३३ लाख रुपैयाँ घुससहित प्रमुख प्रशासकीय अधिकृत पक्राउ
काठमाडौं । भक्तपुरको मध्यपुर थिमि नगरपालिकाका प्रमुख प्रशासकीय अधिकृत भोजराज घिमिरे ३३ लाख रुपैयाँ घुससहित पक्राउ परेका छन् । अख्तियार दुरुपयोग अनुसन्धान आयोगका अनुसार घिमिरे र काठमाडौंको कोटेश्वरस्थित गुड नेबर्स इन्टरप्राइजेज प्रालिका सञ्चालक वरुण ढुंगेललाई घुसको रकमसहित नियन्त्रणमा लिइएको हो । आयोगमा परेको उजुरीका आधारमा खटिएको टोलीले उनीहरूलाई सोमबार मध्यपुर थिमि नगरपालिका–९, निकोसेराबाट पक्राउ गरेको हो । अख्तियारका अनुसार ठेक्का सम्झौताअनुसार बाँकी रहेको किस्ता तथा मोबिलाइजेसन फन्ड भुक्तानी प्रक्रियामा सहजीकरण गरिदिने र बाँकी काममा सहयोग गर्ने भन्दै सेवाग्राहीसँग घुस मागिएको थियो । उनीहरूलाई सेवाग्राहीबाट ३३ लाख रुपैयाँ घुस लिइसकेको अवस्थामा उक्त रकमसहित नियन्त्रणमा लिइएको आयोगले जनाएको छ । पक्राउ परेका दुवै जनालाई मंगलबार विशेष अदालतको आदेशअनुसार घुस तथा रिसवतसम्बन्धी भ्रष्टाचार मुद्दामा म्याद थप गरी अनुसन्धान अघि बढाइएको अख्तियारका प्रवक्ता सुरेश न्यौपानेले जानकारी दिएका छन् ।
रिपब्लिकनलाई ठूलो धक्का, ट्रम्पमाथि हारको दोष
काठमाडौं । अमेरिकामा भएको मध्यावधि निर्वाचनमा राष्ट्रपति डोनाल्ड ट्रम्पको रिपब्लिकन पार्टीले ठूलो धक्का बेहोरेको छ । निर्वाचनको प्रारम्भिक नतिजा सार्वजनिक हुँदै गर्दा पार्टीले प्रतिनिधिसभा र सिनेट दुवैमा आफ्नो बहुमत गुमाउने अवस्था देखिएको हो । निर्वाचनमा भएको कमजोर प्रदर्शनपछि रिपब्लिकन पार्टीभित्रै हारको जिम्मेवारी राष्ट्रपति ट्रम्पले लिनुपर्ने आवाज उठ्न थालेको छ । पार्टीका नेताहरूले ट्रम्पको घट्दो लोकप्रियता, विवादास्पद नीतिहरू र महँगी नियन्त्रण गर्न नसकेको विषयले मतदातालाई असन्तुष्ट बनाएको बताएका छन् । रिपब्लिकन नेताहरूलाई प्रतिनिधिसभामा बहुमत गुम्ने आशंका पहिलेदेखि नै थियो । तर, सिनेटमा भने पार्टीले आफ्नो बहुमत जोगाउन सक्ने अपेक्षा गरिएको थियो । पछिल्लो नतिजाले सिनेटमा समेत डेमोक्रेटिक पार्टी बलियो बन्दै गएको देखाएको छ । टेक्ससका अनुभवी रिपब्लिकन लबिस्ट बिल मिलरले पार्टीको हारको जिम्मेवारी ट्रम्पकै भएको बताएका छन् । उनका अनुसार निर्वाचन परिणाम ट्रम्पप्रति मतदाताले देखाएको अस्वीकारको संकेत हो । यसको जिम्मेवारी अरू कसैलाई दिन नमिल्ने उनको भनाइ छ । डेमोक्रेटिक पार्टीले वर्षौंदेखि जित्न नसकेका राज्यमा समेत यसपटक सफलता हासिल गरेको छ । टेक्सस, साउथ क्यारोलाइना, आयोवा र ओहायोमा