पाँच मिनेटको बाटो पार गर्न दुई घण्टाको यात्रा, पुल नहुँदा भरबलियावासीलाई सास्ती
काठमाडौं । रूपन्देहीको मर्चवारस्थित सम्मरीमाई गाउँपालिका–५ को भरबलिया गाउँका बासिन्दा वर्षौंदेखि आधारभूत पूर्वाधार र सेवाको अभावमा कष्टकर जीवन बिताउन बाध्य छन् । नदीमा पक्की पुल नहुँदा नजिकै रहेको बस्तीमा पुग्नसमेत घण्टौँ खर्चिनुपर्ने अवस्था छ । पाँच मिनेटमा पार गर्न सकिने नदी तर्न स्थानीयले ५० देखि ५५ किलोमिटर घुम्नुपर्ने बाध्यता छ । गाडीमा जाँदासमेत डेढदेखि दुई घण्टा घुम्नुपर्ने अवस्था रहेको छ । नदीको वारि र पारि रहेका बस्तीका बासिन्दालाई आवतजावत गर्न मात्रै होइन, खेतीपाती गर्न, कृषि उपज ओसारपसार गर्न तथा दैनिक जीवनयापन गर्नसमेत निकै समस्या हुने गरेको छ । गाउँमा सडक, खानेपानी, विद्युत्, शिक्षा र स्वास्थ्यजस्ता आधारभूत सुविधाको सहज पहुँचसमेत नपुगेको स्थानीयको गुनासो छ । स्थानीय जमेरुन निशा, जेलिल देवान, नुरुद होदा मुसलमान र बेचन हरिजनले वर्षौंदेखि आफूहरूले दुःख भोग्दै आए पनि समस्या समाधानका लागि सम्बन्धित निकायले पर्याप्त चासो नदिएको बताए । उनीहरूका अनुसार गाउँमा न सिधा सडक छ, न सहज आवागमनको व्यवस्था । शिक्षा र स्वास्थ्य सेवाका लागि समेत सहज पहुँच नहुँदा स्थानीयले अनेक कठिनाइ झेल्नुपरेको छ । स्थानीयका अनुसार विसं २०३२ मा बाढी पसेपछि एउटा गाउँ खोला वारि र पारि छुट्टिएको हो । गाउँ विस्थापित हुँदा बस्तीलाई पुरानो स्थानबाट करिब एक किलोमिटर टाढा सार्नुपरेको थियो । त्यसपछि पनि प्राकृतिक विपत्तिको जोखिम र पूर्वाधार अभावले गाउँलेको जनजीवन सहज हुन सकेको छैन । विसं २०६० मा तत्कालीन वडा नम्बर ५ अन्तर्गतको मंगलपुर गाउँमा भएको आगलागीले पाँच जनाको मृत्यु भएको थियो भने ठूलो क्षति पुर्याएको स्थानीयले स्मरण गरेका छन् । आगलागीका बेला उद्धार र उपचारको पर्याप्त व्यवस्था नहुँदा पीडा भोग्नुपरेको तथा परिवारका सदस्यसमेत गुमाउनुपरेको उनीहरूको भनाइ छ । विपत्तिका बेला आवश्यक सहयोग नपाएको र त्यसपछि पनि आफूहरूको अवस्था बुझ्न तथा समस्या समाधान गर्न कोही नफर्किएको स्थानीयको गुनासो छ । ‘वर्षौंदेखि दुःख भोगिरहेका छौँ । गाउँमा सिधा बाटो छैन, शिक्षा र स्वास्थ्य सेवामा सहज पहुँच छैन । नदीपारि जानुपर्दा लामो बाटो घुम्नुपर्छ । हाम्रो समस्या सुन्ने र समाधान गर्ने कोही भएन,’ खेतमा बदाम खन्दै गरेका स्थानीय राजेन्द्र गुप्ताले भने । तिनाउ–दानव नदीमा एउटा झोलुङ्गे पुल भए पनि त्यसबाट सवारीसाधन लैजान सकिने अवस्था छैन । त्यसैले नदीको अर्को किनारमा रहेका खेतबारीमा पुग्न किसानलाई कठिनाइ हुने गरेको छ । खेतमा बाली लगाउनेदेखि स्याहार्ने र