श्री एयरलाइन्सले बंगलादेश र भारतमा उडान भर्ने
काठमाडौं । श्री एयरलाइन्सले अन्तर्राष्ट्रिय उडान गर्ने भएको छ । नेपाल नागरिक उडड्यन प्राधिकरणले उक्त विमानलाई अन्तर्राष्ट्रिय उडान गर्न अनुमति दिएको हो । श्री एयरलाइन्सले भारत र बंगलादेशमा उडान गर्न अनुमति पाएको हो । भारतको डिल्ली र कलकताको लागि उडान अनुमति पाएको नागरिक उड्यन प्राधिकरणले जनाएकाे छ । क्यानका अनुसार एयलाइन्सले गत शुक्रबार अन्तर्राष्ट्रिय उडान भर्ने अनुमति पाएको हो । त्यसैगरी बंगलादेशको ढाकामा उडान अनुमति पाएको हो । भारत सरकार र बंगलादेशले उडान अनुमति दिएपछि विमानले आफ्नो उडान तालिका सार्वजनिक गर्ने प्राधिकरणका सूचना अधिकारी ज्ञानेन्द्र भुलले बताए । नेपालमा रहेका चार एयरलाइन्स कम्पनीले अन्तर्राष्ट्रिय उडानको अनुमति पाएका छन् । नेपाल वायुसेवा निगम, हिमालयन एयरलाइन्स, बुद्ध एयरलाइन्स र श्री एयरलाइन्सले उडान भर्ने छन् । आन्तरिक उडान भर्ने एयरलाइन्समा बुद्ध एयरले यसअघि अन्तर्राष्ट्रिय उडानको अनुमति पाएको छ । बुद्ध एयरलाइन्सले भारतको वणारस र पटनामा उडान भर्न अनुमति पाइसकेको छ ।
मन्त्रिपरिषद् बैठक जारी, निर्णय सार्वजनिक गर्ने जिम्मा सामान्य प्रशासन मन्त्रीलाई
काठमाडौं । प्रधानमन्त्री तथा मन्त्रिपरिषद्को कार्यालयमा मंगलबार मन्त्रिपरिषद्को बैठक जारी रहेको छ । उक्त बैठकका निर्णयहरू सार्वजनिक गर्ने जिम्मेवारी भने आजका लागि सरकारका नियमित प्रवक्ताभन्दा फरक मन्त्रीलाई दिइएको छ । सरकारका प्रवक्ता शिक्षा मन्त्री सस्मीत पोखरेल व्यस्त रहेकाले आजको बैठकका निर्णयहरू संघीय मामिला तथा सामान्य प्रशासन तथा भूमि व्यवस्था, सहकारी तथा गरिबी निवारण मन्त्री प्रतिभा रावलले सार्वजनिक गर्ने कार्यक्रम तय गरिएको जनाइएको छ ।
विश्व बैंकको सहयोगमा निर्माणाधीन सडकमा ४३ प्रतिशत प्रगति
दमौली । विश्व बैंकको सहयोगमा स्तरोन्नति सुरु भएको व्यास नगरपालिकास्थित चार वडा जोड्ने सडकको काम ४३ प्रतिशत सकिएको छ । विसं २०८१ जेठदेखि सुरु भएको उक्त सडकमा हालसम्म ४३ प्रतिशत भौतिक प्रगति भएको व्यास नगरपालिकाले जनाएको छ । विश्व बैंकको सहयोगमा सहरी शासकीय तथा पूर्वाधार विकास आयोजनाअन्तर्गत व्यास नगरपालिका–७, ९, १० र ११ जोड्ने पराशर मार्ग स्तरोन्नतिको काम भइरहेको प्रमुख प्रशासकीय अधिकृत सुकदेव लम्सालले जानकारी दिए । व्यास नगरपालिकाको वडा नं ७, ९, १० र ११ लाई जोड्ने पराशर मार्गअन्तर्गत बुल्दीखोला–बेलटारी–फराकचौर–अधेरीभञ्ज्याङ–कुमालगाउँ–समता स्कुल–कलेस्ती सडक कालोपत्र गरिनेछ । उक्त खण्डमा १०।