गण्डकी प्रदेशमा पाँच वर्षभित्रै वैदेशिक रोजगारीको बाध्यता अन्त्य हुने : मन्त्री विष्ट
काठमाडौं । श्रम, रोजगार तथा सामाजिक सुरक्षामन्त्री गोकर्ण विष्टले गण्डकी प्रदेशको पोखरामा श्रम तथा रोजगार कार्यालयको शुरुवात गरेका छन् । आगामी दिनमा यस कार्यालयबाट नै वैदेशिक रोजगारमा जाने हुनेलाई श्रम स्वीकृति प्रदान गरिने उद्देश्यका साथ यो कार्यालयको स्थापना भएको हो । मन्त्री विष्टले प्रधानमन्त्री रोजगार कार्यक्रम मार्फत लाखौँ युवालाई रोजगार दिने लक्ष्यका साथ कार्यक्रम ल्याउन ल्याएको बताउँदै अबको पाँच वर्षभित्र वैदेशिक रोजगारमा जानुपर्ने बाध्यताको अन्त्य हुने बताएका छन् । नेपालको जनशक्तिलाई सदुपयोग गर्न सरकार दत्तचित रहेको भन्दै कृषिजन्य उद्योगको विकासका लागि मात्रै लाखौँ जनशक्ति चाहिएकाले विभिन्न क्षेत्रमा रोजगार सिर्जना गर्न सरकार प्रतिबद्ध भएर कार्य गर्ने जानकारी दिएका छन् । सङ्घीय सरकारले वैदेशिक रोजगारमा जानेको सुलभताका लागि सातवटै प्रदेशमा श्रम तथा रोजगार कार्यालय स्थापना गर्न लागेको भन्नुहुँदै ७५३ वटै स्थानीय तहमा रोजगार सेवा केन्द्र स्थापना गर्न लागेको जानकारी गराएका छन् । आर्थिक, सामाजिक र सांस्कृतिक पक्षका साथै शिक्षण, आवास र रोजगारलाई संविधानको मौलिक हकमा राखिएकाले यस विषयमा सरकार सजग रहेको र मुलुकको विकास निर्माणमा जनताको मेहनत आवश्यक रहेको स्पष्ट पारेका छन् । रासस
सबैभन्दा बढी सेयरधनी भएको कम्पनीको सेयर कारोबार आइतबारदेखि खुल्दै
काठमाडौं । नेपालमा रहेका कम्पनीहरुमै सबैभन्दा धेरै शेयरधनी संख्या भएकाे अपर तामाकाेशी हाइड्राेपावर लिमिटेडकाे शेयर नेप्सेमा सूचिकृत भएकाे छ । सूचिकृत भएसँगै ७ लाख भन्दा बढी शेयरधनीमध्ये ३ लाख ३४ हजार शेयरधनीसँग रहेकाे १ कराेड ५८ लाख कित्ता शेयरकाे काराेबार आइतबारदेखि शुरु हुने निश्चित भएकाे छ । कम्पनीको १० करोड ५९ लाख कित्ता आईपीओ नेप्सेमा सूचिकृत भएको छ । कुनै पनि सूचिकृत कम्पनीको सेयर नेप्सेमा सूचिकृत भएको भोलिपल्टदेखि कारोबार शुरु गर्ने व्यवस्था रहेको छ । सोही अनुसार यस कम्पनीको पनि आगामी आइतबार अर्थात पुस २९ गतेदेखि नेप्सेमा सेयर कारोबार हुने छ । अब इच्छुक लगानीकर्ताले उक्त दिनदेखि दोश्रो बजारमा सेयर किनबेच गर्न पाउने छन् । सर्वसाधारणकाे काराेबार खुलेसँगै कर्मचारी सञ्चयकाेषका सञ्चयकर्ताहरुकाे काराेबार पनि शुरु हुने बाटाे खुलेकाे छ । अपर तामाकाेशीमा १ लाख ७६ हजार कर्मचारीकाे शेयर छ जुन जारी भएङ्काे ३ वर्ष पुरा भइसकेकाे छ । त्यस्तै २ लाख २२ हजार स्थानीयवासीकाे शेयर भने भर्खरै मात्र जारी गरिएकाेले त्याे काराेबार हुन अझै तीन वर्ष कुर्नुपर्नेछ ।
कृषिमा दिने व्यक्तिगत अनुदान रोक्दै सरकार, अर्को वर्षदेखि सहकारीलाई मात्र दिइने
