पोप लियोलाई फोक्सोको क्यान्सर भएको पुष्टि, भ्याटिकनले दियो यस्तो जानकारी
काठमाडौं । पोप लियोलाई फोक्सोको क्यान्सर भएको पुष्टि भएको छ । यद्यपि उनको दाहिने फोक्सोको तल्लो भाग हटाउन गरिएको शल्यक्रिया सफल भएको भ्याटिकनले जनाएको छ । भ्याटिकनले जारी गरेको स्वास्थ्यसम्बन्धी बुलेटिनअनुसार ७१ वर्षीय पोपको मंगलबार रोमस्थित जेमेली अस्पतालमा करिब ९० मिनेटसम्म शल्यक्रिया गरिएको थियो । शल्यक्रियापछि उनलाई फोक्सोको एडेनोकार्सिनोमा नामक क्यान्सर भएको पत्ता लागेको हो । भ्याटिकनले भनेको छ, ‘शल्यक्रिया सफल भएको छ र यस क्रममा कुनै जटिलता देखिएको छैन ।’ शल्यक्रियापछि पोप सामान्य रूपमा होसमा आएको र केही समय चिकित्सकीय निगरानीमा राखेपछि उनलाई आफ्नो कोठामा सारिएको पनि भ्याटिकनले जनाएको छ । भ्याटिकनले नियमित स्वास्थ्य परीक्षणका क्रममा पहिलोपटक पोपको फोक्सोमा गाँठो देखिएको जानकारी दिएको छ । उनलाई करिब एक साता अस्पतालमै राखिने अपेक्षा गरिएको छ । यसअघि ठूलो संख्यामा मानिसहरू पोपको प्रतीक्षामा अस्पतालबाहिर घण्टौंसम्म बसेका थिए । पोप सवार गाडी अस्पताल परिसरमा पुग्दा उपस्थित मानिसहरूले उनको अभिवादन गर्दै शीघ्र स्वास्थ्यलाभको कामना गरेका थिए । त्यस क्रममा पोपले गाडीको पछाडिको झ्यालबाट हात हल्लाउँदै र मुस्कुराउँदै उनीहरूको अभिवादन स्वीकार गरेका थिए । त्यसपछि अस्पतालको सिँढीमा कर्मचारीहरूले उनको स्वागत गरेका थिए । तीमध्ये एक कर्मचारीले सहानुभूति व्यक्त गर्दै ‘मलाई दुःख लागेको छ’ भनेका थिए । जवाफमा पोपले मुस्कुराउँदै काँध उचालेका थिए । कर्मचारीहरूले उनलाई ‘हामी तपाईंको साथमा छौं’ भन्दै आश्वस्त पारेका थिए । भ्याटिकनले जारी गरेको विज्ञप्तिमा शल्यक्रियाका क्रममा पोपको दाहिने फोक्सोको तल्लो भाग पूर्ण रूपमा हटाइएको उल्लेख छ । शल्यक्रिया आवश्यकताअनुसार पूर्ण रूपमा सम्पन्न भएको सुनिश्चित गर्न उक्त भाग हटाइएको भ्याटिकनले स्पष्ट पारेको छ । यसैबीच, भ्याटिकनका एक स्रोतले समाचार संस्था एएफपीलाई क्यान्सर शरीरका अन्य भागमा फैलिएको छ वा छैन भन्ने पत्ता लगाउन थप परीक्षण भइरहेको जानकारी दिएका छन् ।
कङ्गोमा इबोला सङ्क्रमितको सङ्ख्या ९ हजार नाघ्यो, खोप परीक्षणको तयारी तीव्र
काठमाडौं । डेमोक्रेटिक रिपब्लिक अफ कङ्गो (डीआरसी) मा पछिल्लो पटक फैलिएको इबोला महामारीका कारण सङ्क्रमितको सङ्ख्या ९ हजार नाघेको छ । गत मे महिनाबाट सुरु भएको यस महामारीले अहिलेसम्म ९ हजार ६६ जनालाई सङ्क्रमित बनाएको छ भने ४ हजार ३८१ जनाले ज्यान गुमाएका छन् । कङ्गोको स्वास्थ्य मन्त्रालय र इबोला टास्क फोर्सले सार्वजनिक गरेको पछिल्लो विवरणअनुसार यस महामारीको मृत्युदर ४८.३ प्रतिशत पुगेको छ । कुल सङ्क्रमितमध्ये २ हजार ३८९ जना उपचारपछि निको भएका छन् । सातवटा प्रान्तका ६५ स्वास्थ्य क्षेत्रमा फैलिएको यस रोगको इपिसेन्टर (केन्द्रबिन्दु) इटुरी प्रान्त बनेको छ, जहाँ कुल सङ्क्रमितको ७३.८ प्रतिशत हिस्सा देखिएको छ । उत्तर किभु प्रान्तमा भने मृत्युदर सबैभन्दा उच्च ५७.