आरम्भ चौतारी लघुवित्तको स्वतन्त्र सञ्चालकमा कल्पना केसी नियुक्त
काठमाडौं । आरम्भ चौतारी लघुवित्त वित्तीय संस्था लिमिटेडको स्वतन्त्र सञ्चालकमा कल्पना केसी नियुक्त भएकी छन् । संस्थाको सञ्चालक समितिको १८३औँ बैठकले केसीलाई स्वतन्त्र सञ्चालक पदमा नियुक्त गर्ने निर्णय गरेको हो । यसअघि स्वतन्त्र सञ्चालक रहेकी सम्झना श्रेष्ठले व्यक्तिगत कारण देखाउँदै पदबाट राजीनामा दिएकी थिइन् । उनको राजीनामा कात्तिक १६ गतेदेखि लागू हुने गरी सञ्चालक समितिले स्वीकृत गरेको छ । श्रेष्ठको राजीनामापछि रिक्त रहेको पदमा काठमाडौंको पुरानो बानेश्वर–९, बत्तीसपुतली निवासी केसीलाई नियुक्त गरिएको संस्थाले नेपाल स्टक एक्सचेन्ज (नेप्से) लाई जानकारी गराएको छ ।
बिग मार्टबाट ४१५ रुपैयाँको सामान किन्ने उपभोक्ताले जिते १० लाखको बम्पर पुरस्कार
काठमाडौं । सरकारले सञ्चालन गरेको करदाता प्रोत्साहन कार्यक्रमअन्तर्गत जनकपुरका एक उपभोक्ताले १० लाख रुपैयाँको बम्पर पुरस्कार जितेका छन् । कात्तिक १ देखि १५ गतेसम्मको पहिलो पाक्षिक अवधिका लागि आयोजित लक्की ड्रमार्फत जनकपुरका उपभोक्ताले उक्त पुरस्कार जितेका हुन् । कात्तिक ५ गते बिग मार्टबाट ४१५ रुपैयाँको सामान खरिद गरेका ०९८०४६५५८१७५ नम्बरका करदाताले १० लाख रुपैयाँको बम्पर उपहार प्राप्त गरेका हुन् । अर्थ मन्त्रालयमा आयोजित ‘कात्तिक महिनाको पहिलो पाक्षिक करदाता प्रोत्साहन पुरस्कार कार्यक्रम’ मा लक्की ड्रमार्फत विजेता छनोट गरिएको थियो । कार्यक्रमअन्तर्गत १५ जना उपभोक्तालाई जनही १ लाख ३३ हजार ३४ रुपैयाँ पुरस्कार दिने व्यवस्था गरिएको छ । यसका साथै प्रत्येक पाक्षिक अवधिमा एक जनालाई १० लाख रुपैयाँको बम्पर पुरस्कार प्रदान गर्ने कार्यक्रम रहेको छ । बम्पर पुरस्कार विजेता उपभोक्तालाई आन्तरिक राजस्व विभागका महानिर्देशक डा. भीष्मकुमार भुसालले टेलिफोनमार्फत बधाई दिएका थिए । कार्यक्रममा क्रिकेट खेलाडी ललितनारायण राजवंशीसमेत उपस्थित थिए ।
आरम्भ चौतारी लघुवित्तले लाभांश नदिने
काठमाडौं । आरम्भ चौतारी लघुवित्त वित्तीय संस्था लिमिटेडले आर्थिक वर्ष २०८२/८३ मा सेयरधनीलाई कुनै पनि लाभांश वितरण नगर्ने भएको छ । संस्थाको आइतबार बसेको सञ्चालक समितिको १८३औँ बैठकले गत आर्थिक वर्षको वित्तीय विवरण स्वीकृत गर्दै लाभांश वितरण नगर्ने निर्णय गरेको हो । बैठकले २०८३ असार मसान्तसम्मको वासलात, आर्थिक वर्ष २०८२/८३ को नाफा–नोक्सान हिसाब तथा नगद प्रवाह विवरणलगायतका वित्तीय विवरण छलफल गरी स्वीकृत गरेको छ । स्वीकृत वित्तीय विवरण अन्तिम स्वीकृतिका लागि नेपाल राष्ट्र बैंकमा पेस गर्ने निर्णयसमेत भएको संस्थाले नेपाल स्टक एक्सचेन्ज (नेप्से) लाई जानकारी गराएको छ । यससँगै आरम्भ चौतारी लघुवित्तका सेयरधनीले आर्थिक वर्ष २०८२/८३ को मुनाफाबाट बोनस सेयर तथा नगद लाभांश नपाउने भएका छन् ।
