दरबन्दी छ, डाक्टर छैनन्, आएका पनि टिक्दैनन् : पाल्पा जिल्ला अस्पताल
काठमाडौं । पाल्पा जिल्लामै ठूलो सरकारी अस्पतालका रुपमा स्तरोन्नति हुँदै गरेको रामपुर अस्पतालमा दरबन्दी भएर पनि डाक्टर नहुँदा बिरामीले सास्ती खेप्नु परेको छ । पचास शय्याको अस्पतालको रुपमा विकसित हुँदै गरेको यस अस्पतालमा दरबन्दी अनुसार डाक्टर त छैनन् नै, भौगोलिक विकटतासँगै पर्याप्त सुविधा नहुँदा विशेषज्ञ डाक्टर यहाँ बसेर जनतालाई सेवा दिन चाहेको देखिँदैन । विशेषज्ञ डाक्टर छोटो समय बस्ने जाने क्रम यहाँको नियति नै बनेको छ । डेन्टल सर्जनसहित १४ जना डाक्टरको दरबन्दी रहेको अस्पतालमै नियमित बसेर सेवा दिने एकजना पनि विशेषज्ञ डाक्टर नहुने गरेको स्थानीयवासीको दुःखेसो छ । दुईजना मेडिकल अधिकृत र एकजना डेन्टल सर्जनको भरमा अस्पताल चलेको छ । अस्पतालमा नवौँ र दशौँ तहका विशेषज्ञ डाक्टरको दरबन्दी रिक्त छ । विशेषज्ञ तहका डाक्टर अस्पतालमा नहँुदा यहाँका बिरामीले औषधोपचारमा निकै समस्या झेल्दै आएका छन्र । डाक्टर देखिन आउँछन्, एक–दुई महिना बित्न नपाउँदै अन्यत्र जाने गरेका छन्र । बिरामीलाई सेवा दिन भन्दा पनि सकेसम्म सुगम स्थानमा बसेर जागीर टिकाउने प्रवृत्ति डाक्टरहरूमा देखिएको छ । अस्पतालमा ५९ मध्ये हाल ३२ जना कर्मचारी मात्रै कार्यरत छन् । भौगोलिक विकटताका हिसाबले रामपुर अझै पनि सुविधा सम्पन्न शहरका रुपमा स्थापित हुन सकेकोे छैन । माथिल्लो तहका डाक्टरले ग्रामीण भेगमा बसेर जनतालाई सेवा दिन चाहँदैनन् । अस्पतालमा दरबन्दी भए पनि सुविधा उपभोग गर्न नपाएको विरामीहरूको गुनासो रहेको छ । अस्पतालमा भिडियो एक्सरे मेशिन प्रयोग गर्ने विशेषज्ञ नहुँदा बिरामी निजी मेडिकलमा पुगेर महङ्गो शुल्कमा सेवा लिन बाध्य छन् । जिल्ला सदरमुकाम तानसेनदेखि करीब ६५ किलोमिटर पूर्वमा रहेको यस अस्पतालमा विशेषज्ञ डाक्टरकै अभावमा आएका बिरामीलाई अन्यत्र पठाउने गरिन्छ । पाल्पा, स्याङ्जा, तनहुँ र नवलपरासीका जनता सेवा लिन अस्पतालमा नै पुग्नु पर्छ भन्ने मानसिकताको विकास भइरहेका बेला विशेषज्ञ डाक्टरबाट सेवा सुविधा नपाउँदा अन्यत्र भौँतारिनु पर्ने बाध्यता पूर्वी पाल्पावासीमा रहेको छ । दरबन्दी अनुसारका विशेषज्ञ डाक्टर नहुँदा सेवा लिन उनीहरु जिल्ला सदरमुकाम तानसेनस्थित लुम्बिनी मेडिकल कलेज, युनाइटेड मिसन अस्पताल, बुटवल, भैरहवा, पोखरा, काठमाडौँ लगायतका विभिन्न अस्पताल पुगिरहेका छन् । आकस्मिक सेवाका लागि अस्पतालबाट अन्यत्र पठाइएका बिरामीलाई समयमा पु¥याउन नसक्दा अकालमै ज्यान गुमाउनुपर्ने अवस्था पनि छ । वर्षायामका बेला सडक समस्याका कारण वर्षेनी नागरिकले उपचारमा