एमालेले राष्ट्रिय भेलाबाट ८ कार्यभार तय गर्ने
काठमाडौं । नेकपा एमालेले आगामी मंसिर २ र ३ गते काठमाडौंमा आयोजना गर्ने राष्ट्रिय भेलामार्फत पार्टीका आठवटा प्रमुख कार्यभार अघि सार्ने भएको छ । पार्टीले सत्य, संगठन, पुनर्जागरण, युवा तथा महिला नेतृत्व, प्रतिपक्षी भूमिका र डिजिटल प्रतिवादलाई आगामी राजनीतिक तथा सांगठनिक कार्यदिशाका रूपमा प्रस्तुत गरेको छ । काठमाडौंको कार्की ब्याङ्क्वेटमा आयोजना हुने राष्ट्रिय भेलाका लागि सार्वजनिक गरिएको अवधारणामा एमालेले पार्टीलाई जनस्तरसम्म विस्तार गर्ने र आधारभूत वर्ग तथा समुदायसँगको सम्बन्ध सुदृढ बनाउने लक्ष्य अघि सारेको छ । एमालेले सार्वजनिक गरेको आठ कार्यभारमध्ये पहिलोमा ‘सत्य’लाई जनस्तरसम्म पुर्याउने विषय समेटिएको छ । दोस्रोमा पार्टीलाई आधारभूत वर्ग र समुदायसम्म विस्तार गर्ने तथा तेस्रोमा संगठनलाई योजनाबद्ध काम र त्यसको मापन गर्ने प्रणालीमा अघि बढाउने उल्लेख छ । त्यस्तै, युवा र महिलालाई पार्टीको जिम्मेवारी, निर्णय प्रक्रिया र नेतृत्वमा स्थापित गर्ने विषयलाई चौथो कार्यभार बनाइएको छ । पाँचौं कार्यभारका रूपमा प्रत्येक कार्यकर्ताको आत्मविश्वास र जनसम्बन्ध पुनर्जागरण गर्ने एजेन्डा अघि सारिएको छ । पार्टीले प्रतिपक्षी भूमिकालाई नागरिक अधिकार र जनजीविकासँग जोड्ने नीति पनि अघि सारेको छ । सार्वजनिक अवधारणामा नागरिक अधिकारको रक्षा र जनजीविकाका सवाललाई प्रतिपक्षी राजनीतिको प्रमुख आधार बनाउने उल्लेख छ । यसैगरी, डिजिटल माध्यमबाट हुने प्रतिवादलाई पनि एमालेले आफ्नो राजनीतिक कार्यभारमा समेटेको छ । ‘सत्यको विजय नभएसम्म’ डिजिटल प्रतिवाद जारी राख्ने अवधारणा प्रस्तुत गर्दै पार्टीले सूचना तथा सञ्चारका डिजिटल माध्यमलाई राजनीतिक प्रतिवादको क्षेत्रका रूपमा अघि सारेको छ । आठौं कार्यभारमा भने ‘समृद्ध नेपाल, सुखी नेपाली’को राष्ट्रिय आकांक्षा पूरा नभएसम्म निरन्तर संघर्ष गर्ने प्रतिबद्धता व्यक्त गरिएको छ ।
सेयर बजारमा ७ अर्ब १८ करोडको कारोबार
काठमाडौं । सोमबार सेयर बजारमा दोहोरो अंकको गिरावट आएको छ । नेपाल स्टक एक्सचेन्ज (नेप्से) परिसूचक ३२.६२ अंकले घटेर २६५७ बिन्दुमा झरेको हो । नेप्सेका अनुसार २१ कम्पनीको सेयर मूल्य बढ्दा २५२ कम्पनीको सेयर मूल्य घटेको छ । ६ कम्पनीको सेयर मूल्यमा भने कुनै परिवर्तन आएको छैन । सोमबार ३४३ कम्पनीको १ करोड कित्ता सेयर किनबेच हुँदा ७ अर्ब १८ करोड रुपैयाँ बराबरको कारोबार भएको छ । जसमध्ये सबैभन्दा धेरै कारोबार घलेम्दी हाइड्रोको भएको छ । घलेम्दीको ३७ करोड रुपैयाँ बराबरको कारोबार भएको छ । साथे ग्लोबल आईएमई बैंकको २९ करोड, कुमारी बैंकको २७ करोड, लुम्बिनी विकास बैंकको २३ करोड र मकर जितुमायाको २० करोड रुपैयाँ बराबरको कारोबार भएको छ । सेयर बजारमा कारोबार भएका सबै उपसूचकमा गिरावट आएको छ । नेप्सेका अनुसार सबैभन्दा धेरै विकास बैंक उपसूचक घटेको छ । विकास बैंक उपसूचक १.