कुमारी बैंकले सेयरधनीलाई २.१० प्रतिशत नगद लाभांश दिने
काठमाडौं । कुमारी बैंक लिमिटेडले आर्थिक वर्ष २०८२/८३ को नाफाबाट सेयरधनीलाई २.१०५३ प्रतिशत नगद लाभांश दिने प्रस्ताव गरेको छ । बैंकको भदौ ३० गते बसेको सञ्चालक समितिको बैठकले आर्थिक वर्ष २०८२/८३ को वित्तीय विवरण पारित गरी स्वीकृतिका लागि नेपाल राष्ट्र बैंकमा पठाउने निर्णय गरेको हो । नेपाल राष्ट्र बैंकबाट वित्तीय विवरण स्वीकृत भएपछि आगामी वार्षिक साधारणसभाबाट पारित गराएर सेयरधनीलाई चुक्ता पुँजीको २.१०५३ प्रतिशत नगद लाभांश वितरण गर्ने प्रस्ताव गरिएको बैंकले जनाएको छ । उक्त नगद लाभांशमा लाभांश करसमेत समावेश हुनेछ । बैंकको हालको चुक्ता पुँजी २६ अर्ब २२ करोड ५८ लाख ६१ हजार ३४० रुपैयाँ रहेको छ । प्रस्तावित लाभांशअनुसार बैंकले करिब ५५ करोड २२ लाख रुपैयाँ नगद लाभांश वितरण गर्नेछ । बैंकले यसपटक बोनस सेयर प्रस्ताव गरेको छैन । लाभांश वितरणका लागि सेयर दाखिल खारेज बन्द हुने मिति (बुक क्लोज) र वार्षिक साधारणसभाको मिति भने हाल तय गरिएको छैन । लाभांश वितरणका लागि नेपाल राष्ट्र बैंकको स्वीकृति र बैंकको आगामी वार्षिक साधारणसभाबाट अनुमोदन हुनुपर्नेछ ।
प्रभु स्टक मार्केटले ५ प्रतिशत नगद लाभांश दिने
काठमाडौं । प्रभु स्टक मार्केट लिमिटेडले सेयरधनीलाई ५ प्रतिशत नगद लाभांश वितरण गर्ने भएको छ । कम्पनीको सञ्चालक समितिको भदौ २९ गते बसेको बैठकले गत आर्थिक वर्ष २०८२/८३ को मुनाफा तथा रिजर्भ कोषबाट चुक्ता पुँजीको ५ प्रतिशतका दरले १ करोड रुपैयाँ नगद लाभांश वितरण गर्ने निर्णय गरेको हो । लाभांश प्रस्ताव पारित गर्न कम्पनीले असोज २३ गते अपराह्न ४ बजे काठमाडौंको बुद्धनगरस्थित कार्यालयमा तेस्रो वार्षिक साधारण सभा बोलाएको छ । सभामा गत आर्थिक वर्षको सञ्चालक समितिको वार्षिक प्रतिवेदन तथा लेखापरीक्षकको प्रतिवेदन पारित गर्ने र चालु आर्थिक वर्ष २०८३/८४ को लेखापरीक्षणका लागि लेखापरीक्षक नियुक्ति तथा पारिश्रमिक निर्धारण गर्ने प्रस्तावसमेत पेस हुनेछ । त्यसैगरी, सञ्चालक समितिको रिक्त स्थानमा गरिएको सञ्चालकहरूको नियुक्ति अनुमोदन गर्ने, सञ्चालक समितिको संख्या परिवर्तन गर्ने तथा सञ्चालकको पारिश्रमिक, भत्ता र सुविधासम्बन्धी व्यवस्थामा संशोधन गर्ने प्रस्ताव सभामा पेस हुनेछ । कम्पनीको प्रबन्धपत्र तथा नियमावलीमा आवश्यक संशोधन गर्न सञ्चालक समितिलाई सम्पूर्ण अख्तियारी प्रदान गर्ने प्रस्तावसमेत सभाले पारित गर्नेछ ।
गरिमा विकास बैंक मर्जरमा जाने, असोज २६ गते बोलायो सेयरधनी भेला
काठमाडौं । गरिमा विकास बैंकले २० प्रतिशत लाभांश प्रस्ताव पारित गर्न वार्षिक साधारण सभा बोलाएको छ । बैंकको सञ्चालक समितिको भदौ ३० गते बसेको बैठकले २०औँ वार्षिक साधारण सभा असोज २६ गते पोखरा, कास्कीमा बिहान साढे १० बजे बोलाउने निर्णय गरेको हो । सभाले गत आर्थिक वर्ष २०८२/८३ को नाफाबाट सेयरधनीलाई चुक्ता पुँजी ६ अर्ब २ करोड १३ लाख ४८ हजार रुपैयाँको १० प्रतिशतका दरले ६० करोड २१ लाख ३४ हजार रुपैयाँ बराबरको बोनस सेयर र करसहित १० प्रतिशतका दरले ६० करोड २१ लाख ३४ हजार रुपैयाँ नगद लाभांश वितरण गर्ने प्रस्ताव पारित गर्नेछ । यस्तै, सभामा गत आर्थिक वर्षको सञ्चालक समितिको वार्षिक प्रतिवेदन तथा लेखापरीक्षकको प्रतिवेदन पारित गर्ने र चालु आर्थिक वर्ष २०८३/८४ को लेखापरीक्षणका लागि लेखापरीक्षक नियुक्ति तथा पारिश्रमिक निर्धारण गर्ने प्रस्तावसमेत पेस हुनेछ । बैंकको हाल कायम अधिकृत पुँजी वृद्धि गरी ६ अर्ब ६५ करोड रुपैयाँ पुर्याउने तथा सञ्चालकहरूलाई प्रदान गरिने बैठक भत्ता, दैनिक भ्रमण भत्ता र टेलिफोन, पत्रपत्रिका तथा इन्टरनेट खर्चबापत प्रदान गरिने रकम वृद्धि गर्ने प्रस्ताव पनि सभामा पेस हुनेछ । त्यसैगरी, उपयुक्त बैंक तथा वित्तीय संस्थासँग मर्जरमा जान आवश्यक प्रक्रिया अगाडि बढाउन सञ्चालक समितिलाई अख्तियारी प्रदान गर्ने तथा बैंकको प्रबन्धपत्र र नियमावलीमा आवश्यक संशोधन गर्ने प्रस्तावसमेत सभाले पारित गर्नेछ । लाभांश तथा साधारण सभा प्रयोजनका लागि बैंकले असोज १४ गते एक दिन बुक क्लोज गर्ने निर्णय गरेको छ । त्यसैले असोज १३ गतेसम्म नेपाल स्टक एक्सचेन्ज (नेप्से)मा कारोबार भई कायम भएका सेयरधनीले साधारण सभामा सहभागी हुन तथा प्रस्तावित लाभांश प्राप्त गर्न सक्नेछन् ।
