिसको एनभीडीयाका प्रमुख जेन्सेन हुआङसँग निकट सम्बन्ध रहेको थियो । अमेरिकी गुप्तचर निकायहरूको आकलनमा उनी चीनको राज्य सुरक्षा मन्त्रालयसँग जोडिएकी थिइन् र हुआङबाट सूचना प्राप्त गरी बेइजिङसम्म पु‍र्याउने उद्देश्यले परिचालित भएकी थिइन् । एलिस पहिले चीनमा टेलिभिजन पत्रकारका रूपमा काम गर्थिन् । पछि उनी सिंगापुरमा रहेको डेटा सेन्टरसम्बन्धी कम्पनी मेगास्पिडमा उच्च तहको कार्यकारी पदमा पुगेकी थिइन् । मेगास्पिड एनभीडीयाको दक्षिणपूर्वी एसियाली क्षेत्रका प्रमुख ग्राहक कम्पनीमध्ये एक हो । अमेरिकी सञ्चारमाध्यमका अनुसार एलिस र जेन्सेनबीचको सम्बन्ध सामान्य व्यावसायिक सम्पर्कभन्दा निकट रहेको थियो । उनीहरू सन् २०२४ मा ताइवानमा सँगै देखिएको तस्बिरसमेत सार्वजनिक भएको छ । दुवैको थर एउटै भए पनि उनीहरूबीच पारिवारिक सम्बन्ध भने नरहेको समाचारमा उल्लेख छ । अमेरिकी गुप्तचर निकायहरूले एलिसले हुआङसँगको सम्बन्धलाई प्रयोग गरेर एनभीडीयाका उच्चस्तरीय प्रविधि र व्यावसायिक सूचनासम्म पहुँच बनाउने प्रयास गरेकी थिइन् भन्ने आशंका छ । साथै अमेरिकी सरकारले चीनतर्फ अत्याधुनिक चिप निर्यातमा लगाएको प्रतिबन्ध खुकुलो बनाउन हुआङलाई प्रभावमा पार्ने प्रयाससमेत भएको हुन सक्ने आकलन गरिएको छ । यद्यपि यी आरोप र गुप्तचर निकायहरूको आकलन अनुसन्धानबाट अन्तिम रूपमा प्रमाणित भइसकेका छैनन् । मेगास्पिड र अर्बौं डलरको चिप कारोबार यो घटनालाई अझ संवेदनशील बनाउने अर्को पक्ष मेगास्पिड र एनभीडीयाबीचको ठूलो व्यावसायिक कारोबार हो । द न्युयोर्क टाइम्सका अनुसार मेगास्पिडले पछिल्ला दुई वर्षमा एनभिडियाबाट ४ अर्ब ८० करोड अमेरिकी डलरभन्दा बढी मूल्यका चिप खरिद गरेको थियो । मेगास्पिडले खरिद गरेका चिप र त्यसको सम्भावित अन्तिम प्रयोगबारे अमेरिकी अधिकारीहरूले पनि चासो देखाउँदै आएका थिए । अमेरिकी सरकारले चीनलाई अत्याधुनिक सेमिकन्डक्टर प्रविधिमा पहुँच सीमित गर्ने उद्देश्यले एनभीडीयाका केही शक्तिशाली एआई चिपको निर्यातमा प्रतिबन्ध लगाएको छ । अमेरिकी अधिकारीहरूलाई मेगास्पिडमार्फत प्रतिबन्धित चिप चीनसम्म पुग्न सक्ने आशंका रहेको समाचारमा उल्लेख छ । यही पृष्ठभूमिमा एलिसको गतिविधि र हुआङसँगको सम्बन्धलाई अमेरिकी गुप्तचर निकायहरूले चासोका साथ हेरेका थिए । एनभीडीयाका चिपहरू कृत्रिम बौद्धिकता (एआई) प्रणाली विकास गर्न आवश्यक पर्ने डेटा सेन्टर र कम्प्युटिङ प्रणालीमा व्यापक रूपमा प्रयोग हुन्छन् । त्यसैले कम्पनीको प्रविधि र सूचनामा विदेशी गुप्तचर निकायको पहुँच हुन सक्ने आशंकाले अमेरिकाको राष्ट्रिय सुरक्षासँग जोडिएको प्रश्नसमेत उठाएको छ । हुआङले यसअघि अमेरिकी बजारबाट चीनलाई चिप बिक्री गर्न सहज बनाउनुपर्ने पक्षमा सार्वजनिक रूपमा धारणा राख्दै आएका थिए । उनको तर्क अमेरिकी प्रविधि चिनियाँ बजारमा उपलब्ध रहँदा अमेरिकी कम्पनीको प्रतिस्पर्धात्मक क्षमता बलियो हुने र चीनलाई आफ्नै प्रविधि विकास