कष्ट भोग्दै आएका छन् । शहरी क्षेत्रको सेवा सुविधासँग तुलना गर्दै यहाँ आएका डाक्टर एक–दुई महिनापछि अन्यत्र जाने गरेको अस्पतालको भनाई रहेको छ । यहाँ स्थानीय स्तरकै डाक्टर नहुँदा पनि अस्पतालमा नियमित विशेषज्ञ डाक्टर टिक्न नसकेको धेरैको ठम्याइ छ । कोही अध्ययन बिदा देखाएर, कोही भौगोलिक विकटताको बहाना गरेर त कोही शहरी क्षेत्रका अस्पतालमा कार्यरत डाक्टरको सेवा सुविधासँग तुलना गर्दै अन्यत्र जाने गरेका छन् ।अस्पतालमा दिनहुँ बिरामीको चाप बद्दै जाँदा दैनिक दुई सय पचास जना जति बिरामी उपचारका लागि आउने गरेका छन् । बीमाका कारण पनि दिनहुँ बिरामी सङ्ख्या बढ्ने तथा स्थानीय निकायले अस्पतालको सेवा प्रवाहमा चासो नदिँदा पनि अस्पतालमा नियमित डाक्टर नबस्दाँ समस्या उत्पन्न भएको छ । डाक्टरहरू साँझ बिहान निजी मेडिकलमा सेवा दिन पाउने गरी आफूलाई पायक पर्ने स्थानमा सरुवा हुने प्रवृत्ति पनि समस्याको कारण रहेको सरोकारवाला बताउँछन् । हाल पन्ध्र शय्याको क्षमतामा सञ्चालित यस अस्पतालबाट घरदैलोमै स्वास्थ्य सेवा प्रदान गर्ने उद्देश्यले क्षमता बढाएर पचास शय्याको सुविधा सम्पन्न भवन बनाउने काम धमाधम भइरहेको छ । अस्पताल स्तरोन्नति भइरहेकै अवस्थामा पनि दरबन्दी अनुसारका डाक्टर नबसेका कारण भोलिका दिनमा पनि यहाँ नियमित रुपमा विशेषज्ञ डाक्टर बस्छन् र सेवा दिन्छन् भन्ने कुरामा आमनागरिक ढुक्क बन्न नसकेको स्थानियको गुनासो रहेको छ । विसं २०५२ मा प्राथमिक स्वास्थ्य केन्द्रका रुपमा स्थापना भई सेवा दिँदै आएको यस अस्पताल २०६७ सालमा पन्ध्र शय्यामा स्तरोन्नति भएको थियो । विसं २०७० मा पचास श्ययामा स्तरोन्नति गर्ने घोषणा गरिए पनि अहिलेसम्म पनि पन्ध्र शय्या मै सीमित रहेको छ । नयाँ भवनको निर्माण कार्य सम्पन्न भएपछि हाडजोर्नी, फिजिसियन सर्भिस, रेडियोलोजिष्ट लगायतका अत्याधुनिक सेवा सञ्चालन हुने दाबी अस्पतालले गरेको छ ।रासस
१ हजार रुपैयाँ बचत गर्नेलाई १० लाखको बीमा, विनाधितो ७ प्रकारका कर्जा ८ प्रतिशत व्याजमा
काठमाडौं । एनएमबि बैंक लिमिटेडले बचतकर्ता र साना व्यवसायीलाई लक्षित आकर्षक बचत र कर्जा योजना ल्याएको छ । बैंकले सोमबार पत्रकार सम्मेलन गरी ७ प्रकारका लघुकर्जा विनाधितो प्रदान गर्ने र त्यसको व्याजदर सस्तो हुने जनाएको छ । त्यस्तै, एक हजार रुपैयाँ बचत गरी खोलिने सरल बचत खातामा ७ प्रतिशत व्याजसहित बचतकर्ताको १० लाख रुपैयाँ बीमा हुने बैंकले जनाएको छ । विपन्न वर्गका जनतालाई सहुलियतपूर्ण कर्जा दिने सरकारी नीतिलाई समर्थन गर्दै बैंकले सात प्रकारका कर्जाहरुमा विनाधितो प्रदान गर्न लागिएकाे जनाएकाे छ । बैंकले एनएमबि