युनिलिभर नेपालले प्रतिकित्ता १ हजार ५४० रुपैयाँ लाभांश दिने
काठमाडौं । युनिलिभर नेपाल लिमिटेडले गत आर्थिक वर्ष २०८२/८३ को नाफाबाट सेयरधनीलाई प्रतिकित्ता १ हजार ५४० रुपैयाँ लाभांश वितरण गर्ने प्रस्ताव गरेको छ । कम्पनीको शुक्रबार बसेको सञ्चालक समितिको १९७औँ बैठकले आर्थिक वर्ष २०८२/८३ को लेखापरीक्षण गरिएको वार्षिक वित्तीय विवरण स्वीकृत गर्दै उक्त लाभांश वितरण गर्ने प्रस्ताव गरेको हो । कम्पनीले लाभांश वितरण प्रयोजनका लागि आगामी मंसिर ९ गतेदेखि २३ गतेसम्म सेयर दाखिला खारेज (बुक क्लोज) गर्ने निर्णय गरेको छ । यसअनुसार मंसिर ८ गतेसम्म नेपाल स्टक एक्सचेन्ज (नेप्से) मा कारोबार भई कायम रहेका सेयरधनीले प्रस्तावित लाभांश प्राप्त गर्न सक्नेछन् । कम्पनीको प्रस्तावित लाभांश आगामी वार्षिक साधारणसभाबाट पारित भएपछि सेयरधनीलाई वितरण गरिनेछ ।
कामना सेवा फुटसल कपमा पुरुषतर्फ कुमारी र महिलातर्फ लुम्बिनी च्याम्पियन
काठमाडौं । कामना सेवा विकास बैंकले आफ्नो २०औँ वार्षिकोत्सवको अवसरमा आयोजना गरेको ‘कामना सेवा फुटसल कप’ को छैटौँ सिजन आइतबार सम्पन्न भएको छ । बैंक तथा वित्तीय संस्थाबीच आपसी सद्भाव, सहकार्य र सम्बन्ध अभिवृद्धि गर्ने उद्देश्यले आयोजित प्रतियोगिता धन्यन्तरी फुटसलमा सम्पन्न भएको हो । प्रतियोगितामा पुरुषतर्फ २० र महिलातर्फ १० गरी कुल ३० टोलीको सहभागिता रहेको थियो । बैंकका प्रमुख कार्यकारी अधिकृत दिनेश थकालीले एन्फा रेफ्री संगीता सुनुवारलाई बल हस्तान्तरण गर्दै प्रतियोगिताको औपचारिक उद्घाटन गरेका थिए । उद्घाटन समारोहमा बैंकका नायव प्रमुख कार्यकारी अधिकृत, प्रमुख व्यवसाय अधिकृत, प्रमुख सञ्चालन अधिकृतलगायत विभिन्न विभागका प्रमुख तथा कर्मचारीहरूको उपस्थिति थियो । मुख्य प्रतियोगिताअघि नेपाल आर्थिक पत्रकार समाज (सेजन), नेपाल आर्थिक पत्रकार संघ (नाफिज) र इकोनोमिक मिडिया एसोसिएसन नेपाल (इमान) बीच मैत्रीपूर्ण खेल आयोजना गरिएको थियो । उक्त प्रतिस्पर्धामा नाफिज विजयी भएको थियो । पुरुषतर्फको फाइनलमा कुमारी बैंकले माछापुच्छ्रे बैंकलाई टाइब्रेकरमा ३-२ गोलले पराजित गर्दै उपाधि जितेको छ । त्यस्तै, महिलातर्फको फाइनलमा साविक विजेता लुम्बिनी विकास बैंकले ग्लोबल आइएमई बैंकलाई टाइब्रेकरमा ५-४ गोलले हराउँदै उपाधि रक्षा गरेको छ । प्रतियोगिताको समापन समारोहमा बैंकका