लुम्बिनी लायन्सको अपराजित यात्रामा ब्रेक लगाउँदै काठमाडौं गोर्खाज विजयी
काठमाडौं । नेपाल प्रिमियर लिग (एनपीएल) मा काठमाडौं गोर्खाजले साविक विजेता लुम्बिनी लायन्सको लगातारको अपराजित यात्रालाई ब्रेक लगाउँदै शनिबार ३६ रनको रोमाञ्चक जित दर्ता गरेको छ । कीर्तिपुरस्थित टीयू क्रिकेट मैदानमा काठमाडौंले दिएको १६१ रनको लक्ष्य पछ्याएको लुम्बिनी १९.३ ओभरमा १२४ रनमा समेटियो । लगातार १० खेलसम्म अपराजित रहेको लुम्बिनीको यो यस सिजनको पहिलो हार हो । जितसँगै काठमाडौं ४ खेलबाट ६ अंक जोड्दै रनरेटका आधारमा दोस्रो स्थानमा उक्लिएको छ भने पराजित लुम्बिनी ५ खेलबाट ७ अंकसहित अझै शीर्ष स्थानमै कायम छ । टस हारेर पहिले ब्याटिङको निम्तो पाएको काठमाडौं गोर्खाजले निर्धारित २० ओभरमा ८ विकेट गुमाएर १६० रन बनाएको थियो । काठमाडौंका लागि अष्ट्रेलियाका दिग्गज ब्याटर डेभिड वार्नर र साहिल पटेलले पहिलो विकेटका लागि १०४ रनको शतकीय साझेदारी गर्दै टोलीलाई उत्कृष्ट सुरुवात दिलाएका थिए । वार्नरले ५० बलमा ९ चौका र १ छक्काको मद्दतमा सर्वाधिक ६६ रन तथा पटेलले ३६ बलमा ३८ रन बनाए। तर, १४ औं ओभरमा पटेल र १६औं ओभरमा वार्नर आउट भएपछि काठमाडौंको ब्याटिङ लाइनअप धर्मराउन पुग्यो । तल्लो क्रमका ब्याटरहरू सस्तैमा समेटिए पनि सहान अराचिगेले १५ बलमा अविजित ३४ रन जोडेपछि टोली सम्मानजनक स्कोरसम्म पुगेको थियो । बलिङतर्फ लुम्बिनीका अभिशेष गौतम, शेर मल्ल र रुबेन ट्रम्पलम्यानले २-२ विकेट लिए । १६१ रनको लक्ष्य पछ्याउने क्रममा लुम्बिनीको सुरुवात अत्यन्तै खराब रह्यो । काठमाडौंका बलर जहानदाद खान र कप्तान करण केसीले पावर प्लेमै लुम्बिनीको टप र मिडल अर्डर ध्वस्त पारेपछि टोलीले ६ विकेट गुमाएर मात्र २५ रन बनाएको थियो । डार्शी सर्ट (४), आसिफ (१), निरोशन डिकवेला (१४) र ग्रान्ड स्टेवार्ट (६) सस्तैमा पेभेलियन फर्किए भने कप्तान रोहित पौडेल र दिलिप नाथले खाता सम्म खोल्न सकेनन् । त्यसपछि सन्दिप जोराले इनिङ्स सम्हाल्ने प्रयास गर्दै ४५ बलमा ४४ रनको धैर्यतापूर्ण योगदान दिए । उनले रुबेन ट्रम्पलम्यान (११) सँग २१ रन र अभिशेष गौतम (१६) सँग आठौं विकेटका लागि ४६ रनको साझेदारी गर्दै टोलीलाई थप संकटबाट जोगाए । तर, १८औं ओभरमा जोरा र अन्तिम ओभरमा शेर मल्ल (१२) आउट भएसँगै लुम्बिनी पराजित हुन पुग्यो ।काठमाडौंका लागि उत्कृष्ट बलिङ गरेका जहानदाद खानले ४ ओभरमा २३ रन खर्चेर ४ विकेट हात पारे भने कप्तान करण केसीले २ तथा शाहब आलम, सन्तोष यादव, रसिद खान र सहान अराचिगेले १-१ विकेट लिए ।
‘पैसाको बलमा पार्टी किन्ने प्रयास भयो, तर सिद्धान्त साट्न सकिँदैन’- शेरबहादुर देउवा
