अमेरिकी मध्यावधि चुनावः प्रारम्भिक परिणाममा ट्रम्पको रिपब्लिकन पार्टीलाई धक्का
काठमाडौं । अमेरिकामा सम्पन्न बहुप्रतीक्षित मध्यावधि निर्वाचनको मतगणना जारी रहँदा सार्वजनिक प्रारम्भिक नतिजामा डेमोक्रेटिक पार्टीले अग्रता लिएको छ । राष्ट्रपति डोनाल्ड ट्रम्प नेतृत्वको रिपब्लिकन पार्टी भने प्रारम्भिक मतपरिणाममा पछाडि परेको देखिएको छ । प्रारम्भिक नतिजा सार्वजनिक भएसँगै डेमोक्रेटिक पार्टीका नेता तथा समर्थकहरू उत्साहित भएका छन् । तल्लो सदन हाउस अफ रिप्रिजेन्टेटिभ्स र माथिल्लो सदन सिनेटका विभिन्न प्रतिस्पर्धात्मक निर्वाचन क्षेत्रमा डेमोक्रेटिक उम्मेदवारहरूले अग्रता कायम राखेका छन् । निर्वाचनअघि उल्लेख्य सफलता हासिल गर्ने दाबी गर्दै आएको रिपब्लिकन पार्टीका लागि भने प्रारम्भिक नतिजा चुनौतीपूर्ण देखिएको छ । राष्ट्रपति ट्रम्पले समर्थन गरेका केही प्रमुख उम्मेदवारहरू प्रारम्भिक मतगणनामा पछाडि परेपछि रिपब्लिकन पार्टीभित्र चुनावी रणनीतिबारे समीक्षा हुन थालेको विश्लेषण गरिएको छ । यद्यपि, विभिन्न राज्यमा हुलाकमार्फत प्राप्त मत (मेल–इन भोट) गणना हुन बाँकी रहेकाले अहिले नै अन्तिम नतिजाबारे निष्कर्ष निकाल्न सकिने अवस्था छैन । विशेषगरी कडा प्रतिस्पर्धा रहेका निर्वाचन क्षेत्रको पूर्ण मतगणनापछि मात्रै दुवै सदनमा दलहरूको वास्तविक शक्ति सन्तुलन स्पष्ट हुनेछ । अमेरिकी कंग्रेसको शक्ति सन्तुलन, सरकारको आगामी नीतिगत दिशा तथा अमेरिकी राजनीतिको भावी समीकरणका दृष्टिले यस मध्यावधि निर्वाचनको अन्तिम परिणामलाई महत्त्वका साथ हेरिएको छ ।
लेज बेचेर एसियनको २.१२ अर्ब आम्दानी, १० ग्राहकको ४० प्रतिशत हिस्सा
काठमाडौं । पेप्सिकोका उत्पादन, विशेषगरी लेज चिप्सको कारोबार विस्तार भएपछि एसियन डिस्ट्रिब्युटर्स प्रालिको सञ्चालन आम्दानी गत आर्थिक वर्ष २०८२/८३ मा २ अर्ब १२ करोड ७० लाख रुपैयाँ पुगेको छ । यो अघिल्लो आर्थिक वर्षको तुलनामा २१.५४ प्रतिशत अर्थात् ३७ करोड ७० लाख रुपैयाँ बढी हो । आर्थिक वर्ष २०८१/८२ मा कम्पनीले १ अर्ब ७५ करोड रुपैयाँ सञ्चालन आम्दानी गरेको थियो । कम्पनीका अनुसार अघिल्लो वर्ष पेप्सिकोका उत्पादनको पूर्ण अवधिको कारोबार समेटिन सकेको थिएन । तर, गत आर्थिक वर्षमा वर्षभर नै यी उत्पादनको कारोबार भएकाले आम्दानी वृद्धिमा योगदान पुगेको हो । विशेषगरी लेज चिप्सको बिक्री विस्तारले कम्पनीको