तिहार-छठमा विद्युत् आपूर्ति नरोकिने, २४ सै घण्टा जनशक्ति अलर्ट
काठमाडौं । नेपाल सम्वत्, तिहार तथा छठ पर्वका अवसरमा उपभोक्तालाई नियमित, भरपर्दो र गुणस्तरीय विद्युत् सेवा उपलब्ध गराउन नेपाल विद्युत् प्राधिकरणले विशेष तयारी गरेको छ । ऊर्जा, जलस्रोत तथा सिँचाइ मन्त्री विराज भक्त श्रेष्ठको निर्देशनपछि प्राधिकरणले विद्युत् उत्पादनदेखि प्रसारण र वितरण प्रणालीसम्मको व्यवस्थापन चुस्त बनाएको हो । उज्यालो र उल्लासको पर्व तिहारमा विद्युत् आपूर्ति अवरुद्ध हुन नदिन प्राधिकरणले प्रणालीको नियमित निगरानी, सम्भावित प्राविधिक समस्या पहिचान तथा तत्काल समाधानका लागि आवश्यक जनशक्तिलाई २४ सैं घण्टा तयारी अवस्थामा राखेको जनाएको छ । यसअघि ऊर्जामन्त्री श्रेष्ठले अघिल्लो साता प्राधिकरणका कार्यकारी निर्देशक दीर्घायु कुमार श्रेष्ठसहित उच्च अधिकारीहरूलाई तिहार तथा छठ पर्वमा विद्युत् आपूर्ति नियमित राख्न र सम्भावित अवरोध न्यूनीकरण गर्न निर्देशन दिएका थिए । उनले आपूर्ति व्यवस्थापनसँगै उपभोक्ताका गुनासोलाई तत्काल सम्बोधन गर्ने प्रभावकारी व्यवस्था मिलाउनसमेत जोड दिएका थिए । मन्त्रीको निर्देशनअनुसार प्राधिकरणले विद्युत् प्रणालीको निरन्तर निगरानी, प्राविधिक जनशक्तिको परिचालन र सम्बन्धित निकायबीच समन्वयलाई प्राथमिकतामा राखेको छ । विशेषगरी विद्युत् आपूर्तिमा समस्या देखिए तत्काल समाधान गर्न तथा नो लाइट सेवामा प्राप्त हुने फोन नियमित रूपमा उठाएर उपभोक्ताका गुनासा शीघ्र सम्बोधन गर्न निर्देशन दिइएको छ । यस वर्षको लक्ष्मीपूजाका दिन साँझ विद्युत्को अधिकतम माग करिब १ हजार ७०० मेगावाट पुग्ने प्राधिकरणको अनुमान छ । उक्त माग धान्न आन्तरिक उत्पादन नै पर्याप्त हुने देखिएको छ । प्राधिकरणका अनुसार सो अवधिमा विद्युत् उत्पादन करिब २ हजार ५०० मेगावाट पुग्ने प्रक्षेपण छ। यसले आन्तरिक मागभन्दा उत्पादन बढी हुने भएकाले विद्युत् आपूर्ति व्यवस्थापन सहज हुने अपेक्षा गरिएको छ । यसैबीच, प्राधिकरणले चाडपर्वका समयमा विद्युत् दुर्घटनाबाट जोगिन सुरक्षित प्रयोगमा विशेष ध्यान दिन उपभोक्तालाई आग्रह गरेको छ । घरमा प्रयोग भइरहेका विद्युतीय उपकरण, तार तथा अन्य सामग्रीको अवस्था जाँच गर्न, गुणस्तरहीन सामग्री प्रयोग नगर्न र विद्युत् चुहावट वा तारमा समस्या देखिए आफैँ मर्मत नगरी दक्ष प्राविधिकको सहयोग लिन प्राधिकरणले अनुरोध गरेको छ । विद्युत् आपूर्तिमा कुनै समस्या आएमा नजिकको वितरण केन्द्र वा सम्बन्धित नो लाइट सेवामा सम्पर्क गरी जानकारी गराउन पनि प्राधिकरणले उपभोक्तालाई आग्रह गरेको छ ।
लुम्बिनीविरुद्ध काठमाडौंको ब्याटिङ
