गगनलाई देउवा समूहको निम्तो छैन, महत भन्छन्– ‘अर्को कांग्रेस नै थाहा छैन’
काठमाडौं । नेपाली कांग्रेसको शेरबहादुर देउवा समूहले १५औँ महाधिवेशनको उद्घाटन सत्रमा गगनकुमार थापा नेतृत्वको कांग्रेसलाई आमन्त्रण नगर्ने भएको छ । प्रतिनिधिसभामा प्रतिनिधित्व गर्ने सबै राजनीतिक दलका प्रमुखलाई उद्घाटन समारोहमा सम्बोधनका लागि निमन्त्रणा गर्ने तयारी गरेको देउवा समूहले हालै सम्पन्न महाधिवेशनबाट सभापति निर्वाचित थापालाई भने निम्तो नदिने भएको हो । देउवा समूहका नेता डा. प्रकाशशरण महतले आफूहरू नै नेपाली कांग्रेसको वैधानिक नेतृत्व भएकाले अर्को समूहलाई निमन्त्रणा गर्नुपर्ने आवश्यकता नरहेको बताएका छन् । ‘हामी वैधानिक कांग्रेस हौँ। पार्टी विभाजित भएको छैन। त्यसैले अर्को कांग्रेस छ भन्ने नै हामीलाई थाहा छैन,’ महतले भने, ‘वैधानिक कांग्रेसको सभापति शेरबहादुर देउवा हुनुहुन्छ। उहाँकै नेतृत्वमा १५औँ महाधिवेशन हुँदैछ।’ महतका अनुसार महाधिवेशनको उद्घाटन सत्रमा प्रतिनिधिसभामा प्रतिनिधित्व गर्ने सबै राजनीतिक दलका प्रमुखसहित अन्य दललाई पनि निमन्त्रणा पठाइएको छ। तर, आफूहरूले आधिकारिक नमान्ने समूहलाई निमन्त्रणा गर्ने प्रश्नै नउठ्ने उनको भनाइ छ। ‘प्रतिनिधिसभामा रहेका सबै दलसहित अन्य दललाई निम्तो दिएका छौँ। अस्तित्वमै नरहेकालाई निम्तो दिने कुरै भएन,’ महतले भने। देउवा समूहले गगन थापा नेतृत्वको कांग्रेसलाई निमन्त्रणा नगर्ने निर्णय गरेसँगै पार्टीको आधिकारिकता र नेतृत्वसम्बन्धी विवाद महाधिवेशनको उद्घाटन समारोहमा समेत प्रत्यक्ष देखिने भएको छ। एकातिर थापा नेतृत्वको समूहले १५औँ महाधिवेशनबाट नयाँ नेतृत्व चयन गरिसकेको छ भने अर्कातिर देउवा पक्षले शेरबहादुर देउवालाई नै वैधानिक सभापति दाबी गर्दै आफ्नै नेतृत्वमा महाधिवेशन प्रक्रिया अघि बढाइरहेको छ। प्रतिनिधिसभामा रहेका अन्य दलका प्रमुखलाई उद्घाटन सत्रमा सम्बोधनका लागि आमन्त्रण गर्ने तर कांग्रेसकै अर्को समूहका सभापतिलाई निमन्त्रणा नगर्ने देउवा पक्षको तयारीले पार्टीभित्रको नेतृत्व र आधिकारिकतासम्बन्धी विवादलाई थप सतहमा ल्याएको छ।
प्रधानमन्त्रीलाई बस्नेतको प्रश्न : निर्णयको जिम्मेवारी कर्मचारीले मात्रै लिनुपर्ने ?
