६ महिनामा ५ अर्ब ९५ कराेड रूपैयाँ बराबरकाे कृषि बीमा, बीमा शुल्क संकलन ४२% ले वृद्धि
काठमाडौ । बाली तथा पशुपन्छी बीमामा आकर्षण बढ्दै गएको छ । बीमा समितिका अनुसार बाली तथा पशुपन्छी बीमा गर्नेको संख्या बढ्दै गएको छ । उक्त बीमाकै लागि सरकारले ७५ प्रतिशत अनुदानको समेत व्यवस्था गरेको छ । चालु आर्थिक बर्षको ६ महिनामा ५ अर्ब ९५ करोड ५८ लाख ६० हजार ८ सय २५ रुपैयाँ बराबरकाे बाली तथा पशु बीमा भएकाे छ । यस्तै, सोही अवधिमा बीमा शुल्क भने २७ करोड ६० लाख ७ सय ४६ रुपैयाँ संकलन भएको छ । साथै, बीमा लेख संख्या ३५ हजार ५ सय ५५ पुगेको छ । चालु आर्थिक बर्षको पहिलो त्रैमासमा मात्रै बाली तथा पशुपन्छी बीमाङ्क ४ अर्ब ६८ करोड ३० लाख ३९ हजार ६ सय १० रुपैयाँ थियो । दौश्रो त्रैमास अर्थात पुस मसान्तसम्ममा ५ अर्ब ९५ करोड ५८ लाख ६० हजार ८ सय २५ रुपैयाँ बराबर बीमा भएकाे हाे । चालु आर्थिक वर्षको पहिलो त्रैमासमा २१ करोड ७५ लाख ५० हजार ६ सय ९७ रुपैयाँ बीमा शुल्क संकलन भएको थियो भने दोश्रो त्रैमास पुस मसान्त सम्ममा २७ करोड ६० लाख ७ सय ४६ रुपैयाँ संकलन भएको बीमा समितिले उपलब्ध गराएको तथ्याङ्कमा उल्लेछ छ । साथै, पहिलो त्रैमासमा बीमालेख संख्या २७ हजार ८ सय १४ रहेको थियो भने दोस्रो त्रैमाससम्म आइपुग्दा वृद्धि भएर ३५ हजार ५ सय ५५ पुगेको छ । पछिल्लो समय देशैभर बीमाका कार्यक्रम सञ्चालन भएकाे, बीमाको आधारभूत ज्ञान पाउनेहरुले बीमामा सहभागी हुन इच्छुक देखिएकाे बीमा समितिका अध्यक्ष चिरञ्जिवी चापागाईँ बताउँछन् । तल्लाे तहमा बीमाकाे लाभबारे जानकारी पुग्न थालेकाेले कृषि बीमामा समेत पर्न थालेकाे र पशु तथा बाली धन बीमाको प्रिमियम ४२ प्रतिशतले बढेको उनले जानकारी दिए । अध्यक्ष चापागाईँले बीमामा विश्वास रहेको र बीमाप्रति सकारात्मक धारणा फैलदै गएको तर्क गरे । चालु आर्थिक बर्षको सुरुवातमा बीमा समितिले लघु बीमा निर्देशिका जारी गरेको थियो । यसरी निर्देशिका जारी गरेपश्चात बीमाका कार्यक्रममा सहभागिता बढ्दै गएको समितिको बुझाई रहेको छ । सरकारले पनि कृषि तथा पशुधन बाली बीमा गर्दा लाग्ने बीमा शुल्कमा ७५ प्रतिशत अनुदान दिदै अाएकाे छ ।
गृहमन्त्री थापा र चिनिया राजदुतबीच भेटवार्ता
काठमाडौँ । गृहमन्त्री रामबहादुर थापा ‘बादल’ र चीनका नवनियुक्त राजदुत होउ यान्छीबीच भेटवार्ता भएको छ । गृह मन्त्रालयमा भएको भेटमा नेपाल–चीन सम्बन्ध, आपसी सहकार्य र आगामी दिनमा सहयोगका विषयमा छलफल भएको थियो । नेपालको सामाजिक र आर्थिक विकासका लागि चीन सरकारले दिँदै आएको सहयोगलाई थप बढाउँदै लैजाने बताए । भेटमा गृहमन्त्री थापाले राजदुत यान्छीलाई बधाई तथा कार्यकाल सफलताको शुभकामना दिँदै कार्यकालमा नेपाल र चीनबीचको सम्बन्धले थप उचाई लिने विश्वास रहेको जानकारी दिए । भेटमा गृहमन्त्री थापाले नेपाल एक चीन नीतिप्रति प्रतिबद्ध रहेको बताउँदै नेपाली भूमिबाट कुनै किसिमका चीन विरोधी गतिविधि हुन नदिइने प्रतिबद्धता व्यक्त गरेका थिए । भेटमा राजदूत यान्छीले आफ्नो कार्यकालमा नेपाल चीनबीच सम्बन्ध थप उचाईमा पुर्याउन सक्दो पहल गर्ने प्रतिवद्धता व्यक्त गरेका छन् ।