व्यवसायिक कृषि तथा पशुपन्छी कर्जा १० लाख रुपैयाँसम्म, शिक्षित युवा स्वरोजगार कर्जा ७ लाखसम्म, वैदेशिक रोजगारीबाट फर्केका युवा परियोजना कर्जा १० लाखसम्म र दलित समुदाय व्यवसाय विकास कर्जा १० लाखसम्म दिने जनाएको छ । त्यसैगरी, बैंकले उच्च र प्राविधिक तथा व्यवसायिक शिक्षा कर्जा ७ लाखसम्म, भूकम्प पीडितहरुको निजी आवास निर्माण कर्जा ३ लाखसम्म र १५ लाख रुपैयाँसम्म महिला उद्यमशीलता कर्जा उपलब्ध गराउने भएको छ । यस्ताे कर्जा बढीमा पाँच वर्षकाे लागि प्रदान गरिने छ । कर्जा लिन व्यवसायिक याेजना पेश गर्नुपर्छ । शैक्षिक कर्जा लिन कम्तिमा स्नातक पास गरेकाे, ४० वर्ष भन्दा कम उमेरकाे, कम्तिमा ७ दिन सम्बन्धित व्यवसाय गर्न तालिम लिएकाे हुनुपर्नेछ । यी सात प्रकारका कर्जाकाे व्याज करिब ८ हुने बैंकका प्रमुख कार्यकारी अधिकृत सुनिल केसीले बताए । यस्ताे कर्जामा कुनै पनि प्रकारका शुल्क नलाग्ने प्रमुख व्यापार अधिकृत गाेविन्द घिमिरेले जानकारी दिए । त्यस्तै, बैंकले कृषि पेशामा संलग्न महिलाहरुलाई लक्षित गरी “अग्रणी महिला कृषि कर्जा” योजना संचालनमा ल्याएको छ । जस अन्तर्गत महिला कृषकहरुले उत्पादन लागतमा आधारित रहि १५ लाख रुपैयाँ सम्मको कर्जा पाउने छन् । यस्ताे कर्जा लिन धिताे आवश्यक हुनेछ । हजार बचतमा १० लाखको बीमा एनएमबी बैंकले निक्षेपकर्ताहरुलाई “एनएमबि सहारा बचत खाता” नामक नयाँ योजना ल्याएको छ । एक हजार रुपैयाँ बचत राखेर खोल्न सकिने यस खातामा निक्षेपकर्ताले ७ प्रतिशत व्याज र १० लाख रुपैयाँ सम्मको बीमा सुविधा पाउने छन् । बैंकले विभिन्न १८ वटा गम्भिर रोगहरु, दुर्घटनाबाट मृत्यु तथा पूर्ण अशक्त भएको अवस्थामा बैंकले निक्षेपकर्तालाई बीमा वाफत १० लाख रुपैयाँ भुक्तानी दिनेछ । बचतकर्ताको बीमा शिखर इन्स्योरेन्समा हुनेछ । बचतकर्तालाई गम्भिर रोगहरु लागेको रिपोर्टसहित डाक्टरले सिफारिस गरेपछि उपचार हुनु पूर्व नै बीमा दावी भुक्तानी गरिने शिखर इन्स्योरेन्स कम्पनीको प्रमुख कार्यकारी अधिकृत दिप प्रकाश पाण्डेले बताए । बचतकर्तालाई व्याजले मात्र आकर्षित नगरी अतिरिक्त सुविधा दिने उदेश्यसहित यस्तो योजना ल्याएको एनएमबी बैंकका प्रमुख कार्यकारी अधिकृत सुनिल केसीले बताए । ‘थोरै रकम बचत राखेर खोल्न सकिने एनएमबी सहारा बचत खाता’मा व्याज पनि उच्चतम दिएका छौं । बीमा सुविधा पनि राम्रो दिएका छौं’ केसी भन्छन्–यसले सर्वसाधारणमा बचत गर्न प्रोत्साहित गर्नेछ ।’ यस्ताे बचत खाता जाे काेहीले पनि खाेल्न सक्ने र सबै उमेरका बचतकर्तालाई बीमामा सहभागि गराइने केसीले जानकारी दिए ।
६८ वर्ष पुरानो पुस्तकालयकाे रूप फेरियाे, पाठकको गन्तव्य स्थल बन्दै
