इन्टरनेट कम्पनीलाई १० दिनभित्र विवरण पेश गर्न प्राधिकरणको कडा निर्देशन

काठमाडौं । नेपाल दूरसञ्चार प्राधिकरणले इन्टरनेट सेवा प्रदायकलाई दूरसञ्चार सेवा दस्तुरको विवरण बुझाउन निर्देशन दिएको छ । प्राधिकरणले गत आर्थिक वर्ष २०८२/८३ र चालू आर्थिक वर्षको असोज महिनासम्मको आय, दूरसञ्चार सेवा दस्तुर दाखिला तथा त्यससँग सम्बन्धित आवश्यक कागजात पेस गर्न निर्देशन दिएको हो । प्राधिकरणले अनुमतिपत्र प्राप्त गरी इन्टरनेट सेवा सञ्चालन गरिरहेका सबै सेवा प्रदायकलाई १० दिनभित्र विवरण बुझाउन भनेको हो । आर्थिक ऐन, २०६३ को दफा ८ को उपदफा ५ मा दूरसञ्चार सेवा दस्तुरको प्रशासन नेपाल दूरसञ्चार प्राधिकरणले निर्धारण गरेबमोजिम हुने व्यवस्था छ । सोही कानुनी व्यवस्थाअनुसार सेवा प्रदायकले नेपाल सरकारको राजस्व खातामा दाखिला गरेको दूरसञ्चार सेवा दस्तुरको विवरण माग गरिएको प्राधिकरणले जनाएको छ । प्राधिकरणले सेवा प्रदायकसँग इन्टरनेट बिक्रीबाट प्राप्त आय, मर्मतसम्भारबाट प्राप्त आय, उपकरण बिक्रीबाट प्राप्त आय र अन्य आयको छुट्टाछुट्टै विवरण माग गरेको छ । त्यसैगरी, कुल आय, दाखिला गरिएको दूरसञ्चार सेवा दस्तुरको रकम र दाखिला मितिसमेत खुलाउनुपर्नेछ । तोकिएको समयभन्दा ढिलो दस्तुर बुझाएको भए त्यसबापत दाखिला गरिएको ब्याजको विवरणसमेत पेस गर्नुपर्ने जनाएको छ । सेवा प्रदायकले दाखिला गरेको मूल दस्तुर र ब्याजसहितको कुल रकम पनि खुलाउनुपर्नेछ । प्राधिकरणले प्रत्येक महिनाको विवरण छुट्टाछुट्टै तयार गरी तोकिएको ढाँचामा पेस गर्न निर्देशन दिएको छ । विवरणसँगै दूरसञ्चार सेवा दस्तुर दाखिला गरेको पुष्टि हुने आवश्यक कागजातसमेत संलग्न गर्नुपर्नेछ ।

पहाडी तथा हिमाली क्षेत्रमा आंशिक बदली, तराईमा तुवाँलो

काठमाडौं । मुलुकमा पश्चिमी वायुको आंशिक प्रभाव रहेको छ । यसको प्रभावले कोशी, बागमती र गण्डकी प्रदेशका हिमाली तथा पहाडी भू-भागमा साधारणतया बादल लागेको छ भने लुम्बिनी प्रदेशको पहाडी क्षेत्रमा आंशिक बदली भएको छ । तराईका केही स्थानमा तुवाँलो लागेको छ भने देशका बाँकी भागमा मौसम सफा रहेको छ । मौसम पूर्वानुमान महाशाखाका अनुसार आज दिउँसो कोशी, बागमती, गण्डकी र लुम्बिनी प्रदेशका हिमाली तथा पहाडी भू-भागमा आंशिक बदली रहनेछ । बाँकी भागको मौसम सफा रहनेछ । कोशी र गण्डकी प्रदेशका हिमाली भू-भागका एक-दुई स्थानमा हल्का वर्षा तथा हिमपातको सम्भावना रहेको महाशाखाले जनाएको छ । त्यस्तै, आज राति कोशी, मधेश र लुम्बिनी प्रदेशका साथै बागमती र गण्डकी प्रदेशका हिमाली तथा पहाडी भू-भागमा आंशिक बदली रहनेछ । देशका बाँकी भागमा मौसम मुख्यतया सफा रहने अनुमान छ । तराईका साथै उपत्यका र खोँचहरूमा बिहानपख हुस्सु तथा कुहिरो लाग्ने सम्भावना रहेको महाशाखाले जनाएको छ ।

काठमाडौं उपत्यकामा चिसो बढ्यो, न्यूनतम तापक्रम ८.८ डिग्रीमा झर्‍यो

काठमाडौं । काठमाडौं उपत्यकासहित देशभर चिसो बढ्न थालेको छ । मंगलबार उपत्यकाको न्यूनतम र अधिकतम दुवै तापक्रम सोमबारको तुलनामा घटेसँगै चिसो महसुस गरिएको हो । नेपाल मौसम विज्ञान विभागको मौसम पूर्वानुमान महाशाखाले सार्वजनिक गरेको विवरणअनुसार मंगलबार काठमाडौं उपत्यकाको न्यूनतम तापक्रम ८.८ डिग्री सेल्सियसमा झरेको छ ।  यस्तै, अधिकतम तापक्रमसमेत घटेर २१.१ डिग्री सेल्सियसमा सीमित भएको छ । सोमबार उपत्यकाको न्यूनतम तापक्रम ११.५ डिग्री र अधिकतम तापक्रम २२.५ डिग्री सेल्सियस मापन गरिएको थियो ।  एकै दिनमा तापक्रममा आएको यो गिरावटले उपत्यकामा चिसो ह्वात्तै बढाएको छ । महाशाखाले दैनिक रूपमा काठमाडौं उपत्यकासहित देशका विभिन्न स्थानको न्यूनतम र अधिकतम तापक्रम मापन गर्दै आएको छ । जसअनुसार बिहान ८ः४५ बजे न्यूनतम तापक्रम र साँझ ५ः४५ बजे अधिकतम तापक्रम मापन गर्ने गरिन्छ ।  मौसमविद्हरूका अनुसार न्यूनतम तापक्रमले रातिदेखि बिहानसम्मको चिसोपनलाई जनाउँछ भने अधिकतम तापक्रमले दिनभरको मौसमको अवस्था मापन गर्छ ।  हाल उपत्यकामा मात्र नभई देशभरकै तापक्रम घट्ने र चिसो बढ्ने क्रम जारी रहेको महाशाखाले जनाएको छ ।