विश्वकप क्रिकेट ट्रफी पोखरा हुँदै चन्द्रागिरिमा
काठमाडौं । अन्तर्राष्ट्रिय क्रिकेट परिषद्ले चार दिने भ्रमणका लागि नेपाल ल्याइ पुर्याएको ट्रफी आइतबार चन्द्रागिरिमा प्रदर्शन गरिएको छ । विश्वका ५ महादेश, २१ देश र ६० स्थानमा प्रदर्शन गरिने उक्त ट्रफी नेपालको नयाँ एकीकृत पर्यटकीय गन्तव्य चन्द्रागिरिमा प्रदर्शनका लागि लागिएको हो । ट्रफी बंगलादेशबाट दुबई हुँदै नेपाल ल्याइ पुर्याएको अन्तर्राष्ट्रिय क्रिकेट परिषद्को संयोजक भावना घिमिरेले बताएका छन् । यसअघि ट्रफी पश्चिम नेपालको पोखरामा प्रदर्शन गरि काठमाडौं फर्काइएको संयोजक घिमिरेले बताए । ट्रफी प्रदर्शनमा आएको अन्तर्राष्ट्रिय क्रिकेट परिषद् लगायको टोलीलाई चन्द्रागिरि हिल्स लिमिटेडका अध्यक्ष चन्द्रप्रसाद ढकाल र महाप्रवन्धक अभिषेक विक्रम शाहले चन्द्रागिरि परिसरमा स्वागत गरेका हुन् ।
नेपाल पत्रकार महासंघको साधारणसभा मंसिर १५ गतेदेखी हुने
चितवन। नेपाल पत्रकार महासंघ चितवन शाखाको साधारणसभा आउँदो मंसिर १५ गतेदेखी हुने भएको छ । शनिवार बसेको कार्यसमिति बैठकले साधारणसभा गर्ने मिति तय सहित विभिन्न निर्णयहरु समेत गरेको छ । शनिवारको बैठकले साधारणसभा सम्पन्न गर्नका लागी विभिन्न ६ उपसमिति समेत तय गरेको छ । उपसमिति संयोजकहरुमा जनक अर्याल, हरि पोख्रेल, शान्ता अधिकारी, तीर्थ नेपाल , प्रकाशमणी ज्ञवाली र प्रविण दत्त रहेका छन् । २ महिनाको अन्तरालमा बसेको बैठकले भवनको माथिल्लो तला निमार्ण गरि सभाहल बनाउने कार्यलाई तिव्रता दिने समेत निर्णयले गरेको छ , यस्तै कार्यालय ब्यवस्थापनको लागि सचिव तीर्थ नेपालको संयोजकत्वमा कायौलय ब्यवस्थापन सम्वन्धी विधान निमार्ण गर्ने निर्णय बैठकले गरेको हो । पत्रकार महासंघका केन्द्रिय अध्यक्षको प्रमुख आतिथ्थततामा हुने साधारण सभामा पत्रकार महासंघ चितवनले प्रदान गर्दै आएको विभिन्न पुरस्कारहरु समेत प्रदान गरिने भएको छ । चितवन जिल्लामा रहेको २ सय ३४ सदस्यहरुको हक हितको लागि आगामी दिनमा उपलब्धीमुलक तालिम संचालन गर्ने यस अधिको निर्णयलाई सम्वन्धी संयोजक मार्फत पुरा गर्ने प्रतिवद्धता समेत शनिवारको बैठकबाट पारित गरिएको अध्यक्ष राधेश्याम खतिवडाले जानकारी दिए ।
महालक्ष्मी विकास बैंकका ग्राहकलार्इ ग्रान्डी अस्पतालमा साढे ७ प्रतिशत छुट
काठमाडौं । महालक्ष्मी विकास बैंक लिमिटेडको डेबिट कार्ड प्रयोग गर्ने ग्राहक वर्ग तथा ग्राहकका परिवारले ग्रान्डी इन्टरनेशनल अस्पतालको उपचार सेवा शुल्कमा साढे ७ प्रतिशत छुट पाउने भएका छन् । हालै दुई संस्थाबीच उक्त सम्झौता भएको हो । उक्त सम्झौता अनुसार बैंकका डेबिट कार्ड प्रयोग गर्ने ग्राहक, ग्राहकका परिवार, कर्मचारी लगायत कर्मचारीका परिवारले ग्रान्डी इन्टरनेशनल अस्पतालमा उपचार गराउँदा सेवाशुल्कमा छुट पाउन सक्नेछन् । यसका साथै बैंकका कर्मचारी तथा कर्मचारीका परिवारले अस्पतालको सेवा शुल्कमा १० प्रतिशत छुट पाउनेछन् ।