काठमाडौं । नेपाली कांग्रेसका पूर्वसभापति एवं पूर्वप्रधानमन्त्री शेरबहादुर देउवाले पार्टीको आधिकारिकतासम्बन्धी विवादमा आर्थिक चलखेल भएको आरोप लगाएका छन् । उनले निर्वाचन आयोगको निर्णय प्रक्रियामाथि प्रश्न उठाउँदै पार्टीको आधिकारिकता पैसाको प्रभावमा टुंग्याइएको जिकिर गरेका हुन् । शनिबार काठमाडौंमा कांग्रेस संस्थापनइतर समूहको जिल्ला अधिवेशनमा उनले निर्वाचन आयुक्तहरूलाई ज्यानको धम्की दिएपछि अर्कोको पक्षमा निर्णय गर्नुपरेको भन्ने समाचार सार्वजनिक भएको उल्लेख गरे । उनले निर्वाचन आयोगमा भएको निर्णय प्रक्रियालाई अस्वाभाविक भन्दै आर्थिक चलखेलमार्फत पार्टीको आधिकारिकता प्रभावित पारिएको आरोप लगाए । उनले पैसाको बलमा पार्टी नै किन्ने प्रयास भएको टिप्पणी गरे । देउवाले पार्टीको राजनीतिक मूल्य, सिद्धान्त र पहिचानलाई पैसासँग साट्न नसकिने बताए । ‘पार्टीको आधिकारिकतासम्बन्धी निर्णयमा दबाब र आर्थिक चलखेल भएको भन्ने आरोप सार्वजनिक भएका छन्,’ उनले भने, ‘यस्ता गम्भीर विषयमा निष्पक्ष छानबिन र सत्यतथ्य सार्वजनिक हुनुपर्छ । पार्टी पैसाको प्रभावमा होइन, विधि, विधान र कार्यकर्ताको विश्वासमा चल्नुपर्छ ।’ उनले आफूले अब पार्टी र देशका निम्ति योगदान गर्ने समय आएको बताए । ‘मैले जीवनमा धेरै कुरा पाइसकेको छु, अब मलाई व्यक्तिगत रूपमा केही पाउनु छैन, बरु पार्टी र देशका लागि योगदान दिनु छ,’ उनले भने, ‘यो पार्टीलाई जोगाउने र देशलाई समृद्ध बनाउने जिम्मेवारी हामी सबैको हो ।’ देउवाले पार्टीको आधिकारिकतासम्बन्धी विवादमा अदालतबाट न्याय पाउने विश्वास समेत व्यक्त गरे । ‘मलाई विश्वास छ, यसपटक हामीले रुख चुनाव चिह्न लिएर अघि बढ्ने अवसर पाउनेछौं,’ उनले भने, ‘अदालतबाट न्यायपूर्ण निर्णय आउनेछ भन्ने विश्वासका साथ हामी दृढतापूर्वक अघि बढ्छौँ ।’
तिहार बिदामा पनि बैंकिङ सेवा दिन राष्ट्र बैंकको निर्देशन
काठमाडौं । तिहारको सार्वजनिक बिदामा पनि बैंक तथा वित्तीय संस्थाले बैंकिङ सेवा सञ्चालन गर्नुपर्ने भएको छ । नेपाल राष्ट्र बैंकले भन्सार कार्यालयमा रहेका बैंक तथा वित्तीय संस्थाका शाखाबाट सार्वजनिक बिदाका दिनसमेत आवश्यक बैंकिङ सेवा उपलब्ध गराउन निर्देशन दिएको छ । अर्थ मन्त्रालयअन्तर्गतको भन्सार विभागले व्यापार सहजीकरण, आपूर्ति प्रणाली सुचारु राख्न तथा सेवा प्रवाहको निरन्तरता कायम गर्न तिहार बिदामा समेत बैंकिङ सेवा सञ्चालन गर्न अनुरोध गरेपछि राष्ट्र बैंकले यस्तो निर्देशन जारी गरेको हो । भन्सार विभागको कात्तिक १८ गतेको पत्रका आधारमा राष्ट्र बैंकले कात्तिक २२ गतेदेखि २६ गतेसम्म सार्वजनिक बिदाका दिन भन्सार कार्यालयमा रहेका बैंक तथा वित्तीय संस्थाका शाखाबाट आवश्यक बैंकिङ सेवा सुचारु राख्न भनेको छ । तिहारको लामो सार्वजनिक बिदाका कारण मालवस्तुको भन्सार जाँचपास प्रक्रिया प्रभावित हुन नदिन तथा आयात–निर्यातसँग सम्बन्धित कारोबारमा अवरोध हुन नदिन यस्तो व्यवस्था गरिएको हो । राष्ट्र बैंकको निर्देशन बमोजिम सम्बन्धित बैंक तथा वित्तीय संस्थाले भन्सार कार्यालयमा रहेका आफ्ना शाखाबाट आवश्यक बैंकिङ सेवा उपलब्ध गराउने व्यवस्था मिलाउनुपर्नेछ ।