गर्न थप प्रोत्साहन नपुग्ने भन्ने थियो । तर, चीनसँगको प्रविधि प्रतिस्पर्धालाई राष्ट्रिय सुरक्षाको विषय मान्दै आएका अमेरिकी अधिकारीहरूले भने अत्याधुनिक चिपको निर्यातमा कडाइ गर्नुपर्ने धारणा राख्दै आएका छन् । पत्नी र परिवारसँग माफी माग्दै हुआङ विवाद चर्किएपछि हुआङले कम्पनीका कर्मचारीलाई सम्बोधन गर्दै आफूले पत्नीप्रति बेइमानी गरेको स्वीकार गरेका छन् । एक्सियोसले प्राप्त गरेको उनको आन्तरिक सन्देशअनुसार उनले पत्नी र परिवारसँग माफी माग्दै आफ्नो व्यवहारका कारण पत्नी र सन्तानलाई चोट पुगेको बताएका छन् । उनले सन्देशमा लेखेका छन्, ‘मैले मेरी पत्नीप्रति बेइमानी गरेँ । मेरा कामले उनलाई र हाम्रा सन्तानलाई चोट पु‍र्याएको छ । मैले गरेको कामको कुनै बहाना छैन ।’ उनले कम्पनीका कर्मचारी, सञ्चालक समिति, व्यावसायिक साझेदार र सेयरधनीसँग पनि माफी मागेका छन् । आफ्नो जिम्मेवारी पूरा गर्न नसकेको स्वीकार गर्दै उनीहरूको विश्वास पुनः प्राप्त गर्न काम गर्ने प्रतिबद्धता जनाएका छन् । ‘एनभीडीयाको नेतृत्व गर्नु मेरो जीवनकै ठूलो अवसर हो । म कम्पनीप्रति पूर्ण रूपमा प्रतिबद्ध छु र तपाईंहरूको विश्वास पुनः प्राप्त गर्न काम गर्नेछु,’ उनको सन्देशमा उल्लेख छ । यद्यपि, कर्मचारीलाई पठाइएको उक्त सन्देशमा उनले एलिस हुआङको नाम उल्लेख गरेका छैनन् । न त उनीसँगको सम्बन्धबारे विस्तृत विवरण नै दिएका छन् । उनले मुख्य रूपमा आफ्नो वैवाहिक सम्बन्धमा बेइमानी गरेको स्वीकार गरेका हुन् । अमेरिकी संसद्ले पनि माग्यो जवाफ हुआङसँग जोडिएको यो विषय अमेरिकी संसद्सम्म पुगेको छ । अमेरिकी प्रतिनिधिसभाका चीनसम्बन्धी समिति, विदेश मामिला समिति र गुप्तचर समितिका रिपब्लिकन नेतृत्वले नोभेम्बर ४ मा हुआङलाई पत्र लेख्दै घटनाबारे जानकारी दिन आग्रह गरेका थिए । उनीहरूले एलिससँगको सम्बन्ध र एनभीडीयाको संवेदनशील सूचना सुरक्षासम्बन्धी व्यवस्थाबारे जानकारी दिन आग्रह गरेका हुन् । पत्रमा चीनले अमेरिकी संवेदनशील प्रविधि र सूचनामा पहुँच प्राप्त गरेको हुन सक्ने विषय राष्ट्रिय सुरक्षाका दृष्टिले गम्भीर रहेको उल्लेख गरिएको छ । अमेरिकी संसद्ले यस घटनाबाट राष्ट्रिय सुरक्षामा परेको सम्भावित जोखिमको वास्तविक अवस्था पत्ता लगाउनुपर्ने जनाएको छ । यसअघि अमेरिकी विदेशमन्त्री मार्को रुबियोले पनि हुआङ र एलिसबीचको सम्बन्धबारे अमेरिकी राष्ट्रपति डोनाल्ड ट्रम्प प्रशासनका उच्च अधिकारीहरूलाई जानकारी गराएको द न्युयोर्क टाइम्स ले जनाएको थियो । समाचारअनुसार ट्रम्पलाई पनि यस विषयमा जानकारी दिइएको थियो । तर, ट्रम्पले यसअघि यस विषयमा कुनै कदम नचालेको समाचारमा उल्लेख छ । आइतबार पत्रकारहरूसँग कुरा गर्दै ट्रम्पले हुआङलाई राम्रो व्यक्ति भन्दै उनको कामको प्रशंसासमेत गरेका थिए । उनले हुआङसँग त्यस दिन कुरा नभएको बताए पनि आफूले उनीसँग चीन भ्रमणमा जान सक्ने सम्भावनालाई अस्वीकार नगरेको बताएका थिए । अमेरिकी विदेशमन्त्री