राष्ट्रिय राजमार्गका आयोजनामा तत्काल सम्पन्न गर्न पूर्वाधार विकास समितिको निर्देशन
काठमाडौं । राष्ट्रिय राजमार्गका विभिन्न सडक आयोजनामा देखिएका समस्या समाधान गर्न पूर्वाधार विकास समितिका सभापति आशिष गजुरेलले निर्देशन दिएका छन् । समितिका सभापति गजुरेलको संयोजकत्वमा मंगलबार (आज) काठमाडौंमा बसेको बैठकमा पूर्व–पश्चिम राजमार्गअन्तर्गत कमला–ढल्केबर–बागमती सडक खण्डको हालसम्मको प्रगति, निर्माण कार्यमा देखिएका अवरोध तथा सम्बन्धित निकायको भूमिकाबारे छलफल भएको थियो । बैठकले विद्युत् पोल तथा रुख व्यवस्थापनका विषयमा छलफलपछि सम्बन्धित मन्त्रालय र निकायलाई समयसीमाभित्र समस्या समाधान गर्न निर्देशन दिएको हो । ‘पूर्व–पश्चिम राजमार्गअन्तर्गत कमला–ढल्केबर–बागमती सडक खण्ड तथा बुटवल–गोरुसिङ्गे सडक खण्डमा रहेका विद्युत् पोल दुई महिनाभित्र, र नागढुङ्गा–मुग्लिन सडक खण्डमा रहेका विद्युत् पोल एक महिनाभित्र सार्न ऊर्जा, जलस्रोत तथा सिँचाइ मन्त्रालय र नेपाल विद्युत् प्राधिकरणलाई निर्देशन दिने निर्णय भएको छ,’ समितिका सभापति गजुरेलले भने । त्यसैगरी, राजमार्गका विभिन्न खण्डमा रहेका रुख कटानका लागि कृषि तथा वन तथा वातावरण मन्त्रालयलाई आवश्यक पहल गर्न अनुरोध गर्ने निर्णय भएको उनको भनाइ छ । सडक विभागलाई आवश्यक साइट उपलब्ध गराउन समेत निर्देशन दिइएको उनले बताए । उक्त बैठकमा पूर्वाधार विकास समिति सदस्य माननीय राजकिशोर महत्तो, मिथिला नगरपालिकाका प्रमुख महेन्द्र महत्तो, सडक विभागका महानिर्देशक डा. विजय जैशी, नेपाल विद्युत् प्राधिकरणका कार्यकारी निर्देशक दीर्घायु कुमार श्रेष्ठ, पूर्वाधार विकास मन्त्रालयका सचिवालय सदस्य दिनेश चमार, कमला–ढल्केबर–बागमती आयोजना प्रमुख राजेश कुमार दास तथा नागढुङ्गा–मुग्लिन पश्चिम खण्ड आयोजना प्रमुख सजना अधिकारीलगायत सम्बन्धित निकायका प्रतिनिधिहरूको उपस्थिति रहेको थियो ।
२६६४ बिन्दुमा पुग्यो सेयर बजार
काठमाडौं । मंगलबार सेयर बजार सामान्य अंकले बढेको छ । नेपाल स्टक एक्सचेन्ज (नेप्से) परिसूचक ६.६२ अंकले बढेर २६६४ बिन्दुमा पुगेको हो । नेप्सेका अनुसार १४३ कम्पनीको सेयर मूल्य बढ्दा १२३ कम्पनीको सेयर मूल्य घटेको छ । १३ कम्पनीको सेयर मूल्यमा भने कुनै परिवर्तन आएको छैन । मंगलबार ३४९ कम्पनीको १ करोड कित्ता सेयर किनबेच हुँदा ५ अर्ब ६४ करोड रुपैयाँ बराबरको कारोबार भएको छ । जसमध्ये सबैभन्दा धेरै कारोबार ग्लोबल आइएमई बैंकको भएको छ । ग्लोबलको २३ करोड रुपैयाँ बराबरको कारोबार भएको छ । साथै बुटवल पावर कम्पनीको १९ करोड, सोल्टी होटलको १६ करोड र सानिमा मिडल तमोरको १५ करोड रुपैयाँ बराबरको कारोबार भएको छ । नेप्सेमा कारोबार भएका उपसमूहमध्ये मंगलबार होटल तथा पर्यटन समूहमा सबैभन्दा धेरै वृद्धि भएको छ । उक्त समूहको सूचक ७५.७६ अंक अर्थात् १.०७ प्रतिशतले बढेर ७ हजार ९३.२४ विन्दुमा पुगेको छ । त्यस्तै, बैंकिङ समूहको सूचक ८.३२ अंकले बढेर १ हजार ६०२.०६ विन्दुमा पुगेको छ । विकास बैंक समूह ३.७४ अंकले बढेर ५ हजार ५५२.०२, जलविद्युत् समूह ११.४८ अंकले बढेर ३ हजार ६६८.२२ विन्दुमा पुगेको छ । जीवन बीमा समूह १०.७९ अंक, निर्जीवन बीमा समूह ९.४२ अंक र माइक्रोफाइनान्स समूह ६.१४ अंकले बढेका छन् । व्यापार समूह ५.०२ अंकले बढ्दा म्युचुअल फन्ड समूहमा सामान्य वृद्धि देखिएको छ । यता, फाइनान्स समूह ०.२६ अंकले घटेर २ हजार २१३.४७ विन्दुमा झरेको छ । लगानी समूह ०.०४ अंक, उत्पादन तथा प्रशोधन समूह ७.१८ अंक र अन्य समूह ०.५१ अंकले घटेका छन् ।
‘इन्जिनियरिङ बीमासम्बन्धी निर्देशन’ को मस्यौदा तयार
काठमाडौं । नेपाल बीमा प्राधिकरणले ‘इन्जिनियरिङ बीमासम्बन्धी निर्देशन, २०८३’ को मस्यौदा तयार गरी सार्वजनिक गरेको छ । प्राधिकरणले देशभित्र सञ्चालित निर्माण आयोजना तथा पूर्वाधार विकाससँग सम्बन्धित बीमालाई थप व्यवस्थित, पारदर्शी र प्रभावकारी बनाउने उद्देश्यले सो मस्यौदा तयार पारेको जनाएको छ । प्राधिकरणले तयार पारेको मस्यौदा उपर राय सुझाव संकलनको लागि सूचना प्रकाशित भएको मितिले ७ दिनभित्र सुझाव उपलब्ध गराउन आह्वान गरेको छ । प्राधिकरणका अनुसार सुझाव प्राधिकरणको बीमालेख शाखाको इमेलमा पठाउन सक्नेछन् । सुझाव सर्वसाधारण तथा सरोकारवालाहरूले बुझाउन सक्नेछन् । यस निर्देशिकाअन्तर्गत ६ प्रकारका प्रमुख इन्जिनियरिङ्ग बीमालेखहरू समेटिएका छन् । जसमा ठेकेदारहरूको सबै जोखिम बीमा, जडान तथा निर्माण जोखिम बीमा, ठेकेदारको प्लान्ट तथा मेशिनरी बीमा, इलेक्ट्रोनिक उपकरण बीमा र ब्वाइलर तथा प्रेसर भेसल बीमा रहेका छन् । परियोजनाअन्तर्गत सिएआर र ईएआर बीमालेखको हकमा १ करोडभन्दा माथिको बीमा भएमा बीमकले अनिवार्य रुपमा स्थलगत निरीक्षण गरी जोखिम मूल्यांकन प्रतिवेदन तयार पार्नुपर्ने छ । वार्षिक रूपमा नवीकरण हुने सीपिएम, ईईआई, बिपीभीआई आदि बीमालेखको हकमा १० लाख रुपैयाँभन्दा माथिको बीमांकमा स्थलगत निरीक्षण अनिवार्य गरिएको छ । त्यस्तै, निर्देशिकामा