काठमाडौं गोर्खाजद्वारा लुम्बिनी लायन्सलाई १६१ रनको लक्ष्य
काठमाडौं । डेभिड वार्नरको उत्कृष्ट अर्धशतकका बाबजुद नेपाल प्रिमियर लिग (एनपीएल) अन्तर्गत शनिबार भएको खेलमा काठमाडौं गोर्खाजले साविक विजेता लुम्बिनी लायन्सलाई १६१ रनको लक्ष्य प्रस्तुत गरेको छ । टस हारेर पहिले ब्याटिङ गरेको काठमाडौंले निर्धारित २० ओभरमा ८ विकेट गुमाएर १६० रन बनाएको हो । शानदार सुरुवात गरेको काठमाडौंको इनिङ्स मध्यक्रम र तल्लो क्रममा भने धर्मराएको थियो । ओपनर डेभिड वार्नर र साहिल पटेलले पहिलो विकेटका लागि १०४ रनको शतकीय साझेदारी गर्दै टोलीलाई बलियो स्थितिमा पुर्याएका थिए । १२ ओभरको समाप्तिमा बिना विकेटको क्षतिमा १०० रन बनाएको काठमाडौंको इनिङ्स १४औं ओभरमा पटेल आउट भएपछि रोकियो । पटेलले ३६ बलमा ३८ रन बनाए । त्यसपछि १६औं ओभरमा कप्तान वार्नर व्यक्तिगत ६६ रन बनाएर आउट भए । ५० बल खेलेका उनले ९ चौका र १ छक्का प्रहार गरे । वार्नर आउट भएपछि लुम्बिनीका बलर हावी हुँदै काठमाडौंको ब्याटिङ लाइन ध्वस्त बनाए । अन्त्यतिर सहान अराचिगेले अविजित ३४ रन (१५ बल, ३ चौका, १ छक्का) बनाएपछि काठमाडौंले सम्मानजनक स्कोर खडा गर्न सफल भयो । अन्य ब्याटरहरूमा करण केसीले ९ रन बनाउनुबाहेक अन्यले दोहोरो अंकमा रन जोड् सकेनन् । लुम्बिनीका लागि बलिङतर्फ रुबेन ट्रम्पलम्यान, शेर मल्ल र अभिशेष गौतमले समान २–२ विकेट लिए। अभिशेषले ४ ओभरमा मात्र १५ रन खर्चिएर किफायती बलिङ गरे भने शेर मल्लले ४ ओभरमा १९ रन खर्चेर २ विकेट हात पारे ।
‘कुलार्णवतन्त्र’ नेपाली भाषामा प्रकाशित
काठमाडौं । तन्त्रविद् सन्दीप सापकोटाद्वारा अनुवाद तथा सम्पादन गरिएको प्राचीन तान्त्रिक ग्रन्थ ‘कुलार्णवतन्त्र’ नेपाली भाषामा प्रकाशित भएको छ । तन्त्रचर्चा परिवारद्वारा प्रकाशित उक्त ग्रन्थ शनिबार मध्यपुरथिमी क्वालखुस्थित श्रीबालकुमारी मन्दिरमा अर्पण गरिएको हो । १७ अध्याय र २०५८ श्लोक समेटिएको ग्रन्थको अनुवाद प्रचलित नेपाल लिपिमा संरक्षित मूल संस्कृत पाठका आधारमा गरिएको हो । नेपाल लिपिमा उपलब्ध संस्कृत भाषाको तान्त्रिक वाङ्मयलाई नेपाली भाषामा प्रस्तुत गर्ने यस कार्यले प्राचीन ज्ञान परम्पराको अध्ययन, अनुसन्धान र प्राज्ञिक विमर्शलाई सहज बनाउने अपेक्षा गरिएको छ । तान्त्रिक आगम परम्पराको महत्त्वपूर्ण ग्रन्थ मानिने ‘कुलार्णवतन्त्र’मा