८८ प्रतिशतले घटेर ५ हजार ५४८.२८ विन्दुमा झरेको छ । त्यस्तै, निर्जीवन बीमा उपसूचक १.७२ प्रतिशतले घटेर ९ हजार ४२३.८८ विन्दुमा पुगेको छ । अन्य उपसूचकमा पनि गिरावट देखिएको छ । व्यापार उपसूचक ०.८६ प्रतिशत, होटल तथा पर्यटन ०.६३ प्रतिशत, उत्पादन तथा प्रशोधन ०.९० प्रतिशत र म्युचुअल फन्ड उपसूचक ०.७३ प्रतिशतले घटेका छन् । त्यस्तै, बैंकिङ उपसूचक १.०७ प्रतिशत, जलविद्युत् १.०८ प्रतिशत, वित्त १.५३ प्रतिशत, लगानी १.४२ प्रतिशत, जीवन बीमा १.४७ प्रतिशत, लघुवित्त १.१६ प्रतिशत र अन्य उपसूचक १.६१ प्रतिशतले घटेका छन् ।
डा. केसीको उपचार त्रिवि शिक्षण अस्पतालमा हुँदै
काठमाडौं । इलाममा अनसनरत चिकित्सा शिक्षा सुधारका अभियन्ता डा. गोविन्द केसीको स्वास्थ्यमा जटिलता देखिएपछि काठमाडौं ल्याइएको छ । नेपाली सेनाको हेलिकोप्टरमार्फत सोमबार बिहान १०ः३० बजे काठमाडौं ल्याइएका केसीको महाराजगञ्जस्थित त्रिवि शिक्षण अस्पतालमा उपचार भइरहेको छ । चिकित्सा शिक्षा तथा स्वास्थ्य क्षेत्र सुधारका माग राख्दै डा. केसीले गत बिहीबारदेखि इलामस्थित नारायण मन्दिरमा आफ्नो २५औँ सत्याग्रह सुरु गरेका थिए । अनसनका क्रममा स्वास्थ्य अवस्था बिग्रिएपछि उनलाई थप उपचारका लागि काठमाडौं ल्याइएको हो । यसैबीच, उनका सहयोगी पवन थापाले सरकारसँग तत्काल वार्ता गरी डा. केसीका माग सम्बोधन गर्न आग्रह गरेका छन् । काठमाडौं ल्याएपछि पनि सरकारले उनको स्वास्थ्य अवस्थाबारे चासो नदेखाएको थापाको गुनासो छ । उनले सरकारले यथाशीघ्र वार्ता गरेर समस्या समाधान गर्नुपर्ने बताएका छन् ।
न्यायाधीशहरूको नाम जोडेर समाचार प्रकाशन नगर्न सर्वोच्च अदालतको आग्रह
काठमाडौं । सर्वोच्च अदालतले प्रधानन्यायाधीश तथा न्यायाधीशहरूको नाम जोडेर पछिल्लो समय सञ्चारमाध्यम र सामाजिक सञ्जालमा प्रकाशित समाचारप्रति गम्भीर ध्यानाकर्षण भएको जनाएको छ। सोमबार बसेको सर्वोच्च अदालतको पूर्ण बैठकले छानबिनको निष्कर्ष सार्वजनिक नहुँदै कसैलाई लाञ्छित गर्ने तथा न्याय सम्पादनको कार्यमा अवरोध पुग्ने गरी समाचार प्रकाशन तथा प्रसारण नगर्न सञ्चारमाध्यमलाई आग्रह गरेको हो। पूर्ण बैठकले सार्वजनिक भएका विषयमा बिना पूर्वाग्रह, निष्पक्ष र स्वतन्त्र ढङ्गबाट संविधान तथा कानुनबमोजिम छानबिन गरी सत्यतथ्यसहितको निष्कर्ष यथाशीघ्र सार्वजनिक गर्न सम्बन्धित निकायलाई