कामना सेवाद्वारा जनकल्याण विद्यालयका १३८ विद्यार्थीलाई शैक्षिक सामग्री वितरण
काठमाडौं । कामना सेवा विकास बैंकले शाखा कार्यालय सर्दीमार्फत जनकल्याण आधारभूत विद्यालयका विद्यार्थीहरूलाई स्टेशनरी तथा शैक्षिक सामग्री वितरण गरेको छ । बैंकका नारायणगढ क्षेत्र प्रमुख सुरेन्द्र भण्डारीले विद्यालय व्यवस्थापन समितिका अध्यक्ष दल बहादुर सिन्जलीलाई उक्त सामग्री हस्तान्तरण गरेका हुन् । विद्यालयमा नर्सरीदेखि कक्षा ८ सम्म अध्ययनरत १३८ जना विद्यार्थीहरूलाई विभिन्न प्रकारका शैक्षिक सामग्री प्रदान गरिएको थियो । वितरण गरिएका सामग्रीमा वर्णमाला तथा अंकसम्बन्धी चार्ट, एबीसीडी चार्ट, हप्ताका दिन र महिनासम्बन्धी चार्ट, नर्सरी तहका अध्ययन सामग्री, पेन्सिल कलर, कापी, पेन्सिल तथा बालबालिकाका लागि खेलमुखी शैक्षिक सामग्री समावेश रहेका छन् । कार्यक्रममा बोल्दै अध्यक्ष सिन्जलीले बैंकको सहयोगप्रति धन्यवाद व्यक्त गर्दै यस्ता सामग्रीले विद्यार्थीहरूको सिकाइ प्रक्रियालाई सहज र प्रभावकारी बनाउन महत्वपूर्ण भूमिका खेल्ने बताए । उनले यस्ता कार्यक्रमहरूले सामुदायिक विद्यालयका विद्यार्थीहरूको मनोबल वृद्धि गर्नुका साथै शिक्षा क्षेत्रमा सकारात्मक प्रभाव पार्ने धारणा व्यक्त गरे । यसैगरी, बैंकका क्षेत्र प्रमुख भण्डारीले यस्ता सहयोगले विद्यार्थीहरूको पठनपाठनमा थप सहजता र प्रेरणा मिल्ने विश्वास व्यक्त गरे । कार्यक्रममा बैंकका कर्मचारी, विद्यालय व्यवस्थापन समितिका पदाधिकारी, प्रधानाध्यापक, शिक्षक तथा विद्यार्थीहरूको उपस्थिति रहेको थियो । बैंकले आगामी दिनहरूमा पनि सरोकारवालासँगको सहकार्यमा यस्ता सामाजिक तथा शैक्षिक कार्यक्रमलाई निरन्तरता दिने जनाएको छ ।
हिमालयन लघुवित्तद्वारा मालती देवीलाई ३ लाख ऋण मिनाहा रकम भुक्तानी
काठमाडौं । हिमालयन लघुवित्त वित्तीय संस्था लिमिटेडको शाखा कार्यालय बंकुल, रौतहटले बीमा दाबी रकम भुक्तानी गरेको छ । रौतहट जिल्ला, मौलापुर नगरपालिका–७ पिपरिया टोलस्थित केन्द्र नं. ४५ की सदस्य श्रीमती मालती देवीका श्रीमान् धुरन साह कानुको मृत्यु भएपछि संस्थाले बीमा क्षतिपूर्ति उपलब्ध गराएको हो । श्रीमती मालती देवीले संस्थाबाट ३ लाख रुपैयाँ कर्जा लिएकी थिइन् । उनका श्रीमानको निधनपछि संस्थाको नियमानुसार कर्जाको साँवा र ब्याज मिनाहा गरिएको छ । साथै कर्जा बीमा अन्तर्गत काजक्रिया खर्च वापत २५ हजार रुपैयाँ समेत थप गरी एकमुष्ट रकम भुक्तानी गरिएको शाखा प्रबन्धक श्यामबाबु प्रसाद यादवले जानकारी दिए । संस्थाले आफ्ना सदस्यहरूको हित र संरक्षणका लागि