तन्त्र दर्शन, साधना तथा परम्परागत ज्ञानसम्बन्धी विषय समेटिएका छन् । यसको नेपाली अनुवादले संस्कृत तथा नेपाल लिपिमा सीमित रहेको तान्त्रिक साहित्यलाई नेपाली भाषाका पाठक, अध्येता र अनुसन्धानकर्ताको पहुँचमा पुर्याउन सहयोग गर्ने विश्वास गरिएको छ । ग्रन्थ अर्पण कार्यक्रममा तन्त्रविद् महेश्वरजुजु राजोपाध्याय, पूर्वकुमारी चनिरा वज्राचार्य, तन्त्रविद् प्रा. डा. रत्न शम्शेर ज.ब.रा. लगायत विद्वान् तथा धार्मिक-सांस्कृतिक क्षेत्रका व्यक्तित्वहरूको उपस्थिति रहेको थियो ।
मन्त्री बादीले गरिन् सुर्खेत रङ्गशालाको अनुगमन
काठमाडौं । महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षामन्त्री सीता बादीले सुर्खेतस्थित रङ्गशालाको अनुगमन गरेकी छन् । कर्णाली प्रदेशमा आयोजना हुने दशौँ राष्ट्रिय खेलकुद प्रतियोगिताको तयारी, पूर्वाधार निर्माण र व्यवस्थापकीय प्रगतिको स्थिति बुझ्न मन्त्री बादी रङ्गशाला परिसर पुगेकी हुन् । अनुगमनका क्रममा उनले खेल मैदान, प्याराफिट र अन्य आवश्यक पूर्वाधारको निर्माण तथा व्यवस्थापकीय प्रगतिबारे सरोकारवालासँग विस्तृत जानकारी लिएकी छन् । प्रतियोगितालाई व्यवस्थित, भव्य र सफल बनाउन खेलाडीका लागि आवश्यक आवास, खेलस्थलको व्यवस्थापन र अन्य सेवा सुविधाका विषयमा मन्त्री बादीले चासो राखेकी छन् । राष्ट्रिय खेलकुद प्रतियोगिताले नयाँ प्रतिभाको पहिचान, खेल क्षेत्रको समग्र विकास र राष्ट्रिय एकता प्रवद्र्धनमा महत्त्वपूर्ण योगदान पु¥याउने विश्वास व्यक्त गर्दै उनले तोकिएको समयमै सम्पूर्ण तयारी पूरा गर्न निर्देशन दिइन् । कर्णाली प्रदेशमा पहिलो पटक आयोजना हुन लागेको यस राष्ट्रियस्तरको प्रतियोगिताले यस क्षेत्रको खेल पर्यटन, पूर्वाधार विकास र राष्ट्रिय पहिचान स्थापित गर्न कोसेढुङ्गा साबित हुने अपेक्षा गरिएको छ ।
नेपाल संवत् ११४७ को स्वागतमा कांग्रेसको सुकुण्दा र्याली, सभापति थापा सहभागी
काठमाडौं । नेपाली कांग्रेस काठमाडौं महानगर समितिले नेपाल संवत ११४७ को अवसरमा आज सुकुण्दा ¥याली आयोजना गरेको छ । ¥यालीमा नेपाली कांग्रेसका सभापति गगनकुमार थापा सहभागी भएका छन् । नेपाल संवतको नयाँ वर्षको स्वागत तथा मौलिक कला, संस्कृति र परम्पराको संरक्षण एवं प्रवद्र्धन गर्ने उद्देश्यले ¥याली आयोजना गरिएको हो । ¥यालीमा सहभागीहरूले सुकुण्डा बोकेर नगरका विभिन्न क्षेत्रमा परिक्रमा गरेका थिए । नेपाल संवत नेपाली मौलिक पहिचान, इतिहास र सांस्कृतिक गौरवसँग जोडिएको संवत हो । विशेषगरी नेवार समुदायले नयाँ वर्षका रूपमा हर्षोल्लासका साथ मनाउने नेपाल संवत्ले राष्ट्रिय एकता, सांस्कृतिक विविधता र परम्परागत सम्पदाको महत्त्वलाई समेत उजागर गर्दै आएको छ । कांग्रेस महानगर समितिले आयोजना गरेको ¥यालीमा पार्टीका नेता तथा कार्यकर्ता, स्थानीय जनप्रतिनिधि र सर्वसाधारणको सहभागिता रहेको थियो । ¥यालीले नेपाल संवत्को ऐतिहासिक महत्वलाई नयाँ पुस्तासम्म पु¥याउन तथा मौलिक संस्कृतिको संरक्षणमा टेवा पु¥याउने अपेक्षा गरिएको छ ।