काठमाडौं । कीर्तिपुरस्थित त्रिवि क्रिकेट मैदानमा जारी नेपाल प्रिमियर लिग (एनपीएल) मा लुम्बिनी लायन्सविरुद्ध काठमाडौं गोर्खाजले पहिले ब्याटिङ गर्ने भएको छ । लुम्बिनीका कप्तान रोहित पौडेलले टस जितेर पहिले बलिङ गर्ने निर्णय गरेपछि काठमाडौं गोर्खाज ब्याटिङका लागि मैदान उत्रिन लागेको हो । जारी लिगमा पाँचौं खेल खेल्न लागेको लुम्बिनी आजको खेल जित्दै दुई खेल अगावै प्लेअफमा आफ्नो स्थान सुरक्षित गर्ने लक्ष्यमा छ । यसअघि खेलेका तीन खेलमा जित र एक खेलमा अंक बाँड्दै ७ अंक जोडेको लुम्बिनी अंक तालिकाको शीर्ष स्थानमा छ । अर्कोतर्फ, चार खेलमा दुई जित र दुई हारसहित ४ अंक जोडेको काठमाडौं गोर्खाज चौथो स्थानमा छ । काठमाडौंले आजको टोलीमा एक परिवर्तन गर्दै देव शाहको स्थानमा आदिल आलमलाई मैदान उतारेको छ । विगतको नतिजा हेर्दा काठमाडौंविरुद्ध लुम्बिनीको पल्ला भारी देखिन्छ। लिगका अघिल्ला दुई संस्करणका साथै अघिल्लो सिजनको एलिमिनेटरमा पनि लुम्बिनीले काठमाडौंलाई पराजित गरेको थियो। पछिल्ला ११ खेलमा अपराजित रहँदै उत्कृष्ट फर्ममा रहेको लुम्बिनी आज पनि सोही लय कायम राख्न चाहन्छ । आजको खेलका लागि दुवै टोलीमा लुम्बिनी लायन्सबाट रोहित पौडेल (कप्तान), सन्दीप जोरा, तिलक भण्डारी, अविशेक गौतम, आशिफ शेख, दीलीप नाथ, शेर मल्ल, रुवेन ट्रम्पलम्यान, निरोशन डिकवेल्ला, डार्सी सर्ट र ग्रान्ट स्टेवार्ट छन् । यस्तै, काठमाडौं गोर्खाजमा करण केसी, भीम सार्की, रासिद खान, आदिल आलम, सन्तोष यादव, साहब आलम, साहिल पटेल, डेविड वार्नर, सहान, विलियम बसिस्टो र जनादन खान छन् ।
सर्वोच्चका लागि प्रस्तावित चार न्यायाधीशहरुको नाम संसदीय समितिबाट अनुमोदन
काठमाडौं । सर्वोच्च अदालतको न्यायाधीश पदमा प्रस्तावित चार न्यायाधीशको नाम संसदीय समितिबाट अनुमोदन गरिएको छ । शनिबार बसेको संसदीय सुनुवाइ समितिको बैठकबाट उनीहरू नाम अनुमोदन गरिएको हो । सर्वोच्चको न्यायाधीशमा नियुक्तिका लागि समितिबाट नाम अनुमोदन गरिएकाहरूमा रत्नबहादुर बागचन्द, चन्द्रबहादुर सारू, जनक पाण्डे र गोकर्ण डाँगी छन् । समितिमा शुक्रबार बागचन्द र सारूको सुनुवाइ गरिएको थियो । शनिबार पाण्डे र डाँगीको सुनुवाइपछि उनीहरूको नाम अनुमोदन गरिएको थियो । संसदीय समितिमा सुनुवाइ र त्यहाँबाट अनुमोदनपश्चात् उनीहरूलाई नियुक्त गरिने संवैधानिक व्यवस्था छ ।
काठमाडौंमा जापानी फुड फेस्टिभल, नेपाल-जापान कूटनीतिक सम्बन्धको ७०औँ वर्षगाँठ मनाइँदै
काठमाडौं । नेपाल र जापानबीच कूटनीतिक सम्बन्ध स्थापना भएको ७०औं वर्षगाँठ तथा होक्काइडो ग्रुपको सातौं वार्षिकोत्सवको अवसरमा काठमाडौंमा जापानी फुड फेस्टिभल आयोजना भइरहेको छ । होक्काइडो ग्रुप र रेडिसन काठमाडौंको सहकार्यमा लाजिम्पाटस्थित होक्काइडो एसियन कुजिनमा नोभेम्बर ३ देखि ९ सम्म सञ्चालन भइरहेको यस फेस्टिभलले जापानी खानाको परम्परा, पाककला र सांस्कृतिक अभ्यासलाई नेपाली आगन्तुकमाझ प्रस्तुत