आपतकालीन अवस्थामा विभिन्न सहयोग कार्यक्रम सञ्चालन गर्दै आएको जनाएको छ । दुःखको समयमा आर्थिक सहयोग प्रदान गरेकोमा केन्द्रका सदस्यहरूले संस्थाप्रति धन्यवाद व्यक्त गरेका छन् । उक्त रकम मौलापुर नगरपालिका–७ का वडा अध्यक्ष रामपुकार साह र संस्थाका निजगढ अनुगमन प्रमुख सन्दीप बिडारीद्वारा हस्तान्तरण गरिएको थियो । कार्यक्रममा शाखा प्रबन्धक यादव, कर्मचारी रामाशंकर महरा तथा केन्द्रका सदस्यहरूको उपस्थिति रहेको थियो ।
डेब्यूमै ‘म्यान अफ दि इलेक्सन’
काठमाडौं । नेपाल उद्योग वाणिज्य महासंघको निर्वाचन सम्पन्न भएको छ । बुधबार भएको निर्वाचनको मतपरिणाम सार्वजनिक भएर विजेताले प्रमाणपत्र पनि प्राप्त गरिसकेका छन् । महासंघको विधानअनुसार अञ्जन श्रेष्ठ स्वतः अध्यक्ष बनेका छन् । एसोसिएट उपाध्यक्षमा प्रवलजंग पाण्डे, वस्तुगतमा नरेशलाल श्रेष्ठ र जिल्लानगरमा दिलसुन्दर श्रेष्ठ र कृष्णप्रसाद शर्मा निर्वाचित भएका छन् । निर्वाचन समितिले उपलब्ध गराएको विवरणअनुसार कुल ६९ जना निर्वाचित भएका छन् । एसोसिएटतर्फ १७ जना, जिल्लानगर तर्फ १५ जना, वस्तुगततर्फ १३ जना र प्रत्येक प्रदेशबाट दुई जना गरी १४ जना निर्वाचित भएका हुन् । महासंघको विधान अनुसार प्रत्येक क्षेत्रबाट जना महिला सदस्य, वस्तुगत महासंघ, द्विराष्ट्रिय उद्योग वाणिज्य संघ, संस्थापन सदस्य समूहबाट एक जना गरी कुल ६९ जना निर्वाचित भएका छन् । निर्वाचन समितिले सार्वजनिक गरेको मत परिणामअनुसार सचिन ढकाल म्यान अफ दि इलेक्सन बनेका छन् । उनी एसोसिएटतर्फबाट कार्यकारिणी सदस्यमा विजयी भएका हुन् । उनले कुल १३ सय १८ मत प्राप्त गरेका छन् । उनले आइएमई ग्रुपबाट प्रतिनिधित्व गरेका हुन् । उनी निवर्तमान अध्यक्ष चन्द्रप्रसाद ढकालका छोरा हुन् । उनी स्पोर्टस् व्यवसायमा आवद्ध छन् । फुटबल चितवन क्लब (एफसी चितवन)को अध्यक्ष समेत रहेका ढकाल खेलकुद, पर्यटन तथा हस्पिटालिटी व्यवसाय पनि आवद्ध छन् । ढकालको व्यवस्थापनमा बाग्लुङमा इला कम्फर्ट होटल सञ्चालनमा छ । महासंघको एसोसिटतर्फबाट निर्वाचित सदस्यमा ढकाल सबैभन्दा कान्छा उम्मेदवार पनि हुन् । उद्योगी व्यवसायीहरूको निर्वाचन उनका लागि डेब्यू अर्थात् पहिलो हो । डेब्यूमै उनले उत्कृष्ट नतिजा हात पारेका छन् । उनका बुवा चन्द्रप्रसाद ढकाल महासंघको राजनीतिबाट बाहिरिएसँगै छोरा सचिनको प्रवेश भएको छ । अब सचिनले उद्योग व्यवसायसँगै महासंघभित्रको राजनीतिमा पनि एक खेलाडीका रुपमा उदाउनेछन् । उनीपछि सर्वाधिक मत पाउने उम्मेदवार अम्बिका पौडेल बनेका छन् । उनले ११ सय ८३ मत पाए । कसले कति मत पाए ?