आग्रह गरेको छ। सर्वोच्च अदालतका प्रवक्ता तथा सह(रजिस्ट्रार डा। अशोककुमार क्षेत्रीद्वारा जारी प्रेस विज्ञप्तिमा न्यायपालिका जनताको आस्था र विश्वासमा आधारित संस्था भएकाले यससँग सम्बन्धित समाचारले आम जनता तथा सेवाग्राहीमा भ्रम र नकारात्मक असर पार्न नहुने उल्लेख छ। ‘छानबिनको निष्कर्ष प्राप्त नहुँदै कसैलाई लाञ्छित गर्ने वा न्याय सम्पादनको कार्यमा अवरोध पुग्ने गरी कुनै पनि समाचार प्रकाशन तथा प्रसारण नगर्न सम्बन्धित सबैमा आग्रह गर्दछौँ,’ पूर्ण बैठकको निर्णयमा भनिएको छ। बैठकले संविधान र कानुनको सर्वोच्चताप्रति आफ्नो प्रतिबद्धता दोहोर्‍याउँदै कानुनको शासनप्रति गम्भीर हुन सबैलाई आग्रह गरेको छ। साथै, सञ्चारमाध्यममा प्रकाशित तथा प्रसारित विषयमा हुने कानुनी छानबिन र अनुसन्धानमा आफूहरू कानुनबमोजिम जवाफदेहिता तथा सहयोग गर्न प्रतिबद्ध रहेको जनाएको छ। पूर्ण बैठकले प्रकाशित समाचारबाट विचलित नभई नियमित रूपमा न्यायिक कार्यमा क्रियाशील रहन देशभरका अदालतमा कार्यरत सम्पूर्ण न्यायिककर्मीलाई समेत आग्रह गरेको छ। प्रधानन्यायाधीश तथा सम्बन्धित न्यायाधीशहरूले यसअघि नै आफ्नो धारणा लिखित रूपमा सार्वजनिक गरिसकेको सन्दर्भ उल्लेख गर्दै सर्वोच्च अदालतले सोमबार पूर्ण बैठकबाट पाँचबुँदे निर्णय गरेको हो।
कर्णालीले काठमाण्डूलाई दियो १८१ रनको लक्ष्य
काठमाडौं । कर्णाली याक्सले काठमाण्डू गोर्खाजसामु १८१ रनको लक्ष्य प्रस्तुत गरेको छ । कुल २० ओभरमा ६ विकेट गुमाउँदै कर्णालीले १८० रनको योगफल तयार पारेको हो । कर्णालीका लागि हुसेन तलतले ४०, पवर सर्राफले ३०, गुल्सन झाले २० र मार्कले १७ रन बनाए । काठमाण्डूका लागि कप्तान करण केसीले दुई विकेट लिए । त्यसैगरी, साहब आलम, जाहाडाड खान, देव साह र सन्तोष यादवले समान एक विकेट लिए । कर्णाली जनकपुर बोल्ट्स र विराटनगर किंग्सलाई हराउँदै तालिकाकाे शीर्ष स्थानमा छ । यसअघि काठमाण्डूले टस जित्दै फिल्डिङ रोजेको थियो ।
भ्रामक समाचारप्रति आपत्ति जनाउँदै कांग्रेसले भन्यो– ध्यान मोड्न भ्रम फैलाइयो
काठमाडौं । नेपाली कांग्रेसले पार्टी र नेतृत्वविरुद्ध सञ्चारमाध्यम तथा सामाजिक सञ्जालमा प्रकाशित समाचार र लगाइएका आरोपप्रति आपत्ति जनाएको छ । सभापति गगनकुमार थापाको सचिवालयले सोमबार (आज) विज्ञप्ति जारी गर्दै आपत्ति जनाएको हो । सामाजिक सञ्जालमा आएका समाचारहरू निराधार र कपोलकल्पित भएको दाबी गर्दै अपुष्ट सूचनाका आधारमा भ्रममा नपर्न आमनागरिकलाई आग्रह गरेको हो । सरकारका पछिल्ला गतिविधि र घटनाबाट जनताको ध्यान अन्यत्र मोड्न प्रतिपक्षी दलविरुद्ध सुनियोजित रूपमा भ्रम फैलाउने प्रयास