समायोजनले कुनैपनि कर्मचारीको वृत्ति विकास रोकिँदैन: मन्त्री पण्डित
काठमाडौँ । सरकारले कुनैपनि राष्ट्र सेवकको वृत्ति विकासलाई नरोक्ने गरी कर्मचारी समायोजन अध्यादेश विधेयक, २०७५ ल्याएको स्पष्ट पारेको छ । राष्ट्रियसभाको आजको बैठकमा सङ्घीय मामिला तथा सामान्य प्रशासनमन्त्री लालबाबु पण्डितले सबै कर्मचारीलाई सहजरूपमा सेवा सुविधा तथा वृत्ति विकासका लागि मन्त्रालयले विशेष ध्यान दिएको बताए । आधिकारिक टे«ड युनियनसँग पनि समायोजनका बारेमा छलफल भएको र उहाँहरूले पनि सहमति जनाएको जानकारी दिँदै मन्त्री पण्डितले अध्यादेशको प्रतिस्थापन विधेयक प्रस्तुत हुँदासम्म सबै समस्या समाधान हुने विश्वास व्यक्त गरे । नागरिकलाई स्थानीय तहमा नै सहजरूपमा सेवा सुविधा उपलब्ध गराउने लक्ष्यका साथ कर्मचारी व्यवस्थापन गर्न लागेको भन्दै अवसर र जिम्मेवारीको समेत बाँडफाँट गरेर काम गर्ने संस्कार बसाल्न लागिएको बताए । सङ्घीय सरकारको मूल्य र मान्यतालाई प्रभावकारी कार्यान्वयन गर्न उक्त अध्यादेश ल्याइएको मन्त्री पण्डितको भनाइ थियो । मन्त्री पण्डितले प्रदेश र स्थानीय तहसँग जोडिएका अन्य कानूनसमेत छिट्टै सदनमा प्रस्तुत गर्ने जानकारी दिए । सङ्घीयता कार्यान्वयनका सम्बन्धमा जोडिएका सबै नियम तथा कानून निर्माणमा सरकारले ध्यान दिएकोसमेत उनको भनाइ थियो । राष्ट्रियसभाको आजको बैठकले ‘कर्मचारी समायोजन अध्यादेश, २०७५’ लाई स्वीकृत गरियोस् भन्ने प्रस्तावलाई स्वीकृत गरेको छ ।
शुरु भयो शिखर सुज एकल प्रदर्शनी, कम्तीमा १५ प्रतिशत छुट
काठमाडौँ । भृकुटी मण्डपमा आजदेखि शिखर सुज एकल प्रदर्शनी शुरु भएको छ । प्रदेश नम्बर ३ का आर्थिक मामिला मन्त्री कैलाश ढुंगेलले एक समारोहका बीच प्रदर्शनीको उद्घाटन गरे । सो अवसरमा मन्त्री ढुंगेलले स्वदेशी उद्योगको प्रबद्र्धनमा प्रदेश सरकार सक्दो सहयोग गर्न तयार रहेको बताए । २० दिनसम्म सञ्चालन हुने प्रदर्शनीमा जुत्ता खरिद गर्दा कम्तीमा १५ प्रतिशत छुट हुने कम्पनीले जनाएको छ । शिखर सुजका प्रबन्ध निर्देशक रामकृष्ण प्रसाईँले नेपाली ग्राहकहरुका लागि आकर्षक र सस्तो जुत्ता उत्पादन गर्दै आएको र आगामी दिनमा नेपालीहरुको भावना र चाहनालाई बुझेर आफ्ना उत्पादन ग्राहक समक्ष ल्याउने बताए ।
बाँकेको नरैनापुर ‘ल्याप्चे मुक्त’ गाउँपालिका निर्माण अभियानको शुरुवात