उत्पादन भित्र्याउने बेलासम्म किसानले अतिरिक्त समय, श्रम र खर्च व्यहोर्नुपरेको छ । बीउबिजन, पानी तथा कृषि सामग्री ओसारपसार गर्नसमेत समस्या हुने गरेको उनीहरूको भनाइ छ । पक्की पुल बने ५० हजार मानिस लाभान्वित हुने दाबी स्थानीय अगुवा वाजिद अली देवानले भरबलिया गाउँको आवागमन सहज बनाउन सडक निर्माणका लागि पहल गर्दै आएको बताए । उनका अनुसार नदीमा पक्की पुल निर्माण हुन सके भरबलियासहित बुद्ध जन्मस्थल लुम्बिनी आसपासका क्षेत्रका करिब ५० हजार मानिस प्रत्यक्ष वा अप्रत्यक्ष रूपमा लाभान्वित हुनेछन् । ‘एउटा पक्की पुल र सिधा सडक निर्माण हुन सके यहाँका नागरिकले भोग्दै आएको ठूलो समस्या समाधान हुन्छ । किसानलाई खेतबारीमा पुग्न, कृषि उपज बजारसम्म पुर्याउन र बिरामीलाई उपचारका लागि लैजान सहज हुन्छ,’ स्थानीय अगुवा देवानले भने । उनका अनुसार पुलको अभावले स्थानीयको समय र खर्च मात्रै बढाएको छैन, शिक्षा, स्वास्थ्य, कृषि र आर्थिक गतिविधिमा समेत असर पारेको छ । सहज सडक सञ्जाल नहुँदा गाउँको समग्र विकास प्रभावित भएको उनको भनाइ छ । यस वडामा करिब ६ हजार ५०० जनसङ्ख्या छ भने पालिकाभर ४३ हजार जनसङ्ख्या रहेको छ । उनले यहाँको वास्तविक अवस्थाबारे वर्तमान सरकार, पूर्वाधारमन्त्री सुनिल लम्सालसहित यस क्षेत्रका संघीय सांसद कन्हैया वनिया र तैफिक अहमदलाई समेत भेटेरै जानकारी गराइएको बताए । यो क्षेत्र रूपन्देही निर्वाचन क्षेत्र नम्बर ४ अन्तर्गत पर्दछ । चुनावी आश्वासनमा सीमित छ यहाँको विकास स्थानीयले चुनावका बेला विभिन्न राजनीतिक दलका नेता तथा कार्यकर्ता घरदैलोमा पुगेर विकासका आश्वासन दिने गरे पनि व्यवहारमा अपेक्षित परिवर्तन नआएको गुनासो गरेका छन् । स्थानीयका अनुसार राजनीतिक नेतृत्व विभिन्न पदमा पुगे पनि भरबलियाको सडक, पुल र आधारभूत सेवासम्बन्धी समस्या समाधान हुन सकेको छैन । मर्चवार क्षेत्रका विभिन्न बस्तीमा पूर्वाधार विकासको आवश्यकता रहेको उल्लेख गर्दै स्थानीयले भरवालियाको समस्यालाई प्राथमिकतामा राख्न माग गरेका छन् । खासगरी उनीहरूले तिनाउ–दानव नदीमा पक्की पुल निर्माण, सडकको स्तरोन्नति तथा शिक्षा र स्वास्थ्य सेवाको पहुँच विस्तार गर्न सम्बन्धित निकायसँग आग्रह गरेका छन् । उनीहरूको मुख्य पेसा नै खेतीकिसानी र मजदुरी रहेको छ । स्थानीयका लागि पक्की पुल केवल नदी वारपार गर्ने संरचना मात्रै होइन, वर्षौंदेखि भोग्दै आएको सास्तीबाट मुक्ति पाउने आशा पनि हो । पुल निर्माण भए किसानलाई खेतीपाती गर्न, बालबालिकालाई विद्यालय जान, बिरामीलाई अस्पताल पुर्याउन र गाउँका बासिन्दालाई दैनिक कामकाज गर्न सहज हुने स्थानीय नन्दलाल हरिजनको भनाइ छ । वर्षौंदेखि विकासको प्रतीक्षामा रहेको भरबलियाका बासिन्दाले अब आश्वासनभन्दा कामको अपेक्षा गरेका छन् । आधारभूत सेवाको समेत सहज पहुँच नभएको यो गाउँमा सरोकारवालाको ध्यान समयमै जान जरुरी देखिन्छ ।