काठमाडौं । भक्तपुर नगरपालिका अन्तर्गत सञ्चालित ६८ वर्ष पुरानो जनज्योति पुस्तकालयको काँचुली फेरिएको छ । विगत लामो समय भक्तपुर दरबार क्षेत्रस्थित साँघुरा कोठामा सञ्चालन भइरहेको भक्तपुरको ऐतिहासिक पुस्तकालय नयाँ र व्यवस्थित भवनमा सरेसँगै यसको काँचुली फेरिएको हो । जनज्योति पुस्तकालयको स्थापना विसं २००७ मा भएको हो । तत्कालीन राजा त्रिभुवनले घट्खामा उद्घाटन गरी सञ्चालनमा आएको यो पुस्तकालय करीब पाँच दशकभन्दा बढी दरबार क्षेत्रस्थित नपा भवनमा सञ्चालन हुँदै आइरहेको थियो । नगरपालिकाले यसको व्यवस्थित सञ्चालनका लागि भनपा–२ नःपुखुस्थित नगरपालिकाको नयाँ भवनमा गत जेठमा स्थानान्तरण गरेसँगै यो पुस्तकालयको काँचुली फेरिएको हो । गत जेठ ७ गते नेपाल मजदूर किसान पार्टीका अध्यक्ष नारायणमान बिजुक्छेले जनप्रतिनिधिले काम थालेको एक वर्ष पूरा भएका अवसरमा पुस्तकालय उद्घाटन गरी नयाँ भवनमा सञ्चालन गरेको हो । पुस्तकालयमा पाठकको मागबमोजिम किताब राख्ने ठाउँ र भौतिक पूर्वाधारको अभाव भएपछि गत जेठमा नयाँ भवनमा स्थानान्तरण गरेर थप व्यवस्थित गरी सञ्चालनमा ल्याएको पुस्तकालयका प्रमुख भूपाल मूलको भनाई रहेको छ । उक्त पुस्तकालय सरेसँगै पाठकलाई पोखरीको मनोरम दृश्य, शान्त र फराकिलो कोठामा बसी पुस्तक र पत्रपत्रिका पढ्न एकदमै सजिलो भएको बताएका छन् । पुस्तकालय यता सरेपछि पहिलेभन्दा सङ्ख्यात्मक रुपमा अध्ययन गर्न आउने पाठकको सङ्ख्यामा समेत वृद्धि आएको छ । नयाँ भवनमा स्थानान्तरण गरेसँगै नगरपालिकाको आर्थिक सहयोगमा पाँच लाख बराबरको पाठकको मागअनुसार बजारमा आएका नयाँ साहित्य, राजनीतिक दर्शन, विद्यार्थीका लागि आवश्यक पुस्तक थपिएको छ । पुस्तकालय राष्ट्रिय तथा अन्तर्राष्ट्रिय लेखक र साहित्यकारका तस्बीरले थप पठनीय देखिएका छन् । पुस्तकालयमा नयाँ र पुराना गरी हाल एक हजार २ सय भन्दाबढी सदस्य रहेका छन् । पुस्तकालय थप व्यवस्थित गर्न सिसी क्यामरा जडान गरिनुका साथै पाठकलाई सहज तुल्याउन १२ हजारभन्दा बढी पुस्तक विद्युतीय दर्ता गर्ने अन्तिम तयारी भइरहेको छ । पुस्तकालयमा पढ्नका लागि राष्ट्रियस्तरका सबै दैनिक, साप्ताहिक, पाक्षिक र मासिक पत्रपत्रिकाको व्यवस्थासमेत गरिएको छ । पुस्तकालयमा नेपाली, अङ्ग्रेजी र हिन्दी भाषालगायत विभिन्न साहित्यिक क्षेत्रसँग सम्बन्धित पुस्तकसमेत सङ्कलनमा राखिएका छन् । पुस्तकालयमा गोरखापत्र दैनिकको विसं २०५६ यताका सबै अङ्क व्यवस्थित रुपमा अभिलेख राखिएको छ । साथै अन्य विभिन्न राष्ट्रिय पत्रपत्रिकाको दुई दुई वर्षका अभिलेख राख्ने गरिएको छ । आम पाठकको सहजताका लागि शनिबारसमेत खुला रहने