बिग मुभिजमा अत्याधुनिक प्रविधि, अब सिनेमा हेर्दा अनुभव नै बेग्लै
दुई दशकअघि नेपालमा आधुनिक मल्टिप्लेक्स संस्कृतिको थालनी गर्ने पहिलो मल्टिप्लेक्स बिग मुभिजले प्रविधिको तीव्र विकास र दर्शकहरूको बढ्दो अपेक्षालाई सम्बोधन गर्ने उद्देश्यले सिनेमा हललाई रिनोमेसन गरी अत्याधुनिक सुविधासम्पन्न बनाएको छ । रिनोभेसनका क्रममा कम्पनीले आफ्नो मूल नारा ‘एक्सपेरियन्स सिनेमा एक्सपेरियन्स द डिफ्रेन्स’ लाई सार्थक बनाउन हलका हरेक पक्ष– प्रविधि, ध्वनि, सिट, वातावरण जस्ता पक्षमा अन्तर्राष्ट्रिय स्तर कायम गरेको बिग मुभिजका चेयरम्यान राजेन्द्र अर्यालले मंगलबार आयोजित पत्रकार सम्मेलनमा जानकारी दिए । काठमाडौंको कमलपोखरीस्थित सिटी सेन्टरमा रहेको बिग मुभिजको हलमा स्टेट अफ दि आर्ट दृश्य प्रविधि बार्को फोर के आरजीबी लेजर प्रोजेक्टर जडान गरिएको छ । कम्पनीले युरोपेली ब्रान्डको बहुचर्चित बार्को एसपीफोरके– २० सी (सिरिज ४)स्मार्ट लेजर प्रोजेक्टरमा २१ हजार ल्युमेन्स) को चमक र फोरके (४०९६*२१६०) को नेटिभ रिसोलुसन रहेको छ । पर्दामा चलचित्रका दृश्यहरूलाई अत्यन्त स्पष्ट, चम्किलो र जिवन्त बनाउन कम्पनीले ठूलो रकम खर्चेर यो प्रोजेक्टर जडान गरेको हो । चलचित्रका दृश्यमा वास्तविक र उच्च गुणस्तरीय रङ संयोजनका लागि ९८.५ प्रतिशतभन्दा बढी आरईसी २०२० र डीसीआई ए थ्री कलर स्पेस सपोर्ट गर्ने प्रविधि जडान गरिएको छ । पर्दाका दृश्यहरूलाई अत्यन्त स्पष्ट, चम्किलो र जिवन्त बनाउन बिग मुभिजका हलहरूमा १९*४३ फिट, २०*४३ फिट र २०*४६ फिट आकारका विशेष सिल्भर स्क्रिन राखिएका छन् । साउन्ड सिस्टमतर्फ थ्री–डी इमर्सिभ साउन्ड सिस्टम जडान गरिएको छ । परम्परागत साउन्ड सिस्टमभन्दा फरक हरेक स्पिकरलाई स्वतन्त्र अडियो फिड दिने गरी ६४–च्यानल डल्बी एट्मस प्रविधि जडान गरिएको छ । हलको ओभरहेड र र चारैतिर राखिएका स्पिकरहरू तथा सीपी (५) ए साउन्ड प्रोसेसरको मद्दतले १२८ वटासम्म साउन्ड अब्जेक्टहरूलाई एकैपटक नियन्त्रण गरी दर्शकलाई चारैतर्फबाट वास्तविक ध्वनि अनुभव गराउँछ । यी स्पिकरका कारण विशेषगरी एक्सन/साउन्ड इन्टेन्सिभ चलचित्रहरूमा दर्शकले थप रोमाञ्चक अनुभव लिन पाउँछन् । हलका सिटहरूलाई पनि आरामदायी बनाइएको छ । दर्शकलाई विशेष अनुभूति दिलाउन नयाँ लक्जरी तथा एर्गोनोमिक सिटिङ राखेको छ । दर्शकको सहजताका लागि २५५ वटा २२ इन्चका ‘च्याम्पियन सिरिज’ थिएटर कुर्सीहरू राखिएका छन् । यी कुर्सीमा