तिहारको दोस्रो दिन आज कुकुर पूजा गरिँदै
काठमाडौं । नेपालीहरूको दोस्रो ठूलो चाड तिहार अर्थात् यमपञ्चकको दोस्रो दिन आज कुकुर पूजा गरेर मनाइँदैछ । तिहारको दोस्रो दिन कुकुरलाई यमराजको दूतका रूपमा पूजा गर्ने धार्मिक तथा सांस्कृतिक परम्परा छ । घरमा पालिएका तथा सडकमा रहेका कुकुरलाई फूलमाला लगाइदिने, टीका लगाउने र मीठा परिकार खुवाएर सम्मान गर्ने गरिन्छ । हिन्दु धार्मिक मान्यताअनुसार कुकुरलाई यमराजको द्वारपाल तथा रक्षकका रूपमा लिइन्छ । कुकुरले घरको सुरक्षा गर्नुका साथै मानिसप्रति वफादारी देखाउने भएकाले पनि यस दिन विशेष सम्मान गर्ने चलन छ । कुकुर पूजाका अवसरमा आज विभिन्न स्थानमा कुकुरलाई फूलमाला र टीका लगाएर मीठा खानेकुरा खुवाइँदैछ । तिहारको पहिलो दिन काग पूजा गरिएको थियो भने दोस्रो दिन कुकुर पूजा गरिन्छ । त्यसपछि क्रमशः लक्ष्मी पूजा, गोवर्धन पूजा तथा म्हः पूजा र भाइटीका मनाइन्छ ।
कसरी लाग्यो दरबारमार्गको लाउन्ज बारमा आगो ?
काठमाडौं । काठमाडौंको दरबारमार्गस्थित लिक्विड लाउन्ज बारमा आइतबार बिहान आगलागी भएको छ । महेन्द्र शालिक नजिकै रहेको बारमा बिहान करिब ८ः५५ बजे आगलागी भएको हो । आगलागीको सूचना पाएलगत्तै दमकल र सुरक्षाकर्मीको टोली घटनास्थल पुगेको थियो । प्रहरीका अनुसार आगो नियन्त्रणमा लिन दुईवटा दमकल परिचालन गरिएको छ । जिल्ला प्रहरी परिसर काठमाडौंका एसपी दानबहादुर थापाले घटनामा हालसम्म मानवीय क्षति भएको जानकारी प्राप्त नभएको बताए । आगलागी हुँदा बारमा कोही पनि नरहेको प्रारम्भिक जानकारी प्रहरीले दिएको छ । बार सञ्चालकलाई घटनास्थलमा बोलाउने प्रयास भइरहेको प्रहरीले जनाएको छ । आगलागी कसरी सुरु भयो भन्ने खुलेको छैन । आगलागीबाट भएको भौतिक क्षतिको विवरणसमेत आउन बाँकी छ । घटनाको कारण र क्षतिको यकिन विवरण अनुसन्धानपछि मात्रै खुल्ने प्रहरीले जनाएको छ ।
कुकुर तिहारमा मात्रै होइन, अब हरेक दिन कुकुरको हेरचाह गर्दै गोल्याण फाउण्डेशन
काठमाडौं । कुकुर तिहारको अवसरमा गोल्याण फाउण्डेशनले सामुदायिक कुकुरको संरक्षण, स्वास्थ्य सुरक्षा र पशुप्रति मानवीय व्यवहार प्रवर्द्धन गर्ने उद्देश्यले ‘एक दिनको माला होइन, हरेक दिनको माया’ अभियान सुरु गरेको छ । काठमाडौं महानगरपालिका–१०, नयाँ बानेश्वरस्थित छक्कुबक्कु टोलबाट अभियानको शुभारम्भ गरिएको हो । कुकुर तिहारमा एक दिन फूलमाला लगाएर पूजा गर्ने परम्परालाई वर्षभरि नै माया, दया र जिम्मेवार