प्रशासक बन्न पाँच सहकर्मीबीच प्रतिस्पर्धा
काठमाडौं । कर्मचारी सञ्चय कोषको प्रशासक बन्नका लागि पाँच जना प्रतिस्पर्धी देखिएका छन् । अर्थ मन्त्रालयले सार्वजनिक गरेको सूची अनुसार कोषको प्रशासक बन्नका लागि पाँच जना सहर्मीहरु प्रतिस्पर्धामा देखिएका हुन् । मन्त्रालयले जीवन कुमार कट्वाल (झापा), दामोदर प्रसाद सुवेदी (महोत्तरी), भरतराज वस्ती (झापा), विजय कुमार श्रेष्ठ (मोरङ) र सागर कुमार सिंह (काठमाडौं)को नाम सर्टलिष्टमा राखेको छ । सर्टलिष्टमा परेका कट्वाल वर्तमान निमित्त प्रशासक हुन् । जितेन्द्र धितालले राजीनामा दिएपछि उनी निमित्त बनेका थिए । अहिले उनी पनि प्रशासक बन्ने प्रतिस्पर्धामा छन् । यस्तै, दामोदर प्रसाद सुवेदी पनि कोषको प्रशासक बन्ने दौडमा छन् । उनी हाल कोषको मुख्य प्रबन्धकको रुपमा कार्यरत छन् भने अर्का प्रतिस्पर्धी भरतराज वस्ती पनि कोषको कामु सहप्रशासकको जिम्मेवारीमा छन् । यस्तै, विजय कुमार श्रेष्ठ पनि कामु सहप्रशासनको भूमिकामा छन् भने सागर कुमार सिंह पनि मुख्य प्रबन्धकको जिम्मेवारीमा छन् । छनोट समितिले छनोट भएका ५ जना उम्मेदवारहरूको प्रस्तुतीकरण तथा अन्तर्वार्ताको मिति पनि तय गरेको छ ।
जापानले बनायो मानिस बस्न मिल्ने फ्रिज
काठमाडौं । यदि तपाईंले कहिल्यै गर्मीयामको अत्यधिक तापमा फ्रिज खोलेर टाउकोभित्र राख्दै ‘यसैभित्र पस्न पाए कस्तो हुन्थ्यो’ भन्ने सोच्नुभएको छ भने जापानले त्यो कल्पनालाई वास्तविक उपकरणमा परिणत गरेको छ । जापानको एक कम्पनीले ‘ह्युमन रेफ्रिजेरेटर’ नामको एकल व्यक्तिका लागि बनाइएको विशेष कुलिङ बुथ सार्वजनिक गरेको छ । यसको उद्देश्य केही मिनेटमै शरीरको तापक्रम घटाएर गर्मीका कारण हुने स्वास्थ्य समस्याबाट बचाउनु हो । ‘डो हिएमोन बक्स’ नाम दिइएको यो डिजाइनको बुथ जापानी रेफ्रिजेरेसन तथा भेन्डिङ मेसिन निर्माता एसडीआरएसले विकास गरेको हो भने यसको बिक्री औद्योगिक उपकरण आपूर्तिकर्ता ट्रक्सो नाकायामाले गरिरहेको छ । बाहिरबाट हेर्दा यो सिसाको ढोका भएको सानो धातुको क्याबिन जस्तो देखिन्छ । तर यसमा खाना राखिँदैन, मानिसलाई चिसो बनाउन विशेष रूपमा डिजाइन गरिएको हो । कम्पनीले सार्वजनिक गरेको भिडियोअनुसार यसमा पारदर्शी सिसाको ढोका र भित्र बस्ने सिट हुन्छ । प्रयोगकर्ताले बुथभित्र प्रवेश गरी सिटमा बस्ने, ढोका बन्द गर्ने र त्यसपछि चिसो हावाले शरीरलाई चिस्याउने काम गर्छ । बुथभित्रको तापक्रम करिब १५ डिग्री सेल्सियस कायम राखिन्छ भने ५ डिग्री सेल्सियस तापक्रमको चिसो हावा सिधै टाउको, घाँटी, काँध र ढाडतर्फ फालिन्छ । कम्पनीका अनुसार करिब ५ मिनेटमै प्रयोगकर्ताले शरीर निकै चिसो भएको महसुस गर्न थाल्छन् । १० मिनेटसम्म प्रयोग गर्दा शरीरको तापक्रम घट्न मद्दत पुग्ने र गर्मीका कारण हुने थकान तथा असहजताका