पतञ्जलिले यूनिलिभरकाे बजार खाेस्दा लगानीकर्ताले एक कित्ता सेयरमा ७ हजार ५०० गुमाए, के हुन्छ अब ?
काठमाडौं । सूचिकृत कम्पनीमध्ये सबैभन्दा महङ्गो युनिलिभर नेपाल लिमिटेडको सेयर मूल्यमा उच्च गिरावट आएको छ । युनिलिभर कम्पनीका लगानीकर्ताले एक वर्षको अवधिमा प्रतिकित्ता सात हजार पाँच सय रुपैयाँ अर्थात २५.३९ प्रतिशत गुमाइसकेका छन् । गत वर्षको माघमा प्रतिकित्ता २८ हजार रुपैयाँमा कारोबार भएको यूनिलिभरको सेयर गत साता प्रतिकित्ता २० हजार ५०० रुपैयाँमा झरेको छ । जुन अहिलेसम्म गत एक वर्षयताको न्युनतम मूल्य हो । हाल कम्पनीको चुक्ता पुँजी ९ करोड २० लाख रुपैयाँ रहेको छ । अंकित मूल्य १०० रुपैयाँ रहेको कम्पनीको हाल ९ लाख २० हजार ७०० कित्ता सेयर नेप्सेमा सूचिकृत रहेको छ । गत आवमा कम्पनीले ९९ करोड ९ लाख रुपैयाँ खुद नाफा कमाएको थियो । जुन अघिल्लो वर्षको तुलनामा ३ करोड रुपैयाँ बढी हो । किन घट्यो त सेयर मूल्य ? समग्रमा सेयर बजारमा गिरावट देखिएकोले यस कम्पनीमा त्यसको प्रभाव पर्नु स्वभाविक हो । तर बजारमा आएको गिरावट भन्दा यस कम्पनीको सेयर मूल्यमा आएको गिरावट उच्च छ । कम्पनीले सेयरधनीलाई वितरण गर्ने लाभांशदर घट्दै गएकाले यूनिलिभरको सेयर मूल्यमा उच्च गिरावट आएको देखिन्छ । कम्पनीले गत आर्थिक वर्ष २०७४/७५ को नाफाबाट लगानीकर्तालाई प्रतिकित्ता ७०० रुपैयाँ लाभांश दिएको छ । यो विगत पाँच वर्ष यताको सबैभन्दा कम लाभांश हो । अघिल्ला वर्ष कम्पनीले प्रतिकित्ता १२७० रुपैयाँसम्म लाभांश दिएको थियो । एक वर्षअघि यस कम्पनीको सेयर किन्नेले लाभांश वापत ७०० रुपैयाँ कमाउँदा ७ हजार पाँच सय रुपैयाँ गुमाएका छन् । कम्पनीले गत कात्तिकमा साधारणसभा गरी लगानीकर्तालाई लाभांश वितरण गरिसकेको छ । बोनस सेयर र हकप्रद सेयरमा आकर्षित हुने लगानीकर्ताको लागि यो कम्पनीको सेयर आकर्षित छैन । कम्पनीले पुँजी वृद्धिको लागि बोनस सेयर वा हकप्रद सेयर जारी गर्ने सम्भावना नरहेको र कम्पनीको नगद लाभांश दरमा पनि गिरावट आएकोले यस सेयरप्रति लगानीकर्ताको चासो कम हुँदै गएको साधारण लगानीकर्ता बताउँछन् । यूनिलिभरको उत्पादनसँग प्रतिस्पर्धी भएर रामदेव बाबाको कम्पनी पतञ्जलीको उत्पादनले बजार लिएपछि यस कम्पनीको सेयर मूल्य घटेको लगानीकर्ताको बुझाई छ । बजारमा प्रतिस्पर्धा बढेपछि कम्पनीकाे नाफा र वितरित लाभांश घटेकाे र सेयर मूल्यमा उच्च गिरावट देखिएकाे जानकारहरू बनाउँछन् ।
घरघरमा इन्डक्सन चुल्हो, सडकमा इलेक्ट्रिक सवारी
