सामुदायिक विद्युत उपभोक्ता र पुल्चोक ईन्जिनियरिङ क्याम्पसबीच प्राविधिक क्षमता विकास गर्ने सम्झौता
काठमाडौं । सामुदायिक विद्युत उपभोक्ता राष्ट्रिय महाँसंघ, नेपाल र पुल्चोक ईन्जिनियरिङ क्याम्पसबीच सामुदायिक विद्युत उपभोक्ता संस्थाहरुको प्राविधिक क्षमता विकासको गर्ने सम्झौता भएको छ । उक्त सम्झौतामा सामुदायिक विद्युत उपभोक्ता राष्ट्रिय महाँसंघ, नेपालको तर्फबाट अध्यक्ष नारायण ज्ञवाली र पुल्चोक ईन्जिनियरिङ्ग क्याम्पसको तर्फबाट प्रा.डा. गोकर्ण बहादुर मोत्राले हस्ताक्षर गरेका छन् । सम्झौता पश्चात कलेजले स्नातक अध्ययन पुरा गरेका विद्यार्थीहरुलाई सामुदायिक विद्युत उपभोक्ता राष्ट्रिय महाँसंघसंग समन्वय गराउँने भएको छ । साथै, सामुदायिक विद्युत उपभोक्ता राष्ट्रिय महाँसंघले विद्यार्थीहरुलाई सामुदायिक विद्युत उपभोक्ता संस्थाको क्षमता विकासमा लगाउने विषयमा सम्झौता भएको छ । यसले सामुदायिक विद्युतीकरण कार्यक्रमवाट विद्युतीकरण भएको क्षेत्रमा प्राविधिक क्षमता विकास भई ग्रामीण क्षेत्रका जनतामा दिगो, गुणस्तरीय तथा सुरक्षित विद्युत पुग्ने कम्पनीको विश्वास छ । त्यस्तै, सामुदायिक ग्रामीण विद्युतीकरणका सवालमा महासंघ र क्याम्पसको सहकार्यमा अनुसन्धान कार्य गर्ने एवं कतिपय प्राविधिक सवालमा क्याम्पसले महासंघलाई सहयोग र सहजीकरण समेत गर्नेछ । साथै, अध्ययनको नाममा भईरहेको वौद्धिक पलायनलाई केही हदसम्म रोक्न समेत यसले मदत पुर्याउँने कम्पनीको अपेक्षा रहेको छ । हाल देशभरका ५२ जिल्लामा २८२ सामुदायिक संस्थामार्फत ५ लाख घर परिवारमा विद्युतको विस्तार भएको छ । नेपाल सरकारले जनसहभागितामा सामुदायिक विद्युतीकरण कार्यक्रम शुरु गरेपछि विभिन्न जिल्लामा विद्युतको विस्तार भएको हो । नेपाल सरकारको आगामी तीन वर्षभित्र आधारभुत रुपमा सवै नेपालीको घरमा विद्युतको पहुँच पुर्याउने र पाँच वर्षभित्रमा चाहेजति विद्युत उपलव्ध गराउने भन्ने नीति एंव कार्यक्रम रहेको छ । यसरी सरकारको घोषित कार्यक्रममा सामुदायिक संस्थाहरु, स्थानीय सरकार, प्रदेश सरकार र संघीय सरकारको संयुक्त प्रयासवाटमात्र सवै नेपालीको घरमाविद्युतको पहुँच पुर्याउँन संभव हुन्छ । देशमा क्रियाशील सामुदायिक संस्थाहरुको छाता संस्थाको रुपमा सामुदायिक विद्युत उपभोक्ता राष्ट्रिय महाँसंघ, नेपाल स्थापित भई क्रियाशील रहेको छ । सामुदायिक विद्युतीकरण शुरु भएको १४ वर्षको अवधिमा सहभागिता वापत नगद १ अर्ब ३० करोड रुपैयाँभन्दा बढी रकम विद्युत प्राधिकरणमा जम्मा भईसकेको संस्थाले जनाएको छ ।
प्रधानमन्त्री केपी ओलीलाई ५ हजार जरिवाना !
