एनपीएलमा आज कर्णाली-पोखरा र चितवन-काठमान्डु भिड्दै
काठमाडौं । नेपाल प्रिमियर लिग (एनपीएल) क्रिकेटको तेस्रो संस्करणअन्तर्गत आज दुई खेल हुँदैछन् । कीर्तिपुरस्थित त्रिवि क्रिकेट मैदानमा हुने पहिलो खेलमा कर्णाली याक्स र पोखरा एभेन्जर्सबीच प्रतिस्पर्धा हुनेछ भने दोस्रो खेलमा चितवन राइनोज र काठमाडौं गोर्खाज आमनेसामने हुनेछन् । आजको पहिलो खेलमा कर्णाली र पोखरा दुवै टोली जित निकाल्दै प्लेअफमा पुग्ने सम्भावना कायम राख्ने लक्ष्यसहित मैदान उत्रनेछन् । चार खेलबाट दुई जित र दुई हारसहित चार अंक जोडेको कर्णाली तालिकाको छैटौँ स्थानमा छ । पोखरा भने पहिलो जितको खोजीमा हुनेछ । चार खेल खेलेको पोखराले अहिलेसम्म कुनै पनि खेल जित्न सकेको छैन । यी दुई टोलीबीचको खेल दिउँसो साढे १२ बजे सुरु हुनेछ । आजै हुने दोस्रो खेलमा चितवन राइनोज र काठमाडौं गोर्खाज भिड्नेछन् । दुवै टोली जित निकाल्दै अंकतालिकामा आफ्नो स्थान सुधार गर्ने लक्ष्यमा हुनेछन् । चार खेलबाट तीन जित र एक हारसहित चार अंक जोडेको काठमाडौं तालिकाको दोस्रो स्थानमा छ । चितवनले चार खेलबाट दुई जित र एक हारसहित पाँच अंक जोडेको छ । एक खेल भने वर्षाका कारण रद्द भएको थियो । चितवन तालिकाको चौथो स्थानमा रहेको छ । यी दुई टोलीबीचको खेल साँझ ५ बजे सुरु हुनेछ ।
तिहारको चौथो दिन आज गाईको पूजा
काठमाडौं । तिहारको चौथो दिन आज गाईको पूजा गरी मीठा परिकार खान दिएर मनाइँदैछ । हिन्दू धर्ममा गाईलाई पवित्र जनावरका रूपमा पूजा गर्ने परम्परा रहिआएको छ । गाईको दूध आमाको दूधजत्तिकै पोषिलो हुने विश्वासका कारण गाईलाई गौमाताका रूपमा सम्मान गरिन्छ । दूध, गोबर र गहुँत प्राप्त हुने भएकाले पनि धार्मिक तथा सांस्कृतिक रूपमा गाईको विशेष महत्व रहेको छ । धार्मिक मान्यताअनुसार विधिपूर्वक गाईको पूजा गरी मीठा परिकार खान दिँदा पुण्य प्राप्त हुने विश्वास छ । नेपालका केही स्थान तथा समुदायमा कात्तिक कृष्ण औँसीकै दिन गाईपूजा गर्ने चलन रहे पनि शास्त्रीय मान्यताअनुसार औँसीको अन्त्य र प्रतिपदाको सुरुआतमा गाईपूजा गर्ने परम्परा छ । वैदिक सनातन हिन्दू धर्मावलम्बीले विभिन्न धार्मिक कार्यमा गाईदान गर्ने परम्परासमेत अपनाउँदै आएका छन् । पछिल्लो समय गाईको अभावमा सङ्कल्प गरेर रकम राख्ने चलन बढेको धर्मशास्त्रका जानकार प्रा. डा. रामचन्द्र गौतमले बताएका छन् । गाईलाई राष्ट्रिय जनावरका रूपमा समेत सम्मान गरिएको छ । धार्मिक विश्वासअनुसार आज गाईको पूजा गरी साउन शुक्ल पूर्णिमाका दिन दाहिने हातमा बाँधिएको रक्षाबन्धन गाईको पुच्छरमा बाँधिदिएमा मृत्युपछि गाईले वैतरणी नदी तारेर स्वर्ग पुर्याउने मान्यता रहिआएको छ ।
लक्ष्मीपूजाका दिन विद्युत् माग १ हजार ८१३ मेगावाट पुग्यो