५५ किलोमिटर दूरी कालोपत्र हुने प्रमुख प्रशासकीय अधिकृत लम्सालले बताए । उक्त सडक स्तरोन्नतिका लागि २०८१ साल वैशाख १६ गते निर्माण कम्पनीसँग सम्झौता भएको थियो । सडक स्तरोन्नतिका लागि ४० करोड ८३ लाख ३५ हजार ९२१ रुपैयाँमा निर्माण कम्पनी बिकेएचटिडिसीएल एसिपीएल जेभी कालीमाटीसँग सम्झौता भएको थियो । सडक स्तरोन्नतिका लागि गत विसं २०८० पुस २६ गते ५२ करोड ७८ लाख ३० हजार ४२७ रुपैयाँको ठेक्का आह्वान भएको थियो । त्यसमध्ये नौवटा फर्मले बोलपत्र दर्ता गराएकामा २३.४१ प्रतिशत घटी बोलपत्र दर्ता गराउने फर्मको बोलपत्र स्वीकृत भएको थियो । विसं २०८२ असारसम्म यसको म्याद रहेकामा काम नसकिएपछि २०८३ असारसम्म म्याद थप भएको छ । दश दशमलव ५५ किलोमिटर उक्त सडकखण्डमा कालोपत्र, नाला तथा अन्य संरचना निर्माण गरिनेछ । उक्त सडकले व्यास नगरपालिका–११ स्थित बुल्दीखोला, बेल्टारी, फराकचौर, व्यास नगरपालिका–१० अधेरीभञ्ज्याङ, पोख्रेलफाँट, व्यास नगरपालिका–९ कुमालगाउँ, व्यास नगरपालिका–७ समता स्कुल, कलेस्तीलगायतका ठाउँ जोड्छ । रासस
अन्ततः पक्राउ परे गतिशील सहकारीका पूर्वअध्यक्ष पाठक, अन्य सञ्चालकलाई पनि खोज्दै
काठमाडौं । प्रहरीले ललितपुरको लगनखेलमा रहेको गतिशील सहकारीका पूर्वअध्यक्ष बलराम पाठकलाई पक्राउ गरेको छ । जिल्ला प्रहरी परिसर ललितपुरका अनुसार उनलाई इमाडोलबाट पक्राउ गरिएको यो सहकारीले बचतकर्ताको रकम अपचलन गरेको आरोप छ । यो विषयमा परिसर ललितपुरले अनुसन्धान अघि बढाएको छ । सहकारीका बचतकर्ताले बचत फिर्ता नपाएको भन्दै लामो समयदेखि आन्दोलन र विरोध पनि गर्दै आएका थिए । विकासन्युज डटकमले यस सहकारीसँग सम्बन्धित धेरै समाचार सम्प्रेषण गरेको थियो । सहकारी डुबाउन उनले मुख्य भूमिका खेलेको भन्दै बचकर्ताहरु विरोध गर्दै आएका छन् । सहकारीको रकम अपचलनको आरोप लागेपछि सरकारले पाठकलाई राष्ट्रिय वाणिज्य बैंकको अध्यक्षबाट पनि हटाएको थियो । प्रहरीले सो सहकारीका अन्य सञ्चालकलाई पनि खोजिरहेको बताएको छ । उनीहरू अहिले फरार छन् । यस सहकारीका अध्यक्ष विकास थापा हुन् । सम्बन्धित समाचार : सहकारी डुबाएर सरकारी बैंकको अध्यक्ष, स्वामित्व बिनै नेतृत्वको लाभ गतिशील सहकारीलाई संकटग्रस्त घोषणा गर्न माग, बचतकर्ताले एक वर्षदेखि पाएनन् पैसा गतिशील सहकारीले बचतकर्ताको ५ हजार पनि फिर्ता गर्न सकेन, ८६ रोपनी जग्गा बेच्दै
चितवनको मंगलपुरमा कजारिया टायल्सको नयाँ शोरुम सञ्चालन
काठमाडौं । कजारिया रमेश टायल्स लिमिटेडले चितवनको मंगलपुरमा नयाँ शोरुम सञ्चालनमा ल्याएको छ । अथर्व इन्टरप्राइजेजद्वारा सञ्चालित उक्त शोरुम वैशाख ७ गते औपचारिक रूपमा उद्घाटन गरिएको हो । उद्घाटन समारोहमा कजारिया रमेश टायल्स लिमिटेडका निर्देशक हिमांशु अग्रवालको उपस्थिति रहेको थियो । उनले प्रमुख क्षेत्रीय बजारहरूमा आफ्नो पहुँच विस्तार गर्ने कम्पनीको दीर्घकालीन रणनीति अझ सुदृढ भएको बताए । नयाँ शोरुम सञ्चालनमा आएसँगै चितवन तथा