काठमाडौं । राष्ट्रिय जनता पार्टी (राजपा) नेपालका बरिष्ठ उपाध्यक्ष एवम् राष्ट्रिय सभाका संसदीय दलका नेता वृषेशचन्द्र लालले प्रधानमन्त्री केपी शर्मा ओलीलाई ५ हजार जरिवाना गर्नुपर्ने माग गरेका छन् । संबिधान विपरिद प्रदेश सभामा प्रवेश गरेकाले ओलीलाई ५ हजार जरिवाना गर्नुपर्ने माग उनले राखेका हुन् । नेता लालले प्रदेश सभा सदस्यबाहेक अरु व्यक्ति प्रदेश सभामा अनधिकृत रुपमा छिरे ५ हजारसम्म जरिवाना गर्ने व्यवस्था संविधानमै भएकोले ओलीलाई संविधानको धारा १८४ बमोजिम उक्त जरिवाना गर्नुपर्ने माग गरेका हुन । यद्धपी उनले प्रधानमन्त्रीले सम्बोधन गर्न पाउनुहुँदैन भन्ने आफूहरुको कुनै मान्यता नरहेको पनि स्पष्ट पारे । उनले थपे,‘देशको प्रधानमन्त्रीले सम्बोधन गर्न पाउनुपर्छ । तर, यसको लागि संविधानमै व्यवस्था गर्नुपर्छ । नियमावालीमा आवश्यक व्यवस्था गर्नुपर्छ । अनधिकृत रुपमा प्रदेश सभामा यसका सदस्यबाहेक अरुले छिर्न र बोल्न पाउँदैन् ।’ उनले अघि थपे-‘प्रधानमन्त्री केपी शर्मा ओलीले प्रदेश नम्बर २ को प्रदेश सभामा अनधिकृत रुपमा प्रवेश गरेर सम्बोधन गर्नुभयो । जुन कुरा संविधान, कानून र नियामावलीमा व्यवस्था गरिएको छैन । प्रधानमन्त्रीले बोल्न पाउनुपर्छ । प्रदेश सभामा बोल्नै पाउनुहुन्न भन्ने मेरो कुरा होईन । उहाँले हिजो प्रदेश नम्बर २ मा राजा÷महाराजाको अनुभुति दिनेगरि सम्बोधन गर्नुभयो । यो संविधान विपरित छ ।’
विद्युतबाट चल्ने बस भित्र्याउन इको प्यानल र मयुरबीच प्रतिस्पर्धा, ३ महिनामै सञ्चालनमा आउने
काठमाडौं । नेपालमा पहिलोपटक ब्याट्रीबाट चल्ने बस भित्र्याउन दुई कम्पनीले तयारी थालेका छन् । प्रदुषण कम गर्ने विद्युतिय बस सञ्चालनका लागि गोर्खा इको प्यानल र मयुर यातायातले आआफ्नै तयारी थालेका छन् । इलेक्ट्रोनिक बस खरिद गर्नका लागि सरकारले करमा विशेष छुट दिएपछि कम्पनीहरुले बस भित्र्याउन तिब्र तयारी थालेका हुन । डिजेलबाट चल्ने बस भन्दा ब्याट्रिबाट चल्ने बस केहि महगों हुने गोर्खा इको प्यानलका प्रमुख कार्यकारी अधिकृत कृष्णभक्त दुवालले बताए । “हामीले अहिले नमूना परिक्षणका लागि २ वटा बस ल्याउने तयारी गरेका छौं, यसका लागि चीनियाँ कम्पनी सियानज्याङ जिउहाउ अटोमोबाइलसँग सम्झौता भैसकेको छ, दुवालले भने अबको ३ महिना १५ दिनमा बस सञ्चालनमा ल्याउछौं ।” उनले इलेक्ट्रोनिक बसलाई मानिसहरुले विस्वास नगरेको र आफ्नो कम्पनीले सो भ्रमलाई चिर्ने बताए । यो बसको ब्याट्री ३ घण्टामा फुल चार्ज हुनेछ । फुल चार्ज एक पटक फुल चार्ज भएको ब्याट्रीबाट ५० किलोमिटरसम्म गुडाउन सकिनेछ । दुवालका अनुसार बसका लागि ४ करोड रूपैयाँ खर्च लाग्नेछ । प्यानलले बस रिङरोडभित्रै सञ्चालन गर्ने तयारी गरेको छ । एउटा बसको लम्बाई ५ मिटर र अर्को बसको बसको लम्बाई १० मिटर भन्दा बढी हुने हुनेछ । बसको लम्बाई लामो हुने भएकोले कुन