कामना सेवा र लुम्बिनी जनरल इन्स्योरेन्सबीच बैंकास्योरेन्स सम्झौता
काठमाडौं । कामना सेवा विकास बैंक र लुम्बिनी जनरल इन्स्योरेन्स कम्पनीबीच बैंकास्योरेन्स सेवा सम्बन्धी सम्झौता भएको छ । उक्त सम्झौतापत्रमा कामना सेवा विकास बैंकको तर्फबाट कामु प्रमुख कार्यकारी अधिकृत प्रविण वस्नेत र लुम्बिनी जनरल ईन्स्योरेन्सको तर्फबाट प्रमुख कार्यकारी अधिकृत नुरप्रकाश प्रधानले हस्ताक्षर गरेका हुन् । यस सम्झौता अनुसार बैंकका ग्राहकहरुले मुलुकभर फैलिएको ६४ वटै शाखाहरुबाट सहज रुपमा लुम्बिनी जनरल इन्स्योरेन्सको निर्जीवनबीमा पोलिसिहरु खरिद गर्न सक्नेछन् । काठमाडौंको ज्ञानेश्वरमा केन्द्रीय कार्यालय रहेको बैंकको हाल देश भरि ६४ वटा शाखा तथा १७ वटा एटिएम मार्फत ग्राहकहरुलाई आफनो सेवाहरु प्रदान गर्दै आएको छ ।
उपप्रधानमन्त्री पोखरेल भन्छन्-विदेशी औषधिलाई बिस्थापित गर्छौँ
काठमाडौँ । उपप्रधान तथा रक्षामन्त्री इश्वर पोखरेलले विदेशबाट आउने औषधिलाई बिस्थापित गर्ने पक्षमा सरकारको रहेको बताएका छन् । उनले भने-नेपाललाई चाहिने औषधि मध्ये हाल ४५ प्रतिशत स्वदेशमा नै उत्पादन हुन्छ, अब विदेशबाट आउने ५५ प्रतिशत औषधिलाई बिस्थापित गर्ने पक्षमा छौं । काठमाडौँ टोखामा रहेको देउराली–जनता फर्मास्यूटिकल्स प्रालिको २८ औं वार्षिकोत्सव कार्यक्रमलाई संबोधन गर्दै मन्त्री पोखरेलले यस्तो कुरा बताएका हुन् । सो कार्यक्रममा उनले भने–यस औषधि उद्योगले देश विकासमा ठूलो योगदान गरेको छ । सो उद्योगले पैसा कमाउने मात्रै हैन रिसर्चको काम पनि गरिरहेको भन्दै मन्त्री पोखरेलले प्रशंसा गरे । सो अवसरमा मन्त्री पोखरेलले ५३ वटा ठूला उद्योग र १५ वटा त औषधि उद्योग नै थपिने क्रममा रहेको बताए । औषधि उद्योगको विकासका लागि सरकार सहयोग गर्न तयार छ–उनले भने । बार्षिकोत्सव कार्यक्रममा औष्धि व्यवस्था विभागका महानिर्देशक नारायण ढकालले भने निजी क्षेत्रले औषधि उत्पादनका लागी ल्याब बनाउन लागेको बताए । टोखा नगरपालिकाको मेयर प्रकाश अधिकारीले स्थानीय क्षेत्रमा उद्योगमा स्थानीयलाई रोजगारीमा प्राथमिकता दिन आग्रह गरे । कार्यक्रमका अध्यक्ष तथा कम्पनीका कार्यकारी निर्देशक हरिभक्त शर्मा उद्योगबाट उत्पादित औषधि अन्तर्राष्ट्रिय स्तरको भएको बताए । सो उद्योगमा ५०७ जनालाई रोजगारी दिएको समेत उनले बताए । उद्योगी शर्माले नेपाल भारतबीच खुला बोर्डर रहेसम्म देश आत्मनिर्भर नहुने बताए । नेपाली उद्योगले औषधि बनाउन नपाउने, तर बिदेशी औषधि नेपालमा ल्याएर बिक्री गर्न पाउने यो कस्तो देश हो मन्त्रीज्यू भन्दै प्रश्न गरे ।
