पत्रकारलाई विश्वप्रकाशको प्रश्न– ‘तपाईंहरू सबै सुरक्षित हुनुहुन्छ ?’
काठमाडौं । नेपाली कांग्रेसका वरिष्ठ उपसभापति विश्वप्रकाश शर्माले सरकारका गतिविधिले पत्रकारिता क्षेत्रको स्वतन्त्रता र पत्रकारको सुरक्षामाथि प्रश्न उठाएको टिप्पणी गरेका छन् । बुधबार (आज) पार्टी केन्द्रीय कार्यालय सानेपामा आयोजित पत्रकार सम्मेलनमा बोल्दै शर्माले पत्रकारहरू आफ्नो असन्तुष्टि र असहमति सार्वजनिक गर्नसमेत असुरक्षित महसुस गरिरहेको हो कि भन्ने आशंका व्यक्त गरे । पत्रकार सम्मेलनमा समाचार संकलनका लागि पुगेका पत्रकारहरूको हातमा कालोपट्टी नदेखेपछि उनले उनीहरूको सुरक्षाबारे प्रश्न उठाएका थिए । प्रतिपक्षी दलको कार्यालयमै आएर समाचार संकलन गरिरहेका पत्रकारहरूले समेत सरकारप्रतिको असन्तुष्टि संकेत गर्ने गरी कालोपट्टी बाँधेको आफूले अपेक्षा गरेको उनको भनाइ थियो । ‘प्रतिपक्षीकै कार्यालयमा आएर बुम अगाडि तेर्साउँदै गर्दा पत्रकार साथीहरूको हातमा कहीँ न कहीँ कालोपट्टी होला भन्ने मलाई अनुमान लागेको थियो,’ शर्माले भने । उनले पत्रकारहरूले सरकारका गतिविधिप्रति असहमति राख्ने र आफ्ना समस्या निर्भीक रूपमा अभिव्यक्त गर्ने वातावरण हुनुपर्नेमा जोड दिए । पत्रकारले सिंहदरबारदेखि बालुवाटारसम्म पुगेर प्रधानमन्त्रीकै सामुन्ने पनि आफ्नो असन्तुष्टि र आलोचना राख्न सक्ने अवस्था लोकतन्त्रमा आवश्यक रहेको उनको भनाइ थियो । पत्रकारको हातमा कालोपट्टी नदेखिएको प्रसंगलाई जोड्दै शर्माले पत्रकारिता क्षेत्रको स्वतन्त्रता र सुरक्षाबारे नैतिक प्रश्नसमेत उठाए । ‘मैले तपाईंहरू कसैको हातमा कालोपट्टी देखिनँ । त्यसैले तपाईंहरूलाई सोध्न चाहन्छु– तपाईंहरू सबै सुरक्षित हुनुहुन्छ ?,’ उनले पत्रकारहरूलाई प्रश्न गरे ।
घलेम्दी हाइड्रोको ५ मेगावाट विद्युत् आयोजना पुनः सञ्चालनमा
काठमाडौं । घलेम्दी हाइड्रो लिमिटेडले म्याग्दीमा सञ्चालन गरिरहेको ५ मेगावाट क्षमताको घलेम्दी खोला जलविद्युत् आयोजना पुनः सञ्चालनमा आएको छ । कम्पनीका अनुसार गत असोज ११ गते कालीगण्डकी नदीमा आएको भीषण बाढीका कारण आयोजना बन्द भएको थियो । बाढीले नेपाल विद्युत् प्राधिकरणको दाना–कुश्मा २२० केभी प्रसारण लाइनका टावरहरूमा क्षति पुर्याएको थियो । त्यसपछि आयोजनाबाट उत्पादित विद्युत् प्रसारण हुन नसक्दा आयोजना बन्द भएको थियो । क्षतिग्रस्त प्रसारण लाइनका टावरहरूको मर्मत तथा सम्भारपछि असोज ३१ गते रातिदेखि आयोजना पुनः सञ्चालनमा आएको कम्पनीले जनाएको छ । कम्पनीले बुधबार नेपाल स्टक एक्सचेन्ज (नेप्से) लाई पत्राचार गर्दै आयोजनाको विद्युत् उत्पादन पुनः सुरु भएको जानकारी दिएको हो ।