भइरहेको आरोप कांग्रेसले लगाएको हो । विज्ञप्तिमा कांग्रेसले पार्टी विधान र प्रचलित कानुनअनुसार विशेष महाधिवेशन सम्पन्न गरेको तथा त्यसबाट नेतृत्व र निर्णयको आधिकारिकतासम्बन्धी विषय निर्वाचन आयोग र अदालतका निर्णयबाट पुष्टि भइसकेको उल्लेख छ । त्यस्तै, संविधान, प्रचलित कानुन, पार्टी विधान र सर्वोच्च अदालतको आदेशअनुसार सम्पन्न १५औं महाधिवेशनले पार्टीको संस्थागत प्रक्रियालाई थप सुदृढ बनाएको कांग्रेसको दाबी छ । कांग्रेसले लोकतन्त्र, नागरिक स्वतन्त्रता, जनअधिकार र विधिको शासनका पक्षमा निरन्तर आवाज उठाउँदै आएको जनाएको छ । सरकारले लोकतान्त्रिक मूल्य र मान्यताविपरीत गतिविधि गरे त्यसको सशक्त प्रतिवाद गर्ने पनि विज्ञप्तिमा उल्लेख छ । बिचौलियासँग सम्बन्धित विषय र त्यससँग जोडिएका सबै प्रकरणमा गहिरो, निष्पक्ष तथा प्रमाणमा आधारित अनुसन्धान हुनुपर्ने कांग्रेसको भनाइ छ । दोषी देखिने जोकोहीलाई कानुनी कारबाही गर्नुपर्ने र त्यसमा पार्टीको पूर्ण साथ रहने पनि उसले स्पष्ट पारेको छ । तर, अनुसन्धानका क्रममा नेपाल प्रहरीको छापसहितका कागजात, तथ्य तथा कथित बयानहरू छानिछानी सार्वजनिक भइरहेको भन्दै कांग्रेसले आपत्ति जनाएको छ । अनुसन्धान चयनात्मक ढङ्गले अघि बढाइएको हो कि भन्ने प्रश्नसमेत उठेको कांग्रेसको भनाइ छ । अनुसन्धानमा संलग्न निकायभित्रकै व्यक्तिहरूको भूमिकाबारे विभिन्न विषय सार्वजनिक भइरहेकाले समग्र अनुसन्धान प्रक्रिया पारदर्शी र निष्पक्ष हुनुपर्नेमा उसले जोड दिएको छ । कांग्रेसले कुनै पनि निष्पक्ष अनुसन्धानबाट पछि नहट्ने स्पष्ट पार्दै राजनीतिक पूर्वाग्रह र भ्रामक प्रचारका आधारमा कसैलाई आरोपित गर्ने प्रवृत्ति स्वीकार्य नहुने जनाएको छ । अनुसन्धानलाई निष्पक्ष बनाउन पार्टीको संसदीय दलले समेत निर्णय गरिसकेको पनि विज्ञप्तिमा उल्लेख छ ।
विकास नायक-२०८३ को मनोनयनको समय एक साता थप
काठमाडौं । विकास नायक २०८३ का लागि खुला गरिएको मनोनयन एक साता थप गरिएको छ । देश विकासमा उल्लेखनीय, अनुकरणीय र दीर्घकालीन योगदान पुर्याएका व्यक्ति तथा संस्थाको पहिचान गरी सम्मान गर्ने उद्देश्यसहित विकास नायक २०८३ का लागि खुला गरिएको मनोनयन एक साता थप गरिएको हो । गत वर्षझैं यस वर्ष पनि विकासन्युजले विभिन्न १० क्षेत्रबाट १० जना विकास नायक छनोट गर्ने गरी आव्हान एक साताका लागि थप गरिएको हो । विकास नायक छनोट प्रक्रियामा सहभागी हुन चाहने व्यक्ति, संस्था तथा सरोकारवालाले सम्भावित योगदानकर्ताको नाम सिफारिस गर्न र उनीहरूले गरेका कामबारे सूचना उपलब्ध गराउन सक्नेछन् । अब मनोनयन फारम २०८३ कात्तिक २२ गतेसम्म भरिसक्नुपर्नेछ । विकास नायक मनोनयन फारम भर्न यहाँ क्लिक गर्नूहोस् विकास नायक छनोटका लागि पूर्वअर्थमन्त्री रामेश्वर खनालको संयोजकत्वमा विकास नायक निर्णायक समिति समेत गठन गरिएको छ । समितितमा नेपाल राष्ट्र बैंकका पूर्वगभर्नर महाप्रसाद अधिकारी, त्रिभुवन विश्वविद्यालयको पत्रकारिता तथा आमसञ्चार विभागका प्रमुख प्रा. डा. कुन्दन अर्याल र इक्रा नेपालकी कार्यकारी प्रमुख वर्षा श्रेष्ठ सदस्य छन् । विकासन्युजका सम्पादक सन्तोष रोकाया समितिका सदस्य सचिव छन् । समितिको पहिलो बैठकले २१ दिनको समयावधि राखेर विकास नायक मनोनयनका खुला गर्ने निर्णय गरेको थियो । अहिले एक साता समय थप गरिएको हो । विकास नायक निर्णायक समितिले देश विकासका विभिन्न आयामलाई समेटेर १० वटा क्षेत्र निर्धारण गरेको छ । ती क्षेत्रबाट उत्कृष्ट योगदानकर्ताका रूपमा १० जना विकास नायक छनोट गरिनेछ । निर्धारित क्षेत्रहरूमा नीति निर्माण तथा पैरवी, सार्वजनिक सेवा (प्रशासन, सुरक्षा र न्याय) मानव विकास (शिक्षा, स्वास्थ्य तथा सीप), वित्तीय क्षेत्र (बैंक, बीमा, पुँजीबजार, सहकारी), उद्योग (उत्पादन तथा निर्यातमूलक उद्योग), सेवा तथा व्यापार क्षेत्र, सूचना प्रविधि तथा कृत्रिम बौद्धिकता (एआई), पूर्वाधार तथा हरित उर्जा विकास, कृषि आधुनिकीकरण र कला, साहित्य, चलचित्र तथा खेलकुद रहेका छन् । यी विधाले समेट्ने क्षेत्रहरूमा व्यक्तिले गरेको कामको प्रभाव, त्यसबाट सिर्जना भएको अवसर, अपनाइएको नवीनता र समाजमा परेको सकारात्मक परिवर्तनलाई छनोटको आधार बनाइनेछ । मनोनयनका लागि सम्बन्धित क्षेत्रका व्यक्ति वा संस्थाले गरेको काम र त्यसको प्रभावबारे सूचना तथा विवरण उपलब्ध गराउन सकिनेछ । प्राप्त सिफारिस, सम्बन्धित स्रोतबाट संकलित विवरण र विकास मिडियाको अध्ययनका आधारमा सम्भावित विकास नायकको सूची तयार गरिनेछ । व्यक्ति वा संस्थाको कामले अर्थतन्त्र र समाजमा पारेको प्रभाव, नवीनता, सहभागिता, समावेशिता, पारदर्शिता, नैतिकता, दीर्घकालीन स्थायित्व र अरूलाई प्रेरित गर्न सक्ने क्षमतालाई विकास नायक छनोटको आधार मानिनेछ। छनोट भएका विकास नायकले गरेका काम र त्यसबाट प्राप्त उपलब्धिबारे विकासन्युज डटकम तथा देशविकास म्यागेजिनमा विस्तृत सामग्री प्रकाशन गरिनेछ । यसबाट सफल अभ्यास, नवीन सोच र अनुकरणीय कार्यका अनुभवलाई व्यापक पाठकवर्गसम्म पुर्याउने अपेक्षा गरिएको छ । विकास नायक अवार्डले विकासमा योगदान गर्ने व्यक्तिहरूको पहिचान मात्र गर्ने छैन, उनीहरूले अपनाएका सफल अभ्यासबाट अरू व्यक्ति, संस्था र समुदायलाई अनुसरण गर्न प्रेरित गर्ने छ । स्थानीय तहदेखि राष्ट्रिय स्तरसम्म भइरहेका