काठमाडौं । बाँके जिल्लाको नरैनापुर गाउँपालिकालाई ‘ल्याप्चे मुक्त’ गाउँपालिकाका निर्माण गर्ने अभियान अगाडी सरेको छ । गाउँपालिका अध्यक्ष इस्तियाक अहमद साहले, गाउँपालिकाका बनाउने अभियान शुरु गरेको जानकारी दिँदै १२ हजार बढी नागरिक निरक्षर रहेको बताएका छन् । गाउँपालिकामा निरक्षरको तथ्याङ्क सङ्कलन गरेर साक्षर बनाउँनुको साथै ‘ल्याप्चे मुक्त’ क्षेत्र बनाउने अभियान रहेको गाउँपालिका अध्यक्षले जानकारी दिएका छन् । ल्याप्चेका कारण सामाजिक सुरक्षाभत्ता वितरणमा समेत समस्या भइरहेको हुँदा तथ्याङ्क सङ्कलन गरेर पहिलो चरणमा तीन हजारलाई साक्षर बनाइने भएको छ । अध्यक्ष साहका अनुसार पहिलो चरणमा साक्षर गराएकाले बाँकी रहेका निरक्षरलार्ई साक्षर बनाउन परिचालन गर्ने गरी अभियान सञ्चालन गर्ने तयारी गरेका छन् । चैतभित्र तीन हजार निरक्षरलाई साक्षर बनाउने लक्ष्य अनुसार गाउँपालिकाका छवटै वडामा खटिने १०० सहजकर्तालाई रु १४ लाख मूल्य बराबरको शैक्षिक सामग्री हस्तान्तरण गरिएको छ । नरैनापुरसँगै नेपालगञ्ज उपमहानगरका विभिन्न वडा र बाँकेमा गरी अझै ८० हजारको हाराहारीमा नागरिक निरक्षर रहेको तथ्याङ्कले जनाएको छ । उक्त गाउँपालिकालाई साक्षर बनाउन अभियान सुचारु गरेको बताएका छन ।रासस
रेमिटर्स एसोसिएसनको अध्यक्षमा सुमन पोखरेल निर्वाचित, यस्तो छ नयाँ नेतृत्व
काठमाडौं । नेपाल रेमिटर्स एसोसिएसनको अध्यक्षमा सुमन पोखरेल निर्वाचित भएका छन् । विहीबार राजधानी काठमाडौंमा सम्पन्न १३ औं साधारण सभाले पोखरेललाई निर्विरोध निर्वाचित गरेको हो । पोखरेल आईएमई लिमिटेडका प्रमुख कार्यकारी अधिकृत हुन् । साधारण सभाले सिटी एक्सप्रेस मनी ट्रान्सफर प्रा.लिका चन्द्र टण्डनलाई उपाध्यक्ष, नेपाल रेमिट इ. प्रा.लिका रितेश मित्तल महासचिवमा निर्वाचित गरेको छ । सुर्य रेमिटका संजय सिग्देल कोषाध्यक्ष, आइपे रेमिटका इन्द्र शर्मा सचिव चुनिएका छन् । कार्यसमिति सदस्यहरुमा युमा श्रेष्ठ (हिमालयन बैंक), प्रविन अधिकारी (युनाइटेड रेमिट), दीपेन्द्र खनाल (इजीलिकं) चुनिएका छन् । विधानअनुसार निवर्तमान अध्यक्ष दिवाकर थापा कार्यसमितिमा रहनेछन् । कार्यसमितिको अध्यक्षमा चयन भएपछि संक्षिप्त प्रतिक्रिया दिँदै नवनिर्वाचित अध्यक्ष पोखरेलले रेमिटेन्स क्षेत्रका समस्या समाधानमा आफ्नो नेतृत्व निरन्तर क्रियाशील रहने प्रतिवद्धता व्यक्त गरेका छन् ।सबै रेमिटेन्स कम्पनीहरू संगठित भइ आफ्ना समस्याहरू सम्बन्धित निकायसम्म पुर्याउने उद्देश्यले २०६० सालमा नेपाल रेमिटर्स एसोसिएसनको स्थापना गरिएको थियो ।
प्राधिकरणको नाफा ७ अर्बभन्दा बढी, चालु आवमा ३८ अर्ब ११ करोड बजेट विनियोजन
