नेपाल मेडिसिटीका चिकित्सक सहितको हेलिकप्टर बारामा
काठमाडौं । नेपाल मेडिसिटी अस्पतालको चिकित्सक सहितको टोली बारा पुगेको छ । मेडिकल उपकरण सहित हेलिकप्टर बारामा पुगेको हो । बारामा गए राती भएको भिषण हावाहुरीका कारण दूर्घटनामा परेका घाइतेहरुको उद्धार एवं उपचारका लागि नेपाल मेडिसिटी अस्पतालले आफ्ना चिकित्सक तथा स्वास्थ्यकर्मीको टोली बारा पठाएको छ । त्यसैगरी अर्को मेडिकल टोली भेन्टिलेटर सहितको एम्बुलेन्स त्रिभुवन विमानस्थलमा तयारी अवस्थामा राखिएको छ । नेपाल मेडिसिटी अस्पतालका अध्यक्ष डा. उपेन्द्र महतो पनि विरामीहरुको आवश्यक सहयोग र समन्वयका लागि यति बेला बारामा पुगेका छन् ।
नुवाकोटमा ग्लोबल आइएमई बैंकवाट सहुलियतपूर्ण कर्जा वितरण
काठमाडौं । ग्लोबल आइएमई बैंकले नुवाकोटको त्रिशुली शाखाले ६ जना भुकम्प पिडितलाई आवास निर्माण कर्जा वितरण गरेको छ । राष्ट्रिय पुननिर्माण प्राधिकरणका कार्यकारी सदस्य डा. चन्द्रबहादुर श्रेष्ठले भुकम्प पिडितहरुको निजि आवास निर्माणका लागि कर्जा वितरण गरेका हुन् । स्थानीय सरकारको सहयोगमा घरनबनाएका भूकम्प पिडितहरुको घरघरमा गएर समस्याको पहिचान गर्ने र सरकारले अनुदान दिएर घर बनाउन लगाउँदा पनि लाभग्राहीले आनाकानी गरेमा सरकारले विशेष निगरानी राखेर वास्तविकता पत्ता लगाउने श्रेष्ठले बताए । सोही समारोहमा बैंकका रिटेल बैंकिङ्ग प्रमुख नरहरि सिलवालले विभिन्न तीन जना ग्राहकहरुलाई कृषि तथा पशुपंक्षी कर्जा र महिला उद्यमशिल कर्जा वितरण गर्दै लगानी गरेर प्रतिफल प्राप्त गर्न सक्ने जानकारी छ । बैंकले १३४ वटा शाखा, १५ वटा राजश्व संकलन काउण्टर, १४२ एटिएम, ९ वटा एक्सटेन्सन काउण्टर तथा १२४ शाखा रहित बैंकिङ्ग सेवा र नेपाल बाहिर ३ प्रतिनिधि/सम्पर्क कार्यालय मार्पmत आफ्ना १० लाख भन्दा बढि ग्राहकहरुलाई सेवा प्रदान गर्दै आइरहेको छ । त्यस्तै बैंकले अत्याधुनिक प्रविधियुुक्त भाईवर बैंकिङ्ग सेवा, मोबाइल बैंकिंङ्ग सेवा, इन्टरनेट बैंकिङ्ग सेवाको साथमा रु. १५ लाखसम्मको बिना धितो प्रोफेशनल कर्जा पनि प्रदान गर्दै आइरहेको छ ।
कोरिया जस्तो सजिलो छैन जापानको रोजगारी, कस्ता व्यक्ति योग्य हुन्छन् ?