१ प्रतिशत रहेको छ । स्वास्थ्य मन्त्री रोजर काम्बाका अनुसार महामारी केही क्षेत्रमा नियन्त्रणउन्मुख देखिए पनि विश्व स्वास्थ्य सङ्गठन (डब्लूएचओ) का महानिर्देशक टेड्रोस अधानोम गेब्रेयससले केही स्थानमा भाइरसको सङ्क्रमण अझै बढ्दो क्रममा रहेको भन्दै चेतावनी दिएका छन् । समुदायस्तरमा हुने मृत्युको उच्च दर र कन्ट्याक्ट ट्रेसिङमा देखिएका कमी–कमजोरी हालका प्रमुख चुनौती बनेका छन् । यो प्रकोप ‘बुन्डिबुग्यो इबोला’ भाइरसका कारण फैलिएको हो, जसका लागि हालसम्म कुनै पनि विशेष खोप वा उपचार पद्धति आधिकारिक रूपमा स्वीकृत भइसकेको छैन । यद्यपि, ‘ट्युमाइनी’ नामक चरण २–३ को क्लिनिकल परीक्षण सुरु गर्ने तयारी अन्तिम चरणमा पुगेको छ । यस परीक्षणले बुन्डिबुग्यो भाइरसविरुद्धका खोपका उम्मेदवारहरूको प्रभावकारिता जाँच गर्नेछ । हाल अग्रपङ्क्तिमा खटिएका स्वास्थ्यकर्मीहरूलाई अनुसन्धान प्रोटोकलअन्तर्गत ‘इर्भेबो’ खोप लगाइँदै छ । तर यो खोप ‘जैर इबोला’ भाइरसका लागि मात्र प्रभावकारी मानिने भएकाले बुन्डिबुग्यो भाइरसविरुद्ध यसको प्रभावकारिता परीक्षणको विषय बनेको छ । मे १५ मा घोषणा गरिएको यो प्रकोप डीआरसीको इतिहासकै सबैभन्दा घातक र विश्वकै दोस्रो ठूलो इबोला महामारीका रूपमा दर्ज भएको छ ।
रुस सबैभन्दा ठूलो खतरा, एआई र इरानबाट पनि सतर्क रहनुपर्छ : बेलायती गुप्तचर निकाय
काठमाडौं । बेलायतको गुप्तचर निकाय एमआई–५ का प्रमुख केन म्याककलमले रुस अहिले बेलायत र उसका सहयोगी देशका लागि सबैभन्दा ठूलो सुरक्षा खतरा बनेको बताएका छन् । रुसलाई ‘आक्रामकताको मामिलामा नम्बर एक’ भन्दै उनले रुसबाट उत्पन्न खतरासँग जुध्न एमआई–५ ले शीतयुद्धको समयमा भन्दा पनि बढी स्रोतसाधन परिचालन गरिरहेको बताए । लन्डनस्थित एमआई–५ को मुख्यालयमा आफ्नो वार्षिक सम्बोधन गर्दै म्याककलमले पछिल्लो १० वर्षमा विदेशसँग सम्बन्धित सुरक्षा खतराहरू चार गुणाले बढेको बताए । उनका अनुसार अहिले आतंकवाद र विदेशबाट उत्पन्न हुने सुरक्षा खतरासँग जुध्न गरिने कामको भार लगभग समान स्तरमा पुगेको छ । एमआई–५ प्रमुखले इरान र दक्षिणपन्थी अतिवादबाट बढ्दै गएको खतराप्रति पनि चेतावनी दिए । उनले आफ्नो निकायले कृत्रिम बौद्धिकता (एआई) प्रयोग गर्ने प्रयासमा रहेका आतंकवादीहरूलाई पक्राउ गरेको बताए । केही घटनामा एआईलाई ड्रोनसँग जोडेर प्रयोग गर्ने प्रयाससमेत गरिएको उनले जानकारी दिए । म्याककलमका अनुसार, रुसले नेटो सदस्य राष्ट्रहरूविरुद्ध प्रत्यक्ष युद्ध गर्नुको सट्टा ‘हाइब्रिड युद्ध’ अर्थात् अप्रत्यक्ष माध्यमबाट दबाब सिर्जना गर्ने रणनीति अपनाइरहेको छ । यद्यपि, रुसले अहिलेसम्म नेटोसँग प्रत्यक्ष सैन्य द्वन्द्व हुने सीमासम्म पुग्नबाट जोगिँदै आएको उनले बताए । युक्रेनमाथि आक्रमण गरेपछि बेलायत र अन्य देशबाट ठूलो संख्यामा रुसी जासुसहरू निष्कासित गरिएकाले रुसी राष्ट्रपति कार्यालय क्रेमलिनको परम्परागत गोप्य सञ्जाल निकै कमजोर बनेको पनि उनले दाबी गरे । उनका अनुसार अहिले रुसले आफ्ना उद्देश्य पूरा गर्न अपराधीहरूलाई पैसा दिएर उनीहरूलाई प्रयोग गर्ने प्रयास गरिरहेको छ ।