प्रदेश २ सरकारको महत्वका ४ योजना, पहिलो प्राथमिकतामा सडक निर्माण
धनुषा । प्रदेश नं २ सरकारले ‘प्रादेशिक महत्वका योजना’ सार्वजनिक गरेको छ । प्रदेश नं २ का भौतिक पूर्वाधार विकासमन्त्री जितेन्द्र सोनलले जनकपुरमा पत्रकार सम्मेलनमार्फत योजना सार्वजनिक गरेका हुन् । सार्वजनिक गरिएका योजनामा प्रदेशका आठ जिल्लालाई जोड्ने गरी प्रादेशिक सडक निर्माण गर्ने योजनालाई मुख्य प्राथमिकतामा राखिएको छ । प्रत्येक जिल्लामा २५ देखि ३५ किलोमिटरका दरले प्रदेशभरी करीब २५० किलोमिटर दुई लेनको सडक निर्माण गर्ने योजना अघि सारिएको छ । प्रादेशिक सडकले यस क्षेत्रका जनताको जीवनस्तर उकास्नाका साथै आर्थिक र व्यापारिक उन्नति गर्ने लक्ष्य सरकारले लिएको छ । त्यसैगरी, दोस्रोे प्राथमिकतामा प्रदेशमा कृषि उत्पादन बढाउन र रोजगार सिर्जना गर्ने उद्देश्यले ‘हरेक खेतमा पानी, हर हातको काम’ योजनालाई राखिएको छ । सो योजनाअन्तर्गत आठ जिल्लामा डिप ट्यूवेल जडान, बाँध, बैरेज र नहरको निर्माण गरी पानीको स्रोतलाई तत्काल व्यवस्थापन गर्ने कार्यक्रम सरकारको छ । सरकारको तेस्रो योजनामा जनता आवास कार्यक्रम रहेको छ । प्रदेश सरकारले यस कार्यक्रमअन्तर्गत पहिलो चरणमा डोम, हलखोर, मुसहर र मेस्तर जातका लागि घर निर्माण गर्ने भएको छ । चौथो योजना ५० मेगावाट सौर्य ऊर्जा उत्पादन रहेको छ । प्रदेशका गौरवको योजनाका चार योजनालाई अगाडि बढाइने मन्त्री सोनलले बताए । प्रादेशिक सडक निर्माणका लागि प्रदेश सरकारले प्रारम्भिक योजना तयार गर्न आठै जिल्लामा मातहतका कार्यालयलाई पत्राचार गर्न निर्देशन दिइसकेको उनले जानकारी दिए ।
प्राइम लाइफ इन्स्योरेन्सको बीमा शुल्क ३१ प्रतिशतले बढ्याे
काठमाडौं । प्राइम लाइफ इन्स्योरेन्सले खुद बीमा शुल्क आर्जनमा ३०.९९ प्रतिशत वृद्धि गरेको छ । गत आर्थिक वर्ष(आव)को पुस मसान्तमा ९३ करोड ३५ लाख रुपैयाँ खुद बीमा शुल्क आर्जन गरेको कम्पनीले चालु आवको सोही अवधिमा एक अर्ब २२ करोड रुपैयाँ कमाएको हो । कम्पनीले लगानी, कर्जा तथा अन्यबाट ३६ करोड ९६ लाख रुपैयाँ आर्जन गरेको छ । जुन गत पुस मसान्तको तुलनामा ८ करोड २३ लाख रुपैयाँ बढी हो । त्यस्तै, बीमालेखको धितोमा कर्जाबाट ३ करोड १५ लाख, अन्य प्रत्यक्ष आय ९८ लाख १५ हजार कमाएको छ । जुन अघिल्लो वर्षको तुलनामा बढी हो । कम्पनीको दोश्रो त्रैमासिक वित्तीय विवरण अनुसार इन्स्योरेन्सले हालसम्म पुनर्बीमा कमिशनबाट कत्तिपनि आम्दानी गरेको छैन । यस वर्षको शुरुको भुक्तानी हुन बाँकी दावी बापत व्यवस्था ७६ लाख ९३ हजार रहेको इन्स्योरेन्सले जनाएको छ ।