काठमाडौं । आकर्षक रोजगारी गन्तव्यको रुपमा हेरिएको जापानको रोजगारी समझदारी पत्रमा केहि हप्ता अघि सम्झौता भएको छ । सम्झौता पत्रमा श्रम तथा सामाजिक सुरक्षा मन्त्रालयका रामप्रसाद घिमिरे र नेपालका लागि जापानी राजदुत मासामिसी साईगोले हस्ताक्षर गरे । बहु प्रतिक्षित सम्झौताको पहिलो बुँदामै Specified Skilled Worker अर्थात विशेष विषयमा दक्षता हासिल गरेको श्रमिक भन्ने शब्द प्रयोग भएपछि जापान रोजगारी असहज बनेको हो । कुनै पनि सिप नजान्ने व्यक्तिले जापान रोजगारीको अवसर प्राप्त गर्ने छैनन् । सम्झौतामा १४ वटा कार्य क्षेत्रहरु तोकिएका छन् । जसमा कृषि, नर्सिङ केयर, सवारी साधन मर्मत, खाद्य सेवा उद्योग, निर्माण उद्योग, खाद्य पेय पदार्थको उत्पादन, आवास उद्योग मेसिनरी पार्टस उद्योग, माछा मार्ने तथा पाल्ने उद्योग, औद्योगिक उपकरण उद्योग, इलेक्ट्रिक, इलेक्ट्रोनिक्स र सूचना प्रविधि उद्योग, बिल्डिङ सरसफाई र व्यवस्थापन, जहाज र जहाज पार्टपुर्जा उद्योग रहेका छन् । यी १४ क्षेत्रमा उच्च दक्षता हासिल गरेको व्यक्तिले मात्र रोजगारीको अवसर पाउने उल्लेख गरिएको छ । रोजगारी सम्बन्धी अझै अध्ययन हुन बाँकी रहेको मन्त्रालयले जनाएको छ । दक्षिण कोरिया जस्तो सजिलो छैन भाषामा दोहोरो मापदण्ड वर्षेनी दशौं हजार व्यक्तिलाई रोजगारी अवसर दिइरहेको कोरियाले कामदार छनोटको आधार भाषालाई बनाएको छ । एउटा व्यक्ति सिधैं भाषा परीक्षामा सफल हुन सके उसले रोजगारीको अवसर प्राप्त गर्छ । तर, जापानले भाषामा दोहोरो मापदण्ड लगाउने तयारी गरेको छ । जापानी भाषा परीक्षाको लागि अहिले २ संस्थाले परीक्षा सञ्चालन गरिरहेका छन् । जसमा एनबीएस न्याट र त्रिभुवन विश्वविद्यलय रहेका छन् । न्याटले वर्षमा २ महिनाको फरकमा ६ पटक भाषा परीक्षा सञ्चालन गर्दै आएको छ भने विश्वविद्यालयले वर्षमा २ पटक अंग्रेजी महिनाको जुलाई र डिसेम्बर जेएलपीटी परीक्षा सञ्चालन गर्दै आएको छ । जापानी भाषा परिक्षाको मापदण्ड पाँच तहसम्म रहेको छ । सामान्यतया परीक्षाको मापदण्ड एन५, एन४, एन३, एन२, र एन१ तोकिएको हुन्छ । यसमा पनि ग्रेड ए देखि ग्रेड डी सम्म तोकिएको हुन्छ । ग्रेड ९० देखि शुरु हुनेछ । ९० देखि १०० ल्याउनेलाई डी ग्रेड, १०० देखि १२० ल्याउनेलाई सी १२० देखि १४० सम्म ल्याउनेलाई बी र १४० देखि १६० अंक ल्याउनेलाई ए ग्रेडमा राख्ने प्रावधान रहेको छ । यसरी भाषा परीक्षामा पास भएपछि पुनः जापानी पक्षले भाषा परीक्षण गर्नेछ । जापानी अधिकारीले लिएको भाषा परीक्षणको अंक नै अन्तिम हुनेछ । मन्त्रालयका प्रवक्ता नारायणप्रसाद रेग्मीले जेएलपीटीको अंक भन्दा जापानी अधिकारीले लिएको परिक्षण निर्णायक हुने बताए । कामदारको रुपमा जापान जान चाहानेले जेएलपीटी परीक्षामा सहभागी हुनुपर्नेछ । जापानी भाषा परीक्षा एवम् सीप परिक्षणको लागि वैदेशिक रोजगार विभाग अन्र्तगत छुट्टै इकाई गठन गर्ने तयारी