युद्धविरामको अवधिमा ‘स्ट्रे अफ हर्मुज’ पूर्ण रूपमा खुला रहने
काठमाडौं । युद्धविरामको अवधिभर स्ट्रेट अफ होर्मुज पूर्णरूपमा खुला रहने भएको छ। इरानको विदेश मन्त्रालयले युद्धविरामको अवधिभर पूर्ण रुपमा होर्मुज सञ्चालन हुने घोषणा गरेको हो । इरानले युद्धविरामको अधवधिर होर्मुजमा कुनै अवरोध नहुने प्रष्ट पारेको अन्तर्राष्ट्रिय सञ्चारमाध्यमहरूले जनाएका छन् । अमेरिका र इरानबीच १५ दिने युद्धविराम जारी छ । युद्धविराम अप्रिल ८ देखि औपचारिक रूपमा सुरु भएको हो। पाकिस्तानको सक्रिय मध्यस्थतामा सम्भव भएको यो युद्धविरामको मुख्य उद्देश्य दुई देशबीच बढ्दो सैन्य तनावलाई कम गरी वार्ताको वातावरण सिर्जना गर्नु थियो । तर, अप्रिलको दोस्रो साता इस्लामावादमा भएको उच्चस्तरीय शान्ति वार्तामा कुनै ठोस सहमति जुट्न सकेन । इरानले आफ्नो परमाणु नीति र रणनीतिक महत्त्वको ‘स्ट्रेट अफ हर्मुज’ माथिको आफ्नो अडान नछोडेपछि वार्ता विना निष्कर्ष टुंगिएको हो । दुई मुलुकबीच दोस्रो तहमा वार्ता भइरहेको अन्तर्राष्ट्रिय सञ्चारमाध्यहरूले जनाएका छन् । यही सप्ताहान्तभित्र परिणामुखी वार्ता हुने अमेरिकी राष्ट्रपति डाेनाल्ड ट्रम्पले दावी गरेका छन् ।
कांग्रेसको आधिकारिकता विवादमा सकियो जवाफी बहस, केहीबेरमै आदेश आउने
काठमाडौं । नेपाली कांग्रेसको आधिकारिकता विवादसम्बन्धी रिटमा जवाफी बहस सकिएको छ । सर्वोच्च अदालतका न्यायाधीशद्वय शारंगा सुवेदी र नृपध्वज निरौलाको संयुक्त इजलासबाट अब केही छिनमै आदेशको तयारी भएको अदालत स्रोतले बताएको छ । गत पुसको अन्तिम साता काठमाडौंको भृकुटीमण्डपमा सम्पन्न विशेष महाधिवेशनबाट बनेको नेपाली कांग्रेसको नयाँ कार्यसमितिको वैधानिकता सम्बन्धी विवाद सर्वोच्च अदालत पुगेको हो । उक्त विशेष महाधिवेशनले १४ औं महाधिवेशनबाट निर्वाचित शेरबहादुर देउवा नेतृत्वको कार्यसमिति भंग गर्दै गगन थापा नेतृत्वमा नयाँ कार्यसमिति चयन गरेको थियो । विशेष महाधिवेशनबाट बनेको उक्त कार्यसमितिलाई निर्वाचन आयोगले वैधानिकता प्रदान गरेपछि विवाद चर्किएको हो । निर्वाचन आयोगको निर्णयविरुद्ध तत्कालीन सभापति शेरबहादुर देउवा र तत्कालीन कार्यवाहक सभापति पूर्णबहादुर खड्कासहितको पक्ष सर्वोच्च अदालत पुगेको थियो ।
‘नागरिक हिँड्ने फुटपाथमा प्रहरीको सवारीसाधन पार्किङ नगर्नू’
