सत्तारुढ दलकै सांसदको प्रस्ताव : अब मध्यावधि चुनावमा जानुपर्छ
काठमाडौं । सरकार गठन भएका एक वर्ष नपुग्दै सत्तारुढ दलकै सांसदका तर्फबाट मध्यावधि चुनाव गर्ने प्रस्ताव आएको छ । सत्तारुढ संघीय समाजवादी फोरम नेपालकी सांसद सरिता गिरीले संघीय संसदको प्रतिनिधिसभामा शुक्रबारको बैठकमा भएका गतिविधिले संसदको नियमावलीको ‘ब्रेकडाउन’ भएको भन्दै अब मध्यावधि चुनावमा जानुपर्ने आवश्यकता देखिएको बताएकी हुन् । रिपोर्टर्स क्लबको मंगलबारको कार्यक्रममा उनले संसदको गतिविधिले सरकारले संसदलाई आफ्नो नियन्त्रणमा राखेको पुष्टि भएको समेत बताइन् । कार्यक्रममा राष्ट्रिय जनता पार्टीका सांसद लक्ष्मणलाल कर्णले अहिलेको संसदको अवरोध जनताको बहुदलीय जनवादलाई अबलम्बन गर्ने दलबाट भएको भन्दै यो सिद्धान्तले राज्यशक्ति आफ्नो हातमा आएपछि दमनमा उत्रनुपर्ने वतालत गर्ने बताए । नेपाली काँग्रेसकी सचेतक पुष्पा भुषालले संसद प्रतिपक्षी दलको हुने भन्दै आफुहरुलाई बोल्न नदिएर सभामुखले असल कार्यकर्ताको भूमिका निर्वाह गरेको आरोप लगाइन् । अन्तिममा बोलेका नेकपाका राष्ट्रि सभाका सचेतक खिमलाल भण्डारीले संसदमा प्रधानमन्त्रीको संबोधनपछि प्रश्न सोध्नैपर्छ भन्ने केही नभएको भन्दै यो सबै कार्यव्यवस्था समितिले निर्धारण गर्र्ने बताए ।
विश्व बैंकका अध्यक्ष जिमले गरे राजीनामाको घोषणा
काठमाडौँ । विश्व बैंकका अध्यक्ष जिम योङ्ग किमले राजीनामा दिने घोषणा गरेका छन् । ६ वर्षदेखि विश्व बैंकको अध्यक्ष रहेका जिमले आउँदो फेब्रुअरी १ देखि लागु हुने गरी राजीनामाको घोषणा गरेका हुन् । ५९ वर्षका जिम सन् २०२२ सम्म विश्व बैंकको अध्यक्ष रहनु पर्ने थियो, तर उनले राजीनामाको घोषणा गरेका हुन् । उनी सन् २०१७ मा दोस्रो कार्यकालका लागि निर्वाचित भएका थिए । जिम विकासोन्मुख देशमा पूर्वाधार विकासका लागि आवश्यक पर्ने लगानी बढाउने काममा सक्रिय हुने विश्व बैंकले बताएको छ । जिमले आफ्नो वक्तव्यमा विश्व बैंक जस्तो महत्वपूर्ण संस्थाको अध्यक्षका रुपमा काम गर्न पाउनु ठूलो सम्मानको कुरा रहेको उल्लेख गरे । जिमले अप्रत्यासित राजीनामाको कारण खुलाएका छैनन् । विश्व बैंककी प्रमुख कार्यकारी अधिकृत क्रिस्टालिना जोर्जिएभाले जिमको ठाउँ लिने सम्भावना छ ।(एजेन्सीहरुबाट)
एशियन लाईफले ल्यायो नयाँ बीमा योजना, एउटै बीमालेखबाट श्रीमान/श्रीमती दुबैको सुरक्षा
काठमाडौं । एशियन लाईफ इन्स्योरेन्स कम्पनीले समय सापेक्ष नविनतम “दम्पती सुरक्षा प्लस (संयुक्त सावधिक)” जीवन बीमा योजना बजारमा ल्याएको छ । इन्स्योरेन्सले पारिवारिक खुशीका पलहरुमा आर्थिक सुरक्षाको अनुभूती प्रदान गर्न उक्त योजना प्रचलनमा ल्याएको हो । यस योजना अन्तर्गत एउटै बीमालेखबाट श्रीमान/श्रीमती दुबै जनाको बीमाङ्कको साढे दुई गुणासम्म छुट्टाछुट्टै जोखिम बहन हुने कम्पनीले जनाएको छ । त्यस्तै, ५० हजार रुपैयाँदेखि माथि जतिसुकै रकमको बीमा गर्न सकिने र ठूलो बीमाङ्कको बीमाशुल्क रकममा छुट पाइने छ । यस योजनाको विभिन्न विशेषताहरु जस्तै, दुर्घटना मृत्यु लाभ, स्थायी अपाङ्ग/अशक्त सुविधा एवं बीमा शुल्क छुट तथा