तपाईँको पैसा बजारमा चलेन, यसो गर्नुहोस्
काठमाडौं । तपाईँसँग भएको नोट बजारमा कसैले दिन नमाने नेपाल राष्ट्र बैंकले साटिदिने भएको छ । नेपाल राष्ट्र बैंकले सूचना नै जारी गरी बैंकले जारी गरेका नोटहरुमा छपाई समस्या भएका नोटहरुमा कुनै किसिमको त्रुटी पाइएमा नेपाल राष्ट्र बैंक नोट सट्टा भर्ना नियमावली २०५९ बमोजिम चलनचल्तीमा अयोग्य नोटहरु शोधभर्ना गरिदिने भएको हो । बैंकले नाटको संरक्षणका लागि गम्भीर बन्न र आवश्यकभन्दा बढी रकम बैंकमा जम्मा गर्न अनुरोध समेत गरेको छ । नेपाल राष्ट्र बैंक नोट सट्टा भर्ना नियमावली २०५९ अनुसार कुनै पनि व्यक्तिले छपाई बिग्रिएको, च्यातिएको, डढेको नोटको ५० प्रतिशत भन्दा बढी भाग पूरा नम्बर सहित पेश गरेमा उक्त नोटको मूल्य बराबरको शोधभर्ना गरिदिने व्यवस्था छ । तर शोधभर्ना हुन नसकेको अवस्थामा पनि सो नोट फिर्ता भने गरिने छैन ।
नेपाली बजारमा डस्नाभन्दा क्लासिक म्याट्रेस सस्तो छ : रमेश काफ्ले
क्लासिक म्याट्रेसका प्रमुख कार्यकारी अधिकृत रमेश काफ्ले बहुआयामिक व्यक्ति हुनुहुन्छ । राजनीति, वकालत, लेखन, कम्पनी व्यवस्थापन, उत्पादन, व्यापार प्रवद्र्धन सबै काम उहाँको लागि नयाँ छैन । कानुनमा स्नातक तह पास गर्नु भएका काफ्ले कर्पोरेट सेक्टरमा वकालत थाल्नुभयो । यहि क्रममा गोर्खा व्रअरी, एनएस, केडिया, चौधरी ग्रुप तथा अन्य कर्पोरेट कम्पनीमा आवद्ध भइ काम काम गर्नुभयो । हाल उहाँ क्लासिक म्याट्रेसको प्रमुख कार्यकारी अधिकृत हुनुहुन्छ । प्रस्तुत छ नेपालमा म्याट्रेसको बजार र क्लासिक म्याट्रेसको बारेमा काफ्लेसँग विकासन्यूजका लागि राजाराम न्यौपानेले गरेको कुराकानी ः क्लासिक म्याट्रेसको कारखाना पहिले काठमाडौँमा थियो पछि सिमरामा सारियो, किन ? पहिले हाम्रो कारखाना काठमाडौँको बाँसबारीमा थियो । विगत ३ वर्षदेखि हामीले काठमाडौँको ठाउँ सानो भएको महशुस गरेर सिमारामा कारखाना सारेका हौँ । पहिले कारखाना भएको ठाँउमा हामीले अहिले गोदाम राखेका छौँ । हामीलाई काठमाडौँमा भन्दा सिमारामा कारखाना सञ्चालन गर्न सहज भएको छ । हामीले कारखाना सिमारा सारेपछि कारखानालाई विस्तार पनि सजिलो भएको छ । क्लासिक म्याट्रेसको विशेषता के हो ? हामीले गुणस्तरीय म्याट्रेस उत्पादन गरिरहेका छौँ । नेपाली स्प्रिङ्ग म्याट्रेसका लागि हामी पायोनियर हौँ । हामीले हाम्रा सबै ग्राहकहरुलाई २ वर्षदेखि १० वर्षसम्मको ग्यारेन्टी दिएर बिक्री गरिरहेका छौँ । ६ हजार देखि ७० हजारसम्मको म्याट्रेस ग्राहकले प्रयोग गर्न पाएका छन् । अत्याधुनिक प्रविधिको प्रयोग गरेर म्याट्रेस उत्पादन गरेका छौ । पुर्ण रुपमा हाम्रो उत्पादन स्वास्थ्यकर पनि छ । हामीले स्थापना गरेको क्वायर प्लान्ट दक्षिण एशियाकामै पहिलो प्लान्ट हो । पोलिस्टर फाइबर र कोकोनंट फाइबर मिक्स गरेर हिटिङ सिस्टमबाट म्याट्रेस तयार गछौँ । यसरी म्याट्रेस तयार गर्दा कुनै पनि प्रकारको केमिकल प्रयोग भएको हुँदैन । त्यसैले यो म्याट्रेस सबैका लागि विशेष बन्दै गहिरहेको छ । हामीले बनाएको म्याट्रेस नेचुरल पनि छ । विदेशी म्याट्रेसमा केमिकलको प्रयोग गरिएको हुन्छ त ? विदेशबाट आउने क्वायर म्याट्रेसहरुमा पोलिस्ट्रार फाइबर र कोकोनंट फाइबर एक आपसमा जोड्नका लागि रबर र अरु केमिकल पनि प्रयोग गरिएको हुन्छ । त्यसरी तयार पारिएको म्याट्रेस राम्रो स्वास्थ्यका लागि राम्रो हुँदैन । विदेशी म्याट्रेसको प्रयोगले स्वास्थ्यका लागि कस्तो असर गर्छ ? बजारमा केही उद्योगहरुले पि–फर्म को प्रयोग गरेर उत्पादन गरेको पनि पाइएको छ । पिफम भनेको प्याकिङ्ग म्याटेरियल हो । सामानहरु प्याकिङ्गको लागि प्रयोग गरिने म्याटेरियल हो । त्यस्तो खालको पि–फर्र्म म्याट्रेसका लागि कदापि प्रयोग गर्नु हुँदैन । सामानहरु प्याकिङ्गको लागि प्रयोग गरिने मेट्रियलहरु प्रयोग गरेका म्याट्रेसहरु पनि बजारमा आएका छन् । ति म्याट्रेसहरुले स्वास्थ्यमा राम्रो गर्दैन र पि–फर्म बेडको लागि प्रयोग गर्न बनाइएको हैन । क्लासिक म्याट्रेसको बजार हिस्सा कस्तो छ ? नेपालमा हाम्रो क्लासिक म्याट्रेस एक नम्बरमा नै हो । उत्पादन र बजार हिस्साको हिसाबले हामीले बजार लिइरहेका छौँ । प्रत्येक वर्ष बजारमा माग बढेर ३०\४० प्रतिशत उत्पादन वृद्धि गर्ने गरेका छौँ । क्लासिक कुन कुन प्रकारको म्याट्रेस उत्पादन गरेर बजारमा ल्याएको छ ? क्लासिकले क्वायर र स्प्रिङ्ग म्याट्रेसले उत्पादन गरी बजारमा विक्री वितरण गरिरहेको छ । स्प्रिङ्ग म्याट्रेस अलि आरामदायी हुन्छ । हामीले सबै वर्गले प्रयोग गर्न सक्ने म्याट्रेस पनि उत्पादन गरिरहेका छौँ । ग्राहकको माग अनुसार पनि हामीले गुणस्तरीय म्याट्रेस बनाउने गरेका छौँ । क्लासिक म्याट्रेसको लक्षित वर्र्ग को हो ? हामीले सामान्य परिवारका डस्ना प्रयोग गर्नेदेखि स्टार होटलहरुलाई मध्यनजर गरेर म्याट्रेस उत्पादन गरिरहेका छौँ । हाम्रो म्याट्रेस डस्नाभन्दा पनि सस्तो छ । डस्ना १\२ वर्षमा नै बिग्रिएर जान्छ त्यसलाई फेरि बनाउने खर्चलाई हेर्ने हो भने हाम्रो म्याट्रेस सस्तो पर्न जान्छ । मानिसहरुको बुझाईमा पनि परिवर्तन हँुदै गहिरहेको छ । सस्तो र धेरै टिकाउ हुने भएपछि उपभोक्ताको म्याट्रेसप्रति रुचि बढ्दै गहिरहेको छ । बाहिर बसेर आएका ग्राहकले अलि आरामदायी नै प्रयोग गरिरहेका छन् । विभिन्न स्टार होटलहरुले पनि क्लासिकका म्याट्रेसहरु प्रयोग गरिरहेका छन् । नेपालमा बनेको र विदेशबाट ल्याएको म्याट्रेसमा के फरक हुन्छ ? विदेशबाट नेपालमा ल्याएका म्याट्रेसभन्दा नेपालमा नै उत्पादन गरेको म्याट्रेस राम्रो र गुणस्तरीय हुन्छ । नेपालमा उत्पादन गरेको म्याट्रेस ल्याबबाट पास भएको हुन्छ, तर विदेशबाट आएको म्याट्रेस कस्तो छ भनेर कुनै पनि निकायले टेस्ट्र गरेको पाइँदैन । विदेशबाट आयातित म्याट्रेसको कुनै ग्यारन्टी हुँदैन । तर नेपालमा बनेको म्याट्रेसहरुमा ग्यारेन्टी पनि हुन्छ । विदेशबाट आएका म्याट्रेसभन्दा नेपालमा नै बनेको म्याट्रेसको उत्पादन लागत २५ प्रतिशत कम छ । त्यसैको कारणले पनि नेपाली म्याट्रेस सस्तो र गुणस्तरीय छ । विदेशी म्याट्रेसको ग्यारेटी हुँदैन । विदेशी म्याट्रेस कुन मापदण्ड अनुसार बनेको छ, भनेर मापन गर्ने हाम्रो भन्सारहरुमा कुनैपनि यन्त्र छैन । स्वदेशमा नै अन्र्तराष्ट्रिय