पुस्तकालय जाडो महीनामा बिहान ११ बजेदेखि ५ बजेसम्म र गर्मी मौसममा ११ बजेदेखि ६ बजेसम्म खुला गर्दछ । पछिल्लो समय पुस्तकालय व्यवस्थित भएसँगै पाठकका लागि निःशुल्क इन्टरनेट सुविधादेखि अध्ययन कक्ष र शौचालयका समेत छुट्टै व्यवस्था गरिएको छ । पुस्तकालयमा आधुनिक तबरले विकास गर्न वैज्ञानिक पद्धतिलाई अवलम्बन गरी पुस्तक राखिएका छन् । भक्तपुरको इतिहास बोकेको यस पुस्तकालय ख्वपः विश्वविद्यालयको आधारका रुपमा विकास गर्दै जानुका साथै भविष्यमा इ–लाइबेरीका रुपमा विकास गर्ने नगरपालिकाको लक्ष्य रहेको जनाएको छ । रासस
पाँच महिनामा ५२ आयोजनासँग विद्युत् खरीद सम्झौता, १० वर्षमा १५ हजार मेगावाट उत्पादन गर्ने लक्ष्य
काठमाडौं । नेपाल विद्युत् प्राधिकरणले चालु आर्थिक वर्षको पाँच महिनामा ५२ जलविद्युत् आयोजनाका प्रवद्र्धकसँग विद्युत् खरीद सम्झौता गरेको छ । प्राधिकरणका प्रवक्ता प्रबल अधिकारीका अनुसार विद्युत् खरीद सम्झौता भएका ती आयोजनाको क्षमता एक हजार ५१ मेगावाट रहेका छन् । प्राधिकरणले चालु आर्थिक वर्षको पहिलो दिन अर्थात् गत साउन १ गते आरती पावर कम्पनीले भोजपुरमा निर्माण गर्न लागेको १४ दशमलब ५० मेगावाट क्षमताको माथिल्लो इरखुवा जलविद्युत् आयोजनासँग सम्झौता गरेको थियो । वित्तीय व्यवस्थापन भई निर्माणका विभिन्न चरणमा रहेका आयोजनाको क्षमता दुई हजार ५०१ मेगावाट रहेको छन् । यस्तै वित्तीय व्यवस्थापन नभएका आयोजनाको क्षमता दुई हजार ५८१ मेगावाट रहेका छन् । हाल कूल ७६ आयोजनाबाट ५२० मेगावाट विद्युत् उत्पादन भएका छन् । प्राधिकरणको केन्द्रीय प्रणालीमा एक मेगावाटभन्दा माथिका ७४ आयोजनाबाट एक हजार तीन मेगावाट विद्युत् जोडिएको छ । यस्तै संखुवासभामा आयोजनास्थल रहेको १२ मेगावाट क्षमताको दूधकुण्ड खोला, एक दशमलब पाँच मेगावाट क्षमताको माथिल्लो गडीगाड गरी कूल १६ आयोजनासँग सम्झौता गरेको छ । आर्थिक वर्ष २०८४/८५ सम्ममा १५ हजार मेगावाट विद्युत उत्पादन गर्ने लक्ष्यलाई आधार मान्दै ५ हजार २५० मेगावाटसम्म नदी प्रवाही प्रकृतिका आयोजनासँग सोही आधारमा सम्झौता हुनेछ । यस्तै चार हजार ५ सय मेगावाटसम्मका अर्धजलाशययुक्त प्रकृतिका आयोजनाको विद्युत खरीद सम्झौता समेत ‘टेक अर पे’ गरिने प्राधिकरणले जनाएको छ । सरकारले आगामी १० वर्षमा १५ हजार मेगावाट विद्युत् उत्पादन गर्ने लक्ष्य राखेको छ । प्राधिकरणका अनुसार गत असोजमा ११ जलविद्युत् आयोजनाको प्रवद्र्धकसँग सम्झौता हुँदा कात्तिकमा तीन आयोजनाको प्रवद्र्धकसँग मात्र त्यस्तो सम्झौता भएको थियो । पछिल्लो समयमा प्राधिकरणले विद्युत् खरीद सम्झौतामा पुनरावलोकनमा पाँच हजार २५० मेगावाट