गरेको छ । साँझ ५ देखि ८ बजेसम्म सञ्चालन हुने फेस्टिभलमा प्रतिव्यक्ति ३ हजार रुपैयाँ (कर तथा सफ्ट ड्रिंकसहित) शुल्क निर्धारण गरी डिनर बुफे तथा अनलिमिटेड सुसीको व्यवस्था गरिएको छ भने सहज व्यवस्थापनका लागि दैनिक सहभागिता ७० जनामा सीमित गरिएको छ । फेस्टिभलमा जापानका सुसी कलाकार काजुयुकी हायाशीको प्रत्यक्ष पाककला प्रस्तुति रहेको छ । जसले आगन्तुककै अगाडि सुसी तयार पारेर जापानी पाक शैली र परम्पराको अनुभव गराइरहेका छन् । फेस्टिभलमा निगिरी सुसी, होसोमाकी रोल, तेप्पान्याकीलगायत नौ फरक विधाका करिब ४८ परिकारहरू समावेश छन् । खानाका साथै जापानी क्यालिग्राफी र परम्परागत माचा चिया बनाउने विधि प्रदर्शनसमेत गरिएको छ । सन् २०१९ मा अर्जुन अधिकारीले पार्क भिलेज रिसोर्टबाट सुरु गरेको होक्काइडो ग्रुपले हाल काठमाडौं उपत्यका, पोखरा र चितवन गरी १० वटा रेस्टुरेन्ट तथा आउटलेटमार्फत जापानी खानाको पहिचान र आतिथ्य सेवा विस्तार गरिरहेको छ ।
पर्यटन प्रवर्द्धन र संस्कृति संरक्षण गर्न बाजुरामा फेसन शो
काठमाडौं । बाजुरामा स्थानीय उत्पादन प्रवर्द्धन गर्न फेसन शो आयोजना भएको छ । 'फार्म टु फेसन–क्लाइमेट अवेरनेस रनवे - २०२६'आयोजना गरिएको आयोजक थ्रेड्स अफ द हिमालयन फाउन्डेसनले जनाएको छ । ४ नोभेम्बरमा आयोजना गरिएको कार्यक्रमले फेसन, जलवायु सचेतना, सांस्कृतिक संरक्षण, ग्रामीण सशक्तीकरण र दिगो पर्यटनलाई एकै मञ्चमा जोडेको फाउन्डेसनले जनाएको छ । आयोजक संस्था अध्यक्ष रमिला नेम्कुल श्रेष्ठले यहाँ गरिएको फेसन शो ले नेपालको हिमाली क्षेत्रमा भेडापालन र स्थानीय ऊनको सम्भावनालाई राष्ट्रिय तथा अन्तर्राष्ट्रिय स्तरमा प्रवर्द्धन गर्ने लक्ष्य राखेको बताइन् । उनका अनुसार किसान, स्थानीय सीप, महिला तथा लघु उद्यमशीलता र फेसन उद्योगबीच सम्बन्ध स्थापित गर्ने दीर्घकालीन लक्ष्य राखेको छ । कार्यक्रमले जलवायु परिवर्तनबाट प्रभावित हिमाली समुदायको आवाज उठाउँदै दिगो उत्पादन, प्राकृतिक स्रोत संरक्षण र स्थानीय ज्ञानको महत्त्व उजागर गरेको समेत आयोजकले जनाएको छ । यसबाट बाजुरा र सुदूरपश्चिम क्षेत्रको प्राकृतिक सौन्दर्य, सम्पदा पर्यटन सम्भावना विश्वसामु चिनाउने अवसर सिर्जना गरेको छ ।
धनतेरसमा एलआरआर ग्रुपले हस्तान्तरण गर्यो २६ युनिट ईभी
काठमाडौं । एलआरआर ग्रुपले धनतेरसको अवसर पारेर आफूले आधिकारिक रुपमा आयात गर्ने विभिन्न ब्राण्डका २६ युनिट विद्युतीय गाडी (ईभी) ग्राहकलाई हस्तान्तरण गरेको छ । कम्पनीले धनतेरसको अवसर पारेर स्काईवेल, जीली र बिएडब्ल्यू ईभी ग्राहकलाई हस्तान्तरण गरेको हो । एलआरआर ग्रुपका अनुसार स्काईवेलका १० युनिट ईभी शुक्रबार एकैदिन ग्राहकलाई हस्तान्तरण गरिएको छ । यसैगरी, बिएडब्लयू ई७ प्रो ८ युनिट पनि शुक्रबारै हस्तान्तरण गरिएको छ । यसैगरी, कम्पनीले जीलीका ८ युनिट पनि धनतेरसकै अवसरमा हस्तान्तरण गरिएको जनाएको छ । यसरी एलआरआर ग्रुपले तिहार अन्तर्गतको धनतेरसको उपलक्ष्यमा २६ युनिट ईभी हस्तान्तरण गरेको हो । अब लक्ष्मी पूजाको दिन पनि केही गाडीहरु हस्तान्तरण हुने कम्पनीले जनाएको छ । कम्पनीले यसअघि नै बुकिङ गर्ने ग्राहकहरुलाई प्राथमिकतामा राखेर गाडी उपलब्ध गराउन सुरु गरेको हो । नाडा अटो शो २०२६ र त्यस आसपास गाडी बुकिङ गर्ने ग्राहकहरुले अहिले क्रमशः गाडी पाउन थालेका छन् ।
तिहार र छठमा नक्कली नोटको कारोबार रोक्न प्रहरी परिचालन
काठमाडौं । तिहार तथा छठमा ठगी, चोरी, डकैती, लुटपाट, जुवातास, अनलाइन ठगी, बेटिङ, नक्कली नोटको कारोबार, अवैध हुण्डी कारोबार हुने प्रहरी परिचालनको संख्या बढाइने भएको छ । आपराधिक गतिविधिहरू नियन्त्रण तथा न्यूनीकरण गर्न प्रभावकारी रूपमा प्रहरी परिचालित हुने प्रहरी प्रधान कार्यालयले जनाएको छ । काठमाडौं उपत्यकाबाट बाहिरिने सवारी चालकको सवारी चालक अनुमति पत्र चेकजाँच, मादक पदार्थ एवम् लागूपदार्थ सेवन चेकजाँच, सिट क्षमता अनुसार यात्रु राखे नराखेको प्रहरीले चेक गर्ने छ । प्रहरीले लामो दूरीको सवारी साधनहरूमा २ जना चालक भए नभएको चेकजाँच गर्ने र प्रत्येक सवारी साधनहरूको मेकानिकल चेकजाँच गर्ने भएको छ । कृत्रिम अभाव सिर्जना गर्ने, अस्वाभाविक मूल्यवृद्धि गर्ने, म्याद गुज्रिएका तथा गुणस्तरहीन वस्तु बिक्री गर्ने र उपभोक्तालाई ठगी गर्ने गतिविधि हुन सक्ने भएकाले नेपाल प्रहरीले नियन्त्रण गर्न विशेष सक्रियता अपनाएको छ । नेपाल प्रहरीले वाणिज्य, आपूर्ति तथा उपभोक्ता संरक्षण विभाग, स्थानीय तह, जिल्ला प्रशासन कार्यालय र अन्य सरोकारवाला निकायसँग समन्वय गरी बजार अनुगमनमा सहकार्य गरिरहेको छ । कृत्रिम अभाव सिर्जना गर्ने, अस्वाभाविक मूल्यवृद्धि गर्ने तथा बढी मूल्य लिने व्यवसायीमाथि निगरानी र आवश्यक अनुसन्धान गर्ने, उपभोक्ताको स्वास्थ्यमा प्रतिकूल असर पार्ने म्याद गुज्रिएका, नक्कली तथा गुणस्तरहीन वस्तुको बिक्रीवितरण सम्बन्धी सूचनामा तत्काल कारबाहीका गर्ने भएको छ । ठूला व्यापारिक केन्द्र, गोदाम, डिपो, बजार क्षेत्र तथा आपूर्ति मार्गहरूमा आवश्यक सुरक्षा निगरानी र चेकजाँचलाई थप तीव्र बनाउँदै प्रहरीले कार्य गरिरहेको छ । कालोबजारी, मूल्यवृद्धि र उपभोक्ता ठगी सम्बन्धी सूचना संकलन गरी तत्काल प्रहरी परिचालन गर्नेछ । उपभोक्ताबाट प्राप्त गुनासो, सूचना तथा उजुरीलाई प्राथमिकताका साथ सम्बोधन गर्न प्रहरी कार्यालयहरूलाई सक्रिय बनाउनुका साथै आवश्यकता अनुसार संयुक्त अनुगमन टोली परिचालन गरिने छ । प्रहरीले फूलमाला तथा पूजासामग्रीको बिक्रीवितरणमा उपभोक्ता नठगिऊन् भन्ने उद्देश्यले व्यवसायीलाई पारदर्शी मूल्यमा बिक्रीवितरण गर्न अनुरोध