६.४३ अंकले बढ्यो नेप्से, ३५ करोडको कारोबार
काठमाडौ । साताको दोस्रो दिन सोमबार नेपाल स्टक एक्सचेञ्ज(नेप्से) परिसूचकमा ६.४३ अंकले बढेको छ । ०.५६ प्रतिशतले बढ्दा परिसूचक ११४९.९९ बिन्दुमा पुगेको छ । सोमबार १७१ कम्पनीले शेयर कारोबार गरेका छन् । १२ लाख ६५ हजार ६ सय ६२ कित्ता सेयर खरिद बिक्री हुँदा ३५ करोड २८ लाख १० हजार ७ सय ५० रुपैयाँको कारोबार भएको छ । सोमबार २ सूचक बाहेक अन्यमा हरियाली देखियो । बैंक समूह १०.१५, होटल समूह ३३.६७, विकास बैंक समूह ६.३७, जलविद्युत समूह २.८७, वित्तीय समूह २.०७, निर्जीवन बीमा समूह २९.७, माईक्रोफाईनान्स समूह २.२८ र जीवन बीमा समूह २.२ अंकले बढेका छन् । उत्पादन मूलक समूह ४.४४ र अन्य समूह ५.९२ अंकले घटेका छन् । नेशनल माईक्रोफाईनान्स वित्तीय संस्थाका लगानीकर्ताले ५.४५ प्रतिशतले सबैभन्दा धेरै नाफा आर्जन गरेका भने यूनिभर्सल पावर कम्पनीका लगानीकर्ताले ९.८७ प्रतिशतले सबैभन्दा धेरै घाटा व्यहोरेका छन् ।
भिवो मोवाइल कम्पनीको उपहार योजना ‘नयाँ वर्षको वहार, आईपिएल टिकेट उपहार’
काठमाडौ । नयाँ बर्षलाई लक्षित गरेर भिवो मोवाइल कम्पनीले विभिन्न उपहार योजनाहरु सार्वजनिक गरेको छ । चैत्र १८ देखि ३० गतेसम्म भिवोका कुनैपनि मोवाइल सेट खरिद गर्ने ग्राहकहरु उक्त उपहार योजनामा सहभागी हुन सक्ने छन् । भिवोका मोबाइल खरिद गर्ने ग्राहक मध्येबाट छनोट हुनेलाई आईपिएलको टिकट देखी स्मार्ट फोनसम्मका अफरहरु राखिएका छन् । भिवोले ‘नयाँ वर्षको वहार, आईपिएल टिकेट उपहार’ योजना ल्याएको छ । भिवो मोवाईलका सिनियर डिजिटल एजुकेटिभ पियुष गिरी भन्छन्–‘भिवो मोबाईलले ग्राहकको आवश्यकता अनुसार काम गर्दै आएको छ, यसपालि हामीले आईपिएल लक्षित भएर त्यसमा सहभागी हुन सक्ने अफर ल्याएका छौ । ’ भिवोको ल्याएको नयाँ बर्षको योजना अनुसार मोवाइल फोन खरिद गर्दा कम्पनीले ग्राहकको आईएमई नम्बर राख्ने छ । सोही नम्बरमा छनौट हुने लक्की ग्राहकले विभिन्न अफर प्राप्त गर्ने सफल हुन्छन् । चैत्र ३० गतेसम्म फोन खरिद गर्दा आईएमई नम्बर रजिस्ट्रर हुने व्यवस्था छ । ८ दिनसम्म हुनेछ आईपिएल टिकेटको अफर नयाँ बर्षको अफर १३ दिनको लागि भएपनि आईपिएल टिकेटको अफर भने ८ दिन भित्रमा मोबाईल किन्ने ग्राहकलाई मात्र प्राप्त हुनेछ । मंगलबारदेखि दैनिक १ जनाले आईपिएल टिकट पाउने छन् । टिकट ८ दिनसम्म वितरण गरिने छ । यसरी ८ दिनमा ८ जना टिकट योजनामा सहभागी