काठमाडौं । सरकारद्धारा व्यवसायिक कृषिमा पेसामा व्यक्तिलाई दिने सहुलियत एवं अनुदानहरुको व्यापक दुरुपयोग भएको भन्दै सरकारले त्यस्ता अनुदानहरुलाई रोक्ने तयारी गरेको छ । अर्थमन्त्री युवराज खतिवडाले त्यस्तो अनुदान प्राप्त गरेका उद्यमीहरुबाट उपभोक्ताले राहत पाएको अवस्था नदेखिएकोले त्यस्तो अनुदान नीति अर्काे वर्षदेखि खारेज गर्ने तयारी गरेको बताएका हुन् । काठमाडौंमा बिहीबारदेखि सुरु भएको सहकारी उद्यम प्रवर्द्धनसम्बन्धी राष्ट्रिय कार्यशालाको उद्घाटन गर्दै त्यस्ता अनुदान कार्यक्रमहरु सहकारीमार्फत् उपलब्ध गराउने र त्यस्ता सहकारीहरुले नै कति उपभोक्ताहरु कसरी लाभान्वित भए भन्ने रिपोर्ट सम्बन्धित सरकारलाई बुझाउनुपर्ने भन्दै आगामी बजेटदेखि त्यस्तो अनुदानमा व्यापक सुधार ल्याउने तयारी गरिएको बताएका हुन् । ‘ठूला र आधुनिकीकरणसहितको उद्यममा सररकारले सीधै सहयोग गर्नसक्छ तर रासायनिक मल, कृषि यन्त्र तथा शीतभण्डारलगायतमा दिइने अनुदान अब व्यक्तिलाई दिइँदैन, दुरुपयोग भयो ।’ उनले तरकारी, फलफुल, दुध, जडिबुटी लगायतका कृषिजन्य सामाग्रीको प्रशोधनका लागि २५ प्रतिशतको अनुदान दिने व्यवस्था बवेटले गरेको भन्दै त्यस्तो अनुदान लिन मन्त्रालयमा आउन आग्रह समेत गरे । कहिले दुधको अभाव हुने तर कहिले दुध नै नबिक्ने अहिलेको जस्तो अवस्था हटाउन सरकारले पाउडर दुध उत्पादन गर्न चाहेको भन्दै उनले त्यस्तो उद्योग चलाउन पनि २५ प्रतिशत पुँजीगत अनुदान दिने व्यवस्था गरिएको भन्दै सम्बन्धित कृषि सहकारीहरुलाई अग्रसर हुन आग्रह गरे । मन्त्री खतिवडाले भने । अर्थमन्त्रीले सहकारीलाई निजीभन्दा भिन्न छौं भनेर देखाउन र सामाजिक हितमा समर्पित हुन आग्रह समेत गरे । हाल सरकारले साना तथा मझौला व्यवसायले उत्पादन गरेको वस्तुहरु अन्य वस्तुहरुभन्दा १५ प्रतिशतसम्म महँगो भए पनि सरकारी निकायले सोही वस्तुको प्रयोग गर्नपर्ने नीतिगत व्यवस्था गरिएको छ । यस्तो व्यवस्थाले साना व्यवसायको संरक्षण गर्न सहयोग पुगेको दाबी खतिवडाले गरे ।
काठमाडौँ भ्यू टावर निर्माणमा ढिलाई, साढे ३ अर्ब लागत लाग्ने अनुमान
काठमाडौँ । करीब चार वर्षदेखि निर्माण कार्य शुरु गरेको काठमाडौँ भ्यू टावर (दृश्यावलोकनस्तम्भ) निर्माणको कामले अझै गति लिन सकेको छैन । निर्माण कार्य शुरु गरेको चार वर्ष बित्नै लाग्दासम्म पनि मुस्किलले १५ प्रतिशत मात्रै काम भएको छ । उक्त भ्यू टावर निर्माणका लागि रु तीन अर्ब ५० करोड लाग्ने अनुमान रहको छ । कामपा, निजी साझेदारी एकाइ प्रमुख धु्र्व काफ्लेका अनुसार सम्झौता भएको काम हुने हो र अहिले त कम्तिमा पनि ७५ प्रतिशत काम सकिसक्नुपर्ने हो तर त्यस्तो अवस्था नरहेको बताएका छन् । स्तम्भका लागि २३ रोपनी पाँच आना जग्गा छुट्याइएको छ । सोमध्ये ४० प्रतिशत भूभागमा स्तम्भ बन्नेछ भने ६० प्रतिशत भाग खाली राखिनेछ । सो अग्लो घर नेपाली कलासंस्कृति झल्किने खालको हुने, कामपा र ठेकेदार कम्पनीबीच भएको सम्झौतानुसार कम्पनीले वार्षिक रु दुई करोड ३५ लाख तिर्नुपर्ने हुन्छ । यो वार्षिक २ दशमलव ५ प्रतिशतका दरले बढ्दै