क्षमतासम्म नदी प्रवाही आयोजनाको सम्झौता हुने भएको छ । यस्तै थप ७० मेगावाट क्षमताका १२ आयोजनासँग निकट भविस्यमा नै सम्झौता गर्ने तयारी गरिएको छ । प्राधिकरणले पछिल्लो दिनमा अर्धजलाशय प्रकृतिका आयोजनासँग सम्झौता गर्ने तयारी गरेको छ । गत मङ्सिर २५ गते ऊर्जा, जलस्रोत तथा सिँचाइ मन्त्री वर्षमान पुनको अध्यक्षतामा बसेको प्राधिकरण सञ्चालक समितिको बैठकले विद्युत् खरीद सम्झौता ‘टेक अर पे’ मा गर्ने निर्णय गरेको छ । यस्तै एक मेगावाट क्षमताभन्दा कमका १५ आयोजनाबाट ११ दशमलब २४ मेगावाट विद्युत् जोडिएका छन् । प्राधिकरणको प्रणालीमा प्राधिकरण आफ्नै पाँच हजार ५४५ मेगावाट घण्टा, निजी क्षेत्रको चार हजार ९६७ मेगावाट घण्टा र भारतबाट आठ हजार ८४३ मेगावाट घण्टा विद्युत् उपलब्ध हुँदै आएको छ । कूल माग भने १९ हजार ३५५ मेगावाट घण्टा रहेको छ । रासस
सेयर बजारले गति लियो, नेप्से १३ अंकले बढ्दा निर्जीवन बीमा समूहमा उच्च वृद्धि
काठमाडौं । सेयर बजारमा सरकारले सकारात्मक नीति लिएपछि सेयर बजारले गति लिएको छ । आइतबार दोहोरो अंकले बढेको बजार सोमबार पनि १५.१७ अंकले बढेर ११८२.७८ अंकमा पुगेको छ । जुन अघिल्लो दिनको तुलनामा १.३० प्रतिशत वृद्धि हो । अर्थमन्त्रालयले समिति गठन गरेपछि लगानीकर्ता आशावादी देखिएका छन् । जसले गर्दा सेयर कारोबार रकममा पनि सुधार देखिएको छ । सोमबार कुल १५९ कम्पनीको ४२ करोड रुपैयाँ बराबरको सेयर कारोबार भएको छ । सबैभन्दा बढी छिमेक लघुवित्त विकास बैंकको ४ करोड ८३ रुपैयाँ बराबरको सेयर किनबेच भएको छ । त्यस्तै, दोहोरो अंकले उकालो लागेको बजारमा विभिन्न ४ कम्पनीका लगानीकर्ताले ९ प्रतिशत बढी कमाएका छन् । मिर्मिरे लघुवित्त वित्तीय संस्थाका लगानीकर्ताले ९.९२ प्रतिशत कमाएका छन् । त्यस्तै, कालिका लघुवित्त वित्तीय संस्थाको ९.८९, पूर्णिमा विकास बैंकको ९.८० र आरम्भ माइक्रोफाइनान्सको ९.२१ प्रतिशतले सेयर मूल्यमा वृद्धि भएको छ । निर्जीवन बीमा समूहको सूचक २२०.५१ अंकले उकालो लागेको छ । सोमबार ट्रेडिङ समूह बाहेक कारोबारमा आएका बाँकी समूह हरिया भएका छन् । ट्रेडिङ समूह सामान्य ३.०४ अंकले घटेको छ ।
चिल्लो नारायणगढ-मुग्लिन सडक अब जोखिममुक्त, यस्ता छन् उच्च जोखिममा रहेको सडकहरु
काठमाडौं । निर्माणअघि उच्च जोखिम युक्त रहेको नारायणगढ मुग्लिन सडकखण्डमा जोखिम घटेको छ । यातायात व्यवस्था विभागले यो सडकखण्डलाई कम जोखिमयुक्त सडकमा वर्गीकरण गरेको हो । ३६ किलोमिटर लामो सो सडक पुल निर्माण बाहेक सबै काम सकिइसकेको छ । नारायणगढ मुग्लिन सडकमा दैनिक ८ हजार भन्दा बढी सवारी साधन गुडिरहेका छन् । कालीखोला आसपासको ४ किलोमिटर