मासिक, त्रैमासिक, अद्र्धवार्षिक तथा वार्षिक रुपमा बीमा शुल्क भुक्तानीको सुविधा रहेको छ । यस बीमा योजना अन्तर्गत बीमा अवधि समाप्त हुने मितिसम्म दुबै बीमित जीवित रहेमा पूरै बीमाङ्क रकम र आर्जित बोनस पाइने छ । बीमा अवधि भित्र दुईमध्ये एक बीमितको मृत्यु भएमा बीमाङ्कको १०० देखि २५० प्रतिशत रकम र आर्जित बोनस पाइने छ । त्यस्तै, बीमा अवधिभित्र अर्को बीमितको पनि मृत्यु भएमा बीमाङ्कको १०० देखि २५० प्रतिशत रकम र बीमा अवधि समाप्त हुने मितिसम्म दुईमध्ये एक बीमित मात्र जीवित रहेमा पूरै बीमाङ्क रकम पाइने इन्स्योरेन्सले जनाएको छ ।
सतर्कता केन्द्रलाई निर्देशन-‘कुन कुन गौरवका आयोजनामा गडबड छ सूचि पठाउनू’
काठमाडौँ । प्रतिनिधि सभा अन्तरगत विकास तथा प्रविधि समितिले राष्ट्रिय गौरबका आयोजनाहरुको गुणस्तर परीक्षण प्रतिवेदन यथाशीघ्र समितिलाई उपलब्ध गराउन राष्ट्रिय सतर्कता केन्द्रलाई निर्देशन दिएको छ । समितिको मंगलबारको बैठकमा राष्ट्रिय आयोजनाहरुको विद्यमान अवस्था र अनुगमनका सम्बन्धमा राष्ट्रिय सतर्कता केन्द्रका प्रमुख अतिकृतसँग छलफल गरी यस्तो निर्देशन दिइएको हो । समितिले चालु आर्थिक वर्षमा के कति विकास आयोजनाहरुको प्राविधिक परीक्षण गरियो ? त्यसको विवरण समितिलाई उपलब्ध गराउन र के कस्तो कारवाहीका लागि सिफारिस गरियो सो को वितरण समेत समितिलाई उपलब्ध गराउन केन्द्रलाई निर्देश गरिन्छ–समितिको निर्देशनमा उल्लेख छ । साथै समितिले राष्ट्रिय गौरब र अन्य विकासका आयोजनाहरुको आरम्भदेखि अन्त्यसम्म विभिन्न चरणमा प्राविधिक परीक्षण गरी निर्माण सामाग्रीहरुको समेत गुणस्तर परीक्षणको व्यवस्था मिलाउन निर्देशन दिइएको छ ।
क्यान इन्फोटेक २०१९ माघ १५ देखि २० गतेसम्म हुने
काठमाडौँ । कम्प्युटर एशोसियशन नेपाल महासंघ(क्यान महासंघ) को आयोजनामा माघ १५ देखि २० गतेसम्म क्यान इन्फोटेक २०१९ हुने भएको छ । क्यान महासंघले आज पत्रकार सम्मेलन मार्फत क्यान इन्फोटेक आयोजना सम्बन्धी जानकारी गराएको हो । काठमाडौँको भृकुटी मण्डपमा माघ १५ देखि २० गतेसम्म ६ दिन हुने मेलालाई सुबिसु क्यान इन्फोटेक २०१९ इन एसोशियशन विथ इ–सेवा नाम दिइएको छ । नयाँ नयाँ प्रबिधिको अवलोकनसँगै जागिरको अवसरपनि भन्ने नाराका साथ आयोजित मेलामा सूचना तथा सञ्चार प्रविधि र उपकरणको अवलोकन तथा खरिद गर्न सकिने छ । यस पटकको इन्फोटेकमा शिक्षा, स्वास्थ्य, कृषि र पर्यटनको क्षेत्रमा प्रयोग भएका नयाँ प्रबिधि समेत समावेश गर्ने प्रयास गरिएको आयोजकले बताए । मेलामा प्रत्येक ३–३ घण्टामा चिठ्ठा मार्फत अवलोकनकर्तालाई गिफ्ट ह्याम्पर प्रदान गरिने छ । साथै प्रत्येक दिन १ जनालाई बम्पर पुरस्कारको पनि व्यवस्था गरिने बताइएको छ । नेपालीले निर्माण गरेको दैनिक जीवनमा प्रयोग हुने रोबोट पनि प्रदर्शन गरिने छ । सूचना प्रबिधिको क्षेत्रमा करियर बनाउन प्राबिधिक विषय अध्ययनरत विधार्थीले मेला स्थलमै बायोडाटा बुझाउन सक्नेछन् । क्यान महासंघले ती बायोडाटालाई आइटी कम्पनीहरुमा पठाइदिने र रोजगारीका लागि आवश्यक सहजीकरण गर्ने पत्रकार सम्मेलनमा जानकारी दिइयो । कूल १७५ वटा स्टल रहने छन् । मेला अवलोकनका लागि सर्वसाधारणलाई प्रवेश शुल्क १०० रुपैयाँ र बिधार्थीका लागि ५० रुपैयाँ तोकिएको छ । साथै अनलाइन टिकट खरिदमा १० प्रतिशत छुट हुने क्यान महासंघका महासचिव रञ्जीतकुमार पोदारले बताए ।