इन्स्योरेन्सले २०७५ पुसमा ९ करोड रुपैयाँ मात्रै नाफा कमाउन सफल भएको हो । उक्त नाफा गत असोज मसान्तको तुलनामा ३ करोड रुपैयाँले बढी हो । कम्पनीले चालु आर्थिक वर्षको असोज मसान्तमा ६ करोड ८० लाख रुपैयाँ नाफा आर्जन गरेको थियो । हाल कम्पनीको चुक्ता पुँजी बढेर १ अर्ब ७८ लाख रुपैयाँ रहेको छ । गत आवको दोश्रो त्रैमासमा कम्पनीको चुक्ता पुँजी ६१ करोड रुपैयाँ रहेको थियो । त्यस्तै, कम्पनीको जगेडा कोषमा ९७ करोड ९० लाख, जीवन बीमा कोषमा ७ अर्ब ६८ करोड र महाबिपत्ती कोष जगेडामा ९ करोड ३९ लाख रुपैयाँ संचित रहेको छ । हालसम्म कम्पनीले १३ अर्ब ४८ करोड ५२ लाख रुपैयाँ कूल बीमा शुल्क आर्जन गरेको छ । त्यस्तै, कायम रहेको बीमालेखको संख्या ४८ करोड ६६ लाख रहेको इन्स्योरेन्सको जारी बीमालेखको संख्या एक अर्ब ६६ करोडभन्दा बढी रहेको छ । समिक्षा अवधिमा कम्पनीको व्यवस्थापन खर्च बढेर २ करोड ३२ लाख रुपैयाँ पुगेको छ । जुन गत वर्षको पुस मसान्तमा एक करोड ६३ लाख रुपैयाँ रहेको थियो । हालसम्म कम्पनीले १ हजार ६० दाबी मार्फत कूल २२ करोड ७८ लाख रुपैयाँको दाबी भुक्तानी गरेको छ । त्यस्तै, ५५ दाबी बापत १ करोड ९२ लाख रुपैयाँ भुक्तानी हुन बाँकी रहेको कम्पनीको विवरणमा उल्लेख छ । इन्स्योरेन्सको प्रतिसेयर आम्दानी १०.१४, प्रतिसेयर नेटवेर्थ १६०.१२ रुपैयाँ र प्रतिसेयर कुल सम्पत्तीको मूल्य ६४२.३३ रुपैयाँ रहेको छ । त्यस्तै, मूल्य आम्दानी अनुपात ४९.२९ रहेको छ । चालु आर्थिक वर्षको दोश्रो त्रैमासिक अवधिमा कम्पनीको सेयरको अन्तिम मूल्य प्रतिकित्ता ५०० रुपैयाँ रहेको थियो । सो अवधिमा अधिकतम मूल्य प्रतिकित्ता ५४५ र न्युनतम ३८५ रुपैयाँ रहेको कम्पनीले जनाएको छ ।
हड्तालमा सहभागी ५ हजार श्रमिकले गुमाए रोजगारी
ढाका, बङ्गलादेश । बङ्गलादेशमा विश्व प्रसिद्ध ट्रेडमार्कका लागि कपडा सिलाउने तर निम्न ज्यालामा काम गर्दै आएका श्रमिकले हडतालमा सामेल भएको आरोपमा करिब पाँच हजार जनाको रोजगारी गुमेको छ । जनवरीमा उचित ज्यालादर कायम गर्न माग गर्दै आन्दोलनमा सहभागी भएका कारण उनीहरूको रोजगारी गुमेको हो । केही दिनदेखि जारी हडतालमा देशभरबाट हजारौँको सङ्ख्यामा सहभागी भएपछि करिब ३० अर्ब अमेरिकी डलर लगानीमा सञ्चालनमा रहेको कपडा उद्योगमा काम अवरूद्ध भएको थियो । बङ्गलादेशको असुलियामा कपडा सिलाईसम्बन्धी कम्पनीहरू एच एण्ड एम, वालमर्टलगायतका कम्पनीविरुद्ध भएका प्रदर्शनका क्रममा भएका झडपमा एक जनाको मृत्यु भएको छ भने ५० जनाको मृत्यु भएको छ । प्रदर्शन चर्किँदै गर्दा भएका झडपका क्रममा हजारौँ कामदारले उद्योग तथा तीसँग सम्वद्ध संस्थाबाट सामानहरू लुटेको र तोडफोड गरेको आरोपसँगै उनीहरूलाई उद्योगले हटाएका समाचार बाहिर आएका हुन् । तर श्रमिकहरूको संगठन ट्रेड यूनियनले उद्योगले कामदारलाई अनावश्यक