नायव प्रमुख कार्यकारी अधिकृत विनय दाहालले विजेता तथा उपविजेता टोलीलाई ट्रफी, मेडल र प्रमाणपत्र प्रदान गरेका थिए । समारोहमा बैंकका उच्च व्यवस्थापन तहका पदाधिकारी, विभागीय प्रमुख तथा कर्मचारीहरूको उपस्थिति थियो । बैंकले आफ्नो वार्षिकोत्सवका अवसरमा हरेक वर्ष आयोजना गर्दै आएको यस प्रतियोगिताले बैंक तथा वित्तीय संस्थाबीच खेलकुदमार्फत आपसी सम्बन्ध, एकता र सहकार्य सुदृढ बनाउन योगदान पु¥याउँदै आएको बैंकले जनाएको छ । प्रतियोगिताले विभिन्न संस्थाका कर्मचारीलाई कार्यक्षेत्रभन्दा बाहिर खेलकुदमार्फत एकै ठाउँमा जोड्दै स्वस्थ प्रतिस्पर्धाको अवसर प्रदान गर्ने बैंकको विश्वास छ । यसैबीच, बैंकले आफ्नो २०औँ वार्षिकोत्सवको अवसरमा कात्तिक १८ गते बुधबार देशव्यापी रक्तदान कार्यक्रम आयोजना गर्ने जनाएको छ ।
सिंहदरबारमा सचिव बैठक सुरु, प्रशासनिक सेवा र कर्मचारीमाथिको धरपकडबारे छलफल
काठमाडौं । मुख्यसचिव गोविन्दबहादुर कार्कीले आह्वान गरेको सचिव बैठक सिंहदरबारमा सुरु भएको छ । बैठकमा प्रशासनिक सेवा प्रवाहलाई प्रभावकारी बनाउने, सुशासन कायम गर्ने तथा पछिल्लो समय कर्मचारीहरूमाथि भइरहेको धरपकडलगायत विषयमा छलफल भइरहेको स्रोतले जानकारी दिएको छ । सरकारी सेवाको प्रभावकारिता, प्रशासनिक कामकारबाहीमा देखिएका समस्या तथा कर्मचारी प्रशासनसँग सम्बन्धित पछिल्ला घटनाक्रम बैठकका प्रमुख छलफलका विषय रहेको बताइएको छ । विशेषगरी पछिल्लो समय कर्मचारीमाथि भएका कारबाही र धरपकडले प्रशासनिक वृत्तमा उत्पन्न गरेको अवस्थाबारे पनि सचिवहरूबीच छलफल भइरहेको स्रोतको भनाइ छ ।
सरकारविरुद्ध साझा मोर्चा कस्ने तयारीमा कांग्रेस, पाँच प्रतिपक्षी दलको बैठक आज
काठमाडौं । प्रमुख प्रतिपक्षी दल नेपाली कांग्रेसले सरकारका पछिल्ला गतिविधिविरुद्ध साझा धारणा बनाउन पाँच प्रतिपक्षी दलको बैठक बोलाएको छ । सरकारको स्वेच्छाचारिता, प्रेस स्वतन्त्रतामाथिको हस्तक्षेप र संविधानमाथि भइरहेको प्रहारलगायत विषयमा छलफल गर्न कांग्रेसले प्रतिपक्षी दलहरूलाई एकै ठाउँमा बोलाएको हो । कांग्रेस संसदीय दलका नेता भीष्मराज आङ्देम्बेको आह्वानमा आज दिउँसो १ बजे सिंहदरबारस्थित संसदीय दलको कार्यालयमा बैठक बस्दै छ। बैठकमा नेकपा एमाले, नेपाली कम्युनिस्ट पार्टी (नेकपा), श्रम संस्कृति पार्टी र राष्ट्रिय प्रजातन्त्र पार्टी (राप्रपा) लाई