डेमोक्रेटिक उम्मेदवारहरूले महत्त्वपूर्ण जित निकालेका छन् । यीमध्ये धेरै राज्यलाई रिपब्लिकन पार्टीको बलियो आधार मानिँदै आएको थियो । एसोसिएटेड प्रेस (एपी) का अनुसार डेमोक्रेटिक पार्टीले सिनेटमा बहुमत हासिल गरिसकेको छ । रिपब्लिकनको पकड रहेको टेक्सस, क्यान्सस, साउथ क्यारोलाइना, ओहायो र नर्थ क्यारोलाइनामा डेमोक्रेटिक उम्मेदवार विजयी भएका छन् । प्रतिनिधिसभामा पनि डेमोक्रेटिक पार्टी बहुमत नजिक पुगेको छ । यद्यपि सबै सिटको नतिजा आइसकेको छैन । मिनेसोटाका रिपब्लिकन रणनीतिकार ग्रेग पिपेनले पनि पार्टीको हारका लागि ट्रम्पका नीतिहरू जिम्मेवार रहेको बताएका छन् । उनले विभिन्न राज्यका मतदाताले राष्ट्रपतिको नीति मन नपराएको र पार्टीले लगातार गल्ती गरेको टिप्पणी गरेका छन् । चुनावी हार स्वीकार्न ट्रम्प तयार निर्वाचनमा रिपब्लिकन पार्टीले ठूलो क्षति बेहोरेपछि राष्ट्रपति ट्रम्पले भने नतिजा स्वीकार गर्ने बताएका छन् । द न्युयोर्क टाइम्सलाई दिएको अन्तर्वार्तामा ट्रम्पले आफू मध्यावधि निर्वाचनको परिणाम पूर्ण रूपमा स्वीकार गर्न तयार रहेको बताएका हुन् । उनले डेमोक्रेटिक पार्टीसँग मिलेर काम गर्ने इच्छा पनि व्यक्त गरेका छन् । ट्रम्पले भनेका छन्, ‘हामी उनीहरूसँग मिलेर काम गर्ने आशा गर्छौं । हामी मिलेर कुनै समाधान निकाल्नेछौं ।’ तर, ट्रम्पको अर्को अभिव्यक्तिले भने उनी डेमोक्रेटिक पार्टीसँग सहज रूपमा सहकार्य गर्ने पक्षमा नरहेको संकेत गरेको छ । उनले सामाजिक सञ्जाल ट्रुथ सोसलमा ‘भिटो’ लेखिएको टोपीको तस्बिर सार्वजनिक गरेका छन् । यसअघि सीबीएस न्युजसँगको कुराकानीमा पनि उनले राष्ट्रपतिका रूपमा आफूले पाएको सम्पूर्ण अधिकार प्रयोग गर्ने बताएका थिए । ट्रम्पले विशेषगरी डेमोक्रेटिक पार्टीले संसद्बाट ल्याउने विधेयक आवश्यक परे भिटो गर्ने संकेत गरेका छन् । अमेरिकी राष्ट्रपतिलाई संसद्बाट पारित विधेयकमा असहमति जनाउँदै त्यसलाई रोक्न भिटो अधिकार प्रयोग गर्ने संवैधानिक अधिकार छ । के हो मध्यावधि निर्वाचन ? अमेरिकामा राष्ट्रपतिको चारवर्षे कार्यकालको बीचमा हुने निर्वाचनलाई मध्यावधि निर्वाचन भनिन्छ । राष्ट्रपतिको कार्यकाल सुरु भएको दुई वर्षपछि यो निर्वाचन हुन्छ । यस निर्वाचनमा प्रतिनिधिसभाका सबै ४३५ सिट र सिनेटका करिब एकतिहाइ अर्थात् यसपटक ३५ सिटका लागि मतदान हुन्छ । यसबाहेक विभिन्न राज्यमा गभर्नर र अन्य पदका लागि पनि निर्वाचन हुन्छ । अमेरिकी संसद्का दुई सदनमध्ये प्रतिनिधिसभामा बहुमतका लागि २१८ र सिनेटमा ५१ सिट