मकर जितुमाया सुरी हाइड्रोपावरले १३.६८ प्रतिशत लाभांश दिने
काठमाडौं । मकर जितुमाया सुरी हाइड्रोपावर लिमिटेडले सेयरधनीलाई १३.६८ प्रतिशत लाभांश वितरण गर्ने प्रस्ताव गरेको छ । कम्पनीको आइतबार बसेको सञ्चालक समितिको बैठकले आर्थिक वर्ष २०८२/८३ को सञ्चित मुनाफाबाट हाल कायम चुक्ता पुँजीको १३ प्रतिशत बोनस सेयर र कर प्रयोजनका लागि ०.६८४२ प्रतिशत नगद लाभांश वितरण गर्ने प्रस्ताव गरेको हो । कम्पनीको हाल कायम चुक्ता पुँजी ७६ करोड रुपैयाँ रहेको छ । यसअनुसार कम्पनीले ९ करोड ८८ लाख रुपैयाँ बराबरको बोनस सेयर वितरण गर्नेछ । त्यस्तै, बोनस सेयरमा लाग्ने कर प्रयोजनका लागि ५२ लाख रुपैयाँ बराबरको नगद लाभांश वितरण गर्ने प्रस्ताव गरिएको छ । प्रस्तावित बोनस सेयर तथा नगद लाभांश विद्युत् नियमन आयोग र नेपाल धितोपत्र बोर्डबाट स्वीकृत भई आगामी वार्षिक साधारणसभाबाट पारित भएपछि सेयरधनीलाई वितरण गरिने कम्पनीले जनाएको छ ।
सुनको मूल्य तोलामा २ हजार ३ सय रुपैयाँले बढ्यो
काठमाडौं । सोमबार सुनचाँदीको मूल्यमा वृद्धि भएको छ । नेपाल सुनचाँदी व्यवसायी महासंघका अनुसार आज सुनको मूल्य तोलामा २ हजार ३ सय रुपैयाँ बढेको हो । महासंघले सोमबारका लागि सुनको मूल्य प्रतितोला २ लाख ७४ हजार ३ सय रुपैयाँ निर्धारण गरेको छ । आइतबार सुन प्रतितोला २ लाख ७२ हजार रुपैयाँमा कारोबार भएको थियो । आइतबार सुनको मूल्य तोलामा ८ हजार ३ सय रुपैयाँ घटेको थियो । त्यस्तै, सोमबार चाँदीको मूल्य पनि तोलामा ७० रुपैयाँ बढेको छ । आइतबार प्रतितोला ३ हजार ६५० रुपैयाँमा कारोबार भएको चाँदी आज बढेर ३ हजार ७२० रुपैयाँ पुगेको छ ।
गाउँगाउँमा सिंहदरबार : अब स्थानीय तहबाटै जग्गासम्बन्धी सेवा
काठमाडौं । सरकारले आगामी एक महिनाभित्र देशभरका सबै स्थानीय तहबाट भूमि प्रशासनसम्बन्धी सेवा सञ्चालन गर्ने निर्णय गरेको छ । प्रधानमन्त्री बालेन शाहले सोमबार सामाजिक सञ्जाल फेसबुकमार्फत उक्त जानकारी दिएका हुन् । उनका अनुसार हालसम्म ३३ वटा स्थानीय तहबाट भूमि प्रशासनसम्बन्धी सेवा सफलतापूर्वक सञ्चालन भइरहेको छ । सरकारले बाँकी रहेका सबै स्थानीय तहबाट समेत आगामी एक महिनाभित्र जग्गासम्बन्धी सेवा अनिवार्य रूपमा सञ्चालन गर्ने व्यवस्था मिलाउने निर्णय गरेको प्रधानमन्त्री शाहले बताएका छन् । प्रधानमन्त्री शाहले संघीय लोकतान्त्रिक गणतन्त्रको मूल मर्म राज्य र नागरिकबीचको दूरी घटाउनु रहेको उल्लेख गर्दै सरकारी सेवा लिन नागरिक टाढाका कार्यालय धाउनुपर्ने अवस्थाको अन्त्य गर्नुपर्ने बताएका छन् । सरकारको शासकीय सुधारसम्बन्धी एक सय कार्यसूचीअन्तर्गत भूमि प्रशासनका