अब सामान कुर्दै अन्योलमा बस्नुनपर्ने, विमानस्थलमै ब्यागेजको लाइभ फिड हेर्न मिल्ने
काठमाडौं । त्रिभुवन अन्तर्राष्ट्रिय विमानस्थलमा यात्रुहरूको ब्यागेज व्यवस्थापनलाई थप पारदर्शी, व्यवस्थित र यात्रुमैत्री बनाउने उद्देश्यले ब्यागेज ड्रप एरियाको प्रत्यक्ष दृश्य (लाइभ फिड) अब आगमन कक्ष (अराइभल एरिया) को ब्यागेज क्लेम क्षेत्रमा उपलब्ध गराइएको छ । संस्कृति, पर्यटन तथा नागरिक उड्डयनमन्त्री खडकराज पौडेल ‘गनेस’को पहलमा सुरु गरिएको यस व्यवस्थाबाट अन्तर्राष्ट्रिय उडानमार्फत नेपाल आउने यात्रुले आफ्नो सामान विमानबाट झारिएपछि ब्यागेज बेल्टसम्म आइपुग्ने प्रक्रियाबारे प्रत्यक्ष जानकारी प्राप्त गर्न सक्नेछन् । यसले यात्रुलाई सामानको अवस्थाबारे जानकारी लिन सहज बनाउनुका साथै ब्यागेज प्राप्त गर्न लाग्ने समयको अनुमान गर्नसमेत सहयोग पुर्याउने अपेक्षा गरिएको छ । यसअघि विमानबाट झारिएको सामान ब्यागेज क्लेम क्षेत्रमा आइपुग्न लाग्ने समयबारे यात्रुले प्रत्यक्ष जानकारी पाउने व्यवस्था थिएन । सामान आउने प्रतीक्षामा यात्रुहरू अन्योलमा पर्ने तथा ब्यागेज व्यवस्थापन प्रक्रियाबारे पर्याप्त सूचना नहुँदा असहजता सिर्जना हुने गरेको थियो । नयाँ व्यवस्थाले ब्यागेज ड्रप क्षेत्रमा भइरहेको गतिविधि आगमन कक्षमै देख्न सकिने भएपछि यात्रुको प्रतीक्षा समयलाई थप सहज र व्यवस्थित बनाउने विश्वास गरिएको छ । पछिल्लो समय मन्त्री पौडेलले विमानस्थलको सेवा सुधार, प्रविधिको उपयोग र यात्रुको सुविधालाई प्राथमिकतामा दिने कुरामा गम्भीर रुपमा पहल गरेका छन् । यस पहलले त्रिभुवन अन्तर्राष्ट्रिय विमानस्थलको सेवा अनुभवलाई थप प्रभावकारी र यात्रुमैत्री बनाउने अपेक्षा गरिएको छ । यात्रु सेवाको गुणस्तर अभिवृद्धि, सेवा प्रवाहमा पारदर्शिता र आधुनिक प्रविधिको प्रयोगमार्फत विमानस्थललाई अन्तर्राष्ट्रिय मापदण्डअनुरूप विकास गर्ने प्रयासको रुपमा हेरिएको छ ।
कालीमाटीमा कुरिलो किलोको ७०० रुपैयाँ, कुन तरकारीको मूल्य कति ?
