छैँठौं बर्षमा नेपाली जुत्ताघर, एक हजारमै छाला जुत्ता
काठमाडौं । नेपाली जुत्ता घर छैठौं बर्षमा प्रवेश गरेको छ । स्थापनाको ५ बर्ष पुरा गरेर छैठौं बर्ष प्रवेश गरेसँगै कम्पनीले बर्षै भरी बिशेष अफर ल्याउने भएको छ । असार र साउनमा समर सेल मेला सञ्चालन गरेको कम्पनीले भदौ महिनामा भने छैँठौं बर्ष गाँठका अवसरमा अर्काे अफर ल्याएको छ । ‘प्रत्येक महिना एउटा एउटा क्याम्पेन चलाउँछौं । असार र साउन महिनामा सेल मेला चलायौं, अब भदौंमा छौँठौ बार्षिकोत्सवका अवसरमा आफ्ना ग्राहकहरुलाई बिशेष छुट योजना ल्याएका हौं ।’, नेपाली जुत्ता घर प्रालीका अध्यक्ष होमनाथ उपाध्यायले भने । नेपाली जुत्ता घरमा न्युनतम एक हजा मूल्यमा पनि छालाका जुत्ताहरु पाईन्छन् । उपभोक्ताले आफुले खरिद गर्ने जुत्तामा प्रयोग भएका कच्चा पदार्थहरुका बारेमा पनि जानकारी लिन सक्नेछन् । भर्खरै बजारमा आएका जुत्ताहरुमा २० देखि ५० प्रतिशतसम्म छुट सुबिधा पनि उपलब्ध रहेको उपाध्यायले बताए । नेपाली जुत्ता घरमा खरिद गरिने हरेक जुत्ताहरुमा ६ महिना वारेन्टी पाइन्छ । नेपालमा उत्पादन हुने सबै किसिमका जुत्ता किन्न, हेर्न र अनुसन्धान गर्न पनि पाइन्छ । त्यस बाहेक नेपाली उत्पादन र नेपाली ब्राण्डका बारेमा जानकारी लिन पनि सकिन्छ । सबै नेपालीलाई नेपाली उत्पादन प्रयोग गराउने उदेश्यले ६ बर्ष पहिले सुरु भएको नेपाली जुत्ता घर अहिले जमल, बुद्धमल माछापोखरी, महाराजगंज चक्रपथ, अद्धैत मार्ग पुरानो बसपार्क, कुमारीपाटी ललितपुर र पोखरा सिद्धार्थ चोक स्थित चिप्लेढुंगामा विस्तार भैसकेको छ । नेपाली जुत्ता घरमा बिएफ डिअर हिल सुज, शिखर, कोशेली, क्रसरोड, स्काई सुज, टाकुरा, लेदर विंग्स, शु ल्याण्ड, सफ्ट टच ब्राण्ड सहभागी छन् । लेदर विंग्सले ७५० रुपैंयाँमै छाला जुत्ता उपलब्ध गराईरहेको छ ।
स्वरोजगार लघुवित्तले २१ प्रतिशत लाभांश दिने, चुक्ता पुँजी २९ करोड नाघ्ने
काठमाडौं । स्वरोजगार लघुवित्त वित्तीय संस्थाले सेयरधनीलाई २१.०५२६ प्रतिशत लाभांश दिने भएको छ । संस्थाले २० प्रतिशत बोनस र कर प्रयोजनको लागि १.०५२६ प्रतिशत नगद गरी सो मात्राको लाभांश दिने प्रस्ताव गरेको हो । उक्त प्रस्ताव हालै सम्पन्न कम्पनी सञ्चालक समितिको बैठकले गरेको हो । बैठकको प्रस्तावलाई नेपाल राष्ट्र बैंकले स्वीकृति तथा संस्थाको आगामी साधारणसभाले पारित गर्नुपर्ने छ । त्यसपछि मात्र सेयरधनीले सो मात्राको लाभांश पाउने छन् । हाल संस्थाको चुक्ता पुँजी २४ करोड ४९ लाख रुपैयाँ रहेको छ । २० प्रतिशत बोनस पश्चात लघुवित्तको पुँजी २९ करोड ३९ लाख रुपैयाँ नाघ्ने छ । पछिल्लो समय संस्थाको सेयर मूल्य प्रतिकित्ता ७८० रुपैयाँ रहेको छ ।