पुराना र कुच्चिएका जारमा पानी बेच्नेलाई कारबाही हुने
काठमाडौं । बजारमा पुराना, कुच्चिएका, टालिएका र अपारदर्शी जारमा प्रशोधित पिउने पानी बिक्री भइरहेको जनगुनासो बढेपछि खाद्य प्रविधि तथा गुण नियन्त्रण विभागले कडा निगरानी र कारबाहीको चेतावनी दिएको छ । विशेष गरी गर्मी र वर्षायाममा पानीजन्य रोगहरूको संक्रमण फैलने उच्च जोखिम हुने भएकाले विभागले पिउने पानीको स्वच्छता र गुणस्तरमा कडाइ गर्न लागेको हो । विभागका अनुसार मापदण्डविपरीतका जार प्रयोग गर्दा पानीको गुणस्तर कायम नहुने र उपभोक्ताको स्वास्थ्यमा गम्भीर समस्या देखिन सक्छ । यस्ता जारहरू सफा गर्न कठिन हुने र पानी दूषित हुने सम्भावना प्रबल रहन्छ । विभागले पानी उत्पादक, ढुवानीकर्ता तथा बिक्रेताहरूका लागि प्रशोधित पिउने पानी उत्पादन तथा बिक्रीवितरण गर्दा तोकिएको गुणस्तर मापदण्ड अनिवार्य पालना गर्नुपर्ने, पुराना, कुच्चिएका, टालिएका, चुहिएका वा भित्रको पानी स्पष्ट नदेखिने (अपारदर्शी) जारहरू तत्काल हटाउनुपर्ने, निर्देशनको उल्लंघन गरी असुरक्षित रूपमा पानी बिक्री गरेको पाइएमा खाद्य स्वच्छता तथा गुणस्तर ऐन, २०८१ बमोजिम कडा कानुनी कारबाही गरिनेलगायत निर्देशन जारी गरेको छ । उपभोक्ताको स्वास्थ्यसँग प्रत्यक्ष जोडिएको विषय भएकाले ढुवानी र बिक्रीका क्रममा लापरवाही नगर्न विभागले सचेत गराएको छ । विभागले उपभोक्ताहरूलाई पनि पानी खरिद गर्दा जारको अवस्था र लेबल हेरेर मात्र खरिद गर्न आग्रह गरेको छ ।
संकटमा मधेश सरकार
काठमाडौं । मधेश प्रदेश सरकार पुनः एकपटक गम्भीर राजनीतिक संकटमा परेको छ । मुख्यमन्त्री कृष्णप्रसाद यादवको नेतृत्वप्रति असन्तुष्टि जनाउँदै जनमत पार्टीले सरकारलाई दिएको समर्थन फिर्ता लिएपछि सत्ता समीकरण नै तरंगित बनेको हो । सरकारमै सहभागी जनता समाजवादी पार्टी (जसपा) र लोकतान्त्रिक समाजवादी पार्टी (लोसपा) पनि समर्थन फिर्ता लिने तयारीमा रहेको संकेतले प्रदेश सरकारको स्थायित्व थप अनिश्चित बनेको छ । यसबीच बाहिरबाट समर्थन गर्दै आएको नेकपा एमाले भने तत्काल सरकार ढाल्ने पक्षमा नदेखिए पनि ‘पर्ख र हेर’को रणनीतिमा बसेको छ । एमालेको यो अवस्थाले मधेश प्रदेशको राजनीतिक समीकरण अझै जटिल बन्ने देखिएको छ । मधेश प्रदेशमा जनमत पार्टीको समर्थन फिर्ता केवल एउटा राजनीतिक कदम मात्र होइन, यसले वर्तमान सरकारप्रतिको असन्तुष्टि औपचारिक रूपमा सार्वजनिक गरेको छ । जनमत पार्टीले मुख्यमन्त्री कृष्ण यादवले प्रभावकारी रूपमा काम गर्न नसकेको आरोप लगाउँदै समर्थन फिर्ता लिएको हो । जनमतको यो निर्णयसँगै प्रदेश सरकार अल्पमतमा पर्ने जोखिम बढेको छ । किनकि मधेश प्रदेश सभामा स्पष्ट बहुमतको समीकरण निकै नाजुक छ र केही दलहरूको समर्थन हट्नेबित्तिकै सरकार ढल्नसक्ने