दराजले ल्यायो नेपालमा पहिलोे पटक “ब्राण्ड डे”, जुनसुकै एक ब्राण्डमा विशेष छुट पाइने
काठमाडौं । नेपालको एक प्रमुख अनलाइन सपिङ्ग गन्तव्य, दराजले पहिलो पटक ब्राण्ड डे उत्सव ल्याएको छ । जसमा एक दिनमा एक प्रख्यात ब्राण्डले ग्राहकहरुलाई आकर्षक एवंम् विशेष छुट दिने छ । यो उत्सवले अनलाइन सपिङ्गको अनुभूतिलाई अझ व्यापक र उत्साहित बनाउने छ । यो ब्राण्ड डे हरेक महिनाको १ र १५ गते आयोजना गरिनेछ र पहिलो पटक यो किनमेल दिवस फेब्रुअरी १, २०१९ बाट शुरु हुनेछ । २४ घण्टाको सीमित अवधिभित्र उपभोक्ताहरुले नाम चलेका प्रसिद्ध ब्राण्डहरु जस्तैः क्लोभिया, क्यालिबर, मन्त्र, गोल्डस्टार, अमेरिकन टुरिस्टर, टाइटन, बाल्त्रा, शायोमि, मेबेल्लाइन, कन्भर्स, रँगोली, सोनी, लॉरियल पेरिस र अरु पनि धेरै ब्राण्डहरु आकर्षक बार्गेन डिलमा उपलब्ध हुनेछ । एक प्रमुख अनलाइन सपिङ्ग केन्द्र दराजले नेपालमा पहिलो पटक ब्राण्ड डे उत्सव प्रारम्भ गर्दैछ जसमा एक ब्राण्डले एक दिनमा विशेष महत्व पाउनेछ । उपभोक्ताहरुले पनि सो दिनमा अद्भुत किनमेलको अनुभव संगाल्न सक्ने कम्पनीले जनाएको छ । साथै, सो दिन आकर्षक डिलहरु, मनोरन्जनात्मक खेलहरु र संग्रहणीय भाउचरहरुद्वारा ग्राहकहरुलाई उत्साहित तथा संलग्न गराइने दराजका सह प्रबन्ध निर्देशक लीनो एह्लेरिङले भने ।
वैदेशिक रोजगारीमा जानेलाई सञ्चयकोषमा आबद्ध गराउन सुझाव
काठमाडौँ । विभिन्न कामका सिलसिलामा विदेशमा रहेका नेपालीलाई सञ्चय कोष तथा सामाजिक सुरक्षाको दायरामा ल्याउन सुझाइएकोे छ । श्रम, रोजगार तथा सामाजिक सुरक्षा मन्त्रालयका सचिव महेशप्रसाद दहालको संयोजकत्वमा गठित कार्यदलले तयार गरेको प्रतिवेदनले वैदेशिक रोजगारीमा रहेका व्यक्तिको सामाजिक सुरक्षाको आवश्यकतालाई सम्बोधन गर्न सरकारसमक्ष सिफारिश गरेको हो । वैदेशिक रोजगारीका क्रममा रहेका करीब ४३ लाख युवालाई यस अभियानमा सहभागी गराउँदा दीर्घकालीन रुपमा आन्तरिक पूँजी निर्माण गर्न तथा विप्रेषण आप्रवाहमा देखिएको समस्यालाई समाधान गर्नसमेत सहयोग पुग्ने प्रतिवेदनमा औँल्याइएको छ । वैदेशिक रोजगारीमा रहेका व्यक्तिलाई सञ्चय कोष तथा सामाजिक सुरक्षाको योजनामा चरणबद्ध रुपमा आबद्ध गर्न सिफारिश गरिएको छ । पहिलो चरणमा नेपालबाट श्रम स्वीकृति प्राप्त गरी नेपाल सरकारले वैदेशिक रोजगारका लागि खुला गरेका देशमा वैदेशिक रोजगारीमा गएका वा जाने नेपाली श्रमिकलाई समेट्न प्रतिवेदनले सुझाव दिएको छ । दोस्रो चरणमा विदेशमा व्यापार÷व्यवसाय गरिरहेका