नवनियुक्त आईजीपी केसीलाई गृहमन्त्री गुरुङले लगाइदिए फुली
काठमाडौं । नेपाल प्रहरीका महानिरीक्षकलाई गृहमन्त्रीले दज्र्यानी चिह्न लगाइदिएका छन् । बुधबार गृह मन्त्रालयमा नवनियुक्त महानिरीक्षक मनोजकुमार केसीलाई गृहमन्त्री सुधन गुरुङले दज्र्यानी चिह्न लगाइदिएका हुन् । यसअघि गृहसचिवले दज्र्यानी चिह्न लगाउने गरेका थिए । सरकारले आजै केसीलाई प्रहरी महानिरीक्षक नियुक्त गरेको थियो । मन्त्रिपरिषद्को आकस्मिक बैठकले दानबहादुर कार्कीलाई हटाएर केसीलाई महानिरीक्षक बनाउने निर्णय गरेको थियो । मन्त्रिपरिषद् बैठकले कार्कीलाई प्रधानमन्त्रीको सुरक्षा सल्लाहकारको जिम्मेवारी दिएको छ ।
नेपाली उत्पादनलाई विश्व बजारसँग जोड्न 'नेपाल प्रत्यायन केन्द्र' सञ्चालनमा
काठमाडौं । सरकारले नेपालको औद्योगिक विकास र व्यापार सहजीकरणका नेपाल प्रत्यायन केन्द्र स्थापना गरेको छ । त्रिपुरेश्वरस्थित केन्द्रको आज एक कार्यक्रमका बीच उद्योग, वाणिज्य तथा आपूर्तिमन्त्री ई. दीपककुमार साहले उद्घाटन गरे । उनले उद्योगको लागत घटाउने, उपभोक्ताको विश्वास बढाउने र नेपाली उत्पादनलाई विश्व बजारसँग जोड्ने दिशामा यस केन्द्रको सञ्चालन कोशेढुङ्गा सावित हुनेमा विश्वास व्यक्त गरे । नेपाली उद्योगलाई प्रतिस्पर्धी बनाउने, उपभोक्ताले गुणस्तरीय र सुरक्षित वस्तु तथा सेवा प्राप्त गर्ने सुनिश्चितता बढाउने र नेपाली उत्पादनलाई अन्तर्राष्ट्रिय बजारमा स्थापित गर्ने उद्देश्यले केन्द्रको स्थापना गरिएको हो । मन्त्रालयका अनुसार केन्द्रको सञ्चालनबाट अब प्रयोगशाला, मेडिकल ल्याव, निरीक्षण तथा प्रमाणीकरण गर्ने संस्थाले नेपालमै प्रत्यायन सेवा प्राप्त गर्ने आधार तयार भएको छ । यसले उद्योगी तथा व्यवसायीको परीक्षण र प्रमाणीकरणसम्बन्धी समय र खर्च घटाउन, गुणस्तर सुधार गर्न तथा विदेशी निकायमाथिको निर्भरता कम गर्न सहयोग पुग्नेछ । साथै केन्द्रको स्थापनापछि खाद्य पदार्थ, औषधिजन्य उत्पादन, निर्माण सामग्री, विद्युतीय उपकरणलगायत वस्तुको गुणस्तर परीक्षण गर्ने संस्थाको विश्वसनीयता अभिवृद्धि हुँदा आम उपभोक्ताको स्वास्थ्य, सुरक्षा र हित संरक्षणमा समेत सकारात्मक योगदान पुग्ने अपेक्षा गरिएको छ । “नेपालको निर्यात व्यापारलाई सहज बनाउन अन्तर्राष्ट्रिय प्रत्यायन तथा पारस्परिक मान्यताको व्यवस्था विकास गर्न केन्द्रले महत्वपूर्ण भूमिका खेल्नेछ । यसबाट नेपाली उत्पादनको गुणस्तरप्रति अन्तर्राष्ट्रिय विश्वास बढाउन र निर्यातकर्ताको लागत तथा प्रक्रियागत झन्झट घटाउन समेत सहयोग पुग्नेछ“, मन्त्रालयद्वारा जारी गरेको विज्ञप्तिमा भनिएको छ । नागरिकले सुरक्षित वस्तु पाउनुपर्छ, उद्योगीले अनावश्यक खर्च र झन्झटबाट मुक्ति पाउनुपर्छ र नेपाली उत्पादनले विश्व बजारमा सम्मानजनक स्थान बनाउनुपर्छ भन्ने विषयलाई आत्मसात् गर्दै केन्द्रको स्थापना गरिएको हो ।