काठमाडौं । नेकपा एमालेका सचिव महेश बस्नेतले सुनकोशी–मरिण डाइभर्सन बहुउद्देश्यीय आयोजनाको ठेक्का प्रक्रिया रद्द गरिएको विषयमा प्रधानमन्त्री बालेन्द्र शाहसँग जवाफ मागेका छन् । पूर्वप्रधानमन्त्री केपी शर्मा ओली नेतृत्वको सरकारले अघि बढाएको राष्ट्रिय गौरवको आयोजनाको अर्बौं रुपैयाँको ठेक्का प्रक्रिया अन्तिम चरणमा पुगिसकेको अवस्थामा ठेक्का रद्द गर्न बाध्य पारिएको भन्दै बस्नेतले आपत्ति जनाएका हुन् । सामाजिक सञ्जालमार्फत बस्नेतले आफ्नो धारणा सार्वजनिक गरेका हुन् । उनले आफूले चाहेको निर्णय कर्मचारीको हस्ताक्षरबाट गराउने तर त्यसको कानुनी तथा प्रशासनिक जवाफदेहिताबाट राजनीतिक नेतृत्व पन्छिन खोजेको भन्दै प्रश्न गरेका छन् । ‘आफूले चाहेको निर्णय अरूको हस्ताक्षरमा गराउने, अनि भोलि अख्तियार र अदालतको कठघरामा कर्मचारीलाई उभ्याएर आफू पानीमाथिको ओभानो बन्ने कस्तो शासनशैली हो यो ?,’ उनले प्रश्न गरेका छन् । बस्नेतले सत्ता र निर्णय प्रक्रियामा राजनीतिक नेतृत्वको नियन्त्रण रहने तर त्यसबाट उत्पन्न हुने जवाफदेहिताको भार कर्मचारीमाथि मात्रै थोपर्ने प्रवृत्तिमाथि प्रश्न उठाएका छन् । ‘सत्ता आफ्नो, दबाब आफ्नो, निर्णय आफ्नो चाहनाअनुसार, तर जवाफदेहिता चाहिँ अरूको ?,’ उनको प्रश्न छ । उनले ठेक्का रद्द गर्ने निर्णय उचित थियो भने प्रधानमन्त्री कार्यालयले लिखित निर्देशन दिएर त्यसको जिम्मेवारी लिन किन नसकेको भन्दै प्रधानमन्त्री शाहसँग जवाफ मागेका छन् ।
पौने १० करोड भ्रष्टाचारको आरोपमा मालपोतका नासुविरुद्ध मुद्दा, परिवारका सदस्यसमेत तानिए
काठमाडौं । भूमिसुधार विभाग अन्तर्गतका भूमिसुधार तथा मालपोत कार्यालयहरूमा कार्यरत नायब सुब्बा (नासु) यदुनाथ आचार्यविरुद्ध अख्तियार दुरुपयोग अनुसन्धान आयोगले पौने १० करोड रुपैयाँभन्दा बढी गैरकानुनी सम्पत्ति आर्जन गरेको अभियोगमा विशेष अदालतमा मुद्दा दायर गरेको छ । आचार्यले पदीय मर्यादा विपरीतका कार्य गरी अस्वाभाविक रूपमा गैरकानुनी सम्पत्ति आर्जन गरेको भन्ने उजुरीका आधारमा अनुसन्धान गर्दा उनी र उनको परिवारको नाममा ठूलो परिमाणमा वैधानिक स्रोत नखुलेको सम्पत्ति भेटिएपछि आयोगले सोमबार आरोपपत्र दायर गरेको हो । अख्तियारका अनुसार आचार्य २०५४ साल माघ २ गते जिल्ला विकास समितिको कार्यालय खोटाङमा गाविस सचिव (रा.प.