एडभान्स एर्गोनोमिक्स, रिच ल्यामिनेटेड फेब्रिक र थ्री–पोजिसन लकिङ सुविधा छ । थप विलासी र आरामदायी अनुभवका लागि २९ वटा २९ इन्चका ‘रोयल लक्जुरिया’ क्रिम कलर रिक्लाइनरहरू जडान गरिएको छ । हलभित्र नयाँ कार्पेटिङ, अकोस्टिक वाल कभरिङ र आधुनिक लाइटिङको व्यवस्था गरी पूर्ण रूपमा नयाँ वातावरण तयार पारिएको हो । ‘नेपालको पहिलो मल्टिप्लेक्सको पहिचान बनाएको बिग मुभिजले प्रविधि र सुविधामा सधैं पहिलो र अगाडि रहने आफ्नो इतिहासलाई यो व्यापक रिनोभेसन मार्फत पुनः प्रमाणित गरेको छ,’ उनले भने । ‘अब बिग मुभिजमा चलचित्र हेर्नु पर्दामा दृश्य हेर्नु मात्र हुने छैन, यो पूर्ण रूपमा कथा र वातावरणलाई महसुस गर्ने एउटा अविस्मरणीय अनुभव हुने विश्वास हामीले लिएका छौं,’ उनले थपे । उनका अनुसार बिग मुभिजमा अब दर्शक उत्कृष्ट पिक्चर, साउन्ड, कम्फर्ट र ओभरअल सिनेमा एक्सपेरियन्स गर्न पाउनेछन् ।
लुम्बिनीलाई पोखराले दियो ९८ रनको लक्ष्य
काठमाडौं । जारी नेपाल प्रिमियर लिग (एनपीएल)को तेस्रो संस्करण अन्तर्गत आज भएको दोस्रो खेलमा पोखरा एभेन्जर्सले लुम्बिनी लायन्ससामु ९८ रनको लक्ष्य प्रस्तुत गरेको छ । निर्धारित २० ओभरमा ९ विकेट गुमाउँदै पोखराले ९७ रनको योगफल तयार पार्यो । पोखराका लागि चमिका करुणारत्ने २५, कप्तान कुशल भुर्तेलले १४, माहेदी हसनले १३ र किरण ठगुन्नाले १२ रन बनाए । पोखराका रुबेन ट्रम्पेलम्यानले तीन विकेट लिए । तिलक भण्डारीले दुई तथा शेर मल्ल, अभिशेष गौतम र कप्तान रोहित पौडेलले समान एक–एक विकेट लिए । दुबै टिमको यो तेस्रो खेल हो । लुम्बिनीले पहिलो खेलमा सुदूरपश्चिम रोयल्सलाई पराजित गरेको थियो भने दोस्रो खेल वर्षाका कारण रद्द भएपछि चितवन राइनोजसँग अंक बाँडेको थियो । त्यसैगरी, पोखरा पहिलो खेलमा सुदूरपश्चिम र दोस्रो खेलमा जनकपुर बोल्ट्ससँग पराजित भएको थियो ।
लुम्बिनी विकास कोषको सदस्य सचिवमा सन्तोष पाण्डे नियुक्त
काठमाडौं । सरकारले लुम्बिनी विकास कोषको सदस्य सचिवमा इन्जिनियर सन्तोष पाण्डेलाई नियुक्त गरेको छ । मंगलबार बसेको मन्त्रिपरिषद् बैठकले रुपन्देहीका स्थायी बासिन्दा पाण्डेलाई कोषको सदस्य सचिवको जिम्मेवारी दिने निर्णय गरेको हो । रुपन्देहीको तिलोत्तमा स्थायी घर भएका पाण्डेले स्थानीय समुदायका सरोकार र लुम्बिनी क्षेत्रका विषय आफूले नजिकबाट बुझेको बताएका छन् । नियुक्तिपछि प्रतिक्रिया दिँदै उनले स्थानीय भावना र सरोकारलाई समेटेर काम