काठमाडौं । नेपाल नागरिक उड्डयन प्राधिकरण (क्यान) ले पछिल्ला वर्षमा निरन्तर नाफा आर्जन गर्न सफल भएको छ । प्राधिकरणले स्थापनापछि पहिलोपटक आव २०६८/६९ मा नाफा आर्जन गरेको थियो । पछिल्ला वर्षमा पनि निरन्तररूपमा आर्जन गर्दै सात अर्बभन्दा बढी नाफा पुर्याएको छ । प्राधिकरणको २०औँ वार्षिकोत्सवका अवसरमा हालै सार्वजनिक गरिएको प्रतिवेदनअनुसार आव २०७३/७४ सम्मको कूल सञ्चित नाफा सरकारलाई बुझाउने लाभांशबापतको रकम कट्टा गरेपछि ७ अर्ब ३७ करोड ५६ रुपैयाँ लाख पुगेको छ । सो नाफाको आधारमा महालेखा परीक्षकबाट प्रमाणित आव २०७२/७३ सम्मको वित्तीय विवरणबमोजिम सरकारको शेयर लगानीको लाभांशबापत छुट्याइएको रकम एक अर्ब ६३ करोड ५६ लाख रुपैयाँ भुक्तानी गरिएको प्राधिकरणले जनाएको छ । प्राधिकरणले आव २०७४/७५ मा छ अर्ब २३ करोड ५९ लाख रुपैयाँ आम्दानी गरेको छ । उक्त आवका लागि प्राधिकरणको आय विमानस्थल विकास शुल्कबाहेक पाँच अर्ब ४९ करोड ४३ लाख रुपैयाँ प्रक्षेपण गरेकोमा ७४ करोड १६ लाख रुपैयाँ वृद्धि भई छ अर्बभन्दा बढी आम्दानी गर्न सफल भएको हो । चालू आव २०७५/७६ मा प्राधिकरणले ३८ अर्ब ११ करोड ६९ लाख रुपैयाँ बजेट विनियोजन गरेको छ । उक्त बजेटमध्ये पूँजीगत खर्चतर्फ ३४ अर्ब २५ करोड चार लाख रुपैयाँ तथा कार्य सञ्चालनतर्फ तीन अर्ब ८६ करोड ६५ लाख रुपैयाँ निर्धारण गरिएको छ । आव २०७४/७५ मा क्यानले पूँजीगत खर्चतर्फ ३२ अर्ब ६५ करोड १४ लाख रुपैयाँ र कार्य सञ्चालनतर्फ तीन अर्ब ५३ करोड १५ लाख रुपैयाँ गरी जम्मा ३६ अर्ब १८ करोड २८ लाख रुपैयाँ व्यय अनुमान गरिएकोमा पूँजीगत खर्च १७ अर्ब तीन करोड ९४ लाख र कार्य सञ्चालन खर्च दुई अर्ब २२ करोड ८० लाख रुपैयाँ गरी जम्मा १९ अर्ब २६ करोड ७५ लाख रुपैयाँ खर्च भएको क्यानले जनाएको छ । चालू आव २०७५/७६ को स्रोततर्फ आम्दानी पाँच अर्ब ९६ करोड ९३ लाख रुपैयाँ, विमानस्थल विकास शुल्क दुई अर्ब ६४ करोड ५० लाख रुपैयाँ एवं ऋण, शेयर तथा अनुदानबाट २० अर्ब ८५ करोड रुपैयाँ गरी जम्मा २९ अर्ब ४६ करोड ४३ लाख रुपैयाँ हुने अनुमान गरिएको क्यानले जनाएको छ । प्राधिकरणले मूल्य अभिवृद्धि कर, साँवा ब्याज भुक्तानी र लाभांशबापतको रकम गरी जम्मा तीन अर्ब २४ करोड ८९ लाख रुपैयाँ सरकारलाई भुक्तानी गरी राजश्वमा उल्लेखनीय योगदान गरेको जनाएको छ । रासस
एनआईसी एशिया बैंकको नयाँ शाखा झापाको फाल्गुनन्दचोकमा