रुबियोले भने यो विषयमा टिप्पणी गर्न अस्वीकार गरेका छन् । उनले घटनाको संवेदनशील प्रकृति र कम्पनीभित्रको आन्तरिक विषय भएकाले यसबारे बोल्न नसक्ने बताएका थिए । चीन भन्छ– आरोप निराधार उता, चीनले भने जासुसीसम्बन्धी आरोप अस्वीकार गरेको छ । चिनियाँ पक्षले एलिस हुआङलाई चीनको गुप्तचर निकायले परिचालन गरेको भन्ने दाबीलाई निराधार र चीनलाई बदनाम गर्ने प्रयास रहेको बताएको हो । एनभीडीयाले यसअघि हुआङ र एलिसबीचको सम्बन्ध सामान्य व्यावसायिक सम्पर्क मात्रै रहेको बताउँदै आएको थियो । कम्पनीले आफ्ना प्रमुखले प्रत्येक वर्ष हजारौं ग्राहक कम्पनीका कार्यकारीहरूसँग भेटघाट गर्ने र एसियाका क्लाउड सेवा ग्राहकलाई सामान्य व्यावसायिक जानकारी मात्रै उपलब्ध गराउने गरेको जनाएको थियो । यस्ता खाले भेटघाटमा कम्पनीको व्यापारिक गोप्य सूचना वा अमेरिकी राष्ट्रिय सुरक्षासँग सम्बन्धित जानकारी आदानप्रदान नहुने कम्पनीको दाबी थियो । तर, पछिल्लो घटनाक्रमपछि कम्पनीले स्वतन्त्र छानबिन सुरु गर्ने निर्णय गरेको हो । नेतन्याहूलाई सत्ताच्युत गर्ने दाउमा आइजेनकोट मध्यावधि चुनावपछि मस्कलाई ४२० अर्ब डलर बढी घाटा कुवेतमा सद्दाम हुसेनको कब्जा र ४ दिन टिकेको ‘कुवेत गणराज्य’ बाइनान्स ह्याकमा उत्तर कोरियाको संलग्नता अस्वीकार जेनजी आन्दोलनको रापमा जर्मनी इजरायलको चुनावी नतिजा र अबका चुनौती चिनियाँ अर्बपतिहरूमा नागरिकता त्याग्नेको संख्या बढ्दै एम्बाप्पेको अभिव्यक्तिले ला–लिगाको ४० करोड युरोको कारोबार जोखिममा ब्राजिलमा लुलाको ऐतिहासिक जित, चौथो कार्यकाल अहिलेसम्मकै कठिन
आप्रवासन नीतिमा आवश्यकताभन्दा बढी कडाइ भएको ट्रम्पले स्वीकारोक्ति
काठमाडौं । अमेरिकी राष्ट्रपति डोनाल्ड ट्रम्पले आफ्नो सरकारले अवैध आप्रवासीविरुद्ध आवश्यकताभन्दा बढी कडा नीति अपनाएको स्वीकार गरेका छन् । सीबीएसको कार्यक्रम ‘६० मिनेट्स’लाई दिएको अन्तर्वार्तामा ट्रम्पले अमेरिकाको सीमा हुँदै अवैध रूपमा प्रवेश गर्ने मानिसको संख्या घटाउन आफ्नो प्रशासनले उल्लेखनीय सफलता हासिल गरेको दाबी गरे । यसका लागि आफूले ‘ए प्लस’ अंक पाउनुपर्ने उनको भनाइ थियो । यद्यपि, ठूलो संख्यामा आप्रवासीलाई देशबाट निष्कासन गर्ने नीतिका कारण आफूलाई राजनीतिक क्षति पुगेको पनि उनले स्वीकार गरे । गत मंगलबार सम्पन्न मध्यावधि निर्वाचनमा आप्रवासनको मुद्दा आफ्नो रिपब्लिकन पार्टीका लागि फाइदाजनक र हानिकारक दुवै बनेको ट्रम्पले बताए । उनले भने, ‘खराब मानिसहरूलाई देशबाट बाहिर निकाल्ने कामका लागि मैले निकै राम्रो अंक पाउनुपर्छ ।’ यता, अमेरिकी गृह सुरक्षा विभागले भने अवैध आप्रवासीविरुद्ध सरकारले अपनाउँदै आएको कडा नीतिबाट पछि नहट्ने स्पष्ट पारेको छ । मध्यावधि निर्वाचनकै दिन गरिएको सर्वेक्षणअनुसार मतदाताका लागि आप्रवासन तेस्रो सबैभन्दा महत्त्वपूर्ण मुद्दा बनेको थियो ।
चाडपर्वमा साइबर अपराधीको निशानामा बैंकिङ र ग्राहक, कसरी जोगिने ?