काठमाडौं । यस वर्षको लक्ष्मीपूजाका दिन नेपालको विद्युत् प्रणालीमा अधिकतम माग (पिक लोड) १ हजार ८१३ मेगावाट पुगेको छ । नेपाल विद्युत् प्राधिकरणका अनुसार लक्ष्मीपूजाको बेलुका ६ बजेर १५ मिनेटमा राष्ट्रिय प्रणालीमा यो पिक लोड रेकर्ड गरिएको हो । उक्त समयमा देशभित्रको कुल विद्युत् उत्पादन २ हजार ४००.३० मेगावाट रहेको थियो । आन्तरिक माग सहज रूपमा पूरा गरेसँगै बाँकी रहेको ५८७.३० मेगावाट विद्युत् भारत र बंगलादेशतर्फ निर्यात गरिएको प्राधिकरणले जनाएको छ । पछिल्लो समय जलविद्युत् उत्पादन क्षमतामा थप वृद्धि हुँदै गएका कारण चाडपर्वका बेलासमेत आन्तरिक आवश्यकता धानेर अतिरिक्त ऊर्जा विदेश पठाउन सकिने अवस्था सुदृढ बन्दै गएको छ । प्राधिकरणको विवरण अनुसार पिक लोडको समयमा निजी क्षेत्रका जलविद्युत् आयोजनाबाट १ हजार ५३६.५० मेगावाट विद्युत् उत्पादन भएको थियो । यस्तै, प्राधिकरणका सहायक कम्पनीहरूबाट ४९९.२० मेगावाट, प्राधिकरणका आफ्ना जलाशय तथा नदी प्रवाही (आरओआर र पीआरओआर) आयोजनाहरूबाट ३४२.३० मेगावाट र स्टोरेज आयोजनाबाट २२.३० मेगावाट विद्युत् उत्पादन भएको थियो । यसैबीच, लक्ष्मीपूजाको साँझ मात्रै काठमाडौं उपत्यकाको अधिकतम विद्युत् माग ४८९.५० मेगावाट पुगेको उल्लेख गरिएको छ । माग व्यवस्थापनमा गरिएको पूर्वतयारीका कारण यस वर्षको लक्ष्मीपूजाको दिन विद्युत् प्रणालीमा कुनै पनि अवरोध (पावर इन्टरप्सन) नभएको र यस अवधिमा प्रणालीको फ्रिक्वेन्सी ५०.१२० हर्ज स्थिर रहेको प्राधिकरणले स्पष्ट पारेको छ । अघिल्लो वर्षको लक्ष्मीपूजाको तुलनामा यस वर्ष विद्युत्को माग ६८ मेगावाट्ले बढेको छ । गत वर्षको लक्ष्मीपूजामा १ हजार ७४५ मेगावाट विद्युत् खपत भएको थियो । ऊर्जा, जलस्रोत तथा सिँचाइ मन्त्री विराज भक्त श्रेष्ठले प्राकृतिक विपद्का कारण प्रणालीमा ठूलो क्षति पुगेको अवस्थामा पनि विद्युतको उच्चतम माग व्यवस्थापन गर्न सफल भएकोमा प्राधिकरणका कर्मचारी, व्यवस्थापन र आम उपभोक्तालाई धन्यवाद दिए । मन्त्री श्रेष्ठ आइतबार साँझ ऊर्जा सचिव, प्राधिकरण सञ्चालक समितिका सदस्य तथा प्राधिकरणका उच्च व्यवस्थापनकसहित प्राधिकरणको भार प्रेषण केन्द्रमा पुगेर विद्युतको माग र आपूर्तिको अवस्थाबारे जानकारी लिएका थिए । उनले विगत तीन वर्षको लक्ष्मीपूजाको दिनको विद्युत् माग र आपूर्तिको तथ्यांक विश्लेषण गर्दै यस वर्ष चुनौतीपूर्ण परिस्थितिमा समेत माग व्यवस्थापन हुनु सकारात्मक उपलब्धि भएको बताए । उहाँले विद्युतको सुरक्षित र मितव्ययी प्रयोग गर्दै उज्यालोको पर्व मनाएकोमा उपभोक्तालाई धन्यवाद दिँदै नियमित र भरपर्दो विद्युत् आपूर्तिका लागि अहोरात्र खटिने कर्मचारीको योगदानको प्रशंसा गरे । आगामी दिनमा पनि विद्युत् आपूर्तिलाई सुरक्षित, भरपर्दो र नियमित बनाउन उत्तिकै प्रतिबद्धताका साथ काम गर्न उनले सम्बन्धित निकायलाई आग्रह गरे । लक्ष्मीपूजाका दिनमा खपत विद्युतको पछिल्लो ३ वर्षको विवरण :
आईएमई लाइफको जीवन बीमा कोष १९ अर्ब ९७ करोडमाथि