तोकिएको न्यूनतम बीमाशुल्क दरभन्दा कम दरमा बीमालेख जारी गर्न पाइने छैन । १ वर्षभन्दा बढी अवधिको परियोजनाका लागि बीमा जारी भएको ६० दिनभित्र कुल बीमाशुल्कको कम्तीमा एक–तिहाइ रकम बुझाइ १ वर्षभित्र बाँकी किस्ता बुझाउने सुविधा प्रदान गरिएको छ । पूर्ण क्षति भएको अवस्थामा सम्पत्तिको उमेर अनुसार ० प्रतिशत देखि ५० प्रतिशतसम्म ह्रासकट्टी लागू हुनेछ । (६ महिनाभन्दा कम उमेरको सम्पत्तिमा ह्रासकट्टी लाग्ने छैन) दाबी भुक्तानी गर्दा योग्य रकमको बढीमा १० प्रतिशतसम्म अधिक कट्टा गर्न सकिने व्यवस्था छ ।
सोलुखुम्बु हेलिकप्टर दुर्घटना अपडेट : उपचाररत तीन घाइते खतरामुक्त
काठमाडौं । सोलुखुम्बुको खुम्बु पासाङल्हामु गाउँपालिका –४, फेरिचेमा दुई हेलिकप्टर दुर्घटना हुँदा घाइते भएका दुई पाइलट र एक यात्रु खतरामुक्त रहेका छन् । लुक्लाबाट उडेको एयर डाइनेस्टीको नाइन एन एओडी हेलिकप्टर र गोरक्षेपबाट फेरिचे पुगेको फिस्टेल एयरको नाइन एन एजेआर हेलिकप्टर अवतरणका क्रममा बिहान ८ बजेर ११ मिनेटमा एक–आपसमा ठोक्किँदा दुर्घटना भएको थियो । भारतको तमिलनाडु राज्य, चेन्नई घर भएका अन्दाजी ४७ वर्षीय वसन्तकुमार बलरामुडुको मृत्यु भएको छ भने दुवै हेलिकप्टरका पाइलटसहित तीन जना घाइते भएका छन् । उनीहरूको ललितपुरस्थित मेडिसिटी अपस्पतालमा उपचार भइरहेको छ । ‘भारतीय मुलका न्युजिल्याण्डका नागरिक र घाइते फिस्टेलका पाइलटलाई उपचारका लागि काठमाडौंको अस्पतालमा उपचाररत हुनुहुन्छ । उहाँहरू अहिले जोखिममुक्त रहेको जानकारी अस्पतालले गराएको छ,’ नागरिक उड्ययन प्राधिकरणका सूचना अधिकारी ज्ञानेन्द्र भुलले बताए । घाइते हुनेमा फिस्टेल हेलिकप्टरका पाइलट रविन्द्र प्रजापति, डाइनेस्टी हेलिकप्टरका पाइलट प्रजल केसी र भारतीय मूलका न्युजील्याण्डका नागरिक ४९ वर्षीय सेलिशकुमार पटेल रहेका छन् । घाइतेमध्ये पटेल र प्रजापतिलाई प्रभु एयरको हेलिकप्टरमार्फत उपचारका लागि ल्याइएको हो । डाइनेस्टी एयरका पाइलट केसीको लुक्लास्थित निकोल निक्की अस्पतालमा उपचार भइरहेको र अवस्था सामान्य रहेको छ । भिजिबिलिटी क्लियर रहेको बेला भएको उक्त दुर्घट्नाबारे प्राधिकरणका सूचना अधिकारी भुलले यतिबेला अनुसन्धान जारी रहको जानकारी दिए । ‘ भिजिबिलिटी क्लियर नै भएको अवस्थामा पङ्खा र पुच्छर ठोक्कीदा दुर्घट्ना भएको देखिन्छ । हामी प्रविधिक कारण हो वा हावाका कारण दुर्घटना भएको हो अनुसन्धानकै क्रममा छौं,’ उनले भने । पाइलट निलम्ब गर्ने नगर्ने भन्ने विकासन्युजको प्रश्नमा भने उनले अनुसन्धान पछि निर्णय हुने बताए ।
