दशैं-तिहारमा बैंकरलाई १३ दिन बिदा, कुन-कुन दिन बस्न पाउँछन् घर ?
काठमाडौं । नेपाल राष्ट्र बैंकले बैंक तथा वित्तीय संस्थामा काम गर्ने कर्मचारीहरूका लागि दशैं तथा तिहारको बिदाको व्यवस्था गरेको छ । राष्ट्र बैंकको जनशक्ति व्यवस्थापन विभागले बैंक तथा वित्तीय संस्थाका कर्मचारीहरूका लागि दशैं तथा तिहारमा ११ दिन बिदा दिने व्यवस्था गरेको हो । राष्ट्र बैंकले गरेको व्यवस्थाका अनुसार बैंक तथा वित्तीय संस्थाका कर्मचारीहरूले दशैंमा ६ दिन बिदा पाउनेछन् । राष्ट्र बैंकले असोज महिनामा घटस्थापनादेखि दशैंसम्म ६ दिन बिदाको व्यवस्था गरेको हो । आज घटस्थापनाको दिनमा बैंकका कर्मचारीहरु बिदामा छन् । आज बैंक तथा वित्तीय संस्थाहरू बन्द छन् । बैंक तथा वित्तीय संस्थाका कर्मचारीहरूले १७ गते घटस्थापनाका दिन पाएको बिदासहित दशैंमा ६ दिन बिदाको समय तोकिएको छ । असोज २४ गतेदेखि कर्मचारीले बिदा पाउनेछन् भने असोज २८ गतेसम्म सो बिदा हुनेछ । असोज २९ गतेदेखि भने बैंक तथा वित्तीय संस्थाहरू खुल्नेछन् । नेपाल राष्ट्र बैंकले तिहारमा पनि बिदाको व्यवस्था गरेको छ । तिहारमा कात्तिक १५ गतेदेखि १९ गतेसम्म कर्मचारीहरूले बिदा पाउनेछन् । बैंक तथा वित्तीय संस्थाका कर्मचारीले तिहारमा पनि ५ दिन बिदा पाउनेछन् । १८ गते भाइटिका छ । त्यसको पछिल्लो दिन कात्तिक १९ गते राष्ट्र बैंकले बिदा दिएको छ । सो दिन सार्वजनिक बिदा नै हो । राष्ट्र बैंकले कर्मचारीहरूका लागि छठ पर्वको बिदाको पनि व्यवस्था गरेको छ । कात्तिक २२ गते छठ पर्व र २५ गते फाल्गुनन्द जयन्तीको बिदा छट्याइएको छ । २५ गतेको बिदा भने किरात धर्ममा आस्था राख्ने कर्मचारीले मात्रै बिदा पाउनेछन् । यस्तै, ३० गते पनि बिदा गरेको छ । कात्तिक ३० गते गुरु नानक जयन्ती छ । तर, सो दिन नेपाली शिख धर्माबलम्बी कर्मचारीहरूको लागि मात्रै बिदा हुने जानकारी राष्ट्र बैंकले गराएको छ । राष्ट्र बैंकले सम्बन्धित धर्म, संस्कृति, भौगोलिक क्षेत्र र स्थानविशेषका लागि मात्र सार्वजनिक बिदा हुने पर्वहरूको हकमा सम्बन्धित कर्मचारीहरूले स्वयम घोषणा गरी सम्बन्धित विभाग, कार्यालय वा शाखामा अग्रिम जानकारी गराउनुपर्ने उल्लेख गरेको छ ।
इरान-इजरायल युद्धका कारण भारतीय लगानीकर्ताले गुमाए ६० खर्ब
काठमाडौं । बिहीबार भारतीय सेयर बजारमा भारी गिरावट आएको छ । इरान र इजरायलबीच बढ्दो तनावका कारण विश्वभरिका बजारमा गिरावट आएकाले त्यसको प्रभाव भारतीय बजारमा पनि देखिएको हाे । बीएसई सेन्सेक्स ९०० अंकको गिरावटसहित खुल्यो भने निफ्टी पनि २५५५० भन्दा तल पुगेको छ । सबै क्षेत्रमा गिरावट आएको छ । यसका कारण बीएसईमा सूचीबद्ध कम्पनीहरूको मार्केट क्याप ५६ अर्ब ६३ करोड रुपैयाँले घटेर ४६ अर्ब ९२ अर्ब ३० करोडमा पुगेको छ । सेन्सेक्सका ३० मध्ये २८ वटा घटेर खुलेका छन् । यसैबीच अनिल अम्बानीको कम्पनी रिलायन्स पावरको सेयर फेरि एकपटक अपर सर्किटमा पुगेको छ । यो सेयर गत सत्रमा ५१.१० रुपैयाँमा बन्द भएकोमा आज ५ प्रतिशतले बढेर ५३.६५ रुपैयाँमा पुगेको छ । यो ५२ हप्ताको उच्चतम स्तर हो । गान्धी जयन्तीका कारण असोज २ गते भारतीय सेयर बजार बन्द रहे पनि विश्वका अधिकांश बजार ओरालो लागेको थियो । दक्षिण कोरियामा १.२ प्रतिशत र जापानमा २.२ प्रतिशतले गिरावट आयो । तर, ताइवानमा ०.७५ प्रतिशत र हङकङमा ६.२ प्रतिशतले वृद्धि भएको थियो भने चीनको बजार बन्द रह्यो । प्रि-ओपन सत्रमा सेन्सेक्स १२६४ अंक अर्थात् १.५ प्रतिशत गिरावटका साथ ८३००२ अंकमा झर्यो भने निफ्टी पनि ३४४ अंक अर्थात् १.३३ प्रतिशतले घटेर २५४५२ अंकमा झर्यो । दिउँसो १२ बजे सेन्सेक्स १३१८ अंक अर्थात् १.५६ प्रतिशतले घटेर तल ८२९४८.२३ अंकमा थियो भने निफ्टी ३९६ अंक अर्थात् १.५३ प्रतिशतले घटेर २५४००.९५ अंकमा थियो। एजेन्सी