स्तरको म्याट्रेस निर्माण भएपछि विदेशी म्याट्रेसलाई रोक्ने हो भने देशको व्यापार घाटामा पनि कमी आउँछ । कुन वर्गले म्याट्रेस बढी प्रयोग गरिरहेका छन् ? डस्ना प्रयोग गर्ने वर्गहरुले लागत हिसाब गरेर डस्नाभन्दा म्याट्रेस नै सस्तो छ भनेर प्रयोग गरिरहेका छन् । प्रयोगकर्ताहरु सचेत भएका छन् । डस्नाजस्तो एकै ठाउँमा पोको पर्ने समस्या म्याट्रेसमा नहुने भएकाले पनि समान्य वर्गमा मानिसहरु पनि आकर्षित भईरहेका छन् । पुराना कपडा प्रयोग गरेर डस्ना बनाइ प्रयोग गर्दा स्वास्थ्यमा असर गर्छ भनेर पनि म्याटे«स निम्नदेखि उच्च वर्गले प्रयोग गरिरहेका छन् । तपाईले भन्नुभयो कि पुराना कपडाबाट बनाएको डस्ना प्रयोग गर्नु हुँदैन, किन ? प्रयोग गरेर काम नलाग्ने भएपछि डस्नामा कपडा प्रयोग गर्नु स्वास्थ्यको हिसाबले पनि राम्रो हुँदैन । अस्पतालमा प्रयोग गरेका कपडालाई शुद्धीकरण नगरी पेलेर त्यसको डस्ना बनाउँदा स्वास्थ्यमा कस्तो हुन्छ भनेर प्रयोगकर्ताले पनि बुझिसकेका छन् । क्लासिक म्याट्रेसको माग प्रतिवर्ष कति प्रतिशतले बढ्ने गरेको छ ? नेपालीहरुले क्लासिक म्याट्रेस प्रयोगमा वृद्धि गरेका छन् । हामीले अघिल्लो वर्षभन्दा यो वर्ष ४० प्रतिशतले उत्पादन वृद्धि गरेका छौँ । हाम्रो उत्पादनको बजारमा माग प्रत्येक वर्ष ३०/४० ले बढ्ने गरेको छ । ग्राहकहरुले पनि लागतको हिसाब गरेर डस्नाभन्दा क्लासिक म्याट्रेस नै सस्तो भनेर प्रयोग गरिरहेका छन् । स्थानीय उद्योगहरुलाई प्रोत्साहन गर्ने सरकारको नीति कस्तो छ ? नेपाल सरकारले स्थानीय उद्योगहरुलाई प्रोत्साहन गर्ने नीति नै छैन । सरकारले नेपाली उद्योगहरुलाई प्रोत्साहन गर्ने नीति बनाउनु अति जरुरी छ । देश विश्व व्यापार संगठनको सदस्य भएको छ, भनेर मात्रै हुँदैन । देशमा उत्पादन हुने वस्तुहरुको सरकारले प्रोत्साहन गर्नुपर्छ । विदेशबाट बनेर आएका म्याट्रेसहरुको भन्सार सही मूल्याङ्कन हुनुपर्यो । अहिले जुन दर कायम भएर म्याट्रेसहरु नेपाल भित्रिएका छन् । ति म्याट्रेसहरु त्यो दर रेट बन्छ कि बन्दैन भनेर पनि सरकारले हेर्नुपर्छ । नेपाल सरकारले नै विदेशी ट्रयाग लागेर आएका सामानहरु सबै राम्रो हुन्छ भनेर बुझिहरेको छ । तर विदेशबाट आएका सामानहरु सबै राम्रो हुन्छ भने पनि हुँदैन । नेपाली म्याट्रेस र विदेशी म्याट्रेसमा कुन राम्रो हो भनेर ग्राहकले पनि राम्रोसँग बुझिसकेका छैनन् । यस्तो अवस्थामा सरकारले भने बुझेको छैन । नेपाली उद्योगीहरुले उद्योगको समस्या सरकालाई पनि सुनाएको छ ? हामीले भन्सार विभागका डिजीलाई नै लिखित रुपमा नेपाली उद्योगहरुमा यो यो समस्या छ, यसरी समाधान गर्न सकिन्छ भनेर छलफल गरेका थियौँ । हामीले अर्थ सचिव र मन्त्रीहरुसँग पनि छलफल गरेका थियौँ । उहाँहरुले नेपाली उद्योगहरुलाई प्रोत्साहन गछौँ भनेका थिए । तर पछि त्यसको कुनै कार्यान्वयन भएन । नेपाली गलँैचाहरु जसरी म्याट्रेस विदेश पठाउन सकिन्छ ? म्याट्रेसको नेपाली मागलाई नै अहिले राम्रोसँग पुरा गर्न सकिएको छैन । नेपालको माग पुरा भए पछि हाम्रो म्याट्रेसहरुलाई विदेशमा पठाउन सकिन्छ । हामीले तिब्बत र भारतसँग क्वायर