६ रुग्ण ठेक्का तोड्न मन्त्री लम्सालको निर्देशन
काठमाडौं । स्थानीय पूर्वाधार विकास विभागअन्तर्गत सञ्चालनमा रहेका प्रगतिको सम्भावना नरहेका ६ वटा रुग्ण ठेक्का तोड्ने प्रक्रिया अघि बढाइने भएको छ । पूर्वाधार विकासमन्त्री सुनिल लम्सालले विभागअन्तर्गतका आयोजना तथा कार्यक्रमको समीक्षा गर्दै यस्तो निर्णय गरिएको जानकारी दिएका हुन् । उनका अनुसार विभागअन्तर्गत हाल १९ वटा ठेक्का रुग्ण अवस्थामा छन्। तीमध्ये प्रगतिको सम्भावना नरहेका ६ वटा ठेक्का तोड्ने प्रक्रिया अघि बढाइने निर्णय भएको हो । मन्त्री लम्सालका अनुसार मन्त्रालयको निरन्तर निगरानी र सहजीकरणपछि ६ वटा आयोजना सम्पन्न भएका छन् भने थप ५ वटा आयोजनाको निर्माण कार्यसमेत अघि बढेको छ । बुधबार पूर्वाधार विकास मन्त्रालयअन्तर्गत स्थानीय पूर्वाधार विकास विभागबाट सञ्चालित आयोजना तथा कार्यक्रमहरूको समीक्षा गरिएको थियो । समीक्षा क्रममा स्थानीय पूर्वाधार निर्माणसम्बन्धी कार्ययोजना संशोधन गरी आयोजना तथा कार्यक्रमको कार्यान्वयनलाई थप गति दिन आवश्यक निर्देशनसमेत दिइएको मन्त्री लम्सालले बताएका छन् । अलपत्र र रुग्ण अवस्थामा रहेका ठेक्काहरूको गहिरो अध्ययन तथा समीक्षा गरी काम अघि बढ्न नसक्ने आयोजनाको ठेक्का अन्त्य गर्ने र सम्भावना भएका आयोजनालाई निर्माणमा फर्काउने मन्त्रालयको प्रयास रहेको उनको भनाइ छ ।
बैंकिङ कसुरमा दोषी बैदार पक्राउ
काठमाडौं । बैंकिङ कसुर मुद्दामा एक करोड ५१ लाख रुपैयाँ जरिवाना र एक वर्ष कैद सजाय सुनाइएका सुबिन बैदार पक्राउ परेका छन् । काभ्रेपलाञ्चोकको बनेपा नगरपालिका–६ निवासी ४० वर्षीय बैदारलाई प्रहरीले बुधबार (आज) बनेपा नगरपालिका–७ बाट पक्राउ गरेको हो । काठमाडौं जिल्ला अदालतले २०८३ असार ३२ गते बैंकिङ कसुरसम्बन्धी मुद्दामा बैदारलाई एक करोड ५१ लाख रुपैयाँ जरिवाना र एक वर्ष कैद सजाय हुने फैसला गरेको थियो । दीपक चापागाईंको जाहेरीका आधारमा नेपाल सरकार वादी र बैदार प्रतिवादी रहेको उक्त मुद्दामा अदालतले सजाय सुनाए पनि उनी सजाय भुक्तान नगरी फरार रहेका थिए । प्रहरीका अनुसार बैदार काभ्रेपलाञ्चोकका विभिन्न स्थानमा लुकिछिपी बसिरहेको भन्ने गोप्य सूचना प्राप्त भएपछि खोजी गर्ने क्रममा पक्राउ परेका हुन् । पक्राउ परेका बैदारलाई फैसला कार्यान्वयनका लागि काठमाडौं जिल्ला अदालतमा पेस गरिएको प्रहरीले जनाएको छ ।