कारोबार बढाउन सहयोग गरेको छ । कम्पनीको आम्दानीमा पछिल्ला वर्षमा वृद्धि र उतारचढाव दुवै देखिएका छन् । आर्थिक वर्ष २०८०/८१ मा १ अर्ब ४१ करोड ५० लाख रुपैयाँ सञ्चालन आम्दानी गरेको कम्पनीले आव २०७९/८० मा १ अर्ब २५ करोड रुपैयाँ कमाएको थियो । त्यस्तै, आर्थिक वर्ष २०७८/७९ मा १ अर्ब ४९ करोड, आव २०७७/७८ मा १ अर्ब २१ करोड ६९ लाख, आव २०७६/७७ मा १ अर्ब २ करोड ६७ लाख र आव २०७५/७६ मा १ अर्ब २१ करोड ३ लाख रुपैयाँ आम्दानी गरेको थियो । पेप्सिकोको विश्वव्यापी ब्रान्ड पहिचान कम्पनीका लागि सकारात्मक भए पनि यसका उत्पादनको कारोबारमा नाफाको मार्जिन तुलनात्मक रूपमा कम छ । ठूलो परिमाणमा बिक्री हुने तर कम नाफा दिने उत्पादनको हिस्सा बढ्दा कम्पनीको समग्र सञ्चालन नाफामा दबाब परेको छ । कम्पनीको सञ्चालन नाफा मार्जिन आर्थिक वर्ष २०८१/८२ मा करिब ९ प्रतिशत रहेकोमा गत आर्थिक वर्ष घटेर करिब ५ प्रतिशतमा झरेको छ । ३० भन्दा बढी उत्पादनको कारोबार, देशभर २०० वितरक सन् २०११ मा स्थापना भएको एसियन डिस्ट्रिब्युटर्सले तीव्र उपभोग्य वस्तु (एफएमसीजी) को आयात तथा व्यापार गर्दै आएको छ । कम्पनीले पेप्सिको, निविया, जायडस, म्याकभिटिज, विप्रो र लिन्ड्टजस्ता अन्तर्राष्ट्रिय ब्रान्डका उत्पादन नेपाली बजारमा बिक्री तथा वितरण गर्दै आएको छ । कम्पनीले नेपालमा निविया, जायडस, म्याकभिटिज, विप्रो र लिन्ड्टलगायतका ब्रान्डका उत्पादन आयात तथा वितरण गर्ने विशेष अधिकार पाएको छ । जायडसका ग्लुकोन–डी, न्यासिल, कम्प्लान, एभरीयुथ र सुगरफ्री गोल्ड तथा म्याकभिटिजका डाइजेस्टिभ बिस्कुट कम्पनीको वितरण सूचीमा छन् । त्यस्तै, विप्रोका एन्चान्टेयर र रोमानो तथा लिन्ड्टका चकलेटको पनि कारोबार गर्दै आएको छ । कम्पनीले देशभर २०० भन्दा बढी वितरक तथा व्यावसायिक साझेदारमार्फत आफ्ना उत्पादन बजारमा पु¥याउँदै आएको छ । स्थापित अन्तर्राष्ट्रिय ब्रान्ड, तिनको बजार पहिचान र देशव्यापी वितरण सञ्जाल कम्पनीको व्यावसायिक आधारका रूपमा रहेका छन् । एसियन डिस्ट्रिब्युटर्स विशाल ग्रुपअन्तर्गत सञ्चालनमा रहेको कम्पनी हो । कम्पनीमा अशिष कुमार अग्रवालको करिब २६ प्रतिशत सेयर स्वामित्व छ । त्यस्तै, कविता संघाईको करिब २२ प्रतिशत, विशाल अग्रवालको करिब ११ प्रतिशत, सञ्चिता अग्रवालको करिब ११ प्रतिशत र शिल्पा अग्रवालको करिब ११ प्रतिशत सेयर हिस्सा रहेको छ । बाँकी सेयर