म्याट्रेस पठाउनका लागि छलफल गरिरहेका छौँ । सरकारले उत्पादित वस्तु र कच्चा पदार्थको भन्सारमा फरक गर्नुपर्छ । सरकारले कच्चा पदार्थ र उत्पादित वस्तुको एउटै भन्सार मूल्यांकन गरिरहेको छ । सरकारले कच्चा पदार्थ र उत्पादित वस्तुको एउटै भन्सार मूल्याङ्कन गरेको कारणले नेपाली उद्योगहरु विकसित हुन सकेका छैनन् । नेपालमा म्याट्रेस उत्पादनका लागि दक्ष जनशक्ति छन् ? सुरुमा हामीले भारतबाट म्याट्रेसका लागि दक्ष जनशक्ति ल्याएर नेपाली श्रमिकहरुलाई तालिम दियौँ र त्यसपछि नेपामा नै दक्ष जनशतिmहरु उत्पादन भएका थिए । नेपालमा काम सिकेर विदेश पालायन हुनेहरु पनि धेरै छन् । अहिले नेपाली बजारमा म्याट्रेस उत्पादनका लागि दक्ष जनशतिको अभाव छैन ।
अब लभ्ली हिलसम्म पक्की बाटो, पर्यटक बढ्ने दावी
बेनी । म्याग्दी सदरमुकाम बेनीबजारदेखि पर्यटकीयस्थल लभ्लीहिल जाने पदमार्ग निर्माण शुरु भएको छ । बेनी नगरपालिका–२ मा रहेको पर्यटकीयस्थल लभ्लीहिल जाने पर्यटकको सुविधाका लागि बेनी नगरपालिका, म्याग्दी प्रवासी नेपाली सङ्घ (मोना) र म्याग्दी उद्योग वाणिज्य सङ्घको त्रिपक्षीय साझेदारीमा पदमार्ग निर्माण शुरु गरिएको हो । बेनीको हाँडेभीरदेखि लभ्लीहिल जोड्ने सो पदमार्गको आइतबारदेखि पूर्वाधार निर्माण शुरु गरिएको म्याग्दी उद्योग वाणिज्य सङ्घका द्वितीय उपाध्यक्ष राजेश शाक्यले जानकारी दिए । १ दशमलव ७ मिटर चौडाइ भएको सो पदमार्ग निर्माणमा ७८ लाख बढी लागत अनुमान गरिएको छ । नगरपालिका, मोना र सङ्घले क्रमशः ५०, ४०, र १० प्रतिशत लगानी गर्ने यस पदमार्गलाई आगामी ३ महीनाभित्र सम्पन्न गर्ने लक्ष्य लिइएको छ । पदमार्गको लागि रेखाङ्कन गरिएको क्षेत्रको झाडी सरसफाइ शुरु गरिएको छ । दुईदेखि तीन समूहमा जनशक्ति परिचालन गरेर पदमार्ग निर्माणकार्यलाई तीव्रता दिइने शाक्यले बताए । हाँडेभीरदेखि लम्भीहिलसम्म ६७७ मिटर लामो बाटोमा पक्की ढलान गरिएको पदमार्ग निर्माण हुने सङ्घका अध्यक्षसमेत रहेका पदमार्ग निर्माण समितिका संयोजक उत्तम कर्माचार्यले जानकारी दिए । “म्याग्दी भ्रमण वर्षको अवसरमा सरकारी, निजी र प्रवासी म्याग्देलीको साझेदारीमा पर्यटन पूर्वाधार निर्माण गर्न लागेका हौँ, पदमार्ग निर्माणपछि सदरमुकाम बेनीसँगै लभ्लीहिल क्षेत्रको पर्यटन विकासमा सहयोग पुग्ने अपेक्षा गरेका छौँ”, अध्यक्ष कर्माचार्यले भने । रासस
डिसेम्बर २३ देखि काठमाडौंमा मानव स्रोतको रुपान्तरण सम्बन्धी सम्मेलन हुँदै
काठमाडौं । डिजिटल विश्वमा मानव स्रोतको रुपान्तरण सम्बन्धी सम्मेलन आयोजना हुने भएको छ । बैंकिङ फाइनान्स एण्ड इन्स्योरेन्स इन्सिच्युड अफ नेपाल (बीएफआईएन) ले यही डिसेम्बर २३ तारिखका दिन काठमाडौंको होटल र्याडिसनमा एकदिने सम्मेलन आयोजना गर्न लागेको हो । सम्मेलनमा नेपाल तथा भारतका विज्ञ तथा व्यवस्थापकहरुले आफ्ना विचार तथा अनुभवहरु प्रस्तुत गर्ने आयोजकले जनाएको छ । सम्मेलनमा भारतको टाटा कन्सल्टेन्सी सर्भिसेज फाइनान्सियल सोलुसनका उपाध्यक्ष आर. विवेकानन्द, भारतको आईडीएफसी बैंकका मानव संसाधन निर्देशक प्रतिक दुवे, रिस्क म्यानेजमेन्ट एशोसिएसन