हिउँको घुम्टोमा दुधेदह, सेताम्मे बने हिमाली पाखा (फोटो फिचर)
काठमाडौं । हुम्लाको चंखेली गाउँपालिका–१ मा अवस्थित धार्मिक तथा पर्यटकीयस्थल दुधेदहमा तीन फिटसम्म हिउँ परेको छ । हिमपातपछि दुधेदह क्षेत्र सेताम्मे बनेको छ । हिउँले ढाकिएको ताल र आसपासका हिमाली दृश्यले दुधेदहको सुन्दरता थप मनमोहक बनाएको छ । सेताम्मे हिमाल र हिउँले ढाकिएको तालले यहाँ पुग्ने पर्यटकलाई आकर्षित गर्ने दृश्य बनेको छ । दुधेदहमा साउन पूर्णिमा र विजयादशमी पूर्णिमाका अवसरमा श्रद्धालु तथा धार्मिक पर्यटकको भीड लाग्ने गर्छ । यस क्षेत्रमा दुधेदहसहित २४ वटा ताल रहेका छन् । स्थानीय बासिन्दाका अनुसार तालको पानी दूधजस्तै सेतो देखिने भएकाले यसको नाम दुधेदह रहन गएको हो । यहाँ भुवानी देवताको उत्पत्ति भएको धार्मिक विश्वास छ । यही विश्वासका आधारमा पूर्णिमाका अवसरमा पूजाआजा गर्ने परम्परा छ । प्राकृतिक सुन्दरता, धार्मिक आस्था र हिमाली भूगोलको संगम बनेको दुधेदह हिमपातपछि झनै आकर्षक देखिएको छ ।
आईजीपी नियुक्तिबारे ओली : उनीहरूको भनेको मान्ने मान्छे भनेर नयाँ नियुक्ति गरेको होला
काठमाडौं । नेकपा एमालेका अध्यक्ष एवं पूर्वप्रधानमन्त्री केपी शर्मा ओलीले सरकारले प्रहरी महानिरीक्षक (आईजीपी) परिवर्तन गरेर नयाँ नियुक्ति गरेको विषयमा व्यङ्ग्यात्मक प्रतिक्रिया दिएका छन् । बुधबार पार्टी केन्द्रीय कार्यालय च्यासलमा सञ्चारकर्मीसँग कुरा गर्दै अध्यक्ष ओलीले सरकारले आफूहरूले भनेको मान्ने व्यक्ति भएकै कारण नयाँ प्रहरी महानिरीक्षक नियुक्त गरेको हुन सक्ने टिप्पणी गरेका हुन् । सरकारले प्रहरी महानिरीक्षक दानबहादुर कार्कीलाई पदबाट हटाएर एआईजी डा. मनोज केसीलाई नयाँ प्रहरी महानिरीक्षक नियुक्त गरेको छ । मन्त्रिपरिषद्को बुधबार बसेको बैठकले कार्कीलाई प्रधानमन्त्रीको सुरक्षा सल्लाहकारमा नियुक्त गर्ने निर्णयसमेत गरेको थियो । सरकारको उक्त निर्णयबारे सञ्चारकर्मीले राखेको जिज्ञासामा ओलीले भने, ‘उनीहरूले भनेको मान्ने मान्छे भनेर नयाँ नियुक्ति गरेको होला ।’ यसैबीच, ओलीले मंगलबार नेपाली कांग्रेसका सभापति गगनकुमार थापासँग आफ्नो राम्रो कुराकानी भएको बताएका छन् । ओलीले भने, ‘गगनकुमार थापासँग राम्रो कुराकानी भयो, राजनीतिक कुराहरू भए ।’ उनले थापासँग राजनीतिक विषयमा कुराकानी भएको जानकारी दिए ।
अमेरिकी चुनावमा डेमोक्र्याटको जितले ट्रम्प–रुस सम्बन्धमा कस्तो असर पार्ला ?