सरकारको रहेको छ । यद्यपी कस्तो किसिमको मापदण्ड निर्माण हुने भन्ने अहिले तयार भैसकेको छैन । कस्तो व्यक्तिले प्राप्त गर्न सक्छन् जापानमा रोजगारी जापान सरकारले नेपालबाट कामदार भित्र्याउन चाहेको १४ क्षेत्रमध्ये कुनै विषयमा दक्ष हुनु पर्नेछ । यदि कुनै व्यक्ति नर्सिङ केयरमा जान इच्छुक छ भने उसले पहिले जेएलपीटीको एन४ तहको भाषा परीक्षा पास गरेको हुनु पर्नेछ । यसरी भाषा परीक्षामा पास भएपछि मात्र जापानी अधिकारीले लिने सिप तथा भाषा परीक्षणमा सहभागी हुन पाइनेछ । यसरी छनोट भएको कामदारलाई २ भागमा विभाजन गरिनेछ (एसएसडब्लु) पहिलो वर्ग र (एसएसडब्लु) दास्रो वर्ग । पहिलो वर्गका श्रमिक बढीमा ५ वर्ष काम गर्न पाउनेछन् भने भने दास्रो वर्गका कामदारको समय थप पनि हुन सक्नेछ । दुबै वर्गका कामदारले आफ्नो परिवार समेत लैजान पाउने व्यवस्था गरिएको छ । यी वर्गका कामदारहरुलाई जापानी नागरिक सरह सेवा सुविधा प्राप्त गर्न सक्नेछन् । यसरी जापान जाने कामदारको लागि जापान सरकारको सार्वजनिक रोजगार केन्द्र हेल्लो वर्कले सहयोग तथा समन्वय गर्नेछ ।
मृतक ग्राहक सदस्यको ऋण साधनाले गर्यो मिनाह
काठमाडौँ । साधना लघुवित्त वित्तीय संस्था लि. मकवानपुर बज्रबराही शाखाले आफ्ना ग्राहक सदस्यको निधन पश्चात ऋण कर्जा मिनाह गरेको छ । शाखा कार्यालय बज्रबराहीद्वारा प्रवद्घित केन्द्र नं ७०, नागदह साधना महिना विकास केन्द्रकी स्व. सुकुमाया स्याङ्गतान माघ २० गते निधन भएकामा स्व. स्याङ्गतानले वित्तीय संस्थावाट लिएको कर्जाको तिर्न बाँकी सावा र सो सावाले हुन आउने ब्याज रकम गरी ७२ हजार १ सय ९१ रुपैयाँ मिनाहा गरिएको हो । संस्थाले आइतबार स्याङ्गतान कै घर नजिक रहेको नागदह प्राविको प्राङ्गगडमा कर्जा मिनाह कार्यक्रम गरेको हो । उक्त कार्यक्रममा कर्जा मिनाह पत्र र बचत ६ हजार १ सय ३० रुपैयाँ मृतकका श्रीमान् सानुकान्छा घलानलाई प्रदान गरिएको थियो । थाहा नपा वडा नं ११ का वडा अध्यक्ष किरण वल र वित्तीय संस्थाको कर्जा तथा जोखिम ब्यवस्थापन विभाग प्रमुख रामप्रसाद लामिछानेले सो रकम प्रदान गरेका र्थि । गर्नुभएको थियो । कार्यक्रममा वित्तीय संस्थाको कर्जा तथा जोखिम ब्यावस्थापन विभागका लामिछानेले वित्तीय संस्थाले ग्रामिण भेगका जनतालाई लक्षित गरी विभिन्न किसिमका वित्तीय सेवासँगै सामाजिक उत्तरदायित्वको भूमिका निर्वाह गर्दै आएको जानकारी गराए ।
माैसमकाे भविष्यवाणीमा चुक्याे महाशाखा; आगलागी र हुरीले १ महिनामै १४ करोड क्षति