क्षेत्रमा २९ वटा जोखिमपुर्ण पहिरो रहेका छन् । यसका लागि विभिन्न स्थानमा पर्खाल लगाउने काम गरिएको छ । सडकको विभिन्न स्थानमा राखेको स्पीड ब्रेकरले दुर्घटनालाई कम गर्ने विभागले दाबी गरेको छ । यसैगरी सडकको छेउमा सेफ्टी निर्माणको काम पनि अन्तिम चरणमा पुगेको छ । विभागले देशभरबाट ६० जोखिमयुक्त सडकको पहिचान गरी उच्च जोखिम मध्यम जोखिम र कम जोखिममा वर्गीकरण गरेको छ । जसअन्तर्गत उच्च जोखिममा ६, मध्यम जोखिममा ४३ र न्युन जोखिममा ११ वटा रुट रहेका छन् । दुर्घटना, सडकको दुरी, सडकको क्षमता लगायतलाई आधार मानेर सडकको वर्गीकरण गरिएको हो । यस्ता छन् उच्च जोखिममा रहेका सडकहरु गल्छि-पिपलटार, काठमाडौं-पिपलटार, बार्तुङ-तम्घास, गोरुसिङगे-सन्धिखर्क, डुम्रे-बेसिशहर र बेसिशहर-चामे मध्यम जोखिम मलेखु-धादिङबेसी, पिपलटार-धुन्चे, धुन्चे-रसुवागढी, गल्छी-नौबिसे, नौबिसे-काठमाडौं, बुटवल-बर्थुङ, गल्याङ-वालिङ, वालिङ-स्याङजा, स्याङजा-पोखरा, पोखरा-कुस्मा, कुस्मा-बाग्लुङ, बाग्लुङ-बेनी, बेनी-जोमसोम, पोखरा-डुम्रे, डुम्रे-आबुखैरेनी, आबुखैरेनी-मुग्लिन, आबुखैरेनी-गोर्खा, चौरेल-फिकेल, फिकल-इलाम, इलाम-फिदिम, फिदिम-ताप्लेजुङ, धरान-हिले, हिले-लेगुवा, लेगुवा-भोजपुर-दिक्तेल, हिले-बसन्तपुर, बसन्तपुर-चैनपुर-खाँदबारी, बसन्तपुर-तेह्रथुम, कटारी-घुर्मी, घुर्मी-ओखलढुङगा, ओखलढुङगा-सल्लेरी, बर्दिबास-सिन्धुली, सिन्धुली-खुर्कोट, खुर्कोट-धुलिखेल, खुर्कोट-रामेछाप, खुर्कोट-मन्थली, मन्थली-तामाकोशी, लामाङगु-चरिकोट, चरिकोट-तामाकोशी, तामाकोशी-जिरी, धुलिखेल-जिरोकिलो, जिरोकिलो-दोलालघाट, दोलालघाट-चतरा र मुग्लिन-नारायणगढ रहेका छन् । न्युन जाखिम इटहरी-धरान, र्मिचइया-कटारी, खुर्कोट-गुर्मि, खुर्कोट-खाडिचौर, खाडिचौर-कोदारी, काठमाडौं-बनेपा, काठमाडौं-धुलिखेल, मुग्लिन-मलेखु, पोखरा-डुम्रे, डुम्रे-आबुखैरेनी र आबुँखैरेनी-मुग्लिन रहेका छन् ।
नेपाल इन्स्योरेन्सका संचालक दुर्गाप्रसाद नेपालले दिए राजिनामा
काठमाडौं । नेपाल इन्स्योरेन्स कम्पनी लिमिटेडका संचालक दुर्गाप्रसाद नेपालले सञ्चालक समितिको सदस्य पदबाट राजिनामा दिएका छन् । पुस १ गते बसेको कम्पनीको सञ्चालक समितिको बैठकले संचालक नेपालको राजिनामालाई स्वीकृती दिएको हो । संचालक समितिले सोही दिनदेखि लागू हुने गरी नेपालको राजिनामालाई स्वीकृत गरेको हो ।
नयाँ पाठ्यक्रमकाे याेजना बनाउँन शिक्षाविद् बुटवलमा