नेपाली नागरिक र तेस्रो चरणमा गैरआवासी नेपालीलाई योजनामा समेट्न सिफारिश गरिएको संयोजक दहालले जानकारी दिए । प्रतिवेदनमा योजनाको कार्यान्वयन गर्दा प्रारम्भमा ‘पाइलट प्रोजेक्ट’ का रुपमा वैदेशिक रोजगारीमा धेरै नेपाली रहेकामध्येबाट उपयुक्त देश छनोट गरी कार्यक्रम शुरु गर्न सुझाव दिइएको छ । त्यो मुलुकबाट प्राप्त अनुभवको आधारमा अन्य मुलुकमा पनि त्यस्तो योजना क्रमशः विस्तार गर्दै लैजान सरकारसमक्ष सिफारिश गरिएको छ । कार्यदलले योजना प्रारम्भ भएपछि श्रम स्वीकृति प्रदान गर्दाकै अवस्थामा ती व्यक्तिलाई योजनामा सूचीकृत गर्ने र योजना लागू हुनुपूर्व नै वैदेशिक रोजगारीमा रहेका कामदारका हकमा श्रम स्वीकृति नवीकरण गर्दा वैदेशिक रोजगार विभाग तथा सम्बन्धित देशमा रहेका नेपाली नियोगमार्फत सूचीकृत हुने व्यवस्था मिलाउन सुझाव दिइएको छ । प्रतिवेदनमा उल्लेखित योजनामा सहभागी हुनेलाई वार्षिक न्यूनतम २४ हजार र अधिकतम तीन लाखको सीमाभित्र रही आफ्जो वित्तीय क्षमताअनुसार योजनामा योगदान गर्ने व्यवस्था मिलाउन सिफारिश गरिएको छ । त्यस्तो योजनामा मासिक, त्रैमासिक, अर्धवार्षिक वा वार्षिक रुपमा योगदान रकम जम्मा गर्न सक्ने व्यवस्था गर्नुपर्ने छ । योगदानको रकम सम्बन्धित रोजगारदाताले नै जम्मा गरिदिनुपर्ने व्यवस्था मिलाउन र योजनाको कार्यान्वयन र योगदानको रकम सङ्कलनलाई व्यवस्थित बनाउन सरकारीस्तरमै वार्ता गरी दुई सरकारबीच समझदारी कायम गर्नुपर्ने प्रतिवेदनमा औँल्याइएको छ । योजनालाई वैदेशिक रोजगारीमा रहेका व्यक्ति तथा परिवारमैत्री एवं आकर्षक बनाउन उपयुक्त प्रतिफल दिने व्यवस्था गर्ने तथा परिवारको कम्तीमा एक जना सदस्यको स्वास्थ्य वा दुर्घटना बीमा जस्ता कार्यक्रम समावेश गर्न पनि कार्यदलले सुझाव दिएको छ । कार्यक्रममा सहभागी हुने व्यक्तिका नेपालमा रहेको परिवारका सदस्यले आयआर्जन हुने वा स्वरोजगार सिर्जना हुने प्रकृतिका कुनै आयमूलक व्यापार वा व्यवसाय गर्न चाहेमा सापटी प्रदान गर्ने व्यवस्था मिलाउनसमेत प्रतिवेदनले औँल्याएको छ । त्यस्ता परिवारका सदस्यको शिक्षा तथा स्वास्थ्य उपचारका लागि रकमको आवश्यकता परेमा वा घर जग्गा खरिद वा आवास निर्माण क्षेत्रमा लगानी गर्न चाहेमा योगदानकर्ताको व्यक्तिगत खातामा मौज्दात रकमको आधारमा विशेष सापटी प्रदान गर्ने व्यवस्था मिलाउन सिफारिश गरिएको कार्यदलका संयोजक दहालले जानकारी दिए । योगदानकर्ता ६० वर्ष पूरा भएपछि शारीरिक एवं मानसिक अशक्तता भएमा वा वैदेशिक रोजगारी अन्त्य गरी