स्वास्थ्य संस्थामा जन्मिएका छोरीको नाममा बैंक खाता !
काठमाडौं । चितवन जिल्लाको इच्छाकामना गाउँपालिकाले स्वास्थ्य संस्थामा जन्मिएका छोरीको नाममा रकमसहितको बैंक खाता खोल्ने भएको छ । गाउँपालिकाले एक जना बालिकाको खातामा पाँच हजार जम्मा गरी अभिभावकलाई समेत कम्तिमा रु पाँच हजार जम्मा गर्नुपर्ने व्यवस्था गरेको छ । भ्रुण हत्या बढ्न थालेपछि सो अभियान शुरु गरिएको गाँउपालिकाले जनाएको छ । अभिभावकको अवस्था कमजोर रहेमा दातासमेत खोजी रकम जम्मा गराउने गाउँपालिकाले जनाएको छ । गाउँपालिका प्रमुख गीता गुरुङकाअनुसार गाउँपालिका भित्रका बच्चा जन्माउने चार वटा केन्द्रमा जन्मिएका छोरीका नाममा खाता खोल्न लागिएको हो । इच्छाकामना–१ को हात्तिवाङ–४ को कुरीनटार, ६ को चण्डीभञ्ज्याङ र ७ को माथिल्लो दाहाखानीमा बर्थिङ सेन्टर रहेको छ । त्यस गाउँपालिकाको चार वटा बर्थिङ सेन्टरमा गत वर्ष जन्मिएका शिशुमध्ये २७ छोरी र १०० छोरा भएपछि आफूले बाल बचत कार्यक्रम शुरु गरेको बताएका छन् । २५ हजार १२ जनसङ्ख्या रहेको उक्त गाउँपालिकामा १३ हजारभन्दा बढी महिला रहेका छन् । सहकारी र ठूला संस्थासँग समेत छोरीको खातामा रकम राखी सहयोग अध्यक्ष गुरुङले आग्रह गरेका छन् । रु १० हजार र त्यो भन्दामाथि निक्षेप राखी उच्च शिक्षा अध्ययनका बेला उपयोग गर्ने योजना बनाइएको छ । हालका लागि गाउँपालिका भित्रका बर्थिङ सेन्टरमा मात्रै जन्मिएका छोरीको नाममा खाता खोलेपछि सो गाउँपालिकाबाट अन्यत्र गएर छोरी जन्मिएमा पनि खाता खोलिदिने योजना रहेको उजनाएका छन् । गाउँपालिकाले चालू आर्थिक वर्षका लागि रु ३० लाख बजेट महिला र बालबालिकाका लागि विनियोजन गरी महिलाको चेतना अभिवृद्धिसँगै सीपमुलक तालिमसमेत दिँदै आएको छ । रासस
हिमालयन हाइड्रो एक्स्पोको तयारी अन्तिम चरणमा, माघ ४ गते उपराष्ट्रपति पुनले उद्घाटन गर्ने
काठमाडौँ । स्वतन्त्र उर्जा उत्पादकहरुको संस्था नेपाल(इप्पान) र एक्स्पो एण्ड इभेण्ट मेनेजमेन्ट सर्भिसेज प्रालिले संयुक्त रुपमा आयोजना गर्न लागेको दोश्रो हिमालयन हाइड्रो एक्स्पो २०१९ को तयारी अन्तिम चरणमा पुगेको छ । एक्स्पोको तयारीबारे जानकारी दिन बिहीबार आयोजित पत्रकार सम्मेलनमा इप्पानका अध्यक्ष शैलेन्द्र गुरागाईँले तयारी अन्तिम चरणमा रहेको बताए । राजधानीको भृकुटी मण्डपमा आगामी माघ ४ गतेदेखि एक्स्पो शुरु हुनेछ । कार्यक्रमको उद्घाटन उपराष्ट्रपति नन्दबहादुर पुनले गर्ने तय भएको पत्रकार सम्मेलनमा बताइयो । एक्स्पोमा सहभागी हुन अहिलेसम्म ८५ भन्दा बढी प्रदर्शकहरुले १०० भन्दा बढी स्टल बुकिङ गरिसकेका छन् । जलविद्युतको क्षेत्रमा महत्वपूर्ण तथा ठूलो