व्यवहारमा रूपान्तरण गर्ने उद्देश्यले अभियान सुरु गरिएको फाउण्डेशनले जनाएको छ । तीनमहिने परीक्षण परियोजनाका रूपमा सञ्चालन हुने अभियानमा सामुदायिक कुकुरलाई पौष्टिक खाना खुवाउने, आवश्यक खोप लगाउने, नियमित स्वास्थ्य परीक्षण गर्ने तथा जनचेतना अभिवृद्धि गर्ने कार्यक्रम समेटिएका छन् । फाउण्डेशनका अनुसार अभियानको प्रारम्भिक चरणमा सामुदायिक कुकुरको वास्तविक संख्या, स्वास्थ्य अवस्था, व्यवस्थापन लागत र स्थानीय सहकार्यको प्रभावकारिताबारे अध्ययन गरिनेछ । यसबाट प्राप्त तथ्याङ्कका आधारमा आगामी दिनमा अभियानलाई थप व्यवस्थित र वैज्ञानिक बनाउने योजना छ । अभियानको शुभारम्भ कार्यक्रममा प्रतिनिधिसभा सदस्य रञ्जु दर्शनाले सामुदायिक कुकुरको सम्मान र संरक्षणले समाजलाई समेत जिम्मेवार बनाउने बताइन् । उनले अभियानमार्फत गोल्याण फाउण्डेशनले पशुप्रतिको उच्च मानवीय भावना प्रस्तुत गरेको उल्लेख गरिन् । गोल्याण ग्रुप तथा गोल्याण फाउण्डेशनका अध्यक्ष अक्षय गोल्याणले कुकुरप्रतिको माया र सम्मान एक दिनमा मात्र सीमित हुन नहुने बताए । वर्षमा एक दिन कुकुरको पूजा गर्ने सांस्कृतिक परम्परालाई दैनिक व्यवहारमा उतार्न अभियान सुरु गरिएको उनको भनाइ छ । त्यस्तै, फाउण्डेशनकी प्रमुख कार्यकारी अधिकृत ज्योति गैह्रेले सडक तथा सार्वजनिक क्षेत्रमा आश्रित कुकुरको आधारभूत आवश्यकता पूरा गर्न र उनीहरूप्रति समाजको दृष्टिकोण सकारात्मक बनाउन अभियानले सहयोग गर्ने बताइन् । उनले कुकुरप्रति माया गर्न नसक्ने वा डराउने नागरिकलाई समेत दुर्व्यवहार नगर्न, ढुंगा नहान्न र कुकुरलाई खाना खुवाउने स्वयंसेवकलाई अवरोध नगर्न आग्रह गरिन् । अभियानअन्तर्गत स्वयंसेवकले आफ्नो कार्यक्षेत्रभित्रका सामुदायिक कुकुरलाई दैनिक एक छाक भात र मासुसहितको पोषिलो खाना खुवाउनेछन् । भेटेरिनरी टोली तथा विशेषज्ञबाट नियमित स्वास्थ्य परीक्षण गरी आवश्यकताअनुसार उपचार र खोपको व्यवस्था गरिनेछ । फाउण्डेशनले वडा नम्बर १० भित्र रहेका सबै सामुदायिक कुकुरलाई रेबिज, डिस्टेम्पर र क्यानाइन कोरोना भाइरसविरुद्धको खोप लगाउने जिम्मेवारी लिएको छ । साथै जुका, लुतो र एलर्जीजस्ता समस्याको पहिचान गरी उपचारसमेत गरिने जनाएको छ । खोप लगाइएका कुकुरलाई पहिचानका लागि रिफ्लेक्टिभ कलरसमेत लगाइनेछ । यसले रातिको समयमा कुकुरलाई टाढैबाट देख्न सकिने भएकाले सडक दुर्घटनाको जोखिम घटाउने अपेक्षा गरिएको छ । साथै कुकुरको संख्या पहिचान, खाना वितरण र खोप व्यवस्थापनमा समेत सहज हुनेछ । अभियान सञ्चालनका लागि फाउण्डेशनले काठमाडौं महानगरपालिका र वडा नम्बर १० कार्यालयसँग समन्वय गरेको छ । अभियानमा फाउण्डेशनका स्वयंसेवक