अवस्था रहन्छ । सरकारमै सहभागी जसपा र लोसपा पनि असन्तुष्ट देखिएका छन् । यी दुवै दलले औपचारिक रूपमा समर्थन फिर्ता लिएको घोषणा नगरे पनि आन्तरिक रूपमा त्यसतर्फ तयारी भइरहेको बताएका छन् । जसपाका नेताहरूले सरकारले गति बढाउन नसके बिहीवार समर्थन फिर्ता लिने जनाएका छन् । जसपा बाराका प्रदेश सभाका सदस्य सरोजकुमार यादवले सरकारको गति नबढे भोलिसम्म समर्थन फिर्ता लिने जानकारी दिए । जसपा र लोसपा दुवै दल मधेश प्रदेशको राजनीतिमा निर्णायक भूमिका खेल्ने हैसियतमा छन् । उनीहरूको निर्णयले सरकार टिक्ने कि ढल्ने भन्ने लगभग निश्चित हुन्छ । यदि यी दलहरूले पनि समर्थन फिर्ता लिए भने सरकारलाई समर्थन गर्ने सांसदको संख्या अल्पमतमा पुग्ने छ । एमालेको पर्ख र हेर नीति नेकपा एमाले अहिले निर्णायक भूमिकामा देखिए पनि तत्काल हस्तक्षेप गर्ने पक्षमा छैन । एमाले संसदीय दलका नेता सरोजकुमार यादवले पार्टी सरकार ढाल्ने पक्षमा नरहेको स्पष्ट पारेका छन् । उनले एमालेले वर्तमान परिस्थितिलाई नजिकबाट नियालिरहेको बताए । उनले भने, ‘सरकारको नेतृत्वप्रति स्वयं कांग्रेसभित्रै सहमति छैन भने हामीले किन जबरजस्ती बोकेर बस्ने ?’ एमालेले यसअघि नै मुख्यमन्त्रीलाई खर्च गर्ने क्षमता बढाउन र प्रशासनिक कार्यक्षमता सुधार गर्न सचेत गराएको यादवले जानकारी दिए । तर त्यसमा अपेक्षित सुधार नदेखिएको उनको भनाइ छ । कांग्रेसको दुविधा मधेश प्रदेशमा कांग्रेस नेतृत्वमै सरकार रहेको भए पनि अहिले पार्टीभित्रै मुख्यमन्त्री कृष्ण यादवप्रति एकमत देखिँदैन । प्रदेश सरकारको कार्यसम्पादन कमजोर भएको भन्दै कांग्रेस सांसदहरूले नै आलोचना गरिरहेका छन् । केही नेताहरू नयाँ नेतृत्वको विकल्प खोज्नुपर्ने पक्षमा देखिएको कांग्रेसका एक सांसदले बताए । उनले भने, ‘धेरै सांसदहरू वर्तमान मुख्यमन्त्रीको कार्य क्षमतामा विश्वस्त छैनन् । केही सांसदहरू मात्रै वर्तमान मुख्यमन्त्रीलाई नै निरन्तरता दिनुपर्ने धारणा राखेका छन् ।’ यही आन्तरिक दुविधाले कांग्रेसको रणनीति अस्पष्ट बनेको छ । अन्य प्रदेशमा एमाले–कांग्रेस सहकार्य हाल नेपालका अन्य ६ प्रदेशमा एमाले र कांग्रेसबीच सहकार्यको अभ्यास भइरहेको छ । तर मधेश प्रदेशको सन्दर्भ केही फरक रहेको एमाले संसदीय दलका मुख्य सचेतक हरिनारायण महतोले जानकारी दिए । यहाँको राजनीतिक संरचना बढी क्षेत्रीय दलहरूमा आधारित रहेकाले राष्ट्रिय दलहरूको समीकरणलाई जटिल बनाउने उनको भनाइ छ । ‘त्यसैले अन्य प्रदेशको जस्तो सहकार्य यहाँ सजिलै लागू हुने अवस्था देखिँदैन,’ महतोले भने । सम्भावित सत्ता समीकरणहरू हालको अवस्थामा मधेश प्रदेशमा केही सम्भावित परिदृश्य देखिएका छन् । पहिलो परिदृष्यमा वर्तमान सरकारको पुनर्गठन नै सवैभन्दा उपयुक्त सम्भावना