उद्यमी, सीए र पूर्वबैंकरले हाँकेको सिद्धार्थ बैंक
काठमाडौं । नेपालको बैंकिङ क्षेत्रमा आफ्नो छुट्टै पहिचान बनाएको सिद्धार्थ बैंकले वित्तीय कारोबार विस्तारसँगै संस्थागत सुशासन र अनुभवी नेतृत्वलाई पनि प्राथमिकतामा राख्दै आएको छ । वित्तीय क्षेत्रदेखि उद्योग, व्यापार र व्यवस्थापनसम्म लामो अनुभव हासिल गरेका व्यक्तिहरूको नेतृत्वमा बैंकले आफ्नो व्यावसायिक यात्रा अघि बढाइरहेको छ । कम्पनी ऐन, २०६३ बमोजिम २०५८ असोज १२ गते स्थापना भएको सिद्धार्थ बैंकले २०५९ पुस ९ गते नेपाल राष्ट्र बैंकबाट वित्तीय कारोबार सञ्चालन गर्ने अनुमति पाएको थियो । त्यसको भोलिपल्ट अर्थात् २०५९ पुस १० गतेदेखि बैंकले नेपाल राष्ट्र बैंकबाट ‘क’ वर्गको इजाजतपत्र प्राप्त संस्थाका रूपमा औपचारिक रूपमा वित्तीय कारोबार सुरु गरेको हो । स्थापनाकालदेखि नै संस्थापक तथा सञ्चालकहरूको अनुभव र व्यावसायिक पृष्ठभूमिलाई आफ्नो संस्थागत संरचनाको महत्त्वपूर्ण पक्ष बनाउँदै आएको बैंकमा संस्थापक सेयरधनीहरूको ५१ प्रतिशत र सर्वसाधारण सेयरधनीहरूको ४९ प्रतिशत स्वामित्व रहेको छ । बैंकको चुक्ता पुँजी १९ अर्ब ७७ करोड रुपैयाँ पुगेको छ । असोज मसान्तसम्म बैंकले ३ खर्ब ३४ अर्ब ८२ करोड रुपैयाँ निक्षेप संकलन गरेको छ भने २ खर्ब ४४ अर्ब ४ करोड रुपैयाँ कर्जा लगानी गरेको छ । बैंकको वित्तीय कारोबारलाई व्यवस्थित रूपमा अघि बढाउने जिम्मेवारी सञ्चालक समितिले निर्वाह गर्दै आएको छ । समितिको नेतृत्व अध्यक्ष राहुल अग्रवालले गरिरहेका छन् । उनीसँगै दिनेश शंकर पालिखे, वीरेन्द्रकुमार शाह, अंकित केडिया र भोजन अर्याल सञ्चालकका रूपमा आबद्ध छन् । त्यस्तै, कमला वाग्लेले स्वतन्त्र सञ्चालकका रूपमा समितिमा प्रतिनिधित्व गरिरहेकी छन् । राहुल अग्रवाल सिद्धार्थ बैंकका अध्यक्ष राहुल अग्रवाल बैंकको सञ्चालक समितिमा २१ जनवरी २०२१ देखि सञ्चालकका रूपमा आबद्ध छन् । उनले १२ जनवरी २०२५ देखि बैंकको अध्यक्षको जिम्मेवारी सम्हाल्दै आएका छन् । बेलायतको लन्डनस्थित मिडलसेक्स विश्वविद्यालयबाट व्यवसाय प्रशासनमा स्नातकोत्तर गरेका अग्रवालसँग नेपालको औद्योगिक तथा व्यावसायिक क्षेत्रमा साढे २ दशकको अनुभव रहेको छ । रिलायन्स ग्रुपका सञ्चालकका रूपमा कार्यरत उनी रिलायन्स सुपरटेक सिमेन्ट प्रालि., रिलायन्स सिमेन्ट प्रालि., अन्नपूर्ण क्वारिज प्रालि. र रिलायन्स पेपर मिल्स प्रालिको सञ्चालकका रूपमा समेत आबद्ध छन् । उनी