१०० मेगावाटको सुपर त्रिशुलीको बिजुली विद्युत प्राधिकरणले किन्ने सम्झौता, ६ वर्षभित्र बल्ने
काठमाडौं । नेपाल विद्युत प्राधिकरण र प्रवद्र्धक ब्लु इनर्जी प्राइभेट लिमिटेडबीच १०० मेगावाटको सुपरत्रिशुली बिजुली खरिदबिक्री सम्झौता (पीपीए) भएको छ । विद्युत प्राधिकरण र ब्लु इनर्जीबीच आईतबार पीपीए भएको हो । जसअनुसार वर्षादको ६ महिनामा प्रतियुनिट ४ रुपैयाँ ८० पैसा र सुख्खायाममा ८ रुपैयाँ ४० पैसामा पीपीए भएको हो । बिजुलीको बजार निश्चित भएकाले आयोजना बनाउन लगानी जुटाउन सहज भएको छ । आयोजना बनाउ १६ अर्ब रुपैयाँ लाग्ने अनुमान गरिएको छ । पीपीए भएकाले अब लगानी जुटाएर निर्माण काम सुरु गरिने ब्लु इनर्जीका निर्देशक निरन्जन रेग्मीले जानकारी दिए । “यो वर्ष लगानी जुटाएर आगामी वर्षको अक्टुबरदेखि निर्माण सुरु गरी सन् २०२४ को फेब्रुअरीमा बिजुली बल्ने छ” उनले भने । आउदो जनवरीसम्म ठेकेदार छनौट गरिसक्ने तयारी भएको रेग्मीले बताए । डलरमा पीपीए नभएपछि नेपाली बैंकबाट लगानी जुटाइने उनले स्पष्टपारे । आयोजना इन्जिनियरिङ प्रक्युमेन्ट कन्ट्रयाक्ट (ईपीसी) प्रारुमा बनाउने कम्पनीको तयारी छ । आयोजनाको बाँध, विद्युतगृहलगायत अन्य पुर्वाधार बनाउनका लागि कम्पनीले निर्माण व्यवसायी छनौट गर्न लागेको हो । ब्लु इनर्जीले विद्युत विकास विभागबाट विद्युत उत्पादन अनुमतिपत्र (लाइसेन्स) पाइसकेको छ । आयोजना स्वदेशी तथा विदेशी संयुक्त लगानीमा निर्माण हुनेछ । आयोजनाबाट २०८१ देखि बिजुली उत्पादन गर्ने लक्ष्य लिइएको छ । आयोजनामा सरार्फ ग्रुपको मुख्य लगानी हुने भएको छ । यस्तै, हङकङको डोमिन्स होल्डिङस र नेपाली लगानीकर्ताको स्वपुँजी हुने छ । आयोजनालाई विश्व बैंक अन्र्तगतको अन्तराष्ट्रिय वित्त निगम (आईएफसी) को ऋण लगानी हुने उनले जानकारी दिए । यसका अतिरित्त नेपालमा होटल व्यवसाय गर्दै आएको सरार्फ र नेपालीको लगानी हुने भएको छ । सुपर त्रिशुलीको विस्तृत आयोजना प्रतिवेदन (डीपीआर) एसएनभी ल्याभिन क्यानाडाले गरेको हो । डीपीआर अनुसार आयोजनाको प्रतिमेगावाट लागत १६ करोड रुपैयाँ छ । आयोजनामा ७० प्रतिशत कर्जा र ३० प्रतिशत स्वपुँजी हुने गरी लगानी संरचना तयार पारिएको छ । आयोजनाको बाँधसंगै विद्युतगृह हुने (ड्याम टोई) प्रकृतिको छ । यस्तो संरचना हुने सुपर त्रिशुली नेपालको पहिलो जलविद्युत आयोजना हुनेछ । यस्तो बाँध भएको सुपर त्रिशुली नेपालको पहिलो आयोजना हुनेछ । नदीको वहावमा आधारित आयोजनाबाट वार्षिक ४० करोड ६७ लाख युनिट बिजुली उत्पादन हुने छ । आयोजनाको मुल संरचना राजधानीबाट १ सय किलोमिटर टाढाको दुरीमा हुने छ । चितवनको दारेचोक र गोरखाको मकैसिंहमा पर्छ । आयोजनाबाट १९ किलोमिटर टाढा आवुखैरनीमा रहेको २२० केभी क्षमताको सवस्टेशनमा बिजुली जोडिने छ ।