धम्की तथा कानूनी कारबाही गर्ने चेतावनीसमेत दिएको बताएका छन् । “अहिलेसम्म कपडा उद्योगले चार हजार ८९९ कामदारलाई आन्दोलन गरेको आरोपमा जागिरबाट निकालेको, एक प्रहरीले नाम गोप्य राख्ने शर्तमा एएफपीलाई बताए ।” बङ्गलादेशको एउटै गार्मेन्टमा काम गर्दै आएका र महिनावारी ९५ अमेरिकी डलर आम्दानी रहेका एक हजार २०० भन्दा बढी कामदारलाई हटाइएको यूनियनको दावी छ । ट्रेड यूनियनले कामबाट हटाइएका कामदारको सङ्ख्या करिब सात हजार पुगेको र करिब १०० जनालाई पक्राउ गरिएको बताएका छन् । तर इन्डस्ट्री अल बङ्गलादेश काउन्सिलका महासचिव सलाउद्दिन सापोनले भने यूनियनको आह्वानमा आन्दोलनमा सहभागी भएका कामदार डरले आफै काममा नफर्किएको बताए । करिब तीन हजार कामदार, जसले उद्योगविरोधी गतिविधिमा सहभागी बने, विरुद्ध विभिन्न मुद्दा दर्ता भएका र धेरैले उद्योगमा नफर्किने निर्णय गरेका छन्, उनले एएफपीसँगको कुराकानीमा बताए । मुलुकभर प्रहरी नियन्त्रणमा लिइएका भनिएका कामदारबारे प्रहरीले कुनै प्रतिक्रिया दिन मानेन । बङ्गलादेशमा करिब चार हजार ५०० कपडा सिलाउने फ्याक्ट्री रहेका छन् जहाँ करिक ४१ लाख कामदारले रोजगारी पाइरहेका छन् । बङ्गलादेश विश्वभर तयारी कपडा निर्यातका लागि चीनपछि पहिलो स्थानमा आउँछ । बङ्गलादेशले सामानको नियातबाट गर्ने आम्दानीमा करिब ८० प्रतिशत हिस्सा समुद्रपारको कपडा व्यापारबाट नै हुने गर्छ । रासस/एएफपी
टोयटाले ‘एअरव्याग डिफेक्ट’ भएका करिब पाँच हजार कार फिर्ता लिने
बेइजिङ, चीन । जापानी कार कम्पनी टोयटाले ‘डिफेक्टिफ एअर व्याग’ भएका भनिएका करिब करिब पाँच हजार कारलाई चीनबाट फिर्ता लाने बताएको छ । टोयटा कम्पनीको लेक्सस सेडान ब्रान्डको कारमा एअरब्यागमा समस्या भएको भन्ने ग्राहकको आरोपपछि चार हजार ६८२ गाडीलाई फिर्ता लाने भएको कम्पनीका चिनियाँ बजार व्यवस्थापकले बताएका छन् । “टोयटा मोटर्सको चिनियाँ लगानी समूहले लेक्सस आइएस २५०सी को निर्माणमा सन् २०१४ को जनवरी १५ देखि सहकार्य गरेको र सोही बर्ष जनवरी ६ देखि सन् २०१७ फेब्रुवरी १३ सम्म कम्पनीले बनाएका लेक्सस जीएक्स ४०० का चार हजार ६८१ गाडीहरूलाई फिर्ता लिनेछ,” टोयटाको चीनस्थित बजार नियमनकारी निकायद्वारा जारी विज्ञप्तिमा भनिएको छ । अगाडिको यात्रुको सुरक्षाका लागि बनाइएको एअरव्यागमा नै समस्याभएपछि असुरक्षा भएको भन्ने उपभोक्ताबाटा व्यापक चासो आएपछि कम्पनीले उक्त निर्णय लिएको हो । टाकता एअलव्यागमा समस्या भएका कारण उक्त गाडी प्रयोगका क्रममा विश्वभर मृत्यु र गम्भीर चोटका घटना बढेको भन्ने प्रतिक्रियापछि विश्वभरबाट ठूलो सङ्ख्यामा लेक्सस आइएस २५०सी नामक कारलाई फिर्ता गर्न लागिएको हो । कम्पनीले एअरव्यागमा समस्या भएको पाएमा विना शुल्क यसलाई फेरिदिने बताएको छ । रासस/सिन्ह्वा