अपि पावरको ५ प्रतिशत बोनस पारित, चुक्ता पुँजीले १ अर्ब १९ करोड नाघ्याे
काठमाडौं । अपि पावर कम्पनी लिमिटेडले सेयरधनीलाई गत वर्षको नाफाबाट ५ प्रतिशत बोनस सेयर दिने भएको छ । कम्पनीको मंगलबार सम्पन्न १५औं वार्षिक साधारणसभाले संचालक समितिको उक्त प्रस्तावलाई पारित गरेको हो । सोही अनुसार कम्पनीले आ.व २०७४/०७५ को मुनाफाबाट सेयरधनीहरुलाई ५ प्रतिशत बोनस शेयर (कर बाहेक) दिने भएको छ । बोनस सेयर वितरण पछि कम्पनीको चुक्ता पुँजी १ अर्ब १९ करोड रुपैयाँ पुगेको कम्पनीले जनाएको छ । कम्पनीले निर्माण सम्पन्न गरेको ८.५ मे.वा. क्षमताको नौगडगाढ जलविद्युत आयोजना विगत ३ वर्ष देखी नाफामा संचालन भईरहेको छ । साथै, कम्पनीले प्रबद्र्धन तथा विकाश गरेको माथिल्लो चमेलिया जलविद्युत आयोजनाको विद्युत खरिद बिक्री सम्झौताको मस्यौदामा हस्ताक्षर गरेको पनि कम्पनीले जनाएको छ । कम्पनीले विकास गरेको १८ मे.वा. आयोजनामध्ये १४ मे.वा. क्षमताका ४ वटा सोलार आयोजनाहरुको विद्युत खरिद विक्री सम्झौता सम्पन्न गरिसकेको छ र सोलार आयोजना निर्माणको लागी भारतको जेनेरल इलेक्ट्रिक कम्पनीसँग सोलार प्यानलहरु, इनभर्टर तथा अन्य आवश्य सामानहरु खरिद गर्ने सम्झौता पनि सम्पन्न भइसकेको कम्पनीले जनाएको छ । कम्पनीले १ः२ बराबरको हकप्रद सेयर जारी गरी शोलार आयोजनाहरु, माथिल्लो चमेलिया जलविद्युत आयोजना तथा सिद्धकाली पावरले निर्माण गर्ने त्रिशुली गल्छी जलविद्युत आयोजनामा लगानी गर्ने जनाएको छ । साधारणसभाले नियमन निकाय नेपाल धितोपत्र बोर्ड (सेवोन) सँग १ः२ को अनुपातमा हकप्रद सेयर निश्कासनको अनुमति छिटोभन्दा छिटो दिन आग्रह गरेको छ ।
प्रदेश नं ७ को धनगढीमा सिटिजन्स बैंकको प्रादेशिक कार्यालय
काठमाडौं । सिटिजन्स बैंकले प्रदेश नं ७ को प्रादेशिक कार्यालय धनगढीमा स्थापना गरेको छ । प्रदेश नं ७ अन्तर्गत बैंकका ५ वटा शाखाहरु (बझांग, अछामको ढकारी, धनगढी, महेन्द्रनगर तथा कैलालीको मोहन्याल)बाट व्यापार विस्तारका एवंम शाखाहरुसँगको समन्वय, निगरानी, संस्थागत सुशासन, जोखिम व्यवस्थापन गुनासो सुनुवाई जस्ता कार्यहरू प्रादेशिक कार्यालयलकाे काम सम्पादन गर्ने बैंकले जनाएको छ । प्रदेश नं ७ मा रहेका ९ जिल्लामध्ये ४ वटा जिल्लामा बैंकको पहुँच रहेको छ । यस प्रदेशमा बैंकले करिव २० हजार ग्राहकवर्गलाई बैंकिङ्ग सेवा प्रदान गर्दै आएको छ । बैंकले प्रादेशिक कार्यालयहरु : प्रदेश नं १ को विराटनगरमा, प्रदेश नं २ को वीरगञ्जको आदर्शनगरमा, प्रदेश नं ४ को पोखराको सिमलचौरमा, प्रदेश नं ५ को नेपालगञ्जमा, र प्रदेश नं ६ को सुर्खेतमा स्थापना गरिसकेको छ । देशभरि हालसम्म ८१ वटा शाखा, ७५ वटा एटिएम. र ९९ वटा शाखा रहित बैंकिङ्ग एकाईहरुबाट करिव चार लाख ग्राहकवर्गलाई आधुनिक बैंकिङ्ग सेवाहरु प्रदान गर्दै आएको छ ।,
निसानका पूर्व अध्यक्ष जापान अदालतमा उपस्थित, न्यायाधीश सामु के के भने ?