काठमाडौं । नेपाल प्रहरीले आफ्नो मातहतका प्रहरीलाई फुटपाथमा सवारीसाधन पार्किङ नगर्न निर्देशन दिएको छ । प्रहरीले सवारीसाधन पार्किङ गर्दा सर्वसाधारणको आवागमनमा अवरोध हुने प्रहरीले उल्लेख गरेको छ । ‘कानुन कार्यान्वयन गर्ने निकायका सदस्यहरूको सडक अनुशासन विपरीतका कार्यले सर्वसाधारण नागरिकको आवागमनमा बाधा पुग्नुका साथै प्रचलित नियम कानुनको समेत उल्लङ्घन हुने गर्दछ,’ प्रहरीले भनेको छ, ‘कानुनको पालना गर्ने र गराउने गहन जिम्मेवारी बोकेको संस्थाका सदस्यहरूले सवारी साधन प्रयोगमा उच्च अनुशासन कायम गर्नु आवश्यक छ ।’ प्रहरी एकाइ तथा प्रहरी कर्मचारीहरूलाई सरकारी प्रयोजनको होस् वा आफ्नो निजी होस्, सवारीसाधन चलाउँदा र सवारीसाधन पार्किङ गर्दा ट्राफिक नियमहरूको पूर्ण रुपमा पालना गर्न प्रहरीले अनुरोध गरेको छ । सामाजिक सञ्जालमा नेपाल प्रहरीको सवारी साधन फुटपाथमा पार्क गरिएको तस्बिर सम्प्रेषण भएको सम्बन्धमा नेपाल प्रहरीले आपत्ति जनाएको छ ।
आज पनि सकेन कांग्रेसले संसदीय दलको नेता चयन गर्न
काठमाडौं । नेपाली कांग्रेसले संसदीय दलको नेता चयन प्रक्रिया औपचारिक रूपमा सुरु भएको छ । सिंहदरबारस्थित संसदीय दलको कार्यालयमा शुक्रबार बसेको बैठकमा नेतृत्व चयनबारे प्रारम्भिक छलफल भएको निर्वाचन समितिका संयोजक तथा सहमहामन्त्री प्रकाश स्नेही रसाइलीले जानकारी दिए । दलको नेताका लागि अर्जुननरसिंह केसी र भीष्मराज आङ्देम्बे प्रमुख दाबेदारका रूपमा देखिएका छन् । साथै मोहन आचार्यदेखि निस्कल राईसम्मका नेताहरूको नाम पनि चर्चामा रहेको छ । ‘सम्भवतः भोलि सहमतिका साथ दलको नेता चयन हुन्छ,’ सोलुखुम्बुका सांसद प्रकाशसिंह कार्कीले भने । उनका अनुसार स्पष्ट मापदण्डसहित भोलि कांग्रेसले दलको नेता पाउनेछ । प्रतिनिधि सभामा कांग्रेसका ३८ सांसद रहेका छन् । पार्टीले सकेसम्म सर्वसम्मत रूपमा दलको नेता चयन गर्ने प्रयास गरिरहेको कार्कीले जानकारी दिए । सहमति जुट्न नसके निर्वाचन प्रक्रियामार्फत टुंगो लगाइने कार्कीले जानकारी दिए । सहमहामन्त्री रसाइलीका अनुसार सहमतिको प्रयासलाई निरन्तरता दिँदै भोलि पुनः दाबेदारहरूसँग छलफल गरिनेछ । उनले भने, ‘नेता चयन प्रक्रिया सुरु भइसकेको छ, तर आज टुंगो लागेन । भोलि फेरि छलफल गरेर सहमति खोज्ने प्रयास गर्छौं ।
नेप्से सर्किट ब्रेकरमा नयाँ नियमः ५ प्रतिशतमा १५ मिनेट स्थगित, ८ प्रतिशतमा बन्द