काठमाडौं । आइएमई लाइफ इन्स्योरेन्स कम्पनीको चालु आर्थिक वर्ष २०८३/८४ को पहिलो त्रैमास (साउन–असोज) सम्ममा जीवन बीमा कोषमा १९ अर्ब ९७ करोड ७९ लाख रुपैयाँ रहेको छ । अघिल्लो आवको यही अवधिसम्म जीवन बीमा कोषमा १४ अर्ब १८ करोड ६२ लाख रुपैयाँ थियो । अघिल्लो आवको तुलनामा समीक्षा अवधिमा कम्पनीको जीवन बीमा कोषको आकार ४०.८३ प्रतिशतले बढेको छ । समीक्षा अवधिमा कम्पनीले २ अर्ब २३ करोड ३७ लाख रुपैयाँ कुल बीमाशुल्क आर्जन गरेको छ । अघिल्लो आवमा कम्पनीले १ अर्ब ५९ करोड ५ लाख रुपैयाँ कुल बीमाशुल्क आर्जन गरेको थियो । अघिल्लो वर्षको तुलनामा समीक्षा वर्षमा कम्पनीको कुल बीमाशुल्क आर्जन ४०.४४ प्रतिशतले बढेको छ । त्यस्तै, असोजसम्ममा कम्पनीले २ अर्ब १८ करोड ८५ लाख रुपैयाँ खुद बीमाशुल्क आर्जन गरेको छ । अघिल्लो आवको यही अवधिमा कम्पनीले १ अर्ब ५३ करोड ६३ लाख रुपैयाँ खुद बीमाशुल्क आर्जन गरेको थियो । अघिल्लो आवको तुलनामा कम्पनीको खुद बीमा शुल्क आर्जन ४२.४५ प्रतिशतले बढेको छ । समीक्षा अवधिमा कम्पनीको महाविपत्ति कोषमा ३२ करोड ८८ लाख रुपैयाँ, रिटेन्ड अर्निङमा ८१ करोड ६४ लाख रुपैयाँ र अन्य इक्विटीमा २८ करोड ९६ लाख रुपैयाँ रहेको छ । अघिल्लो आवको यही अवधिमा कम्पनीको महाविपत्ति कोषमा ३२ करोड १२ लाख रुपैयाँ, रिटेन्ड अर्निङमा ७१ करोड ३३ लाख रुपैयाँ र अन्य इक्विटीमा २२ करोड ४६ लाख रुपैयाँ थियो । समीक्षा अवधिमा कम्पनीले १४ करोड १२ लाख रुपैयाँ नाफा आर्जन गरेको छ । अघिल्लो आवको यही अवधिमा कम्पनीले १५ करोड ८३ लाख रुपैयाँ नाफा आर्जन गरेको थियो । अघिल्लो आवको तुलनामा समीक्षा अवधिमा कम्पनीको नाफा १०.७८ प्रतिशतले घटेको छ ।
प्रभु महालक्ष्मीको नाफा ४५.८९ प्रतिशतले बढ्यो
काठमाडौं । प्रभु महालक्ष्मी लाइफ इन्स्योरेन्स कम्पनीले चालु आर्थिक वर्ष २०८३/८४ को पहिलो त्रैमास (साउन–असोज) सम्ममा ९ करोड ३० लाख रुपैयाँ नाफा आर्जन गर्न सफल भएको छ । कम्पनीले अघिल्लो आवको यही अवधिमा ६ करोड ३७ लाख रुपैयाँ नाफा आर्जन गरेको थियो । अघिल्लो आवको तुलनामा समीक्षा अवधिमा कम्पनीको नाफा ४५.८९ प्रतिशतले बढेको छ । समीक्षा अवधिमा कम्पनीले १ अर्ब ८८ करोड १ लाख रुपैयाँ कुल बीमाशुल्क आर्जन गरेको छ । अघिल्लो आवको यही अवधिमा कम्पनीले १ अर्ब ४४ करोड ३५ लाख रुपैयाँ कुल बीमाशुल्क आर्जन गरेको थियो । अघिल्लो आवको तुलनामा समीक्षा अवधिमा कम्पनीको कुल बीमाशुल्क आर्जन ३०.२५ प्रतिशतले बढेको छ । त्यस्तै, अवधिमा कम्पनीले १ अर्ब ८१ करोड ६ लाख रुपैयाँ खुद बीमाशुल्क आर्जन गरेको छ । अघिल्लो आवको यही अवधिमा कम्पनीको खुद बीमा शुल्क १ अर्ब ३८ करोड ९६ लाख रुपैयाँ कमाएको थियो । अघिल्लो आवको तुलनामा कम्पनीको खुद बीमा शुल्क ३०.