काठमाडौं । कालीमाटी फलफूल तथा तरकारी बजार विकास समितिले शुक्रबारका लागि कृषिउपजको न्यूनतम थोक मूल्य सार्वजनिक गरेको छ । समितिले सार्वजनिक गरेको मूल्यसूचीअनुसार ठूलो नेपाली गोलभेडा प्रतिकिलो ६० रुपैयाँ, भारतीय ठूलो गोलभेडा ६० रुपैयाँ र सानो (टनेल) गोलभेडा ४० रुपैयाँ तोकिएको छ । त्यस्तै, रातो आलु (लाम्चो, गोलो र मुडे) प्रतिकिलो ५५ रुपैयाँ रहेको छ । भारतीय रातो आलु ३० रुपैयाँ र सेतो आलु २८ रुपैयाँ तोकिएको छ । भारतीय सुकेको प्याज प्रतिकिलो ८८ रुपैयाँ, स्थानीय गाजर ८० रुपैयाँ र तराई गाजर ५० रुपैयाँ रहेको छ । बन्दाको मूल्य प्रतिकिलो ३० रुपैयाँ, स्थानीय काउली ३० रुपैयाँ, रातो मूला ३० रुपैयाँ र सेतो मूला (हाइब्रिड) ३० रुपैयाँ छ । लाम्चो भन्टा ३० रुपैयाँ, डल्लो भन्टा ५० रुपैयाँ तथा घिउ सिमी (लोकल र हाइब्रिड) ५० रुपैयाँ तोकिएको छ । टाटे सिमी प्रतिकिलो ६० रुपैयाँ, भटमासकोसा १०० रुपैयाँ, तितो करेला ७० रुपैयाँ र लौका ४० रुपैयाँ रहेको छ। सागसब्जीतर्फ रायोको साग र तोरीको साग प्रतिकिलो ३० रुपैयाँ, पालुङ्गो साग ८० रुपैयाँ, चकसूरको साग १०० रुपैयाँ र हरियो प्याज २०० रुपैयाँ तोकिएको छ। च्याउतर्फ कन्य च्याउ प्रतिकिलो १०० रुपैयाँ, डल्ले च्याउ २६० रुपैयाँ, राजा च्याउ २८० रुपैयाँ र सिताके च्याउ ८०० रुपैयाँ रहेको छ। त्यस्तै, कुरिलो ७०० रुपैयाँ, न्यूरो ९० रुपैयाँ, ब्रोकाउली ९० रुपैयाँ, चुकन्दर ८० रुपैयाँ, सेलरी ४०० रुपैयाँ, पुदीना ६०० रुपैयाँ र गान्टे मूला १०० रुपैयाँ तोकिएको छ। फलफूलतर्फ फुजी स्याउ प्रतिकिलो ३०० रुपैयाँ, मुस्ताङको स्याउ २०० रुपैयाँ र जुम्लाको स्याउ २५० रुपैयाँ रहेको छ। नेपाली तथा मालभोग केरा प्रतिदर्जन १०० रुपैयाँ, कागती प्रतिकिलो १५० रुपैयाँ र अनार ३०० रुपैयाँ तोकिएको समितिले जनाएको छ।
शुक्रबार घट्यो डलर, युरो र पाउण्डको मूल्य
काठमाडौं । नेपाल राष्ट्र बैंकले शुक्रबारका लागि निर्धारण गरेको विदेशी मुद्राको विनिमयदरअनुसार अमेरिकी डलर, युरो र पाउण्डसहित अधिकांश विदेशी मुद्राको भाउ घटेको छ । आज अमेरिकी डलर एकको खरिददर १५० रुपैयाँ ८७ पैसा र बिक्रीदर १५१ रुपैयाँ ४७ पैसा कायम भएको छ। बिहीबार अमेरिकी डलर एकको खरिददर १५१ रुपैयाँ १३ पैसा र बिक्रीदर १५१ रुपैयाँ ७३ पैसा थियो। त्यस्तै, युरोपियन युरो एकको खरिददर १६९ रुपैयाँ ४६ पैसा र बिक्रीदर १७० रुपैयाँ १३ पैसा निर्धारण गरिएको छ। बिहीबार युरो एकको खरिददर १७० रुपैयाँ १६ पैसा र बिक्रीदर १७० रुपैयाँ ८४ पैसा थियो। आज बेलायती पाउण्ड स्टर्लिङ एकको खरिददर २०३ रुपैयाँ ११ पैसा र बिक्रीदर २०३ रुपैयाँ ९२ पैसा कायम भएको