काठमाडौं । नेपालको विद्युत उत्पादन क्षमता बढ्दै जादाँ सरकारले इलेक्ट्रिक सामाग्रीमा ध्यान बढाएको छ । हाल भारतसँग ५ सय मेगावट बिजुली खरिद गरिरको अवस्थामा इलेक्ट्रिक सवारी र इन्डक्सन चुल्होमा लगानी बढाउन चाहेको हो । इन्डक्सन चुल्होको विस्तार गर्न शुक्रबारबाट बजारमुखि प्रवद्र्धन राष्ट्रिय अभियान सुरु भएको छ । सन् २०२२ सम्ममा प्रत्येक घरमा विद्युतिय चुल्हो पुर्याउन यस अभियानको सुरु भएको हो । अभियानको सुरुवात गर्दै उर्जा, जलस्रोत तथा सिंचाई मन्त्री वर्षमान पुनले अब पेट्रोलिय पदार्थको आयतमा भारी कटौति हुने बताए । उनले विद्युतिय क्षेत्रको प्राविधिक समस्या हटाई प्रत्येक घरमा इन्डक्सन चुल्हो जडान गर्ने बताए । ‘प्रत्येक नेपाली नागरिकले विद्युतको शेयरमा लगानी गर्नेछ, यसबाट करिब ६ खर्ब रकम उठ्नेछ मन्त्री पुनले भने त्यसपछि खर्बौको इन्धन आयत हुने दिन सकिन्छ ।’ अभियनमा ऐक्यबद्धता जनाउदै विद्युत प्राधिकरण कार्यकारी निर्देशक कुलमान घिसिङले माग सन्तुलनबाटै लोडसेडिङ हटाउन सफल भएको दाबी गरे । ‘देशभरको विद्युतको माग करिब २ हजार मेगावट रहेको थियो यो समस्या विद्युत चुहावटबाट उब्जिएको हो घिसिङले भने चुहावट १३ प्रतिशतमा सिमित गर्दा माग पनि घटेर १३ सय मेगावाटमा आयो ।’ उनले ट्रान्सफर्मर समस्याकै कारण अहिले विद्युत प्रवाहमा समस्या आएको बताए । यो सँगै सरकारले विद्युतिय सवारी र इन्डक्सन चुल्होको विकासमा ध्यान दिएको छ । सरकारले उपत्यकामा विद्युतिय सवारीको लागि ३ सय इलेक्ट्रिक बस किन्ने तयारी थालेको छ । बस खरिदका लागि हाल भौतिक पुर्वाधार तथा यातायात मन्त्रालयले अध्यान गरिरहेको प्रवक्ता शिवहरी सावकोटाले बताए । पेट्रोलिय पदार्थ भन्दा विद्युतको प्रयोग सस्तो पर्ने सरोकार निकायहरुले दाबी गरिरहेका छन् । विद्युतविद अनन्त नकर्मीका अनुसार २०१९ मा गरिएको एक अध्ययन अनुसार ५ जना परिवार रहेको परिवारमा एलपीजी ग्यास भन्दा इन्डक्शन चुल्हो ३ सय ८४ रुपैंया सस्तो पर्ने देखाएको छ । अर्थात एलपीजी ग्याँस प्रयोग गर्दा १४ सय ७८ रुपैंया खर्च हुनेछ भने विद्युतिय चुल्होको प्रयोग गर्दा ११ सय १४ रुपैंया पर्नेछ । यसैगरी विद्युतिय सवारीमा पनि पेट्रोल डिजेल भन्दा निकै सस्तो पर्ने देखिएको छ । एउटा समान्य विद्युतिय कारको ब्याट्री पुर्ण चार्ज हुदाँ २७ युनिट विद्युत विजुली खर्च हुनेछ जसको बजार मूल्य २७० रुपैंया पर्ने गर्दछ । यसबाट २१२ किलोमिटर गुडाउन सकिनेछ । यसरी हेर्दा पेट्रोल डिजेलको सवारी भन्दा विद्युतिय सवारी ४ गुणा सस्तो पर्नेछ ।