३० प्रतिशतले बढेको छ । ५ अर्ब ३० करोड ७७ लाख रुपैयाँ चुक्तापुँजी रहेको कम्पनीको महाविपत्ति कोषमा १५ करोड ८३ लाख रुपैयाँ रहेको छ । अघिल्लो आवको यही अवधिमा कम्पनीको महाविपत्ति कोषमा १४ करोड ८५ लाख रुपैयाँ थियो । त्यस्तै, रिटेन्ड अर्निङमा ५१ करोड ७० लाख रुपैयाँ र अन्य इक्विटीमा ३७ करोड ६१ लाख रुपैयाँ रहेको छ । अघिल्लो आवको यही अवधिमा कम्पनीको रिटेन्ड अर्निङमा ४२ करोड ८२ लाख रुपैयाँ र अन्य इक्विटीमा २८ करोड ३७ लाख रुपैयाँ थियो । समीक्षा अवधिमा कम्पनीको जीवन बीमा कोषमा १९ अर्ब ७१ करोड ८६ लाख रुपैयाँ रहेको छ । अघिल्लो आवको यही अवधिसम्ममा जीवन बीमा कोषमा १४ अर्ब ८४ करोड ६८ लाख रुपैयाँ थियो । अघिल्लो आवको तुलनामा कम्पनीको जीवन बीमा कोषको आकार ३२.८१ प्रतिशतले बढेको छ ।
सामाजिक सुरक्षा भत्तामा ३१ लाख हिनामिना, वडाध्यक्षसहित पाँच जनाविरुद्ध मुद्दा
काठमाडौं । सामाजिक सुरक्षा भत्ता वितरणमा अनियमितता गरी ३१ लाख ६७ हजार २०० रुपैयाँ हिनामिना गरेको आरोपमा अख्तियार दुरुपयोग अनुसन्धान आयोगले पाँच जनाविरुद्ध भ्रष्टाचार मुद्दा दायर गरेको छ । आयोगले ओखलढुंगाको लिखु गाउँपालिका–९ मा आर्थिक वर्ष २०७५/७६ र २०७६/७७ मा सामाजिक सुरक्षा भत्ता वितरण गर्दा अनियमितता गरेको आरोपमा तत्कालीन प्रमुख प्रशासकीय अधिकृत, निमित्त प्रमुख प्रशासकीय अधिकृत, वडा अध्यक्ष र एमआईएस अपरेटरविरुद्ध विशेष अदालत काठमाडौंमा आरोपपत्र दायर गरेको हो । आयोगका अनुसार तत्कालीन वडा अध्यक्ष शुकवीर तामाङले आफ्नो दायाँ हातको बुढीऔँलाको छाप ३६० पटक प्रयोग गरी २९ लाख १५ हजार २०० रुपैयाँ भुक्तानी लिएको देखाइएको छ । यसका लागि अन्य प्रतिवादीसँग पूर्वसहमति र मिलेमतो भएको अख्तियारको आरोप छ । त्यस्तै, सामाजिक सुरक्षा भत्ता वितरण गर्दा दोहोरो नाम समावेश गर्ने, मृत्यु भइसकेका लाभग्राहीको लगत कट्टा नगर्ने तथा बसाइँसराइ गरी अन्यत्र गइसकेका लाभग्राहीको विवरण अद्यावधिक नगरी भत्ता वितरण गरेको देखाएर थप २ लाख ५२ हजार रुपैयाँ अनियमितता गरेको आयोगले जनाएको छ । यसरी गलत विवरणसहितको अभिलेख तयार गरी पेश्की फर्छ्योट गराएर कुल ३१ लाख ६७ हजार २०० रुपैयाँ हिनामिना गरेको अनुसन्धानबाट पुष्टि भएको अख्तियारको दाबी छ । आयोगले तत्कालीन प्रमुख प्रशासकीय अधिकृत ओमबहादुर दर्जीविरुद्ध ९ लाख ५३ हजार ६०० रुपैयाँ, अभयकुमार गुप्ताविरुद्ध ११ लाख ६७ हजार २०० रुपैयाँ र निमित्त प्रमुख प्रशासकीय अधिकृत दिनानाथ चौधरीविरुद्ध ७ लाख ९४ हजार ४०० रुपैयाँ बिगो कायम गरी मुद्दा दायर गरेको छ । त्यस्तै, तत्कालीन वडा अध्यक्ष शुकवीर तामाङ र एमआईएस अपरेटर खिला विकविरुद्ध जनही ३१ लाख ६७ हजार २०० रुपैयाँ बिगो कायम गरिएको छ । अख्तियारले प्रतिवादीहरूविरुद्ध भ्रष्टाचार निवारण ऐनअनुसार कैद तथा बिगोबमोजिम जरिवाना गर्न र बिगो असुलउपर गर्न मागदाबी लिएको छ । साथै, सरकारी अभिलेखमा रहेको विवरण तथा कागजात सच्याउने, थपघट गर्ने र हेरफेर गर्ने कार्य गरेको आरोपमा थप सजायको मागसमेत गरिएको आयोगले जनाएको छ । आयोगका प्रवक्ता सुरेश न्यौपानेले कात्तिक २० गते जारी गरेको प्रेस विज्ञप्तिअनुसार आरोपपत्र विशेष अदालत काठमाडौंमा दायर गरिएको हो ।