अफ इण्डियाका महासचिव राकेश अग्रवाल, साउथ एशिया फास्ट ट्रयाक एण्ड एनालाइसिस्टका सम्पादक सौरजित ऐयर लगायतलाई आमन्त्रण गरिएको छ । त्यस्तै, पूर्व मुख्यसचिव विमल कोइराला, नेपाल बैंकर्स संघका अध्यक्ष ज्ञानेन्द्र ढुङ्गाना र नेपाल पुनर्बीमा कम्पनीका अध्यक्ष महेश कुमार गुरागाईँले सम्मेलनको विभिन्न सेसनको अध्यक्षता गर्नेछन् भने नेपाल राष्ट्र बैंकका कार्यकारी निर्देशक नारायणप्रसाद पौडेल, माइक्रोसफ्टका क्षेत्रीय निर्देशक एलेन विलोचन तुलाधर, नेपाल इन्भेष्टमेन्ट बैंकका सह–महाप्रबन्धक विजेन्द्र सुवालले वक्ताका रुपमा रहेका छन् । त्यस्तै बीएफआईएनका प्रबन्ध निर्देशक डा. विनोद आत्रेय, ग्लोबल आइएमई बैंककी सहायक महाप्रबन्धक आरती राणा, संजित कुमार, प्रभु बैंककी मानव संसाधन र व्यवसायिक योजना विभाग प्रमुख रश्मी पन्त र लक्ष्मी लघुवित्तका प्रमुख कार्यकारी अधिकृत प्रकाशराज शर्माले पनि कार्यक्रममा बोल्नेछन् । उक्त सम्मेलनमा सहभागी हुन बीएफआईएनका सदस्यहरुले प्रतिव्यक्ति ९००० रुपैंया र सोबाहेकका अन्यले १०००० रुपैंया तिर्नुपर्ने आयोजकले जनाएको छ । उक्त रकममा भ्याट समावेश नगरिएको समेत आयोजकले बताएको छ । उक्त सम्मेलनका लागि दराज डटकम, नेपाल लाइफ इन्स्योरेन्स, मेगा बैंक, कुमारी बैंक, मर्कन्टाइल लगायतले सहयोग गर्ने प्रतिबद्धता जनाइसकेको बीएफआईएनका प्रबन्ध निर्देशक डा. विनोद आत्रेयले बताए । अात्रेयले सम्मेलनमा विश्वमा सूचना प्रविधिकाे अाविष्कारसँगै राेजगारीकाे अायामहरुमा परिवर्तन अाउँदै गरेकाे परिप्रेक्षमा भावी दिनहरुमा हुनसक्ने परिवर्तन र त्यस्ता परिवर्तनसँग मानवस्राेतकाे रुपान्तरण कसरी गर्ने भन्ने सम्बन्धमा विज्ञहरुले अाफ्ना विचार प्रस्तुत गर्ने र छलफल हुने बताए ।
विद्युत प्राधिकरणका हैटौडा क्षेत्रीय कार्यालयअन्तर्गतका १० वटा शाखा प्रमुखसँग कार्यसम्पादन सम्झौता
काठमाडौं । नेपाल विद्युत प्राधिकरणले विद्युत् चुहावट नियन्त्रण र सेवा प्रवाह सुधारमा केन्द्रित भई वितरण तथा ग्राहक सेवा निर्देशनालय (डिसिएस)को हेटौडा क्षेत्रीय कार्यालय अन्तर्गतका शाखा प्रमुखसँग कार्यसम्पादन सम्झौता गरेको छ । प्राधिकरणका कार्यकारी निर्देशक कुलमान घिसिङसँग क्षेत्रीय कार्यालयका प्रमुख नवराज सुवेदीले शनिबार कार्यसम्पादन सम्झौता गरेका हुन् । ऊर्जा, जलस्रोत तथा सिंचाइ मन्त्री वर्षमान पुन, सचिव सञ्जय शर्मा र प्राधिकरणका सञ्चालक विश्वप्रकाश गौतमको उपस्थितिमा भएको कार्यक्रममा डिसिएसका उपकार्यकारी निर्देशक हरराज न्यौपानेसँग क्षेत्रीय कार्यालय अन्तर्गतका १० वटा शाखा प्रमुखसँग सम्झौता गरेका छन् । प्राधिकरणले जनकपुर, नेपालगंज तथा सुर्खेत क्षेत्रीय कार्यालयका प्रमुख र त्यस अन्तर्गतका वितरण केन्द्र प्रमुखसँग सम्झौता गरिसकेको छ । कार्यसम्पादन सम्झौतामा विद्युत् चुहावट नियन्त्रणलाई उच्च प्राथमितामा राखी यसको अंकभार ५० राखिएको छ । कार्यसम्पादनमा राखिएका सूचकहरुको वस्तुनिष्ठ मूल्याकंन गरी शाखा प्रमुखलाई पुरस्कार र दण्ड दिने व्यवस्था गरिएको छ । कार्यक्रममा मन्त्री पुनले सेवा प्रवाह गर्ने शैलीलाई