गरेको छ । फूलमाला तथा अन्य पूजा सामग्रीको कृत्रिम अभाव सिर्जना गर्ने, अस्वाभाविक मूल्यवृद्धि गर्ने र उपभोक्तालाई ठगी गर्ने गतिविधि रोक्न सम्बन्धित निकायसँग समन्वय गरी बजार अनुगमन, मूल्यसूचीको पालना तथा उपभोक्ता हित संरक्षणमा निगरानी गर्ने कार्य समेत प्रहरीले गरिरहेको छ । चाडपर्वको अवधिमा देशभर समग्र सुरक्षा व्यवस्थालाई भरपर्दो बनाइएको प्रहरीका प्रवक्ता अबीनारायण काफ्लेले बताए । नागरिकलाई सुरक्षाको प्रत्याभूति दिलाउन योजनाबद्ध रूपमा प्रहरी परिचालन, अनुगमन तथा सुरक्षा मापदण्ड समेतलाई लक्षित गरी विशेष सुरक्षा योजना अवलम्बन गरिएको उनको भनाइ छ । प्रहरीले पटका, आतिसबाजी तथा पटकाजन्य पदार्थको प्रयोगले आगलागी, मानवीय चोटपटक, अङ्गभङ्ग, घर तथा सम्पत्तिमा क्षति र वातावरणीय प्रदूषण निम्त्याउन सक्ने भएकाले अनुरोध गरेको छ । बालबालिकाको हातमा पटका तथा प्रज्वलनशील पदार्थ नदिन, उनीहरूलाई यस्ता वस्तुबाट टाढा राख्नुपर्ने प्रहरीले बताएको छ। अभिभावकले विशेष निगरानी र सचेतना अपनाउनुपर्ने, आगलागीबाट बच्न आवश्यक सतर्कता अपनाउनुपर्ने, विद्युत सर्ट हुन सक्ने सम्भावनालाई ध्यानमा राखी घर तथा पसलको सुरक्षा गर्नुपर्ने काफ्लेले बताएका छन्। विस्फोटक पदार्थको आवाजबाट हुनसक्ने ध्वनि प्रदूषण नियन्त्रण, सार्वजनिक स्थान तथा सडकमा पटका नपड्काउन, पटका तथा विस्फोटक पदार्थको अवैध कारोबार नगर्न एवम् मादक पदार्थ सेवन गरी यात्रा नगर्न समेत प्रहरीले विशेष अनुरोध गरेको छ ।
अतिफ अस्लमको ‘लाइभ इन नेपाल’ कन्सर्टको डिजिटल टिकेटिङ पार्टनर बन्यो खल्ती
काठमाडौं । पाकिस्तानी गायक अतिफ अस्लमको आगामी ‘अतिफ अस्लम लाइभ इन नेपाल’ कन्सर्टको डिजिटल टिकेटिङ पार्टनरका रूपमा ‘खल्ती बाइ आइएमई’ आबद्ध भएको छ । जय मिडिया म्यानेजमेन्ट प्रालिको आयोजनामा आगामी डिसेम्बर १९, २०२६ मा इटहरीस्थित इटहरी रंगशालामा हुने उक्त कन्सर्टमा अतिफ अस्लमले आफ्ना गीतमार्फत सांगीतिक प्रस्तुति दिनेछन् । ‘ताजदार-ए-हरम’, ‘तेरे बिन’, र ‘दिल दियाँ गल्लाँ’ जस्ता गीतका गायक अस्लमलाई हेर्न नेपालसहित भारत तथा अन्य दक्षिण एसियाली देशहरूबाट समेत उल्लेख्य दर्शक सहभागी हुने अपेक्षा गरिएको छ । यस सहकार्यमार्फत दर्शकहरूले खल्ती एप प्रयोग गरी सहज, सुरक्षित र सुविधाजनक तरिकाले डिजिटल माध्यमबाटै कन्सर्टको टिकट खरिद गर्न सक्नेछन् । खल्तीका चिफ अपरेटिङ अफिसर पुष्पराज न्यौपानेले नेपालमा सांगीतिक कार्यक्रमप्रति दर्शकको आकर्षण बढ्दै गएको अवस्थामा अतिफ अस्लमजस्ता अन्तराष्ट्रिय कलाकारको कन्सर्टसँग जोडिन पाउँदा उत्साहित भएको बताए । उनले यसबाट दर्शकलाई टिकट खरिदमा सहजता र पारदर्शिता मिल्नुका साथै नेपालको मनोरञ्जन क्षेत्रलाई डिजिटल रूपान्तरण गर्न थप टेवा पुग्ने विश्वास व्यक्त गरे ।