अच्युत खरेलका दुवै नियुक्ति खुमबहादुरबाट
काठमाडौं । बालेन सरकारले प्रहरी महानिरीक्षक (आईजीपी) दानबहादुर कार्कीलाई पदमुक्त गरेपछि धेरैले पूर्व आईजीपी अच्युतकृष्ण खरेललाई सम्झिए । र, खरेलझैं कार्की पनि पुनः आईजीपीमा फर्किने विश्लेषण गर्दैछन् । ३० वर्ष पुरानो खरेल प्रकरण के थियो ? कसरी आईजीपीबाट पदमुक्त भए ? कसरी पुनः आईजीपीमा नियुक्त भए ? खोज्दा तथ्यहरू निकै रोचक भेटिए । तत्कालीन गृहमन्त्री खुमबहादुर खड्काले खरेललाई आईजीपी बनाए । खड्कापछिका गृहमन्त्री बामदेव गौतमले उनलाई पदमुक्त गरे । ८ महिनापछि फेरि सरकार परिवर्तन भयो । गृहमन्त्रीमा खड्का फर्किए । खड्काले आईजीपीमा पुनः खरेललाई नियुक्ति गरे । अच्यूतकृष्ण खरेलले आत्मकथामा धेरै रोचक कुरा लेखेका छन् । वि.सं २०५३ साल माघ महिनाको घटना हो । प्रधानमन्त्री शेरबहादुर देउवा थिए, गृहमन्त्री खुमबहादुर खड्का । एकैदिन एआईजी बनेका अच्युतकृष्ण खरेल र ध्रुबबहादुर प्रधानबीच आईजीपी बन्ने दौडधूप चलिरहेको थियो । एक जना पत्रकारले एआईजी खरेललाई फोन गरेर शंकरदेव क्याम्पस अगाडि भेट्न बोलाए । एआईजी खरेल पत्रकारले बोलाएकै ठाउँमा पुगे । खरेल आफैले हाँकेको गाडीमा ती प्रभावशाली पत्रकार चढे । उनी बेनामी छन् । खरेलले गाडी थापाथली, पुल्चोक, सातदोबाटो, कोटेश्वर, गौशाला, महाराजगञ्ज हुँदै फेरी पुतलीसडक शंकरदेव क्याम्पस अगाडि पुर्याए । यस यात्रामा धेरै कुरा भए, त्यसमध्ये मुख्य दुई कुरा भएछन् । पहिलो, आईजीपी बनाउने ग्यारेन्टीसहित नेतालाई घुस खुवाउन २० लाख रुपैयाँ माग गरे पत्रकारले । दोस्रो, एआईजी खरेलले पत्रकारको प्रस्ताव अस्वीकार गर्न सकेनन् । खरेलले किताबको २६२ पृष्ठमा लेखेका छन्– ‘आईजीपी हुन २० लाख रुपैयाँ ठूलो कुरा होइन । दिन नसकिने पनि होइन । जग्गा जमिन छँदै थियो । एउटा टुक्रा बेचेर पनि सजिलै २० लाख जुगाड गर्न सकिन्थ्यो ।’ पत्रकारको प्रस्तावपछि आफू रन्थनिएको र उक्त प्रस्ताव सिधै अस्वीकार गर्न पनि नसकेको उल्लेख गरेका छन् । यस विषयमा छलफल गर्न उक्त पत्रकारसँग तीन पटकसम्म भेटर कुरा गरेको र फोनमा समेत संवादहरू भएको उल्लेख गरेको छन् । तर, खरेलले २० लाख घुस माग्ने पत्रकारको नाम सार्वजनिक गरेका छैनन् । खरेल वि.सं २०५३ फागुन १५ गते आईजीपीमा नियुक्त भए । वि.सं २०५३ फागुन २५ गते देउवा नेतृत्वको सरकार ढल्यो । फागुन २७ गते प्रधानमन्त्री लोकेन्द्र बहादुर चन्दको नेतृत्वमा नयाँ मन्त्रिपरिषद् गठन भयो । बामदेव गौतम गृहमन्त्री भए । सरकार गठन लगत्तै गृहमन्त्री गौतम र खरेलबीच मन फाट्यो । आत्मकथामा यसबारे लामो व्याख्या छ । वि.