गर्ने प्रतिबद्धता जनाएका छन् । ‘म रुपन्देहीको बासिन्दा हुँ । लुम्बिनीमा विगतमा भएका गतिविधि र स्थानीय समुदायका चिन्ताबारे म नजिकबाट जानकार छु । उहाँहरूको भावना समेटेर काम गर्छु,’ पाण्डेले भने । पाण्डे प्रधानमन्त्री बालेन्द्र शाह काठमाडौं महानगरपालिकाको प्रमुख रहँदादेखि नै उनको निकट रहेर सचिवालयमा काम गर्दै आएका व्यक्ति हुन्। पछिल्लो समय उनी पूर्वाधार विकासमन्त्री सुनिल लम्सालका प्रमुख सल्लाहकारका रूपमा कार्यरत थिए। पूर्वाधार विकास, संरचनागत इन्जिनियरिङ र सहरी व्यवस्थापनमा अनुभव हासिल गरेका पाण्डेले काठमाडौंको एड्भान्स्ड कलेज अफ इन्जिनियरिङ एन्ड म्यानेजमेन्टबाट सिभिल इन्जिनियरिङमा स्नातक गरेका छन्। उनले भारतको विश्वेश्वरैया टेक्नोलोजिकल युनिभर्सिटीबाट स्ट्रक्चरल इन्जिनियरिङमा स्नातकोत्तर गरेका हुन्। उनले यसअघि काठमाडौं महानगरपालिका, बुटवल उपमहानगरपालिका र तिलोत्तमा नगरपालिकामा संरचनागत इन्जिनियरका रूपमा काम गरिसकेका छन्। स्थानीय तहमा कार्यरत रहँदा भवन निर्माण संहिता, संरचनागत सुरक्षा, अग्ला भवनहरूको प्राविधिक परीक्षण तथा विद्युतीय भवन निर्माण अनुमति प्रणालीको कार्यान्वयन र सुधारमा योगदान गरेको उनको अनुभव छ।
१५ देशका ३०० विज्ञले प्रशासन सुधारबारे बहस गर्ने
काठमाडौं । सार्वजनिक प्रशासनलाई कसरी प्रभावकारी, पारदर्शी, जवाफदेही र नागरिकमैत्री बनाउने ? राज्यका संस्थाहरूको क्षमता कसरी बढाउने ? बदलिँदो समय र नागरिकका अपेक्षाअनुसार शासन प्रणालीलाई कसरी रूपान्तरण गर्ने ? यिनै प्रश्नमा केन्द्रित रहेर दक्षिण एसियासहित १५ देशका विज्ञहरू काठमाडौंमा जुट्ने भएका छन् । सार्वजनिक प्रशासन तथा शासकीय व्यवस्थापनसम्बन्धी अन्तर्राष्ट्रिय सम्मेलन बुधबार (भोलि) देखि काठमाडौंमा सुरु हुँदैछ । कात्तिक १८ देखि २० गतेसम्म सञ्चालन हुने सम्मेलनमा दक्षिण एसियाका आठसहित १५ देशका ३०० भन्दा बढी प्रतिनिधि सहभागी हुने आयोजक संस्थाहरूले जनाएका छन् । नेपाल प्रशासनिक प्रशिक्षण प्रतिष्ठान र नेपाल जनप्रशासन संघको संयुक्त आयोजनामा हुन लागेको सम्मेलनमा सार्वजनिक प्रशासन, शासकीय व्यवस्थापन, नीतिनिर्माण, प्रशासनिक सुधार र सार्वजनिक सेवा प्रवाहका क्षेत्रमा काम गरिरहेका विज्ञ, अनुसन्धानकर्ता, नीतिनिर्माता तथा सरकारी अधिकारी सहभागी हुनेछन् । सम्मेलनको मुख्य विषय दक्षिण एसियामा सार्वजनिक प्रशासनको पुर्नकल्पना, नैतिकता, समावेशिता र राज्यको