हुन पाउँछन् । टिकेट प्राप्त गर्ने ग्राहकलाई होटलमा खाने तथा २ दिनसम्मको बस्ने सुविधा कम्पनीले नै व्यहोर्ने जनाएको छ । यस्तै, ५ दिनको लागि भने स्मार्ट फोनको अफर पाउन सकिने छ । स्मार्ट फोन अफर अन्तर्गत भिवोको ‘वाई एटिवान आई’ ५ जनाले पाउन सक्ने छन् । सो मोवाईलको नेपाली बजारमा १६ हजार ७ सय १९ रुपैयाँ पर्छ । साथै, १ सय ३० वटा भिवो व्यागको अफर समेत यही योजनमा समावेश छ । यस अफरमा भने दैनिक १० जना विजेतालाई भिवो व्याग वितरण गरिन्छ । यता, भिवो मोवाईलले नयाँ बर्षलाई लक्षित गरेर ‘भि फिप्टिन’ समेत भित्र्याउने तयारी गरेको छ । मोवाईल यसै साता भित्रिने कम्पनीले जनाएको हो । भिवोको नयाँ मोडेलको मोवाईल नेपाली बजारमा ४५ हजार ४ सय ९० रुपैयाँमा खरिद गर्न सकिने छ । यस्तै, नेपाली बजारमा भिवोको सबैभन्दा सस्तो मोवाईलको रुपमा ‘वाइ फिप्टी थ्री सि’ पर्दछ । जस्को बजार मूल्य १४ हजार ६ सय ९० रुपैयाँ पर्छ ।
वोर्ल्ड टच टुर्स् एण्ड ट्राभल्समा नयाँ व्यवस्थापन
काठमाडौं । पर्यटन क्षेत्रको सम्बन्धमा वोर्ल्ड टच टुर्स् एण्ड ट्राभल्स प्रालिमा नयाँ व्यवस्थापन आएको छ । वोर्ल्ड टचको ब्यवस्थापन जिम्मेवारी युवा पर्यटन ब्यवसायी रमेश पौडेल र प्रकाश शाक्यले लिएका हुन । वोर्ल्ड टच टुर्स् एण्ड ट्राभल्सले हाल काठमाडौं पोखरा रुटमा पर्यटक पारवहन सेवा उपलब्ध गराउदै आएको छ । उक्त कम्पनीले एअर कन्डिसन, हीटिङ सिस्टम, अडियो भिडियो एबम म्यूजिक सिस्टम, निशुल्क मिनिरल वाटर र वाईफाई सेवा सहितको सुविधा सम्पन्न २ वटा बसहरु उक्त रुटमा संचालन गर्दै आएको छ । वोर्ल्ड टच टुर्स् एण्ड ट्राभल्सले नेपालका प्रमुख पर्यटकिय गन्तब्य स्थलहरु पोखरा,सौराहा, लुम्बिनी, जनकपुर, ईलाम लगायतका स्थान र दार्जलिङसम्मको टुर प्याकेज समेत सन्चालन गर्दै आइरहेको कम्पनीका प्रबन्ध निर्देशक रमेश पौडेलले बताए । वोर्ल्ड टच टुर्स् एण्ड ट्राभल्सले पर्यटकहरुको सुविधालाई ध्यानमा राख्दै थप सेवा विस्तार गर्न लागेको जानकारी समेत उनले दिए । प्रबन्ध निर्देशक पौडेलले भिजिट नेपाल २०२० लाई सफल पार्न पर्यटन व्यवसायी र सरकारको प्रयास मात्रै पर्याप्त नहुने बताउदै सबै जना नेपालीहरु एकजुट भई उक्त अभियानलाई सफल बनाउनु पर्ने बताए ।
बैंककमा नेपालको दीर्घकालीन विकास योजना निर्माण सम्बन्धी छलफल