आसपासका ग्राहकहरूले कजारियाका प्रिमियम टायल उत्पादनहरू अझ सहज रूपमा प्राप्त गर्न सक्ने कम्पनीले जनाएको छ । यसलाई स्थानीय निर्माण तथा आवास क्षेत्रमा गुणस्तरीय सामग्रीको पहुँच विस्तार गर्ने महत्वपूर्ण कदमका रूपमा लिइएको छ । सो अवसरमा निर्देशक अग्रवालले भने, 'अथर्व इन्टरप्राइजेजसँगको सहकार्यमा चितवनमा उपस्थिति विस्तार गर्न पाउँदा हामी खुसी छौं । यहाँ पूर्वाधार र आवास निर्माणको माग बढ्दै गएकाले उच्च गुणस्तरका डिजाइन–केन्द्रित टायल समाधानको ठूलो सम्भावना देखिरहेका छौं ।' कजारिया रमेश टायल्सले नेपालभर आफ्नो सञ्जाल विस्तार गर्दै टायल उद्योगमा विश्वासिलो ब्रान्डका रूपमा स्थान सुदृढ गरिरहेको जनाएको छ । कम्पनीले नवीनता, गुणस्तर र आकर्षक डिजाइनमार्फत ग्राहकलाई सेवा प्रदान गर्दै आएको छ ।
नेप्से १७ अंकले घट्यो, ३ कम्पनीमा सकारात्मक सर्किट
काठमाडौं । मंगलबार सेयर बजार सामान्य अंकले घटेको छ । नेपाल स्टक एक्सचेन्ज (नेप्से) परिसूचक १७ अंकले घटेर २८०७ बिन्दुमा झरेको हो । नेप्सेका अनुसार ४८ कम्पनीको सेयर मूल्य बढ्दा २१५ कम्पनीको सेयर मूल्य घटेको छ । ६ कम्पनीको मूल्यमा भने कुनै परिवर्तन आएको छैन । मंगलबार ३४७ कम्पनीको १ करोड कित्ता सेयर किनबेच हुँदा ५ अर्ब ७७ करोड रुपैयाँ बराबरको कारोबार भएको छ । जसमध्ये सबैभन्दा धेरै कारोबार सोलु हाइड्रोपावरको भएको छ । सोलुको ३७ करोड रुपैयाँ बराबरको कारोबार भएको छ । साथै रिलाइन्स स्पिीनिङको ३० करोड, नेसनल हाइड्रोको २३ करोड, होटल फोरेस्टको २२ करोड र एसवाई प्यानलको १८ करोड रुपैयाँ बराबरको कारोबार भएको छ । मंगलबारको कारोबारमा ३ कम्पनीको सेयर मूल्यमा सकारात्मक सर्किट लागेको छ । सूर्यकुन्ड हाइड्रो र पाल्पा सिमेन्टको सेयर मूल्य १५ प्रतिशतले बढेका छन् । शिखर पावरको सेयर मूल्य १४.९९ प्रतिशतले बढेका छन् । आज १३ समूहको उपसमूहमध्ये एउटाको सूचक बढेको छ । होटल एन्ड टुरिजमको सेयर मूल्य १.१६ प्रतिशतले बढेकाे छ ।
गृहमन्त्री सुधन गुरुङको राजीनामा पत्र तयार, रविसँग निर्णायक भेट
काठमाडौं । गृहमन्त्री सुधन गुरुङले राजीनामा दिने तयारी गरेका छन् । गृहमन्त्रालय स्रोतका अनुसार उनले प्रधानमन्त्री बालेन्द्र शाह (बालेन) समक्ष राजीनामा बुझाउने तयारी गरेका हुन् । राष्ट्रिय स्वतन्त्र पार्टी (रास्वपा)का अधिकांश सांसदले पार्टी नेतृत्वमार्फत राजीनामाका लागि दबाब बढाएपछि गुरुङले पद त्याग्ने निर्णयतर्फ अग्रसर भएको स्रोतको दाबी छ । ‘राजीनामा पत्र तयार भइसकेको छ। आजै प्रधानमन्त्री शाह र रास्वपा सभापति रवि लामिछानेसँग भेट गरेर अन्तिम निर्णय हुनेछ,’ स्रोतले भन्यो । यसैबीच, गृहमन्त्री गुरुङ सभापति लामिछानेलाई भेट्न बुढानिलकण्ठ पुगेका छन् । लामिछानेको सुझाव र निर्देशनअनुसार नै उनले आगामी कदम चाल्ने बुझिएको छ । उनी विवादित व्यवसायी दीपक भट्ट र शंकर ग्रुपसँग व्यावसायिक साझेदारी रहेको आरोपका कारण आलोचनामा परिरहेका छन् ।