एशियन लाईफले ल्यायो जीवन संजीवनी योजना, ५० हजारमै बीमा गर्न सकिने
काठमाडौं । एशियन लाईफ इन्स्योरेन्स कम्पनी लिमिटेडले नयाँ जीवन बीमा योजना “जीवन संजीवनी” (अग्रिम भुक्तानी सावधिक र आजीवन) सार्वजनिक गरेको छ । कम्पनीको संचालक समितिका अध्यक्ष दिपकुमार श्रेष्ठले शनिबार आयोजित एक कार्यक्रमका अवसरमा नयाँ बीमा योजना सार्वजनिक गरेका हुन् । न्यूनत्तम ५० हजारको बीमाङ्कमै शुरु गर्न सकिने यस योजनामा बीमितले बीमा अवधीभर पटक-पटक किस्तामा भुक्तानी पाउनेछन् । त्यस्तै, बीमित ९९ वर्ष पुरा हुन्जेल जीवितै रहेमा थप बीमाङ्क रकम भुक्तानी पाउने कम्पनीले जनाएको छ । यस अन्तर्गत बीमितले बीमाको अवधीका आधारमा बीमा शुरु भएको ३ वर्षदेखि नै किस्तामा बीमाङ्कको रकम भुक्तानी पाउनेछन् । साथै, उनीहरुले रकम भुक्तानी पाउन बीमा समाप्ती अवधीसम्म कुर्नु नपेर्ने इन्स्योरेन्सले बताएको छ । यदि बीमा अवधीभित्रै बीमितको मृत्यु भएमा परिवारजनले बाँकी बीमाशुल्क नतिरी नै बीमाङ्क रकम र आर्जित बोनस एकमुष्ठ भुक्तानी पाउने छन् । यस कम्पनीको अधिकृत पुँजी ५ अर्ब रुपैयाँ र चुक्ता पुँजी १ अर्ब २५ करोड ६७ लाख रुपैयाँ रहेको छ । कम्पनीले यसअघि नै १८ वटा जीवन बीमा योजनाहरु प्रचलनमा ल्याई सकेको छ ।
आईसिएफसि फाइनान्सले ८ प्रतिशत नगद लाभांश दिने
काठमाडौं । आईसिएफसि फाइनान्स लिमिटेडले ८ प्रतिशत नगद लाभांश दिने भएको छ । संस्थाले गत वर्षको मुनाफाबाट चुक्ता पुँजीको सो मात्राको लाभांश दिने प्रस्ताव राखेको हो । संस्थाको हालै बसेको सञ्चालक समितिको बैठकले उक्त प्रस्ताव राखेको हो । बैठकको प्रस्तावलाई नेपाल राष्ट्र बैंकले स्वीकृति तथा संस्थाको आगामी वार्षिक साधारणसभाले पारित गर्नुपर्ने छ ।
नेटगियर आइसिटी अवार्ड २०१८ सम्पन्न, ७ विधामा ९ जनालाई वर्षको सर्वोत्कृष्टको सम्मान
काठमाडाैं । लिभिङ विथ आइसिटीको आयोजनामा तेस्रो संस्करणको ‘नेटगियर आइसिटी अवार्ड २०१८’ सम्पन्न भएको छ । ‘सूचना प्रविधिमा सम्भावना र उत्कृष्टताको खोजी’ मूल नारासहित शुक्रबार राजधानीमा भएको एक समारोहमा विभिन्न ७ विधामा आइसिटी अवार्ड प्रदान गरिएकाे छ । विभिन्न विधामा सर्वोत्कृष्ट भएका विजयीहरुलाई सञ्चार तथा सूचना प्रविधिमन्त्री गोकुल बास्कोटासहित विशिष्ट अतिथिहरुले सम्मान गरेका थिए । सो अवसरमा बोल्दै मन्त्री बास्कोटाले सरकारले आइसिटी क्षेत्रका लागि आवश्यक नीति र पूर्वाधारको वातावरण तयार पारिरहेको बताए । समाज सरलबाट जटिलतर्फ जाने चर्चा गर्दै उनले मानिसको जीवन सहजताका लागि नयाँ प्रविधिको विकास भइरहेको बताए । ‘नेपालको आइसिटी क्षेत्रमा पनि केही हुँदैछ भन्ने प्रमाण आइसिटी अवार्डले दिएको छ । यो क्षेत्रमा सम्भावनाको खोजी गर्दै नयाँ पुस्तालाई भविष्य छ भनेर चिनाउन र हरेक चुनौतीलाई सबैले मिलेर सामना गर्न आवश्यक छ । ’ कार्यक्रममा सञ्चार तथा सूचना प्रविधि मन्त्रालयका सचिव महेन्द्रमान गुरुङ, प्रधानमन्त्री तथा मन्त्रिपरिषद कार्यालयका सचिव केदारबहादुर अधिकारी, शिक्षा तथा विज्ञान प्रविधि मन्त्रालयका सचिव कृष्णराज बिसी, पूर्वमन्त्री गणेश साह, नेपाल प्रहरी महानिरीक्षक सर्वेन्द्र खनाल र राष्ट्रिय युवा परिषदका उपाध्यक्ष माधव ढुंगेल लगायतले विकासमा आइसिटीको प्रयोग, सम्भावना र अवार्डले प्रदान गरेको उत्साहको विषयमा मन्तव्य राखेका थिए । विभिन्न विधाका विजयीहरुलाई मन्त्री बास्कोटासहित विभिन्न मन्त्रालयका सचिव, नेपालका सरकारका विभिन्न विभागका प्रमुख, आइटी क्षेत्रका उद्योगी एवं व्यवसायी, बैंकिङ तथा इन्सुरेन्स, शिक्षण तथा टेलिकम क्षेत्रका प्रमुखहरु सहित ४ सय ५० बढिको उपस्थिती रहेको थियो । आइसिटी अवार्ड सूचना प्रविधि क्षेत्रका विकास र विस्तारमा उत्कृष्टतको खोजी गर्ने अभियान भएको अवार्ड समितीका अध्यक्ष राजन लम्सालले बताए । प्रविधिको क्षेत्रमा अग्रजलार्इ सम्मान र नयाँलाई प्रोत्साहनको प्लाटफर्म विकास गरिएको लम्सालले कार्यक्रममा जानकारी दिए । कसलाई कुन अवार्ड ? आइसिटी अवार्डमा कुल ७ विधा रहेका थिए । यसअन्तर्गत आइसिटी स्टार्टअप अवार्ड, आइसिटी प्रडक्ट अवार्ड, आइसिटी पायोनियर अवार्ड, आइसिटी आन्ट्रप्रनर अवार्ड, आइसिटी डायस्पोरा अवार्ड, डिजिटल गभर्नेन्स अवार्ड, आइसिटी मिडिया रिकग्निसन अवार्ड रहेका थिए । साथै स्टार्टअप र प्रडक्ट अवार्डमा एक कम्पनीलाई जुरी स्पेशल मेन्सन अवार्ड पनि प्रदान गरिएको थियो । सबै विधामा १ सय २० को अनलाइन आवेदन आएको थियो । १० जनाको जुरी समुहले १ महिनासम्म अध्ययन, अन्तवार्ता, प्रिजेन्टेशन, कार्यालय भ्रमण, अनलाइन भोटिङ लगायतको छनौट प्रकृयाबाट उत्कृष्ट छानिएको जुरी संयोजक हेमपाल श्रेष्ठले जानकारी दिए । नेपाल प्रहरीलाई डिजिटल गभर्नेन्स आइसिटी अवार्ड आइसिटी अवार्ड २०१८ अन्तर्गत नेपाल प्रहरीले डिजिटल गभर्नेन्स अवार्ड प्राप्त गर्न सफल भएको छ । सूचना प्रविधिको उच्चतम प्रयोग गर्ने सरकारी निकायलाई वितरण गरिने यो अवार्डमा नेपाल प्रहरी उत्कृष्ट भएको हो । नेपाल प्रहरीको कार्यालयमा कागजको प्रयोग ८० प्रतिशतले घटिसकेको छ । चाँडै नै पाल पुलिस नामको इन्टिग्रेटेड एप्लिकेशन पनि ल्याउने तयारीमा प्रहरी जुटेको छ । अवार्ड ग्रहण गर्दै प्रहरी महानिरिक्षक सर्वेन्द्र खनालले सरकारको डिजिटलाइजेसनको अभियानसँगै प्रहरी सूचना प्रविधिको अधिकतम प्रयोगतर्फ अघि बढेको बताए । आइसिटी पायोनियर अवार्ड सञ्जीव राजभण्डारीलाई तीन दशकदेखि नेपालको सूचना प्रविधिको विकास र विस्तारमा अनवरत लागिरहेका मर्कन्टाइल कम्युनिकेशनका संस्थापक सञ्जीव राजभण्डारीले आइसिटी पायोनियर अवार्ड प्राप्त गरेका छन् । राजभण्डारीले नेपालमा पहिलोपटक इन्टरनेट सेवा भित्र्याउने, बैंक तथा वित्तीय क्षेत्रका सफ्टवेयर निमार्ण गर्नेदेखि सूचना प्रविधिका महत्वपूर्ण प्रडक्टहरुको बजारीकरण गर्न योगदान दिएका छन् । विभिन्न राष्ट्रिय तथा अन्तर्राष्ट्रिय संघ संस्थामार्फत यो क्षेत्रको उत्थानमा उनी सक्रिय रहँदै आएका छन् । विश्वास ढकाललाई आइसिटी आन्ट्रप्रेनर अवार्ड एफवान सफ्टका अध्यक्ष विश्वास ढकालले आइसिटी आन्ट्रप्रेनर अवार्ड प्राप्त गरे । विद्यार्थी जिवनमा एउटा कोठाबाट सुरु भएको एफ वान सफ्टमार्फत् उनले ४५० भन्दा बढी नेपालीलाई प्रत्यक्ष रोजगारी दिन सफल भएका छन् । हाल एफवान सफ्टअन्तर्गत ई सेवालगायत १५ कम्पनी सञ्चालनमा छन् । पिपुल डेभलपमेन्ट ल्याबलाई आइसिटी स्टार्टअप अवार्ड मल्टिनेश्नल कम्प्युटर नेटवर्किङ कम्पनी नेटगियरले शीर्ष प्रायोजन गरेको यस संस्करणको आइसिटी स्टार्टअप अवार्ड पिपुड डेभलपमेन्ट ल्याब प्रालिले जित्न सफल भएको छ । निर्णायक र अनलाइन भोटिङको आधारमा पहिलो हुन सफल यस कम्पनीले प्रविधिको माध्यमबाट मानिसलाई करियर गाइड गर्ने, कोचिङ प्रदान गर्ने र उनीहरुको लिडरसिप प्रोसेसलाई नयाँ रुपले मूल्याकंन र परिभाषित गर्ने गर्दछ । आइ–सोलुसन्स लाइफलाई आइसिटी प्रडक्ट अवार्ड दर्शन टेकले केही महिनाअघि विकास गरेको इन्सुरेन्स म्यानेजमेन्ट सफ्टवेयर आइ-सोलुसन्स लाइफले आइसिटी प्रडक्ट अवार्ड जित्न सफल भयो । यो प्रडक्ट लाइफ इन्सुरेन्स कम्पनी, पोलिसी मार्केट, एजेन्सी मार्केट, इन्सुरेन्स रेगुलेटर आदिका लागि लक्षित छ । हाल ६ प्रमुख विमा कम्पनीहरुमा समेत यसको प्रयोग गरिएको छ । सारथीलाई जुरी स्पेसल मेन्सन अवार्ड अनलाइनबाट ट्याक्सी सेवा प्रदान गर्दै आइरहेको सारथी प्रालीले जुरी स्पेसल मेन्सन अवार्ड जित्न सफल भएको छ । आइसिटी स्टार्टअप र प्रडक्ट दुवै विधामा उत्कष्ट ५ मा पर्न सफल सारथी उपभोक्तालाई प्रविधिसँग जोडेर सहज तरिकाले ट्याक्सी सेवा उपलब्ध गराउँदै आएको छ । आइसिटी डायस्पोरा अवार्ड हिमाल कर्माचार्यलाई त्यसैगरी अन्तराष्ट्रिय तहमा रही सूचना प्रविधिमा उदाहरणीय काम गरेको भन्दै लिपफ्रग टेक्नोलोजीका कार्यकारी प्रमुख हिमाल कर्माचार्यलाई आइसिटी डायस्पोरा अवार्ड प्रदान गरियो । हाल अमेरिकामा रहेका उनले नेपालको सूचना प्रविधि क्षेत्रमा पनि प्रत्यक्ष योगदान गर्दै आएका छन् । आइसिटी मिडिया रिकग्निसन न्यौपाने र साउदलाई त्यसैगरी आइसिटी मिडिया रिकग्निसन अवार्ड पत्रकारद्धय सन्तोष न्यौपाने र गोपाल साउदलाई प्रदान गरिएको छ । साउद नयाँपत्रिका दैनिकमा कार्यरत छन् भने न्यौपाने नागरिक दैनिकमा कार्यरत छन् । आइसिटीलाई मुख्य विधा बनाएर पत्रकारिता गरेका पत्रकारलाई यो अवार्ड वितरण गरिन्छ ।