स्वदेश फर्किएमा वा नियमित तीन वर्षसम्म योगदान नगरे र योगदानकर्ताको मृत्यु भएमा एकमुष्ट भुक्तानी गर्ने व्यवस्था मिलाउन सरकारलाई सिफारिश गरिएको छ । प्रतिवेदनमा योगदानकर्ताले चाहेमा योजनाको रकम निवृत्तिभरण योजनामा रुपान्तरण गर्न सक्ने बाटोसमेत खुला राखिएको छ । प्रतिवेदनको पूर्णरुपमा कार्यान्वयन गर्ने कानूनी आधार निर्माण गरी विसं २०७६ साउन १ गतेदेखि लागू गर्ने वातावरण सिर्जना गर्न सरकारलाई सुझाव दिएको छ । कार्यदलका संयोजक एवं श्रम मन्त्रालयका सचिव दहाल वैदेशिक रोजगारीमा गएका व्यक्तिलाई सामाजिक सुरक्षा योजनामा नसमेटिएसम्म संविधान प्रदत्त सामाजिक सुरक्षाको हकले मूर्त रुप पाउन नसक्ने उल्लेख गर्दै प्रतिवेदनका सिफारिश कार्यान्वयनबाट मात्रै संविधान प्रदत्त हकको सुनिश्चितता हुने बताउँछन् । वैदेशिक रोजगारीमा संलग्न व्यक्तिलाई सामाजिक सुरक्षा योजनामा आबद्ध गराउन सञ्चय कोष तथा सामाजिक सुरक्षा योजनाको उपर्युक्त खाका तर्जुमा गरी प्रतिवेदन पेश गर्न श्रम रोजगार तथा सामाजिक सुरक्षामन्त्री गोकर्ण विष्टको मन्त्रिस्तरीय निर्णयअनुसार श्रम मन्त्रालयका सचिवको संयोजकत्वमा कार्यदल निर्माण गरिएको थियो । कार्यदलमा परराष्ट्र मन्त्रालय, अर्थ मन्त्रालय, नेपाल राष्ट्र बैंक, कर्मचारी सञ्चय कोष, सामाजिक सुरक्षा कोषको प्रतिनिधि र विज्ञ सहभागी हुनुहुन्थ्यो । कार्यदलले आजै एक कार्यक्रमका बीच श्रममन्त्री विष्टललाई प्रतिवेदन बुझाएको छ । प्रतिवेदनमा वैदेशिक रोजगारीमा रहेका व्यक्तिका लागि सञ्चय कोष तथा सामाजिक सुरक्षा योजनाको खाका, सो योजना कार्यान्वयन गर्ने संयन्त्र, विभिन्न निकायको जिम्मेवारी र समयसीमासहितको कार्यान्वयनको योजना एवं कार्यान्वयनका लागि आवश्यक पर्ने नियमावलीको मस्यौदासमेत प्रस्तुत गरिएको संयोजक दहालले जानकारी दिए । कार्यान्वयन गर्न सरकार दृढः मन्त्री विष्ट प्रतिवेदन ग्रहण गर्दै मन्त्री विष्टले कार्यदलले गरेका सिफारिश कार्यान्वयन गर्न सरकार दृढ रहेको बताए । प्रतिवेदनलाई तत्काल कार्यान्व्यनमा लैजाने प्रतिबद्धता व्यक्त गर्दै उनले भने, “प्रतिवेजनमा प्रस्तुत सुझावलाई गम्भीरताका साथ अध्ययन गरी सिफारिश गरिएका पक्षलाई कार्यान्वयन गर्न आवश्यक ऐन, कानून निर्माण गरिनेछ ।” रासस
काठमाडौंमा लेखा पेशा र अबको बाटोसम्बन्धी सम्मेलन हुँदै