लक्षण कम हुने दाबी गरिएको छ । यसमा तीनवटा कुलिङ मोड छन् । साथै अत्यधिक चिसो हुन नदिन २० मिनेटपछि यो स्वतः बन्द हुने व्यवस्था गरिएको छ। कम्पनीका अनुसार ‘डो हिएमोन बक्स’ लामो समयसम्म बाहिर वा अत्यधिक गर्मी भएको स्थानमा काम गर्ने व्यक्तिहरूलाई लक्षित गरी बनाइएको हो । यसमा निर्माण मजदुर, कारखाना कर्मचारी, गोदाममा काम गर्ने श्रमिक तथा खुला स्थानमा आयोजना हुने कार्यक्रमका कर्मचारी समावेश छन् । यो बुथ स्थायी रूपमा जडान गर्नुपर्ने आवश्यकता पर्दैन । घरभित्र वा बाहिर दुवै ठाउँमा प्रयोग गर्न सकिन्छ । साथै यसमा पाङ्ग्रा भएकाले आवश्यक स्थानमा सजिलै सार्न पनि सकिन्छ । कम्पनीका अनुसार यो कुलिङ बुथले सामान्य स्पट एयर कन्डिसनर (एसी) को तुलनामा करिब आधा मात्र बिजुली खपत गर्छ । त्यसैले अत्यधिक गर्मीबाट छिटो राहत दिने ऊर्जामैत्री विकल्पका रूपमा यसलाई प्रस्तुत गरिएको छ । यसको अवधारणा लोकप्रिय जापानी कार्टुन पात्र डोरेमोनको जादुई खल्तीबाट निस्किएको उपकरणजस्तै लागे पनि यो घरेलु प्रयोगका लागि बनाइएको होइन । ‘डो हिएमोन बक्स’ मुख्य रूपमा व्यवसायिक प्रतिष्ठान, कारखाना, गोदाम र निर्माणस्थलका लागि लक्षित गरिएको हो । अत्याधुनिक प्रविधि भएकाले यो फ्रिजको मूल्य पनि सस्तो छैन । स्ट्यान्डर्ड ‘डो हिएमोन बक्स’को मूल्य १५ लाख जापानी येन (करिब साढे १४ लाख रुपैयाँ) तोकिएको छ ।
पढ्दापढ्दै अन्तर्राष्ट्रिय कम्पनीमा काम गर्दै इस्लिङ्टनका २९ विद्यार्थी
काठमाडौं । इस्लिङ्टन कलेजले विद्यार्थीलाई पढाइसँगै विभिन्न परियोजनामा काम गर्ने अवसर प्रदान गर्दै आएको छ । हाल कलेजमा अध्ययनरत २९ जना विद्यार्थीले पढाइसँगै अमेरिका, अस्ट्रेलिया र बेलायतका विभिन्न कम्पनीका परियोजनामा काम गरिरहेको कलेजले जनाएको छ । कलेजले उनीहरूलाई आफ्नो पहिलो एआई–नेटिभ ट्यालेन्ट समूहका रूपमा प्रस्तुत गरेको जनाएको छ । कलेजका अनुसार २९ जना विद्यार्थीलाई विशेष तालिम प्रदान गरी साझेदार संस्था ग्लोबल टिम्स एआईमार्फत अमेरिका, अस्ट्रेलिया र बेलायतका विभिन्न परियोजनामा आबद्ध गरिएको हो । विद्यार्थीहरूको क्षमता साझेदार संस्था पेक्सस टेकले पनि सकारात्मक रूपमा मूल्यांकन गरेको कलेजले जनाएको छ । कलेजले विद्यार्थीलाई अध्ययनकै क्रममा उद्योगसँगको सहकार्य, अन्तर्राष्ट्रियस्तरको तालिम तथा व्यावहारिक सिकाइमार्फत विश्वव्यापी कार्य वातावरणमा काम गर्ने अवसर दिँदै आएको छ । सोही अवसरअन्तर्गत हाल २९ जना विद्यार्थी नेपालमै बसेर अन्तर्राष्ट्रिय कम्पनीका परियोजनामा काम गरिरहेका छन् । इस्लिङ्टनले विद्यार्थीलाई वास्तविक परियोजना, उद्योगमैत्री प्रयोगशाला, व्यावहारिक अभ्यास तथा कार्यअनुभवमार्फत रोजगारी बजारका लागि तयार पार्दै आएको छ भने अध्ययन पूरा नहुँदै विद्यार्थीले अन्तर्राष्ट्रिय कम्पनीसँग काम गर्ने अवसर प्रदान गरिरहेको छ । कलेजका अध्यक्ष सुलभ बुढाथोकी विद्यार्थीले अध्ययन र करिअरलाई सँगसँगै अघि बढाइरहेको बताउँछन् । ‘हाम्रा विद्यार्थीले डिग्री पूरा गर्ने कि काम सुरु गर्ने भन्ने दुविधामा बस्नुपरेको छैन,’ उनी भन्छन्, ‘हाम्रा विद्यार्थी अध्ययनसँगै अन्तर्राष्ट्रिय कम्पनीका परियोजनामा काम गरिरहेका छन् ।’ पेक्सस टेकका प्रमुख कार्यकारी अधिकृत (सीईओ) प्रशान्त केसीले इस्लिङ्टन कलेजका विद्यार्थी प्राविधिक रूपमा सक्षम रहेको र एआई–आधारित कार्य वातावरणमा सुरुदेखि नै काम गर्न सक्ने क्षमता रहेको बताए ।
पहिरोले रोकियो मुग्लिन–नारायणगढ सडक, गाईघाटमा डोजर परिचालन
काठमाडौं । मुग्लिन–नारायणगढ सडक खण्डअन्तर्गत चितवनको गाईघाट नजिकै सोमबार पहिरो खस्दा सडक एकतर्फी अवरुद्ध भएको छ । सडक डिभिजन भरतपुरका अनुसार पहिरो खसेलगत्तै सडक खुलाउने कार्यका लागि आवश्यक उपकरण घटनास्थलमा परिचालन गरिएको छ । डिभिजनले पहिरो हटाउन करिब १ देखि २ घण्टा लाग्ने अनुमान गरिएको जनाएको छ । त्यस अवधिसम्म उक्त सडक खण्डमा सवारीसाधन एकतर्फी सञ्चालन हुने भएकाले यात्रु तथा चालकलाई सावधानी अपनाउन र आवश्यक संयमता अपनाउन आग्रह गरिएको छ । सडक पूर्ण रूपमा सञ्चालनमा ल्याउन पहिरो पन्छाउने कार्य तीव्र रूपमा भइरहेको सडक डिभिजन भरतपुरले जनाएको छ ।
केयुको उपकुलपतिका लागि १० जनाको नाम छनोट
काठमाडौं । काठमाडौं विश्वविद्यालय (केयू)को उपकुलपति पदका लागि दरखास्त दिएका १० जना उम्मेदवार छनोटमा परेका छन् । नाम सिफारिस गर्न गठित सिफारिस तथा छनोट समितिले अन्तिम चरणका लागि १० जनाको नामा सार्वजनिक गरेको छ । समितिले सार्वजनिक गरेको सूचनाअनुसार त्यागराज पोखरेल, निरञ्जन पराजुली, बालचन्द्र लुइँटेल, विकास न्यौपाने, भीमप्रसाद श्रेष्ठ, राजेन्द्र जोशी, विवेक बराल, शोभानन्द सञ्जेल, सुयोध शर्मा र हरि प्रसाद न्यौपानेको नाम छनोट गरिएको हो । छनोटमा परेका १० जनाको भदौ २१ र २२ गते अन्तवार्ता हुने जनाइएको छ । जसमा २१ गते त्यागराज पोखरेल, निरञ्जन पराजुली, बालचन्द्र लुइँटेल, विकास न्यौपाने र भीमप्रसाद श्रेष्ठको अन्तर्वार्ता हुनेछ भने २२ गते दिउँसो १ बजेदेखि राजेन्द्र जोशी, विवेक बराल, शोभानन्द सञ्जेल, सुयोध शर्मा र हरि प्रसाद न्यौपानेको प्रस्तुतीकरण तथा अन्तर्वार्ता तय गरिएको छ ।
कोशीमा मुख्यमन्त्री विवाद : समाधान खोज्न एमालेको संयुक्त बैठक सुरु