बाहिरबाटै मात्रा हेर्न मिल्ने नेपाल ग्याँसको कम्पोजिट सिलिण्डर आजदेखि बजारमा, मूल्य १० हजार ६ सय
काठमाडौं । ग्याँस सिलिण्डर बिस्फोटको खतरालाई अन्त्य गर्न नेपाल ग्याँस उद्योगले कम्पोजिट एलपि ग्याँस सिलिण्डर आजदेखि बजारमा ल्याउने भएको छ । नयाँ ब्राण्ड लाइट सेफ सिलिण्डरलाई नेपाल ग्याँसले बिक्री गर्ने भएको हो । कम्पनीले प्रति सिलिन्डर ग्याँसको मूल्य १० हजार ६ सय रुपैंया तोकेको छ । यो ग्याँस सिलिण्डर सबै परिक्षण गरेर आगलागिका बेलामा पनि बिस्फोटन नहुने गरी प्रमाणित गरिएकाले शतप्रतिशत सुरक्षित रहेको कम्पनीको दाबी छ । सिलिण्डर पारदर्शी भएकाले यसमा ग्याँसको मात्रा कति छ भनेर हेर्न सकिन्छ । यो बिल्कुलै खिया प्रतिरोधात्मक रहेको कम्पनीले जानकारी दिएको छ । कम्पनीका अनुसार विकशित देशमा परीक्षण निकायबाट मजबुत प्रमाणित भएको साथै नापतौल तथा गुणस्तर विभागबाट समेत स्वीकृति तथा प्रमाणीकरण भएको छ । गत बैशाखमा क्लासिक ट्रेड इन्टरनेसनल प्रालिले कार्बन कम्पोजिट फाइबरले बनेको एलपिजी सिलिन्डरलाई लञ्च गरेको थियो ।आधुनिक प्रविधिबाट निर्मित यस कम्पोजिट सिलिन्डर कार्बन कम्पोजिट फाइबरले बनेको एलपिजी सिलिन्डरलाई मल्टी नेशनल कम्पनी टाइम टेक्नोप्लास्टले उत्पादन गरेको हो । परम्परागत सिलिण्डरको तुलनामा बलियो भएकाले यसलाई मेनटेनेन्स गरिरहनु नपर्ने कम्पनीको दाबी छ । यो सिलिण्डरको तौल फलामे सिलिण्डरको तुलनामा आधा भन्दा कम रहेको छ । यसमा भएको ह्याण्डल रिङले यसलाई उचाल्न सजिलो बनाउने कम्पनीले जानकारी दिएको छ । बर्षेनी नेपालमा ग्याँस सिलिण्डर बिस्फोट भएर ज्यान नै गुमाउनुपर्ने, धन सम्पती क्षति हुने अवस्था बढ्दै गएको सन्दर्भमा कम्पोजिट ग्याँस विकल्प हुने कम्पनीको भनाई रहेको छ । फलामको सिलिण्डरमा बिस्फोटको खतरा हुने, सिलिण्डरमा २ केजी लेदो तल जम्ने, अपारदर्शीका साथै ग्याँसको मात्रा देख्न नसकिने हुँदा पुरानो प्रविधिलाई हटाउन खोजिएको छ । फलामको सिलिण्डरमा रहेको ग्याँस शून्य डिग्री सेल्सियसमा जम्नेमा कम्पोजिट सिलिण्डरमा माइनस ४० डिग्रीसम्म ग्याँस नजम्ने कम्पनीले जानकारी दिएको छ । नेपाल आयाल निगमले पनि सबै ग्याँस बोटलिङ कम्पनीलाई अनिवार्य रूपमा ५ प्रतिशत कम्पोजिट सिलिण्डर बेच्नुपर्ने नियम बनाउने तयारी गरिरहेको छ । अहिले नेपालमा ७८ लाख भन्दा बढी फलामे सिलिण्डर छन् । यस्ता छन् कम्पोजिट