विराटनगरले जनकपुरलाई दियो १७५ रनको लक्ष्य
काठमाडौं । जारी नेपाल प्रिमियर लिग (एनपीएल)को तेस्रो संस्करणमा विराटनगर किंग्सले जनकपुर बोल्टसामु १७५ रनको लक्ष्य प्रस्तुत गरेको छ । विराटनगरले निर्धारित २० ओभरमा ३ विकेट गुमाउँदै जनकपुरविरुद्ध १७४ रनको योगफल तयार पार्यो । विराटनगरका लागि लोकेश बमले ५० रनको अर्धशतकीय इनिङ खेले । त्यस्तै, इम्रान शेखले ५६ र आन्द्रे रसेलले ५२ रनको बनाए । जनकपुरका लागि मोइन अली र अभिषेक तिवारीले १–१ विकेट लिए । जनकपुरले टस जितेर बलिङ रोजेको थियो । प्रतियोगितामा जनकपुर तेस्रो जितको खोजीमा हुँदा विराटनगर दोस्रो जितको दाउमा छ । दुवै टिमको यो चौथो खेल हो ।
ट्रम्पको लोकप्रियताको परीक्षा, संसदमा बहुमत खोस्ने दाउमा डेमोक्र्याट
काठमाडौं । अमेरिकामा राष्ट्रपति डोनाल्ड ट्रम्पको दोस्रो कार्यकालको दुई वर्ष पूरा हुन लाग्दा महत्त्वपूर्ण मध्यावधि निर्वाचन भइरहेको छ । यो निर्वाचनलाई ट्रम्प प्रशासनको कामको मूल्यांकनका रूपमा हेरिएको छ । निर्वाचनबाट अमेरिकी संसद्का दुवै सदनमा कुन पार्टीको बहुमत कायम हुन्छ भन्ने टुंगो लाग्नेछ । निर्वाचनमा मुख्य प्रतिस्पर्धा राष्ट्रपति ट्रम्पको रिपब्लिकन पार्टी र विपक्षी डेमोक्र्याटिक पार्टीबीच छ । अहिले संसद्का दुवै सदनमा रिपब्लिकन पार्टीको बहुमत छ । तर यसपटक डेमोक्र्याटहरू दुवै सदनमा बहुमत ल्याएर ट्रम्प प्रशासनलाई संसदबाटै चुनौती दिने रणनीतिमा छन् । अमेरिकामा यसलाई मिडटर्म इलेक्सन अर्थात् मध्यावधि निर्वाचन भनिन्छ । तर यो राष्ट्रपति निर्वाचन होइन । अमेरिकी राष्ट्रपतिको चारवर्षे कार्यकालको बीचमा हुने निर्वाचन भएकाले यसलाई मध्यावधि निर्वाचन भनिएको हो । राष्ट्रपतिको कार्यकालको दुई वर्ष बितेपछि हुने यो निर्वाचनले बाँकी दुई वर्ष सरकारलाई संसदमा कति सहज हुन्छ भन्ने निर्धारण गर्छ । निर्वाचनमा प्रतिनिधिसभाका सबै ४३५ सिट र माथिल्लो सदन सिनेटका १०० मध्ये ३५ सिटका लागि मतदान भइरहेको छ । त्यस्तै, देशका ३६ राज्यमा गभर्नर अर्थात् राज्य सरकार प्रमुख चयन गर्न पनि निर्वाचन हुँदैछ । यसबाहेक विभिन्न राज्यमा स्थानीय पद र अन्य विषयमा पनि मतदान भइरहेको छ । कसले मार्ला बाजी ? निर्वाचनअघि सार्वजनिक भएका सर्वेक्षण र चुनावी अनुमानले डेमोक्र्याटिक पार्टीलाई प्रतिनिधिसभामा बहुमत ल्याउने सम्भावना बढी देखाएका छन् । सिनेटमा