क्षमता रहेको छ । प्रतिष्ठानका कार्यकारी निर्देशक डा. रामप्रसाद घिमिरेका अनुसार दक्षिण एसियाली मुलुकबाहेक मलेसिया, इन्डोनेसिया, फिलिपिन्स, थाइल्यान्ड, चीन, अस्ट्रेलिया, बेलायत र संयुक्त राज्य अमेरिकाका अनुसन्धानकर्ता तथा विज्ञहरूको समेत कार्यक्रममा सहभागि रहनेछन् । सम्मेलनमा १४५ वटा अनुसन्धानमूलक कार्यपत्र प्रस्तुत गरिने डा. घिमिरेले जानकारी दिए । उनका अनुसार तीन दिनसम्म चल्ने कार्यक्रममा ३६ वटा प्राविधिक सत्र, एउटा मुख्य प्रवचन र तीनवटा विषयगत विचारमन्थन सत्र सहितका कार्यक्रम सञ्चालन हुनेछन् । सम्मेलनमा सार्वजनिक प्रशासनको नैतिकता, सुशासन, संस्थागत क्षमता, समावेशी शासन प्रणाली, डिजिटल सेवा प्रवाह, प्रशासनिक जवाफदेहिता र नागरिकको विश्वास अभिवृद्धिलगायतका विषयमा छलफल हुनेछ । विशेषगरी राज्यका सार्वजनिक संस्थालाई नागरिकप्रति उत्तरदायी बनाउने र बदलिँदो सामाजिक तथा आर्थिक परिवेशअनुसार प्रशासनिक प्रणालीलाई सुधार गर्ने उपायमा विज्ञहरूले आफ्ना अनुभव र अनुसन्धान प्रस्तुत गर्ने डा. घिमिरेले जानकारी दिए । नेपालका लागि यो सम्मेलन विशेष महत्वको मानिएको छ । संघीय शासन प्रणाली कार्यान्वयन, प्रशासनिक पुनर्संरचना, सार्वजनिक सेवा प्रवाहमा सुधार र सरकारी निकायको कार्यक्षमता अभिवृद्धि नेपालका प्रमुख प्रशासनिक चुनौतीका रूपमा रहेका छन् । यस्ता विषयमा दक्षिण एसियाली मुलुकले भोगेका समस्या, अपनाएका अभ्यास र हासिल गरेका उपलब्धिबारे प्रत्यक्ष अनुभव आदानप्रदान गर्ने अवसर सम्मेलनले प्रदान गर्ने अपेक्षा गरिएको कार्यकारी निर्देशक डा. घिमिरेले बताए । डा घिमिरेका अनुसार दक्षिण एसियाली सार्वजनिक प्रशासनसम्बन्धी सम्मेलन शृङ्खलाको यो तेस्रो संस्करण हो । यसअघि बंगलादेशको ढाका र पाकिस्तानको लाहोरमा यस्तै सम्मेलन आयोजना भइसकेका छन् । यस्तो सम्मेलन नेपालमा भने पहिलोपटक आयोजना हुन लागेको हो । सम्मेलनबाट सार्वजनिक प्रशासन सुधारका लागि नीतिगत सुझाव संकलन गर्नुका साथै अनुसन्धानमूलक सामग्री प्रकाशन गर्ने योजना रहेको छ । सम्मेलनका निष्कर्षलाई काठमाडौं घोषणापत्रका रूपमा अभिलेख गर्ने तयारीसमेत गरिएको छ । डा. घिमिरेले सार्वजनिक प्रशासन केवल सरकारी कार्यालय सञ्चालन गर्ने संयन्त्र मात्र नभई नागरिकले राज्यबाट पाउने सेवा, न्याय र सुशासनको प्रत्यक्ष आधार रहेको बताए ।
प्रेस काउन्सिल र पर्यटन क्षेत्रका कानुन संशोधन गर्न दुई अध्यादेश राष्ट्रपतिसमक्ष सिफारिस