सिलिण्डरको विशेषताहरु नयाँ कम्पोजिट सिलिण्डरको विशेषता पूर्ण-सुरक्षित र विस्फोटन नहुने रहेको छ । यसलाई आगोले विष्फोट गर्न सक्दैन, त्यसैले उपभोक्ताहरुले आफु पूर्ण सुरक्षित भएको विश्वास गर्न सक्ने कम्पनीको दावी रहेको छ । हरेक कम्पोजिट सिलिण्डरलाई प्रयोगशालामा परीक्षण गरिएको हुन्छ । यो सिलिण्डर पारदर्शी भएकोले उपभोक्ताहरुले सिलिण्डरमा ग्यासको लेभल सजिलै जाच्न सकिने छ । कम्पनीका अनुसार अल्ट्राभ्वाइलेट किरणबाट सुरक्षित र इकोफ्रेण्डली मानिएको कम्पोजिट सिलिण्डर सबै मौसममा उपयुक्त मानिएको छ । यस सिलिण्डर फाइबरले बनेको हुनाले बोक्दा हलुका हुनेछ । यसमा ग्यास चुहावट पत्ता लगाउने, भल्भ निभाउने र सुरक्षित राख्ने प्रविधि जडित छ । हाल बिक्री वितरणका लागि कम्पोजिट सिलिण्डर १४.२ के.जी र ५ के.जीमा उपलब्ध छ । बालाजु औद्योगिक क्षेत्रमा रहेको नेपालग्यास उद्योग पूर्ण स्वचालित छ जसमा अटोमेटिक वोटलिङ्ग प्लान्ट, परीक्षण स्थल छन भने विज्ञ प्राविधिक जनशक्तिले यसको सञ्चालन गरेका छन् । यस उद्योगको प्रत्येक सिफ्टमा १२,००० सिलिण्डर उत्पादन गर्नेे र उपभोक्ताको माग अनुसार १००० मेट्रिक टन सम्मको भण्डार गर्ने क्षमता रहेको छ । हाल यसका २६० भन्दा बढी डिलरहरुले काठमाडौं उपत्यका ग्राहकलाई सेवा पुर्याई रहेका छन् भने उपत्यका बाहिर २०० भन्दा बढी डिलरहरु रहेका छन् । मोबाइल एप सार्वजनिक नेपाल ग्यास उद्योगले आफ्नो मोवाइल एप सार्वजनिक गरेको छ । साथै, कम्पनीले नायिका केकी अधिकारीलाई ब्राण्ड एम्वेसेडर घोषणा गरेको छ । उद्योगका कार्यकारी निर्देशक-गोकुल भण्डारीले संस्थाले पूर्ण गुण्स्तरीय सिलिण्डर उपलब्ध गराउँदै आएकोमा कम्पोजिट सिलिण्डर अझ भरपर्दो हुने बताए । नेपालको मापदण्ड अनुसार स्वीकृत तौल +/–१५० ग्राम रहेतापनि नेपाल ग्यास उद्योगले आफ्नो उत्पादनमा +/–२० ग्रामको मापदण्ड तय गरिएको छ । साथै, मेरो किरानालाई नेपाल ग्यास कम्पोजिट सिलिण्डरको काठमाडौं उपत्यका भित्र अनलाइन डेलिभरी पार्टनरको रुपमा पनि घोषणा गरिएको कम्पनीले जनाएको छ ।
एनआईसी एशिया बैंकका ग्राहकलाई नर्भिक इन्टरनेसनल हस्पिटलमा १० प्रतिशत छुट
काठमाडौं । एनआईसी एशिया बैंक लिमिटेडका ग्राहकले थापाथलीको नर्भिक इन्टरनेसनल हस्पिटल एण्ड मेडिकल कलेजमा उपचार गराउँदा १० प्रतिशत छुट पाउने भएका छन् । हालै दुई संस्थाबीच भएको सम्झौता पश्चात बैंकका ग्राहकले नर्भिक हस्पिटलमा सो मात्राको छुट पाउने भएका हुन् । उक्त सम्झौतापत्रमा बैंकको तर्फबाट बैंकका चिफ मार्केटिङ्ग अफिसर जयेन्द्र रावल र हस्पिटलको तर्फबाट नर्भिक इन्टरनेसनल हस्पिटलका कार्यकारी निर्देशक राजेन्द्रबहादुर सिंहले हस्ताक्षर गरेका छन् । सम्झौता पश्चात बैंकका कर्मचारी, कर्मचारीका परिवार, बैंकको डेबिट तथा क्रेडिट कार्डवाहक तथा बैंकका सम्पुर्ण ग्राहकहरुलाई नर्भिक इन्टरनेसनल हस्पिटलमा उपचार गराउँदा हस्पिटलको विभिन्न सेवा सुविधाहरुमा १० प्रतिशतसम्मको छुट पाउने भएका छन् ।