काठमाडौं । नेपाल स्टक एक्सचेन्ज (नेप्से) ले मूल विनियमावलीको विनियम १७ मा संशोधन गर्दै नेप्से परिसूचकको उतारचढावमा आधारित सर्किट ब्रेकर प्रणाली परिवर्तन गरेको छ । संशोधित व्यवस्था अनुसार निरन्तर कारोबार सुरु हुँदा कायम रहेको नेप्से परिसूचक दुई घण्टाभित्र ५ प्रतिशतले घटे वा बढेमा १५ मिनेटका लागि कारोबार रोक्का गरिनेछ । त्यसैगरी, कारोबार सुरु भएको कुनै पनि समयमा नेप्से परिसूचक ८ प्रतिशतले घटे वा बढेमा सो दिनका लागि सम्पूर्ण कारोबार बन्द गरिने व्यवस्था गरिएको छ । यसैगरी, कुनै संगठित संस्थाको प्रारम्भिक कारोबार सत्रमा कायम भएको धितोपत्र मूल्यमा सोही दिन १५ प्रतिशतभन्दा बढी घटबढ हुने गरी कारोबार गर्न नपाइने प्रावधान पनि संशोधित विनियमावलीमा समावेश गरिएको छ ।
दिउँसै असुरक्षित काठमाडौं ? ५४ प्रतिशत अपराध दिउँसोको ६ घण्टाभित्रै
काठमाडौं । प्रहरीले काठमाडौंका विभिन्न ठाउँमा भएका आपराधिक क्रियाकलापको समयको विश्लेषण गरेको छ । चोरी तथा अन्य आपराधिक घटना मध्यान्ह १२ बजेदेखि ६ बजेसम्म ५४ दशमलव ८ प्रतिशत हुने गरेको प्रहरीको अनुसन्धानबाट खुलेको छ । सबैभन्दा बढी आपराधिक क्रियाकलाप मध्यान्ह १२ बजेदेखि ६ बजेसम्म हुने गरेको पाइएको हो । त्यसैगरी, ६ बजेदेखि रातको १२ बजेसम्म २१ प्रतिशत आपराधिक क्रियाकलाप हुने गरेको प्रहरीको विश्लेषणबाट खुलेको काठमाडौं जिल्ला प्रहरी परिसरका प्रवक्ता पवन कुमार भट्टराईले जानकारी दिए । उनका अनुसार बिहानको ६ बजेदेखि मध्यान्ह १२ बजेसम्म १८.८ प्रतिशत आपराधिक क्रियाकलाप हुने गरेको छ । सबैभन्दा कम आपराधिक क्रियाकलाप रातको १२ बजेदेखि बिहान ६ बजेसम्म ५ दशमलव ५ प्रतिशत आपराधिक क्रियाकलाप हुने गरेको प्रहरीको अनुसन्धानबाट खुलेको छ । त्यसैगरी, काठमाडौं प्रहरीले विभिन्न आपराधिक समूहमा सक्रिय युवाहरूको सूची तयार पारेको जानकारी दिएको छ । गुण्डागर्दी भए या आपराधिक पृष्ठभूमिका युवाहरूले त्रास देखाए सूचना उपलब्ध गराउन पनि प्रहरीले आग्रह गरेको छ । प्रहरीले पछिल्लो समय सामाजिक सञ्जालमार्फत आफ्नो समूह देखाउन भिडियो पोस्ट गर्ने, अनावश्यक तडकभडक गरेर नागरिकको मनोविज्ञान त्रास पार्नेहरूको सूची तयार पारेको छ । सूचीमा पर्नेहरूमा अधिकांश गुण्डागर्दी समूहका युवाहरू रहेको प्रहरीले जानकारी दिएको छ ।
सोमबारदेखि सूचीकृत कम्पनीको सेयर मूल्य १५ प्रतिशतसम्म घटबढ हुने
काठमाडौं । नेपाल स्टक एक्सचेन्ज लिमिटेड (नेप्से) ले धितोपत्र कारोबार सञ्चालन (चौथो संशोधन) विनियमावली, २०८२ आगामी सोमबार (वैशाख ७ गते) देखि लागू गर्ने निर्णय गरेको छ। नेप्सेका वरिष्ठ अधिकृत सन्तोष आचार्यले वैशाख ३ गते बसेको सञ्चालक समितिको बैठकले उक्त विनियमावली कार्यान्वयन गर्ने निर्णय गरेको बताए । संशोधित व्यवस्थाअनुसार अब सूचीकृत कम्पनीहरूको सेयर मूल्य उतारचढावको दैनिक सीमा (प्राइस लिमिट) १० प्रतिशतबाट बढाएर १५ प्रतिशत पुर्याइएको छ । यसको अर्थ अब कुनै पनि सूचीकृत कम्पनीको सेयर मूल्य एकै दिनमा अधिकतम १५ प्रतिशतसम्म बढ्न वा घट्न सक्नेछ । साथै, संशोधित विनियमावलीको विनियम ७ को उपविनियम ५ र ६ मा उल्लेखित व्यवस्थाहरूलाई यथाशीघ्र कार्यान्वयन गर्न कारोबार सदस्यहरूलाई आवश्यक निर्देशन दिइएको नेप्सेका ले जानकारी दिएका छन् ।
यस्तो छ सहिद दशरथ चन्द स्वास्थ्य विज्ञान विश्वविद्यालयको १०० दिनको प्रगति विवरण
काठमाडौं । कैलालीको धनगढी गेटास्थित सहिद दशरथ चन्द स्वास्थ्य विज्ञान विश्वविद्यालयले सय दिनको प्रगति विवरण सार्वजनिक गरेको छ । जसमा सबैभन्दा पहिलो प्रमुख उपलब्धी विश्वविद्यालयको उपकुलपति र रजिष्टार नियुक्तिलाई राखिएको छ । यस विश्वविद्यालयको उपकुलपति प्रा.डा. सुनिलकुमार जोशी र रजिष्ट्रार डा. खेमराज जोशीलाई नियुक्त गरी विश्वविद्यालयको प्रशासनिक संरचना व्यवस्थित बनाउने काम अघि बढाइएको जनाएको छ । यस्तै, पूर्वाधार तथा प्राविधिक विकासतर्फ विश्वविद्यालयको आधिकारिक वेबसाइट निर्माण गरिएको, परिसर सरसफाइ तथा व्यवस्थापन, केन्द्रीय प्रशासनिक भवन र आवास व्यवस्थापनमा सुधार गरिएको उल्लेख छ भने शैक्षिक कार्यक्रम सञ्चालन अन्तर्गत पाठ्यक्रम निर्माण कार्य तीव्र बनाइएको छ । एमबीबीएस, बीडीएस, बीएससी नर्सिङ, बीपीटी, बी फार्मेसी, बीपीएच र बी अप्टोमेट्री लगायत कार्यक्रम सञ्चालनको तयारी गरिएको छ । आगामी शैक्षिक सत्रदेखि एमबीबीएस ५० सिट, नर्सिङ ३०, बीएससी एमएलटी २० सिट र बी अप्टोमेट्री २० सिट सञ्चालन गर्ने लक्ष्य राखिएको छ । यसका लागि चिकित्सा शिक्षा आयोगमा सेल्फ–एप्रेजल फारम समेत पेश गरिएको छ । यस्तै, नीतिगत तथा संस्थागत विकासअन्तर्गत शिक्षक तथा कर्मचारी नियमावली, आर्थिक कार्यविधि तथा वित्तीय उत्तरदायित्व सम्बन्धी नियमावली लगायत विभिन्न मस्यौदा तयार पारिएको छ । खरिद, अनुसन्धान केन्द्र, विषय समिति तथा संगठन संरचनासम्बन्धी नियमावली निर्माण प्रक्रियामा रहेका छन् । मानव संसाधन व्यवस्थापनतर्फ ७७ जना प्राध्यापक, सहप्राध्यापक तथा उपप्राध्यापक पदका लागि विज्ञापन प्रकाशित गरिएको छ भने करार शिक्षक छनोट कार्यविधि पनि तयार गरिएको उल्लेख छ । वित्तीय व्यवस्थापनतर्फ चालु आर्थिक वर्षका लागि ४९ करोड १३ लाख बजेट विनियोजन भएको छ भने आगामी वर्षका लागि २ अर्ब ५३ करोडको प्रस्तावित बजेट तयार गरिएको छ । साथै विभिन्न स्रोतबाट आय सुनिश्चित गर्ने पहल भइरहेको विश्वविद्यालयले जनाएको छ ।