सेवा स्थानीय तहबाटै प्रवाह गर्ने लक्ष्य राखिएको उनले बताएका छन् । नेपालको संविधान, स्थानीय सरकार सञ्चालन ऐन, २०७४ र भूमि सम्बन्धी केही नेपाल ऐन संशोधन गर्ने अध्यादेश, २०८३ मा भएका व्यवस्थाअनुसार भूमि प्रशासनका सेवा स्थानीय तहमा हस्तान्तरण गर्ने प्रक्रिया अघि बढाइएको हो । प्रधानमन्त्री शाहका अनुसार यस व्यवस्थाले स्थानीय तहलाई भूमि प्रशासनसम्बन्धी संवैधानिक तथा कानुनी अधिकार प्रयोग गर्न सहज हुनेछ । साथै नागरिकले जग्गासम्बन्धी सेवा लिन भूमि प्रशासन तथा नापी कार्यालय धाउनुपर्ने बाध्यता कम हुने र सेवा थप सरल तथा सहज हुने सरकारको विश्वास छ । यस कार्यका लागि स्थानीय तहलाई आवश्यक पर्ने सम्पूर्ण सहयोग उपलब्ध गराउन सरकार प्रतिबद्ध रहेको पनि प्रधानमन्त्री शाहले बताएका छन् ।
हिमालयन लघुवित्तको ५ प्रतिशत लाभांश घोषणा
काठमाडौं । हिमालयन लघुवित्त वित्तीय संस्था लिमिटेडले सेयरधनीलाई ५ प्रतिशत लाभांश वितरण गर्ने प्रस्ताव गरेको छ । संस्थाको शुक्रबार बसेको सञ्चालक समितिको २६२औँ बैठकले आर्थिक वर्ष २०८२/८३ को वितरणयोग्य मुनाफाबाट हाल कायम चुक्ता पुँजीको ५ प्रतिशत लाभांश वितरण गर्ने प्रस्ताव गरेको हो । प्रस्तावित लाभांशमध्ये ४.७५ प्रतिशत बोनस सेयर र ०.२५ प्रतिशत नगद लाभांश (बोनस सेयरमा लाग्ने कर प्रयोजनका लागि) रहेको छ । संस्थाको हाल कायम चुक्ता पुँजी ३४ करोड १० लाख ८६ हजार ३५ रुपैयाँ ८४ पैसा रहेको छ । यसअनुसार १ करोड ६२ लाख १ हजार ५८६ रुपैयाँ ७० पैसा बराबरको बोनस सेयर र ८ लाख ५२ हजार ७१५ रुपैयाँ ९ पैसा नगद लाभांश वितरण हुनेछ । संस्थाको प्रस्तावित लाभांश नेपाल राष्ट्र बैंकबाट स्वीकृत भई आगामी वार्षिक साधारणसभाबाट पारित भएपछि सेयरधनीलाई वितरण गरिनेछ ।
आरएसडीसी लघुवित्तले ९.४० प्रतिशत नगद लाभांश दिने
काठमाडौं । आरएसडीसी लघुवित्त वित्तीय संस्था लिमिटेडले सेयरधनीलाई ९.४० प्रतिशत नगद लाभांश वितरण गर्ने प्रस्ताव गरेको छ । संस्थाको आइतबार बसेको सञ्चालक समितिको १९१औँ बैठकले आर्थिक वर्ष २०८२/८३ को वितरणयोग्य मुनाफाबाट हाल कायम चुक्ता पुँजीको ९.४० प्रतिशत नगद लाभांश (करसहित) वितरण गर्ने प्रस्ताव गरेको हो । संस्थाको हाल कायम चुक्ता पुँजी १ अर्ब ३ करोड ४० लाख ६४ हजार ४१७ रुपैयाँ रहेको छ । प्रस्तावित लाभांशअनुसार सेयरधनीले कुल ९ करोड ७२ लाख २ हजार ५५ रुपैयाँ २० पैसा नगद लाभांश पाउनेछन् । उक्त लाभांश वितरण प्रस्ताव स्वीकृतिका लागि नेपाल राष्ट्र बैंकमा पठाउने निर्णय भएको संस्थाले जनाएको छ । नेपाल राष्ट्र बैंकबाट स्वीकृति प्राप्त भएपछि संस्थाको १३औँ वार्षिक साधारणसभाबाट पारित गरी प्रचलित कानुनी प्रक्रिया पूरा गरेर सेयरधनीलाई लाभांश वितरण गरिने संस्थाले जनाएको छ ।