रुटमा बस सञ्चालन गर्ने भन्ने विषयमा छलफल भैरहेको छ । प्यानलले ल्याउने १० मिटरको बसमा एसी, वाइफाई, बाहिरको धुलो सजिलै भित्र नपस्ने लगायतको व्यवस्था गरिनेछ । उपत्यकामा यो बस सफल भए यसको संख्या बढाउने प्यानलको तयारी छ । यस बसमा प्रयोग गरिएको ब्याट्री ५ वर्षसम्म टिकाउ हुने जिउहाउ कम्पनीले दाबी गरेको छ । ब्यट्रीमा प्रयोग गरिएको लिथियम आइरन फोस्फेटले ब्याट्री चार्ज छिटो हुनेछ । इको प्यानलले ल्याउने बस सीएनएसी ब्राण्डको हो । यो बस चीनको विभिन्न शहरहरुमा सञ्चालन भैरहेको छ भने मलेसिया थाइल्याण्डमा समेत सञ्चालन भैरहेको छ । नेपालका लागि यो बसको आधिकारी बिक्रेता इको प्यानल हुनेछ । मयुर यातायातमा १ अर्ब लगानी, १ वर्षभित्र ४० वटा इलेक्ट्रिक बस भित्र्याउने सिन्डिकेट अन्त्य भएपछि उदाएको मयुर यातायातले आफ्नो सेवालाई देशभर विस्तार गर्ने तयारी गरेको छ । यातायातका कार्यकारी प्रमुख मोहन श्रेष्ठका अनुसार दशैअघि १०० वटा बस पुर्याउने लक्ष्य राखेको छ । कम्पनीले यो वर्षभित्र ४० वटा इलेक्ट्रिक बस ल्याउनेछ । कम्पनीले दशैअघि उपत्यका बाहिर समेत सेवा सुचारु गर्नेछ । हालसम्म सो कम्पनीमा लगानी १ अर्ब रूपैयाँ नागिसकेको छ । कम्पनीले पब्लिकमा सेयर जारी गरेर थप सेवा विस्तार गर्ने तयारी गरेको छ । श्रेष्ठले भने-” कम्पनीमा गैरआवासीय नेपालीहरुले समेत लगानी गरेका छन्, अब नेपालीहरुलाई पनि सेयर बेचेर नेपालको सबैभन्दा ठूलो यातायात कम्पनी बन्छौं, यसको मोडालिटीको लागि थप छलफल गरिरहेका छौं ।” नेपालमा विद्युत उत्पादनको क्षमता बढेसँगै विद्युतिय कार, मोटरसाइकल स्कुटरको प्रयोग बढ्दै गैरहेको छ ।
आइएमई लाइफ इन्स्योरेन्स दोस्रो वर्षमा प्रवेश, साढे ५३ करोड बीमा शुल्क संकलन गर्न सफल
काठमाडौं । आइएमई लाइफ इन्स्योरेन्स कम्पनी स्थापनाको एक वर्ष पुरा गरी दोस्रो वर्षमा प्रवेश गरेको छ । उक्त अवसरमा कम्पनीले एक कार्यक्रमको आयोजना गरि प्रथम वार्षिकोत्सब मनाएको छ । उक्त कार्यक्रममा कम्पनीका सञ्चालक समितिका अध्यक्ष डा. रामहरि अर्यालले बीमा बजारमा कम्पनीले प्रतिस्पर्धात्मक उपस्थिति जनाएको बताएका छन् । चालु आ.व.२०७५/७६ मा समेत उल्लेख्य शाखा विस्तार गर्नेे र जीबन बीमा व्यवसायमा महत्वपूर्ण भुमिका खेल्ने अभिकर्ताको लागि आर्कषक एवं उत्प्रेरक विविध प्रोत्साहन योजनाहरु कार्यन्वयन गरिने उनले जानकारी दिए । त्यसैगरि कम्पनीले आगामी दिनमा सबैको लागि पहुँच हुने, लाभदायक तथा नवतिम् थप बीमा योजनाहरु ल्याइने जनाएको छ । कम्पनीले नियमनकारी निकाय बीमा समितिको निर्देशानुसार धितोपत्र ऐन बमोजिम निर्देशित तथा अन्य आवश्यक प्रक्रियाहरु पुरा गरि सर्वसाधारणका लागि सेयर जारी गरिने समेत बताएको छ । ब्यवसाय सुचारु भएको प्रथम वर्षमा नै कम्पनीले विभिन्न ५० स्थानमा शाखा कार्यालयहरु स्थापना गरि बीमा सेवा पुर्याउदै आएको छ । कम्पनीले यस आर्थिक बर्ष २०७५/७६ मा समेत ४५ शाखाहरु बिस्तार गरि बीमाको पहुँच तथा सेवामा गुणात्मक देन दिने योजना बनाएको छ । कम्पनीले आर्थिक बर्ष २०७४/७५ मा ५३ करोड ५० लाख रुपैयाँ बीमा शुल्क संकलन गर्न सफल भएको थियो ।