काठमाडौं । आइतबार जल तथा मौसम विज्ञान विभाग अन्तर्गत मौसम पूर्वानुमान महाशाखाले देशभर बदली हुने र देशभरका विभिन्न भागमा बर्षा हुनसक्ने भविष्यवाणी गरेको थियो । पश्चिमी बायुको प्रभाव विस्तारै पूर्वतिर सर्दै जाने भएकोले पूर्व क्षेत्रमा पनि पानी पर्ने सम्भावना रहेको जनाए पनि महाशाखाले आँधी र हुरी आउनेबारे पूर्वानुमान गरेन । तर सोही दिन भारतीय मौसम पूर्वानुमान प्रणालीले भने विहारको उत्तरी क्षेत्रमा त्यस्तो प्रकृतिको आँधिको भविष्यवाणी गरेको थियो, जसले नेपालको बारा र पर्सा कै क्षेत्र इंगित गरेको थियो । विगतमा वर्षा र हिमपातको भविष्यवाणी पनि नमिलाउने नेपालको मौसम पूर्वानुमान प्रणालीमा ल्याएको सुधारपछि पानी पर्ने र हिमपात पर्ने सन्दर्भमा गर्ने भविष्यवाणी केही हदसम्म मिल्न थाले पनि हावाहुरी आउनेबारे भने पूर्वानुमान गर्ने गरेको छैन । जसका कारण सम्बन्धित क्षेत्रका जनताले प्रकोपको पूर्व तयारी गर्न पाएनन् । जसकाे प्रभावस्वरुप भीषण हावाहुरीका कारण आइतबार मात्रै प्रदेश २ अन्तर्गत तराईका बारा र पर्सा जिल्लामा ठूलो मानवीय र जनधनको क्षति भएको छ । हुरीले ३१ जनाकाे ज्यान लिएकाे पुष्टि भइसकेकाे छ भने कराेडाैं बराबरकाे क्षति भएकाे बताइएकाे छ जसकाे विस्तृत विवरण आउन बाँकी रहेकाे राष्ट्रिय विपद् व्यवस्थापन केन्द्रले जनाएको छ । यदि नेपालकाे माैसम पूर्वानुमान प्रणालीले त्यस्तो भविष्यवाणी समयमा गरिदिएकाे थियो भने उक्त प्रकोपबाट हुने जनधनको क्षति न्यूनीकरण हुन सक्थ्यो । फागुन महिनामा १४ कराेडकाे क्षति देशभर भएका प्राकृतिक प्रकोप र दुर्घटनामा एक महिनामा करिब १४ करोडको क्षति भएको छ । फागुन महिनाभर भएका विभिन्न घटनाहरुमा ११ जनाले ज्यान गुमाउँदा कुल १३ करोड ९५ लाख रुपैंया बराबरको क्षति भएको राष्ट्रिय विपद् व्यवस्थापन केन्द्रले जनाएको छ । क्षति भएकामध्ये सबैभन्दा बढी आगलागीको कारणले १३ करोड ६७ लाख भएको छ । त्यस्तै, चट्याङले २३ लाख, बर्षाले २० लाख र जंगली जनाबरको आतंकले करिब साढे ३ लाखको क्षति भएको समेत केन्द्रले जानएको छ । केन्द्रका अनुसार उक्त अवधिमा २५१ ओटा घटना भएका थिए २९३ ओटा आगलागीका घटना भएका थिए भने २९ ओटा चट्याङ्, १८ ओटा जंगली जनावरको आक्रमण, ७ ओटा पहिरो तथा १/१ ओटा हिमपात, डुङ्गा दुर्घटना, भीषण वर्षा र असिनाका घटनाहरु भएका थिए । उक्त घटनाहरुमा मृत्यु भएका १५ जनामध्ये सबैभन्दा धेरै आगलागीमा परि ६ जना, चट्याङले ४ जना र अन्य घटनाहहरुबाट ४ जनाको ज्यान गएको छ भने ती घटनाहरुबाट जम्मा ८७ जना मानिसहरु घाइते भएका छन् । त्यस्ता घटनाले देशभरका ५८२ परिवार प्रभावित भएकोमा डँढेलोले सबैभन्दा धेरै ४४३ परिवारलाई प्रभावित बनाएको छ । जसबाट कुल १८३ ओटा घर पूर्ण र २२ ओटा घर आंशिक रुपमा नष्ट भएको छ । त्यस्तै, जम्मा १५८७ ओटा घरपालुवा जनावरहरुको क्षति हुँदा सबैभन्दा बढी असिनाका कारण १३८४ र आगलागीका कारण १७८ ओटाको क्षति भएको छ । एक महिनाको अवधिमा सडक दुर्घटनाबाट भने २०६ जनाको मृत्यु र ६३२ जना घाइते भएका थिए । उक्त प्रकोपका कारण ३१ जनाको मृत्यु भएको पुष्टि भइसकेको छ भने करोडौं बराबरको जनभनको नष्ट भएको बताइएको छ । यद्यपि क्षतिको पूर्ण विवरण आउन केही दिन लाग्नसक्ने र अहिले भने विपद्पछिको पहिलो सहायतामा नै ध्यान केन्द्रित गरेको केन्द्रले जनाएको छ । हुरीबाट कारण मृत्यु भएका व्यक्तिका परिवारलाई प्रदेश २ सरकारले भने ३ लाख रुपैंया राहत दिने निर्णय गरिसकेको छ ।