रहेको कांग्रेसका नेताहरूको बुझाइ रहेको छ । ‘कांग्रेसले मुख्यमन्त्री परिवर्तन गरेर नयाँ नेतृत्व ल्याउने र असन्तुष्ट दलहरूलाई पुनः सरकारमा ल्याउने प्रयास गर्न सक्छ,’ ती सांसदले भने । नयाँ गठबन्धन सरकारका बारेमा पनि छलफल भइरहेको बाराबाट निर्वाचित जसपा सांसद सरोजकुमार यादवले बताए । उनका अनुसार एमाले, जनमत, जसपासहितका दलहरू मिलेर नयाँ सरकार गठन गर्ने सम्भावना पनि खुला छ । तर एमाले यसमा त्यति धेरै उत्सुक नभएको सांसद मञ्जु थापा मगरको भनाइ छ । उनी भन्छिन्, ‘अन्य प्रदेशमाजस्तै कांग्रेस–एमाले मिलेर जाँदा नै राम्रो हुनसक्छ।’ राष्ट्रपति शासन र प्रदेशमा केन्द्र सरकारको हस्तक्षेप पनि अर्को विकल्प भएको केही नेताहरूको बुझाइ रहेको छ । कांग्रेसका एक सांसदले ‘यदि कुनै पनि दलले बहुमतको सरकार बनाउन नसके प्रदेशमा संवैधानिक संकट उत्पन्न हुनसक्ने हुनाले प्रदेशमा केन्द्रको हस्तक्षेप बढ्नेतर्फ सचेत रहन’ आग्रह गरे । नेपालको संविधानको धारा १६८ मा प्रदेश सरकार गठन र विघटनसम्बन्धी स्पष्ट व्यवस्था गरिएको छ । यदि मुख्यमन्त्रीले बहुमत गुमाए भने प्रदेशसभामा विश्वासको मत लिनुपर्छ । विश्वासको मत प्राप्त गर्न नसकेमा प्रदेश प्रमुखले नयाँ सरकार गठनका लागि प्रक्रिया सुरु गर्छन् । कुनै पनि दलले स्पष्ट बहुमत देखाउन नसकेमा संविधानको धारा १६८ को २ अनुसार वैकल्पिक सरकार गठनको प्रयास हुने नेताहरूले बताएका छन् । त्यो नभए धारा १६८ का अन्य धारा प्रयोग हुने प्रदेश प्रमुखको कार्यालयले जनाएको छ। अन्ततः कुनै विकल्प नदेखिएमा प्रदेश सभा विघटन र मध्यावधि चुनावसम्मको अवस्था आउन सक्ने प्रदेश प्रमुखको कार्यालयका एक कानुन अधिकृतले जानकारी दिए ।
अन्टार्कटिकामा बढ्दो पर्यटनले वातावरण र स्वास्थ्य जोखिम बढायो
काठमाडौं । जलवायु परिवर्तनका कारण तीव्र रूपमा पग्लिँदै गएको अन्टार्कटिकातर्फ आकर्षण बढेसँगै त्यहाँको नाजुक वातावरणमा प्रदूषण, रोग र पारिस्थितिकीय क्षतिको जोखिम पनि उल्लेखनीय रूपमा बढ्दै गएकोमा विज्ञहरूले गम्भीर चिन्ता व्यक्त गरेका छन् । पृथ्वीको सबैभन्दा दुर्गम र संवेदनशील भूभाग मानिने यो महाद्वीपमा ‘अन्तिम अवसर’ को सोचले पर्यटकको चाप तीव्र गतिमा बढिरहेको छ । हालसम्म पर्यटक सङ्ख्या तुलनात्मक रूपमा कम देखिए पनि वृद्धि दर असाधारण छ । महँगो लागत र लामो यात्रा समयका बाबजुद पछिल्ला वर्षहरूमा अन्टार्कटिकामा जानेहरूको सङ्ख्या उल्लेखनीय रूपमा बढेको छ, जसले वैज्ञानिक र वातावरणविद्हरूलाई सतर्क बनाएको छ । सन् २०२४ मा मात्र ८० हजारभन्दा बढी पर्यटकले महाद्वीपमा अवतरण गरेका थिए भने करिब ३६ हजारले जहाजमै बसेर अवलोकन गरेका थिए । विगत तीन दशकमा पर्यटन गतिविधि दश गुणाले बढेको तथ्याङ्कले देखाउँछ र आगामी दशकमा यो सङ्ख्या