अनं. द्वितीय श्रेणी) पदबाट सरकारी सेवामा प्रवेश गरेका थिए। आयोगले उनको सेवा प्रवेशदेखि २०८० साल मंसिर २१ गतेसम्मको अवधिलाई जाँच अवधि कायम गरी आय-व्यय विश्लेषण गरेको थियो । वैधानिक आय साढे ६ करोड, खर्च १५ करोड ९८ लाख जाँच अवधिमा नासु आचार्य र उनको परिवारले पारिश्रमिक, घरजग्गा बिक्री, बैंक कर्जा, कृषि तथा ब्याज आयलगायतका वैधानिक स्रोतबाट ६ करोड २५ लाख ६३ हजार ३४५ रुपैयाँ मात्र आर्जन गरेको देखिएको छ। तर, सोही अवधिमा उनले जग्गा तथा घर खरिद, हलेसी डिपार्टमेन्ट स्टोरमा लगानी, शेयर खरिद, ऋण सापटी, सवारी साधन खरिद तथा बैंक मौज्दात लगायतका शीर्षकमा १५ करोड ९८ लाख ३५ हजार ३३५ रुपैयाँ खर्च तथा लगानी गरेको अनुसन्धानबाट खुलेको छ। आयतर्फको रकमभन्दा व्ययतर्फको रकम घटाउँदा ९ करोड ७२ लाख ७१ हजार ९८९ रुपैयाँ ८३ पैसा बराबरको सम्पत्तिको स्रोत नखुलेको र सो रकम गैरकानुनी रूपमा आर्जन गरी भ्रष्टाचार गरेको पुष्टि भएको अख्तियारको ठहर छ। श्रीमती र छोरीहरूलाई पनि प्रतिवादी बनाइयो गैरकानुनी रूपमा आर्जित सम्पत्ति लुकाउन र असुल उपर गर्ने प्रयोजनका लागि अख्तियारले नासु आचार्यकी श्रीमती ललिता राजभण्डारी, छोरीहरू निलु आचार्य र सरू आचार्यलाई पनि प्रतिवादी बनाएको छ । श्रीमती ललितालाई मुख्य कसुरदार सरह सजाय र जफतको मागदाबी गरिएको छ भने छोरीहरूलाई सम्पत्ति जफत गर्ने प्रयोजनका लागि मात्र प्रतिवादी कायम गरिएको छ । यसैगरी, गैरकानुनी लाभ प्राप्त गर्ने प्रकृतिको मतियार बनेको अभियोगमा प्रभा बस्नेत र कुमारी कटुवालविरुद्ध ३८ लाख ८६ हजार १८२ रुपैयाँ बिगो कायम गरी मुद्दा दायर गरिएको छ । सम्पत्ति शुद्धीकरणतर्फ छुट्टै ९ करोड १९ लाखको मागदाबी नासु आचार्यले आपराधिक क्रियाकलापबाट आर्जित रकमलाई घरजग्गा कारोबार, डिपार्टमेन्ट स्टोर, शेयर बजार तथा विभिन्न व्यक्तिहरूसँगको वित्तीय लेनदेनमार्फत तहकीकरण र एकीकरण गरी सम्पत्ति शुद्धीकरण (मनी लाउन्डरिङ) गरेकोसमेत पाइएको छ। अख्तियारले सम्पत्ति शुद्धीकरण निवारण ऐन, २०६४ बमोजिम आचार्य र उनकी श्रीमती ललिताविरुद्ध थप ९ करोड १९ लाख ८४ हजार ५७६ रुपैयाँ १९ पैसा बिगो कायम गरी सजायको मागदाबी गरेको छ । राष्ट्रसेवक कर्मचारी भएकाले आचार्यलाई थप १० प्रतिशत सजायसमेत हुनुपर्ने अख्तियारको माग छ ।
महालक्ष्मी विकास बैंकका कार्डबाट दराजमा सामान किन्दा २० प्रतिशतसम्म छुट
काठमाडौं । महालक्ष्मी विकास बैंक र दराज नेपालबीच ११.११ अभियानका अवसरमा ग्राहकलाई छुट उपलब्ध गराउने सम्बन्धमा सहकार्य भएको छ । सहकार्यअनुसार महालक्ष्मी विकास बैंकका डेबिट तथा क्रेडिट कार्ड प्रयोगकर्ताले दराजबाट सामान खरिद गर्दा २० प्रतिशतसम्म छुट पाउनेछन् । बैंकका अनुसार २०८३ कात्तिक १५ गतेदेखि कात्तिक २५ गतेसम्म लागू हुने योजनामा डेबिट कार्डबाट भुक्तानी गर्दा खरिद रकमको १५ प्रतिशत वा अधिकतम १ हजार ५०० रुपैयाँसम्म छुट पाइनेछ । त्यस्तै, क्रेडिट कार्डबाट भुक्तानी गर्दा खरिद रकमको २० प्रतिशत वा अधिकतम २ हजार रुपैयाँसम्म छुट उपलब्ध हुनेछ । छुट प्राप्त गर्न ग्राहकले दराजबाट भौचर संकलन गर्नुपर्नेछ । योजना अवधिभर सहभागी हुने ग्राहकलाई पहिले आउनेलाई प्राथमिकता दिँदै छुट प्रदान गरिने बैंकले जनाएको छ । बैंकले आफ्ना डिजिटल बैंकिङ सुविधालाई विस्तार गर्दै ग्राहकलाई सहज र सुरक्षित डिजिटल भुक्तानीको सुविधा उपलब्ध गराउने उद्देश्यले दराजसँग सहकार्य गरेको जनाएको छ । यस सहकार्यले ग्राहकलाई डिजिटल माध्यमबाट भुक्तानी गर्न प्रोत्साहन गर्नुका साथै डिजिटल नवप्रवर्तनमार्फत ग्राहक सन्तुष्टि बढाउन सहयोग पुग्ने बैंकको विश्वास छ । गुणस्तरीय वित्तीय सेवा प्रदान गर्दै आएको बैंकले हालै काठमाडौंको ज्ञानेश्वरमा कफी लाउन्जसहितको डिजिटल हबसमेत सञ्चालनमा ल्याएको छ ।
प्लास्टिकका फूल र माला बिक्रीमा प्रतिबन्ध, उल्लंघन गरे जफत गरिने
काठमाडौं । नजिकिँदै गरेको तिहार पर्वलाई लक्षित गर्दै काठमाडौं महानगरपालिकाले आफ्नो क्षेत्रभित्र प्लास्टिकजन्य फूल, माला तथा सजावटका सामग्री बिक्री वितरणमा प्रतिबन्ध लगाएको छ । महानगरपालिकाले स्वदेशी फूल तथा मालाको प्रयोगलाई प्राथमिकता दिन आग्रह गर्दै व्यवसायी, व्यापारी तथा सर्वसाधारणलाई प्लास्टिकजन्य फूल र माला बिक्री वितरण नगर्न अनुरोध गरेको हो । महानगर प्रहरी बलले सूचना जारी गर्दै प्रतिबन्धको अवज्ञा गरी प्लास्टिकजन्य वा गुणस्तरहीन फूल, माला तथा सजावटका सामग्री बिक्री गरेको पाइएमा त्यस्ता सामग्री जफत गरिने चेतावनी दिएको छ । नेपाली किसानले उत्पादन गरेका फूल तथा मालाले उचित बजार पाऊन् र उपभोक्तालाई खरिद गर्न सहज होस् भन्ने उद्देश्यले महानगरले विभिन्न स्थानमा फूल बिक्रीका लागि व्यवस्था गरेको छ । महानगरले नयाँ बानेश्वरको एनबी सेन्टर र आईप्लेक्स मल, शंखमुलको बिग मार्ट, मध्य बानेश्वरको सेल्सबेरी, बत्तीसपुतलीको फिनिक्स टावर, तीनकुने चौर र सिफल चौरलाई फूल बिक्रीस्थल तोकेको छ । त्यस्तै, चाबहिल क्षेत्रमा एसी कम्प्लेक्स, गणेशस्थान तरकारी बजार र केएल टावर अगाडि फूल बिक्री गर्न पाइनेछ । कमलादीको आईटी बिल्डिङ, पुतलीसडकको स्टार मल, अनामनगरको भाटभटेनी, सुन्धाराको काठमाडौं मल र न्युप्लाजास्थित बज्र कम्प्लेक्स (गुड मार्ट) मा पनि बिक्री गर्न सकिनेछ । यसैगरी, स्वयम्भूको धर्मचक्र पार्क, कलंकीको भाटभटेनी, नयाँ बजारको भ्याली कोल्ड स्टोर, माछापोखरीको बुद्ध मल तथा गुणस्तर खाल्डोमा पनि फूल बिक्रीका लागि स्थान तोकिएको छ । त्यसैगरी, कालिमाटी