आमन्त्रण गरिएको छ । बैठकमा सरकारको जवाफदेहिता, सत्तारुढ राष्ट्रिय स्वतन्त्र पार्टी (रास्वपा) को भूमिका र सरकारका पछिल्ला गतिविधिबारे छलफल हुनेछ। विशेषगरी पत्रकार पक्राउ, सञ्चारमाध्यममा प्रहरी परिचालन तथा प्रेस स्वतन्त्रतामाथि भएको हस्तक्षेपका विषयमा प्रतिपक्षी दलहरूले साझा धारणा बनाउने तयारी गरेका छन्। त्यस्तै, विभिन्न घटनाको छानबिनका लागि गठित समितिका प्रतिवेदन सार्वजनिक गर्नुपर्ने र अनुसन्धान प्रक्रियालाई निष्पक्ष तथा प्रभावमुक्त बनाउनुपर्ने विषय पनि बैठकको एजेन्डामा छन्। कांग्रेसले सरकारका गतिविधि लोकतान्त्रिक मूल्य, संवैधानिक व्यवस्था र नागरिक स्वतन्त्रतामाथि चुनौतीका रूपमा देखिएको भन्दै प्रतिपक्षी दलहरूको साझा भूमिका आवश्यक ठानेको छ। बैठकमार्फत सरकारका गतिविधिविरुद्ध प्रतिपक्षी दलहरूको साझा आवाज निर्माण गर्ने र आगामी दिनमा संसदीय तथा राजनीतिक मोर्चामा सहकार्यको आधार तयार गर्ने कांग्रेसको प्रयास देखिन्छ।
कुरिलो किलोको ७०० रुपैयाँ, यस्तो छ तरकारी तथा फलफूलको मूल्यसूची
काठमाडौं । कालीमाटी फलफूल तथा तरकारी बजार विकास समितिले सोमबारका लागि विभिन्न कृषिउपजको न्यूनतम थोक मूल्य सार्वजनिक गरेको छ। समितिले सार्वजनिक गरेको मूल्यसूचीअनुसार भारतीय ठूलो गोलभेँडा प्रतिकिलो ६० रुपैयाँ र सानो लोकल गोलभेँडा ३५ रुपैयाँ कायम भएको छ। नेपाली ठूलो गोलभेँडा ६० रुपैयाँ र सानो (टनेल) गोलभेँडा ४५ रुपैयाँमा कारोबार भइरहेको छ। त्यस्तै, रातो लाम्चो, गोलो र मुडे आलुको मूल्य प्रतिकिलो ५५ रुपैयाँ कायम भएको छ। भारतीय रातो आलु ३० रुपैयाँ र सेतो आलु २८ रुपैयाँ रहेको छ। भारतीय सुकेको प्याज प्रतिकिलो ८५ रुपैयाँ, लोकल गाजर १०० रुपैयाँ र तराई गाजर ७० रुपैयाँमा कारोबार भइरहेको समितिले जनाएको छ। यस्तै, लोकल बन्दा प्रतिकिलो ४० रुपैयाँ, स्थानीय काउली ३० रुपैयाँ, रातो मूला ३० रुपैयाँ र सेतो हाइब्रिड मूला ३० रुपैयाँ रहेको छ। लाम्चो भन्टा ४० रुपैयाँ, डल्लो भन्टा ६० रुपैयाँ तथा लोकल र हाइब्रिड घिउ सिमी प्रतिकिलो ५० रुपैयाँ कायम भएको छ। टाटे सिमी प्रतिकिलो ६० रुपैयाँ, भटमासकोसा १०० रुपैयाँ, तितो करेला ८० रुपैयाँ र लौका ५० रुपैयाँमा कारोबार भइरहेको छ। हरियो सागसब्जीतर्फ रायोको साग प्रतिकिलो ३० रुपैयाँ, पालुङ्गो ८० रुपैयाँ, तोरीको साग ३० रुपैयाँ र हरियो प्याज २५० रुपैयाँ रहेको छ। त्यसैगरी, कन्य च्याउ प्रतिकिलो १०० रुपैयाँ, डल्ले च्याउ २८० रुपैयाँ, राजा च्याउ ३०० रुपैयाँ र सिताके च्याउ ८०० रुपैयाँ कायम भएको छ। कुरिलो प्रतिकिलो ७०० रुपैयाँ, न्युरो ९० रुपैयाँ, चुकन्दर ८० रुपैयाँ, सेलरी ४०० रुपैयाँ, पुदीना ६०० रुपैयाँ र गान्टे मूला ८० रुपैयाँ रहेको छ। फलफूलतर्फ फुजी स्याउ प्रतिकिलो ३०० रुपैयाँ, मुस्ताङको स्याउ २०० रुपैयाँ र जुम्लाको स्याउ २५० रुपैयाँ कायम भएको छ। नेपाली र मालभोग केरा प्रतिदर्जन १०० रुपैयाँ, कागती प्रतिकिलो २०० रुपैयाँ र अनार ३०० रुपैयाँमा कारोबार भइरहेको समितिले जनाएको छ।
मलेखु–मुग्लिङ सडकखण्ड आज चार घण्टा बन्द हुने
काठमाडौं । पृथ्वी राजमार्गअन्तर्गत मलेखु-मुग्लिङ सडकखण्ड आज चार घण्टा बन्द हुने भएको छ । धादिङको मझिमटारमा निर्माणाधीन आकाशे पुलको यात्रु आवागमन गर्ने भाग (गर्डर) राख्नुपर्ने भएकाले सडक बन्द गर्न लागिएको हो । नागढुंगा-मुग्लिङ सडक आयोजना पश्चिम खण्डका अनुसार आज बिहान ११ बजेदेखि दिउँसो ३ बजेसम्म उक्त सडकखण्डमा सवारी आवागमन पूर्ण रूपमा बन्द गरिनेछ । आयोजनाका अनुसार पुलको गर्डर राख्ने कामका लागि सडक बन्द गर्न लागिएको हाे । उक्त अवधिमा मलेखु–मुग्लिङ सडकखण्ड भएर आवतजावत गर्ने सबै प्रकारका सवारीसाधन सञ्चालनमा रोक लगाइनेछ । सडक बन्द रहने समयमा सवारी चालक तथा यात्रुलाई धैर्यपूर्वक यथास्थानमा रहन, लेन अनुशासन कायम गर्न र ट्राफिक नियम पालना गर्न आयोजनाले अनुरोध गरेको छ ।
एनआईसी एसियाको नाफा १२.७४ करोड रुपैयाँ, ईपीएस पनि उकालो
काठमाडौं । एनआईसी एसिया बैंकको चालु आर्थिक वर्ष २०८३/८४ को पहिलो त्रैमासमा खुद नाफा ४.३२ प्रतिशतले बढेर १२ करोड ७४ लाख रुपैयाँ आर्जन गरेको छ । गत आर्थिक वर्षको असोजसम्म बैंकले १२ करोड २१ लाख रुपैयाँ खुद नाफा कमाएको थियो । बैंकको खुद ब्याज आम्दानी १७.३६ प्रतिशतले घटेको छ । गत वर्षको असोजसम्म २ अर्ब २८ करोड ६० लाख रुपैयाँ रहेको खुद ब्याज आम्दानी चालु आर्थिक वर्षको सोही अवधिमा १ अर्ब ८८ करोड ९२ लाख रुपैयाँमा झरेको छ । बैंकको सञ्चालन मुनाफा १६.५९ प्रतिशतले घटेर १६ करोड १४ लाख रुपैयाँमा सीमित भएको छ । गत वर्षको सोही अवधिमा यस्तो मुनाफा १९ करोड ३५ लाख रुपैयाँ थियो । त्यस्तै, बैंकको कुल सञ्चालन आम्दानी १२.