काठमाडौं । सरकारले प्रेस काउन्सिल र संस्कृति, पर्यटन तथा नागरिक उड्डयन क्षेत्रसँग सम्बन्धित कानुन संशोधन गर्न दुईवटा अध्यादेश ल्याउने भएको छ । मंगलबार बसेको मन्त्रिपरिषद् बैठकले प्रेस काउन्सिल ऐन, २०४८ संशोधन गर्ने तथा संस्कृति, पर्यटन तथा नागरिक उड्डयनलगायतका क्षेत्रसँग सम्बन्धित केही नेपाल ऐन संशोधन गर्ने अध्यादेश जारी गर्न राष्ट्रपतिसमक्ष सिफारिस गर्ने निर्णय गरेको हो । मन्त्रिपरिषद्को निर्णयमा ‘प्रेस काउन्सिल ऐन, २०४८ लाई संशोधन गर्न बनेको अध्यादेश र संस्कृति, पर्यटन तथा नागरिक उड्डयनलगायतका केही नेपाल ऐनलाई संशोधन गर्न बनेको अध्यादेश जारी गर्न राष्ट्रपतिसमक्ष सिफारिस गर्ने’ उल्लेख छ । सरकारले दुई अलग-अलग अध्यादेशमार्फत कानुनी संशोधन गर्न खोजे पनि त्यसमा समेटिएका विषय र संशोधनका प्रस्तावित प्रावधान भने सार्वजनिक गरेको छैन ।
यस वर्षको भाइटीकाको शुभसाइत कात्तिक २५ गते बिहान ११:०७ बजे
काठमाडौं । यस वर्षको भाइटीकाको शुभसाइत सार्वजनिक भएको छ । नेपाल पञ्चाङ्ग निर्णायक विकास समितिका अनुसार २०८३ सालको भाइटीकाको शुभसाइत कात्तिक २५ गते बुधबार बिहान ११ बजेर ७ मिनेटमा रहेको छ । समितिका सदस्य लक्ष्मण पन्थीका अनुसार यस वर्ष यमपञ्चकअन्तर्गतका पर्व कात्तिक २० गतेदेखि सुरु हुनेछन् । कात्तिक २० गते शुक्रबार धनत्रयोदशी (धन्तेरस) र यमदीपदान गरिनेछ। कात्तिक २१ गते शनिबार काग तिहार तथा धन्वन्तरि जयन्ती मनाइनेछ । त्यस्तै, कात्तिक २२ गते आइतबार नरक चतुर्दशी, कुकुर तिहार र लक्ष्मीपूजा परेको छ। कात्तिक २३ गते सोमबार गाईपूजा हुनेछ । कात्तिक २४ गते मंगलबार गोवर्धन पूजा, गोरुपूजा, बलिपूजा, हलितिहार र म्हपूजा मनाइनेछ । सोही दिन नेपाल संवत् ११४७ पनि सुरु हुनेछ । यमपञ्चकको अन्तिम दिन कात्तिक २५ गते बुधबार यमद्वितीया अर्थात् भाइटीका मनाइनेछ । समितिका अनुसार भाइटीकाका दिन दाजुभाइ पश्चिम फर्किएर र दिदीबहिनी पूर्व फर्किएर टीका लगाउनुपर्नेछ ।
मोही लागेको जग्गा बाँडफाँटको समयसीमा थप्ने सरकारको निर्णय
काठमाडौं । सरकारले मोही लागेको जग्गाको बाँडफाँटसम्बन्धी प्रक्रिया पूरा गर्ने समयसीमा थप गर्ने निर्णय गरेको छ । मन्त्रिपरिषद्को २०८३ कात्तिक १७ गते बसेको बैठकले जग्गावाला र मोहीबीच जग्गा बाँडफाँट गरी लिन निवेदन दिनुपर्ने अवधि २०८५ कात्तिक मसान्तसम्म थप गर्ने निर्णय गरेको हो । त्यस्तै, जग्गावाला र मोहीबीच जग्गा बाँडफाँट