एनआईसी एशिया बैंक तेह्रथुमको म्याङलुङमा
काठमाडौं । एनआईसी एशिया बैंकको नयाँ शाखा कार्यालय तेह्रथुम स्थित म्याङलुङमा विस्तार भएको छ । उक्त शाखाको उद्घाटन म्याङलुङ नगरपालिकाका मेयर संजयकुमार तुम्बाहाङ्गफेले गरेका हुन् । यस शाखासहित बैंकको शाखा संख्या २६४ पुगेको छ । साथै, हाल बैंकले २६४ एटिएम, २६ वटा एक्सटेन्सन काउण्टर एवं १८ वटा शाखारहित बैंकिङ्ग ईकाई मार्फत बैंकिङ्ग सेवा प्रदान गरिरहेको छ । त्यस्तै, बैंकले अन्य विभिन्न स्थानहरुमा चाँडै नै थप शाखा कार्यालय संचालनगर्ने योजना बनाएको छ ।
नेपाल र माल्टाबीच पर्यटन, फिल्म लगायत सेवा क्षेत्रमा सम्झौता हुने
काठमाडौं । नेपाल र माल्टाबीचको आर्थिक व्यावसायिक सम्बन्ध तथा आगामी दिनमा निजी क्षेत्रका तर्फबाट हुन सक्ने सहकार्यका क्षेत्रहरूमा सम्झौता हुने भएको छ । नेपाल उद्योग वाणिज्य महासंघका अध्यक्ष भवानी राणा, महासंघका पदाधिकारी तथा नेपालका लागि गणतन्त्र माल्टाका नवनियुक्त राजदुत स्टेफन वर्गबीच महासंघ सचिवालयमा द्विपक्षीय आर्थिक-व्यासायिक भेटवार्तामा सो सम्बन्धि विस्तृत छलफल भएको हो । उक्त भेटवार्तामा, अत्यन्त न्यून रहेको द्विपक्षीय व्यापार विस्तारमा जोड दिएका छन् । महासंघमा रहेको तथ्यांक अनुसार सन् २०१६-१७ मा नेपालले माल्टाबाट २१ करोड र माल्टातर्फ करिव ३५ लाख मुल्य बराबरको वस्तु तथा सामान आयात निर्यात गरेको थियो । द्विपक्षीय भेटवार्तामा व्यापार प्रवद्र्धनका लागि दुवै देशका निजी क्षेत्रबीच आपसी सहकार्यमा जोड दिइयो । माल्टा र नेपालबीच वित्तीय क्षेत्र विकास, पर्यटन, फिल्म लगायत सेवामुलक व्यवसाय र आइसीटी क्षेत्रमा सहकार्यको बलियो सम्भावना रहेको जानकारी गराइएकाे थियाे । बैठकमा महासंघका अध्यक्ष राणा र विशिष्ट सदस्य ढकालले नेपाली निजी क्षेत्र, माल्टाले हासिल गरेको आर्थिक प्रगति नेपालमा आकर्षण गर्न तयार रहेको र त्यसका लागि नवनियुक्त राजदूतबाट सहयोगको अपेक्षा गरेको बताएका छन् । नेपालमा यतिखेर लगानीको वातावरण बन्दै गएको र पर्यटन, कृषि, पूर्वाधार, उर्जा लगायतका क्षेत्रमा लगानीको सम्भावना रहेको समेत राजदुतलाई सो अवसरमा महासंघका तर्फबाट जानकारी गराइयो । नवनियुक्त राजदूत स्टेफेनले नेपाली निजी क्षेत्रसँगको वार्ता अत्यन्त महत्वपूर्ण रहेको र के कसरी द्विपक्षीय आर्थिक व्यवसायिक सम्बन्ध विस्तार, लगानी तथा विकासको अनुभव आदान प्रदान गर्न सकिन्छ । बैठकमा महासंघका विशिष्ट सदस्य एवं पूर्व अध्यक्ष चण्डिराज ढकाल, वरिष्ठ उपाध्यक्ष शेखर गोल्छा, उपाध्यक्ष उमेशलाल श्रेष्ठ र चन्द्रप्रसाद ढकाल, नेपालका लागि माल्टाका वाणिज्यदुत तथा महासंघका तीन नम्वर प्रदेश अध्यक्ष दिनेश श्रेष्ठ, कार्यकारिणी समितिका सदस्यहरू, उद्यमी वासुदेव गौतम समेत सहभागी रहेका थिए ।