६८ प्रतिशतले घटेर २ अर्ब ४२ करोड ६८ लाख रुपैयाँ कायम भएको छ । गत वर्षको असोजसम्म यस्तो आम्दानी २ अर्ब ७७ करोड ९० लाख रुपैयाँ थियो । यद्यपि, खुद शुल्क तथा कमिसन आम्दानी भने ५.३२ प्रतिशतले बढेर ३५ करोड ६ लाख रुपैयाँ पुगेको छ । बैंकको कर्जा नोक्सानी व्यवस्थाबापतको रकम २१.६५ प्रतिशतले घटेको छ । गत वर्षको असोजसम्म १ अर्ब १८ करोड ६४ लाख रुपैयाँ रहेको यस्तो रकम चालु आर्थिक वर्षको सोही अवधिमा ९२ करोड ९४ लाख रुपैयाँमा झरेको छ । कर्मचारी खर्च भने ४.३३ प्रतिशतले बढेर ८३ करोड ६० लाख रुपैयाँ पुगेको छ । बैंकको निक्षेप र कर्जा दुवै घटेका छन् । गत वर्षको असोजसम्म ३ खर्ब ४३ अर्ब ६७ करोड रुपैयाँ निक्षेप संकलन गरेको बैंकको चालु आर्थिक वर्षको असोजसम्म निक्षेप ३ खर्ब ४१ अर्ब ८४ करोड रुपैयाँमा झरेको छ । यो ०.५३ प्रतिशतको गिरावट हो । त्यस्तै, बैंकको कर्जा तथा सापटी ०.४२ प्रतिशतले घटेर १ खर्ब ९१ अर्ब २० करोड रुपैयाँ कायम भएको छ । गत वर्षको असोजसम्म यस्तो कर्जा १ खर्ब ९२ अर्ब १ करोड रुपैयाँ थियो । बैंकको चुक्ता पुँजी १४ अर्ब ९१ करोड ७५ लाख रुपैयाँ र जगेडा कोष २.२० प्रतिशतले बढेर २६ अर्ब २१ करोड रुपैयाँ पुगेको छ । बैंकको खराब कर्जा अनुपात उल्लेख्य बढेको छ । गत आर्थिक वर्षको असोजसम्म ६.९९ प्रतिशत रहेको निष्क्रिय कर्जा (एनपीएल) अनुपात चालु आर्थिक वर्षको असोजसम्म बढेर ९.८१ प्रतिशत पुगेको छ । त्यस्तै, पूँजी पर्याप्तता अनुपात १४.०३ प्रतिशतबाट घटेर ११.१२ प्रतिशतमा झरेको छ । बैंकको प्रतिसेयर आम्दानी (ईपीएस) ३.२१ रुपैयाँबाट बढेर ३.३५ रुपैयाँ पुगेको छ । बैंकको प्रतिसेयर नेटवर्थ १७२.५३ रुपैयाँ रहेको छ ।
करदाता प्रोत्साहन पुरस्कारका १६ विजेता घोषणा हुँदै, क्रिकेट खेलाडीले छनोट गर्ने
काठमाडौं । आन्तरिक राजस्व विभागले कात्तिक महिनाको पहिलो पाक्षिक करदाता प्रोत्साहन पुरस्कार कार्यक्रमका विजेता आज घोषणा गर्ने भएको छ । कात्तिक १ देखि १५ गतेसम्मको अवधिका लागि १५ जना नियमित विजेता र एक जना बम्पर विजेता गरी कुल १६ जनाको नाम सार्वजनिक गर्न लागिएको हो । विभागका अनुसार पुरस्कार विजेता छनोट कार्यक्रममा नेपाल प्रिमियर लिग (एनपीएल) खेलिरहेका क्रिकेट खेलाडी सहभागी हुनेछन् । उनीहरूको सहभागितामा विजेता छनोट गरिने विभागले जनाएको छ । विजेता घोषणा कार्यक्रम आज बिहान ९:३० बजे अर्थ मन्त्रालयको सिंहदरबारस्थित सुवर्ण हलमा आयोजना हुँदैछ ।
