घोषणापत्रका प्रतिबद्धता कार्यान्वयन गर्ने समय आयो : रवि लामिछाने

काठमाडौं । सत्तारूढ दल राष्ट्रिय स्वतन्त्र पार्टी (रास्वपा) का सभापति एवं पूर्वउपप्रधानमन्त्री रवि लामिछानेले चुनावी घोषणापत्र र नारामा सीमित भएका प्रतिबद्धतालाई व्यवहारमा कार्यान्वयन गर्ने समय आएको बताएका छन् । उनले जनताले दिएको मतलाई जिम्मेवारीका रूपमा लिँदै मधेससहित देशभरका समस्या प्राथमिकताका आधारमा समाधान गर्न पार्टीले नीतिगत काम अघि बढाउने बताएका हुन् । सोमबार जनकपुरधाममा पार्टीका सांसद डा. अमरेशकुमार सिंहको मेची–महाकाली पदयात्राका लागि झण्डा हस्तान्तरण कार्यक्रममा बोल्दै लामिछानेले नयाँ कानुन निर्माण, विद्यमान कानुनको सुधार तथा नागरिकका हकअधिकार सुनिश्चित गर्ने कामलाई प्राथमिकता दिने बताए । उनले घोषणापत्रमा धेरै कुरा लेखिए पनि ती प्रतिबद्धतालाई व्यवहारमा उतार्नु मुख्य चुनौती रहेको उल्लेख गरे । लामिछानेले मधेस र सिङ्गो देशका समस्यालाई प्राथमिकताका आधारमा सम्बोधन गर्नुपर्ने बताउँदै त्यसका लागि नीतिगत सुधार आवश्यक रहेको बताए । पार्टीको काँधमा ठूलो जिम्मेवारी आएको उल्लेख गर्दै उनले काम गर्ने क्रममा कमजोरी भए सच्याएर अघि बढ्ने बताए । सभापति लामिछानेले भने, ‘राष्ट्रिय स्वतन्त्र पार्टीले मधेससहित सिङ्गो देशका समस्या पहिचान गरी आवश्यकता र प्राथमिकताका आधारमा नीतिगत सुधार गर्नेछ । नयाँ कानुन निर्माण, विद्यमान कानुनको परिमार्जन र नागरिकका हकअधिकार सुनिश्चित गर्नु हाम्रो प्रमुख जिम्मेवारी हो । घोषणापत्रका प्रतिबद्धतालाई व्यवहारमा उतार्ने यात्रा सुरु भइसकेको छ । चुनौती आए पनि सम्हालिँदै अघि बढ्छौँ ।’ उनले सङ्घीय शासन व्यवस्थाभित्र प्रदेश संरचनालाई कसरी प्रभावकारी बनाउने भन्ने विषयमा राष्ट्रिय बहस आवश्यक रहेको पनि बताए । प्रदेश संरचनालाई बलियो बनाउने विषयमा रास्वपाले विगतदेखि नै धारणा राख्दै आए पनि त्यसबापत विभिन्न आक्षेप खेप्नुपरेको उनको भनाइ छ । उनले प्रदेश सरकारहरूलाई प्रभावकारी रूपमा सञ्चालन गर्ने, प्रदेशको भूमिका थप स्पष्ट बनाउने र स्थानीय तहलाई नागरिकका आवश्यकताअनुसार अधिकारसम्पन्न बनाउने विषयमा छलफल अघि बढाइने बताए । प्रदेश संरचनाको सुधार र पुनरावलोकनको विषय उठाउँदा अनावश्यक रूपमा तर्सिने वा त्यसको गलत अर्थ लगाउने प्रवृत्ति रहेको भन्दै उनले यस्ता बहसबाट पछि हट्न नहुने बताए । लामिछानेले रास्वपाले यस विषयमा छिट्टै राष्ट्रिय बहस सुरु गर्ने र अन्य राजनीतिक दल तथा शक्तिहरूसँग सहकार्य गर्दै सहमतिका आधारमा अघि बढ्ने पनि बताए । सभापति लामिछानेले भने, ‘अब प्रदेश संरचनालाई कसरी मजबुत बनाउने, त्यसलाई जनताको जीविकासँग कसरी जोड्ने र स्थानीय तहलाई थप अधिकारसम्पन्न कसरी बनाउने भन्ने विषयमा राष्ट्रिय बहस आवश्यक छ । प्रदेश सरकारहरूलाई स्थिर र प्रभावकारी बनाउँदै सङ्घीय संरचनामा आवश्यक सुधार गर्नुपर्छ । यी विषयमा हुने बहसलाई गलत अर्थमा बुझ्नु हुँदैन । रास्वपाले सबै राजनीतिक दल र शक्तिसँग संवाद तथा सहकार्य गर्दै सहमतिका आधारमा यो बहस चाँडै अघि बढाउनेछ ।’ उनले जनताले रास्वपालाई दिएको मतलाई निर्विकल्प जिम्मेवारीका रूपमा व्याख्या गर्दै आवश्यकता र प्राथमिकता पहिचान गरेर काम गर्ने प्रतिबद्धता व्यक्त गरे । 