मानिएको यो एक्स्पो १ लाख बढीले अवलोकन गर्ने आयोजक संस्थाले अनुमान गरेका छन् । यस एक्स्पोमा चीन, भारत, अष्ट्रिया, कोरिया, स्वीडेन, जर्मनी, बुल्गेरिया र बेलायतका जलबिद्युत क्षेत्रसँग सम्बन्धित कम्पनीहरु एक्स्पोमा सहभागी हुने पत्रकार सम्मेलनमा जानकारी गराइयो । यसैगरी एक्स्पोमा सहभागी भएर जलविद्यत् आयोजनाको अवलोकन गर्न चाहनेहरुलाई हेलिकप्टर मार्फत दोर्दी करिडोर, माथिल्लो मस्र्याङ्दी, सोलु करिडोर लगायत स्थानमा निर्माणाधीन जलविद्युत आयोजनाहरुको स्थलगत अवलोकन गर्ने व्यवस्था मिलाइएको आयोजकले पत्रकार सम्मेलनमा बताए ।
२०७९ सालमा द्रुतमार्गमा गाडी गुड्छन् सरर…,सेनाले काम यसरी गर्दैछ(भिडियो हेर्नुहोस्)
काठमाडौं । राष्ट्रिय गौरवको आयोजना काठमाण्डौ-तराई/मधेस द्रुतमार्गको काम नेपाली सेनाले द्रुतगतिमा गरिरहेको छ । सेनाले पूर्ण शक्ति लगाएर आर्थिक वर्ष २०७८/०७९ मा सरकारलाई हस्तान्तरण गर्ने गरी काम गरिरहेको छ । सडक निर्माणलाई उच्च गति दिनको लागि डीपीआर बिना नै काम गरिरहेको सेनाले बताएको छ । पहिले भएको अध्ययनको आधारमा काम भैरहेको र आगामी माघसम्म डीपीआर बनिसक्ने सेनाका प्रवक्ता गोकुल भण्डारीले बताए । आर्थिक वर्ष २०७४/०७५ मा सेनाले सत प्रतिशत भौतिक र ९५ प्रतिशत वित्तीय प्रगति गरेको छ । गत आर्थिक वर्षमा सेनाले साढे १९ हजार रुख कटान गरेको छ भने लक्ष्य अनुरुप क्याम्प, सडक, जग्गा अधिग्रहण, डीपीआर निर्माणमा सत प्रतिशत नतिजा निकालेको छ । चालू आर्थिक वर्षमा सेनाले ५४ किलोमिटर सडकतर्फ ३३ प्रतिशत प्रगति भैसकेको छ । हाल सडकलाई विभिन्न खण्डमा विभाजन गरी कटिङ, फिलिङ र सब ग्रेड फर्मेशनको काम भैरहेको छ । यस्तै, हाइजवे स्ट्रक्चर, ड्रइविङ डिजाइन निर्माण गरि बिडिङको काम अन्तिम चरणमा पुगेको छ । यस्तो छ आयोजनामा सेनाको भावी लक्ष्य चालू आर्थिक वर्षमा सेनाले बहुवार्षिक ठेक्का प्याकेजहरु र कटिङ र फिलिङको काम सक्ने लक्ष्य राखेको छ । पुल र सुरुङमार्गको काम यसै वर्षमा शुरु हनेछ । सडक निर्माणको क्रममा आवश्यक पूर्वाधारको विकास गरी आगामी माघसम्म डीपीआर निर्माण सम्पन्न हुनेछ । यसैगरी विभिन्न प्रकारको संरचनाहरु कल्भर्ट, ड्रेनेज, क्रस ड्रेनेज, रिईन्फोर्स अर्थ वाल, रिटेनिङ वाल, अण्डरपास लगायत पूर्वाधारको काम हुनेछ । आर्थिक वर्ष ७७ देखि ७९ सम्म हुने काम सडक, पुल, सुरुङ, स्लोप प्रोटेक्शन, इन्टरचार्ज, टोल प्लाजा, हाइवेज सेफ्टी फर्निचर लगायत पूर्वाधारको निर्माण सकेर आर्थिक वर्ष २०७८/०७९ मा सरकारलाई बुझाउने छ । नेपाली सेनाको टोलीले तराई र पहाड जोड्ने फास्ट ट्रयाक निर्माणका लागि धमाधम पहाड फोरिरहेको छ । महाभारत, शिवालिग र चुरे पर्वत फोेरेर सेनाले देश भित्रको दुरी मेट्दैछ । प्रतिकिलोमिटर १२० घण्टाको स्पीडमा यहाँ सवारी साधनहरु गुड्नेछन् । एसियाली मापदण्डको यो सडक देशको समृद्धिमा कोशे ढुंगा सावित हुनेछ । सेनाले १० ठाउँमा क्याम्प खडा गरेर युद्धस्तरमा काम गरिरहेको जनाएको छ । याे पनि पढ्नुहाेस् पहाड फोडेर काठमाडौं र तराईरमधेश जोड्दै फास्ट ट्रयाक, युद्धस्तरमा काम गर्दै नेपाली सेना यस्तो बन्दैछ काठमाडौं निजगढ फास्ट ट्रयाक (भिडियोसहित)
लक्ष्मी बैंकद्वारा ८.५ % बोनश शेयर दिने घोषणा
काठमाडौँ । लक्ष्मी बैंकले आर्थिक वर्ष २०७४/०७५ को नाफाबाट ८.५ प्रतिशत बोनस सेयर दिने भएको छ । बैंकको संचालक समितिको पुस २५ गते बसेको बैठकले चुक्ता पूँजीको ८.५ प्रतिशत बोनस सेयर दिने निर्णय गरेको हो । नेपाल राष्ट्र बैंकबाट स्वीकृति पछि साधारण सभाले पारित गरेपछि बोनश शेयर वितरण हुने बैंकले जनाएको छ ।
मुक्तिनाथ विकास बैंकले ल्यायो नयाँ सेवा, अब घरमै बसेर खाता खोल्न सकिने
काठमाडौं । मुक्तिनाथ विकास बैंकले अब घरमै बसि बसि खाता खोल्न मिल्ने गरी अनलाईन सेवाको शुरुवात गरेको छ । बैंकले सर्वसाधारणहरुलाई सेवा दिने हेतुले घरमै बसेर अनलाईनबाट खाता खोल्न सकिने व्यवस्था ल्याएको हो । देशभित्र तथा बाहिर रहेका समस्त नेपाली नागरिकहरुले यस प्रविधिको माध्यमबाट बैंकमा खाता खोल्न सक्ने छन् । उक्त सेवाबाट ग्राहकहरुले आफ्नो समयानुकुल बैंकको वेवसाईटबाट खाता खोल्न सक्नेछन् । हाल बैंकले १०२ वटा शाखा तथा २० वटा एटिएमबाट करिब छ लाख ग्राहकलाई बैकिङ्ग सेवाहरु प्रदान गर्दै आएको छ ।
८.५ % बोनस शेयर वितरण गर्ने कुमारी बैंकको घोषणा
काठमाडौँ । कुमारी बैंक लिमिटेडले ८.५ प्रतिशत बोनस शेयर वितरण गर्ने घोषणा गरेको छ । पुस २५ गते बसेको सञ्चालक समितिको बैठकले आर्थिक वर्ष २०७४/०७५ को नाफाबाट बोनस शेयर दिने घोषणा गरेको हो । चुत्तापूजी ७ अर्ब १६ करोड ३३ लाख ९४ हजार ९ सय ७३ रुपैयाँकोे ८.५ प्रतिशत अर्थात ६० करोड ८८ लाख ८८ हजार ५ सय ७३ रुपैयाँ बराबरको बोनश शेयर वितरण गर्ने सञ्चालक समितिले प्रस्ताव पारित गरेको हो । नेपाल राष्ट्र बैंकको स्वीकृति पछि साधारण सभाले पारित गरेपछि मात्र बोनश शेयर वितरण हुने कम्पनी सचिव नरेन्द्रप्रसाद छत्कुलीले जनाएका छन् ।
एनआईसी एशिया बैंक र वोल्ड रेमिटबीच रेमिटेन्स सम्झौता