काठमाडौं । नेपालमा लेखा पेशा र अबको बाटोसम्बन्धी एकदिवसीय सम्मेलन काठमाडौंमा गरिने भएको छ । नेपाल चार्टर्ड एकाउन्टेन्ट्स संस्था (आइक्यान) ले समृद्ध नेपालको यात्रा तय गर्नको लागि स्वच्छ र विश्वास योग्य लेखा परीक्षण आवश्यक रहेको भन्दै लेखा व्यवसाय र अबको बाटो (अकाउन्टिङ प्रोफेसन एण्ड वे फरवार्ड) सम्मेलन गर्न थालेको हो । संस्थाको २२ औँ वार्षिक उत्सवको अवसर पारेर अर्थमन्त्री र नियामक नियकाहरूको उपस्थितिमा १७ माघमा काठमाडौंमा गरिने सम्मेलनलाई चार शत्रमा विभाजित गरिएको छ । सम्मेलनको पहिलो सत्रमा डाटा सुरक्षा (ब्ल्किङ) र वित्तीय बजारको बारेमा जानकारी गराइने कार्यक्रम रहेको छ । नेपालको वित्तीय बजारमा ब्ल्किङको अवधारणा प्रयोगमा ल्याउन कसरी सहजता हुन्छ भन्ने विषयमा कार्यपत्र प्रस्तुत गर्ने कार्यक्रम रहेको छ । सम्मेलनको दोस्रो शत्रमा लेखामा कसरी गुणस्तरीयता प्रदान गर्न सकिन्छ र कुन आधारमा गुणस्तरको आश्वस्तता दिलाउन सकिन्छ भन्ने विषयमा जानकारी गराउने तथा कार्यपत्र प्रस्तुत गरिने कार्यक्रम रहेको छ । तेस्रो शत्रमा संस्थागत सुशासनको लागि व्यवसायिक लेखापालकहरुको भूमिकाका साथै संस्थागत सुशासन रिपोर्टिङ सम्बन्धमा जानकारी गराउने आइक्यानका अध्यक्ष जगनाथ उपाध्यायले जानकारी गराए । त्यस्तै एकदिवसीय कार्यक्रमको अन्तिम शत्रमा नेपालमा बैंक तथा वित्तीय संस्था र बीमा क्षेत्रमा लागू गरिएका नेपाल वित्तीय प्रतिवेदनमाका सम्बन्धमा अनुभव आदान प्रदान गरिने कार्यक्रम राखेको छ। जसमा बैक तथा बित्तीय संस्थाका प्रतिनिधहरुका साथै बीमा क्षेत्रका प्रतिनिधिहरुको सहभागिता रहने जनाइएको छ । यो सम्मेलनले चार्टर एकाउन्टे क्षेत्रमा देखिएको समस्या र समधानको उपायका साथै आम जनाताका चार्टर्ड एकाउन्टेले गरेको कामलाई विश्वासमय दिलाउन सहयोग पुग्ने अध्यक्ष उपाध्यायले बताए । के हो आइक्यान र के गर्छ काम? नेपाल चार्टर्ड एकाउन्टेन्ट्स ऐन, २०५३ को परिच्छेद ३ ले परिषद्को गठनको व्यवस्था गरेको छ र दफा ७ ले परिषद्को गठन र दफा ७ (३) ले चार्टर्ड एकाउन्टेन्ट सदस्यहरुले आफू मध्येबाट निर्वाचित १० जना, दर्तावाला लेखापरीक्षक सदस्यहरुले आफू मध्येबाट निर्वाचित ४ जना र महालेखा परीक्षकको सिफारिशमा नेपाल सरकारले लेखा सम्बन्धी अनुभव भएका व्यक्तिहरु मध्येबाट मनोनित गरेका ३ जना सदस्य सहित १७ जना परिषदमा रहने व्यवस्था छ । परिषद्मा १ अध्यक्ष, १ उपाध्यक्ष र १५ सदस्य रहने व्यवस्था छ । संस्थामा हाल ४ वटा स्थायी समिति र २५ वटा अस्थायी समिति गरी २९ समितिहरु रहेका छन् । ती समितिहरुले परिषद्को रेखदेखमा कार्य संचालन गर्ने गर्दछन् । हाल संस्थामा १३३७ चार्टर्ड एकाउन्टेन्ट्स सदस्य र ७,२५९ दर्तावाला लेखापरीक्षक सदस्य रहेका छन् भने चार्टर्ड एकाउन्टेन्सी शिक्षाको विभिन्न तहमा गरी करीव १४,००० विद्यार्थी अध्यनरत रहेका छन् ।