अन्य लगानीकर्ताको स्वामित्वमा रहेको जनाएको छ । १ अर्ब ६९ करोड ऋण कारोबार विस्तारसँगै कम्पनीको कार्यशील पुँजी आवश्यकता पनि उच्च रहेको छ । मौज्दातमा सामान राख्नुपर्ने र ग्राहकलाई उधारोमा बिक्री गर्नुपर्ने भएकाले कम्पनीको ठूलो रकम मौज्दात तथा उठ्न बाँकी रकममा बाँधिने गरेको जनाएको छ । यसले तरलतामा दबाब सिर्जना गर्नुका साथै दैनिक कारोबार सञ्चालनका लागि बैंक कर्जामाथिको निर्भरता बढाएको कम्पनीको भनाइ छ । कम्पनीले विभिन्न बैंक तथा वित्तीय संस्थाबाट १ अर्ब ६९ करोड ७० लाख रुपैयाँ ऋण लिएको छ । यसमध्ये ९ करोड ७० लाख रुपैयाँ दीर्घकालीन र १ अर्ब ६० करोड रुपैयाँ अल्पकालीन ऋण रहेको छ । कम्पनीको सञ्चालन आम्दानीको तुलनामा खुद कार्यशील पुँजीको अनुपात आर्थिक वर्ष २०८१/८२ मा करिब ६३ प्रतिशत रहेकोमा गत आर्थिक वर्ष घटेर ५८ प्रतिशतमा झरेको छ । अनुपातमा सुधार देखिए पनि कारोबारको आकारसमेत बढेकाले कार्यशील पुँजी व्यवस्थापनमा परेको दबाब पूर्ण रूपमा कम हुन सकेको छैन । शीर्ष १० ग्राहकबाट ४० प्रतिशतभन्दा बढी आम्दानी एसियन डिस्ट्रिब्युटर्सको आम्दानी केही ठूला ग्राहक तथा वितरकमा केन्द्रित रहेको छ । पछिल्ला दुई आर्थिक वर्षमा कम्पनीको कुल आम्दानीको करिब ४० देखि ४३ प्रतिशत हिस्सा शीर्ष १० ग्राहकबाट प्राप्त भएको छ । प्रमुख ग्राहकसँगको लामो व्यावसायिक सम्बन्ध र कम्पनीले बिक्री गर्ने ब्रान्डको बलियो बजार पहिचानले यस्तो निर्भरता जोखिमलाई केही हदसम्म कम गरे पनि कुनै ठूला ग्राहकले कारोबार घटाएमा वा सम्बन्ध तोडेमा आम्दानीमा उतारचढाव आउन सक्ने जनाएको छ ।
१० वर्षका लागि ४ ठाउँमा घर भाडामा लिँदै महालक्ष्मी विकास बैंक
काठमाडौं । महालक्ष्मी विकास बैंकले देशका विभिन्न चार शाखा कार्यालय स्थानान्तरण गर्ने भएको छ । त्यसका लागि बैंकले सम्बन्धित क्षेत्रमा घर वा फ्ल्याट भाडामा खोजेको छ । बैंकले मधेस, बागमती, लुम्बिनी र सुदूरपश्चिम प्रदेशका चार स्थानमा रहेका शाखा स्थानान्तरण गर्न घर भाडामा लिन लागेको हो । बैंकले धनुषाको मिथिला नगरपालिका-६ स्थित ढल्केवर, मकवानपुरको मनहरी गाउँपालिका-७, रुपन्देहीको मायादेवी गाउँपालिका-६ स्थित बेथरी र कञ्चनपुरको बेलौरी नगरपालिका-४ मा शाखा स्थानान्तरण गर्न घर खोजेको छ । बैंकका अनुसार सम्बन्धित स्थानमा करिब ९०० देखि १ हजार ४०० वर्गफिट क्षेत्रफल भएको घर वा फ्ल्याट आवश्यक छ । इच्छुक घरधनीले १५ दिनभित्र आवश्यक कागजातसहित खामबन्द प्रस्ताव पेस गर्नुपर्नेछ । बैंकले भाडामा लिन चाहेको घर सडकसँग जोडिएको र पिल्लर प्रणालीमा निर्माण भएको हुनुपर्ने सर्त राखेको छ । घरको भुइँ तला वा पहिलो तलामा तोकिएको क्षेत्रफल उपलब्ध हुनुपर्नेछ । त्यस्तै, पार्किङ, एटीएम र जेनेरेटर राख्ने ठाउँको व्यवस्था पनि हुनुपर्नेछ । घर भाडामा दिन इच्छुक घरधनीले घरजग्गाको स्वामित्व प्रमाणपत्र, घरको नक्सा पास प्रमाणपत्र, घर सम्पन्नताको प्रमाणपत्र र जग्गाधनीको नागरिकता प्रमाणपत्रको प्रतिलिपिसहित प्रस्ताव पेस गर्नुपर्नेछ । प्रस्तावमा घरको विवरण र मासिक भाडादरसमेत स्पष्ट उल्लेख गर्नुपर्ने बैंकले जनाएको छ । बैंकले कम्तीमा १० वर्षका लागि घर भाडामा लिन चाहेको छ । घरमा रंगरोगन, भल्ट कोठा, बाथरुम तथा शौचालय निर्माण, टायलिङ र फल्स सिलिङजस्ता सुविधा घरधनीले उपलब्ध गराउन सक्ने वा बैंकले आफैँ तयार गर्नुपर्ने अवस्थाबारे पनि प्रस्तावमा खुलाउनुपर्नेछ । भाडामा दिन प्रस्ताव गरिएको घर कुनै कानुनी विवादमा नरहेको, सडक मापदण्डभित्र नपर्ने तथा सम्बन्धित नियमनकारी निकायका मापदण्ड पूरा गरेको हुनुपर्ने बैंकले जनाएको छ ।
भारतीय विदेश सचिव आज नेपाल आउँदै
काठमाडौं । भारतीय विदेश सचिव विक्रम मिश्री दुईदिने औपचारिक भ्रमणका लागि आज काठमाडौं आउँदैछन् । विदेश सचिव मिश्रीको भ्रमण प्रधानमन्त्री वालेन्द्र शाहको भारत भ्रमणको तयारीका सिलसिलामा हुन लागेको हो । परराष्ट्र मन्त्रालयका अनुसार भ्रमणका क्रममा नेपालका परराष्ट्र सचिव अमृतकुमार राई र भारतीय विदेश सचिव मिश्रीबीच द्विपक्षीय वार्ता हुनेछ । वार्तामा नेपाल-भारत सम्बन्धका समग्र पक्षको समीक्षा गर्नुका साथै आपसी हितका विभिन्न विषयमा विचार आदानप्रदान हुने मन्त्रालयले जनाएको छ । दुई देशबीच लामो समयदेखि रहँदै आएको घनिष्ठ तथा मैत्रीपूर्ण सम्बन्धलाई थप सुदृढ बनाउने विषयमा पनि छलफल हुने बताइएको छ । भ्रमणका क्रममा मिश्रीले नेपालका उच्चस्तरीय पदाधिकारीहरूसँग शिष्टाचार भेटघाटसमेत गर्ने कार्यक्रम छ । भारतीय विदेश सचिव मिश्री भोलि नै काठमाडौं भ्रमण सकेर नयाँदिल्ली फर्किने कार्यक्रम छ ।
लाभांश नलिएका सेयरधनीलाई नबिल बैंकको ताकेता