एनआईसी एशिया बैंकद्वारा विद्यालयलाई कम्प्युटर हस्तान्तरण
काठमाडौं । एनआईसी एशिया बैंक लिमिटेडले काठमाडौ जिल्ला, शंखरापुर नगरपालिका वडा नं. ६ साँखुमा अवस्थित श्री भाग्योदय माध्यामिक विद्यालयलाई केहि थान कम्प्युटर हस्तान्तरण गरेको छ । बैंकले आफ्नो संस्थागत सामाजिक उत्तरदायित्वअन्र्तगत बैंकको वित्तीय सहयोगमा उक्त समान सहयोग गरेको हो । प्रतिनिधी सभा राज्य व्यवस्था तथा सुशासन समितिको सभापति शशी श्रेष्ठको प्रमुख आथित्यता तथा नेपाल राष्ट्र बैंकका डेपुटी गर्भनर शिवराज श्रेष्ठको विशेष आथित्यतामा शशि श्रेष्ठ, शिवराज श्रेष्ठ, तथा बैंकका प्रमुख जन सम्र्पक अधिकृत अर्जुन राज खनियाले विद्यालय ब्यवस्थापन समितिका अध्यक्ष मधु के सी र प्रधानाध्यापक रुसण बसीलाई सयुक्त रुपमा उक्त कम्प्यूटरहरु हस्तान्तरण गरेका छन् ।
राजश्व सचिव घिमिरे भन्छन्-आर्थिक गतिबिधि अत्याधिक रुपमा बढ्नु पर्यो
काठमाडौँ । नेपाल चेम्बर अफ कमर्सले अन्तर्राष्ट्रिय भन्सार दिवस–२०१९ को अवसरमा एक कार्यक्रमको आयोजना गरेको छ । कार्यक्रमलाई सम्बोधन गर्दै राजश्व सचिव लालशंकर घिमिरेले आर्थिक गतिबिधि अत्याधिक रुपमा बढ्नुपर्ने, ब्यापारको सहजीकरण सहज ढंगले हुनुपर्ने तथा उपभोक्ताहरुको संरक्षण हुनुपर्ने कुरा बताए । यी तिन कुराको सुदृढिकरण हुन बित्तिकै राजश्व संकलन स्वतः हुने कुरामा समेत उनले जोड दिए । नेपालको कूल ग्राहस्थ उत्पादन ३४ खर्ब जति रहेको र २३ खर्ब भन्दा बढीको उपभोग नेपालमा हुने कुरा समेत उनले बताए । नेपाल चेम्बर अफ कमर्स जस्ता नीजि व्यवसायीहरुको छाता संगठनलाई मानार्थ भन्सार अधिकृत बनाउन आफुहरु तयार रहेको र उक्त संस्थाहरुले त्यसको मर्यादा जोगाउन आफ्नो तर्फबाट पुरा शक्ति लगाउनुपर्ने कुरामा समेत उनले जोड दिए । भंसार बिभागका महानिर्देशक तोयम रायाले अबको भंसार ज्ञानमा आधारित, नवीनतम, प्रविधिमा आधारित र व्यवस्थित हुनुपर्ने कुरामा जोड दिए । सरकारी निकायबीच तथा सरकारी र नीजि संस्थाबिचको समन्वयले मात्रै नेपालको भंसारलाई अन्तर्राष्ट्रिय स्तरको बनाउन सकिने कुरामा उनले जोड दिए । जति मुल्यमा र जुन ठाउंबाट सामान ल्याएको हो, त्यसलाई पुष्टि गर्ने दस्ताबेजहरु भएमा कारोबार मुल्यले सजिलै मान्यता पाउने कुरा समेत उनले उल्लेख गरे । कार्यक्रममा स्वागत मन्तब्य व्यक्त गर्दै नेपाल चेम्बर अफ कमर्सका अध्यक्ष राजेशकाजी श्रेष्ठले भने–सरकारी तहमा हुने अन्तर निकायको समन्वयको अभावमा व्यवसायीहरुले दुख पाएकोले यसतर्फ सरकारले ध्यान दिन आवश्यक छ ।