काठमाडौं । बैंककमा बसोबास गर्दै आएका गैरआवासीय नेपाली विज्ञले राष्ट्रिय योजना आयोगका उपाध्यक्ष तथा अन्य सरकारी अधिकारीसँग नेपालको विकास योजना र भिजनबारे अन्तरक्रिया गरेका छन् । कार्यक्रम गैरआवासीय नेपाली संघ थाइल्याण्डसँगको सहकार्यमा नेपाल पोलिसी इन्ष्टिच्युट (एनपीआई)ले आयोजना गरेको हो । एनपीआई गैरआवासीय नेपाली संघको स्वायत्त थिंक ट्यांक हो, जसले नेपाल र नेपालीलाई केन्द्रमा राखेर देशको नीति निर्माणमा छलफल, बहस,अन्तरक्रिया र अनुसन्धान गर्दछ। बैंककमा शुक्रबार आयोजित अन्तरक्रिया कार्यक्रम सरकारको १५औं आवधिक योजनासँगमा केन्द्रित रहेको एनपीआईका सदस्य रमेश सिंहले बताए । योजना निर्माणमा सहयोग गर्न आयोगले तीन साताअघि आग्रह गरे अनुसार इन्ष्टिच्युटले आफ्नो तर्फबाट आयोगलाई सुझावहरु दिएको उनले बताए । कार्यक्रमको शुभारम्भमा आयोगका सहसचिव खुमराज कोइरालाले १५औं आवधिक योजनाको मस्यौदाका मुलभुत उद्देश्य र लक्ष्यबारे अवगत गराए । त्यसपछि इन्ष्टिच्युटका अध्यक्ष खगेन्द्र ढकालले प्रस्तुती गर्दै ग्लोबल कन्सल्टेशनबाट आएका निष्कर्षहरुको मुख्य बुँदाहरु प्रस्तुत गरेका थिए । उनले आयोगको मस्यौदामा नौ वटा फरक समस्याहरु औंल्याउँदै समाधानको उपाय दिएका थिए । साथै, ढकालले निर्माण–उत्पादन–व्यवस्थापन–अनुगमन (बीपीएमएम)को नयाँ थिम अबको योजनामा अवलम्बन गर्न सिफारिस गर्दै यस थिमको बारेमा व्याख्या गरेका थिए ।
‘मेगा रेमीट’ काे सेवा अब अष्ट्रेलियाकाे अजीज फरेक्सबाट
काठमाडौँ । मेगा बैंक नेपालले अष्ट्रेलियाबाट पनि ‘मेगा रेमीट’ सेवा सुरु गरेको छ । अष्ट्रेलियाको अजीज फरेक्स एण्ड फाइनान्स कम्पनीसँगको साझेदारीमा मेगा बैंकले अष्ट्रेलियाबाट ‘मेगा रेमीट’ सेवा सुरु गरेको हो । अष्ट्रेलियाबाट ‘मेगा रेमीट’ सेवा पहिलोपटक सुरु गरिएको हो । यो सेवा प्रारम्भ भएपछि अष्ट्रेलियाबाट नेपालमा मेगा बैंक र मेगा बैंकका देशभर छरिएका २३ सय भन्दा बढी एजेण्टमार्फत तुरुन्तै रकम पठाउन र भुक्तानी लिन सकिनेछ । मेगा बैंकमै खाता भएका ग्राहकहरुका लागि रेमीट सेवा निःशुल्क गरिएको बैंकले जनाएको छ । नेपालीहरुको बाहुल्यता रहेको अष्ट्रेलियामा यो सेवाले गैरआवासीय नेपाली र विद्यार्थीहरुलाई निकै सहजता मिल्नुका साथै कानुनी र आधिकारिक माध्यमबाट नेपालमा रकम पठाउने बाटो खुलेको बैंकले जनाएको छ । मेगा बैंकले ‘मेगा रेमीट’ सेवालाई संसारका बिभिन्न देशहरुमा जोड्ने क्रममा अष्ट्रेलियाबाट पनि सेवा प्रारम्भ गरेको हो ।
लगानी सम्मेलनमा किन कचकच गरे मातृका यादवले ?