काठमाडौं । कोशी प्रदेशमा मुख्यमन्त्री परिवर्तनको विषयलाई लिएर नेकपा एमालेभित्र देखिएको विवाद समाधान गर्न पार्टी र संसदीय दलको संयुक्त बैठक सुरु भएको छ । एमाले कोशी प्रदेश कमिटीको आयोजनामा भइरहेको बैठकमा पार्टीका सचिव तथा प्रदेश इन्चार्ज शेरधन राई, संसदीय दलका नेता एवं मुख्यमन्त्री हिक्मतकुमार कार्की, प्रदेश कमिटीका पदाधिकारी तथा प्रदेशसभा सदस्यहरू सहभागी छन् । पार्टी र संसदीय दलबीच नयाँ सरकार गठनको विषयमा देखिएको मतभेद समाधान गर्न संयुक्त बैठक बोलाइएको एमाले कोशी प्रदेशले जनाएको छ । यसअघि आइतबार दिनभर मुख्यमन्त्री परिवर्तनको विषयमा आन्तरिक छलफल भएको थियो । त्यसको निरन्तरतास्वरूप सोमबार प्रदेशसभा सदस्यसहितको संयुक्त बैठक आयोजना गरिएको हो । बैठकमा नेपाली कम्युनिस्ट पार्टी र एमालेबीच भएको तीनबुँदे सहमतिपछि नयाँ सरकार गठनको प्रक्रियालाई लिएर पार्टीभित्र उत्पन्न विवादबारे छलफल भइरहेको छ । बैठकबाट विवाद समाधान गर्दै पार्टीको साझा धारणा तय गर्ने प्रयास भइरहेको एमाले स्रोतले जनाएको छ ।
१२ हजार घुस लिएको आरोपमा वन अधिकृतविरुद्ध भ्रष्टाचार मुद्दा
काठमाडौं । अख्तियार दुरुपयोग अनुसन्धान आयोगले सिरहाको सव–डिभिजन वन कार्यालय, बन्दीपुरका कार्यालय प्रमुख राम केवल राय यादवविरुद्ध भ्रष्टाचार मुद्दा दायर गरेको छ । आयोगले सोमबार विशेष अदालत काठमाडौंमा १२ हजार रुपैयाँ घुस लिएको आरोपमा उनीविरुद्ध आरोपपत्र दायर गरेको हो । आयोगका अनुसार काष्ठ उद्योगका लागि ल्याइएको काठको शिल खोलेको मुचुल्का तयार गरी कागजात फिर्ता गर्ने क्रममा रायले सेवाग्राहीलाई विभिन्न बहानामा दुःख हैरानी दिएका थिए । त्यसक्रममा उनले काम गरिदिने भन्दै सेवाग्राहीसँग १२ हजार रुपैयाँ घुस मागेको र लिएको आरोप छ । उजुरीका आधारमा अख्तियार दुरुपयोग अनुसन्धान आयोगको कार्यालय, बर्दिवासबाट खटिएको टोलीले उनलाई सेवाग्राहीबाट १२ हजार रुपैयाँ घुस लिइसकेको अवस्थामा नियन्त्रणमा लिएको थियो । अनुसन्धानबाट रायले आफ्नो पदको दुरुपयोग गर्दै घुस लिएको पुष्टि भएको आयोगको दाबी छ । आयोगले भ्रष्टाचार निवारण ऐन, २०५९ अनुसार बिगो १२ हजार रुपैयाँ कायम गरी सोही बराबर जरिवाना र कैद सजायको माग गर्दै विशेष अदालतमा मुद्दा दायर गरेको जनाएको छ ।
सेयर बजारमा साढे ४ अर्बको कारोबार
काठमाडौं । सोमबार सेयर बजारमा सामान्य अंकको गिरावट आएको छ । नेपाल स्टक एक्सचेन्ज (नेप्से) परिसूचक ३.९३ अंकले घटेर २६८१ बिन्दुमा झरेको हो । नेप्सेका अनुसार १०० कम्पनीको सेयर मूल्य बढ्दा १६८ कम्पनीको सेयर मूल्य घटेको छ । ६ कम्पनीको सेयर मूल्यमा भने कुनै परिवर्तन आएको छैन । सोमबार ३४९ कम्पनीको १ करोड कित्ता सेयर किनबेच हुँदा ४ अर्ब ५४ करोड रुपैयाँ बराबरको कारोबार भएको छ । जसमध्ये सबैभन्दा धेरै कारोबार रिलाइन्स स्पिीनिङको भएको छ । रिलाइन्सको २७ करोड रुपैयाँ बराबरको कारोबार भएको छ । साथै रिडि पावरको २० करोड, ग्लोबल आइएमईको १९ करोड, सप्तकोशी डेभलपमेन्टको १७ करोड र एनआरएन इन्फ्राइस्ट्रक्चरको १५ करोड रुपैयाँ बराबरको कारोबार भएको छ । एभरेष्ट कलरको सेयर मूल्य १४.९९ प्रतिशतले बढेर सकारात्मक सर्किट लागेको छ ।