देशको पूँजी बाहिरिए आर्थिक समृद्धि सम्भव छैनः गभर्नर नेपाल
रुपन्देही । आम नागरिकलाई बैंकिङ सूचना प्रवाह गर्ने उद्देश्यले ‘बैंकिङ, बीमा, पूँजीबजार’ प्रदर्शनी आजदेखि बुटवलमा शुरु भएको छ । “वित्तिय जागरणः राष्ट्रिय अभियान’ कार्यक्रमअन्तर्गत मिडिया इन्टरनेशनलको आयोजना तया नेपाल राष्ट्र बैंकको प्रवद्र्धनमा प्रदर्शनी आयोजना गरिएको हो । प्रदर्शनीको एक समारोहका बीच उद्घाटन गर्दै नेपाल राष्ट्र बैंकका गर्भनर डा चिरञ्जीबी नेपालले मुलुकको अर्थतन्त्र बलियो बनाउन उत्पादनमूलक क्षेत्रमा लगानी बढाउनु पर्ने बताए । उनले खाद्यान्न आयातमा देशको ठूलो पूँजी बाहिरिएकाले यसलाई रोक्न स्वदेशमै लगानी गरी उत्पादन बढाउनु पर्ने धारणा राखे । “पछिल्लो पाँच महिनाको अवधिमा पाँच अर्बको तरकारी र नौ अर्ब बराबरको चामल आयात गरिएको छ ।”, उनले भने, “देशको पूँजी बाहिरिएर आर्थिक समृद्धि सम्भव छैन ।” उनले आम नागरिकमा बैंकसँग कारोबार गर्ने बानीको विकास गरी वित्तीय पहुँच विस्तार गर्न जरुरी रहेको बताए । कार्यक्रममा नेपाल बैंकर्स सङ्घका अध्यक्ष ज्ञानेन्द्रप्रसाद ढुङ्गानाले वित्तीय साक्षरताले नै वित्तीय पहुँच बढ्ने धारणा राखे । डेभलपमेन्ट बैंकर्स एशोसिएशनका उपाध्यक्ष प्रकाश पौडेलले प्रदेशमा थप उद्यमीको सिर्जना गरी उत्पादनमा प्रदेश नं ५ अगाडि छ भन्ने सन्देश दिनु जरुरी रहेकोमा जोड दिए । वित्तीय जागरणः राष्ट्रिय अभियानका संयोजक माधव निर्दोषले बैंकिङ सूचना प्रवाह गर्ने तथा आम नागरिकको बैंकिङ पहुँच बढाउन प्रदर्शनी आयोजना गरिएको बताए । बैंकिङ सूचना प्रवाह गर्ने तथा आम नागरिकको बैंकिङ पहुँच बढाउने उद्देश्यले बुटवलको कालिका मानव ज्ञान माविको प्राङ्गणमा आयोजना गरिएको प्रदर्शनीमा बीमा र बैंकिङसम्बन्धी ४० वटा कक्ष रहेका संयोजक निर्दोषले जानकारी दिए । प्रदर्शनी शनिबार सम्पन्न हुनेछ ।
रसुवा भन्सार कार्यालयले उठायो १५ अर्ब राजश्व
काठमाडौं । रसुवा भन्सार कार्यालय टिमुरेले करीब १५ अर्ब राजश्व सार्वजनिक भएको छ । रसुवा भन्सार कार्यालयका प्रमुख भन्सार अधिकृत पुण्यविक्रम खड्काका अनुसार २०७२ साल मङ्सिरदेखि चालू आर्थिक वर्षको पुस मसान्तसम्म भ्याटसमेत गरी कूल १५ अर्ब १२ करोड ६७ लाख राजश्व आर्जन भएकोे छ । ६७ औँ विश्व भन्सार दिवस कार्यक्रम तयारीबारे प्रमुख भन्सार अधिकृत खड्काले समय सापेक्ष