कोका–कोला मःमःउत्सव अभियानको टिभी कमर्सियल सार्वजनिक
काठमाडौँ । ग्राहकहरुको खुसी र भावनाको कदर गर्दै आएको सर्वाधिक रुचाइएको प्रिय पेय पदार्थ कोका–कोलाले मःमःउत्सव अभियानको लागि टिभी कमर्सियल सार्वजनीक गरेको छ । यस वर्ष कोका–कोलाले विगत तीन वर्षको भन्दा भिन्न स्लोगनको साथ कोका–कोला मःमःउत्सव मनाउन लागेको हो । चाथौँ मःमःउत्सवका लागि स्लोगन “कोक र मःम पर्फेक्ट जोडी” रहेको छ । यस अभियानले उपभोक्ताहरुमा कोक र मःमका विभिन्न परिकारको मज्जा लिनुको साथै नयाँ अनुभव थप्नेछ । मःमः उत्सवको टिभीसीमा कोका–कोला नेपालकी ब्राण्ड एम्बेस्डर प्रियंका कार्कीपनि देखिएकी छिन् । प्रियंका प्रत्येक वर्ष मःमउत्सवमा सहभागी भएपनि पहिलो पटक टिभीसीमा नायक आयुष्मान देशराज जोशी र नायक आकाश श्रेष्ठसँग अभिनय गरेका हुन् । टिभी कमर्सियलको शुरुवातमा प्रियंका आयुष्मानसँग केहि कुरामा रिसाइरहेकी छिन् भने आयुष्मान उनीसँग माफी मागिरहेका छन् । रेस्टुरेन्टका मालिक आकाश ग्राहकहरुका लागि कोक र मःम सर्भ गर्न व्यस्त छन् । आकाशले प्रियंका र आयुष्मानलाई देख्छन् र कोक र मःम ल्याएर दिन्छन् तर, उनीहरुले कोक र मःमलाई टेबलबाट टाढा हटाउछन् । त्यसपछि मःमबाट निस्किएको बाफ बाहिर निस्किनुको सट्टा भित्र पस्छ । र कोकले पनि आशु खसाल्छ (कोकबाट आशु झरेको संकेत गर्छ) । यो देखेर आकाशले कोक र मःमलाई एकै ठाउमा ल्याएर राखीदिन्छन् । जसले गर्दा प्रियंका र आयुष्मानलाई नजीक ल्याउछ । उनीहरु खुसी हुँदै एकअर्कासँग कोक र मःम बाँडेर खान्छन् । यस अभियानको बारेमा बोल्दै नेपालका लागि कोका–कोलाका कन्ट्री डाइरेक्टर अम्बुज सिंहले भने, “कोक र मःम एकसाथ खादा यसले खानाको मज्जा बढाएर पर्फेक्ट जोडी बनाउछ । हामीले विश्वव्यापी सोचलाई स्थानीय रुपान्तरण गर्ने प्रयत्न गरेका छौं र यस अभियान मार्फत मःमःसँग कोक खाँदा त्यसको स्वाद झन् बढ्ने विषयमा बताउन चाहान्छौँ ।
‘रेनो डस्टर आरएक्सएस’ गाडी नेपाली बजारमा, यस्ता छन् आकर्षक विशेषता