छ। अघिल्लो दिन यसको खरिददर २०३ रुपैयाँ ९० पैसा र बिक्रीदर २०४ रुपैयाँ ७१ पैसा थियो। स्वीस फ्र्यांकको भाउ पनि घटेको छ। आज एक स्वीस फ्र्यांकको खरिददर १८४ रुपैयाँ ६० पैसा र बिक्रीदर १८५ रुपैयाँ ३३ पैसा छ। बिहीबार यसको खरिददर १८५ रुपैयाँ १५ पैसा र बिक्रीदर १८५ रुपैयाँ ८९ पैसा थियो। त्यस्तै, अष्ट्रेलियन डलर एकको खरिददर १०५ रुपैयाँ ७९ पैसा र बिक्रीदर १०६ रुपैयाँ २१ पैसा कायम भएको छ। बिहीबार यसको खरिददर १०६ रुपैयाँ ३ पैसा र बिक्रीदर १०६ रुपैयाँ ४५ पैसा थियो। क्यानेडियन डलर एकको खरिददर १०८ रुपैयाँ ११ पैसा र बिक्रीदर १०८ रुपैयाँ ५४ पैसा निर्धारण गरिएको छ। बिहीबार यसको खरिददर १०८ रुपैयाँ ३६ पैसा र बिक्रीदर १०८ रुपैयाँ ७९ पैसा थियो। सिंगापुर डलर एकको खरिददर ११८ रुपैयाँ १७ पैसा र बिक्रीदर ११८ रुपैयाँ ६४ पैसा कायम भएको छ। अघिल्लो दिन यसको खरिददर ११८ रुपैयाँ २५ पैसा र बिक्रीदर ११८ रुपैयाँ ७२ पैसा थियो।
एनपीएलमा आज ४ टोली मैदानमा, कर्णाली-सुदूरपश्चिम र चितवन-पोखरा भिड्दै
काठमाडौं । नेपाल प्रिमियर लिग (एनपीएल) क्रिकेटमा आज पनि दुई खेल हुँदैछन् । कीर्तिपुरस्थित त्रिवि अन्तर्राष्ट्रिय क्रिकेट मैदानमा हुने पहिलो खेलमा कर्णाली याक्स र सुदूरपश्चिम रोयल्सबीच प्रतिस्पर्धा हुनेछ । खेल दिउँसो साढे १२ बजे सुरु हुनेछ । तीन खेल खेलेको कर्णाली याक्स चार अङ्कसहित अङ्क तालिकाको तेस्रो स्थानमा छ । कर्णालीले तीनमध्ये दुई खेलमा जित र एक खेलमा हार बेहोरेको छ । चार खेल खेलेको सुदूरपश्चिम रोयल्स चार अङ्कसहित तालिकाको छैटौँ स्थानमा छ । उसले दुई खेलमा जित र दुई खेलमा हार बेहोरेको छ । यसैगरी आजको दोस्रो खेलमा चितवन राइनोज र पोखरा एभेन्जर्स आमनेसामने हुनेछन् । उक्त खेल दिउँसो साढे ४ बजे सुरु हुनेछ । तीन खेल खेलेको चितवन राइनोज एक जित, एक हार र वर्षाका कारण एक खेल रद्द भएपछि अङ्क तालिकाको सातौँ स्थानमा छ । पोखरा एभेन्जर्स भने अङ्क तालिकाको पुछारमा छ । तीन खेल खेलेको पोखरा तीनवटै खेलमा पराजित भएको छ ।
४०५ जना नयाँ कर्मचारी नियुक्त गर्दै विद्युत् प्राधिकरण
काठमाडौं । नेपाल विद्युत् प्राधिकरणले विभिन्न तह र पदमा सयौँ कर्मचारी माग गर्दै दरखास्त आह्वान गरेको छ । प्राधिकरणले शुक्रबार सूचना प्रकाशित गरी अधिकृत तथा सहायकस्तरका विभिन्न पदमा कर्मचारी भर्नाका लागि आवेदन खुलाएको हो । प्राधिकरणले अधिकृतस्तरमा ८३ जना, मिटर रिडिङ सुपरभाइजर ३१ जना, लेखापाल ३४ जना, सुपरभाइजर (इलेक्ट्रिकल) २४६ जना, सुपरभाइजर (मेकानिकल)८ जना, सुपरभाइजर (सिभिल) ३ जना गरी ४०५ जना कर्मचारी माग गरेको छ । प्राधिकरणले