काठमाडौं । नेपालमा चाडपर्व नजिकिदै जाँदा विद्युतीय भुक्तानी तथा अनलाइन कारोबारमा उल्लेख्य वृद्धि हुने गरेको छ । कारोबारको चाप बढेसँगै साइबर अपराधीहरूले पनि यही अवसरको फाइदा उठाएर बैंकिङ प्रणाली, वित्तीय संस्था तथा सर्वसाधारणका व्यक्तिगत खातालाई निशाना बनाउन सक्ने जोखिम बढ्छ । यसै जोखिमलाई मध्यनजर गर्दै सूचना सुरक्षा प्रतिक्रिया टोली नेपाल (एनपीसर्ट) ले साइबर सेक्युरिटी एडभाइजरी-२०२६ जारी गर्दै बैंक तथा वित्तीय संस्था, भुक्तानी सेवा प्रदायक र आम उपभोक्तालाई उच्च सतर्कता अपनाउन आग्रह गरेको छ । एनपीसर्टद्वारा जारी साइबर सेक्युरिटी एडभाइजरअनुसार चाडपर्वका समयमा वित्तीय प्रणाली तथा व्यक्तिगत खातालाई लक्षित गरी फिसिङ, र्यान्समवेयर, र सूचना बन्धक बनाउने आक्रमण तथा सेवा अवरुद्ध पार्ने साइबर आक्रमणको जोखिम बढ्न सक्छ । साइबर सेक्युरिटी एडभाइजरीमा बैंक, वित्तीय संस्था, भुक्तानी प्रणाली सञ्चालक तथा विद्युतीय वित्तीय सेवा प्रदायकलाई पाँचवटा सुरक्षा उपाय अपनाउन सुझाव दिइएको छ । चौबीसै घण्टा सुरक्षा निगरानी: अनलाइन कारोबार तथा संस्थागत प्रणालीमा हुन सक्ने शङ्कास्पद गतिविधि तत्काल पहिचान गर्न चौबीसै घण्टा सुरक्षा निगरानी केन्द्र सक्रिय राख्नुपर्नेछ । यसबाट सम्भावित साइबर आक्रमण समयमै पहिचान गरी आवश्यक प्रतिकार्य गर्न सकिन्छ । फिसिङ र इमेल फिल्टरिङ: चाडपर्वका छुट, विशेष प्रस्ताव, उपहार तथा चिठ्ठाको प्रलोभन देखाएर पठाइने नक्कली विद्युतीय पत्र र सन्देशलाई संस्थागत प्रणालीमा प्रवेश गर्न नदिन प्रभावकारी छनोट तथा नियन्त्रण प्रणाली लागू गर्नुपर्नेछ । सिस्टम र एप अपडेट: सर्भर, भर्चुअल निजी सञ्जाल (भिपिएन) तथा मोबाइल बैंकिङ अनुप्रयोगमा देखिएका सुरक्षा कमजोरी हटाउन समयमै सुरक्षा अद्यावधिक गर्नुपर्नेछ । साथै, अनुप्रयोग सञ्चालनकै क्रममा सम्भावित जोखिम पहिचान तथा नियन्त्रण गर्ने आत्मसुरक्षा प्रविधि पनि प्रयोग गर्नुपर्नेछ । सुरक्षित तथ्याङ्क भण्डारण: वितरित सेवा अवरोध आक्रमणबाट अनलाइन सेवा सुरक्षित राख्न इन्टरनेट सेवा प्रदायकसँग समन्वय गरी आवश्यक प्रतिरक्षा प्रणाली सक्रिय गर्नुपर्नेछ । साथै, महत्त्वपूर्ण तथ्याङ्कको सुरक्षित तथा मुख्य सञ्जालबाट अलग राखिएको प्रतिलिपि तयार गर्नुपर्नेछ । कारोबार निगरानी: अस्वाभाविक, शङ्कास्पद तथा ठूलो रकमका कारोबारलाई स्वचालित रूपमा निगरानी गर्ने व्यवस्था मिलाउनुपर्नेछ । शङ्कास्पद