काठमाडौं । अमेरिकाको मध्यावधि निर्वाचनमा डेमोक्रेटिक पार्टीले संसद्का दुवै सदन सिनेट र प्रतिनिधिसभामा जित हासिल गरेको छ । यससँगै राष्ट्रपति डोनाल्ड ट्रम्पको कार्यकालको बाँकी अवधिमा अमेरिकी संसद् (कंग्रेस) मा डेमोक्रेटिक पार्टीको नियन्त्रण रहने भएको छ । यस चुनावी परिणामले अमेरिका र रुसबीचको सम्बन्धमा कस्तो असर पार्छ भन्ने प्रश्न पनि उठेको छ । रुसी राष्ट्रपति भ्लादिमिर पुटिनका प्रवक्ता दिमित्री पेस्कोभले सोमबार बीबीसीका संवाददाता स्टिभ रोजेनबर्गसँग कुरा गर्दै डोनाल्ड ट्रम्प आफ्नो कार्यकालको अन्त्यसम्म राष्ट्रपति रहने र आफ्नो विदेश नीतिअनुसार काम गरिरहने बताएका थिए । उनको भनाइको अर्थ चुनावको परिणाम जस्तो आए पनि रुसले अमेरिकी नीतिमा ठूलो परिवर्तन नहुने अपेक्षा गरेको देखिन्छ । राष्ट्रपति ट्रम्पले रुसका सबै माग पूरा गरेका भने छैनन् । उदाहरणका लागि, युक्रेन युद्ध अन्त्य गर्न रुसले राखेका सर्तअनुसार शान्ति सम्झौता हुन सकेको छैन । तर ट्रम्पको विदेश नीतिबाट रुसले केही फाइदा भने उठाएको छ । हालै अमेरिकी राष्ट्रपति ट्रम्पले रुसमाथि लगाइएका केही प्रतिबन्ध कार्यान्वयनमा रोक लगाएका थिए । साथै रुसबाट डिजेल खरिद गर्न पनि सहमति जनाएका थिए । त्यस्तै, युक्रेनी राष्ट्रपति भोलोदिमिर जेलेन्स्कीको आलोचना गर्दा ट्रम्प रुसी राष्ट्रपति पुटिनभन्दा पनि बढी आक्रामक देखिएका छन् । यद्यपि, रुसको अखबार ‘नेजाभिसिमाया गजेटा’ले यसै साताको सुरुवातमा रिपब्लिकन पार्टीले संसदमा आफ्नो नियन्त्रण गुमाए ट्रम्पलाई समस्या हुन सक्ने अनुमान गरेको थियो । अखबारका अनुसार यस्तो अवस्थामा ट्रम्प डेमोक्रेटिक पार्टीले सुरु गर्ने विभिन्न अनुसन्धानमा अल्झिनुपर्ने हुन सक्छ । त्यसले गर्दा उनले आफूले चाहेका नीतिहरू कार्यान्वयन गर्न कठिनाइ हुन सक्छ । रुससँग सम्बन्धित नीतिहरू पनि यसबाट प्रभावित हुन सक्ने अखबारको विश्लेषण थियो । रिपब्लिकन नेताले स्वीकारे चुनावी हार अमेरिकी संसद्का दुवै सदनमा डेमोक्रेटिक पार्टीले नियन्त्रण कायम गरेपछि रिपब्लिकन पार्टीका नेताहरूले पनि चुनावी परिणाम आफ्नो पार्टीका लागि निराशाजनक रहेको स्वीकार गरेका छन् । प्रतिनिधिसभाका सभामुख माइक जोन्सनले चुनावी परिणामप्रति निराशा व्यक्त गरे पनि यसले आफ्नो हौसला कमजोर नबनाउने बताएका छन् । उनले भने, ‘प्रतिनिधिसभामा आफ्नो बहुमत जोगाउन हामीले एक सय वर्षभन्दा पुरानो मध्यावधि निर्वाचनको इतिहास नै बदल्नुपर्नेछ भन्ने हामीलाई थाहा थियो ।’ रिपब्लिकन सिनेटर रोन जोन्सनले बीबीसी रेडियो ४ सँग कुरा गर्दै इरानमा भइरहेको युद्ध र इन्धनको बढ्दो मूल्यले अमेरिकी नागरिकलाई चिन्तित बनाएको बताएका छन् । सन् २०११ देखि विस्कन्सिन राज्यको प्रतिनिधित्व गर्दै आएका रोनले यसपटक भने चुनाव लडेका थिएनन् । त्यस्तै, टेक्ससमा सिनेटको महत्त्वपूर्ण सिटमा पराजित भएका रिपब्लिकन नेता केन प्याक्सटनले पनि देशभरि आफ्नो पार्टीका लागि चुनावी रात कठिन रहेको स्वीकार गरेका छन् । तर उनले पार्टीको