तह १० अन्तर्गत प्रबन्धक एक जना, तह ८ अन्तर्गत सहायक निर्देशक एक जना, वरिष्ठ चार्टर्ड एकाउन्टेन्ट एक जना तथा सहायक प्रबन्धक तीन जना माग गरिएको छ । त्यस्तै, सहायक प्रबन्धक (कम्प्युटर इन्जिनियरिङ) एक जना पनि मागेको छ । यस्तै, तह ७ अन्तर्गत प्रशासनिक अधिकृत सात जना, कानून अधिकृत एक जना, लेखा अधिकृत छ जना र चार्टर्ड एकाउन्टेन्ट एक जनाका लागि दरखास्त आह्वान गरेको छ । प्राविधिकतर्फ इन्जिनियर (इलेक्ट्रिकल) ४२ जना, इलेक्ट्रोनिक्स तीन जना, मेकानिकल चार जना, सिभिल पाँच जना, सर्भे एक जना र कम्प्युटर इन्जिनियरिङतर्फ चार जना माग गरिएको छ । यसैगरी वातावरणविद् र भूगर्भविद् एक-एक जना मागेको छ । प्राधिकरणले सहायकस्तर तह ५ अन्तर्गत पनि विभिन्न पदमा ठूलो सङ्ख्यामा कर्मचारी माग गरेको छ । मिटर रिडिङ सुपरभाइजर (प्रशासनतर्फ) पदमा कोशी प्रदेशबाट सात जना, बागमती प्रदेशबाट १३ जना र लुम्बिनी प्रदेशबाट ११ जना मागेको छ । त्यस्तै, लेखापाल (लेखातर्फ) पदमा कोशी प्रदेशबाट १० जना, मधेश प्रदेशबाट सात जना, बागमती प्रदेशबाट १० जना र लुम्बिनी प्रदेशबाट सात जनाका लागि दरखास्त आह्वान गरेको हो । सुपरभाइजर (इलेक्ट्रिकल) पदमा सबैभन्दा धेरै कर्मचारी माग गरिएको छ । यस पदमा कोशी प्रदेशबाट ५७ जना, मधेशबाट २५ जना, बागमतीबाट ३० जना, गण्डकीबाट ३० जना, लुम्बिनीबाट ४४ जना, कर्णालीबाट २५ जना र सुदूरपश्चिमबाट ३५ जना आवेदन मागेको हो । यसैगरी सुपरभाइजर (मेकानिकल) पदमा कोशी प्रदेशबाट दुई जना, लुम्बिनीबाट एक जना, कर्णालीबाट एक जना र सुदूरपश्चिमबाट चार जना माग गरिएको छ । सुपरभाइजर (सिभिल) पदमा कोशी प्रदेशबाट दुई जना र सुदूरपश्चिमबाट एक जना माग गरिएको प्राधिकरणले जनाएको छ । इच्छुक तथा योग्यता पुगेका नेपाली नागरिकले आगामी मंसिर १० गतेसम्म आवेदन दिन सक्नेछन् । तोकिएको म्यादभित्र आवेदन दिन नसक्ने उम्मेदवारले दोब्बर दस्तुर तिरेर मंसिर १७ गतेसम्म दरखास्त पेस गर्न सक्नेछन् । आवेदन प्राधिकरणको आधिकारिक वेबसाइटमार्फत अनलाइन रूपमा पेस गर्न सकिनेछ ।
कान्तिपुर फर्मास्युटिकल्सलाई १७ करोडको आईपीओ बिक्री गर्न अनुमति
काठमाडौं । नेपाल धितोपत्र बोर्डले कान्तिपुर फर्मास्युटिकल्स ल्याब लिमिटेडलाई सर्वसाधारणका लागि प्रारम्भिक सार्वजनिक निष्कासन (आईपीओ) जारी गर्न स्वीकृति प्रदान गरेको छ । बोर्डले कम्पनीलाई कात्तिक १९ गते विवरणपत्र प्रकाशन तथा सेयर निष्कासनका लागि अन्तिम स्वीकृति प्रदान गरेको हो । स्वीकृति पाएसँगै कम्पनीले प्रतिकित्ता १०० रुपैयाँ अंकित मूल्यका दरले कुल १७ लाख कित्ता साधारण सेयर निष्कासन गर्नेछ । यसअनुसार