त्रिपाल पावरले आईपीओ ल्याउने
काठमाडौं । त्रिकाल पावर कम्पनी लिमिटेडको पहिलो वार्षिक साधारण सभा सम्पन्न भएको छ । सभाले आर्थिक वर्ष २०८२/८३ को वार्षिक प्रतिवेदनका साथै लेखापरीक्षकको प्रतिवेदनसहितको वित्तीय विवरण सर्वसम्मतिले पारित गरेको छ । साधारण सभाले कम्पनीको चुक्ता पुँजी ३० करोड रुपैयाँ पुर्याउने मुख्य एजेण्डा पारित गरेको छ । साथै, सोही पुँजीको २५ प्रतिशत बराबर हुन आउने ७ करोड ५० लाख रुपैयाँ बराबरको साधारण सेयर (आईपीओ) सर्वसाधारणका लागि निष्कासन (जारी) गर्ने प्रस्ताव समेत पारित गरेको छ । त्रिकाल पावर कम्पनी लिमिटेडले सुदूरपश्चिम प्रदेशको दार्चुला जिल्लामा २ मेगावाट क्षमताको थालीगाड साना जलविद्युत आयोजना निर्माण गरिरहेको छ । २०७४ साल चैत ४ गते स्थापित भई २०८३ असार ३१ गते पब्लिक कम्पनी लिमिटेडमा रूपान्तरण भएको यस कम्पनीले महाकाली नगरपालिका वडा नं. ६ र ७ भएर बहने थालीगाड खोलामा उक्त आयोजना अगाडि बढाएको हो । आयोजनाले नेपाल विद्युत् प्राधिकरणसँग मिति २०८१ भदौ १७ गते विद्युत् खरिद बिक्री सम्झौता (पीपीए ) सम्पन्न गरिसकेको छ । यसअघि नै ऊर्जा, जलस्रोत तथा सिँचाइ मन्त्रालय अन्तर्गतको विद्युत् विकास विभागबाट २०८१ साउन २५ गते विद्युत् उत्पादनको अनुमतिपत्र प्राप्त गरेको यस आयोजनाको अनुमतिपत्रको बहाल अवधि २०८१ साउन २५ देखि २११६ साउन २४ गतेसम्म रहनेछ । प्राविधिक विवरण अनुसार आयोजनाको पानी प्रयोग गर्न ९ मिटर लम्बाइ र २ मिटर उचाइको ‘टायरोलियन’ प्रकारको बाँध निर्माण गरी बायाँ किनारमा बटम इन्टेक बनाइनेछ । त्यहाँबाट ग्राभेल ट्रयाप र डिसिल्टिङ्ग वेसिन हुँदै २३५० मिटर लामो हेडरेस तथा पेनस्टक पाइपमार्फत पानीलाई सतही विद्युत् गृहमा खसालिनेछ । विद्युत् गृहमा जडित १००० किलोवाटका दुई वटा पेल्टन टर्बाइन र जेनेरेटरमार्फत २ मेगावाट विद्युत् उत्पादन गरिनेछ । उत्पादित विद्युत् ३३ केभी प्रसारण लाइनमार्फत १.२ किलोमिटर दूरीमा रहेको नेपाल विद्युत् प्राधिकरणको थालीगाड धाप सबस्टेसनमार्फत राष्ट्रिय प्रसारण लाइनमा जोडिनेछ ।
पिताम्बर भण्डारी : त्रिवीका गोल्ड मेडलिस्ट, राष्ट्र बैंकका निवृत्त ईडी
काठमाडौं । सरकारले निक्षेप तथा कर्जा सुरक्षण कोषको प्रमुख कार्यकारी अधिकृत (सीईओ) मा पिताम्बर भण्डारीलाई नियुक्त गरेको छ । मंगलबार बसेको मन्त्रिपरिषद् बैठकले अर्थ मन्त्रालयको सिफारिसमा भण्डारीलाई उक्त पदमा नियुक्त गरेको हो । गुल्मीको धुर्कोट-६ मा २०२८ साल मङ्सिर १९ गते जन्मिएका भण्डारी अर्थतन्त्र, मौद्रिक नीति तथा बैंक तथा वित्तीय क्षेत्रका अनुभवी हुन् । उनले नेपालको केन्द्रीय बैंकिङ क्षेत्रमा करिब २५ वर्ष काम गरेका छन् । मौद्रिक नीति निर्माण, वित्तीय क्षेत्रको नियमन तथा सुपरीवेक्षण, आर्थिक अनुसन्धान र संस्थागत व्यवस्थापनमा उनको लामो अनुभव छ । भण्डारीले राष्ट्र बैंकमा सन् २०१८ अप्रिलदेखि २०२५ अप्रिलसम्म कार्यकारी निर्देशकको जिम्मेवारी सम्हालेका थिए । राष्ट्र बैंकमा रहँदा उनले गैरबैंकिङ वित्तीय संस्था सुपरीवेक्षण विभाग, मौद्रिक व्यवस्थापन विभाग, वित्तीय संस्था सुपरीवेक्षण विभाग, जनशक्ति व्यवस्थापन विभाग तथा संस्थागत योजना र जोखिम व्यवस्थापन विभागको नेतृत्व गरेका थिए । त्यसअघि उनले आर्थिक अनुसन्धान विभागमा निर्देशकका रूपमा काम गरेका थिए । त्यस्तै, राष्ट्र बैंकको जनकपुर र नेपालगञ्ज कार्यालयमा व्यवस्थापक तथा उपव्यवस्थापकको जिम्मेवारी सम्हालेका थिए । विभिन्न विभागमा उपनिर्देशक र सहायक निर्देशकका रूपमा काम गर्दा उनले मौद्रिक नीति, पुँजी बजार, वैदेशिक व्यापार तथा भुक्तानी सन्तुलनका क्षेत्रमा अनुभव हासिल गरेका थिए । केन्द्रीय बैंकिङ अनुभवका अतिरिक्त भण्डारीसँग विभिन्न वित्तीय संस्थाको सञ्चालक तथा नीतिगत तहमा काम गरेको अनुभव पनि छ । उनले नेपाल धितोपत्र बोर्डको सञ्चालक समितिमा सन् २०२५ डिसेम्बरदेखि २०२६ मेसम्म सदस्यका रूपमा काम गरेका थिए । त्यस्तै, सन् २०१९ देखि २०२० सम्म निक्षेप तथा कर्जा सुरक्षण कोषको सञ्चालक रहेका उनी नेपाल ग्रामीण विकास बैंकको सञ्चालकसमेत भएका थिए । पाँचवटा क्षेत्रीय ग्रामीण विकास बैंकको संयुक्त मर्जर समितिमा पनि उनले सदस्यका रूपमा काम गरेका थिए । सन् १९९६ मा त्रिभुवन विश्वविद्यालयबाट अर्थशास्त्रमा स्नातकोत्तर गरेका थिए । स्नातकोत्तर तहमा प्रथम श्रेणीमा प्रथम भएका उनले महेन्द्र विद्याभूषण 'ख’, तारापद चौधरी स्वर्ण पदक (गोल्ड मेडल) र खगेन्द्रमान सिंह प्रधान स्वर्ण पदक (गोल्ड मेडल) प्राप्त गरेका थिए । त्यसपछि उनले बेलायतको ब्राडफोर्ड विश्वविद्यालयबाट सन् २००६ मा अन्तर्राष्ट्रिय अर्थशास्त्रमा स्नातकोत्तर गरेका थिए । यसअघि सन् १९९८ देखि २००० सम्म पाटन बहुमुखी क्याम्पसमा सहायक प्राध्यापकका रूपमा अध्यापनसमेत गरेका थिए । भण्डारीले अन्तर्राष्ट्रिय मुद्रा कोष, फेडरल रिजर्भ बैंक अफ न्यूयोर्क, एसियाली विकास बैंक तथा स्विस नेसनल बैंकलगायतका अन्तर्राष्ट्रिय संस्थाबाट मौद्रिक नीति, वित्तीय अनुशासन र बृहत् सावधानीसम्बन्धी नीतिमा उच्चस्तरीय तालिम लिएका छन् । अन्तर्राष्ट्रिय वित्तीय संस्थाका तालिम तथा कार्यक्रमबाट उनले मौद्रिक व्यवस्थापन र वित्तीय स्थायित्वसम्बन्धी अन्तर्राष्ट्रिय अभ्यासको अनुभव हासिल गरेका छन् । उनका नेपालको सम्भाव्य उत्पादन, उत्पादन अन्तर तथा लगानीसम्बन्धी खोजमूलक अनुसन्धानपत्रसमेत प्रकाशित छन् । अर्थतन्त्रको संरचना, मौद्रिक नीति र वित्तीय क्षेत्रसँग सम्बन्धित अनुसन्धानमा उनको विशेष रुचि रहेको छ ।