प्रधानसेनापतिमा पुर्णचन्द्र थापा
काठमाडौ । सरकारले नेपाली सेनाको प्रधानसेनापतिमा पूर्णचन्द्र थापालाई नियुक्त गर्ने निर्णय गरेको छ । सिंहदरबारमा आज बसेको मन्त्रिपरिषद्को बैठकले थापालाई प्रधानसेनापति बनाउने निर्णय गरेको सञ्चार तथा सूचना प्रविधिमन्त्री गोकुलप्रसाद बाँस्कोटाले जानकारी दिए। रासस
कुमारी बैंकका ग्राहकलाई नेपाल क्यान्सर अस्पतालमा १० प्रतिशत छुट
काठमाडौं । कुमारी बैंक लिमिटेडका ग्राहकले नेपाल क्यान्सर अस्पताल तथा रिसर्च सेन्टर(राजीव गान्धी क्यान्सर संस्थान तथा रिसर्च सेन्टरसँग आबद्ध)मा उपचार गराउँदा १० प्रतिशत छुट पाउने भएका छन् । दुई संस्थाबीच हालै भएको सम्झौतामा बैंकका ग्राहकले सातदोबाटाको उक्त अस्पतालमा उपचार गराउँदा विभिन्न औषधोपचार सेवामा सो मात्राको छुट पाउने भएका हुन् । उक्त सम्झौतापत्रमा कुमारी बैंकका तर्फबाट बैंकका नायब प्रमुख कार्यकारी अधिकृत राजीब गिरी र अस्पतालका तर्फबाट कार्यकारी अध्यक्ष डा.सुदीप श्रेष्ठले हस्ताक्षर गरेका छन् । यसअघि कुमारी बैंकले देशविदेशका विभिन्न अस्पतालहरुबाट उपचार गराउँदा आफ्ना समस्त ग्राहकलाई कुमारी डेबिट/क्रेडिट कार्डको प्रयोग गर्दा विशेष छुटको सुविधा दिँदै आइरहेको छ ।
ज्योति विकास बैंक र देवः विकास बैंकबीच रेमिट सम्झौता
काठमाडौं । ज्योति विकास बैंक र देवः विकास बैंकबीच रेमिटेन्स सम्झौता भएको छ । आइतबार(आज) सम्पन्न उक्त सम्झौतामा ज्योति विकास बैंकको तर्फबाट प्रमुख कार्यकारी अधिकृत गोविन्दप्रसाद ढकाल र देवःविकास बैंकको तर्फबाट प्रमुख कार्यकारी अधिकृत विजयबहादुर श्रेष्ठले हस्ताक्षर गरेका छन् । यस सम्झौता पछि ज्योति विकास बैंकले हालै संचालनमा ल्याएको ज्योति रेमिट सेवा देवस् विकास बैंकका सम्पूर्ण शाखा कार्यालयहरुबाट रेमिटेन्स सेवा प्राप्त गर्न सकिने कम्पनीका प्रमुख कार्यकारी अधिकृत ज्ञवालीले बताएका छन् । हाल ज्योति विकास बैंकको कुल ६० वटा र देवः विकास बैंकको ५१ वटा शाखा कार्यालयहरु सञ्चालनमा रहेका छन् ।
एनसीसी बैंक र सन नेपाल लाईफ इन्स्योरेन्सबीच बैंकास्योरेन्स सम्झौता
काठमाडौं । नेपाल क्रेडिट एण्ड कमर्स बैंक(एनसीसी) लिमिटेड र सन नेपाल लाईफ इन्स्योरेन्सबीच बैंकास्योरेन्स सम्झौता भएको छ । सम्झौता अनुसार एनसीसी बैंकले आफ्नो जुनसुकै शाखाबाट लाइफ इन्स्योरेन्स पोलिसी बिक्री गर्ने छ । उक्त सम्झौतामा एनसीसी बैंकका तर्फबाट प्रमुख कार्यकारी अधिकृत रमेशराज अर्याल र सन नेपाल लाईफ इन्स्योरेन्सका तर्फबाट प्रमुख कार्यकारी अधिकृत राजकुमार अर्याललले संयुक्त रुपमा हस्ताक्षर गरेका छन् ।