काठमाडौं । बुटवल उपमहानगरपालिकामा देशभरका शिक्षाविद्को जमघट हुने भएको छ । अबको शैक्षिक पाठ्यक्रमका विषयमा बहस चलाउने र तीन तहका सरकारको खाकामा शिक्षाविद्ले जमेर छलफल गर्ने बुटवल उपमहानगरपालिकाले जनाएको छ । शैक्षिक सङ्गोष्ठी नाम दिएको कार्यक्रम मुलुकमा पहिलो पटक हुन लागेको हो । ३८ विद्यायलको संख्या रहेको उक्त उपमहानगरपालिकामा बालविकास केन्द्र, सामुदायिक सिकाइ केन्द्र, मदरसा, गुरुकुलसमेत संचालनमा रहेको छन् । सामुदायिक र संस्थागत विद्यालयमा सिकाइ केन्द्रदेखि कक्षा १२ सम्मका कुल विद्यार्थीको सङ्ख्या ५७ हजार ५ सय सात रहेको छ । सीपमूलक विषयसहितको शैक्षिक पाठ्यक्रम कस्तो बनाउने र जनशक्ति उत्पादन तथा व्यवस्थापन कसरी गर्ने भन्ने विषयमा खाका तयार पार्न यस्तो शैक्षिक सङ्गोष्ठीको तयारी भइरहेको बुटवल उपमहानगरपालिकाका प्रमुख शिव सुवेदीले जानकारी दिएका छन् । स्थानीय, प्रादेशिक तथा राष्ट्रियस्तरका पाठ्यक्रममा मौलिकताको शिक्षा जोड्ने र कक्षा ९–१२ को सीपमूलक विषयलाई समेत कसरी परिमार्जन गर्ने भन्ने विषयमा उपमहानगरले एउटा खाका तयार पारेर प्रस्तुत गर्ने छ । शिक्षक, प्रध्यापक, इञ्जिनीयर, डाक्टर, वैज्ञानिक, प्राविधिक, कलाकार, प्रशासक, कृषकलगायतका शैक्षिक जनशक्ति उत्पादन गर्ने भरपर्दो आधार शिक्षा जसले विज्ञान, खोज, अनुसन्धानका साथै प्राप्त भएका वस्तुको उपयोग, प्रशोधन र व्यवसायीकरणको बाटा र पाटालाई शिक्षाले सम्बोधन गरेको छ । शिक्षाविद् रामलाल श्रेष्ठको संयोजकत्वमा गठन भएको समितिमा विज्ञहरु आनन्दमानसिंह शाक्य, रामकृष्ण पछाइँ, तारा पाण्डे, घनश्याम पाठक तथा प्रेमबहादुर बस्नेत रहेका छन् । उक्त समितिले तीन महीना भित्रमा सबै काम सक्नुका साथै सीपयुक्त र दक्षशक्तिको जगबाट नै बुटवलको समृद्धि हुने सबैको ठहर रहेकोले शैक्षिक सङ्गोष्ठी प्रभावकारी हुने बुटवलका प्रमुख प्रशासकीय अधिकृत राजेन्द्र सिग्देल बताएका छन्। बुटवल उपमहानगरपालिकाले नगर शिक्षा योजना बनाउनका लागि कार्यदल गठन गरेको छ । विज्ञ छवि नेपालको संयोजकत्वमा गठन भएको समितिमा डबल विसी, कृष्ण मल्ल, हेमबहादुर क्षेत्री, कुलराज शर्मा र गोविन्द ज्ञवाली रहेका शिक्षा महाशाखा प्रमुख पन्थीले बताएका छन् । सामुदायिक र संस्थागत दुबै विद्यालयलाई यो समितिमा समेटिएको छ । बुटवल उपमहानगरपालिकाले स्थानीय पाठ्यक्रम निर्माणसम्बन्धी कार्यदल बनेको छ । उक्त समितिमा बुद्धिसागर भट्टराई, राजेन्द्रकुमार आचार्य, टीकाराम न्यौपाने, धनीश्वर गौतम, रुद्रलाल उपाध्याय र मोति राज पौडेल रहेका छन् । बुटवल उपमहानगरपालिकाले नगरपालिका भरमा रहेका संस्थागत र सामुदायिक विद्यालयमा एउटै पोशाक बनाउने तयरी गरेको छ । शैक्षिकस्तरको न्यूनतम मापदण्डसमेत तोकेर सबै विद्यालयमा शिक्षक र विद्यार्थीको पोशाक एकै खालको बनाउने गरी तयारी गरिएको प्रमुख सुवेदीले बताएका छन् । रासस