गतिविधि देखिएमा तत्काल आवश्यक अनुसन्धान गरी सम्बन्धित खाता वा कारोबार रोक्ने व्यवस्था गर्नुपर्नेछ । साइबर सेक्युरिटी एडभाइजरीले चाडपर्वका समयमा वित्तीय ठगीबाट जोगिन सर्वसाधारणलाई पनि विशेष सतर्कता अपनाउन आग्रह गरेको छ । झुटा प्रस्ताव, उपहार र चिठ्ठाको प्रलोभनमा नपर्नुहोस्: सामाजिक सञ्जाल, छोटा सन्देश वा ह्वाट्सएपमार्फत आउने नगद फिर्ता, उपहार तथा चिठ्ठा परेको भन्दै पठाइएका शङ्कास्पद सन्देश र लिङ्कमा विश्वास नगर्ने । आधिकारिक स्रोतबाट पुष्टि नगरी त्यस्ता लिङ्क नखोल्नुहोस् र व्यक्तिगत विवरण उपलब्ध नगराउने । एकपटक प्रयोग हुने सङ्केत, गोप्य सङ्केत नम्बर सुरक्षित राख्नुहोस्: कुनै पनि बैंक वा विद्युतीय भुक्तानी सेवाले फोन वा सन्देशमार्फत एकपटक प्रयोग हुने सङ्केत, व्यक्तिगत गोप्य सङ्केत नम्बर वा कूटशब्द माग्दैनन् । त्यसैले यस्ता विवरण कसैलाई पनि उपलब्ध नगराउने। आफूलाई बैंक कर्मचारी बताउने अपरिचित व्यक्तिले मागेमा समेत त्यस्ता विवरण नदिने। सार्वजनिक निःशुल्क इन्टरनेट प्रयोग गरेर बैंकिङ कारोबार नगर्नुहोस्: बसपार्क, क्याफे तथा अन्य सार्वजनिक स्थानमा उपलब्ध खुला ताररहित इन्टरनेट सञ्जाल प्रयोग गरी मोबाइल बैंकिङ वा अनलाइन भुक्तानी नगर्ने । वित्तीय कारोबारका लागि सुरक्षित तथा विश्वासिलो इन्टरनेट सञ्जाल प्रयोग गर्ने । यदि तपाईं शङ्कास्पद अनलाइन गतिविधि, नक्कली सन्देश वा बैंकिङ ठगीको सिकार हुनुभयो भने ढिलाइ नगरी सम्बन्धित बैंक तथा वित्तीय संस्थामा सम्पर्क गर्नुपर्छ । आवश्यकताअनुसार आफ्नो खाता, भुक्तानी सेवा वा सम्बन्धित कारोबार तत्काल रोक्न अनुरोध गर्ने । त्यसपछि घटनासम्बन्धी प्रमाण, सन्देश, कारोबार विवरण तथा अन्य आवश्यक जानकारी सुरक्षित राखी नेपाल प्रहरीको साइबर ब्युरोमा उजुरी दर्ता गराउने ।
पुस ११ र १२ गते साङ्ग्रिला साहित्य महोत्सव आयोजना हुने, ६ चर्चित लेखक सहभागी हुँदै
काठमाडौं । साहित्य, कला तथा सङ्गीतको उत्सवका रूपमा साङ्ग्रिला साहित्य महोत्सवको पहिलो संस्करण आगामी पुस ११ र १२ गते ललितपुरस्थित होटल हिमालयमा आयोजना हुने भएको छ । काठमाडौं साङ्ग्रिला फाउन्डेसनको आयोजनामा हुने दुई दिने महोत्सवले साहित्य, कला, सिर्जनशीलता तथा सांस्कृतिक आदानप्रदानलाई प्रवर्द्धन गर्ने लक्ष्य राखेको छ । महोत्सवमा लेखक, साहित्यकार, कलाकार, पाठक तथा संस्कृतिप्रेमीलाई एकै ठाउँमा ल्याएर विभिन्न विषयमा संवाद तथा