तीनदेखि चार गुणासम्म बढ्न सक्ने अनुमान गरिएको छ । अन्टार्कटिकाको सबैभन्दा बढी भ्रमण गरिने क्षेत्र प्रायद्वीप हो । यो विश्वकै सबैभन्दा तीव्र तापक्रम वृद्धि हुने क्षेत्रमध्ये एक मानिन्छ । अमेरिकी अन्तरिक्ष संस्था नासाका अनुसार सन् २००२ देखि २०२० सम्म हरेक वर्ष औसत १४९ अर्ब मेट्रिक टन बरफ पग्लिएको थियो, जसले यहाँको वातावरणीय असन्तुलन झन् तीव्र बनाएको छ । पर्यटनसँगै स्वास्थ्य जोखिम पनि सतहमा देखिन थालेका छन् । हालै डच क्रूज जहाज एमभी होन्डियसमा दुर्लभ हान्ता भाइरसको घातक प्रकोप देखिएपछि विश्वव्यापी ध्यान आकर्षित भएको छ । विश्व स्वास्थ्य सङ्गठन (डब्लुएचओ) का अनुसार उक्त जहाज अप्रिल १ मा अर्जेन्टिनाको उशुइयाबाट प्रस्थान गरी अन्टार्कटिका र वरपरका टापुहरूमा पुगेको थियो । सङ्गठनले जहाजमा मानव–देखि–मानव सङ्क्रमण भएको हुनसक्ने आशङ्कामा अनुसन्धान गरिरहेको जनाएको छ । प्रारम्भिक अनुमानअनुसार पहिलो सङ्क्रमित व्यक्ति यात्रा अघि नै सङ्क्रमित भएको हुनसक्छ । यसअघि पनि क्रूज जहाजहरूमा रोगको जोखिम देखिँदै आएको छ । नोरोभाइरस जस्ता सङ्क्रमणहरू सङ्कुचित स्थानमा छिटो फैलिने भएकाले जोखिम उच्च रहन्छ । सन् २०२० मा डायमन्ड प्रिन्सेस जहाजमा कोभिड–१९ फैलिँदा त्यस्तो यात्रा कति जोखिमपूर्ण हुन सक्छ भन्ने उदाहरण देखिएको थियो । हान्ता भाइरस सामान्यतया सङ्क्रमित मुसा वा घरमुसाजस्ता जनावरहरूको फोहरबाट सर्ने भए पनि यस घटनाले नयाँ चिन्ता थपेको छ । पर्यावरणीय दृष्टिले पनि जोखिम बढ्दो छ । प्रवासी चराहरूबाट एभियन फ्लू अन्टार्कटिकासम्म पुगेको तथ्य अमेरिकी रोग नियन्त्रण तथा रोकथाम केन्द्रले पुष्टि गरिसकेको छ । यस्तो अवस्थाले पर्यटकहरूको गतिविधि अझ कडाइका साथ नियमन गर्नुपर्ने आवश्यकता औँल्याएको छ । अन्टार्कटिका टुर अपरेटरहरूको अन्तर्राष्ट्रिय सङ्घलगायत संस्थाहरूले पर्यटकहरूका लागि कडा स्वच्छता र आचरणसम्बन्धी नियम लागू गरेका छन् । भ्रमणका क्रममा जनावरहरूबाट दूरी कायम राख्ने, जमिनमा अनावश्यक सम्पर्क नगर्ने तथा जुत्ता र उपकरणहरू पूर्ण रूपमा सफा राख्ने निर्देश दिइन्छ । यात्रु र चालक दलले जुत्ता र सामग्रीमा टाँसिन सक्ने सूक्ष्म जीव, बिउ वा फोहोर हटाउन विशेष सरसफाइ उपकरण प्रयोग गर्ने गरेका छन् । विज्ञहरूका अनुसार केही पर्यटक ‘अन्तिम अवसर पर्यटन’ को मनोवृत्तिका साथ त्यहाँ पुग्ने गर्छन्, जसले पग्लिँदै गएको दृश्यलाई प्रत्यक्ष हेर्ने चाहना राख्छन् । तर यही प्रवृत्तिले दीर्घकालीन रूपमा वातावरणमा थप दबाब सिर्जना गर्ने खतरा बढाएको छ । अन्टार्कटिका सन् १९५९ को अन्टार्कटिक सन्धिअनुसार शान्तिपूर्ण र वैज्ञानिक प्रयोजनका लागि मात्र प्रयोग गरिने क्षेत्र हो । सन्धिले कुनै पनि भ्रमणले वातावरण वा वैज्ञानिक