आवश्यक पर्छ । सिनेटमा १०० सदस्य हुन्छन् । मध्यावधि निर्वाचनलाई राष्ट्रपतिको कार्यशैली र सरकारका नीतिप्रति जनताको समर्थन मापन गर्ने महत्त्वपूर्ण कडीका रूपमा पनि हेरिन्छ । यस निर्वाचनमा संसद्का दुवै सदनमा बहुमत गुमाएमा राष्ट्रपतिलाई आगामी दुई वर्ष सरकारका नीति तथा कार्यक्रम अघि बढाउन कठिन हुन सक्छ । ट्रम्पको लोकप्रियताको परीक्षा, संसदमा बहुमत खोस्ने दाउमा डेमोक्र्याट बाइनान्स ह्याकमा उत्तर कोरियाको संलग्नता अस्वीकार जेनजी आन्दोलनको रापमा जर्मनी इजरायलको चुनावी नतिजा र अबका चुनौती चिनियाँ अर्बपतिहरूमा नागरिकता त्याग्नेको संख्या बढ्दै एम्बाप्पेको अभिव्यक्तिले ला–लिगाको ४० करोड युरोको कारोबार जोखिममा ब्राजिलमा लुलाको ऐतिहासिक जित, चौथो कार्यकाल अहिलेसम्मकै कठिन
ऋण असुलीबाट समस्याग्रस्त ७ सहकारीका १२२ जनाले पाए रकम फिर्ता
काठमाडौं । समस्याग्रस्त सहकारी व्यवस्थापन समितिले ७ समस्याग्रस्त सहकारीको १२२ जनाको बचत रकम फिर्ता गरेको छ । समितिले सार्वजनिक गरेको विवरण अनुसार नेपाल सहकारी वित्तिय सहकारी, आइडियल यमुना हाम्रो बहुउदेश्यीय सहकारी, शिवशिखर सहकारीका २३ जनाको पुर्ण बचत र कान्तिपुर सहकारी,गौतमश्री बहुउदेश्यीय सहकारी, कृषि विकास बहुउदेश्यीय सहकारी, श्री लालिगुराँस बहुउदेश्यीय सहकारीको ९९ जनाको आंशिक बचत फिर्ता गरिएको हो । सरकारले समस्याग्रस्त सहकारीको ऋण असुलीबाट प्राप्त भएको रकम नै पीडित बचतकर्तालाई फिर्ता गरिएको स्पष्ट पारेको छ । पहिलो चरणमा थोरै बचत रकम भएका बचतकर्ताहरूलाई रकम फिर्ता गरिएको समितिले जनाएको छ । यसरी नै क्रमश बचतकर्ताको रकमका आधारमा वर्गीकरण गरेर रकम फिर्ता गरिने छ । समस्याग्रस्त सहकारी संस्थाहरुबाट ऋण असुली र सम्पत्ति व्यवस्थापनबाट प्राप्त रकमबाट सम्बन्धित सहकारीका बचतकर्ताहरुलाई बचत फिर्ता गर्ने कार्य प्रचलित कानुनी व्यवस्था बमोजिम निरन्तर रुपमा संचालन भइरहेको छ ।
तिहारका लागि सुनको असर्फी र चाँदीका सिक्का बिक्री गर्दै राष्ट्र बैंक
काठमाडौं । नेपाल राष्ट्र बैंकले तिहार पर्वको अवसरमा सुनको असर्फी तथा चाँदीका मेडालियन बिक्री गर्ने भएको छ । राष्ट्र बैंकको मुद्रा व्यवस्थापन विभागअन्तर्गत टक्सार महाशाखाले कात्तिक १९ र २० गते सुनको असर्फी तथा चाँदीका मेडालियन बिक्री गर्न लागेको हो । महाशाखाका अनुसार प्रतिव्यक्ति २.