जान्छ । निर्माणको जिम्मा पाएको कम्पनीले अहिलेसम्म कामपालाई कर स्वरुप रु पाँच करोड बुझाइसकेको छ । स्तम्भको सबैभन्दा तल्लो तलामा बसको पार्किङस्थल रहनेछ । त्यसको माथि दोस्रो तलामा हलुका, गाडीको पार्किङस्थल, व्यवस्थित चलचित्र घर, पौडी पोखरी, खाजाघर, बैंक तथा महानगरपालिकाको वडा कार्यालयसमेत रहनेछन् । हालसम्ममा जमीन मुनी ८० प्रतिशत काम भएको छ भनेमाथि नगन्य मात्रामा मात्रै काम भएको छ, समग्रमा १५ प्रतिशत मात्र काम भएको छ । स्तम्भ निर्माणका लागि कामपा र जलेश्वर, स्वच्छन्द र बिकोइ कम्पनीबीच विसं २०७१ फागुन २२ मा सम्झौता भएको थियो । सम्झौतानुसार सम्झौता भएको पाँच वर्षभित्र ती कम्पनीले आफ्नो लगानीमा भवन बनाएर ३० वर्षसम्म चलाउन पाउने व्यहोरा रहेको थियो । रासस
प्राधिकरणको नयाँ व्यवस्था: सात दिनभित्रै नयाँ मिटर
काठमाडौँ । तपाइँले नयाँ आवास तथा घरका लागि नेपाल विद्युत् प्राधिकरणसँग नयाँ मिटरको लागि आवेदन दिनुभएको छ भने अब तपाईंले लामो समय कुर्नुपर्ने छैन । प्राधिकरणले आफ्ना ग्राहकलाई सहजरूपमा सेवा दिने लक्ष्यका साथ प्रक्रिया पुगेकालाई सात दिनभित्र नयाँ मिटर दिने व्यवस्था गर्न मातहतका सबै कार्यालयलाई निर्देशन दिएको छ । प्राधिकरणले ‘सिङ्गल फेज’को नयाँ मिटर सात दिनभित्रमा जडान गरिदिन र उपभोक्तालाई कुनै पनि प्रकारको दुःख नदिन निर्देशन दिएको छ । प्राधिकरणले प्रवाह गर्ने सेवालाई अझ प्रभावकारी बनाउन सिङ्गल फेजको मिटरका लागि निवेदन दिने ग्राहकको मिटर सात दिनभित्रमा जडान गरिदिने प्रतिबद्धतासमेत जनाएको छ । कहीँ कतै त्यस्तो व्यवस्था लागू नभएको पाइए कार्यकारी निर्देशक तथा क्षेत्रीय कार्यालयका प्रमुखलाई सम्पर्क गर्नसमेत प्राधिकरणले उपभोक्तालाई आग्रह गरेको छ । प्राधिकरणका अधिकांश घरायसी ग्राहकले सिङ्गल फेज मिटर प्रयोग गर्छन् । यसैगरी, थ्रि फेज र उद्योग तथा प्रतिष्ठानमा प्रयोग हुने ‘टिओडी’ नयाँ मिटर क्रमशः १५ र ३० दिनभित्र उपलब्ध मात्रै गर्नेछैन, जडान नै गरिदिनुपर्ने व्यवस्था गरिएको कार्यकारी निर्देशक कुलमान घिसिङले जानकारी दिए । ग्राहकलाई प्रवाह गर्ने सेवालाई अझै प्रभावकारी बनाउन र कार्यालय प्रमुख तथा कर्मचारीलाई अझै जिम्मेवार बनाउन यस्तो व्यवस्था गरिएको उनको भनाइ छ । मुलुकभर विद्युत्भार कटौतीको अन्त्यपछि प्राधिकरण विद्युत् चुहावट घटाउने, प्रशासनिक खर्च घटाउने, बाँकी बक्यौता असुल गर्ने, स्तरीय, भरपर्दो तथा सुरक्षित विद्युत् सेवा प्रदान गर्ने, ग्राहक सेवाको स्तरवृद्धि गर्ने, निर्माणाधीन जलविद्युत् तथा प्रसारण लाइनको निर्माणलाई तीव्रता दिनेलगायतका काममा केन्द्रित भएको छ । चुहावट नियन्त्रणका लागि प्राधिकरणले चोरी नियन्त्रण गर्ने र महसुल बक्यौता असुलीमा कडाइ गर्दै आएको छ । यस्तै प्राविधिक चुहावट नियन्त्रण गर्न काठमाडौँ उपत्यका र प्रमुख शहरी क्षेत्रमा पाँच हजार नयाँ ट्रान्सफर्मर जडान गर्ने कार्यलाई प्रमुख