गरी त्यससम्बन्धी कारबाहीको टुङ्गो लगाउनुपर्ने अवधि २०८६ असार मसान्तसम्म थप गर्ने निर्णय भएको छ । भूमि व्यवस्था, सहकारी, संघीय मामिला तथा सामान्य प्रशासन मन्त्रालयको प्रस्तावमा सरकारले उक्त निर्णय गरेको हो । निर्णयअनुसार थप गरिएको समयसीमासम्बन्धी सूचना नेपाल राजपत्रमा प्रकाशन गर्न स्वीकृति दिइएको छ । भूमिसम्बन्धी ऐन, २०२१ मा मोही लागेको जग्गा जग्गाधनी र मोहीबीच बाँडफाँट गर्नुपर्ने व्यवस्था छ । यसका लागि सरकारले नेपाल राजपत्रमा सूचना प्रकाशन गरी निवेदन दिने र बाँडफाँटको कारबाही टुङ्ग्याउने समयसीमा तोक्दै आएको छ ।
नेपाल बैंकका ग्राहकले १८ महिनासम्म किस्तामा सामान किन्न पाउने
काठमाडौं । नेपाल बैंक लिमिटेडका क्रेडिट कार्डबाहकले अब शून्य डाउन पेमेन्टमा किस्ताबन्दीमा सामान तथा सेवा खरिद गर्न पाउने भएका छन् । यसका लागि नेपाल बैंक र ‘बाइ नाउ पे लेटर’ (बीएनपीएल) प्लेटफर्म वानबीएनपीएल सञ्चालन गर्ने फिनटेक कम्पनी फिनटारा सोलुसन्सबीच सम्झौता भएको छ। सम्झौतासँगै नेपाल बैंक वानबीएनपीएलको १३औँ साझेदार बैंक बनेको छ । सम्झौताअनुसार नेपाल बैंकका योग्य क्रेडिट कार्डबाहकले वानबीएनपीएलको व्यापारिक सञ्जालमा आबद्ध पसल तथा व्यवसायबाट सामान र सेवा खरिद गर्दा ० प्रतिशत डाउन पेमेन्टमा किस्ताबन्दी सुविधा पाउनेछन् । ग्राहकले खरिद गरेको रकम ३ देखि १८ महिनासम्मको अवधिमा किस्ताबन्दीमार्फत भुक्तानी गर्न सक्नेछन् । वानबीएनपीएलको सञ्जालमा खुद्रा पसल, मोबाइल तथा ग्याजेट, घरायसी उपकरण, अस्पताल, रिसोर्ट र होलिडे प्याकेज प्रदायकसहित १५० भन्दा बढी अनलाइन तथा अफलाइन व्यापारिक प्रतिष्ठान आबद्ध छन् । नेपाल बैंकका प्रमुख कर्जा अधिकृत प्रदीपकुमार पाठकले फिनटेक कम्पनीसँगको सहकार्यले क्रेडिट कार्डबाहकलाई आधुनिक डिजिटल किस्ताबन्दी सेवा उपलब्ध गराउन सहयोग पुग्ने बताए । त्यस्तै, फिनटारा सोलुसन्सका कार्यकारी निर्देशक आशिष के. शर्माले नेपाल बैंकसँगको साझेदारीले ग्राहकलाई सहज रूपमा कर्जा सुविधा उपलब्ध गराउने दिशामा महत्वपूर्ण योगदान पुर्याउने बताए । सम्झौतामा नेपाल बैंकका रिटेल कर्जा विभाग प्रमुख अर्जुनबहादुर कँडेल र कार्ड विभाग प्रमुख दीपक रेग्मीले पनि ग्राहकका बदलिँदा आवश्यकता पूरा गर्न यो सेवा उपयोगी हुने विश्वास व्यक्त गरेका छन् । यस सुविधाबाट ग्राहकले एकैपटक ठूलो रकम भुक्तानी नगरी आवश्यक वस्तु तथा सेवा खरिद गर्न सक्ने बैंकले जनाएको छ ।