५ ग्रामको सुनको असर्फी एक थान र १० ग्रामका लक्ष्मी तथा गणेश अंकित चाँदीका मेडालियन एक–एक थानका दरले खरिद गर्न पाइनेछ । एक व्यक्तिले बढीमा दुई थान मात्र खरिद गर्न सक्नेछ । बबरमहलस्थित राष्ट्र बैंकको टक्सार महाशाखाबाट बिहान ११ बजेदेखि दिउँसो ३ बजेसम्म पङ्क्तिबद्ध सेवाग्राहीलाई बिक्री गरिनेछ । बिक्री मौज्दात कायम रहेसम्म मात्र जारी रहने राष्ट्र बैंकले जनाएको छ । असर्फी तथा मेडालियन खरिद गर्न नेपाली नागरिकता, राष्ट्रिय परिचयपत्र वा उक्त कागजातको नम्बर उल्लेख भएको अन्य कुनै प्रमाणपत्रको प्रतिलिपिसहित स्वयं उपस्थित हुनुपर्नेछ । खरिदकर्ताले नगद वा क्यूआरमार्फत भुक्तानी गर्न सक्नेछन् । असर्फी तथा मेडालियनको मूल्य भने बिक्री हुने दिन बिहान करिब ११ बजेपछि निर्धारण गरिनेछ । मूल्य निर्धारण भएपछि मात्र बिक्री सुरु हुनेछ ।
नेपालमा पर्यटक र लगानी भित्र्याउन पर्यटनमन्त्रीको अन्तर्राष्ट्रिय पहल
काठमाडौं । संस्कृति, पर्यटन तथा नागरिक उड्डयनमन्त्री खडक राज पौडेल ‘गनेस’ले नेपालको पर्यटन प्रवर्द्धन र अन्तर्राष्ट्रिय हवाई सम्पर्क विस्तारका लागि विभिन्न मुलुकका उच्चपदस्थ अधिकारीसँग भेटवार्ता गरेका छन् । बेलायतको लन्डनमा नोभेम्बर ३ देखि ५ सम्म आयोजना भइरहेको विश्व पर्यटन बजार (डब्ल्यूटीएम) २०२६ मा सहभागी हुने क्रममा मन्त्री पौडेलले भारत, संयुक्त अरब इमिरेट्स (यूएई) र श्रीलंकाका पर्यटनसम्बन्धी अधिकारीसँग भेटवार्ता गरेका हुन् । उनले भारतका संस्कृति तथा पर्यटनमन्त्री गजेन्द्र सिंह शेखावत, यूएईका अर्थ तथा पर्यटनमन्त्री अब्दुल्लाह बिन तुक अल मारी र श्रीलंकाका सहायक पर्यटनमन्त्री प्रा. रुवन रणतुङ्गेसँग छलफल गरेका थिए । उनले भारतकी राज्यसभा सदस्य, लेखिका तथा समाजसेवी सुधा मूर्तिसँग पनि अन्तरक्रिया गरेका छन् । भेटवार्तामा द्विपक्षीय पर्यटन सहकार्य सुदृढ गर्ने, हवाई सम्पर्क विस्तार गर्ने, पर्यटक आवागमन बढाउने, सांस्कृतिक आदानप्रदान प्रवर्द्धन गर्ने तथा पर्यटन क्षेत्रमा लगानी र निजी क्षेत्रबीचको सहकार्य विस्तार गर्ने विषयमा छलफल भएको मन्त्रालयले जनाएको छ । मन्त्री पौडेलले नेपालको पर्यटन क्षेत्रमा अन्तर्राष्ट्रिय साझेदारी र लगानीका लागि ठूलो सम्भावना रहेको उल्लेख गर्दै पर्यटनलाई आर्थिक समृद्धि, रोजगारी सिर्जना र सांस्कृतिक सम्बन्ध विस्तारको माध्यम बनाउनुपर्ने बताएका थिए । उनले नेपाललाई विश्व पर्यटनको आकर्षक, सुरक्षित र प्रतिस्पर्धी गन्तव्यका रूपमा स्थापित गर्न छिमेकी तथा अन्तर्राष्ट्रिय साझेदार मुलुकसँगको सहकार्यलाई परिणाममुखी बनाउने सरकारको लक्ष्य रहेको बताए । भेटवार्ताका क्रममा नेपालको सांस्कृतिक सम्पदा, हिमाली भूगोल, प्राकृतिक