ईडी छोडे, अध्यक्ष बने
काठमाडौं । नेपाल बीमा प्राधिकरणको अध्यक्षमा राजनविक्रम थापा नियुक्त भएका छन् । अर्थ मन्त्रालयले गठन गरेको छनोट समितिको सिफारिसका आधारमा मंगलबार बसेको मन्त्रिपरिषद् बैठकले थापालाई प्राधिकरणको अध्यक्षमा नियुक्त गरेको हो । नवनियुक्त अध्यक्ष थापालाई बुधबार अर्थ मन्त्रालयमा आयोजित कार्यक्रममा अर्थमन्त्री डा. स्वर्णिम वाग्लेले पद तथा गोपनीयताको शपथ गराएका छन् । शपथपछि अर्थमन्त्री वाग्लेले थापालाई बीमा क्षेत्रको विकास र विस्तारका लागि निडर तथा निर्धक्क भएर काम गर्न निर्देशन दिएका छन् । गोरखाको नरेश्वरमा जन्मिएका थापा नेपाल राष्ट्र बैंकका कार्यकारी निर्देशक (ईडी) का रूपमा कार्यरत थिए । करिब तीन दशक नेपालको वित्तीय क्षेत्रमा बिताएका उनी आगामी चैतमा अनिवार्य अवकाशमा जाने तयारीमा थिए । तर, अवकाश हुनुअघि नै उनी बीमा क्षेत्रको नियामक निकायको नेतृत्वमा पुगेका छन् । सन् १९९७ अर्थात् २०५४ सालमा नेपाल राष्ट्र बैंकको सेवामा प्रवेश गरेका थापाले २९ वर्षभन्दा बढी समय केन्द्रीय बैंकमा बिताएका छन् । यस अवधिमा उनले सहायक निर्देशक, उपनिर्देशक, निर्देशक हुँदै कार्यकारी निर्देशकसम्मको जिम्मेवारी सम्हालेका छन् । थापासँग बीमा क्षेत्रसँग सम्बन्धित संस्थागत नेतृत्व र सञ्चालक तहको अनुभव पनि छ । उनी निक्षेप तथा कर्जा सुरक्षण कोष र राष्ट्रिय जीवन बीमा कम्पनीको सञ्चालक रूपमा काम गरेको अनुभव छ । व्यवस्थापन सङ्घ नेपालको प्रथम उपाध्यक्षसमेत रहेका त्रिभुवन विश्वविद्यालयबाट व्यवस्थापन विषयमा एमफिल गरेका छन् । त्यस्तै, पाटन बहुमुखी क्याम्पसबाट अर्थशास्त्रमा स्नातकोत्तर र शङ्करदेव क्याम्पसबाट व्यवस्थापनमा स्नातकोत्तर गरेका छन् । नेपाल ल क्याम्पसबाट कानुनमा स्नातक गरेका उनले वाणिज्यशास्त्रमा स्नातकसमेत गरेका छन् । उनले भारतको सिङ्घानिया विश्वविद्यालयबाट विद्यावारिधि हासिल गरेका छन् । नेपाली बैंकहरूमा संस्थागत सुशासनले जोखिम व्यवस्थापनमा पार्ने प्रभाव उनको विद्यावारिधि अनुसन्धानको मुख्य विषय हो । उक्त उपाधिको समकक्षता हाल त्रिभुवन विश्वविद्यालयबाट मूल्याङ्कनको प्रक्रियामा रहेको छ । थापासँग व्यवस्थापन शिक्षण क्षेत्रमा पनि एक दशकभन्दा बढीको अनुभव छ । उनले विभिन्न शैक्षिक संस्थामा अध्यापन गर्नुका साथै बैंकिङ तथा वित्तीय क्षेत्रसँग सम्बन्धित तालिम कार्यक्रममा स्रोत व्यक्तिका रूपमा काम गरेका छन् । बैंकिङ, व्यवस्थापन र संस्थागत सुशासनसम्बन्धी पुस्तकसमेत प्रकाशित गरेका उनका अनुसन्धानमूलक लेख तथा एक सयभन्दा बढी समसामयिक र विश्लेषणात्मक लेख विभिन्न प्रकाशन तथा पत्रपत्रिकामा प्रकाशित