भने प्रतिस्पर्धा निकै कडा हुने अनुमान छ । अमेरिकी समाचार संस्था रोयटर्सका अनुसार प्रतिनिधिसभामा डेमोक्र्याटहरूले बहुमत ल्याउने पक्षमा सर्वेक्षणहरू देखिएका छन् । तर सिनेटको नतिजा भने अझै अनिश्चित छ । सिनेटमा रिपब्लिकनको पकड कायम रहने वा डेमोक्र्याटले बहुमत खोस्ने भन्ने विषय केही प्रतिस्पर्धात्मक राज्यको नतिजामा निर्भर हुनेछ । यसअघि सिनेटमा रिपब्लिकन पार्टीका ५३ र डेमोक्र्याटिक पक्षका ४७ सदस्य थिए । डेमोक्र्याटिक पक्षमा दुई स्वतन्त्र सांसद पनि छन्, जसले डेमोक्र्याटसँग मिलेर काम गर्छन् । सिनेटमा बहुमतका लागि ५१ सिट आवश्यक हुन्छ । त्यसैले डेमोक्र्याटहरूले बहुमत ल्याउन आफ्नो पक्षमा कम्तीमा चार सिट थप्नुपर्नेछ । प्रतिनिधिसभामा भने कुल ४३५ सिट छन् । बहुमतका लागि २१८ सिट आवश्यक पर्छ । अहिले रिपब्लिकनसँग २१८ र डेमोक्र्याटसँग २१४ सिट छन् । एक स्वतन्त्र सांसद र दुई रिक्त सिट पनि छन् । त्यसैले प्रतिनिधिसभामा बहुमत उल्ट्याउनका लागि डेमोक्र्याटहरूलाई केही सिटमात्रै पर्याप्त हुन सक्छ । यस निर्वाचनमा विशेषगरी टेक्सास, अलास्का, मेन, नर्थ क्यारोलाइना, आयोवा, ओहायो र मिचिगनजस्ता राज्यका सिनेट निर्वाचनलाई महत्त्वपूर्ण रूपमा हेरिएको छ । यी राज्यमा हुने प्रतिस्पर्धाले सिनेटको बहुमत कसको हातमा जाने भन्ने निर्धारण गर्न सक्छ । प्रतिनिधिसभाको निर्वाचनमा पनि धेरै क्षेत्रमा कडा प्रतिस्पर्धा छ । रोयटर्सका अनुसार करिब ४७ निर्वाचन क्षेत्रलाई प्रतिस्पर्धात्मक मानिएको छ । त्यसैले डेमोक्र्याटले प्रतिनिधिसभामा अग्रता कायम गर्ने अनुमान भए पनि अन्तिम नतिजाका लागि मतगणना कुर्नुपर्नेछ । ट्रम्पलाई किन चुनौती ? यो निर्वाचनलाई ट्रम्पको लोकप्रियताको परीक्षाका रूपमा पनि हेरिएको छ । सन् २०२४ को राष्ट्रपतीय निर्वाचन जितेर दोस्रो कार्यकालका लागि ह्वाइट हाउस प्रवेश गरेका ट्रम्पले आफ्नो कार्यकालमा लिएका विभिन्न निर्णयको प्रभाव यस निर्वाचनमा देखिने अनुमान गरिएको छ । विशेषगरी महँगी, इन्धनको मूल्य, भन्सार शुल्क, आप्रवासन नीति र इरानसँगको युद्धलाई लिएर अमेरिकी मतदातामा असन्तुष्टि देखिएको छ । यी विषयले ट्रम्पको पार्टीलाई निर्वाचनमा असर पार्न सक्ने विश्लेषण गरिएको छ । ट्रम्प प्रशासनले लिएका आर्थिक तथा विदेश नीतिसम्बन्धी निर्णय पनि निर्वाचनका प्रमुख मुद्दा बनेका छन् । विपक्षी डेमोक्र्याटहरूले महँगी नियन्त्रण गर्न नसकेको, सर्वसाधारणको जीवनयापन महँगो बनाएको र विदेश