कम्पनीले १७ करोड रुपैयाँ बराबरको आईपीओ जारी गर्न लागेको हो । कम्पनीको सेयर निष्कासन तथा बिक्री प्रबन्धकमा मुक्तिनाथ क्यापिटल लिमिटेड रहेको छ । धितोपत्र बोर्डबाट स्वीकृति पाएसँगै कम्पनीले अब निष्कासन मिति तय गरी सेयर बिक्री प्रक्रिया अघि बढाउनेछ । पहिलो चरणमा वैदेशिक रोजगारीमा रहेका नेपालीका लागि र दोस्रो चरणमा सर्वसाधारणका लागि आईपीओ निष्कासन गरिनेछ ।
अब एउटै दिन सेयर किनबेच गर्न पाइने, यस्ता छन् व्यवस्था
काठमाडौं । नेपालको पुँजी बजारमा अन्तरदिवसीय धितोपत्र कारोबार (इन्ट्राडे ट्रेडिङ) सञ्चालन गर्ने तयारी अघि बढेको छ । यसका लागि नेपाल धितोपत्र बोर्डले अन्तरदिवसीय धितोपत्र कारोबारसम्बन्धी नियमावली, २०८३ को प्रारम्भिक मस्यौदा तयार गरी सरोकारवालासँग राय तथा सुझाव माग गरेको छ । पुँजी बजारमा कारोबारको गति, तरलता तथा मूल्य निर्धारण प्रक्रियालाई थप प्रभावकारी बनाउने उद्देश्यले अन्तरदिवसीय कारोबार प्रणाली लागू गर्न लागिएको बोर्डले जनाएको छ । बोर्डले गत असोज ८ गते सार्वजनिक गरेको ‘नेपालमा धितोपत्रको अन्तरदिवसीय कारोबार कार्यान्वयनसम्बन्धी अवधारणापत्र, २०८३’ का आधारमा नियमावलीको मस्यौदा तयार पारेको हो । प्रस्तावित मस्यौदामा अन्तरदिवसीय कारोबार सञ्चालनका लागि नेपाल स्टक एक्सचेन्ज र धितोपत्र दलाल व्यवसायीले बोर्डबाट स्वीकृति लिनुपर्ने व्यवस्था प्रस्ताव गरिएको छ । साथै, तोकिएका मापदण्ड पूरा गरेका सूचीकृत धितोपत्रलाई मात्र यस्तो कारोबारका लागि योग्य मानिने उल्लेख छ । मस्यौदाअनुसार धितोपत्र दलाल व्यवसायीले ग्राहकको पहिचान, वित्तीय क्षमता, जोखिम वहन गर्ने क्षमता तथा कारोबारका लागि उपयुक्तताको मूल्याङ्कन गरेर मात्र अन्तरदिवसीय कारोबारको सुविधा उपलब्ध गराउनुपर्नेछ । कारोबार सुरु गर्नुअघि ग्राहकको आदेश, मार्जिन, जोखिम सीमा र अन्य आवश्यक सर्तसमेत परीक्षण गर्नुपर्ने व्यवस्था प्रस्ताव गरिएको छ । त्यस्तै, अन्तरदिवसीय कारोबार सञ्चालन गर्ने धितोपत्र दलाल व्यवसायीले आवश्यक प्राविधिक प्रणाली, सुरक्षा व्यवस्था तथा वास्तविक समयमै जोखिम नियन्त्रण गर्न सक्ने संयन्त्र स्थापना गर्नुपर्नेछ । ग्राहकले एकै दिन धितोपत्र खरिद वा बिक्री गरी सिर्जना भएको खुला अवस्थालाई सोही दिन विपरीत कारोबार गरेर बन्द गर्नुपर्ने व्यवस्था पनि मस्यौदामा समेटिएको छ । तोकिएको समयभित्र खुला कारोबार बन्द नगरेमा स्वतः बन्द हुने व्यवस्था प्रस्ताव गरिएको छ । यसलाई स्वतः कारोबार बन्द गर्ने प्रक्रिया भनिन्छ । यसका साथै प्रत्येक ग्राहकले तोकिएबमोजिमको मार्जिन कायम राख्नुपर्ने र बजारको उतारचढावअनुसार