काठमाडौँ । शनिबार सम्पन्न लगानी सम्मेलनमा धेरै विषयमा चर्चा भएपनि उद्योग वाणिज्य तथा आपूर्ति मन्त्री मातृका प्रसाद यादवको पनि राम्रै चर्चा भयो । उद्घाटन शत्रको कार्यक्रममा मुख्य हल भित्र बस्न नपाएपछि उनी अन्य दर्शक बस्ने हलको अन्तिम कुर्सीमा आएर बसेका थिए । मन्त्री नै सहभागी नभएपछि उद्योग सचिव यामुकमारी खतिवडा, उद्योग तथा वाणिज्य विभागका महानिर्देशक योगेन्द्र गौतम मन्त्री सँगै दर्शक दीर्घाको अन्तिम कुर्सीमा आएर बसेका थिए । प्रधानमन्त्री केपी शर्मा ओली हदसम्म वायस गरेको भन्दै उनले सम्मेलनमा रडाको मच्चाएका थिए । उनले सक्रिय भूमिका पनि निभाएनन् भने, कुनै प्रकारको सहयोग समेत गरेनन् । सम्मेलको सम्पूर्ण कमाण्ड गर्ने जिम्मा उद्योग वाणिज्य तथा आपूर्ति मन्त्री मातृका प्रसाद यादवलाई नै दिइनु पर्ने मत पनि नउठेको होइन । तर पछिल्लो समय उनको प्रधानमन्त्री ओलीसँग त्यत्ति राम्रो सम्बन्ध छैन । उद्योगसँग जोडिएको प्रमुख निकाय र तालुकदार संस्था भनेकै उद्योग मन्त्रालय हो । तर प्रधानमन्त्री ओलीको जिरह व्यवहारका कारण मन्त्री यादवलाई कुनै पनि जानकारी नै नगराएप्छि उनी बम्किएका हुन् । उनी कुनै पनि कार्यक्रममा नै सहभागी नगराई तथा उनलाई कुनै पनि जिम्मेवारी नै नराखेर लगानी सम्मेलनको आयोजना गरिएको भन्दैआपत्ति जनाएका थिए । उद्घाटन शत्रमा उनले देखाएको उडण्डता त्यसैको प्रतिबिम्वन भएको बताइन्छ । मन्त्री यादवले पूर्व माओवादी केन्द्रका नेता तथा कार्यकर्तालाईक ही कतैपनि जिम्मेवारी नदिने, दिएको जिम्मेवारी पनि सकेसम्म कमजोर बनाउने र काम नै गर्न नदिने उद्देश्यका साथ प्रधानमन्त्री परिचालित भएको आरोप लगाएका छन् । धन देख्ना महादेवको तेस्रो नेत्र खुल्छ भने जस्तै प्रधानमन्त्री ओलीको प्रमुख सल्लाहकारको जागिर खाएका विष्णु रिमाल जस्ता अराजनीतिक व्यक्तिका कारण आफूलाई बाहेक गरिएको भन्दै उनले मन्त्रालयमा नै असन्तुस्टि व्यक्त गरेका छन् । विभागिय मन्त्रीलाई नै बाइपास गर्ने यो भन्दा चर्को राजनीति के हुन सक्छ र मन्त्रालयकै एक उच्च अधिकारीले भने । तर सचिव यामकुमारी खतिवडा भने सम्मेलनको नाममा आयोजना हुने सामान्य भन्दा सामान्य कार्यक्रममा समेत सहभागी हुने गरेकी छिन् । तर मन्त्रीलाई कुनै पनि जानकारी नदिने, सकेसम्म थाहा पाएपनि थाहा नहोस् भन्ने मान्यता राख्ने गरिएको छ । विभागिय मन्त्रीको हिसाबले सम्मेलनका हरेक जसो कार्यक्रमको संयोजन उद्योग मन्त्रीले नैै गर्नुपर्दथ्यो । त्यसो त मातृकाको भूमिका समेत वर्तमान सरकारका कुनै पनि खास देखिएको छैन । स्वकीय सचिव बनाएका सन्तोष विस्टले मातृकाको भए भरको क्रेज तथा राजनीतिक चरित्रलाई धुलीसात् पारिदिएका छन् । जुनसुकै कर्मचारीको सरुवा