नीतिमा अनिश्चितता सिर्जना गरेको भन्दै सरकारको आलोचना गरिरहेका छन् । अर्कोतर्फ, रिपब्लिकनहरूले ट्रम्प प्रशासनका नीतिले अमेरिकी अर्थतन्त्रलाई बलियो बनाउने, देशको सुरक्षा र राष्ट्रिय हितलाई प्राथमिकता दिने दाबी गर्दै मत मागिरहेका छन् । अमेरिकाको राजनीतिक इतिहास हेर्दा पनि राष्ट्रपतिको पार्टीले मध्यावधि निर्वाचनमा संसद्का सिट गुमाउने प्रवृत्ति देखिन्छ । त्यसैले यसपटक पनि रिपब्लिकन पार्टीलाई चुनौती थपिएको विश्लेषण गरिएको छ । मतदान कस्तो भइरहेको छ ? अमेरिकामा मंगलबार मतदान भइरहेको छ । यसअघि नै लाखौं मतदाताले अग्रिम मतदान र हुलाकमार्फत मतदान गरिसकेका छन् । अमेरिकी सञ्चारमाध्यम एबीसी न्युजका अनुसार निर्वाचनको मुख्य दिन सुरु हुनुअघि नै ५ करोड ७० लाखभन्दा बढी मत खसिसकेको थियो । अमेरिकामा सबै राज्यमा एउटै समयमा मतदान हुँदैन । प्रत्येक राज्यले आफ्नै समयअनुसार मतदान केन्द्र खोल्ने र बन्द गर्ने व्यवस्था गरेका छन् । त्यसैले पूर्वी तटीय क्षेत्रका केही स्थानमा मतदान सकिएपछि मतगणना सुरु हुँदा पश्चिमी क्षेत्रका कतिपय स्थानमा मतदान जारी रहन सक्छ । मतदान सकिएपछि प्रारम्भिक नतिजा आउन थाल्नेछ । तर सबै क्षेत्रको नतिजा एकै दिन सार्वजनिक नहुन सक्छ । विशेषगरी हुलाकमार्फत आएका मत धेरै भएका राज्यमा मतगणना गर्न केही दिन लाग्न सक्छ । त्यसैले प्रारम्भिक मतगणनामा कुनै पार्टी अगाडि देखिँदैमा उसैले चुनाव जितेको निष्कर्ष निकाल्न मिल्दैन । मध्यावधि निर्वाचनले राष्ट्रपतिलाई कसरी असर गर्छ ? अमेरिकी राजनीतिक व्यवस्थामा राष्ट्रपतिले सरकार सञ्चालन गरे पनि संसद्को भूमिका निकै महत्त्वपूर्ण हुन्छ । संसद्का दुवै सदनले कानुन निर्माण, बजेट पारित र सरकारका विभिन्न निर्णयमाथि निगरानी गर्ने काम गर्छन् । यदि यस निर्वाचनमा डेमोक्र्याटहरूले प्रतिनिधिसभा वा सिनेटमध्ये कुनै एक सदनमा बहुमत ल्याए भने ट्रम्प प्रशासनलाई आफ्ना योजना अघि बढाउन कठिन हुन सक्छ । संसदमा बहुमत पाउने पार्टीले विभिन्न सरकारी नीतिमाथि छलफल गराउने, प्रशासनका कामको छानबिन गर्ने र विधेयक पारित गर्ने प्रक्रियामा महत्त्वपूर्ण भूमिका खेल्न सक्छ । विशेषगरी प्रतिनिधिसभामा डेमोक्र्याटहरूले बहुमत ल्याएमा ट्रम्प प्रशासनका निर्णयमाथि छानबिन र निगरानी बढाउन सक्छन् । सिनेटमा पनि बहुमत गुमाएमा राष्ट्रपतिले नियुक्त गर्ने महत्वपूर्ण सरकारी पदाधिकारी तथा न्यायाधीशको अनुमोदन प्रक्रियामा समस्या आउन सक्छ । तर