छन् । उनले सन् २००८ मा प्रकाशित ‘प्रिन्सिपल्स एन्ड प्राक्टिसेज अफ नेपालीज बैंकिङ’ पुस्तकका सहलेखकका रूपमा काम गरेका छन् । त्यस्तै, सन् २०१० मा ‘प्रिन्सिपल्स अफ म्यानेजमेन्ट’ नामक पुस्तक पनि प्रकाशित गरेका छन् । दक्षिण एसियामा सुशासनका चुनौती तथा नेपाली बैंकिङ प्रणालीमा संस्थागत सुशासनको आवश्यकता र महत्वलगायत विषयमा उनले अन्तर्राष्ट्रिय सम्मेलनमा अनुसन्धानपत्र प्रस्तुत गरेका छन् । वित्तीय स्थायित्व, बैंकिङ नियमन, बेसल ढाँचा, जोखिम व्यवस्थापन तथा केन्द्रीय बैंकिङसम्बन्धी विभिन्न अन्तर्राष्ट्रिय तालिम र गोष्ठीमा सहभागी भएका थापाले अमेरिका, बेलायत, स्विट्जरल्यान्ड, दक्षिण कोरिया, मलेसिया, जापान, भारतलगायत विभिन्न देशमा आयोजित कार्यक्रममा सहभागिता जनाएका छन् । उनले अन्तर्राष्ट्रिय नियामकीय अभ्यास तथा वित्तीय स्थायित्वसम्बन्धी अनुभवसमेत हासिल गरेका छन् । जो बसको खलासी हुँदै राष्ट्र बैंकको ईडी बने
निक्षेप तथा कर्जा सुरक्षण कोषको सिइओमा पिताम्बर भण्डारी नियुक्त
काठमाडौं । सरकारले निक्षेप तथा कर्जा सुरक्षण कोषको प्रमुख कार्यकारी अधिकृतमा पिताम्बर भण्डारीलाई नियुक्त गरेको छ । मंगलबार बसेको मन्त्रिपरिषद् बैठकले अर्थ मन्त्रालयको सिफारिसमा उनलाई सो पदमा नियुक्त गरेको हो । बुधबार मन्त्रालय आयोजित एक कार्यक्रममा अर्थमन्त्री डा.स्वर्णिम वाग्लेले भण्डारीलाई नियुक्ति पत्र प्रदान गर्दै सफल कार्यकालको शुभकामना दिए । संस्थाको गरिमा र नागरिकको निक्षेप सुरक्षाको जिम्मेवारीमा कटिबद्ध हुन निर्देशन समेत दिए ।
प्रताप सुवेदी बने नेप्सेको नयाँ सिइओ
काठमाडौं । सरकारले नेपाल स्टक एक्सचेञ्ज (नेप्से) को प्रमुख कार्यकारी अधिकृतमा प्रताप सुवेदीलाई नियुक्त गरेको छ । अर्थ मन्त्रालयले गठन गरेको छनोट समितिको सिफारिसमा मंगलबार बसेको मन्त्रिपरिषद् बैठकले सुवेदीलाई प्रमुख कार्यकारी अधिकृत पदमा नियुक्त गरेको हो । उनलाई मंगलबार अर्थमन्त्री डा. स्वर्णिम वाग्लेले नियुक्ति पत्र प्रदान गर्दै इमानदारीपूर्वक कार्य सम्पादन गर्न निर्देशन दिए ।
नेपाल बीमा प्राधिकरणको अध्यक्षमा राजन बिक्रम थापा नियुक्त
काठमाडौं । सरकारले नेपाल बीमा प्राधिकरणको अध्यक्षमा राजन बिक्रम थापालाई नियुक्त गरेको छ । अर्थ मन्त्रालयले गठन गरेको छनोट समितिको सिफारिसको आधारमा मंगलबार बसेको मन्त्रिपरिषद बैठकले थापालाई अध्यक्षमा नियुक्त गरेको हो । बुधबार अर्थ मन्त्रालयमा आयोजित एक कार्यक्रममा अर्थमन्त्री डा. स्वर्णिम वाग्लेले थापालाई पद तथा गोपनीयताको शपथ गराए । शपथ पछि अर्थमन्त्री डा. वाग्लेले विशेष निर्देशन दिंदै नवनियुक्त अध्यक्ष थापालाई बीमा क्षेत्रको श्रेय वृद्धिमा निडर र निर्धक्क भएर काम गर्न निर्देशन दिए ।