सुधार गरी प्राधिकरणलाई प्रतिश्पर्धी, सक्षम र सवल संस्था बनाउन केन्द्रित हुन निर्देशन दिए । विद्युत् चुहावट हुँदा प्राधिकरणले आम्दानी गुमाइरहेको उल्लेख गर्दै मन्त्री पुनले चोरी नियन्त्रणका लागि प्रभावकारी कदम चाल्न र प्राविधिक चुहावट नियन्त्रणका लागि प्रणालीलाई सुदृढीकरण गर्न निर्देशन दिए । कार्यकारी निर्देशक घिसिङले पारदर्शी, नैतिकवान, व्यवसायिक र कार्यालयमा चेन अफ कमाण्ड कायम गर्दै निर्धक्क र निडर भएर काम गर्न शाखा प्रमुखहरुलाई निर्देशन दिए । विद्युत् चोरी नियन्त्रण अभियान चलाउन, प्रणाली सुदृढीकरण गर्न, वक्यौता असुलीमा कडाइ गर्न लगायतका निर्देशन उनले दिए । कार्यसम्पादन सम्झौता मार्गनिर्देशक निर्देशिका भएकाले ग्राहकलाई दिने सेवामा सुधार र कार्यालयभित्रको कार्यसम्पादनमा चुस्तता आई समग्ररुपमा संस्थाको प्रशासनिक तथा वित्तीय अवस्थामा सकारात्मक प्रभाव पर्ने प्राधिकरणको अपेक्षा छ । कार्यकारी निर्देशक घिसिङले समेत ऊर्जा मन्त्रालयसँग कार्यसम्पादन सम्झौता गरेका छन् । वितरण केन्द्र प्रमुखसँगको सम्झौतामा विद्युत् चुहावट घटाउने, प्रशासनिक खर्च घटाउने, बाँकी वक्यौता असुल गर्ने, स्तरिय, भरपर्दो तथा सुरक्षित विद्युत सेवा प्रदान गर्ने, ग्राहक सेवाको स्तरबृद्धि गर्ने लगायतका कार्यसम्पादन सूचांक निर्धारण गरिएको छ । हरेक क्षेत्रीय कार्यालय र त्यस मातहतका वितरण केन्द्रलाई चुहावट नियन्त्रण, औसत महसुल संकलनको अवधि घटाउने विषयलाई मुख्य लक्ष्य (टार्गेट)निर्धारण गरिएको छ । कार्य सम्पादनको हरेक चार/चार महिनामा मूल्याङकन गरिने प्राधिकरणले जनाएको छ । हरेक वितरण केन्द्रलाई चुहावट नियन्त्रण र बक्यौता असुलीमा दिइएको टार्गेटको कम्तिमा ५० प्रतिशत प्रगति हासिल गरेमा प्रमुखलाई निश्चित रकम नगद प्रोत्साहन भत्तास्वरुप उपलब्ध गराउने व्यवस्था गरिएको छ । यसैगरी, टार्गेट हासिल गर्नेले पाएको नम्बर बढुवामा जोड्ने, विदेशमा आयोजना तालिम, सेमिनारमा जान प्राथमिकता दिने लगायतका गैर नगद प्रोत्साहन समेत पाउने छन् । तर, ५० प्रतिशतभन्दा कम लक्ष्य हासिल गरेमा त्यसलाई कमजोर कार्यसम्पादन मानी बढुवामा सोही अनुसार नम्बर दिने र नगद तथा गैर नगद प्रोत्साहन नपाउने लगायतको व्यवस्था गरिएको छ । प्राधिकरणले प्रमुखहरुलाई बितरण टान्सफर्मर, मिटर, केवल, पोल लगायतका उपकरण समयमै उपलब्ध गराउने र कानुनी परिधिभित्र रहेर स्वतन्त्रपूर्वक काम गर्न दिने प्रतिबद्धता जनाएको छ । सम्झौताको अनुगमन र मूल्याङकनका लागि प्रभावकारी प्रणाली बनाइने प्राधिकरणले बताएको छ । विद्युतीय सुरक्षा, आफ्नो कार्यालय अन्तर्गत ग्रामिण विद्युतीकरण, गुणस्तरीय र भरपर्दो विद्युत आपूर्ति लगायतका विषयलाई सम्झौतामा समेटिएको छ । गत असारसम्म प्राधिकरणको प्रणालीमा औसत २०.४५ प्रतिशत विद्युत् चुहावट छ । प्राधिकरणले धेरै विद्युत् चुहावट भएकालाई धेरै र कम चुहावट भएकालाई कमको चुहावट नियन्त्रणको लक्ष्य दिएको छ । यस्तो लक्ष्य औसतमा ४ प्रतिशत रहेको प्राधिकरणले जनाएको छ । हेटौडा क्षेत्रीय कार्यलयअन्तर्गत गत असारसम्मको विद्युत चुहावट १३.३७ प्रतिशत छ । चालु आर्थिक वर्षको कात्तिकसम्म विद्युत् चुहावट ८.०२ प्रतिशत छ ।