बारा-पर्सामा हावाहुरीः मृतकका परिवारलाई तीन लाख दिने प्रदेश सरकारको निर्णय
धनुषा । गएराति हावाहुरीबाट बारा, पर्सालगायतका जिल्लामा भएको ठूलो धनजनको क्षतिप्रति प्रदेश नं २ को मन्त्रिपरिषद्ले गहिरो दुःख प्रकट गरेको छ । आज बिहानै बसेको प्रदेश मन्त्रिपरिषद्को बैठकले मृतकका परिवारलाई रु तीन लाख तत्कालीन राहतस्वरुप प्रदान गर्ने निर्णय गरेको छ । आइतबार राति बारा र पर्साका विभिन्न ठाउँमा असिनापानीसँगै आएको हावाहुरीबाट २५ भन्दा बढीको मृत्यु भएको छ । कलैया, वीरगञ्जलगायतका अस्पतालमा ४०० भन्दा बढी घाइते उपचाररत छन् । उपचारका क्रममा थप केही घाइतेको समेत निधन भएका समाचार आइरहेका छन् । सुरक्षाकर्मी र स्थानीय उद्धारकर्मी रातिदेखि अहिलेसम्म उद्धारमा खटिइरहेका छन् । प्राकृतिक विपत्तिमा परेर घाइते भएकाको उपचार खर्च प्रदेश सरकारले व्यहोर्ने र घरबार गुमेकाको वासस्थानका लागि प्रदेश सरकारले पहल गर्ने बैठकले निर्णय गरेको छ । बैठकको निर्णयबारे जानकारी दिँदै मुख्यमन्त्री लालबाबु राउतले भने, “हामीले प्रत्येक मृतकलाई रु तीन लाखका दरले तत्कालीन राहत दिने भएका छौँ उपचारमा जति खर्च हुन्छ, त्यो प्रदेश सरकारले व्यहोर्ने छ ।” त्यसैगरी तत्कालका लागि वासस्थानका के गर्न सकिन्छ, त्यो गर्ने र पीडितको पुनर्वासका लागि पहल गर्नेसमेत मुख्यमन्त्री राउतले जानकारी दिए । रासस
कच्चा तेलको उत्पादन घट्यो, विश्व बजारमा तेलको मूल्यवृद्धि
टोकियो । विश्व बजारमा कच्चा तेलको मूल्य सोमबार थप बृद्धि भएको छ । विश्व अर्थतन्त्रमा मन्दी आउने त्रासका कारण पनि तेलको आपूर्तिमा कटौती भएपछि तेलको मूल्यवृद्धि भएको हो । जुन महिनामा ब्रेन्ट कच्चा तेलको मूल्यमा शून्य दशमलब ५ प्रतिशत अर्थात ३४ सेन्टले बृद्धि भई प्रति ब्यारेल ६७.९२ अमेरिकी डलर कायम भएको छ । यो मूल्यवृद्धि पहिलो चौमासिकमा २७ प्रतिशत हो । अमेरिकी वेस्ट टेक्सास इन्टरमेडियट (डब्लुटीआई)मा शून्य दशमलब ५ प्रतिशत वृद्धि भई प्रति ब्यारेल ६०.४४ डलर भएको छ । जनवरीदेखि मार्च महिनाको अवधिमा कच्चा तेलको मूल्यमा ३२ प्रतिशत वृद्धि भएको हो । इरान र भेनेजुएलामाथि अमेरिकी प्रतिबन्ध तथा ओपेक र अरु मुख्य तेल उत्पादक राष्ट्रहरुले गरेको आपूर्ति कटौतीले पनि यस वर्ष तेलको मूल्यवृद्धि भएको छ । यी प्रतिबन्ध र आपूर्ति कटौतीले विश्व अर्थतन्त्रको वृद्धि र अमेरिका–चीन व्यापार युद्धजस्ता जल्दाबल्दा विषयलाई समेत ओझेलमा पारेका छन् । अमेरिकी उप अर्थमन्त्री सिगेल माल्डेल्करले सिंगापुरमा शुक्रबार पत्रकारहरुसँग कुरा गर्दै संयुक्तराज्य अमेरिकाले इरानमाथि थप दबाब सिर्जना गर्ने बताए । अमेरिकी अधिकारीहरु मलेसिया, सिंगापुर र अरु मुलुकहरु