सौन्दर्य, साहसिक पर्यटन, आध्यात्मिक तथा वेलनेस पर्यटनका विशेषताबारे पनि छलफल भएको थियो । डब्ल्यूटीएम लन्डनमा नेपालले यस वर्ष दिगो तथा जिम्मेवार पर्यटन, हिमाली साहसिक गतिविधि, सांस्कृतिक सम्पदा, आध्यात्मिक अनुभव र वेलनेस पर्यटनलाई प्राथमिकताका साथ प्रस्तुत गरेको छ । सन् २०२७ लाई ‘नेपाल वेलनेस पर्यटन वर्ष’ का रूपमा प्रवर्द्धन गर्ने तयारीअनुसार योग, ध्यान, आध्यात्मिकता, मानसिक शान्ति र प्राकृतिक उपचारमा आधारित पर्यटनलाई अन्तर्राष्ट्रिय बजारमा चिनाउने प्रयास गरिएको छ । मन्त्री पौडेलले मेलामा नेपालको प्याभिलियन उद्घाटन गरेका छन् । पर्यटन बोर्डसहित सरकारी तथा निजी क्षेत्रका प्रतिनिधि, वायुसेवा कम्पनी, होटल, ट्राभल तथा टुर अपरेटर सहभागी नेपाली टोलीले मेलामा नेपालको पर्यटन प्रवर्द्धन गरिरहेको छ । मेलामा ३२ नेपाली पर्यटन कम्पनीले स्टल नम्बर एन८–५३० बाट आफ्ना सेवा, गन्तव्य र पर्यटकीय उत्पादनको प्रचार गरिरहेका छन् । यसैबीच, नेपालले हालैका बाढीपहिरोबाट प्रभावित क्षेत्रमा पुनःस्थापना तथा पुनर्निर्माणका काम जारी रहे पनि काठमाडौं, पोखरा, चितवन, लुम्बिनी, अन्नपूर्ण र सगरमाथालगायत प्रमुख पर्यटकीय गन्तव्यमा स्थानीय अवस्था र यात्रा परामर्शअनुसार पर्यटन गतिविधि सञ्चालन भइरहेको सन्देश अन्तर्राष्ट्रिय बजारमा दिएको छ ‘नेपाल खुला छ’ (नेपाल इज ओपन) अभियानमार्फत नेपाल भ्रमणले स्थानीय व्यवसाय, रोजगारी र पर्यटनमा निर्भर समुदायको जीविकोपार्जनमा सहयोग पुर्याउने सन्देशसमेत प्रवाह गरिएको छ ।
कालीमाटीमा सबैभन्दा महँगो सिताके च्याउ, सस्तोमा मूला
काठमाडौं । कालीमाटी फलफूल तथा तरकारी बजार विकास समितिले बुधबारका लागि विभिन्न कृषिउपजको न्यूनतम थोक मूल्य सार्वजनिक गरेको छ । समितिले सार्वजनिक गरेको मूल्यसूचीअनुसार ठूलो नेपाली गोलभेडा प्रतिकिलो ६० रुपैयाँ, भारतीय ठूलो गोलभेडा ६० रुपैयाँ र सानो (टनेल) गोलभेडा ४५ रुपैयाँ कायम भएको छ । आलु रातो (लाम्चो, गोलो र मुडे) प्रतिकिलो ५५ रुपैयाँ रहेको छ । भारतीय रातो आलु ३० रुपैयाँ र सेतो आलु २८ रुपैयाँ तोकिएको छ । भारतीय सुकेको प्याज प्रतिकिलो ८५ रुपैयाँ, लोकल गाजर ८० रुपैयाँ र तराई गाजर ५० रुपैयाँ रहेको छ । त्यस्तै, बन्दा (लोकल), स्थानीय काउली, रातो मूला, सेतो मूला (हाइब्रिड) र लाम्चो भन्टा प्रतिकिलो ३० रुपैयाँ रहेको छ । डल्लो भन्टा ४० रुपैयाँ, घिउ सिमी (लोकल र हाइब्रिड) ५० रुपैयाँ तथा टाटे सिमी ६० रुपैयाँमा कारोबार भइरहेको छ । भटमासकोसा प्रतिकिलो १०० रुपैयाँ, तितो करेला ८० रुपैयाँ र लौका ४० रुपैयाँ तोकिएको छ । सागसब्जीतर्फ रायोको साग प्रतिकिलो २० रुपैयाँ, पालुङ्गो साग ८० रुपैयाँ, तोरीको साग ३० रुपैयाँ र हरियो प्याज २०० रुपैयाँ रहेको छ । च्याउतर्फ कन्य च्याउ प्रतिकिलो ९० रुपैयाँ, डल्ले च्याउ २६० रुपैयाँ, राजा च्याउ २८० रुपैयाँ र सिताके च्याउ ८०० रुपैयाँ तोकिएको छ। त्यस्तै, कुरिलो ७०० रुपैयाँ, न्युरो ९० रुपैयाँ, ब्रोकाउली ९० रुपैयाँ, चुकन्दर ८० रुपैयाँ, सेलरी ४०० रुपैयाँ, पुदिना ६०० रुपैयाँ र गान्टे मूला १०० रुपैयाँ रहेको छ । फलफूलतर्फ फुजी स्याउ प्रतिकिलो ३०० रुपैयाँ, मुस्ताङको स्याउ २०० रुपैयाँ र जुम्लाको स्याउ २५० रुपैयाँ तोकिएको छ । नेपाली र मालभोग केरा प्रतिदर्जन १०० रुपैयाँ, कागती प्रतिकिलो २०० रुपैयाँ र अनार ३०० रुपैयाँ रहेको समितिले जनाएको छ । समितिले सार्वजनिक गरेको मूल्य थोक मूल्य हो । खुद्रा बजारमा भने तरकारी तथा फलफूलको मूल्य फरक हुन सक्नेछ ।
डलरसहित अधिकांश विदेशी मुद्राको भाउ घट्यो, स्विस फ्र्यांक बढ्यो
काठमाडौं । नेपाल राष्ट्र बैंकले बुधबारका लागि निर्धारण गरेको विदेशी मुद्राको विनिमयदरअनुसार अमेरिकी डलर, युरो र पाउन्ड स्टर्लिङको भाउ घटेको छ। त्यस्तै, अस्ट्रेलियन, क्यानेडियन र सिंगापुर डलरको मूल्य पनि घटेको छ। स्विस फ्र्यांकको भाउ भने बढेको छ। राष्ट्र बैंकका अनुसार आज अमेरिकी डलर एकको खरिददर १५१ रुपैयाँ २९ पैसा र बिक्रीदर १५१ रुपैयाँ ८९ पैसा रहेको छ। मंगलबार डलरको खरिददर १५१ रुपैयाँ ५५ पैसा र बिक्रीदर १५२ रुपैयाँ १५ पैसा थियो। त्यस्तै, युरोपियन युरो एकको खरिददर १६९ रुपैयाँ १९ पैसा र बिक्रीदर १६९ रुपैयाँ ८६ पैसा कायम भएको छ। अघिल्लो दिन युरोको खरिददर १७० रुपैयाँ १ पैसा र बिक्रीदर १७० रुपैयाँ ६८ पैसा थियो। बेलायती पाउन्ड स्टर्लिङ एकको खरिददर २०२ रुपैयाँ ८९ पैसा र बिक्रीदर २०३ रुपैयाँ ६९ पैसा रहेको छ। मंगलबार यसको खरिददर २०३ रुपैयाँ ४१ पैसा र बिक्रीदर २०४ रुपैयाँ २२ पैसा थियो। यता, स्विस फ्र्यांकको मूल्य भने बढेको छ। आज एक स्विस फ्र्यांकको खरिददर १८४ रुपैयाँ ८३ पैसा र बिक्रीदर १८५ रुपैयाँ ५६ पैसा पुगेको छ। मंगलबार यसको खरिददर १८४ रुपैयाँ ६० पैसा र बिक्रीदर १८५ रुपैयाँ ३३ पैसा थियो। अस्ट्रेलियन डलर एकको खरिददर १०५ रुपैयाँ ५० पैसा र बिक्रीदर १०५ रुपैयाँ ९२ पैसा कायम भएको छ। अघिल्लो दिन यसको खरिददर १०६ रुपैयाँ ४० पैसा र बिक्रीदर १०६ रुपैयाँ ८२ पैसा थियो। त्यस्तै, क्यानेडियन डलर एकको खरिददर १०८ रुपैयाँ २६ पैसा र बिक्रीदर १०८ रुपैयाँ ६९ पैसा रहेको छ। मंगलबार यसको खरिददर १०८ रुपैयाँ ५१ पैसा र बिक्रीदर १०८ रुपैयाँ ९४ पैसा थियो। सिंगापुर डलर एकको खरिददर ११८ रुपैयाँ ११ पैसा र बिक्रीदर ११८ रुपैयाँ ५८ पैसा कायम भएको छ। अघिल्लो दिन यसको खरिददर ११८ रुपैयाँ ५३ पैसा र बिक्रीदर ११९ रुपैयाँ थियो। राष्ट्र बैंकले तोकेको विनिमयदर आवश्यकताअनुसार परिवर्तन हुन सक्नेछ। वाणिज्य बैंकहरूले निर्धारण गर्ने विदेशी मुद्राको विनिमयदर भने यसभन्दा फरक हुन सक्ने राष्ट्र बैंकले जनाएको छ।
प्रवासी नेपाली मञ्चको दोस्रो अधिवेशन आज, ३५० प्रतिनिधि सहभागी हुँदै
काठमाडौं । विश्वका विभिन्न मुलुकमा रहेका नेपालीलाई सङ्गठित गर्दै आएको प्रवासी नेपाली मञ्च अन्तर्राष्ट्रिय कमिटीको दोस्रो अधिवेशन आज बुधबार काठमाडौंमा सुरु हुँदैछ । बबरमहलस्थित कार्की ब्याङ्क्वेटमा बिहान ११ बजे उद्घाटन हुने अधिवेशनले मञ्चको नयाँ अन्तर्राष्ट्रिय नेतृत्व चयन गर्नुका साथै आगामी कार्यकालको सङ्गठनात्मक दिशा र प्राथमिकता तय गर्ने जनाइएको छ । नेकपा एमालेसम्बद्ध मञ्चको अधिवेशनमा विश्वका ३८ देशबाट ३५० जना प्रतिनिधि काठमाडौंमा भेला हुने एमालेले जनाएको छ । विदेशमा रहेका नेपालीको सङ्गठन विस्तार, प्रवासी नेपालीका साझा सरोकार, उनीहरूको हकहित र नेपालको समृद्धिमा प्रवासी समुदायको भूमिकालगायत विषय अधिवेशनका प्रमुख एजेन्डा बन्ने एमाले प्रचार विभाग प्रमुख निरज आचार्यले जानकारी दिए । अधिवेशनको उद्घाटन नेकपा एमालेकी वरिष्ठ नेता एवं पूर्वराष्ट्रपति विद्यादेवी भण्डारीले गर्ने कार्यक्रम रहेको प्रचार विभाग प्रमुख आचार्यले बताए । उनका अनुसार एमालेनिकट प्रवासी नेपालीको अन्तर्राष्ट्रिय सङ्गठनका रूपमा रहेको मञ्चले दोस्रो अधिवेशनमार्फत आफ्नो सङ्गठनात्मक संरचनालाई थप व्यवस्थित बनाउने र अन्तर्राष्ट्रिय सञ्जाललाई प्रभावकारी बनाउने लक्ष्य लिएको छ । तीन सय ५० प्रतिनिधिको सहभागितामा हुने अधिवेशनलाई मञ्चको भावी नेतृत्व र सङ्गठनात्मक प्रभाव विस्तारका दृष्टिले समेत महत्त्वपूर्ण रूपमा हेरिएको प्रवासी नेताहरूले बताएका छन् । अधिवेशनको समापन समारोहलाई नेकपा एमालेका अध्यक्ष एवं पूर्वप्रधानमन्त्री केपी शर्मा ओलीले सम्बोधन गर्ने कार्यक्रम रहेको आचार्यले जनाए । उनका अनुसार उद्घाटनमा पूर्वराष्ट्रपति भण्डारी र समापनमा एमाले अध्यक्ष ओलीको सहभागिताले अधिवेशनलाई एमालेको प्रवासी सङ्गठनसँग जोडिएको महत्त्वपूर्ण राजनीतिक जमघटका रूपमा समेत स्थापित गरेको छ ।