पहाडकी रानी बन्दीपुर गाउँ पर्यटनको आकर्षक गन्तव्य
गण्डकी । प्राचीन समयमा व्यापारिक नाकाका रुपमा पहिचान बनाएको बन्दीपुर अहिले भने पर्यटकीय गन्तव्यका रुपमा विकास भएको छ । बन्दीपुर विगतमा मोटरबाटोको सुविधा नहुँदा पश्चिम पहाडका तनहुँ, कास्की, लमजुङ, गोरखा र मनाङबाट सामान ल्याएर बिक्री गर्ने प्रमुख व्यापारिक नाकाका रुपमा स्थापित थियो । तनहुँको सदरमुकामसमेत रहेको यहाँबाट २०२५ सालमा सदरमुकाम दमौली सारिएसँगै यसले व्यापारिक नाकाको पहिचान बदलेर पर्यटकीय गन्तव्यका रुपमा परिणत भएको हो । यहाँको सांस्कृतिक सम्पदा एवं प्राकृतिक मनोरमताले पर्यटकीय महत्त्वलाई झनै बढाएको छ । बन्दीपुरको भूदृश्यले तत्कालीन राजा महेन्द्रलाई पनि आकर्षित गरेको थियो । उनले त्यस समयमा नै बन्दीपुरलाई पहाडकी रानी उपमा दिएका थिए । बन्दीपुरमा रहेका प्राचीन शैलीका घर तथा बस्तीसँगै वरपरका रमणीय दृश्य, खड्गदेवी माई, टुँडिखेल आदिले यहाँको आकर्षण बढाएको छ । मस्र्याङ्दी नदी तरेर बन्दीपुर जाने उकालो बाटोको चर्चा गर्दै मबिबि शाहको लेखन र तारादेवीद्वारा गाइएको 'बन्दीपुरे उकाली लामो, मस्र्याङ्दी डुङ्गाले तरेर...' गीत अहिले पनि गुनगुनाउने गरिन्छ । बन्दीपुरको महिमा र गरिमालाई प्रवर्द्धन गर्न पछिल्लो समय विभिन्न पहल हुँदै आएको छ । गाउँ पर्यटनको नमूना गन्तव्यजस्तै रहेको बन्दीपुरमा नेपाल पर्यटन बोर्ड, गण्डकी प्रदेश कार्यालय र बन्दीपुर गाउँपालिकाको संयुक्त आयोजना एवं गाउँ पर्यटन प्रवर्द्धन मञ्च नेपाल (भिटोफ) गण्डकीको सहआयोजनामा यही वैशाख १८ र १९ गते गाउँ पर्यटन मेला आयोजना गर्न लागिएको छ । बन्दीपुरमा पहिलो पटक प्रदेशस्तरीय ‘गाउँ पर्यटन मेला २०८३’ आयोजना गर्न लागिएको नेपाल पर्यटन बोर्ड गण्डकी प्रदेशका प्रमुख मणिराज लामिछानेले बताए । बन्दीपुर गाउँपालिकाले ‘बन्दीपुर गाउँ पर्यटन भ्रमण वर्ष’ घोषणा गरेको सन्दर्भसमेत पारेर पर्यटन मेला गर्न लागिएको हो । 'मेलाको मुख्य उद्देश्य गाउँका साना पर्यटन व्यवसायी र समुदायिक घरवास (होमस्टे)लाई सिधै सहरी बजार र ठूला एजेन्सीहरुसँग जोड्ने प्लेटफर्मको रुपमा विकास गर्ने हो', उनले भने, 'मेलामार्फत होमस्टे र त्यहाँबाट दिने सेवालाई बजारसँग जोड्ने, गाउँ पर्यटनमा निजी तथा सरकारी लगानीलाई अभिवृद्धि गर्ने लक्ष्य राखिएको छ ।' मेलामा प्रदेशका ११ वटै जिल्लाबाट प्रतिनिधित्व गराउने पहल भइरहेको छ । उनले पर्यटन लक्षित कार्यक्रम पोखरामा मात्रै केन्द्रित नगरी प्रदेशका अन्यस्थानमा पुर्याउने योजना रहेको पनि बताए । मेलामा बन्दीपुरको पर्यटनका विषयमा सामूहिक छलफल गरिने बन्दीपुर गाउँपालिकाका अध्यक्ष सुरेन्द्रबहादुर थापाले जानकारी दिए । 