रिलायन्स ट्रेड सेन्टरका सञ्चालक पनि हुन् । अग्रवालले यसअघि सिद्धार्थ क्यापिटल लिमिटेड र शुभलक्ष्मी फाइनान्स लिमिटेडको सञ्चालक समितिमा समेत रहेर काम गरिसकेका छन् । नेपाल तथा भारतको बैंकिङ क्षेत्रमा समेत अनुभव हासिल गरेका अग्रवालसँग औद्योगिक, व्यावसायिक र वित्तीय क्षेत्रको अनुभव रहेको छ । दिनेश शंकर पालिखे बैंकका सञ्चालक दिनेश शंकर पालिखे बैंकका प्रवर्द्धक सेयरधनीहरूको प्रतिनिधित्व गर्दै सञ्चालक समितिमा आबद्ध छन् । उनी २७ जुन २०१६ देखि बैंकको सञ्चालक समितिको सदस्यका रूपमा कार्यरत छन् । हाल उनी बैंकको कर्मचारी सेवा तथा सुविधा समितिको संयोजकसमेत हुन् । पालिखेले त्रिभुवन विश्वविद्यालयबाट व्यवस्थापन विषयमा स्नातकोत्तर गरेका छन् । व्यवसाय तथा लगानी क्षेत्रमा करिब २९ वर्षको अनुभव हासिल गरेका उनी जलविद्युत्, मर्चेन्ट बैंकिङ तथा लगानी व्यवस्थापनसम्बन्धी कम्पनीहरूमा संलग्न रहँदै आएका छन् । उनले यसअघि १० फेब्रुअरी २०१३ देखि २० जुन २०१६ सम्म बिजनेस युनिभर्सल डेभलपमेन्ट बैंकको सञ्चालकका रूपमा जिम्मेवारी निर्वाह गरेका थिए । व्यावसायिक क्षेत्रसँगै सामाजिक गतिविधिमा समेत सक्रिय पालिखे नेपाल क्यान्सर रिलिफ सोसाइटी, रोटरी क्लब अफ पोखरा अन्नपूर्ण र लायन्स क्लब अफ पोखरा हिमालयनलगायत विभिन्न सामाजिक तथा व्यावसायिक संस्थामा आबद्ध छन् । वीरेन्द्रकुमार शाह वीरेन्द्रकुमार शाह १२ जनवरी २०२५ देखि बैंकको सञ्चालक समितिको सदस्यका रूपमा कार्यरत छन् । यसअघि पनि उनले सन् २०१७ फेब्रुअरीदेखि सन् २०२१ जनवरीसम्म सञ्चालकको जिम्मेवारी सम्हालेका थिए । हाल शाह बैंकको लेखापरीक्षण समितिको संयोजक तथा जोखिम व्यवस्थापन समितिको सदस्यका रूपमा कार्यरत छन् । त्रिभुवन विश्वविद्यालयबाट व्यवस्थापन विषयमा स्नातक गरेका उनीसँग नेपालको औद्योगिक तथा व्यावसायिक क्षेत्रमा २५ वर्षको अनुभव रहेको छ । शाहले प्रेस्टिज लुप म्याट इन्डस्ट्रिज प्रालि. र डीबी इन्डस्ट्रिज प्रालिको सञ्चालक तथा एसटीसी फेब्रिक प्रालिको प्रबन्ध सञ्चालकका रूपमा काम गरेका छन् । यसैगरी, उनले सन् २००० देखि २०१३ सम्म तत्कालीन एभरेस्ट इन्स्योरेन्स कम्पनीको सञ्चालकका रूपमा समेत जिम्मेवारी सम्हालेका थिए । औद्योगिक तथा व्यावसायिक क्षेत्रमा लामो अनुभव हासिल गरेका शाह बैंकको लेखापरीक्षण र जोखिम व्यवस्थापनसम्बन्धी जिम्मेवारीमा समेत संलग्न छन् । अंकित केडिया अंकित केडिया लेभरेज होल्डिङ्स प्रालिको प्रतिनिधित्व गर्दै सिद्धार्थ बैंकको सञ्चालक समितिमा आबद्ध छन् । उनी २९ जनवरी २०२१ देखि बैंकको सञ्चालक समितिको सदस्यका रूपमा कार्यरत छन् । हाल उनी बैंकको जोखिम व्यवस्थापन समितिको संयोजक तथा कर्मचारी सेवा तथा सुविधा समितिको