काठमाडौं । एनआईसी एशिया बैंकको नयाँ शाखा झापाको फाल्गुनन्दचोकमा उद्घाटन गरेको छ । एनआईसी एशिया बैंकले सञ्चालनमा ल्याएको दमक फाल्गुनन्दचोक वडा नं १, झापा स्थित फाल्गुनन्दचोक शाखाको एनआई सी एशिया बैंकका संचालक राजेन्द्रप्रसाद अर्यालले उद्घाटन गरेका हुन् । उदघाटन समारोहमा अर्यालले दुर्गम तथा ग्रामीण भेगमा समेत आफ्नो उपस्थिती सबल बनाउदै गएको यस बैंकले नेपाल सरकार तथा नेपाल राष्ट्र बैंकको वित्तिय सवलिकरण अभिवृद्वि गर्ने कार्यमा महत्वपुर्ण योगदान पुराउने जानकारी दिएका छन् । मुलुकभर २७० शाखा कार्यालयहरु, २८९ एटिएम, ३७ वटा एक्सटेन्सन काउण्टर एवं २२ वटा शाखा रहित बैंकिङ्ग ईकाई मार्फत बैंकिङ्ग सेवा प्रदान गर्ने मुलुककै सबैभन्दा ठूलो शाखा सञ्जाल भएको बैंक हुन सफल भएको छ । बैंकको वासलातको आकार रू. २१३ अर्ब भन्दा बढि पुगेको छ भने कुलनिक्षेप करिब रू. १६९ अर्ब तथा कर्जा रू. १४६ अर्ब पुगि निजी क्षेत्रबाट स्थापित बैंकहरु मध्ये नेपालको सबैभन्दा ठूलो बैंकको रुपमा आफ्नो पहिचान बनाउन सफल भइसकेको छ । हालसम्म यस बैंकमा ग्राहकको संख्या करिब १४लाख रहेको छ ।
लेखा समितिमा उपसमितिको प्रतिवेदनबारे जुहारी, उपसमिति माथि खनिए समितिका सांसद
काठमाडौँ । प्रतिनिधि सभा अन्तरगतको लेखा समितिको बैठकमा वाइड बडी प्रकरणमा उपसमितिले दिएको प्रतिवेदनमा माथि जुहारी चलेको छ । उपसमिति माथि समितिका सांसद खनिएका छन् । शुक्रबारको बैठकमा सांसद विशाल भट्टराईले प्रतिवेदनले केही अन्याय गरेको बताए । एउटा मात्र वैठकमा बसेको सचिव प्रेम राईलाई एउटै समूहमा राख्नु कत्तिको न्यायिक हो ? उनले प्रश्न गरे । त्यसैगरी, अर्का सांसद पूर्णकुमारी कर्णले राष्ट्रिय ढुकुटीबाट जुन जहाज किनिएको थियो । त्यो राम्रो हो । तर, खरिद प्रकरणमा अनियमितता देखियो । उपसमितिको प्रतिवेदनमा केही कुरा थप गर्न पाएको भए राम्रो हुने बताइन । सांसद सूर्य पाठकले भने– जहाज खरिद प्रकरणमा गडबड भएको हाम्रो निष्कर्ष छ । उपसमितिको प्रतिवेदनमा हामी सदस्यभन्दा पहिलै मिडियामा जानकारी भयो । यो कसरी भयो ? यसले प्राकृतिक न्याय, निष्पक्षता र तथ्य छ कि छैन ? अनि प्रेम राई र सुगतरत्नलाई एउटै घानमा हाल्ने ? यो हुन सक्दैन भने । सांसद यज्ञबहादुर बोहराले उपसमितिको प्रतिवेदन अघिल्लो दिन सार्वजनिक हुनु गैर जिम्मेवारी भएको बताए । सांसद पार्वती बिसंखीले खरिद प्रक्रियाको प्रपञ्च गर्नेलाई कम र अन्तिम किस्ता दिएर जहाज बुझ्नेलाई बढी दोषी किन देखाईयो ? भनी प्रश्न गरिन् । सांसद लेखराज भट्टले प्रतिवेदनमा केही कमजोरी रहेको बताए । तिनलाई थप अध्ययन कसरी गर्ने भन्नेतिर जानुपर्छ । उपसमितिले प्रतिवेदन