जेठ मसान्तसम्म ललितपुर महानगरको जम्मा ४० प्रतिशत मात्रै विकास बजेट खर्च
काठमाडौं । ललितपुर महानगरपालिकाको विकासलक्षित पुँजीगत खर्चको रफ्तार निकै सुस्त देखिएको छ । चालू आर्थिक वर्षको जेठ मसान्तसम्म आइपुग्दा महानगरले आफ्नो कुल पूँजीगत बजेटको जम्मा ४० प्रतिशत मात्र खर्च गर्न सकेको छ । महानगरपालिकाले आफ्नो ९ औं नगरसभामा आगामी आर्थिक वर्षका लागि वार्षिक नीति तथा कार्यक्रम सार्वजनिक गर्ने क्रममा चालु वर्षको यो वित्तीय प्रगति विवरण बाहिर ल्याएको हो । सार्वजनिक विवरण अनुसार जेठ मसान्तसम्ममा महानगरको चालू र पुँजीगत गरी कुल खर्च ५० प्रतिशत मात्र रहेको छ भने आन्तरिक आयतर्फको राजस्व संकलन ६५ प्रतिशत पुगेको छ ।
७२ हजार घुस लिएको अभियोगमा मुद्दा दायर
काठमाडौं । अख्तियार दुरुपयोग अनुसन्धान आयोगले महोत्तरीको सोनमा गाउँपालिकाका प्रमुख प्रशासकीय अधिकृत श्रीदेव यादवविरुद्ध घुस लिएको अभियोगमा मुद्दा दायर गरेको छ । सडक ढलान योजनाको कार्य सम्पन्न पश्चात् भुक्तानी गर्ने प्रयोजनका क्रममा विभिन्न बहाना बनाई दुःख दिई सेवाग्राहीसँग ७२ हजार रूपैयाँ घुस लिएको अभियोग लागेको छ । आयोगको बर्दिबासबाट खटिएको टोलीले प्रमुख प्रशासकीय अधिकृत यादवलाई सेवाग्राहीसँग घुस लिँदै गरेको अवस्थामा पक्राउ गरेको थियो । आयोगले आरोपी प्रमुख प्रशासकीय अधिकृत यादवविरुद्ध बिगोबमोजिम कैद सजायको समेत माग गरी मुद्दा दायर गरेको छ ।
हेटौँडाका ६० जना अनौपचारिक क्षेत्रका श्रमिक सामाजिक सुरक्षा कोषमा आबद्ध
बागमती । हेटौँडा उपमहानगरपालिकाले अनौपचारिक क्षेत्रमा कार्यरत ६० जना श्रमिकलाई सामाजिक सुरक्षा कोषमा आबद्ध गरेको छ । श्रम, रोजगार तथा सामाजिक सुरक्षा मन्त्रालयको ‘आन्तरिक रोजगार प्रवद्र्धन कार्यक्रम’अन्तर्गत सञ्चालित ‘श्रमको सम्मान, राष्ट्रको अभियान’ कार्यक्रममार्फत अनौपचारिक क्षेत्रका श्रमिकलाई सामाजिक सुरक्षा कोषमा आबद्ध गराइएको हो । गत मंगलबार नगरप्रमुख मीनाकुमारी लामाले सामाजिक सुरक्षा कोषमा आबद्ध भएका ६० श्रमिकलाई परिचयपत्र वितरण गरेका थिए । अन्य श्रमिकलाई पनि क्रमशः सामाजिक सुरक्षा कोषमा आबद्ध गराउने योजना रहेको रोजगार संयोजक विजन श्रेष्ठले जानकारी दिए । उनका अनुसार कोषमा आबद्ध हुनका लागि उपमहानगरपालिकाले प्रतिश्रमिक एक हजार १४० रुपैयाँ तथा योगदानकर्ताले एक हजार ३४० रुपैयाँ प्रतिमहिना जम्मा गर्नुपर्ने व्यवस्था रहेको छ ।