काठमाडौं । नबिल बैंकले नगद लाभांश प्राप्त नगरेका सेयरधनीलाई आवश्यक प्रक्रिया पूरा गरी लाभांश बुझिलिन आग्रह गरेको छ । बैंकले विभिन्न कारणले केही सेयरधनीको खातामा नगद लाभांश भुक्तानी हुन नसकेको भन्दै सेयर रजिस्ट्रार नबिल इन्भेष्टमेन्ट बैंकिङमा सम्पर्क गर्न अनुरोध गरेको हो । बैंकको ४२औँ वार्षिक साधारणसभाले चुक्ता पुँजीको १०.८० प्रतिशत नगद लाभांश र ५ प्रतिशत बोनस सेयर वितरण गर्ने प्रस्ताव पारित गरेको थियो । कुल १५.८० प्रतिशत लाभांश वितरण गर्ने प्रस्ताव पारित भएसँगै बैंकले असोज २२ गतेदेखि नै सेयरधनीलाई नगद लाभांश वितरण गर्न थालेको जनाएको छ । तर, कतिपय सेयरधनीले अझै नगद लाभांश प्राप्त गर्न सकेका छैनन् । सेयर अभौतिकीकरण नभएको, डिम्याट खातामा रहेको बैंक खातासम्बन्धी विवरण नमिलेको, सेयर धितोमा रहेको वा अन्य विविध कारणले लाभांश भुक्तानी हुन नसकेको बैंकले जनाएको छ । यस्ता सेयरधनीलाई आवश्यक विवरण तथा प्रक्रिया मिलाएर नबिल इन्भेष्टमेन्ट बैंकिङमा सम्पर्क गर्न बैंकले आग्रह गरेको छ । लाभांश भुक्तानीसम्बन्धी थप जानकारी तथा सहयोगका लागि सेयर रजिस्ट्रार कार्यालयकी नेहा प्रजापतिलाई सम्पर्क गर्न सकिने बैंकले जनाएको छ । बैंकले यसअघि वितरण गरेका नगद लाभांशसमेत केही सेयरधनी वा उनीहरूका हकवालाले दाबी नगरेको जनाएको छ । साविक युनाइटेड फाइनान्स लिमिटेड र साविक नेपाल बङ्गलादेश बैंक लिमिटेडका सेयरधनीले पाउन बाँकी नगद लाभांशसमेत सेयर रजिस्ट्रार कार्यालयमा सम्पर्क गरी बुझिलिन बैंकले अनुरोध गरेको छ ।
तराईमा हुस्सु, केही स्थानमा हल्का वर्षा हुने
काठमाडौं । नेपालमा हाल पश्चिमी वायुका साथै भारतको उत्तर प्रदेशमा रहेको न्यून चापीय क्षेत्रको आंशिक प्रभाव रहेको छ । यसका कारण देशभर आंशिक बदली हुने मौसम पूर्वानुमान महाशाखाले जनाएको छ । महाशाखाका अनुसार देशका पहाडी तथा तराई क्षेत्रका साथै उपत्यका र खोँचका केही स्थानमा हुस्सु तथा कुहिरो लागेको छ । आज दिउँसो कोशी, मधेश, बागमती, गण्डकी र लुम्बिनी प्रदेशका सबै भू-भागमा आंशिक बदली रहनेछ । त्यस्तै, कर्णाली र सुदूरपश्चिम प्रदेशका हिमाली तथा पहाडी भू-भागमा पनि आंशिक बदली हुने र बाँकी भू-भागमा मौसम मुख्यतया सफा रहने महाशाखाले जनाएको छ । दिउँसो कोशी र गण्डकी प्रदेशका हिमाली तथा पहाडी भू-भागका एक-दुई स्थानमा हल्का वर्षाको सम्भावना रहेको छ । आज राति कोशी, मधेश, बागमती र गण्डकी प्रदेशका सबै भू-भागमा आंशिक बदली रहनेछ । देशका बाँकी भू-भागमा भने मौसम मुख्यतया सफा रहने महाशाखाको पूर्वानुमान छ ।