टोकियो । भ्रष्टाचार आरोपमा थुनामा रहेका निसान कम्पनीका पूर्व अध्यक्ष कार्लोस गोउन पहिलो पटक मङ्गलबार टोकियो अदालतमा उपस्थित भएका छन् । अदालतमा बयानका क्रममा उनले आफू निर्दोष रहेको र कुनै अपराध नगरेको दाबी गरेको अदालतले जनाएको छ । गोउनलाई कम्पनीको गलत वित्तीय रिपोर्टिङको आरोपमा गत नोभेम्बर १९ मा पक्राउ गरिएको थियो । “मेरा विरुद्ध लगाइएका आरोपहरु असत्य हुन्, म निर्दोष छु,” गोउनले न्यायाधीश समक्ष भने । न्यायाधीश समक्ष आफ्नो वक्तव्य पढेर सुनाउँदा उनी दृढ र शान्त देखिएका थिए । “मलाई अन्यायपूर्वक आरोपित गरिएको छ ।” सरकारी वकीलहरुले गोउनमाथि कम्पनीको झुटो वित्तीय प्रतिवेदन तयार गरेको आरोप लगाएका छन् । उनीमाथि खासगरी सन् २०१५ देखियता पाँच वर्षको अवधिमा तलब बापत लिएको करिब चार करोड ४० लाख अमेरिकी डलरलाई कम्पनीको वित्तीय विवरणमा समावेश नगरेको आरोप छ । वकिलहरुले वित्तीय सङ्कटका कारण निसानमा गरेको लगानीमा हुने जोखिमलाई विचार गरेर गोउनले आफूलाई सुरक्षित बनाएको आशंका पनि गरेका छन् । कालो सुट र प्लास्टिक चप्पल लगाएर अदालतमा उपस्थित भएका गोउनले आरोप लगाइएका प्रत्येक बुँदाको जवाफ दिएका थिए । उनले आरोपहरुमाथि प्रतिवाद गर्दै भने, “म निसान बीचमै छाड्न पनि सक्दथें, तर कम्पनी छाड्न चाहिनँ ।” “आँधी आएका बेला जहाजको कप्तानले जहाज छाड्दैन,” उनले अदालतमा भने । विश्वकै अटो उद्योगमा चर्चित व्यक्तित्व कार्लोस गोउन विश्व आर्थिक मञ्चदेखि अरु ठूला एवं विशिष्ट मञ्चहरुमा वक्ताका रुपमा रहने गर्थे । तर तिनै विशिष्ट व्यक्तित्व गोउनलाई अदालतमा उपस्थित गराउँदा जापान प्रहरीले हतकडी लगाएको थियो । अदालतभित्रको इजलासमा भने उनको हतकडी फुकालिएको थियो । गोउन निजी जेट लिएर टोकियोमा ओर्लनासाथ प्रहरीले गिरफ्तार गरेको थियो । कार्लोस गोउन फ्रान्सेली नागरिक हुन् । जापानमा शंकास्पद व्यक्तिहरुलाई प्रमाण नष्ट गर्ने वा तोडमोड गर्ने भन्दै जमानत नदिई थुनामा राख्ने प्रचलन छ । मङ्गलबारको सुनुवाईका क्रममा गोउनका एकजना वकिल गो कोन्डोले गोउन विदेशतर्फ भाग्ने खतरा नरहेको दाबी गरे । “गोउन चिरपरिचित व्यक्ति हुन्, त्यसैले भाग्ने सम्भावना नै छैन । उनले प्रमाण नष्ट गर्ने कुनै जोखिम नै छैन ।” गोउनले अदालत समक्ष आफ्नो कार्यकालमा निसान कम्पनीले गरेका उपलब्धिहरुको व्याख्या गरेका थिए । उनले कम्पनीका उत्पादनलाई चीन, रुस, ब्राजिल र भारतसम्म विस्तार गरेको तथा विद्युतीय कार र स्वचालित ड्राइभिङ जस्ता नवीन प्रविधिको प्रयोगमा ल्याएको बताए । उनले भने, “मलाई निसानमाथि साँच्चिकै प्रेम छ ।” रासस\एपी