एकै दिन विपद्का २४ घटना, तीन जनाको मृत्यु, सात घाइते

काठमाडौं । पछिल्लो २४ घण्टामा देशभर २४ वटा विभिन्न विपद्का घटना हुँदा तीन जनाको मृत्यु भएको छ भने सात जना घाइते भएका छन् ।  राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार आगलागी, सर्पदंश, लेक लाग्ने, पहिरो र जनावरको आक्रमणका घटनामा ३ जनाको मृत्यु भएको हो ।   उक्त अवधिमा सबैभन्दा धेरै आगलागीका १६ घटना भएका छन्।  आगलागीमा एक जनाको मृत्यु र चार जना घाइते भएका छन् । त्यस्तै, सर्पदंशका तीन घटनामा तीन जना घाइते भएका छन् । यसैगरी जनावरको आक्रमणका तीन घटनामा एक जनाको मृत्यु भएको छ भने लेक लाग्ने एक घटनामा एक जनाको मृत्यु भएको छ। पहिरोको एक घटना पनि अभिलेख गरिएको छ । विपद्का घटनामा अनुमानित २८ लाख ३६ हजार रुपैयाँ बराबरको क्षति भएको प्राधिकरणले जनाएको छ। घटनाको व्यवस्थापन तथा उद्धारका लागि १२३ जना प्रहरी परिचालन गरिएको प्राधिकरणले जनाएको छ । 

जनताको कुरा सुन्न दुईमहिने मेची-महाकाली पदयात्रामा अमरेशकुमार सिंह

काठमाडौं । राष्ट्रिय स्वतन्त्र पार्टी (रास्वपा) का सांसद डा. अमरेशकुमार सिंह जनताका समस्या र गुनासा सुन्न दुईमहिने मेची–महाकाली पदयात्राका लागि मेची प्रस्थान गरेका छन् । जात, धर्म, वर्ग र भूगोलका नाममा हुने विभाजन अन्त्य गर्दै राष्ट्रिय एकता मजबुत बनाउने तथा जनताका वास्तविक समस्या बुझ्ने उद्देश्यले पदयात्रा गर्न लागेको उनले बताएका छन् । सोमबार जनकपुरधाममा आयोजित कार्यक्रममा सिंहले मंगलबार बिहान मेची नदीको किनारबाट सुरु हुने पदयात्रा आगामी माघ १ गते मकर सङ्क्रान्तिका दिन महाकाली नदीको किनारमा पुगेर समापन हुने जानकारी दिए । उनले पदयात्रालाई देश र समाज जोड्ने अभियानका रूपमा व्याख्या गरे । जात, धर्म, पहाड–मधेस तथा वर्ग र समुदायका नाममा समाजमा द्वन्द्व हुन नहुने भन्दै सबै नेपालीलाई एकताको सूत्रमा बाँध्नुपर्ने उनको भनाइ छ । सिंहले पदयात्राको अर्को मुख्य उद्देश्य जनताका कुरा सुन्नु रहेको बताए । अहिलेसम्म नेताहरूले जनतालाई आफ्ना कुरा सुनाउने गरेको उल्लेख गर्दै उनले यसपटक जनताकै घरदैलोमा पुगेर उनीहरूका समस्या र अपेक्षा बुझ्ने बताए ।