थप मार्जिन अर्थात् परिवर्तनशील मार्जिन तोक्न सकिने व्यवस्था पनि मस्यौदामा छ । प्रस्तावित नियमावलीमा प्रत्येक ग्राहक, धितोपत्र व्यवसायी, धितोपत्र तथा समग्र बजारका लागि अधिकतम कारोबार सीमा निर्धारण गर्ने व्यवस्था गरिएको छ । जोखिम व्यवस्थापन, आन्तरिक नियन्त्रण तथा गुनासो व्यवस्थापन संयन्त्र स्थापना गर्नु पनि धितोपत्र दलाल व्यवसायीको दायित्व हुने उल्लेख छ । अन्तरदिवसीय कारोबारमा लगानीकर्ताको जोखिम न्यूनीकरण र सचेतना अभिवृद्धिका लागि बोर्ड, धितोपत्र बजार तथा धितोपत्र दलाल व्यवसायीले लगानीकर्ता शिक्षा र सचेतनामूलक कार्यक्रम सञ्चालन गर्नुपर्ने प्रस्ताव गरिएको छ । बोर्डले आवश्यकताअनुसार यस्तो कारोबार प्रणाली चरणबद्ध रूपमा लागू गर्न सक्ने व्यवस्था पनि मस्यौदामा राखिएको छ । बोर्डले प्रस्तावित नियमावलीको प्रारम्भिक मस्यौदामा आगामी मंसिर ४ गतेभित्र राय तथा सुझाव पठाउन सरोकारवाला सबैलाई अनुरोध गरेको छ । मस्यौदामा प्राप्त सुझावका आधारमा नियमावलीलाई अन्तिम रूप दिने प्रक्रिया अघि बढाइनेछ । अन्तरदिवसीय कारोबार प्रणाली कार्यान्वयनमा आएमा लगानीकर्ताले एउटै कारोबार दिनभित्र धितोपत्र खरिद तथा बिक्री गर्न सक्नेछन् । यद्यपि, प्रस्तावित व्यवस्थाअनुसार यस्तो कारोबारमा मार्जिन, अधिकतम कारोबार सीमा र जोखिम नियन्त्रणसम्बन्धी प्रावधान पालना गर्नुपर्नेछ ।
काठमाडौं महानगरले माग्यो ३५ जना न्यायिक सहजकर्ता
काठमाडौं । काठमाडौं महानगरपालिकाले ३५ जना न्यायिक सहजकर्ता (इन्टर्न) मागेको छ । महानगरपालिकाको कानून तथा मानव अधिकार विभागले न्यायिक समितिअन्तर्गत निःशुल्क कानूनी सेवा प्रवाह तथा न्यायिक कार्यमा सहजीकरण गर्ने उद्देश्यले ३५ जना इन्टर्न छनोट गर्न लागेको हो । महानगरपालिकाले इच्छुक तथा योग्य विद्यार्थीलाई आवेदन दिन आह्वान गरेको छ । छनोट भएका विद्यार्थीले महानगरपालिकाको चालु आर्थिक वर्ष २०८३/८४ मा ६ महिनासम्म इन्टर्नका रूपमा काम गर्ने अवसर पाउनेछन् । महानगरपालिकाको न्यायिक समितिअन्तर्गत कानून तथा मानव अधिकार विभाग तथा विभिन्न वडा कार्यालयमा रहेर इन्टर्नहरूले सेवाग्राहीलाई निःशुल्क कानूनी सेवा प्रदान गर्न र न्यायिक प्रक्रियामा सहजीकरण गर्न सहयोग गर्नेछन् । इच्छुक विद्यार्थीले १५ दिनभित्र महानगरपालिकाको अनलाइन आवेदन प्रणालीमार्फत निवेदन पेस गर्न सक्नेछन् । प्राप्त आवेदनमध्येबाट योग्य उम्मेदवारको संक्षिप्त सूची तयार गरी अन्तर्वार्तामार्फत अन्तिम छनोट गरिने महानगरपालिकाले जनाएको छ । छनोट हुने इन्टर्नले पाउने सेवा तथा सुविधासम्बन्धी व्यवस्था महानगरपालिकाको निर्णयअनुसार हुनेछ ।