बढुवा, पदस्थापनामा समेत पैसा लिनै पर्ने विशेष क्षमताका कारण विस्टले मातृकाको भए भरको राजनीतिक विरासतलाई समेत सकिदिएका छन् । जानकार स्रोतहरुका अनुसार लगानी सम्मेलन सकिएको केही दिन पछि मातृका यादव सँगै केही मन्त्रीको जागिर जान सक्ने बताइएको छ । तर लगानी सम्मेलनमा मातृकालाई नै बाहेक गर्ने विषय भने सैद्धान्तिक र व्यवहारिक रुपमा नै मिल्ने विषय नभएको केहीको धारणा छ । तर उनको विरोधी पक्ष भने उद्योगी व्यवसायीलाई हातमा लिन नसकेको तथा लगानीको वातावरण बनाउन नसकेको भन्दै उनलाई भूमिका नदिँदा पनि केही फरक नपर्ने बताउँछन् । सानो वा ठूलो होस् या सानो लगानी कम्पनी रजिष्ट्रारको कार्यालयबाट सुरु हुन्छ ।लगानी गर्न चाहेका लगानीकर्ताले सुरुवातमा नै झन्झट बेहोर्न पर्ने ठाउँ हो कम्पनी रजिष्ट्रारको कार्यालय । कम्पनी रजिष्ट्रार कार्यालय उद्योग वाणिज्य तथा आपूर्ति मन्त्रालय अन्तर्गतको निकाय हो । लगानीकर्ताले माग्ने धेरै सुविधा उद्योग मन्त्रालय अन्तर्गतको हुन्छ । कानूनी रुपमा नै उक्त व्यवस्था गरिएको छ । त्यसैले लगानी सम्मेलन जस्ता उद्योगसँग सम्बन्धित विषयमा उद्योाग मन्त्रीलाई अघि सारिन्छ । सरकारले शुक्रबार र शनिबार लगानी सम्मेलनको आयोजना ग¥यो । । अर्थमन्त्री डा. युवराज खतिवडाले निजी क्षेत्रका प्रतिनिधिलाई दायाँबायाँ राखेर बुधबार लगानी सम्मेलनबारे पत्रकार सम्मेलन गरी सार्वजानिक जानकारी गरेका थिए । ।तर, सम्मेलनको बारेमा जानकारी दिन आयोजित पत्रकार सम्मेलनमा उद्योग वाणिज्य तथा आपूर्तिमन्त्री मातृका यादव उपस्थित थिएनन् । पहिलो पटक लगानी सम्मेलन गर्ने विषयमा जानकारी दिन आयोजित पत्रकार सम्मेलन र बुधबार आयोजना गरिएको पत्रकार सम्मेलनमा उद्योगमन्त्री यादव उपस्थित थिएनन् ।उद्योगमन्त्रीको सचिवालयले जानकारी नभएको कारण उपस्थित नभएको जनाएको छ । खै मन्त्री ज्यूलाई कुनै जानकारी नै आएको थिएन । जसका कारण सम्मेलनको भित्री तयारीका बारेमा उहाँलाई केही पनि जानकारी नै थिएन । सरकारले आयोजना गरेको सम्मेलन भए त विभागिय मन्त्रीलाई पक्कै पनि जानकारी हुन्थ्यो होला तर उहाँलाई कुनै पनि जानकारी नै छैन । अर्थ मन्त्रालय मात्रै भए हुने भएर होला, मन्त्री यादवको सचिवालयले भनेको छ । बुधबार आयोजना भएको पत्रकार सम्मेलनमा सरकार प्रवक्ता तथा सूचना तथा सञ्चारमन्त्री गोकुल बास्कोटा अर्थमन्त्रालयमा गएका थिए । लगानी बोर्डका प्रमुख कार्यकारी अधिकृत महाप्रसाद अधिकारी, केही मन्त्रालयका सचिव, पनि सहभागी थिए । पत्रकार सम्मेलनमा बास्कोटाले केही पनि बोलेनन् । लगानी बोर्डले यो पटक लगानी सम्मेलनको निर्देशक समितिमा अर्थमन्त्री युवराज खतिवडालाई बनाउने निर्णय गरेको थियो । तर उक्त समितिमा उद्योग