काठमाडौं । रेनोको नेपालका लागि आधिकारिक वितरक एड्भान्स अटोमोबाईल प्रा. लि. (बिशाल ग्रुपको सहायक कम्पनी) ले रेनो डस्टर आरएक्सएस नेपाली बजारमा सार्वजनिक गरेको छ । नक्सालको स्टेट अफ द आर्ट शोरुममा मंगलबार एक कार्यक्रम गरि रेनो डस्टर आरएक्सएसको बिक्री वितरण शुरु गरेको हो । रेनो डस्टर आरएक्सएस पेट्रोल भेरियन्टमा उपलब्ध रहेको छ । यसमा स्मार्टफोन भ्वाइस पहिचान प्रणाली, यूएसबी र अक्स इन कनेक्टीभिटी र ७ इन्चको टच स्क्रीन इन्फोटेन्मेन्ट कम्प्याटिबल ब्लुटुथ जडान गरिएको छ । यसको साथै, आरएक्सएस संस्करणमा डियोल एयरब्याग, एबीएस, हिल एसिस्ट, इन्जिन मोबिलाइजर, सेन्ट्रल लकिङ, चाइल्ड सेफ्टी लक, पावर डोर लक, गन मेटल फिनिस सिङ्गल ह्वील लगायतका फिचर रहेका छन् । यसमा स्टीरिङ अडियो र फोन नियन्त्रण गर्ने, गियर रिडिङ ल्याम्प र जीपीएस नेभिगेसन जस्ता विशेषता रहेको छ । डस्टर आरएक्सएस संस्करण १.५ डीसीआई इन्जिनद्वारा संचालित छ जसले ८५ एचपीपावर र २०० एनएम टर्क जेनेरेट गर्छ । यस संस्करणमा एयर कन्डिसनर, हिटर, स्टेरिङ एडजस्टमेन्ट, स्टेरिङ माउन्ट अडियो, पवर सप्लाई पोर्ट, रियर आर्मरेष्ट, इलेक्ट्रीकल्ली एडजस्टेवल रियर भ्यू मिरर लगायतका विशेषताहरु छन् । डस्टर एक्सआरएसमा अगाडि डिस्क ब्रेक र पछाडि ड्रम ब्रेक रहेको छ र अलोय ह्वीलसमेत रहेको छ । डस्टर एक्सआरएस भरपर्दो, विश्वासिलो पहुँच योग्य प्रिमियम एसयूभी हो । यसमा उत्कृष्ट इन्जिनियरिङ, स्टाईल, सुरक्षा र सुलभ तथा आरामदायी सुविधाहरु समावेश गरिएको कम्पनीले जनाएको छ । डस्टर एक्सआरएसले दम्दमर प्रदर्शन, ड्राइभ क्षमता र दक्षता प्रदर्शन गर्छ । फ्रान्सेली अटोमोबाइल निर्माताले केडब्लूआईडीको सहकार्यमा २०१६ देखि नेपाली बजारमा रेनो डस्टरको बिक्री वितरण शुरु गरेको थियो ।
छात्रा शौचालय बनाउन एभरेष्ट बैंकले गर्यो चार लाख सहयोग
काठमाडौँ । एभरेष्ट बैंकले नवलपरासी जिल्लामा शौचालय निर्माण गर्न जोन्टा क्लबलाई चेक हस्तान्तरण गरेको छ । एक समारोहका बीच बैंकका प्रमुख कार्यकारी निर्देशक सोमेश्वर सेठले क्लबका प्रतिनिधि सिमा गोल्छा र समीना श्रेष्ठलाई सरकारी स्कुलमा महिला विद्यार्थीका लागि शौचालय निर्माण गर्न चार लाख रुपैयाँको चेक हस्तान्तरण गरेका हुन् । स्वच्छता र शौचालय अभावका कारण महिला विद्यार्थीको स्कुल छोड्ने संख्यामा सुधार आउने बैंकले आशा व्यक्त गरेको छ । कार्यक्रममा बैंकका डीजीएम गिरिश कोहली, समीना श्रेष्ठ, नवलपरासी शौचालय निर्माण प्रोजेक्टका सदस्य र अन्य प्रतिष्ठित व्यक्तिहरुको पनि उपस्थिति रहेको थियो । बैंकका ग्राहकहरुको संख्या १० लाख भन्दा बढि रहेको छ । हालै भएको क्यामेलस् रेटिङमा एभरेष्ट बैंक दोस्रो स्थानमा पर्न सफल भएको छ ।
फास्ट ट्रयाक जिरो प्वाइन्टः खोकनामा छैन अवरोध