गैरकानुनी इरानी तेलको कारोबार तथा प्रतिबन्ध छल्न इरानीहरुले अपनाउन सक्ने विधिका बारेमा पूर्ण जानकार रहेका छन्, मन्त्री माल्डेल्करले भने । अमेरिकाले तेलको व्यापार गर्ने कम्पनी र रिफाइनरीहरुलाई भेनेजुएलासँग सम्झौताहरु कम गर्दै लैजान आग्रह गरेको छ । त्यसो नगरिए त्यस्ता व्यापारिक फर्ममाथि अमेरिकाले प्रतिबन्ध लगाउने चेतावनी दिइसकेको छ । ओपेक र यसका गठबन्धन मुलुकहरु जस्तै रुसबीचको सम्झौतामा प्रतिदिन करिब १२ लाख ब्यारेल तेल उत्पादन कटौती गर्ने उल्लेख छ । यो सम्झौता गत जनवरी १ बाट कार्यान्वयनमा आएकाले पनि तेलको मूल्यमा क्रमिक रुपमा वृद्धि हुन थालेको छ । अमेरिकी तेल उत्पादन पनि मध्य फेब्रुअरीदेखि स्थिर छ । अमेरिकी सरकारको शुक्रबार प्रकाशित एक प्रतिवेदनमा विश्वकै ठूलो तेल उत्पादक राष्ट्र अमेरिकाको तेल उत्पादन जनवरी महिनामा प्रतिदिन १ करोड १९ लाख ब्यारेल रहेको देखाइएको छ । रासस/एपी
दस वर्ष पुराना अक्सिजन सिलिन्डर प्रयोगमा रोक
काठमाडौँ । पर्वतारोहीले आरोहणका क्रममा दस वर्षभन्दा पुराना अक्सिजन सिलिन्डर प्रयोग गर्न नपाउने भएका छन् । पुुराना सिलिन्डरले सुरक्षा जोखिम निम्त्याउन सक्ने भन्दै पर्यटन विभागले यस्तो व्यवस्था गरेको हो । मिति नाघेका सिलिन्डर प्रयोग गरेको अवस्थामा कारबाही हुने विभागले स्पष्ट पारेको छ । पुराना तथा म्याद गुज्रेका सिलिन्डरलाई नयाँ सिलिन्डरले प्रतिस्थापन गर्नुपर्ने व्यवस्थालाई विभागले अनिवार्य गरेको छ । यसबाहेक पनि विभागले सिलिन्डरसम्बन्धी निश्चित मापदण्ड नै तोकेर सो अनुसार हुनुपर्ने निर्देशन दिएको छ । विभागका अनुसार पर्वतारोहणका क्रममा प्रयोग हुने सिलिन्डर अमेरिकी र युरोपियन मापदन्डबमोजिमको हुनुपर्ने व्यवस्था गरेको छ । त्यस्तै प्रयोग भएका जुनसुकै सिलिन्डर हरेक दुई÷दुई वर्षमा नियमित मर्मत हुनैपर्ने व्यवस्था गरिएको छ । पर्वतारोहीले आरोहणका लागि पर्याप्त सिलिन्डर बोक्नुपर्ने विभागले जनाएको छ । नयाँ मापदन्डअनुसार कम्तीमा दस घण्टाका लागि पुग्ने गरी अक्सिजन सिलिन्डर तयार गर्नुपर्नेछ । त्यसरी सिलिन्डरमा भरिएको अक्सिजन ‘ड्राई’ हुनुपर्ने व्यवस्था विभागले गरेको छ । त्यस्तै विभागले अत्यधिक मूल्यमा अक्सिजन किनबेच हुने प्रवृत्ति नियन्त्रणको प्रयास पनि गरेको छ । जसअनुसार प्रचलित मूल्यभन्दा बढी मूल्यमा अक्सिजन बिक्री वितरण गर्न नपाइने विभागले जनाएको छ । कसैबाट बढी मूल्यमा बिक्री भएको गुनासो आएमा अथवा अनुगमनबाट देखिएमा सम्बन्धितलाई कडा कारबाही गरिने विभागले जनाएको छ । विभागले तोकेका मापदन्डको कार्यान्वयन अवस्था बुझ्न अन्य सरकारी निकायको सहयोगमा अनुमगन टोली गठन गर्ने जनाएको छ । सिलिन्डरकै कारण पर्वतारोहणमा कुनै किसिमको जोखिम पैदा नहोस् भन्ने उद्देश्यले मापदन्ड तयार गरिएको विभागका महानिर्देशक डन्डुराज घिमिरेले जानकारी दिए । आजको गोरखापत्र दैनिकमा समाचार छ ।