सं २०५३ चैत ७ गते साँझ प्रहरी महानिरीक्षकको हैसियतमा खरेलले राजा वीरेन्द्रलाई भेटे । खरेलसँग राजाले नयाँ ‘पोल’ खोलिदिए । ‘गृहमन्त्रीको प्रस्तावमा प्रधानमन्त्रीले तपाईंलाई आईजीपीबाट हटाउन लागेका रहेछन् । मैले यसो गर्नु हुँदैन भनेर पठाइदिएँ’ पृष्ठ २७१ मा लेखिएको छ । २०५३ चैत १९ गते राति पूर्वडीएसपी समेत रहेका खरेलका छिमिकी एवं शुभचिन्तक नरहरि सङ्ग्रौलाले आईजीपीलाई फोन गरे । उनी एमाले निकट थिए र सोही दिन पार्टी कार्यलय गएको सुनाए । र, नयाँ कुरा पनि भने– ‘छिट्टै २५ लाख तयार गर्नुस्, है । होइन भने पुलिसमा पहिरो जान्छ ।’ फोनमा यति भनेपछि सङ्ग्रौलाले कुरा टुङ्ग्याए । खरेलले १२ दिनअघि राजा विरेन्द्रले भनेको कुरा सम्झिए । सङ्ग्रौलाले २५ लाख तयार गर्नु भने । खरेलले नाइँ पनि भनेनन्, ल पनि भनेनन् । ३ दिनपछि अर्थात चैत २२ गते विहानै खरेलले खबर पाए– ‘सरकारले मलाई राष्ट्रिय अनुसन्धान विभाग प्रमुखमा सरुवा गरेर धुव्रबहादुर प्रधानलाई नयाँ आईजीपी नियुक्त गर्यो ।’ सरुवाको निर्णय उल्ट्याउन खरेलले धेरै कसरत गरे । राजदरवारका सैनिक सचिव शान्तकुमार मल्लमार्फत राजा वीरेन्द्रसम्म लविङ गरे । तत्कालीन मन्त्रिपरिषद्का परराष्ट्रमन्त्री प्रकाश चन्द्र लोहनीदेखि एमाले अध्यक्ष मनमोहन अधिकारसम्म भेटे, आफ्ना कुरा गरे । तर, केही लागेन । खरेललाई अनुसन्धान विभागमा काम गर्दा मासिक ३० लाख रुपैयाँसम्मको लाभ गराउनेदेखि अमेरिकाको राजदूत बनाउनेसम्मको प्रस्ताव गरियो । यस्तो लाभको प्रस्ताव ल्याउनेको सूचीमा पूर्वन्यायाधीश प्रचण्डराज अनिल, एमाले नेता सीपी मैनाली, पत्रकार देवप्रकाश त्रिपाठी, राष्ट्रिय अनुसन्धान विभागका सेकेन्डम्यान हरिबहादुर चौधरीसम्मको नाम उल्लेख गरेका छन् । यस्तो लाभको प्रस्तावसँगै एउटा सर्त थियो– ‘सरकारविरुद्ध अदालतमा मुद्दा नहाल्ने । तर, खरेलले मानेनन् । उनले चैत २६ गते राष्ट्रिय अनुसन्धान विभाग प्रमुखमा गरिएको नियुक्ति बदरको माग गर्दै सर्वोच्च अदालतमा रिट निवेदन दर्ता गराए । आत्मकथा पुस्तकमा खरेलले आफू धेरै अनुशाषित र निष्ठावान फौजीको रूपमा उभ्याउने प्रयास गरेका छन् । तर, अदालतमा हालेको मुद्दालाई प्रभावित बनाउन र आफ्नो पक्षमा फैसला गराउन खरेलले सक्दो प्रयास गरेको देखिन्छ र आफूलाई उदाङ्गो बनाएका छन् । प्रधानन्यायाधीश त्रिलोकप्रताप राणा र ओमभक्त श्रेष्ठको कार्यकालभर हरसम्भव कोसिस गरेको, चिनेजानेका मान्छे गुहारेको, भनसुन गराएको तर अदालती महाराजाका अगाडि कसैको केही नलागेको उनले आत्मकथामा खुलस्त लेखेका छन् । राजाको निजी सचिव सुदन पोखरेलले आफूलाई धेरै रुचाउने गरेको, सुदनकी दिदी पर्नेसँग न्यायाधीश केशव उपाध्यायले विवाह गरेको, दरवारका सचिव सुधन पोखरेलले भिनाजु नाता जोडेर मुद्दा हेरिरहेका न्यायाधीश केशव उपाध्यायसँग भेटेको, अच्युतलाई न्याय दिलाउनु भनेको र न्यायाधीशले अच्युतलाई अन्याय परेकोले न्याय दिलाउने बताएको, न्यायाधीश केशवसँग अत्यन्तै निकट रहेका तत्कालीन अर्का न्यायाधीश रामहरि फुयाल मार्फत पनि लविङ गरेको, सोही मुद्दा हेरिरहेका अर्का न्यायाधीश मोहनप्रसाद शर्माको घर कमलपोखरी पुगेर लविङ गरेको, मोहन प्रसादको घरमा बसेर दुवै