काठमाडौं । मंगलबार मध्यान्ह संघिय संसदको विकास तथा प्रबिधी समितिका एक दर्जन सांसद, पत्रकार र नेपाली सेनाको टोली फास्ट ट्रयाकको जिरो किलोमिटरका रुपमा अघि सारिएको खोकनाको स्थलगत अनुगमन निस्कियो । सिंहदरबारबाट हिडेको टोलीले खोकनामा सेनाले स्थापना गरेको आधार शिविरमा सेनाका तर्फबाट प्रारम्भिक ब्रिफिङ लियो । खोकना क्याम्पका कमाण्डर भिमसेन थापाले आफ्नो कार्यक्षेभित्र पर्ने ७.६ किलोमिटर खण्डको अवस्थाबारे जानकारी गराए । सांसदहरुले केहि जिज्ञासा राखे । ति जिज्ञासाहरुको पनि सेनाको फास्ट ट्रयाक आयोजनाका प्रमुख योगेन्द्र खाँण र ड्रईङ एण्ड डिजाइन शाखा प्रमुख सरदलाल श्रेष्ठले जवाफ दिए । तारबार गरेर सामान्य टेण्ड टाँगीएको सेनाको क्याम्पमा चियापानको सामान्य कार्यक्रम सकेर संसदिय टोली सिकाली मन्दिर तर्फ अघि बढ्यो । समिति सभापति कल्याणी खड्काले हिडेरै सिकाली मन्दिर जाने प्रस्ताव गरिन् । सभापतिको प्रस्ताव अनुसार टोली बागमति नदिको किनारै किनार करिब २ किलोमिटर हिडेर डाँडामा रहेका सिकाली मन्दिर पुग्यो । मन्दिर पुग्दा ललितपुरको सोही क्षेत्रका प्रदेश सांसद जीवन खड्का, ललितपुर महानगरपालिका वडा २१ का अध्यक्ष रविन्द्र महर्जन, जन सरोकार समितिका संयोजक नेपाल डंगोलसहित २ दर्जन स्थानीय भेला भएका थिए । संसदिय टोलीले सिकाली मन्दिरबाट दायाँ बायाँ हेर्यो । मन्दिर जोगाउन सेनाले गरेको प्रयासबारे जानकारी लियो । सेनाले सिकाली मन्दिरलाई जोगाउनकै लागि बागमति नदिमा दुई वटा पुल निर्माण गरेर फास्ट ट्रयाकलाई काठमाडौं तर्फ मोडिएको जानकारी दियो । त्यसपछि सुरु भयो स्थानीयसँगको छलफल । सुरुमा प्रदेश सांसद जीवन खड्काले आफ्ना कुरा राखे । उनले आफुहरु फास्ट ट्रयाक बिरोधी नभएको सुरुमै स्पष्ट पारे । ‘हामी फास्ट ट्रयाकका बिरोधी होइनौं, खाली स्थानीय बासिन्दाका जाहेग सुनिदिनुपरो भन्ने हो, मुआब्जा केहि वृद्धि गरिदिनु परो भन्ने हो’, प्रदेश सांसद खड्काले भने । उनले खोकना क्षेत्रमै नयाँ शहर, बाहिरी चक्रपथ, विद्युत प्रसारण लाइन, बागमति करिडोर, फास्ट ट्रयाक लगायतका आयोजना परेकाले स्थानीय बासिन्दामा थातथलो छाड्नुपर्ने त होइन भन्ने त्रास पैदा भएको बताए । ‘जनतामा थातथलो छाड्नुपर्ने त होइन भन्ने डर छ, यस्ता कुराको सम्बोधन गर्नुपर्छ’, खड्काले भने । खड्कापछि ललितपुर महानगरपालिका वडा २१ का अध्यक्ष रविन्द्र महर्जनले आफ्ना कुरा राखे । उनले पनि मुआब्जा रकम थोरै भएकोमा गुनासो पोखे ।