भन्सारको काममा सुधार गर्न सिसी क्यामरा जडान गरी चुहावट रोक्न प्रयास गरिएको, जाँचकीलाई दिनैपिच्छे फरक फरक सामान परीक्षणमा खटाइएको, सुरक्षा अङ्ग अहोरात्र परिचालन भएका कारण चोरी निकासी अन्त्य भएकाले राजश्वमा वृद्धि भएको जानकारी दिएका छन् । गत आर्थिक वर्षको साउनदेखि पुससम्मको तुलनामा चालु आर्थिक वर्ष २०७५/७६ को अवधिमा २५० प्रतिशतले वृद्धि भएको भन्सार कार्यालय टिमुरेले बताएको छ । भन्सार हातामा सामान परीक्षणका लागि ३० जाँचकी नियमित परिचालन भरहेका र परीक्षण गर्दा कुहिने चिजलाई पहिलो प्राथमिकता दिई हेरिने गरेको बताइएको छ । विसं २०७२ वैशाख १२ को भूकम्पको असरले सिन्धुपाल्चोकको तातोपानी नाका पूर्णरूपमा बन्द भएपछि २०७२ साल मङ्सिर १५ गतेदेखि रसुवागढी नाका पूर्णरूपमा सञ्चालन हुँदा मानवचाप बढ्न गई टिमुरे क्षेत्रका होटल, लज र पसल सञ्चालनमा आएपछि यहाँका बासिन्दाको जीवनस्तरमा सुधार आएको टिमुरे घट्टेखोलाका समाजसेवी सोनावाङ्दी तामाङले बताएको छ । भन्सार कार्यालयले भन्सार दिवसअन्तर्गत शनिबार मनाइने कार्यक्रमको सम्पूर्ण तयारी पूरा गरेको छ । कार्यक्रममा शनिबार बिहान रसुवाबाट नेपाल पस्ने पहिलो पर्यटकलाई स्वागत गरिने, रसुवागढीबाट पदयात्रा गर्दै टिमुरे आउने, राजश्व चुहावट रोक्न चेतना जगाउने, भन्सारका विद्यमान ऐननियम दिशाबोध गराउने जस्ता रहेको प्रमुख भन्सार अधिकृत खड्काले जानकारी दिएका छन् । रासस
केएल दुगड समूहको ज्ञान मेज स्टार्च बजारमा
काठमाडौँ । ज्ञान ब्राण्डका विभिन्न खाद्यपदार्थहरु ज्ञान मैदा, ज्ञान आँटा, ज्ञान भोग चक्की आटा, ज्ञान रहर, मसुर, चना दाल तथा ज्ञान बासमती, ज्ञानसोल्टी चामल उत्पादन गर्दै आएको केएल दुगड समूहले ज्ञान मेज स्टार्च (कन फ्लोर) बजारमा ल्याएको छ । ग्राहकका मौलिक पौष्टिक खाद्य पदार्थका आवश्यकताहरु पूर्ति गर्ने क्रममा उक्त समूहले ज्ञान मल्टीग्रेन्स आटा, ज्ञान मकैको च्याँख्ला तथा ज्ञान मकैको पिठो १ वर्ष अगाडि नै बजारमा ल्याएको थियो । बजारको मागलाई ध्यानमा राख्दै यस समूहले मेज स्टार्च ८०० ग्राम, ५०० ग्राम र १०० ग्राम प्याकमा ल्याएको हो । ज्ञान मेज स्टार्च विभिन्न खाद्यपदार्थहरुलाई स्वादिस्ट बनाउन प्रयोग गरिन्छ । खासगरी सुप, सस, जुस जस्ता पदार्थहरुलाई बाक्लो बनाउन, फ्राई खाद्यपदार्थहरु, बेकरी उत्पादनहरुलाई स्वादिस्ट बनाउन यसको प्रयोग गर्न सकिन्छ । के एल दूगड गु्रप उच्च गुणस्तरको उत्पादनहरु उच्चस्तरीय प्रविधिबाट निकै स्वच्छ वातावरणमा उत्पादन गर्न प्रतिबद्ध रहेको जनाइएको छ ।