'गाउँ पर्यटनबाट समृद्धिको यात्रा, विभिन्न जातजातिको संस्कृतिक प्रस्तुति एवं प्रवर्द्धन, सामुदायिक घरवास तथा पर्यटन व्यवसायीका प्रवर्द्धनात्मक कक्षहरु मेलामा स्थापना गरिनेछ', उनले भने, 'उक्त क्रममा यहाँका पर्यटन लक्षित सूचना तथा प्रचार सामग्री वितरणसँगै पर्यटकीय आकर्षणका विविध पक्षलाई उजागर गरिनेछ ।' बन्दीपुर र व्यास नगरपालिकालाई जोडेर ‘होमस्टे सर्किट निर्माण’ प्रक्रिया अगाडि बढाइएको छ । अध्यक्ष थापाका अनुसार यस सर्किटमा बन्दीपुर–२ को मोहोरिया, रामकोट, व्यास–१४ कुलुङ, केशवटार, रुम्सी, बन्दीपुर–६ धरमपानी, व्यास–१२ कमलाबारी, बन्दीपुर–५ कोरिखा, बन्दीपुर सामुदायिक होमस्टे, बन्दीपुरको धरमपानी होमस्टे, ऐतिहासिक हुस्लाङकोट गढी, कमलाबारी, कोरिखा र बन्दीपुर सामुदायिक होमस्टेलगायत समेटिएका छन् । बन्दीपुरको पर्यटन क्षेत्रमा छ अर्ब रुपैयाँभन्दा बढीको लगानी रहेको बताउँदै अध्यक्ष थापाले भ्रमण वर्ष २०२५ मा बन्दीपुरमा स्वदेशी तथा विदेशी गरी छ लाख २५ हजार पर्यटक आएको जानकारी गराए । यस वर्ष ग्रामीण पर्यटन बन्दीपुर भ्रमण वर्ष २०२६ मा सात लाख पर्यटक भित्र्याउने लक्ष्य राखिएको छ । बन्दीपुर क्षेत्रका रामकोट, धरमपानी र कोरिखा होमस्टेलाई नमूना पर्यटकीय गाउँका रुपमा विकास गर्न लागिएको अध्यक्ष थापाले बताए । बन्दीपुर क्षेत्रमा मात्र सात वटा व्यावसायिक घरबास सञ्चालनमा छन् । मेलासँगै यहाँको अर्गानिक खाना, रैथाने अन्नबाली, परम्परागत कला संस्कृतिको समेत प्रवर्द्धन एवं संरक्षण हुने स्थानीयवासीको विश्वास छ । मेलामार्फत समग्र गण्डकी प्रदेशको गाउँ पर्यटनको प्रवर्द्धन र विकासको लक्ष्य राखिएको गाउँ पर्यटन प्रवर्द्धन मञ्च ९भिटोफ० गण्डकी प्रदेशका अध्यक्ष शोभा सापकोटाले बताए । गण्डकी प्रदेशभित्र ५० भन्दा बढी होमस्टे सञ्चालन भइरहेका छन् । उनले यस्ता कार्यक्रममार्फत होमस्टेहरूबीचको पर्यटकीय साझेदारीमा समेत फाइदा पुग्ने विश्वास लिइएको बताए । 'कार्यक्रममार्फत होमस्टेबीच अनुभव आदानप्रदान, व्यवसायिक साझोदारीमा पनि महत्त्वपूर्ण सहयोग पुग्ने अपेक्षा गरेका छौँ', उनले भने, 'सरकारले हप्तामा दुई दिन बिदाको व्यवस्था गरेकाले पनि गाउँ पर्यटनमा सहयोग पुग्ने हाम्रो अपेक्षा छ ।' गाउँ पर्यटन प्रवद्र्धन मञ्च (भिटोफ) गण्डकी प्रदेशले विगत लामो समयदेखि गण्डकी प्रदेशका सम्भावना युक्त घरवासहरूको प्रवर्द्धनमा काम गरिहेको भिटोफ गण्डकीका संस्थापक अध्यक्ष एवं पोखरा पर्यटन परिषद्का अध्यक्ष तारानाथ पहारीले बताए । गण्डकी प्रदेशका हरेक गाउँहरू पर्यटकीय गन्तव्यका रुपमा रहेको बताउँदै उहाँले तिनीहरूको पर्यटकीय उपयोगको आवश्यकता औँल्याए । रासस