‘हामी फास्ट ट्रयाकका बिरोधी होइनौं, विकासले नागरिकको घरबास उठाउनु हुन्न भन्ने मात्रै हो, मुआब्जा थोरै भयो’, वडा अध्यक्ष महर्जनले भने । महर्जनले बोले लगत्तै जन सरोकार समितिका अध्यक्ष नेपाल डंगोलले आफ्ना कुरा राखे । फास्ट ट्रयाकको काठमाडौं प्रस्थान विन्दु फर्सिडोल सार्नुपर्ने तर्क राखेका उनी पनि अन्ततः आफु फास्ट ट्रयाक बिरोधी नभएको स्पष्टीकरण दिन बाध्य भए । स्थानीयहरुको व्यापक बिरोध र आलोचना सामना गर्नुपर्ने पुर्वानुमान गर्दै स्थलगत अध्ययनमा गएको संसदिय टोलीको अनुमान गलत सावित भयो । ‘नागरिकमा व्यापक असन्तुष्ठि होला, थुप्रै मान्छे भेला भएर नाराबाजी गर्लान भन्ने लागेको थियो, दुई दर्जन नागरिकले आफ्ना कुरा राख्नुभयो, नागरिकको समर्थन देखेर उत्साहित भयौं’, समिति सभापति कल्याणी खड्काले भनिन् । नेपाली सेनाले खोकना खण्ड अधिग्रहण गर्नुपर्ने जमिनमध्ये २४१ रोपनी ९ आना ३ दामको मुआब्जा वितरण गरिसकेको जानकारी दिएको छ । अब जम्मा २६७ रोपनी १० आना ३ पैसा ३ दामको मात्रै मुआब्जा वितरण गर्न बाँकी रहेको जानकारी दिएको छ । सोमध्ये पनि माघ १४ गतेसम्ममा थप ८ करोड ९५ लाख मूल्य बराबरको जमिनको मुआब्जा लिनका लागि स्थानीय बासिन्दाले सहमति दिएको पनि खोकना क्याम्पका कमाण्डर भिमसेन थापाले जानकारी दिए । खोकनाको स्थलगत अध्ययन गरेर फर्किएको संसदिय टोलीका सदस्यहरु भन्दै थिएः खोकनामा फास्ट ट्रयाक बिरोधी आवाज सुनिएन ।
नेपाल बैंक र सिटिजन लाइफ इन्स्योरेन्सबीच बैंकास्योरेन्स सम्झौता
काठमाडौं । नेपाल बैंक र सिटिजन लाइफ इन्स्योरेन्सबीच बैंकास्योरेन्स सम्झौता गरेको छ । नेपाल बैंकका कामु प्रमुख कार्यकारी अधिकृत देवेन्द्र प्रताप शाह र सिटिजन लाइफ इन्स्योरेन्सका प्रमुख कार्यकारी अधिकृत पोषकराज पौडेलले उक्त सम्झौतापत्रमा हस्ताक्षर गरेका हुन् । सम्झौता अनुसार ग्राहकहरुले नेपाल बैंकका देशभरि संचालनमा रहेका १५८ शाखाहरुबाट सिटिजन लाइफ इन्स्योरेन्सको जीवन बीमालेख प्राप्तगर्न, प्रिमियम भुक्तानी गर्न, दाबी गर्न लगायत सम्पूर्ण जीवन बीमासेवाहरु प्राप्त गर्न सकिने व्यवस्था रहेको छ । जीवन सारथी योजना अन्तर्गत बीमितले ९० वर्षको उमेरसम्म पैसा पाउने छन् भने क्रिटिकल केयर प्लस मार्फत बीमितले सर्वाधिक २० घातक रोगहरु विरुद्ध औषधि–उपचार खर्च प्राप्त गर्नेछन् । यसै सम्झौतासँगैनेपाल बैंककाग्राहकहरुलेपनियस नौलो योजनाहरुको लाभ उठाउन सक्नेछन् । नेपालभरका ग्राहकलाई सेवा प्रदान गर्ने क्रममा सिटिजन लाइफ इन्स्योरेन्स कम्पनीले बैंकका ६० वटा भन्दाबढि शाखाहरु संचालनमा ल्याइसकेको छ।