निजगढ– भरतपुर रेलमार्गको निर्माणको तयारी, डीपीआर तयारीका लागि आशयपत्र माग
काठमाडौं । कूल १३६ किलोमिटर लामो निजगढ, हेटौडा– भरतपुर रेलमार्गको विस्तृत परियोजना प्रतिवेदन (डीपीआर) तयारीका लागि रेल विभागले आशयपत्र माग गरेको छ ।मेची– महाकाली रेलमार्ग खण्डमा नै पर्ने उक्त रेलमार्गको नयाँ डीपीआर निर्माणका लागि आशयपत्र माग गरिएको विभागका सूचना अधिकारी अमन चित्रकारले जानकारी दिए । नयाँ प्रस्तावअनुसार पूर्व–पश्चिम राजमार्गको समानान्तर रुपमा रेलमार्ग गरिनेछ । चितवन राष्ट्रिय निकुञ्ज भित्रबाट रेलमार्ग निर्माण गर्दा जैविक एवं पर्यावरणको नोक्सानी हुने र ठूलो मात्रामा रुख काट्नुपर्ने भएकाले नयाँ मार्गको पहिचान गरिएको हो । निजगढ चोकबाट १० किलोमिटर पश्चिम हुँदै भरतपुर र नवलपरासीको अमरापुरी जोड्ने गरी नयाँ रेलमार्गको प्रस्ताव गरिएको हो । यसअघि निकुञ्जभित्रबाट गरिएको डीपीआरले काम नगरेपछि नयाँ तयारीका लागि आशयपत्र माग गरिएको विभागको भनाइ छ । विभागका सूचना अधिकारी चित्रकारकाअनुसार आयशपत्र पेश गर्ने अवधि केही दिन बाँकी रहेको छ । केहीले आशयपत्र बुझाएका छन्, भने केही कम्पनी सम्पर्कका आएका छन् । छानिने परामर्शदाता कम्पनीले वातावरणीय, जैविक तथा भौगोलिक रुपमा अध्ययन गर्नुपर्नेछ । यस्तै ठेक्का कागजात तथा परियोजना कार्यान्वयनका लागि कार्ययोजना समेत तयार पार्नुपर्नेछ । आशयपत्र पेश गर्ने परामर्शदाता कम्पनीमध्ये उत्कृष्ट कम्पनी छनोट गरी डीपीआरको काम सम्पन्न गरिने विभागले जनाएको छ । चितवन राष्ट्रिय निकुञ्जका सूचना अधिकारी नुरेन्द्र अर्यालले निकुञ्ज बाहिरबाट नै रेलमार्ग निर्माण गर्ने भन्ने विषयमा यसअघि नै सहमति भएको बताए। निकुञ्जबाट रेलमार्ग लैजान खोजिएको भन्दै स्थानीयवासी र सरोकार भएकाले आपत्ति जनाएपछि मार्ग नै परिवर्तन गरिएको हो । निकुञ्जका सूचना अधिकारी अर्यालले निकुञ्जको मध्यवर्ती क्षेत्रबाट भने रेलमार्ग पर्ने भएको छ । पूर्व–पश्चिम राजमार्गको समानान्तर रुपमा निर्माण हुने रेलमार्गमध्ये निजगढ– हेटौडा–भरतपुर खण्डका हाल वातावरणीय प्रभाव मूल्याङ्कनको काम समेत जारी छ । रेलमार्गको मार्ग नै परिवर्तन भए पनि नयाँ काम गर्नुपरेको विभागको भनाइ छ । आशयपत्र पेश गर्ने कम्पनीले डीपीआर तयार पारेपछि निर्माण शुरु गर्ने योजनामा विभाग छ । यस्तै विभागका सूचना अधिकारी चित्रकारकाअनुसार बुटवल पश्चिम खण्डमासमेत डिपिआरको काम जारी छ । विभिन्न चार खण्डमा विभाजन गरेर उक्त रेलमार्गको डीपीआर काम जारी रहेको र एकाध महीनाभित्रै सम्पन्न हुनेछ । मेचीबाट शुरु हुने पूर्व–पश्चिम रेलमार्ग कञ्चनपुरको गड्डाचौकीसम्म पुग्नेछ । सो रेलमार्गको कूल लम्बाइ करीब ९४६ किलोमिटर रहेको छ । रासस