ब्याङ्क्वेट र चौखेल, हाँडीगाउँको वडा नम्बर ५ कार्यालय अगाडिको डबली र गणेश मन्दिर डबली, सामाखुसीको कोइराला स्मार्ट, महाराजगञ्जको सेल्सबेरी, गोंगबु, चप्पल कारखाना र बालुवाटारको बिग मार्टमा पनि फूल बिक्री गर्न पाइने महानगरले जनाएको छ । टेबहाल मन्दिर परिसर, लगन, जैसिदेवल र भृकुटीमण्डपलाई समेत फूल बिक्रीस्थलका रूपमा तोकिएको छ । फूल बिक्री वितरणका लागि थप सहजीकरण आवश्यक परेमा व्यवसायी तथा सर्वसाधारणले काठमाडौं महानगर प्रहरी बलको कार्यालयमा सम्पर्क गर्न सक्ने महानगरले जनाएको छ ।
दुई सातापछि मन्त्रिपरिषद् बैठक बस्दै
काठमाडौं । प्रधानमन्त्री बालेन शाहले आज (मंगलबार) मन्त्रिपरिषद् बैठक बोलाएका छन् । अपरान्ह ३ बजेका लागि बैठक बोलाइएको प्रधानमन्त्री तथा मन्त्रिपरिषद्को कार्यालयले जनाएको छ । दुई सातापछि बस्न लागेको बैठक सिंहदरबारस्थित प्रधानमन्त्री तथा मन्त्रिपरिषद्को कार्यालयमा हुनेछ । झण्डै १८ दिनपछि बैठक बस्न लागेको हो । फिक्सर इनम सापकोटासँग हाइ प्रोफाइलका व्यक्तिहरू मुछिएको विषय सार्वजनिक भएपछि मन्त्रिपरिषद बैठक बस्न सकेको थिएन ।
आज र भोलि बालबालिकालाई ‘भिटामिन ए’ र ‘जुकाको औषधी’ खुवाइँदै
काठमाडौं । सरकारले आज र भोलि दुई दिन बालबालिकालाई भिटामिन ए र जुकाको औषधी खुवाउँदैछ । राष्ट्रिय भिटामिन ए कार्यक्रमअन्तर्गत स्वास्थ्य तथा जनसङ्ख्या मन्त्रालयले दुई दिन भिटामिन एसँगै जुकाको औषधि पनि खुवाउन थालिएको स्वास्थ्य सेवा विभागका पोषण शाखा प्रमुख लीलाविक्रम थापाले जानकारी दिए । थापाका अनुसार कार्यक्रमका लागि ५२ हजार महिला स्वास्थ्य स्वयंसेविका र १० हजार स्वास्थ्यकर्मी खटिएका छन् । सरकारले प्रत्येक वर्ष कात्तिक र वैशाखमा भिटामिन ए र जुकाको औषधी बालबालिकालाई निःशुल्क खुवाउने गरेको छ । बालबालिकामा हुनसक्ने स्वास्थ्य जटिलता तथा कुपोषणको जोखिम न्यूनीकरण गर्नका लागि विसं २०५० देखि भिटामिन ए क्याप्सुल र विसं २०५६ देखि जुकाको औषधि नियमित खुवाउने गरिएको छ ।
नामी भिगोः दुई महिनामै सर्वाधिक बिक्री हुने कारको सूचीमा
काठमाडौं । सार्वजनिक भएको छोटो अवधिमै नामी भिगो ई-२ प्रति ग्राहकको आकर्षक देखिएको छ । नेपालका लागि डोङफेङ गाडीको आधिकारिक वितरक एमएडब्लू वृद्धि मोटर्सले नाडा अटो शोलाई लक्षित गर्दै गत भदौ ३ गते नेपाली बजारमा सार्वजनिक गरेको यो गाडीमा ग्राहकको आकर्षण देखिएको छ । कम्पनीका अनुसार चालु आर्थिक वर्षको असोज महिनामा मात्रै ८२९ युनिट नामी भिगो ई २ नेपाल आयात भएको छ । कात्तिक १५ गतेसम्म थप ५५० युनिट आयात भएका छन् । सार्वजनिक भएयता १ हजार ८ सयभन्दा बढी गाडी नेपाली सडकमा गुडिरहेको कम्पनीको दाबी छ । नामी भिगोले मूल्य, आकार, रेन्ज र आधुनिक फिचरलाई आफ्नो मुख्य प्रतिस्पर्धी आधार बनाएको छ । ४० लाख रुपैयाँभन्दा कम मूल्यमा ठूलो आकारको एसयूभी उपलब्ध गराउन सक्नु यसको बलियो पक्ष भएको कम्पनीको भनाइ छ । एमएडब्लू वृद्धि मोटर्सका मार्केटिङ हेड विराज श्रेष्ठका अनुसार भिगोको मूल्य र यसले उपलब्ध गराउने सुविधाकै कारण यसमा ग्राहकको आकर्षण बढेको हो । उनका अनुसार यो मूल्य समूहमा भिगोले दिने आकार, सुविधा र फिचर अन्य प्रतिस्पर्धी गाडीको तुलनामा आकर्षक छन् । ‘यो प्राइस सेग्मेन्टमा भिगो आइसकेपछि यससँग बराबरी गर्ने गाडी छैन । ग्राहकले ४० लाख रुपैयाँभन्दा कम मूल्यमा फुल साइज एसयूभी पाइरहेका छन् । त्यसैले यो भ्यालु फर मनी कार बनेको छ,’ श्रेष्ठले विकासन्युजसँगको कुराकानीमा भने । उनका अनुसार नामी भिगो नेपाली बजारका लागि बिल्कुलै नयाँ अवधारणाको गाडी भने होइन । यसअघि पनि नेपाली बजारमा आइसकेको र ग्राहकबाट रुचाइएको मोडल भएकाले यसको बजार विस्तारमा सहजता भएको हो । नेपाली ईभी बजारमा मूल्य र सुविधाबीच सन्तुलन खोज्ने ग्राहकको संख्या बढ्दै गएको छ । सीमित बजेटमा आकर्षक डिजाइन, ठूलो क्याबिन, पर्याप्त रेन्ज र आधुनिक प्रविधि खोज्ने ग्राहकलाई लक्षित गरेर नामी भिगो बजारमा आएको कम्पनीको भनाइ छ । यसको मूल्य ३७ लाख ९९ हजार रुपैयाँ तोकिएको छ । तर, नाडा अटो शोको सुरुवाती अफरअन्तर्गत ३५ लाख ९९ हजार रुपैयाँमै बुकिङ खुला गरिएको थियो । मूल्यका हिसाबले भिगोले नेपाली बजारमा बीवाईडी एटो २ लगायतका ईभीसँग प्रतिस्पर्धा गरिरहेको कम्पनीको दाबी छ । श्रेष्ठका अनुसार भिगोको लोकप्रियतामा मूल्य मात्रै कारण होइन । गाडीको पर्फर्मेन्स, ब्याट्री क्षमता, रेन्ज र नयाँ प्रविधिका सुविधाले पनि ग्राहकको रोजाइमा पर्न सहयोग गरेका छन् । एकपटक चार्ज गर्दा ४३० किलोमिटरसम्म रेन्ज नामी भिगोको प्रमुख आकर्षणमध्ये यसको ब्याट्री क्षमता र रेन्ज पनि हो । यसमा ५१.८७ किलोवाट आवर क्षमताको ब्याट्री जडान गरिएको छ । कम्पनीका अनुसार एकपटक पूर्ण चार्ज गर्दा यसले ४३० किलोमिटरसम्म रेन्ज दिन्छ । यद्यपि वास्तविक रेन्ज सडकको अवस्था, मौसम, ड्राइभिङ शैली र एयर कन्डिसनलगायतका सुविधाको प्रयोगअनुसार फरक पर्न सक्छ । गाडीमा ९९ किलोवाट क्षमताको इलेक्ट्रिक मोटर छ । यसले १६० न्युटन मिटर टर्क उत्पादन गर्छ । यसले सहरी आवागमनसँगै लामो दूरीको यात्राका लागि पनि पर्याप्त शक्ति उपलब्ध गराउने कम्पनीको दाबी छ । यसमा थ्रीसी फास्ट चार्जिङ प्रविधि उपलब्ध छ । १६७ किलोवाट