तथा साझेदारहरू परिचालित हुनेछन् । गोल्याण ग्रुप र गोल्याण फाउण्डेशनले सामाजिक कल्याण तथा सामुदायिक सेवाका क्षेत्रमा विभिन्न गतिविधि सञ्चालन गर्दै आएका छन् । यसअघि रसुवाको भोटेकोशीमा आएको बाढीपछि नुवाकोटको बिदुरस्थित चन्द्रज्योति माध्यमिक विद्यालयमा अस्थायी आश्रय केन्द्र सञ्चालन गरी विस्थापित परिवारलाई सहयोग गरेको थियो । त्यस्तै, जेनजी आन्दोलनका शहीद परिवारका बालबालिकाको शिक्षा र ज्येष्ठ सदस्यको स्वास्थ्य उपचारमा समेत सहयोग गर्दै आएको फाउण्डेशनले जनाएको छ ।
काठमाडौंसँग पराजित भएपछि लुम्बिनीका कप्तान रोहित भन्छन्- ‘अबका दुई खेल जितेर प्लेअफ पुग्छौं’
काठमाडौं । नेपाल प्रिमियर लिग (एनपीएल) को तेस्रो सिजनमा लगातार चौथो खेलसम्म अपराजित यात्रा पूर्णविराम लागेपछि लुम्बिनीका कप्तान रोहित पौडेलले प्लेअफमा पुग्न हारका लागि यो राम्रो समय रहेको बताएका छन् । शनिबारको खेलमा काठमाडौं गोर्खाजसँग हारपछि पत्रकार सम्मेलनमा पौडेलले यो समयमा हारले अगाडि बढ्न मद्दत मिल्ने विश्वास व्यक्त गरे । आगामी दुई खेलमा राम्रो गर्दा प्लेअफमा पुग्ने अवसर पनि रहेको उनको भनाइ थियो । यो हारपछि केही राम्रो गर्न सकिन्छ भन्ने टोलीमा विश्वास आउने पनि उनले बताए। किशोर महतोको चोटले केही परिवर्तन गर्नु परेको र त्यसले गर्दा पहिलो १० ओभरको बलिङमा असर पुगेको उनको भनाइ छ । अन्तिम तीन ओभरमा धेरै रन खाए पनि राम्रो योजनाअनुरूप बलर प्रयोग गरिएको पौडेलले बताए । १६१ रनको लक्ष्य पूरा हुन सक्ने खालको रहेको उनको भनाइ छ । तर पावरप्लेमा धेरै विकेट गुमाउँदा समस्या भएको उनले बताए । आसिफ शेख, डार्सी सर्टले आगामी दिनमा राम्रो खेल्ने उनको विश्वास छ ।
बाढीमा अभिभावक गुमाएका बालबालिकालाई उच्च शिक्षासम्म निःशुल्क पढाउने सरकारको निर्णय
काठमाडौं । शिक्षा तथा खेलकुद मन्त्रालयले १० भदौको विनाशकारी बाढीमा परी ज्यान गुमाएका र बेपत्ता भएकाका सन्तानलाई पूर्ण छात्रवृत्ति उपलब्ध गराउन मन्त्रीस्तरीय निर्णयमार्फत प्रक्रिया अगाडि बढाएको छ । प्रथम चरणमा २७ जना विद्यार्थीलाई यो छात्रवृत्ति उपलब्ध गराइने निर्णय गरिएको छ भने यसपछि क्रमशः पहिचान गर्दै विभिन्न चरणमा थप विद्यार्थीलाई छात्रवृत्ति दिइँदै जाने शिक्षा तथा खेलकुद मन्त्रालयले जनाएको छ । मन्त्रालयले यसअघि नै ’सुनिश्चित भविष्य छात्रवृत्ति योजना सञ्चालन निर्देशिका, २०८३’ स्वीकृत गरी बाढीमा अभिभावक गुमाएका वा बेपत्ता भएकाका सन्तानको लागि निःशुल्क विद्यालय तहको शिक्षाको व्यवस्थापनको प्रक्रियालाई कार्यान्वयनमा लगिसकेको सन्दर्भमा उनीहरुलाई उच्च शिक्षामा समेत छात्रवृत्तिको व्यवस्था गर्ने सम्बन्धमा नयाँ निर्णय गरिएको शिक्षा तथा खेलकुद मन्त्री सस्मित पोखरेलले बताएका छन् । ’प्रथम चरणमा २७ जनालाई छात्रवृत्ति दिइनेछ। यसपछि पनि क्रमशः पहिचान गर्दै चरणबद्ध रुपमा छात्रवृत्ति उपलब्ध गराउनेछौँ,’ मन्त्री पोखरेलले भने । प्रस्तावित व्यवस्था अनुसार निजी विद्यालयमा अध्ययन गरिरहेका बालबालिकाको हकमा शिक्षा विभागले अभिलेख राखेर सम्बन्धित छाता संस्था र स्थानीय तहलाई पत्राचार गर्नेछ । त्यसैगरी सामुदायिक विद्यालयमा अध्ययनरत विद्यार्थीका लागि सम्बन्धित स्थानीय तहलाई पत्राचार गरिनेछ । त्यस्तै उच्च शिक्षा अध्ययन गरिरहेका विद्यार्थीहरूलाई भने विश्वविद्यालय र क्याम्पसहरूमा नियमित रूपमा उपलब्ध हुने छात्रवृत्ति कोटामै थप गरी समावेश गराउन मन्त्रीस्तरीय निर्णयबाट निर्देशन दिइएको छ । यसको लागि मन्त्रालयले विश्वविद्यालय अनुदान आयोग मार्फत आवश्यक व्यवस्था गर्नेछ । यो निर्णयसँगै भोटेकोशी बाढीमा अभिभावक गुमाएका तथा बेपत्ताका सन्तानले जुनसुकै विषयमा पनि उच्च शिक्षासम्म निःशुल्क पढ्न पाउने भएका छन् ।
सरकारले सुरु गर्यो ‘तिहार विशेष रैथाने मेला’, देशैभर विस्तार गर्ने योजना
काठमाडौं । नेपाली मौलिक संस्कृति, रैथाने उत्पादन तथा स्थानीय उद्यमशीलताको प्रवद्र्धन गर्दै स्वदेशी उत्पादनलाई बजारसँग जोड्ने उद्देश्यसहित सरकारले तिहार विशेष रैथाने मेला आयोजना गरेको छ । सरकारको पूर्ण स्वामित्वमा रहेको खाद्य व्यवस्था तथा व्यापार कम्पनी लिमिटेडमार्फत आजदेखि काठमाडौंको थापाथलीस्थित कम्पनीको बागमती प्रादेशिक कार्यालय परिसरमा तीनदिने मेला सुरु भएको छ । रैथाने उत्पादनको बजारीकरण, स्थानीय उद्यमीलाई प्रोत्साहन तथा परम्परागत खाद्य संस्कृति र उत्पादनको संरक्षणका निम्ति प्रधानमन्त्री तथा मन्त्रिपरिषद्को सहजीकरणमा मेला आयोजना गरिएको हो । मेलामा कृषक, कृषक समूह, कृषि सहकारी संस्था, महिला तथा युवा उद्यमी एवं स्थानीय उत्पादकले आफ्ना उत्पादनको प्रदर्शनी तथा बिक्रीका लागि स्टल राखेका छन् । मेलामा तिहार विशेष परिकार तथा परम्परागत खाद्य सामग्री, फूल तथा माला, सजावटका सामग्री, परम्परागत पोसाक, हस्तकलाका सामग्री, माटाका भाँडाकुँडा, रैथाने बाली, कृषि उपजलगायत स्वदेशी तथा स्थानीय उत्पादनलाई प्राथमिकता दिइएको छ । स्थानीय उत्पादनको पहिचान, प्रवद्र्धन र बजारीकरणका माध्यमबाट कृषक तथा साना उद्यमीको आर्थिक गतिविधि विस्तार गर्ने, महिला तथा युवा उद्यमशीलतालाई प्रोत्साहन गर्ने र स्वदेशी उत्पादनको उपभोग बढाउने सरकारको लक्ष्य छ । साथै, आगामी दिनमा पनि साताको दुई दिन सार्वजनिक बिदाको समय उपयोग गर्दै सप्ताहान्तमा यस्ता कार्यक्रम सञ्चालन गरिनेछ । सरकारले यही अभ्यास र मोडेललाई देशका ७७ वटै जिल्लामा विस्तार गर्दै अघि बढाउने योजना बनाएको छ ।