भरतपुर अस्पतालमा बिरामी कुरूवाका लागि छुट्टै भवन बन्ने, ६ करोड २ लाखकाे लागत
चितवन। चितवनको भरतपुर अस्पतालमा बिरामी कुरूवाका लागि छुट्टै भवन बन्ने भएको छ । भरतपुर अस्पताल स्वास्थ्य मन्त्रालय मातहत रहेपनि सहरी विकास मन्त्रालय अन्तर्गत रहेको उक्त भवन ६ करोड २ लाख रूपैयाँमा बनाउन लागिएको हो । भवन निर्माणका लागि निर्माणकर्ताको समेत छनोट भइसकेको छ । बोलपत्र आह्वानपछि निर्माणको ठेक्का रविना जोशी फूलजोर जेभीले पाएको अस्पतालका मेडिकल सुपरिन्टेन्डेन्ट डा. कृष्णप्रसाद पौडेलले जानकारी दिए । उक्त भवन अस्पतालको पुर्वपट्टिको खाली ठाउँमा बन्ने उनले बताए अस्पतालको स्तरोन्नति स्वास्थ्य मन्त्रालयले भरतपुर अस्पताललाई स्तरोन्नति गरी ५ सय शैय्या बनाउन गरेको प्रस्तावमा मन्त्रिपरिषद्ले सैद्धान्तिक सहमति जनाइसकेको छ । ३ सय शैय्याको सरकारी स्वीकृत रहेको अस्पतालमा हाल समितिका तर्फबाट समेत गरी ६ सय शैय्यामा चलिरहेको छ । यसअघि जिल्ला अस्पतालको मात्र मान्यता रहेको भरतपुर अस्पतालसहित कोशीअञ्चल अस्पताल, नारायणी अञ्चल अस्पताल, भेरी अञ्चल अस्पताल र डँडेलधुरा उपक्षेत्रीय अस्पताललाई स्तरोन्नति गर्ने प्रस्ताव गत मन्त्रिपरिषद्को बैठकमा लगिएको थियो । भरतपुर अस्पतालद्वारा रिफर गरिएका बिरामी हेर्नुपर्ने भएपनि जनशक्ति र सेवा सुविधा नभएका कारण समस्या परेको थियो । शैय्या बढेपछि कर्मचारी दरबन्दी पनि बढ्ने अस्पतालले बताएको छ । आकस्मिक कक्ष अलपत्र भरतपुर अस्पतालमा अहिले १२ शैय्याको आकस्मिक कक्ष छ । पुरानो भवनमा रहेको आकस्मिक कक्ष पनि सुविधा सम्पन्न छैन । अस्पतालको अन्य उपचार विभाग भन्दा यही विभाग अव्यवस्थित एवं साँघुरो देखिन्छ । प्रत्येक १० शैय्या बराबर १ आकस्मिक शैय्या हुनुपर्नेमा भरतपुर अस्पतालमा जम्मा १२ वटा मात्र आकस्मिक शैय्या रहेको अस्पतालका मेसु डा। पौडेलले जानकारी दिए । २० वटा शैया आकस्मिक अब्जर्वेसन रहेको उनले बताए । अस्पताल ६ सय शैय्यामा सञ्चालित छ । अस्पतालको टड्कारो आवश्यकता भनेको आकस्मिक भवनको निर्माण नै हो’, मेसु पौडेलले भने, ‘अहिले अस्पताल प्रशासन आकस्मिक भवन निर्माणका लागि विभाग र मन्त्रालयमा धाइरहेको छ ।’ सुत्केरीको भुइँमै उपचार भरतपुर अस्पतालमा अहिले १ सय २० शैयाको स्त्री तथा प्रसूति विभाग रहेको छ । यहाँ दैनिक ४० जना बच्चा जन्मन्छन् । शैया अभावमा नवजात शिशु र सुत्केरीको भुइँमै उपचार हुने गरेको छ । बर्सेनि अस्पतालमा सुत्केरी गराउनेको संख्या बढे पनि शैय्या भने निश्चित हुँदा उनीहरु भुइँमै बसेर उपचार गराउन बाध्य छन् । भरतपुर अस्पतालले यस विभागका लागि थप शैय्या व्यवस्थापन गर्न लागिपरेको तर, जनशक्ति अभावले समस्या भएको अस्पतालले जनाएको छ ।
शिशिर ढुंगानाको बिदाईमा अर्थमन्त्रीले भनेः मेरो बायाँ हात कमजोर भयो