मन्त्रीलाई बोलाइएको थिएन र समितिमा पनि राखिएको छैन । दुई वर्षअघि भएको लगानी सम्मेलनको सयोजनको काम तत्कालिन उद्योगमन्त्री नविन्द्रराज जोशीले गरेका थिए । त्यो बेला उद्योगमन्त्रालय लगानी सम्मेलनमा हाबी थियो । यो पटक लगानी बोर्डका अध्यक्ष समेत हुने प्रधानमन्त्री केपी शर्मा ओलीले निर्देशक समितिको संयोजकत्वमा समिति गठन गरेको थियो । प्रधानमन्त्री ओलीले नै उद्योगमन्त्री यादबलाई बाइपास गरेर लगानी सम्मेलनको सुपरम्यान अर्थमन्त्री खतिवडालाई बनाएका हुन् । उद्योगमन्त्री पत्रकार सम्मेलनमा उपस्थित नभएपनि उद्योग सचिव यामकुमारी खतिवडा भने दुई पटककै पत्रकार सम्मेलनमा उपस्थित थिइन् । विशेष गरी अर्थमन्त्रालयमा ज्वाईलाई विशेष सेवा दिलाएका अर्थमन्त्री खतिवडाको बारेमा उद्योगी व्यवसायी समेत सकारात्मक छैनन् । समाजवादको नाममा निजी क्षेत्राई नराम्ररी पेलेको आरोप उनीमाथि लाग्दै आएको छ । निजी क्षेत्रलाई काम नै गर्न नदिने विशेष क्षमता र स्वभाव भएका कारण पनि उनी सम्मेलनमा पनि हावी छन् । स्वदेशका लगानीकर्ता, तथा उद्योग व्यवसायीलाई सुविधा दिँदा आफ्नै घरको सम्पत्ति बाँडन जस्तो हुने र त्यस्तै व्यवहार गर्ने खतिवडा प्रति पनि उद्योगी व्यवसायी त्यत्ति खुसी छैनन् । पत्रकार सम्मेलनमा उपस्थित नभए पनि उद्योगमन्त्री यादवले लगानी सम्मेलनको एउटा सत्रको सभापतित्व गरे । ‘बिइङ इन्डष्ट्रियल बेस एण्ड क्रियट जब्स’ सत्रको छलफलको सभापतित्व उद्योगमन्त्रीले गरे । तर उनले सो शत्रको अन्त्यमा बाँडिएको उपहार समेत लिएनन् । भने मलाई उपहार नदिनु । सो शत्रमा जसमा उद्योग सचिव खतिवडा, डाबर नेपालका प्रवन्ध निर्देशक अभिमन्यु पोद्दार, नेपाल उद्योग वाणिज्य महासंघका बरिष्ठ उपाध्यक्ष शेखर गोल्छा, हुवाजिन सिमेन्ट चीनका उपाध्यक्ष सु गाङ र पन्चकन्या समूहका प्रवन्ध निर्देशक प्रदिपकुमार श्रेष्ठ सहभागी थियो । उक्त कार्यक्रम शत्र प्रदिपकुमार श्रेष्ठले संचालन गरेका थिए । मातृका यादवलाई किन कुनै भूमिका नदिइएको होला भन्ने प्रश्न गाइगुई रुपमा नउठेको पनि होइन । तर सरकारका अऋन्य निकाय भने सो बारेमा केही बताउन तयार देखिएन ।
श्रम मन्त्रालयमा कल सेन्टर स्थापना, श्रम सम्बन्धी गुनासो र जिज्ञासा राख्न पाइने
काठमाडौँ । श्रम सम्बन्धी समस्याको बारेमा गुनासो र जिज्ञासा सहज रुपमा प्राप्त गर्न र तत्काल सम्बोधन गर्न श्रम मन्त्रालयमा कल सेन्टर स्थापना गरिएको छ । श्रम, रोजगार तथा सामाजिक सुरक्षामन्त्री गोकर्ण बिष्टले सोमबार एक कार्यक्रमका बीच कल सेन्टरको उद्घाटन गरेका हुन् । बैदेशिक रोजगार बोर्ड सचिवालयको व्यवस्थापनमा सो कल सेन्टर शुरु गरिएको हो । गुनासो गर्न वा जानकारी लिन चाहने सेवाग्राहीले स्वदेशबाट भए कल