न्यायाधीशले फैसला लेख्नेसम्मको सहमति गरेको लेखेका छन् । तर, अन्तिममा अर्का न्यायाधीश केशव उपाध्याय मोहनको घरमा नगएपछि मोहनको श्रीमतीले घरमा बनाएको खाना खेर गएको, भोलिपल्ट असोज १० गतेको अदालतमा दुई न्यायाधीशबीच मत बाझिएको र फैसला हुन नसकेको विषयहरू विस्तृत रूपमा पुस्तकमा लेखिएको छ । अदालतमा मुद्दा लम्बियो । लोकेन्द्र बहादुर चन्द नेतृत्वको सरकार ढल्यो । असोज २१ गते प्रधानमन्त्री सूर्यबहादुर थापाको नेतृत्वमा नेपाली कांग्रेस र राप्रपाको गठबन्धनमा नयाँ सरकार बन्यो । नयाँ सरकार बन्ने तयारी हुँदै गर्दा आईजीपीमा आफूलाई पुर्नवहाली गराउने माग लिएर खरेलले हुनेवाला प्रधानमन्त्री सूर्यबहादुर थापा, उनका विश्वासपत्र नवराज सुवेदी, पूर्वप्रधानमन्त्री तथा कांग्रेस सभापति गिरिजाप्रसाद कोइराला, पूर्वप्रधानमन्त्री कृष्णप्रसाद भट्टराई र नयाँ सरकारमा प्रबल दावेदार मानिएको खुमबहादुर खड्कालगायत शक्तिशाली व्यक्तिहरूलाई घरघरमा गएर भेटेका थिए । सबैले आफूलाई आईजीपीमा पुर्नस्थापित गर्ने आश्वासन दिएको खरेलले किताबमा लेखेका छन् । तर, प्रधानमन्त्री सूर्यबहादुर थापाले बुद्धिमान तामाङलाई गृहमन्त्री बनाएपछि आफूलाई आईजीपीमा पुर्नस्थापित गराउने पहल कमजोर भएको खरेलको व्याख्या छ । यसअघि आईजीपी भएको समयमा बुद्धिमान तामाङले एउटा चोरलाई छुटाउन भनेका थिए तर खरेलले मानेनन् । त्यस विषयमा बुद्धिमान र खरेलबीच विवाद र बाझाबाझ भएको थियो । तर, तामाङ लामो समय गृहमन्त्रीमा टिकेनन् । मंसिर १८ गते मन्त्रिपरिषद् हेरफेर भयो । खुमबहादुर खड्का दोस्रो वरियताका गृहमन्त्री भए । खरेल खुशीले गदगद् बने । आत्मकथामा लेखिएअनुसार खड्का र खरेलबीच निकट सम्बन्ध थियो । खरेल खड्काको घरमा बारम्बार पुगिरहन्थे । २०५३ सालमा पनि खड्का गृहमन्त्री रहेकै बेलामा खरेल आईजीपीमा नियुक्त भएका थिए । वि.सं २०५४ सालमा पनि खड्का गृहमन्त्री भएको ८ दिनपछि अर्थात मंसिर २६ गते दोस्रो पटक आईजीपीमा नियुक्त भए । ‘सरुवा भएको ८ महिनापछि म दोस्रो पटक आईजीपीको फुली लगाएर हेडक्वार्टर फर्कें’ खरेलले लेखेका छन् । पछि, २०५५ असार १९ गते सर्वोच्च अदालतले पनि खरेलको मुद्दाको पक्षमा फैसला गर्यो । जतिबेला राजनीतिक नियुक्तीबाट उनी आईजीपी भइसकेका थिए । अन्तिममा अदालतबाट आफ्नो पक्षमा फैसला आएको तर अदालतको आदेशमा आईजीपीको फूली लगाउने आफ्नो इच्छा पुरा नभएको पनि खरेलले लेखेका छन् । आईजीपी नियुक्त हुन र पद टिकाइ राख्न दुई पटक गरेर आफूसँग ४५ लाख रुपैयाँ माग गरिएको तर दुवै पटक आफूले घुस नखुवाएको उनको दावी आत्मकथामा छ । अर्को रोचक दाबी पनि छ । नियुक्ति पूर्वपत्रकारले माग गरेको २० लाख रुपैयाँ पनि बामदेव गौतमको नाममा माग भएको र छिमेकीले २५ लाख रुपैयाँ पनि वामदेवकै नाममा माग गरेको दाबी खरेलको छ । विसं २०५० को दशकमा सबैभन्दा भ्रष्ट नेताहरूको चर्चामा आउने नाम हुन् खुमबहादुर खड्का र वामदेव