बनाएपछि पिएमले समिति बनाएको हो कि जस्तो लाग्न सक्छ । तर, अवस्था यस्तो होइन–सांसद भट्टले भने । सांसद तेजुलाल चौधरीले प्रतिवेदन तयार पार्ने सदस्यहरुलाई धन्यवाद दिनैपर्छ भने । प्रतिवेदनमा केही कमजोरी होलान् । तर यो प्रकरणमा व्यापक भ्रष्टाचार भएको छ । जो जति उफ्रे पनि यो त भएकै छ । महालेखाको प्रतिवेदनले प्रक्रिया गल्ति छ भन्दाभन्दै पैसा दिनुको अर्थ के हो ? सांसद मिनेन्द्र रिजालले उपसमितिलाई हामीले अख्तियार दुरुपयोग अनुसन्धान आयोग ठानेका होइनौं । मिडियामा खबर आयो भन्दैमा अनियमिता नभएको भन्न मिल्दैन होला । अनियमितता त कति भयो कति ? त्यसैले यहाँ राजनीतिक सम्बद्धताकै भरमा कसैको पक्षपोषण नगरौँ । सांसद अमनलाल मोदीले उपसमितिले दिएको प्रतिवेदनमा केही राम्रा पक्ष छन् । सँगै हामीले यहाँ कुनै विभेद देख्दैनांै । हामीले जुन समितिमा प्रतिवेदन पेश गर्छाै तर ती हुबहु पास हुनपर्छ भन्ने पनि हुँदैन । यसबाट हामी कोही तरंगित हुन हुँदैन । खरिद प्रक्रिया नै गलत भनेपछि त्यसमा जोडिएका सबै उत्तिकै जिम्मेवार हुन जान्छन् । उपसमिति सदस्य प्रदीप यादवले भ्रष्टाचारको महानायक सुगतरत्न कंसाकारले जता घुमायो, उतै घुम्नेपनि मन्त्री हुन्छ ? भने । समितिको बैठकमा उपसमितिले नबोलाएका आरोपितलाई समितिले बोलाएर छलफल गर्नु पर्ने कुरापनि उठेको थियो । बैठकमा सांसदहरुले प्रतिवेदन माथि प्रश्न उठाउने अवस्था आउनु नहुने र आधारभूत कुरा फेरबदल गर्नु नहुने कुरा उठेको थियो । बैठकमा सहमति जुट्न नसकेपछि समिति सभापति भरत शाहले अनौपचारिक परामर्श गर्ने गरी सोमबार ११ बजेसम्मका लागि बैठक स्थगित गरेका छन् । वाइड बडीमा ४ अर्ब ३५ करोड अनियमितता, पर्यटनमन्त्रीलाई कारवाही गर्न शिफारिस वाइड बडीमा यसरी भयो अनियमितता (प्रतिवेदन सहित)
मुक्तिनाथ विकास बैंकद्धारा विभिन्न ४ स्थान सहयोग प्रदान
काठमाडाैं । मुक्तिनाथ विकास बैंकले १३ औं वार्षिक उत्सवको अवसरमा ललितपुरको कुपण्डोल शाखाले ललितपुर बजार तथा टोलमा डस्टबीन वितरण गरेकाे छ । यस्तै मोरङ्गको उर्लाबारी शाखाले नमुना बालगृहलाई सरसफाईको सामाग्री वितरण गरेकाे हाे । नवलपरासीको दलदले शाखाले कालिका मा.वि. लाई खेलकुद सामाग्री वितरण तथा केन्द्रिय कार्यालय काठमाण्डौंले कार्यालय परिसरमा वृहत रक्तदान कार्यक्रम गरेर मनाएको छ । बैंकले साप्ताहिक वार्षिक उत्सव विशेष कार्यक्रम हप्ताभरी नै सञ्चालन गर्दै आइरहेको छ र यो कार्यक्रम मिति २०७५ पौष २२ गते सम्म जारी रहने जानकारी दिएको छ ।