सेन्टरको सम्पर्क नम्बर ११४१ वा १६६००११५०००५ मा तथा विदेशबाट भए इमेल, फेसबुक, म्यासेन्जर, इमो, भाइवर जस्ता अनलाइन नेटवर्क मार्फत निःशुल्क रुपमा कल सेन्टरको सम्पर्क नम्बर ९७७१५९७०००८ मा सम्पर्क गर्न सक्ने व्यवस्था मिलाइएको छ । बिहान ७ बजेदेखि बेलुका ९ बजेसम्म सो कल सेन्टरमा फोन गर्न सकिने छ । सेवाग्राहीको संख्या र मागलाई ध्यानमा राखी भविश्यमा यो सेवालाई चौबीसै घण्टा गराउनेतर्फ मन्त्रालय अग्रसर हुने मन्त्री विष्टले बताए । कल सेन्टरमा कस्तो गुनासो/ जिज्ञासा राख्न पाइन्छ ? कल सेन्टरमा वैदेशिक रोजगारीको क्रममा ठगीमा परेका वा स्वास्थ्य समस्याबाट पीडित भई घर फर्कन चाहनेहरु, झुठा मुद्दामा जेल सजाय भोगिरहेकाहरुलाई निःशुल्क कानूनी सहायताको आवश्यकता रहेकाहरुले अनुरोध गर्न सक्ने छन् । साथै बैदेशिक रोजगारी सम्बन्धी अभिमुखीकरण, शिप विकास तालिम र सुरक्षित बैदेशिक रोजगारीका लागि अपनाउनु पर्ने सावधानीका कुराहरु जानकारीहरु लिन सक्नेछन् । यसैगरी, योगदानमा आधारित सामाजिक सुरक्षा कार्यक्रममा सहभागी हुने प्रक्रिया, यस सम्बन्धमा भोग्नु परेका समस्या र प्रधानमन्त्री रोजगार कार्यक्रमसँग सम्बन्धित जिज्ञासाहरु र भोग्नु परेका समस्याहरुबारे सिधै फोन गरी गुनासो गर्न वा जानकारी लिन सकिने बताइएको छ ।
स्वास्थ राज्यमन्त्रीबाट धोबीघाटस्थित कन्या सुरक्षा सर्कल स्तम्भ उद्घाटन
काठमाडौं । स्वास्थ्य तथा जनसंख्या राज्यमन्त्री डा. सुरेन्द्रकुमार यादवले कन्या सुरक्षा सर्कल स्तम्भको उद्घाटन गरेका छन् । काठमाडौंको धोबीघाटस्थित स्टर्लिङ अपार्टमेण्टका नजिक जैन श्वेताम्बर तेरापन्थ महिला मण्डलद्वारा निर्मित उक्त स्तम्भको उद्घाटन गर्दै यादवले जैन श्वेताम्बर तेरापन्थ महिला मण्डलले कन्या सुरक्षा, अहिंसाको सन्देश सम्प्रेषण गर्न कन्या सुरक्षा सर्कलको निर्माण गरी अत्यन्तै सह्रानीय कार्य गरेको बताए । कन्या सुरक्षा सर्कल स्तम्भको निर्माणले कन्या भ्रूणको रक्षादेखि कन्या स्वास्थ्य एवम् कन्याको चौतर्फी विकासमा टेवा पुग्ने प्रतिकको रुपमा यसस्तम्भको निर्माण गरिएको कुरा जैन श्वेताम्बर तेरापन्थ महिला मण्डल काठमाण्डौं (नेपाल)की अध्यक्ष रश्मी जैनले जानकारी दिई । उक्त कार्यक्रममा ललितपुर महानगरपालिकाको उपमेयर गीता सत्याल, उक्त क्षेत्रका वडा अध्यक्ष, वरिष्ठ उद्योपतिहरु लोकमान्य गोल्छा, नरेश दुगड लगायत अन्य उद्योगपति तथा समाजसेवीहरुको उपस्थिति रहेको थिए । ललितपुर महानगरपालिकाको उपमेयर गीता सत्यालले कन्या भू्रण हत्या रोकथामदेखि कन्याको सुरक्षा तथा कन्याको चौतर्फी विकास गरीदेश विकासमा महिलाहरुको सहभागितालाई बढाउने हेतुले जुन स्तम्भको निर्माण गरिएको छ यो अति नै प्रशंसनीय रहेको बताए ।