नागढुंगा-नौबिसे सुरुङ मार्ग बनाउन ६ कम्पनीको आवेदन, पाँच वटा चिनियाँ र एउटा जापानी
काठमाडौं । बहुप्रतिक्षित नागढुंगा–नौबिसे सुरुङ मार्ग बनाउन ६ वटा कम्पनीले आवेदन दिएका छन् । सडक विभागको आयोजना कार्यान्वयन महाशाखाले सुरुङ मार्ग निर्माणका लागि साउन २४ गते ग्लोबल टेण्डर निकालेको थियो । तोकिएको ६० दिने अवधि कात्तिक ८ गतेभित्र ६ वटा कम्पनीहरुले निर्माणको इच्छा जाहेर गरेर आवेदन दिएका हुन् । आयोजनाका इञ्जिनियर छविलाल पौडेलका अनुसार ५ वटा चिनियाँ र एउटा जापानी कम्पनीले आवेदन दिएका हुन् । यी कम्पनीहरुको प्रारम्भिक अध्ययन गरेर छोटो सूचि तयार पारिनेछ । प्रारम्भिक छनौटमा परेका कम्पनीहरुको आर्थिक प्रस्ताव खोलेर निर्माण गर्ने कम्पनी छनौट हुनेछ । उत्कृष्ठ प्राबिधिक प्रस्ताव र न्युनतम लागतमा नागढुंगा–नौबिसे सुरुङ मार्ग निर्माणको प्रस्ताव गर्ने कम्पनीले कामको जिम्मेवारी पाउने छ । आयोजनाले सन २०१९ को जनवरीदेखि ठेकेदार परिचालन गर्ने योजना सहित काम अघि बढाएको छ । ठेकेदार परिचालन भएको ४२ महिनामा निर्माण सम्पन्न गर्ने योजना तयार भएको छ । नेपालमै पहिलो पटक सडकमा निर्माण हुन लागेको सो सुरुङ मार्गको लम्बाई २.६८८ किलोमिटर रहेको छ । दुई लेनको सुरुङमार्गमा ३.५र३.५ मिटरका दुई वटा लेन र १.५ मिटर चौडाईको इमर्जेन्सी ट्रयाक रहनेछ । सुरुङको चौडाई भने ९.५ मिटरको हुनेछ र उचाई ५ मिटरको हुनेछ । सुरुङमा पुग्न काठमाडौं तर्फ मुल सडकबाट २.३७० किलोमिटर बाटो विस्तार गरिनेछ भने धादिङ तर्फ ५६५ मिटर सडक विस्तार गरिनेछ । काठमाडौं खण्डमा पर्ने २६७ रोपनीमा र धादिङ खण्डमा पर्ने १०९ रोपनी जमिन अधिग्रहणका लागि सार्वजनिक सूचना प्रकाशित गरिसकिएको छ । आयोजनाले गत बर्ष ७० करोड मुआब्जा बाढेको थियो भने यसपाली ९० करोड रकम विनियोजन गरेको छ । ती दुबै ठाउँको जमिन अधिग्रहण भने सरकारले आफ्नै श्रोतबाट गरिरहेको छ । काठमाडौं तर्फ सुरुङ मार्गको प्रस्थान विन्दु टुटीपाखा हुनेछ भने धादिङमा सिस्नेखोला हुनेछ । सुरुङ मार्गमा इन्धन बोक्ने गाडी तथा मोटरसाइकललाई प्रवेश निषेध गरिनेछ । सुरुङ मार्गको उपयोग वापत २५ रुपैंयाँ शुल्क असुल्ने प्रारम्भिक सोँच तयार भएको छ । मार्ग निर्माणका लागि जापानले ०.०१ प्रतिशतको ब्याजदरमा ४० बर्षका लागि ऋण दिएको छ । जापानले १६ अर्ब २८ करोड रुपैंयाँ ऋण सहयोग उपलब्ध गराएको हो । निर्माण सम्पन्न भएको १० बर्षपछिसम्म ऋणको सावाँ तथा ब्याज तिर्नुपर्ने छैन् । त्यसपछिको ३० बर्ष भित्र भने नेपालले सावाँ तथा ब्याज दुबै भुक्तानी गरिसक्नुपर्नेछ ।