क्षमताको डीसी फास्ट चार्जर प्रयोग गर्दा ब्याट्रीलाई ३० प्रतिशतबाट ८० प्रतिशतसम्म चार्ज गर्न १८ मिनेट मात्रै लाग्ने कम्पनीको दाबी छ । फास्ट चार्जिङ सुविधाले लामो यात्रामा चार्जिङका लागि लाग्ने समय घटाउन सहयोग गर्ने अपेक्षा गरिएको कम्पनीको भनाइ छ । १९० एमएम ग्राउण्ड क्लियरेन्स नामी भिगोको अर्को विशेषता यसको बाहिरी बनावट र आकार हो । कम्पनीका अनुसार यसको लम्बाइ ४ हजार ३०६ एमएम, चौडाइ १ हजार ८६८ एमएम र उचाइ १ हजार ६५४ एमएम छ । यसमा २ हजार ७१५ एमएम लामो ह्वीलबेस उपलब्ध छ । ठूलो ह्वीलबेसले गाडीको भित्री भागलाई फराकिलो बनाउन सहयोग गरेको छ । यसले यात्रुका लागि पर्याप्त स्पेस उपलब्ध गराउने कम्पनीको भनाइ छ । यसको ग्राउण्ड क्लियरेन्स १९० एमएम छ । नेपाली सडकको अवस्थालाई ध्यानमा राख्दा यो विशेषता पनि उपयोगी हुन सक्छ । विशेषगरी सामान्य कच्ची सडक, उबडखाबड बाटो तथा अग्ला स्पिड ब्रेकरमा गाडी चलाउँदा पर्याप्त ग्राउण्ड क्लियरेन्सले सहजता प्रदान गर्न सक्छ । नामी भिगोले बाहिरी आकार र रेन्जसँगै इन्टेरियर तथा प्रविधिमा पनि ध्यान दिएको छ । यसको क्याबिनमा १२.८ इन्चको इन्फोटेनमेन्ट सिस्टम र ८.८ इन्चको इन्फर्मेसन डिस्प्ले उपलब्ध छ । त्यस्तै, चालकलाई गाडी वरिपरिको अवस्था बुझ्न सहज बनाउने ३६० डिग्री क्यामेरा पनि यसमा छ । भ्वाइस कन्ट्रोलमार्फत गाडीका विभिन्न फङ्सन र मोबाइललाई कमाण्ड दिन सकिने सुविधा उपलब्ध रहेको कम्पनीले जनाएको छ । यसमा ५० वाटको वायरलेस चार्जर, वाइफाइ कनेक्टिभिटी तथा म्युजिकसँग कनेक्ट हुने एम्बियन्ट लाइटिङ सिस्टम पनि छ । चालकको सिटमा हिटेड र भेन्टिलेटेड सुविधा उपलब्ध छ । वेलकम तथा मेमोरी सिट, वान टच रियर सिट फोल्डिङजस्ता सुविधाले यसको क्याबिनलाई थप सुविधासम्पन्न बनाएका छन् । यसको विशेष फिचरमध्ये हेभन एन्ड अर्थ टेलगेट र एक्सटेरियर स्पिकर पनि पर्छन् । यी सुविधाले सामान्य गाडीभन्दा फरक अनुभव दिने कम्पनीको दाबी छ । विशेषगरी हेभन एन्ड अर्थ टेलगेटलाई कम्पनीले भिगोको आकर्षक र फरक पहिचानका रूपमा प्रस्तुत गरेको छ । यस्ता फिचरले गाडीलाई केवल यात्राका लागि प्रयोग हुने साधनभन्दा पनि सुविधासम्पन्न जीवनशैलीसँग जोड्ने कम्पनीको अपेक्षा छ । ईभी खरिद गर्दा ग्राहकले ब्याट्री र रेन्जसँगै सुरक्षालाई पनि प्राथमिकता दिन थालेका छन् । यही पक्षलाई ध्यानमा राखेर नामी भिगोमा विभिन्न सुरक्षा प्रणाली उपलब्ध गराइएको कम्पनीले जनाएको छ । यसमा ६ वटा एयरब्याग, एबीएस, ईबीडी, अटोहोल्ड, हिल होल्ड, डिसेन्ट कन्ट्रोल र ट्रयाक्सन कन्ट्रोलजस्ता सुविधा छन् । त्यस्तै, एडास (उन्नत चालक सहायता प्रणाली) प्रविधिसमेत उपलब्ध रहेको कम्पनीको भनाइ छ । ३६० डिग्री क्यामेराले पार्किङ तथा साँघुरो स्थानमा गाडी चलाउन सहज बनाउने अपेक्षा गरिएको छ । हिल होल्ड र डिसेन्ट कन्ट्रोलले उकालो तथा ओरालो बाटोमा गाडी नियन्त्रण गर्न सहयोग गर्छन् । यी सुविधाले भिगोलाई मूल्यअनुसार सुविधासम्पन्न ईभीका रूपमा स्थापित गर्न सहयोग पुग्ने कम्पनीको दाबी छ । नामी भिगो उत्पादन गर्ने डोङफेङ मोटर कर्पोरेसन लिमिटेड चीनको स्थापित अटोमोबाइल उत्पादक कम्पनी हो । सन् १९६९ मा स्थापना भएको यो कम्पनीले पाँच दशकभन्दा लामो समयदेखि अटोमोबाइल उद्योगमा काम गर्दै आएको छ । कम्पनीको मुख्य उत्पादन केन्द्र चीनको हुबेई प्रान्तस्थित वुहानमा रहेको छ । डोङफेङले यात्रुवाहक सवारीसाधन, व्यावसायिक सवारीसाधन, नयाँ ऊर्जाबाट चल्ने सवारीसाधन, सवारीका पार्टपुर्जा तथा विभिन्न अटोमोबाइलसम्बन्धी उपकरण उत्पादन गर्दै आएको छ । कम्पनीको कुल सम्पत्ति ४९९.३ अर्ब युआन पुगेको र करिब १ लाख २७ हजार कर्मचारी कार्यरत रहेको उपलब्ध विवरणमा उल्लेख छ । विश्वका शीर्ष ५०० कम्पनीको सूचीमा १८८औं स्थानमा रहेको डोङफेङले अनुसन्धान तथा विकास, उत्पादन र बजारीकरणमा लगानी गर्दै आएको छ । कम्पनीका सवारीसाधन विश्वका १०० भन्दा बढी देशमा उपलब्ध छन् । अन्तर्राष्ट्रिय बजारमा यसको विस्तारले पनि नामी भिगोजस्ता नयाँ मोडललाई विश्व बजारमा प्रतिस्पर्धा गर्न आधार प्रदान गरेको छ । नेपालमा ईभीको बजार विस्तारसँगै ग्राहकको रोजाइ पनि बदलिँदै गएको छ । सुरुमा साना तथा सहरी प्रयोगका लागि उपयुक्त गाडीप्रति आकर्षण देखिए पनि पछिल्लो समय ठूलो आकार, लामो रेन्ज, आधुनिक प्रविधि र सुरक्षा सुविधा भएका एसयूभीतर्फ ग्राहकको रुचि बढिरहेको छ । यही बदलिँदो बजारलाई लक्षित गर्दै नामी भिगोले ४० लाख रुपैयाँभन्दा कम मूल्यमा ठूलो आकारको एसयूभी उपलब्ध गराउने रणनीति लिएको देखिन्छ । असोज र कात्तिकमा भएको आयात तथा सार्वजनिक भएको छोटो समयमै १ हजार ८ सयभन्दा बढी गाडी सडकमा पुग्नुले यसको प्रारम्भिक बजार उपस्थिति बलियो देखिएको छ । यद्यपि दीर्घकालीन सफलता भने वास्तविक रेन्ज, ब्याट्रीको टिकाउपन, बिक्रीपछिको सेवा, स्पेयर पार्ट्सको उपलब्धता र ग्राहक सन्तुष्टिमा निर्भर हुनेछ । मूल्य, आकार र फिचरलाई मुख्य प्रतिस्पर्धी आधार बनाएको नामी भिगोले नेपाली ईभी बजारमा कस्तो स्थान बनाउँछ भन्ने आगामी दिनमा स्पष्ट हुँदै जानेछ । तर, सुरुवाती बजार प्रतिक्रियाले भने ४० लाख रुपैयाँभन्दा कम मूल्यको एसयूभी सेग्मेन्टमा नयाँ प्रतिस्पर्धा थपिएको संकेत गरेको छ ।