६८ हजार युवालाई निःशुल्क एआई तालिम दिने सरकारको घोषणा
काठमाडौं । युवा, श्रम तथा रोजगार मन्त्रालयको अगुवाइमा राष्ट्रिय व्यावसायिक प्रशिक्षण प्रतिष्ठानले सञ्चालन गर्न लागेको निःशुल्क एआई तालिमप्रति युवाहरूको आकर्षण देखिएको छ । मन्त्रालयका अनुसार ‘मास्टरिङ एआई विथ इफेक्टिभ प्रम्प्ट इन्जिनियरिङ’ विषयक उक्त तालिमका लागि ६८ हजारभन्दा बढी युवाहरूले आवेदन दिएका छन् । सुरुमा दुई हजार युवालाई मात्र लक्षित गरेर योजना तयार पारिएको भए पनि अपेक्षाभन्दा निकै धेरै आवेदन प्राप्त भएपछि मन्त्रालयले रणनीति परिवर्तन गरेको जनाएको छ । अब आवेदन फाराम भरेका सबै आकांक्षी युवाहरूलाई तालिममा सहभागी गराउने निर्णय मन्त्रालयले गरेको छ । मन्त्रालयका अनुसार यस कदमले प्रविधिको क्षेत्रमा उत्सुक र इच्छुक युवाहरूलाई ठूलो राहत र अवसर मिल्नेछ । तालिम सञ्चालन र सहभागी हुने प्रक्रियालाई सहज बनाउन मन्त्रालयले विशेष प्रविधिको प्रयोग गर्ने भएको छ । जसअनुसार तालिम सुरु हुनुभन्दा दुई घण्टाअघि आवेदकहरूको मोबाइलमा एसएमएसमार्फत जुम वा अनलाइन लिङ्क पठाइनेछ । आवेदकहरूले उक्त लिङ्कमा प्रवेश गरी आफ्नो नाम र मोबाइल नम्बरको आधारमा, आवेदन दिँदा रोजेको सत्रअनुसार सहजै तालिममा सहभागी हुन सक्ने व्यवस्था मिलाइएको छ ।
मन्त्री लम्साल भन्छन्- ७२ आयोजनामा काम नहुने ठेक्का तुरुन्त तोड्छौं
काठमाडौं । पूर्वाधार विकासमन्त्री सुनिल लम्सालले निर्माण सम्भव नभएका आयोजनाको ठेक्का अन्त्य गरी समस्याग्रस्त आयोजनालाई शहरी विकास तथा भवन निर्माण विभागको मातहतबाट हटाइने बताएका छन् । मङ्गलबार विभागमा आयोजित रुग्ण आयोजनाको अवस्थाबारेको समीक्षा बैठकमा मन्त्री लम्सालले समस्याग्रस्त आयोजनाको ठेक्का व्यवस्थापन गरी विभागको कार्यक्षेत्रबाट हटाउने निर्णय गरिएको जानकारी दिए । विभागअन्तर्गतका कुल २ हजार ८०७ कार्यक्रममध्ये ७२ वटा आयोजना समस्याग्रस्त रहेको पाइएको छ । तीमध्ये १० वटा सम्पन्न भएका छन् भने चार वटाको ठेक्का अन्त्य गरिएको छ । आठ वटाको ठेक्का अन्त्य प्रक्रिया अन्तिम चरणमा पुगेको छ । त्यस्तै, ३२ वटा आयोजनाको म्याद थप गरी सञ्चालनमा रहेका छन् भने १८ वटाको म्याद समाप्त भएको उनले बताए । मन्त्री लम्सालले निर्माण सम्भव नभएका आयोजनाको ठेक्का अन्त्य गर्ने र समस्याग्रस्त आयोजनालाई विभागको मातहतबाट हटाउने निर्णय भएको बताए ।