डेमोक्र्याटहरूले दुवै सदनमा बहुमत ल्याउँदैमा ट्रम्प राष्ट्रपति पदबाट हट्ने भने होइनन् । उनको चारवर्षे कार्यकाल सन् २०२९ सम्म रहनेछ । मध्यावधि निर्वाचनले राष्ट्रपतिको पद परिवर्तन गर्दैन, बरु संसदमा उनको पार्टीको शक्ति कति रहन्छ भन्ने निर्धारण गर्छ । नतिजाले आगामी अमेरिकी राजनीतिलाई दिशा दिने यस निर्वाचनको परिणामले ट्रम्प प्रशासनको बाँकी दुई वर्षको राजनीतिक दिशा निर्धारण गर्नेछ । रिपब्लिकनहरूले दुवै सदनमा बहुमत कायम राख्न सके ट्रम्पलाई आफ्ना नीति तथा कार्यक्रम अघि बढाउन सहज हुनेछ । तर डेमोक्र्याटहरूले बहुमत खोसेमा ट्रम्प प्रशासनले संसद्मा बलियो विपक्षको सामना गर्नुपर्नेछ । यसले आगामी दिनमा अमेरिकी अर्थतन्त्र, आप्रवासन, व्यापार, विदेश नीति र अन्य महत्त्वपूर्ण विषयमा सरकारका निर्णयलाई प्रभाव पार्न सक्छ । यस निर्वाचनलाई सन् २०२८ मा हुने अर्को राष्ट्रपतीय निर्वाचनको तयारीका रूपमा पनि हेरिएको छ । बाइनान्स ह्याकमा उत्तर कोरियाको संलग्नता अस्वीकार जेनजी आन्दोलनको रापमा जर्मनी इजरायलको चुनावी नतिजा र अबका चुनौती चिनियाँ अर्बपतिहरूमा नागरिकता त्याग्नेको संख्या बढ्दै एम्बाप्पेको अभिव्यक्तिले ला–लिगाको ४० करोड युरोको कारोबार जोखिममा ब्राजिलमा लुलाको ऐतिहासिक जित, चौथो कार्यकाल अहिलेसम्मकै कठिन
माधव नेपाल र मिनेन्द्र रिजालसहित ९४ जनाविरुद्ध भ्रष्टाचार मुद्दा
काठमाडौं । पूर्वप्रधानमन्त्री माधवकुमार नेपाल र नेपाली कांग्रेसका नेता तथा तत्कालीन मन्त्री मिनेन्द्र रिजालसहित ९४ जनाविरुद्ध भ्रष्टाचार मुद्दा दायर हुने भएको छ । अख्तियार दुरुपयोग अनुसन्धान आयोगले ७६ करोड रुपैयाँ बिगो मागदाबीसहित उनीहरूविरुद्ध विशेष अदालतमा अभियोगपत्र पठाएको हो । अहिले अदालतमा मुद्दा दर्ताका लागि आवश्यक कागजात रुजु गर्ने काम भइरहेको छ । इटहरीस्थित रिजाल टासी इन्डस्ट्रिजको हदबन्दीभन्दा बढी जग्गा सट्टापट्टा र बिक्री गरिएको प्रकरणमा अख्तियारले उनीहरूलाई प्रतिवादी बनाएको हो । उक्त जग्गा सट्टापट्टा र बिक्री गर्न मन्त्रिपरिषदबाट निर्णय गराइएको विषयमा अख्तियारले अनुसन्धान गरेको थियो । अख्तियारका अनुसार ९४ जना प्रतिवादीमध्ये ५३ जनालाई जग्गा जफत गर्ने प्रयोजनका लागि विपक्षी बनाइएको छ । यस प्रकरणमा कुल ७६ करोड रुपैयाँ बिगो मागदाबी गरिएको छ । अख्तियारका सहप्रवक्ता पर्वत गिरीले प्रतिवादीको संख्या धेरै भएकाले अभियोगपत्र र सम्बन्धित कागजात रुजु गर्ने काम भइरहेको बताए । उनका अनुसार मुद्दा औपचारिक रूपमा दर्ता भएपछि प्रतिवादीहरू, उनीहरूमाथि लगाइएका आरोप, बिगो दाबी र जग्गा जफत गर्न गरिएको मागबारे थप विवरण स्पष्ट हुनेछ ।