सदस्यका रूपमा जिम्मेवारी निर्वाह गरिरहेका छन् । केडियाले सिंगापुरस्थित जेम्स कुक विश्वविद्यालयबाट व्यवसाय प्रशासनमा स्नातकोत्तर गरेका छन् । नेपालको कृषि, औद्योगिक तथा व्यावसायिक क्षेत्रमा उनको १४ वर्षभन्दा बढीको अनुभव रहेको छ । उनले महावीर ओभरसिज प्रालि., लेभरेज होल्डिङ्स प्रालि. र महावीर इन्टरनेसनल सप्लायर्स प्रालिको प्रबन्ध सञ्चालकका रूपमा काम गरेका छन् । साथै उनी ग्लोबल पल्स कन्फेडरेसनमा नेपालको प्रतिनिधित्व गर्दै सञ्चालकका रूपमा समेत कार्यरत छन् । कृषि, उद्योग तथा व्यवसायको अनुभवलाई वित्तीय क्षेत्रसँग जोड्दै आएका केडिया बैंकको जोखिम व्यवस्थापनसम्बन्धी जिम्मेवारीमा समेत सक्रिय छन् । भोजन अर्याल भोजन अर्याल रिनुअल इन्भेस्टमेन्ट प्रालिको प्रतिनिधित्व गर्दै सिद्धार्थ बैंकको सञ्चालक समितिमा आबद्ध छन् । उनी १२ जनवरी २०२५ देखि बैंकको सञ्चालक समितिको सदस्यका रूपमा कार्यरत छन् । हाल उनी बैंकको सम्पत्ति शुद्धीकरण तथा आतङ्कवादी क्रियाकलापमा वित्तीय लगानी निवारण समितिको संयोजक छन् । वरिष्ठ लेखापरीक्षण (सीए)का रूपमा परिचित अर्याल भारतको चार्टर्ड एकाउन्टेन्ट संस्था र नेपाल चार्टर्ड एकाउन्टेन्ट्स संस्थाका सदस्य हुन् । उनले त्रिभुवन विश्वविद्यालयबाट व्यवस्थापन विषयमा स्नातक गरेका छन् । वित्तीय व्यवस्थापन, आन्तरिक नियन्त्रण तथा संस्थागत सुशासनका क्षेत्रमा उनको १२ वर्षभन्दा बढीको व्यावसायिक अनुभव रहेको छ । उनी बी. अर्याल एन्ड एसोसिएट्सका सञ्चालकसमेत हुन् । अर्यालले नेपाल र भारतका विभिन्न बैंक तथा वित्तीय संस्थामा वरिष्ठ व्यवस्थापकीय जिम्मेवारी सम्हालिसकेका छन् । साथै उनले नेपाल उद्योग वाणिज्य महासङ्घको उद्योग समितिको सदस्यका रूपमा समेत काम गरेका छन् । वित्तीय व्यवस्थापन र संस्थागत सुशासनसम्बन्धी अनुभव हासिल गरेका अर्यालले बैंकको सम्पत्ति शुद्धीकरण तथा आतङ्कवादी क्रियाकलापमा वित्तीय लगानी निवारणसम्बन्धी समितिको नेतृत्व गरिरहेका छन् । कमला वाग्ले कमला वाग्ले सिद्धार्थ बैंककी स्वतन्त्र सञ्चालक हुन् । उनी ६ जुन २०२५ मा बैंकको स्वतन्त्र सञ्चालकमा नियुक्त भएकी हुन् । हाल उनी बैंकको सम्पत्ति शुद्धीकरण तथा आतङ्कवादी क्रियाकलापमा वित्तीय लगानी निवारण समितिको सदस्यका रूपमा कार्यरत छन् । वाग्लेले त्रिभुवन विश्वविद्यालयबाट व्यवसाय प्रशासनमा स्नातकोत्तर गरेकी छन् । बैंकिङ क्षेत्रमा साढे २ दशक बढीको अनुभवी उनले एभरेस्ट बैंक लिमिटेडमा विभिन्न जिम्मेवारीमा रहेर काम गरेकी थिइन् । बैंकिङ सञ्चालन तथा वित्तीय सुशासनसम्बन्धी क्षेत्रमा हासिल गरेको अनुभवले सञ्चालक समितिको स्वतन्त्र निगरानी र परामर्श भूमिकालाई सुदृढ बनाउन सहयोग पुग्ने अपेक्षा गरिएको छ ।