राजनीतिक यात्रा अझै समाप्त नभएको बताएका छन् । यसअघि राष्ट्रपति डोनाल्ड ट्रम्पले चुनावी हारबारे अपेक्षाभन्दा निकै कम प्रतिक्रिया दिएका थिए । उनले हारको दोष आफ्ना पार्टीका उम्मेदवारहरूलाई दिएका थिए । बीबीसीका अनुसार तीमध्ये केही उम्मेदवार ट्रम्प आफैले छनोट गरेका थिए । यसअघि रिपब्लिकन पार्टीका एक कर्मचारीले बीबीसीसँग कुरा गर्दै चुनावी परिणाम आफूले सोचेभन्दा पनि खराब आएको बताएका थिए । उनले भनेका थिए, ‘यो मैले कल्पना गरेभन्दा पनि खराब भयो । यो त पूर्ण रूपमा ठूलो विपत्ति हो ।’ अमेरिकी मध्यावधि चुनावः प्रारम्भिक परिणाममा ट्रम्पको रिपब्लिकन पार्टीलाई धक्का
पृष्ठभूमिमा चुच्चे नक्सा, अर्थमन्त्री र भारतीय विदेश सचिवको फोटोसूट
काठमाडौं । नेपाल र भारतबीच लिम्पियाधुरा, लिपुलेक र कालापानी क्षेत्रको सीमा विवाद कायमै रहेका बेला भारतीय विदेश सचिव विक्रम मिश्रीसँगको भेटमा अर्थमन्त्री डा. स्वर्णिम वाग्लेको पृष्ठभूमिमा नेपालको चुच्चे नक्सा देखिएको छ । बुधबार अर्थ मन्त्रालयमा भएको भेटको तस्बिरमा नेपालको आधिकारिक चुच्चे नक्सा स्पष्ट देखिएपछि यसले धेरैको ध्यान खिचेको छ । नेपाल भ्रमणमा रहेका भारतीय विदेश सचिव मिश्री र अर्थमन्त्री डा. वाग्लेबीच बुधबार शिष्टाचार भेटवार्ता भएको हो । भेटमा नेपाल र भारतबीचको आर्थिक सहकार्यका विभिन्न विषयमा छलफल भएको अर्थमन्त्रालयले जानकारी दिएको छ । भेटमा अर्थसचिव डा. घनश्याम उपाध्यायसहित परराष्ट्र र अर्थ मन्त्रालयका अधिकारीहरू सहभागी थिए । भेटवार्ताको तस्बिरमा दुवैजना नेपालको चुच्चे नक्सालाई पृष्ठभूमिमा राखेर बसेका छन् । उक्त नक्सामा लिम्पियाधुरा, लिपुलेक र कालापानी क्षेत्रसमेत समेटिएको छ । नेपालले २०७७ जेठ ७ मा लिम्पियाधुरा, लिपुलेक र कालापानी समेटेर नयाँ राजनीतिक तथा प्रशासनिक नक्सा सार्वजनिक गरेको थियो । त्यसपछि संसद्ले संविधान संशोधन गरी उक्त नक्सालाई संविधानको अनुसूचीमा रहेको निशान छापमा समावेश गरेको थियो । भारतले भने नेपालको नयाँ नक्सालाई अस्वीकार गर्दै आएको छ । सीमा विवाद समाधानका लागि दुई देशबीच कूटनीतिक संवाद हुनुपर्ने आवाज उठ्दै आए पनि यो विषय अझै टुंगिएको छैन । गत मे महिनामा लिपुलेक हुँदै कैलाश मानसरोवर यात्रा सञ्चालन गर्ने भारतको योजनाप्रति नेपालले आपत्ति जनाएको थियो । त्यसपछि सीमा विवाद फेरि चर्चामा आएको थियो । भारतीय विदेश सचिव मिश्री दुईदिने नेपाल भ्रमणका क्रममा बुधबार काठमाडौं आएका हुन् । उनको भ्रमण प्रधानमन्त्री बालेन्द्र शाहको प्रस्तावित भारत भ्रमणको तयारी र दुई देशबीचको सम्बन्धका विभिन्न पक्षमा छलफल गर्न केन्द्रित रहेको छ । भ्रमणका क्रममा उनले परराष्ट्रमन्त्री शिशिर खनालसँग पनि भेटवार्ता गरेका छन् । खनालले पनि पृष्ठभूमिमा निशान छापमा चुच्चे नक्सा देखिने गरी तस्बिर खिचाएका छन् । उसो त अर्थमन्त्री वाग्लेको बैठक कक्षमा ठूलो चुच्चे नक्सा राखिएको छ । कुटनीतिज्ञहर"सँग तस्बिर खिचाउँदा उनले चुच्चे नक्सालाई पृष्ठभूमिमा पार्ने गरेका छन् ।
