लाइफ इन्स्योरेन्स कर्पोरेशनले बढायो लाभांश दर, बोनस र नगद कति ?
काठमाडौं । लाइफ इन्स्योरेन्स कर्पोरेशनले अघिल्लो आर्थिक वर्षको लाभांश घोषणा गरेको छ । कम्पनीले सेयरधनीलाई कूल २१.०५२६ प्रतिशत लाभांश वितरण गर्ने प्रस्ताव गरेको हो । पुस ८ गते बसेको कम्पनी सञ्चालक समितिको बैठकले आर्थिक वर्ष २०७६/७७ को नाफाबाट चुक्ता पुँजीको २० प्रतिशत बोनस र कर प्रयोजनको लागि १.०५२६ प्रतिशत नगद लाभांश वितरण गर्ने प्रस्ताव गरेको हो । सञ्चालक समितिको उक्त लाभांश प्रस्तावलाई बीमा समितिले स्वीकृत तथा कम्पनीको आगामी वार्षिक साधारणसभाले पारित गरेपछि मात्रै सेयरधनीले पाउने छन् । प्रस्तावित लाभांश कम्पनीले अघिल्लो आवको तुलनामा बढी हो । कम्पनीले अघिल्लो आर्थिक वर्ष २०७५/७६ को नाफाबाट सेयरधनीलाई चुक्ता पुँजीको १०.५२६३ प्रतिशत लाभांश वितरण गरेको थियो ।
सूर्या लाइफ इन्स्योरेन्ससहित तीन कम्पनीको सेयर मूल्य समायोजन
काठमाडौं । नेपाल स्टक एक्स्चेञ्ज (नेप्से) मा विभिन्न ३ कम्पनीको सेयर मूल्य समायोजन भएको छ । पुस ९ गते शुक्रबार मात्रै सूर्या लाइफ इन्स्योरेन्स, ज्योति विकास बैंक र एनएमबि लघुवित्त वित्तीय संस्थाको सेयर मूल्य समायोजन भएको हो । सूर्या लाइफको १२.७० प्रतिशत बोनस सेयरको लागि मूल्य समायोजन भएको हो । यससँगै इन्स्योरेन्सको समायोजित मूल्य प्रतिकित्ता ६३८.८६ रुपैयाँ तोकिएको छ । त्यस्तै, ज्योति विकास बैंकको पनि ११ प्रतिशत बोनस सेयरको लागि नै मूल्य समायोजन भएको हो । बिहीबार अन्तिम कारोबार प्रतिकित्ता ४४७.५० रुपैयाँमा भएको बैंकको सेयर मूल्य समायोजित पछि प्रतिकित्ता ४०३.१५ रुपैयाँ कायम भएको छ । त्यसैगरी, एनएमबि लघुवित्तको २१.५० प्रतिशत बोनसको लागि मूल्य समायोजन भएको हो र समायोजित मूल्य प्रतिकित्ता १०५३.५० रुपैयाँ कायम भएको छ । यसअघि लघुवित्तको अन्तिम कारोबार प्रतिकित्ता १२८० रुपैयाँमा भएको थियो । यससँगै अबको कारोबारमा यी तीन वटै कम्पनीको सेयर समायोजित मूल्यलाई आधार मानेर हुने छ । सेयर बजार अब पुस ११ गते आइतबार मात्रै खुल्ने छ ।
सिटिजन लाइफ इन्स्योरेन्सका सीईओ पौडेलले पाए निरन्तरता
काठमाडौं । सिटिजन लाइफ इन्स्योरेन्सका प्रमुख कार्यकारी अधिकृत (सीईओ) पोषकराज पौडेलले निरन्तरता पाएका छन् । कम्पनी सञ्चालक समितिको बैठकले सीईओ पौडेललाई दोश्रो कार्यकालको लागि निरन्तरता दिने निर्णय गरेको हो । एक साताअघि बसेको सञ्चालक समितिको बैठकले पौडलको कार्यकाल सकिनु एक महिना अघि नै थप ४ वर्षको लागि निरन्तरता दिने निर्णय गरेको हो । सीईओ पौडेलको पहिलो कार्यकाल यही पुस महिनादेखि सकिँदै छ । चार वर्ष अवधिको पहिलो कार्यकालमा इन्स्योरेन्सलाई एक उचाईमा पुर्याउन सफल भएकोले नै सञ्चालक समितिले उनको कार्यकाल थप्ने निर्णय गरेको हो । सीईओ पौडेलको कार्यकाल थप्नको लागि सञ्चालक समितिले नियामक निकाय बीमा समितिमा पेश गरेको छ । समितिको स्वीकृति पाएपछि उनले सिटिजन लाइफमा दोश्रो कार्यकाल सम्हाल्ने छन् । पौडेलले गत २०७४ साल माघदेखि सिटिजन लाइफको सीईओको कार्यभार सम्हालेका हुन् । उनको कार्यकालमा छोटो अवधिमा कम्पनीले उच्चदरको ग्रोथ हासिल गरिरहेको छ । सिटिजनमा प्रमुखको नेतृत्व कार्यकाल सम्हाल्नुअघि उनले मेटलाइफ इन्स्योरेन्समा प्रमुख वित्तीय व्यवस्थापक भएर १५ वर्षसम्म काम गरेका थिए । त्यसअघि ६ वर्ष अडिट फर्ममा काम गरेका पौडेलसँग शिक्षण पेशा र एनजीओरआइएनजीओमा समेत काम गरेको अनुभव छ । चितवन स्थायी घर भएका पौडेलले गृह जिल्लामै स्नातक र त्रिभुवन विश्वविद्यालय केन्द्रीय क्याम्पसबाट व्यवस्थापन संकायमा स्नातकोत्तर गरेका छन् । २०५३ सालमा काठमाडौं आएका उनले मेटलाइफमा काम गर्दागर्दै अमेरिकाबाट फिलोसिप इन लाइफ इन्स्योरेन्स म्यानेजमेन्ट (एफएलएमआई) डिग्री समेत लिएका छन् ।