विचार आदानप्रदान गरिनेछ । महोत्सवका निर्देशक केन सुवेदीका अनुसार भारतका ६ जना चर्चित लेखक सहभागी हुनेछन् । सहभागी हुने लेखकमा मनु जोसेफ, रुचिर जोशी, जेरी पिन्टो र सतीश पद्मनाभनलगायत रहेका छन् । महोत्सवमा साहित्य, दृश्य कला तथा प्रदर्शनकारी कलासँग सम्बन्धित अन्तरक्रियात्मक सत्र सञ्चालन गरिनेछ । पुस्तक, संस्कृति र समाजका विविध पक्षमा समेत छलफल हुनेछ । संवाद, कलात्मक प्रस्तुति तथा सांगीतिक कार्यक्रममार्फत विभिन्न विधाबीच सहकार्य र अन्तरसम्बन्ध विस्तार गर्ने आयोजकको उद्देश्य छ । आयोजकका अनुसार महोत्सवका विषयगत छलफल दुईवटा हलमा एकैसाथ सञ्चालन हुनेछन् । उद्घाटन समारोहमा विभिन्न सांस्कृतिक नृत्य प्रस्तुत गरिनेछ भने समापन समारोहमा वाद्यवादनसहितको सांगीतिक प्रस्तुति रहनेछ । महोत्सवमा पुस्तक प्रदर्शनीका लागि विभिन्न स्टल राखिनेछन् । साथै, पुस्तकमा हस्ताक्षर गर्ने कार्यक्रममार्फत पाठकले लेखकसँग प्रत्यक्ष भेटघाट तथा अन्तरक्रिया गर्ने अवसर पाउनेछन् । महोत्सवका छलफल सत्रमा बालसाहित्य, महिला साहित्य, सीमान्तकृत समुदायको साहित्य, युवा साहित्य, अनुवाद, कृत्रिम बौद्धिकता तथा कवितालगायत विषय समेटिनेछन् । नेपालको सांस्कृतिक तथा प्राकृतिक वैभवलाई विश्वसामु चिनाउँदै देश तथा विदेशका साहित्यकार र कलाकारलाई एउटै मञ्चमा जोड्ने उद्देश्यले महोत्सव आयोजना गर्न लागिएको आयोजकले जनाएको छ । महोत्सवले पठन संस्कृतिको विकास, सिर्जनात्मक अभिव्यक्तिको प्रवर्द्धन तथा सांस्कृतिक आदानप्रदानलाई प्रोत्साहन गर्ने अपेक्षा गरिएको छ । यसअघि आयोजकले एक वर्षसम्म साहित्यसम्बन्धी संवाद कार्यक्रम ‘साङ्ग्रिला संवाद’ सञ्चालन गरेको थियो । सोही कार्यक्रमको निरन्तरताका रूपमा पहिलो पटक दुई दिने साहित्य महोत्सव आयोजना गर्न लागिएको हो । महोत्सवमा सहभागी हुन प्रवेश निःशुल्क रहने आयोजकले जनाएको छ । कार्यक्रमका विषयवस्तु तथा सहभागी लेखक र कलाकारको विस्तृत विवरण पछि सार्वजनिक गरिनेछ ।
घोप्टेभिरमा पहिरो, पृथ्वी राजमार्ग अवरुद्ध
काठमाडौं । पृथ्वी राजमार्गअन्तर्गत कुरिनटारनजिकै घोप्टेभिरमा पहिरो खसेपछि सडक अवरुद्ध भएको छ । बिहान सुक्खा पहिरो खस्दा राजमार्गको दुवैतर्फको आवागमन ठप्प भएको नागढुङ्गा–मुग्लिन सडक योजना पश्चिम खण्डले जनाएको छ । पहिरो हटाउन आवश्यक मेसिन तथा उपकरण परिचालन गरिसकिएको छ । पहिरो पन्छाउन करिब तीन घण्टा लाग्ने योजनाले जनाएको छ ।