नुवाकोटको बट्टारमा सिटिजन्स बैंकको नयाँ शाखा सञ्चालनमा
काठमाडौं । भोटेकोशी नदीमा आएको विनाशकारी बाढीबाट क्षति पुगेपछि सिटिजन्स बैंक इन्टरनेसनलले नुवाकोटको बट्टारमा नयाँ शाखा सञ्चालनमा ल्याएको छ । गत भदौ १० गते आएको बाढीले बैंकको देवीघाट शाखा पूर्ण रूपमा क्षति पुर्याएपछि स्थानीय सेवाग्राहीलाई सहज र प्रभावकारी बैंकिङ सेवा उपलब्ध गराउने उद्देश्यले विदुर नगरपालिका–२, बट्टारमा नयाँ शाखा सञ्चालनमा ल्याइएको हो । बैंकका प्रमुख कार्यकारी अधिकृत गणेशराज पोखरेलले आज आयोजित एक कार्यक्रमबीच शाखाको उद्घाटन गरेका हुन् । बट्टार शाखा यसअघि सञ्चालनमा रहेको देवीघाट शाखाबाट करिब ७ किलोमिटरको दूरीमा छ । शाखा उद्घाटन कार्यक्रममा प्रमुख कार्यकारी अधिकृत पोखरेलले देवीघाट शाखा पूर्ण रूपमा क्षतिग्रस्त भएपछि ग्राहकलाई निरन्तर बैंकिङ सेवा उपलब्ध गराउन बट्टारमा नयाँ शाखा सञ्चालन गरिएको बताए । उनले कठिन परिस्थितिमा पनि शाखा सञ्चालनका लागि खटिएका कर्मचारीको प्रशंसा गरे । बाढीले शाखामा ठूलो क्षति पुर्याए पनि त्यहाँ कार्यरत कर्मचारी भने सुरक्षित रहन सफल भएका थिए । सुविधासम्पन्न बट्टार शाखामार्फत बैंकले ग्राहकका वित्तीय आवश्यकता पूरा गर्न आवश्यक सबै प्रकारका खुद्रा बैंकिङ सेवा उपलब्ध गराउने जनाएको छ । साथै, साना तथा कर्पोरेट व्यवसायीलाई वित्तीय पहुँचमा जोड्ने लक्ष्य पनि बैंकले राखेको छ । बैंकले संस्थागत सामाजिक उत्तरदायित्वअन्तर्गत बट्टार शाखामा निःशुल्क स्वास्थ्य शिविरसमेत आयोजना गर्ने भएको छ । शिविरमा मुखको क्यान्सर, मुटु तथा रक्तनलीसम्बन्धी रोगको परीक्षण, शरीरको वस्तुमान सूचकाङ्क (बीएमआई) परीक्षण र मधुमेह परीक्षणलगायत सेवा निःशुल्क उपलब्ध गराइने बैंकले जनाएको छ । बागमती प्रदेशमा सिटिजन्स बैंकका ५६ शाखा सञ्चालनमा छन् । बैंकले देशभरका ६१ जिल्लामा रहेका २०० शाखा, १६७ एटीएम, तीन विस्तारित काउन्टर र ४२ शाखारहित बैंकिङ इकाइमार्फत २० लाख ८२ हजारभन्दा बढी ग्राहकलाई सेवा दिँदै आएको छ । बैंकले यसअघि फोनपेसँगको सहकार्यमा नेपालमै पहिलो पटक ‘सिटिजन्स फोनपे क्रेडिट कार्ड’ नामक भर्चुअल क्रेडिट कार्ड पनि सञ्चालनमा ल्याएको थियो । बैंकले सन् २०२४ र २०२५ मा ‘बैंक अफ द इयर’ अवार्डसमेत प्राप्त गरेको जनाएको छ ।
