अधिक तरलताको चापमा बैंकहरू, राष्ट्र बैंकले खिच्यो ५ खर्ब रुपैयाँ
काठमाडौं । बैंकिङ क्षेत्रमा अधिक तरलता भएपछि नेपाल राष्ट्र बैंकले झण्डै ५ खर्ब रुपैयाँ खिचेको छ । चालु आर्थिक वर्ष २०८१÷८२ को साउन र भदौमा राष्ट्र बैंकले बैंकिङ प्रणालीबाट ४ खर्ब ९० अर्ब रुपैयाँ तानेको हो । केन्द्रीय बैंकले तरलता व्यवस्थापन गर्न विभिन्न समयमा बैंकिङ प्रणालीबाट निक्षेप खिच्ने गरेको छ । सोही उपकरण प्रयोग गरेर राष्ट्र बैंकले साउनमा ४ पटकमा १ खर्ब ७० अर्ब रुपैयाँ र भदौमा ६ पटकमा ३ खर्ब २० अर्ब रुपैयाँ गरी बैंक तथा वित्तीय संस्थाहरूबाट ४ खर्ब ९० अर्ब रुपैयाँ निक्षेप खिचेको हो । राष्ट्र बैंकले साउनमा तानेको निक्षेपको ब्याज र साँवा भुक्तानी गरिसकेको छ । राष्ट्र बैंकका अनुसार साउन २ गते तानेको ५० अर्बको साँवा र ब्याज साउन २३ गते फिर्ता गरिसकेको छ । यस्तै, साउन ९ गते ४० अर्ब रुपैयाँ खिचेको राष्ट्र बैंकले ब्याज र साँवा रकम साउन ३० गते फिर्ता गरेको थियो । साउन १६ गते संकलन गरेको ४० अर्ब रुपैयाँ निक्षेपको भुक्तानी फिर्ता भदौ ५ गते र साउन २३ गते खिचेको ४० अर्ब रुपैयाँको भदौ १२ गते फिर्ता गरेको राष्ट्र बैंकले जनाएको छ । राष्ट्र बैंकले भदौमा हालसम्म ६ पटक बैंकिङ प्रणालीबाट निक्षेप संकलन गरेको छ । राष्ट्र बैंककाअनुसार भदौ २ गते १ खर्ब रुपैयाँ, भदौ १२ गते ४० अर्ब रुपैयाँ, भदौ १९ गते ३० अर्ब रुपैयाँ, भदौ २३ गते १ खर्ब रुपैयाँ र भदौ २६ गते ४० अर्ब रुपैयाँ गरी ३ खर्ब २० अर्ब रुपैयाँ निक्षेप खिचेको हो । उक्त निक्षेपको ब्याज र साँवा असोजमा गरिने राष्ट्र बैंकले जनाएको छ । पूर्वबैंकर पर्शुराम कुँवर बैंकिङ प्रणालीमा अधिक तरलता र कर्जाको माग नभएपछि तरलता व्यवस्थापन गर्न राष्ट्र बैंकले निक्षेप खिच्ने गरेको बताउँछन् । स्ट्याण्डिङ डिपोजिट फेसिलेटि (एसडीएफ) मा बैंकहरू आफैं बढी भएको निक्षेप जम्मा गर्न जान्छन् भने निक्षेप संकलनमा भने राष्ट्र बैंकले बोलकबोल गरेर निक्षेप तान्ने गर्दछ । ‘विगतमा राष्ट्र बैंकले त्यतिधेरै निक्षेप संकल गर्दैनथ्यो किनभने बजारमा पहिला तरलता अप्रयाप्त हुन्थ्यो,’ उनले भने, ‘बरू तरलता अभाव वा कडाई हुँदा राष्ट्र बैंकले उल्टै रिपोको माध्यमबाट बैंकहरूलाई प्रदान गथ्र्याे । तर, अहिले पैसा फालाफाल हुन थालेपछि निक्षेप संकलन गर्न लागेको हो ।’
अर्थ मन्त्रालयका सहसचिव मैनाली कृषि विकास बैंकको सञ्चालकमा नियुक्त
काठमाडौं । दीर्घराज मैनाली कृषि विकास बैंकको सञ्चालक समितिको सदस्यमा नियुक्त भएका छन् । नेपाल सरकारको निर्णयानुसार कृषि विकास बैंकको बैंक सञ्चालक समितिको सञ्चालक सदस्यमा दीर्घराज मैनाली मनोनयन भएका छन् । नवनियूक्त सञ्चालक सदस्य सरकारी सेवाको लामो अनुभव हुनुका साथै हाल अर्थ मन्त्रालयको सहसचिव पदमा कार्यरत रहेका छन् । बैंक तथा वित्तीय संस्था सम्बन्धी ऐन अनुसार नवनियुक्त सञ्चालक सदस्य दीर्घराज मैनालीलाई बैंक सञ्चालक समितिका अध्यक्ष रामशरण पुडासैनीले सपथ ग्रहण गराएका थिए । उक्त अवसरमा कृषि विकास बैंकका सञ्चालक सदस्यहरु संजिव कुमार कर्ण, गोविन्द प्रसाद भट्टराई संजिव पौडेल, विनोद कुमार गुरांगाई, श्रीमती रीता सुवेदी कृषि विकास बैंकका प्रमुख कार्यकारी अधिकृत गोविन्द गुरुङ, बैंकका कम्पनी सचिव हिमलाल पौडेलसमेतको उपस्थिती रहेको थियो ।
लक्ष्मी सनराइज बैंकले गर्यो वीरगञ्जमा सेवा विस्तार
काठमाडौं । लक्ष्मी सनराइज बैंकले पर्सा जिल्लाको वीरगञ्ज महानगरपालिकामा आफ्नो शाखा स्थानान्तरण मार्फत सेवा विस्तार गरेको छ । बैंकको वीरगञ्ज महानगरपालिका वडा न. ६ स्थित आदर्शनगर चोकमा रहेको शाखालाई सोही महानगरपालिकाको वडा न. ८ स्थित लिंक रोड ९अघिल्लो शाखा स्थानबाट करिब १ केमी मिटर उत्तर(पूर्वतर्फ) मा स्थानान्तरण गरिएको छ । स्थानान्तरण गरिएको साविकको शाखाका ग्राहकहरूले आदर्शनगरमा रहेको अर्को शाखा मार्फत सेवा लिन सक्नेछन् । स्थानान्तरण भए सँगै लक्ष्मी सनराइज बैंकले आफ्नो सेवा विस्तार गर्दै ग्राहकहरूमाझ बैंकिङ सेवाको पहुँच अझ सहज बनाउने विश्वास राखेको छ । स्थानान्तरण भएको शाखाले ग्राहक तथा व्यवसायीहरूलाई सबै प्रकारका रिटेल बैंकिङ सेवाहरू प्रदान गर्ने बैंकले बताएको छ ।