गौतम । खड्कालाई सर्वोच्च अदालतले २०६९ सालमा भ्रष्टाचार मुद्दामा दोषी नै ठहर गर्यो । उनी जेल पनि परे । तिनै भ्रष्ट छविका खड्काले घुस नखाई खरेललाई दुई पटक आईजीपी बनाए होलान् ? पदमुक्त गराएको रिसले खरेलले गौतमलाई मात्र झोसेर किताबमा वर्णन गरेका त होइनन् ? शंका गर्ने आधार धेरै छन् । खरेलले आत्मकथामा कतै आफूलाई आदर्शपूर्ण पात्रको रूपमा चित्रण गरेका छन् भने कतै आफूलाई आईजीपी पदमा पुन:स्थापित गराउने गर्ने नहुने काममा संलग्न गराएका छन् । राजदरबारबाट अदालतमा ज्याक लगाउनेदेखि न्यायाधीशका घरघरमा पुगेर आफ्नो पक्षमा फैसला गराउन हारगुहार माग्ने काम आफूले गरेको आत्मकथामा सविस्तार पढ्न पाइन्छ । आफू आईजीपी हुँदा मन्त्रीका झण्डावाल गाडी चढेर शरदसिहं भण्डारी नेपाल प्रहरीको हेडक्वाटरमा गएको र त्रिभुवन विमानस्थलको भन्सार नाकाबाट आफ्ना सुनतस्करलाई विना चेकजाँच छोडिदिन माग गरेको विषय उनले आत्मकथामा लेखेका छन् । तर, उनले न तत्काल शरदसिंह भण्डारीलाई प्रहरी हिरासतमा लिने काम गरेका छन्, न त यति गम्भीर विषयको जानकारी प्रधानमन्त्रीको कार्यालयमा वा राजदरबारमा पढाउने काम पनि गरेका छैनन् । दाबी बलियो बनाउन कार्कीले टेकेका दुई नजिर कार्कीले आईजीपी पद गुमाउनुका ५ कारण मनोज केसीलाई चिनाएका ६ काण्ड आईजीपीको फुली खोसिएकाहरू को हुन् नवनियुक्त आईजीपी मनोज केसी ?
मुक्तिनाथ विकास बैंकमा व्यवसाय कर्जा स्वाप गर्दा आधार दरमै ऋण पाइने
काठमाडौं । मुक्तिनाथ विकास बैंक लिमिटेडले साना तथा मझौला उद्यमीलाई लक्षित गर्दै ‘एसएमई महोत्सव’ सञ्चालनमा ल्याएको छ । बैंकले लक्ष्मीपूजाको अवसर पारेर २०८३ कात्तिक २२ गतेदेखि सुरु गरेको यो अभियान पुस मसान्तसम्म सञ्चालन हुनेछ । महोत्सवअन्तर्गत बैंकले व्यवसायी तथा उद्यमीलाई आधार दरमै व्यवसाय कर्जा स्वाप गर्ने सुविधा उपलब्ध गराएको छ । यस योजनाअनुसार अन्य बैंक तथा वित्तीय संस्थाबाट लिएको व्यवसाय कर्जा मुक्तिनाथ विकास बैंकमा स्वाप गर्दा आधार दरमा शून्य प्रतिशत प्रिमियम अर्थात् आधार दरमै कर्जा प्राप्त गर्न सकिनेछ । बैंकका अनुसार यस योजनाले व्यवसायीलाई सहज र प्रतिस्पर्धी ब्याजदरमा कर्जा उपलब्ध गराउनुका साथै वित्तीय व्यवस्थापन सहज बनाउन सहयोग पुग्नेछ । विशेषगरी साना तथा मझौला उद्यमीलाई व्यवसाय सञ्चालन तथा विस्तारका लागि आवश्यक वित्तीय स्रोतको पहुँच सहज बनाउने बैंकको उद्देश्य छ । बैंकले ग्राहकको आवश्यकता, व्यवसायको सम्भावना र उद्यमशीलताको प्रवर्द्धनलाई प्राथमिकतामा राख्दै विभिन्न वित्तीय सेवा तथा सुविधा प्रदान गर्दै आएको जनाएको छ । एसएमई महोत्सव पनि उद्यमशीलता प्रवर्द्धन र व्यवसायीलाई थप वित्तीय अवसर उपलब्ध गराउने प्रयासको हिस्सा रहेको बैंकले जनाएको छ । यस योजनाबाट लाभ लिन इच्छुक व्यवसायी तथा उद्यमीले मुक्तिनाथ विकास बैंकका नजिकका शाखा कार्यालयमा सम्पर्क गरी थप जानकारी लिन सक्नेछन् ।