लुम्बिनी बौद्ध विश्वविद्यालयमा उपकुलपतिको लापरबाही
काठमाडौं । लुम्बिनी बौद्ध विश्वविद्यालयका उपकूलपति प्रा. नरेशमान बज्राचार्यको ज्यादती र मनोमानीतन्त्रले विश्व विद्यालय अस्तव्यस्त बन्दै गएको आरोप लागेको छ । लुम्बिनी, रुपन्देहीमा केन्द्रिय कार्यालय रहेको र पठनपाठन पनि नियमित रुपमा केन्द्रमै भैरहेको विश्वविद्यालयको प्रमुख व्यक्ति नरेशमान बज्राचार्य भने अधिकांश समय राजधानीमै बस्ने गरेका छन् । प्रधानमन्त्रीकोे कार्यालयले नै पत्र पठाई हरेक विश्वविद्यालयका पदाधिकारीहरु सम्बन्धित ठाँउमा बस्नुपर्ने निर्देशन दिएको थियो । तर उनी भने विभिन्न बहाना बनाई एक वर्षमा करिब १ महिना मात्र विश्वविद्यालयमा हाजिर हुने र बाँकी समय राजधानी तथा विदेश भ्रमणमा बिताउने गरेका छन् । लुम्बिनीमा घरभाडा वापत मासिक २२ हजार रुपैंयाँ बुझ्ने उनी गुम्बामा बस्ने गरेका छन् । त्यस्तै विदेश भ्रमणमा जाँदा नियम बिपरित प्रतिदिन दुई सय डलर लिने गरेको पनि स्रोतले बताएको छ । स्मरण रहोस् विश्व विद्यालय अनुदान आयोगका अध्यक्षले विदेश भ्रमण गरे वापत प्रतिदिन २५ डलर मात्र पाउँछन् तर त्यही आयोगले अनुदान दिएर चलेको विश्वविद्यालयले भने आफैं नियम बनाएर स्वयं उपकूलपतिले नै मनोमानी ढंगले खर्च गर्ने गरेका छन् । लुम्बिनी विश्व विद्यालयको क्षेत्र विस्तार एवं विकासका लागि ५ नं. प्रदेशका सबै राजनितिक दलहरुको प्रयासबाट देवहमा १०० विघा सरकारी जग्गा प्राप्त हुँदैछ । उनलाई महिला कर्मचारीमाथि हातपात गरेको आरोप पनि विगतमा लागेको थियो । सरकारले लुम्बिनी बौद्ध विश्वविद्यालयको ललितपुर स्थित सम्पर्क कार्यालय केही महिना अघि नै हटाउने निर्णय गरेको थियो । तर उपकुलपति भने अझै पनि बिभिन्न बहानामा राजधानीमै बसिरहेको विश्वविद्यालयको उच्च श्रोतले बतायो । एक बर्षमा उनको ३० देखि ४० दिनमात्रै हाजिरी कायम रहेको श्रोतले बतायो । उनीका विरुद्ध विविश्वविद्यालयका अन्य पदाधिकारी र कर्मचारीहरुले मोर्चा बन्दी गरेका छन् । बज्राचार्यले सरकारको अनुमति बिनै १६ पटकसम्म बिभिन्न देशको भ्रमण गरेको पनि श्रोतले बतायो । दोश्रो कार्यकाल पुनः उपकूलपति बन्ने दौडमा लागेका बज्राचार्यलाई रोक्न उनका चार बर्षे क्रियाकलापहरुको फेहरिस्ता कुलपति अर्थात प्रधानमन्त्रीलाई बुझाउने तयारी अन्य पदाधिकारी तथा कर्मचारीले गरिरहेका छन् ।