सकारात्मक प्रयासलाई सार्वजनिक बहसको विषय बनाउँदै विकासप्रतिको उत्साह र जिम्मेवारी बढाउनु पनि यसको उद्देश्य हो । फारम भर्न क्यूआर कोड स्क्यान गर्नूहोस् । विकास मिडियाले विकास नायक २०८३ को घोषणा तथा सम्मानका लागि आगामी पुस १९ गते सार्वजनिक समारोह आयोजना गर्ने तयारी गरेको छ । उक्त समारोहमा छनोट भएका विकास नायकलाई सम्मान गरिनेछ । विकास नायक-२०८३ को मनोनयन खुला सिधा सम्पर्क: [email protected], whatsapp 9801130454 विकास नायक श्रृङ्खला
टाटा गुरुहरूका लागि १४ स्थानमा प्राविधिक तालिम सुरु
काठमाडौं । टाटा कमर्सियल गाडीको मर्मत तथा सर्भिसिङमा संलग्न प्राविधिक जनशक्तिको सीप र दक्षता अभिवृद्धि गर्ने उद्देश्यले ‘टाटा बीएस–६ तालिम प्रशिक्षण कार्यक्रम’ सुरु भएको छ । नेपालका लागि टाटा कमर्सियल गाडीको आधिकारिक वितरक सिप्रदी अटोपार्ट्स प्रालि र सिप्रदियन सहायता संस्थाको संयुक्त आयोजनामा आइतबारदेखि तालिम सुरु भएको हो । कात्तिक १५ देखि २० गतेसम्म सञ्चालन हुने ६ दिने प्रशिक्षण कार्यक्रम देशका विभिन्न १४ स्थानमा आयोजना भइरहेको छ । तालिम हेटौंडा, बिर्तामोड, विराटनगर, दमक, धनगढी, पर्सारटाँडी, इटहरी, नारायणघाट, मिर्चैया, पोखरा, भैरहवा, ढल्केवर, दाङ/घोराही र वीरगञ्जमा सञ्चालन हुनेछ । कार्यक्रममा टाटा कमर्सियल गाडीमा कार्यरत प्राविधिक तथा इलेक्ट्रिसियन अर्थात् टाटा गुरुहरूलाई आधुनिक सवारी प्रविधि तथा बीएस–६ (भारत स्टेज–६) सम्बन्धी प्राविधिक ज्ञान र सीप प्रदान गरिनेछ । प्रशिक्षणमा विद्युतीय प्रणालीको आधारभूत ज्ञान, ब्याट्रीको संरचना तथा कार्यप्रणाली, भोल्टेज, करेन्ट, रेसिस्टेन्स, विद्युतीय सर्किट, मल्टिमिटरको प्रयोग तथा सवारीसाधनको स्टार्टिङ र चार्जिङ प्रणालीबारे जानकारी दिइनेछ । त्यस्तै, बीएस–६ इन्जिन म्यानेजमेन्ट सिस्टमअन्तर्गत सेन्सर, ईसीयू र एक्टुएटरको कार्यप्रणालीबारे पनि प्रशिक्षण दिइनेछ । सवारीसाधनको उत्सर्जन नियन्त्रण प्रणालीअन्तर्गत डीपीएफ तथा एससीआर सिस्टम, तिनका विभिन्न पार्टपुर्जाको पहिचान र कार्यप्रणाली, सर्किट विश्लेषण, रिजेनेरेसन प्रक्रिया तथा डायग्नोस्टिक टुल्सको प्रयोगबाट प्राविधिक समस्या पहिचान र समाधान गर्ने विषयसमेत तालिममा समेटिएका छन् । यस प्रशिक्षणले टाटा कमर्सियल गाडीको मर्मत तथा सर्भिसिङमा संलग्न प्राविधिक जनशक्तिको दक्षता, समस्या समाधान गर्ने क्षमता र व्यावसायिक सीप अभिवृद्धि गर्ने अपेक्षा गरिएको आयोजकले जनाएको छ । आधुनिक सवारी प्रविधिबारे प्राविधिक जनशक्तिलाई दक्ष बनाउँदै गुणस्तरीय सर्भिसिङ सेवा प्रवर्द्धन गर्ने उद्देश्यले कार्यक्रम आयोजना गरिएको हो ।