नेपालमा लगानी गर्न कतारी लगानीकर्ता तयार, बैंकिङसहित यी ५ क्षेत्र प्राथमिकतामा
काठमाडौं । श्रमिक गन्तव्यको रूपमा मात्रै नभइ कतारका लगानीकर्ताले नेपालमा लगानीको अवसर पनि खोजिरहेको बताएका छन् । नेपालको सूचना प्रविधि, औषधि उद्योग, बैंक वित्तिय संस्था सम्बद्ध सेवाहरु, जलविद्युत, पर्यटन लगायतका क्षेत्रमा कतारका लगानीकर्ताहरूको रुचि देखिएको छ । कतारका लगानीकर्ता नेपालमा लगानीको अवसर खोजिरहेका छन्,’ कतार चेम्बर अफ कमर्शका अध्यक्ष खालिफा बिन जसिम बिन मोहमद अल थानीले भने, ‘हामी थप लगानीकर्ताहरूलाई पनि प्रोत्साहित गर्नेछौ ।’ नेपाल कतार बिजनेस काउन्सिलको पहिलो अध्यक्षस्तरिय बैठकमा अध्यक्ष थानी र महासंघ अध्यक्ष चन्द्र प्रसाद ढकाल एवं प्रतिनिधिमण्डलबीच बुधबार कतारको राजधानी दोहामा सम्पन्न बैठकमा आर्थिक सम्बन्ध विस्तारका बिषयमा छलफल भएको हो । कतारका अमीर सेख तमीम बिन हमाद अल थानी को गत अप्रिल २३ र २४ मा सम्पन्न नेपाल भ्रमणका क्रममा महासंघ र कतार चेम्बरबीच बिजनेस काउन्सिल स्थापना गर्ने सहमतिमा हस्ताक्षर भएको थियो । काउन्सिलको यस पहिलो अध्यक्षस्तरिय वैठकमा अध्यक्ष ढकाल र कतार चेम्बर अध्यक्ष थानीले आ आफ्नाे नेतृत्वमा सदस्य नियुक्त गरि काउन्सिललाई छिट्टै पूर्णता दिने सहमति पनि भएको छ । त्यस लगत्तै नेपालमा कतार नेपाल बिजनेस सम्मेलन आयोजना गर्ने प्रस्ताव अध्यक्ष ढकालले राखे । आगामी वर्ष उक्त कार्यक्रम आयोजना गर्ने सहमति पनि बैठकमा भयो । बैठकमा अध्यक्ष ढकालले नेपालमा वाह्य क्षेत्र स्थायित्व रहेको र कानुनहरुमा गरिएको सुधारले लगानीको अवसर जुटदै गएको बताए । उनले कतारका लगानीकर्ताहरूलाई नेपालमा जलविद्युत, पर्यटन, सूचना प्रविधि, सीप विकास लगायतका क्षेत्रमा पर्याप्त सम्भावना रहेकोले लगानीका लागि आह्वान गरे । कतार सरकारले आयोजना गरेको एसियन कोअपरेसन डायलगमा नेपालको निजी क्षेत्रको प्रतिनिधित्व गर्दै अध्यक्ष ढकालले सहभागिता पनि जनाएका थिए । गत वैशाखमा मात्रै कतारका अमिर शेख तमिम विन हमाद अल थानी नेपाल आएका थिए । दुई दिने नेपालमा भ्रमणमा आएका उनीसँग सरकारी तहमा ५ वटा समझदारी र एउटा सम्झौता भएको थियो भने निजी क्षेत्रसँग पनि दुईवटा समझदारी र सम्झौता भएका थिए । सो बेला दुई देशको संस्कृति र कलाको क्षेत्रमा सहकार्य गर्न नेपालको संस्कृति पर्यटन तथा नागरिक उड्डयन मन्त्रालय र कतारको संस्कृति मन्त्रालयबीच समझदारी, युवा तथा खेलकुदको क्षेत्रमा सहकार्य गर्न नेपाल र कतारबीच समझदारी र नेपालको महान्यायाधिवक्ता कार्यालय र कतारको सार्वजनिक अभियोजन कार्यालयबीच सहयोग तथा सहकार्यको समझदारी भएको थियो । यस्तै, कूटनीतिक प्रशिक्षणका लागि नेपालको परराष्ट्र मामिला अध्ययन प्रतिष्ठान (आईएफए) र कतारको परराष्ट्र मन्त्रालयअन्तर्गको कूटनीतिक प्रशिक्षण केन्द्रबीच समझदारी, दुई देशका निजी क्षेत्र, नेपाल उद्योग वाणिज्य महासंघ र कतार चेम्बरबीच नेपाल–कतार संयुक्त व्यापार परिषद् स्थापना गर्ने सम्बन्धी समझदारी र सम्झौता भएको थियो । सोहीअनुरूप कतारका लगानीकर्ता अहिले नेपालमा लगानी गर्न इच्छा देखाएका हुन् ।