२१ वर्षसम्म विमानस्थल सञ्चालनमा आएन, सरोकारवाला निकायको बेवास्था
लम्की । बन्द भएको २१ वर्षसम्म पनि टीकापुर विमानस्थल सञ्चालनमा आउन सकेको छैन । सशस्त्र द्धन्द्धका कारण विसं २०५४ देखि उडान बन्द भएको उक्त विमानस्थल सञ्चालनका लागि स्थानीयवासीले प्रयास गरे पनि सरोकारवाला निकायको बेवास्थाका कारण सञ्चालनमा आउन नसकेको हो । उक्त विमानस्थल पुनः सञ्चालनका लागि स्थानीयवासीले विगत सात वर्षदेखि विभिन्न राजनीतिक दलका शीर्षनेतासँग आग्रह गर्नाका साथै सम्बन्धित निकायको ध्यानाकर्षण गराउँदै आएका छन् । विसं २०४२ देखि सञ्चालन हुँदै आएको उक्त विमानस्थल सशस्त्र द्वन्द्वका कारण २०५४ सालदेखि बन्द भएको थियो । लामो समयसम्म विमानस्थल सञ्चालनमा नआएपछि २०६१ सालमा चार सय घरधुरी मुक्त कमैयाले त्यहाँ अतिक्रमण गरे । वर्षौदेखि बन्द रहेको विमानस्थल सञ्चालनका लागि स्थानीयवासीले पहल गरेकाले नगर विकास टीकापुर समितिले विमानस्थलमा बसेका मुक्तकमैयालाई अन्यत्र स्थानमा स्थानान्तरण गर्ने सहमतिमा विसं २०६९ मा ती मुक्तकमैयाले विमानस्थलको जग्गा छोडेका थिए । सरकारले बन्द रहेका २२ वटा विमानस्थल सञ्चालनमा ल्याउने जनाएकाले टीकापुरमा पनि सो विमानस्थल सञ्चालनका लागि स्थानीय बासिन्दाले सञ्चालन समिति गठन गरेर पहल शुरु गरेको पनि सात वर्ष बितिसक्यो । स्थानीयवासीको पहलमा अतिक्रमित जग्गा खाली गरेर विमानस्थल सञ्चालनका लागि तारबार र रनवे बनाउने कार्यसमेत गरियो । करीब दुई करोड रुपैयाँको लागतमा विमानस्थल सञ्चालनका लागि तारबारसहित ६०० मिटरमा रोडा बिछ्याएर धावन मार्गसमेत निमार्ण गरिएको छ । उक्त विमानस्थल अध्ययन, निमार्ण तथा सञ्चालन समितिका संयोजक टीकाराम जोशीले स्थानीय सञ्चालन समितिले आफ्नै पहलमा टीकापुरमा विमान सेवा सञ्चालनका लागि २०७१सालमा ‘टेस्ट फ्लाइट’लाई सम्म पारिएको बताए । उनले भने, ‘‘तारा एयरको ट्वीनअटर विमानबाट ‘टेस्ट फ्लाइट’ तयार भएपछि टीकापुर विमानस्थल पुनःनिर्माण तथा सञ्चालन समितिले यति एयरलाइन्ससित टीकापुरबाट १६ सिट टिकट बेच्ने सम्झौता गरी साताको एक दिन उडान भर्ने सम्झौता पनि गरिएको थियो तर जहाज आएन ।’’ जोशीले बताए ‘‘ विमानस्थल सञ्चालनका लागि टीकापुरमा विभिन्न पक्षबाट सहयोग भयो । यहाँ आउने मन्त्री तथा शीर्ष नेतालाई ज्ञापनपत्र, मागपत्रदेखि लिएर ध्यानाकर्षणसम्मको काम अहिलेसम्म पनि जारी छ । हामी अहिले पनि प्रयासरत छौं ।’’ सञ्चालन समिति सदस्य मातृका तिमिल्सिनाले भने, ‘‘बन्द अवस्थामा गौचरणमा परिणत भएको विमानस्थल सञ्चालनार्थ टीकापुरमा नागरिकस्तरबाट टीकापुर विमानस्थल अध्ययन निमार्ण तथा सञ्चालन समिति गठन भएकै कारण आज विमानस्थलको जग्गा सुरक्षित छ । सरकारले चाहेमा उडान शुरु गर्न गाहे पनि छैन ।’’ विमानस्थल पुनःनिर्माण गर्नका लागि टीकापुर नगरपालिका बोर्डको निर्णयका आधारमा मालपोत कार्यालयले २०७० सालमा चार महीना घरजग्गा खरीद बिक्रीमा एक प्रतिशत अतिरिक्त कर लगाउँदा ३५ लाख रुपैयाँ सङ्कलन भएको थियो तर विमानस्थल सञ्चालनमा नआउँदा सो रकम अझै सञ्चालन समितिको खातामा थन्किएको छ । संयोजक जोशीले विमानस्थल कालोपत्रेका लागि २०७३ मा सर्भेक्षण भएर २१ करोड रुपैयाँको बराबरको लागत अनुमान गरे पनि काम हुन नसकेको जानकारी दिए । उनले भने, “हरेक नेताले आश्वासन मात्रै दिए, निर्देशन दिएर काम कसैले गरेनन् । फेरि तीन महीनाअघि सर्भेक्षण भएको छ । ३१ करोड रुपैयाँको लागत अनुमान गरेर संस्कृति, पर्यटन तथा नागरिक उड्ययनमन्त्री रवीन्द्रप्रसाद अधिकारीलाई बुझाएका छौँं । “उहाँले आवश्यक बजेट उपलब्ध गराउने आश्वासन दिनुभएको छ । काम हुन्छ होला ।’’जोशीले भने, ‘‘मन्त्रीले टीकापुरबाट सुदूर र मध्यपश्चिममा हवाईसेवा सञ्चालन गरिने बताउनुभएको छ । कालोपत्रे भएमा टीकापुरबाट ४० देखि ४२ सिटसम्मको जहाज उडाउन सकिने भएकाले कालोपत्रेका लागि पहल जारी छ ।’’ टीकापुर विमानस्थल निमार्ण तथा सञ्चालनका लागि हरेक वर्ष यस क्षेत्रका जनप्रतिनिधि सहितको टोली राजधानी काठमाडौँमा गइरहेका छन्। ‘‘गतवर्ष पनि एक टोलीले प्रधानमन्त्रीको कार्यालय, शहरी विकास मन्त्रालय, पर्यटन मन्त्रालय, योजना आयोगमा विमानस्थल निमार्णका लागि पहल गर्न आग्रह गरेको थियो ।’’ टीकापुर विकास मञ्चका अध्यक्ष नवराज रावलले भने । विमानस्थल सञ्चालन हुनुपर्ने स्थानीयवासीको माग जारी छ । सुदूरपश्चिम प्रदेशका सांसद डा रणबहादुर रावलले भने, ‘‘टीकापुरबाट विमानस्थल सञ्चालन हुने सम्भावना छ प्रदेश सरकारले पनि यो सम्भावनालाई प्राथमिकता दिन आवश्यक छ ।’’ टीकापुरका आसपासका यात्रुले हवाई यातायातका लागि एक सय किलोमिटर भन्दाबढी दूरीमा रहेको नेपालगञ्ज या धनगढी जानुपर्ने बाध्यता छ । बजार क्षेत्रतर्फ एक हजार २५० मिटर लम्वाइ रहेको विमानस्थलका लागि आवश्यक परे थप तीन सय मिटर जग्गा सहजरूपमा उपलब्ध गराउन सकिने भएकाले टीकापुर विमानस्थल उपयुक्त रहेको स्थानीयवासीको भनाइ छ । रासस