काठमाडौं । ‘शिशिर ढुंगानाको सरुवाले मेरो एउटा हात कमजोर भएको छ, उहाँसँग काम गर्दा मलाई साह्रै सहज भएको थियो, अब आउनेलाई शिशिरजी कै जसरी काम गर्नुपर्ने चुनौती छ’, यो भनाई हो अर्थमन्त्री डा. युवराज खतिवडाको । आइतबार राजश्व सचिव शिशिर ढुंगानाको बिदाई कार्यक्रममा मन्त्री खतिवडाले उनको मुक्तकण्ठले प्रशंसा गरे । मन्त्रीले ढुंगानालाई भावी मुख्य सचिवको सम्भावना बोकेका प्रशासकको रुपमा समेत उभ्याउन भ्याए । ‘तपाई अर्थको क्याडर, प्रधानमन्त्री कार्यालयमा गएर ज्ञानको दायरालाई अझै फराकिलो पार्नुस्, कार्यकालको थुप्रै समय बाँकी नै रहेछ, अझै माथिसम्म जाने ठाउँ र सम्भावना दुवै छ’, डा. खतिवडाले भने । प्रधानमन्त्री कार्यालयमा पनि ढुंगानाले आफ्नै सचिवका रुपमा काम गर्ने भन्दै उनले केही काम तत्काल अघि बढाउन निर्देशन पनि दिए ।‘प्रधानमन्त्री कार्यालयमा अर्थ तथा पुर्वाधार समितिको संयोजक मै छु, तपाईले मेरै सचिवका रुपमा काम गर्ने हो, लगानी सम्बन्धी ऐन, ठुला पूर्वाधार सम्बन्धी ऐन लगायतका केही काम तत्कालै गर्नुपर्नेछ, त्यसलाई चाँडो टुंग्याउनु होला’, मन्त्री खतिवडाले भने । विदाई कार्यक्रममा अर्थ सचिव राजन खनालले ढुंगानाको अभाव महशुस हुने बताएका थिए । उनले ढुंगानाका लागि अर्थमन्त्रालयको ढोका पुनः खुल्ला हुने दावी समेत गरेका थिए । ‘म पनि अर्थबाट बिदा भएको थिएँ, पछि फेरी आएँ, तपाई पनि आज जाँदै हुनुहुन्छ, भोली फेरी आउनुहुनेछ’, अर्थ सचिव खनालले भने । आफ्नो विदाई कार्यक्रममा सचिव ढुंगानाले अर्थमन्त्री र अर्थ सचिवसँग बसेर आफुले धेरै कुरा सिक्न पाएको धारणा राखेका थिए । भावुक रुपमा प्रस्तुत भएका ढुंगानाले आफुबाट कुनै गल्ति कमजोरी भएको खण्डमा माफी दिन आग्रह समेत गरेका थिए । ढुंगानाको बिदाई कार्यक्रममा अर्थमन्त्रालयका सबै बिभाग तथा महाशाखा प्रमुख, संस्थानका प्रमुखहरुलाई सहभागी भएका थिए । नेपाल राष्ट्र बैंकबाट भने डेपुटी गभर्नर चिन्तामणी शिवाकोटीले सहभागी थिए । ढुंगानाले २०७४ असार ६ गते राजश्व सचिवको जिम्मेवारी पाएका थिए । २०६३ साउन ७ गते अर्थमन्त्रालयको क्याडर बनेका उनी १२ बर्षपछि अर्थबाट बाहिरिएका हुन् । श्रोतका अनुसार राजश्व अनुसन्धान विभाग, सम्पति सुद्धिकरण विभागलाई प्रधानमन्त्री कार्यालयमा तानिएपछि ती निकायलाई हेर्ने गरि ढुंगानालाई प्रधानमन्त्री कार्यालय लगिएको हो । त्यस्तै, ठूला पूर्वाधारहरु प्रधानमन्त्री कार्यालयले नै हेर्ने गरि नयाँ ऐन समेत बनाउन लागिएको छ । सो ऐन कार्यान्वयनमा आउँदा ती आयोजना हेर्न पनि ढुंगानालाई अर्थमा तानिएको हुन सक्ने श्रोतले बतायो ।
सन नेपाल लाइफ इन्स्योरेन्सद्वारा आठ स्थानमा बीमा जागरण अभियान सम्पन्न
काठमाडौं । सन नेपाल लाइफ इन्स्योरेन्स कम्पनीद्वारा आठ स्थानमा बीमा जागरण अभियान सम्पन्न भएको छ । जनकपुर, लहान, यदुकुवा, गोदार, चन्द्रनिगाहपुर, बिरगंज, हेटौडा, नारायणगढमा बीमा जागरण अभियान तथा अभिकर्ता सम्मान कार्यक्रम सम्पन्न गरेको छ । उक्त कार्यक्रम कम्पनीका महा प्रबन्धक कमलराज गौतमको प्रमुख आतिथ्यतामा सम्पन्न भएको छ । बाक्लो स्थानिय जनसमुदायको सहभागिता रहेको उक्त कार्यक्रममा उत्कृष्ट अभिकर्ताहरुलाई सम्मान गर्नुको साथ कम्पनीका महा प्रबन्धक कमलराज गौतमले जीवनबीमाको महत्वकाे बारे जानकारी दिएका छन् ।