लुम्बिनी लायन्सको अपराजित यात्रामा ब्रेक लगाउँदै काठमाडौं गोर्खाज विजयी
काठमाडौं । नेपाल प्रिमियर लिग (एनपीएल) मा काठमाडौं गोर्खाजले साविक विजेता लुम्बिनी लायन्सको लगातारको अपराजित यात्रालाई ब्रेक लगाउँदै शनिबार ३६ रनको रोमाञ्चक जित दर्ता गरेको छ । कीर्तिपुरस्थित टीयू क्रिकेट मैदानमा काठमाडौंले दिएको १६१ रनको लक्ष्य पछ्याएको लुम्बिनी १९.३ ओभरमा १२४ रनमा समेटियो । लगातार १० खेलसम्म अपराजित रहेको लुम्बिनीको यो यस सिजनको पहिलो हार हो । जितसँगै काठमाडौं ४ खेलबाट ६ अंक जोड्दै रनरेटका आधारमा दोस्रो स्थानमा उक्लिएको छ भने पराजित लुम्बिनी ५ खेलबाट ७ अंकसहित अझै शीर्ष स्थानमै कायम छ । टस हारेर पहिले ब्याटिङको निम्तो पाएको काठमाडौं गोर्खाजले निर्धारित २० ओभरमा ८ विकेट गुमाएर १६० रन बनाएको थियो । काठमाडौंका लागि अष्ट्रेलियाका दिग्गज ब्याटर डेभिड वार्नर र साहिल पटेलले पहिलो विकेटका लागि १०४ रनको शतकीय साझेदारी गर्दै टोलीलाई उत्कृष्ट सुरुवात दिलाएका थिए । वार्नरले ५० बलमा ९ चौका र १ छक्काको मद्दतमा सर्वाधिक ६६ रन तथा पटेलले ३६ बलमा ३८ रन बनाए। तर, १४ औं ओभरमा पटेल र १६औं ओभरमा वार्नर आउट भएपछि काठमाडौंको ब्याटिङ लाइनअप धर्मराउन पुग्यो । तल्लो क्रमका ब्याटरहरू सस्तैमा समेटिए पनि सहान अराचिगेले १५ बलमा अविजित ३४ रन जोडेपछि टोली सम्मानजनक स्कोरसम्म पुगेको थियो । बलिङतर्फ लुम्बिनीका अभिशेष गौतम, शेर मल्ल र रुबेन ट्रम्पलम्यानले २-२ विकेट लिए । १६१ रनको लक्ष्य पछ्याउने क्रममा लुम्बिनीको सुरुवात अत्यन्तै खराब रह्यो । काठमाडौंका बलर जहानदाद खान र कप्तान करण केसीले पावर प्लेमै लुम्बिनीको टप र मिडल अर्डर ध्वस्त पारेपछि टोलीले ६ विकेट गुमाएर मात्र २५ रन बनाएको थियो । डार्शी सर्ट (४), आसिफ (१), निरोशन डिकवेला (१४) र ग्रान्ड स्टेवार्ट (६) सस्तैमा पेभेलियन फर्किए भने कप्तान रोहित पौडेल र दिलिप नाथले खाता सम्म खोल्न सकेनन् । त्यसपछि सन्दिप जोराले इनिङ्स सम्हाल्ने प्रयास गर्दै ४५ बलमा ४४ रनको धैर्यतापूर्ण योगदान दिए । उनले रुबेन ट्रम्पलम्यान (११) सँग २१ रन र अभिशेष गौतम (१६) सँग आठौं विकेटका लागि ४६ रनको साझेदारी गर्दै टोलीलाई थप संकटबाट जोगाए । तर, १८औं ओभरमा जोरा र अन्तिम ओभरमा शेर मल्ल (१२) आउट भएसँगै लुम्बिनी पराजित हुन पुग्यो ।काठमाडौंका लागि उत्कृष्ट बलिङ गरेका जहानदाद खानले ४ ओभरमा २३ रन खर्चेर ४ विकेट हात पारे भने कप्तान करण केसीले २ तथा शाहब आलम, सन्तोष यादव, रसिद खान र सहान अराचिगेले १-१ विकेट लिए ।