तथा सौन्दर्य मूल्यमा नकारात्मक असर पार्न नहुने स्पष्ट व्यवस्था गरेको छ । यद्यपि, पर्यटन तीव्र रूपमा बढ्दै जाँदा पुराना नियमहरू पर्याप्त नहुने चिन्ता पनि व्यक्त हुन थालेको छ । वातावरणविद्हरूले अन्टार्कटिकालाई विश्वका अन्य संवेदनशील पारिस्थितिकीय क्षेत्रसरह कडाइका साथ नियमन गर्न आवश्यक रहेको बताएका छन् । उनीहरूका अनुसार अहिलेको वृद्धि दरलाई बेवास्ता गरिए भविष्यमा यो अमूल्य भूभाग गम्भीर क्षतिको सामना गर्न सक्छ । रासस
दीपक भट्ट र सुलभ अग्रवाललाई थप १२ दिन हिरासतमा राख्न अनुमति
काठमाडौं । दीपक भट्ट र सुलभ अग्रवाललाई थप १२ दिन हिरासतमा राखेर अनुसन्धान गर्न अदालतले अनुमति दिएको छ । विशेष अदालत काठमाडौंले सम्पत्ति शुद्धीकरण (मनि लाउण्डरिङ) को कसुरमा अनुसन्धानका लागि हिरासतमा रहेका भट्ट र अग्रवाललाई १२ दिनको म्याद थप गर्न अनुमति दिएको हो । बुधबार विशेष अदालतका न्यायाधीशहरू हेमन्त रावल, डिल्लीरत्न श्रेष्ठ र विदुर कोइरालाको इजलासले अनुसन्धान कार्य नसकिएको भन्दै म्याद थपको आदेश दिएको हो ।
माग पूरा गर्न सडकमा हड्ताल गर्नुपर्ने बाध्यतालाई अन्त्य गरेँ : चन्द्र ढकाल
काठमाडौं । नेपाल उद्योग वाणिज्य महासंघका निवर्तमान अध्यक्ष चन्द्रप्रसाद ढकालले आफ्नो कार्यकालमा गरेका सम्पूर्ण वाचा पूरा गरेको बताएका छन् । महासंघको जिम्मेवारीबाट बिदा लिने क्रममा उनले निजी क्षेत्रको शिर उचो बनाउने गरी काम गरेको र चुनावी प्रतिबद्धताहरू कार्यान्वयनमा आएको दाबी गरे । निवर्तमान अध्यक्ष ढकालले महासंघ र आफ्नो जन्मवर्ष समेत एउटै हुनुलाई एक दुर्लभ र सुखद संयोगका रूपमा स्मरण गरे । उनले भने, ‘म जन्मेको वर्ष र महासंघ स्थापना भएको वर्ष एउटै परेको छ, यस्तो अवसर थोरैलाई मात्र प्राप्त हुन्छ।’ आफ्नो कार्यकालको प्रमुख उपलब्धिका रूपमा निजी क्षेत्रका माग पूरा गराउन सडकमा ओर्लिनुपर्ने र हड्ताल गर्नुपर्ने बाध्यतालाई अन्त्य गरेको उनले उल्लेख गरे । ‘निजी क्षेत्रका मुद्दा सम्बोधनका लागि अब हड्ताल गर्नुपर्ने अवस्था छैन,’ ढकालले भने, ‘नवनिर्वाचित अध्यक्षले पनि महासंघको गरिमा र शिरलाई सधैँ उचो राख्न विशेष ध्यान दिनुपर्छ ।’ उनले आफू जिम्मेवारीबाट बाहिरिए पनि निजी क्षेत्रका मुद्दा र समस्या समाधानका लागि सदैव सहयोग गर्न तत्पर रहने प्रतिबद्धता समेत व्यक्त गरे । महानिर्देशक अवस्थीको राजीनामा यसैबीच, महासंघका महानिर्देशक गोकर्ण अवस्थीले आफ्नो पदबाट राजीनामा दिएका छन् । व्यक्तिगत कारण देखाउँदै दिएको उक्त राजीनामा निवर्तमान अध्यक्ष ढकालले स्वीकृत गरिसकेका छन् । महासंघका नवनिर्वाचित पदाधिकारी तथा सदस्यहरूको प्रमाणपत्र वितरण र सपथ ग्रहण कार्यक्रम भोलि बिहान १०ः ३० बजे टेकुस्थित महासंघको सचिवालयमा हुने तय भएको छ ।