काठमाडौं । एनआईसी एशिया बैंकले वोल्ड रेमिटसँगको सहकार्यमा ५० भन्दा बढी देशबाट इनवार्ड रेमिटेन्सको सुरुवात गरेको छ । बैंकले यस सम्बन्धमा वोल्ड रेमिट, यूकेसँग सम्झौता गरि नेपाल राष्ट्र बैंकबाट स्वीकृति प्राप्त गरेको हो । वोल्ड रेमिटको न्यूनतम शुल्क तथा ठूलो साझेदार विस्तारका कारण नेपालमा आउने वोल्ड रेमिट मार्फतका कारोवार वार्षिक १६०% ले वृद्घि भइरहेको छ । उक्त सम्झौता अनुसार वोल्ड रेमिट मार्फत कतार, साउदी अरबिया, युएई, कुवेत, जापान, क्यानडा, अस्टे«लिया, न्यूजलेन्याण्ड, यूके, यूएस्ए र यूरोप लगायत विभिन्न ५० भन्दा बढी देशमा रहेका छन् । नेपालीहरुले नेपालमा रहेका आफन्तहरु वा अन्य व्यक्तिहरुले तुरुन्त भुक्तानी पाउने गरी पठाएको विप्रेषण रकम यस बैंकका मुलुकभर फैलिएको २७० वटा शाखा कार्यालयहरु तथा ६ हजार ७०० भन्दा बढी सहायक प्रतिनिधिहरु मार्फत सरल र सुलभ रुपमा भुक्तानी पाउन सकिने छ । वोल्ड रेमिटको ग्राहकले एजेन्टका मार्फत विप्रेषण सेवा नलिकन आफै आफ्नो मोवाइल मार्फत परिवार तथा साथीहरुलाई तुरुन्त भुक्तानी पाउने गरी पैसा पठाउन सक्ने व्यवस्था रहेको छ । यो सेवाले ग्राहकको समय तथा पैसाको बचत हुनेछ । वोल्ड रेमिटले ग्राहकहरुलाई आफ्नो परिवार तथा साथीहरुलाई विभिन्न माध्यम जस्तै केस पिकअप तथा व्याक टान्सफरद्वारा पैसा पठाउने सेवा दिइरहेको छ । मुलुकभर २७० शाखा कार्यालयहरु, २८९ एटिएम, ३७ वटा एक्स्टेन्सन काउण्टर एवं २२ वटा शाखारहित बैंकिङ्ग मार्फत बैंकिङ्ग सेवा प्रदान गर्दै आएको छ । बैंकको वासलातको आकार रू. २१५ अर्ब भन्दा बढि पुगेको छ भने कुलनिक्षेप करिब रू. १६९ अर्ब तथा कुलकर्जा करिब रू. १४७ अर्ब रहेको छ । हालसम्म बैंकका ग्राहक संख्या करिब १४ लाख रहेको छ ।
सीटीईभीटीद्धारा भक्तपुर प्राविधिक तालिम केन्द्रले पाएको सम्बन्धन रद्द
काठमाडौं। प्राविधिक शिक्षा तथा व्यावसायिक तालिम परिषद् (सीटीईभीटी) ले भक्तपुर प्राविधिक तालिम केन्द्रलाई दिएको सम्बन्धन/स्वीकृति रद्द गरेको छ । सीटीईभीटीले सम्बन्धन स्वीकृतिमा भएका शर्तहरु उल्लंघन गरेको, तोकिएको शुल्क भन्दा विद्यार्थीहरुबाट बढी रकम असुली गरेको, सीटीईभीटीले पटक-पटक गरेको अनुगमन तथा निरिक्षण पछि कमी कमजोरी सुर्धान आग्रह गरे पनि पालना नगरेको भन्दै स्वीकृति रद्द गरेको हो । सीटीईभीटीले हालै भक्तपुर प्राविधिक तालिम केन्द्रलाई लिखितरुपमा स्पष्ट पार्न पत्राचार समेत गरेको थियो । तर, सीटीईभीटीलाई तालिम केन्द्रले पठाएको लिखित स्पष्टीकरणको जवाफले चित्त नबुझाएपछि सम्बन्धन नै रद्द गरी दिएको हो । अ.न.मी. तालिम कार्यक्रमका लागि सम्बन्धन तथा स्वकृति पाएको भक्तपुरको बालकोटमा रहेको भक्तपुर प्राविधिक तालिम केन्द्रको सम्बन्धन तथा स्वकृति रद्द गर्दै सीटीईभीटीले त्यहाँ अध्ययनरत्त विद्यार्थीहरुको व्यवस्थापनको लागि आउँदो माघ ७ गते सूचना प्रकाशित गरेर जानकारी गराइने जनाएको छ । श्रोत – मेरो स्टडी