प्राथमिकतामा राखिएको छ । यस्तै वितरण लाइन तथा सबस्टेसनको सुदृढीकरणको काम पनि अगाडि बढाइएको छ । सेवा सुधारका लागि ग्राहक सेवासम्बन्धी प्रतिबद्धता हरेक कार्यालयमा टाँसी सोहीअनुसारको काम गर्ने व्यवस्थासमेत मिलाइएको छ । नयाँ मिटर जडानमा समस्या रहेको र कर्मचारीले अनावश्यक दुःख दिने गरेको तथा घुस मागेको र घुस माग्दामाग्दै प्राधिकरणका कर्मचारी समेत पक्राउ पर्न थालेपछि प्राधिकरणले नयाँ व्यवस्था गरेको हो । प्राधिकरणले ग्राहक तथा वितरण केन्द्रले कार्यसम्पादन अवधिसहितको प्रतिबद्धता पत्र फ्लेक्समा प्रिन्ट गरी सबैले देख्ने ठाउँमा राख्ने व्यवस्थासमेत मिलाएको छ । हरेक वितरण केन्द्रले आफूले प्रदान गर्ने सेवा, कार्यसम्पादन अवधि र सम्पर्क व्यक्तिको नाम तथा सम्पर्क मोबाइल नम्बर समेटिएको विवरण कार्यालय परिसरमा ग्राहकले देख्ने ठाउँमा राख्नुपर्ने नयाँ व्यवस्था गरिएको छ । नयाँ व्यवस्थाअनुसार सिङ्गल फेजको मिटर जलेमा वा बिग्रेमा एक दिनभित्र मर्मत गरिनेछ । यस्तै थ्रि फेजको तीन दिन र टिओडी १० दिनभित्रमा जडान÷मर्मत गर्ने व्यवस्था समेत मिलाइएको छ । प्राधिकरणले प्रवाह गर्ने सेवामा कुनै गुनासो भएमा सम्बन्धित केन्द्र प्रमुखको मोबाइल नम्बरमा वा प्राधिकरणको जनगुनासो व्यवस्थापनको फोन नम्बर ११५० मा पनि उजुरी गर्न सकिने व्यवस्था गरिएको कार्यकारी निर्देशक घिसिङको भनाइ छ । प्राधिकरणले विद्युत् चुहावट नियन्त्रण र सेवा प्रवाह सुधारमा केन्द्रीत भई क्षेत्रीय कार्यालय र त्यसअन्तर्गतका केन्द्र प्रमुखसँग धमाधम कार्यसम्पादन करार सम्झौतासमेत गर्दै आएको छ । रासस
आयल निगमको बार्षिकोत्सवमा मन्त्री यादवको चेतावनी-अनियमितता गर्नेको स्वास्थ्य ठीक हुँदैन
काठमाडौँ । उद्योग, बाणिज्य तथा आपूर्ति मन्त्री मातृका यादवले नेपाल आयल निगममा अनियमितता गर्ने कसैको स्वास्थ्य ठीक नहुने चेतावनी दिएका छन् । निगमको ४९ औं वर्षमा प्रवेश गरेको अवसरमा आयोजित कार्यक्रममा मन्त्री यादवले यस्तो आरोप लगाएका हुन् । सो अवसरमा मन्त्री यादवले भने–’चिनी उद्योगी र आयल निगमले मेरो ज्यान खाइसक्यो ।’ सोही अवसरमा मन्त्री यादवले आयल निगमको ४ अर्ब घाटा मेकअप भइरहेको बताए । उनले भने–’अब तेलको मूल्य घट्छ ।’ यता, सोही कार्यक्रममा आयल निगमका नवनियुक्त कार्यकारी निर्देशक सुरेन्द्रकुमार पौडलले आफू निगमको उत्थानमा खरो भएर लाग्ने बताए । उनले आफुले निगमका लागि धेरै योजना बनाएको र भाबी दिनमा लागू गर्दै जाने बताए । उनले भने–’निगमका कर्मचारीको सेवा सुबिधा बढाउने र निगममा रहेको कोषको समुचित प्रयोग गर्नेछु ।’ कार्यक्रममा पेट्रोलियम ढुवानी महासंघका सचिव विश्वप्रसाद अर्यालले ६६ प्रतिशत निजी लगानी रहेको निगमले वितरण गर्ने पेट्रोलियम पदार्थको शुद्धताका बारेमा बोलेका थिए ।
१० प्रतिशत बोनस पछि डिप्रोक्स लघुवित्तकाे सेयर मूल्य समायाेजन
काठमाडौं । डिप्रोक्स लघुवित्त वित्तीय संस्थाको सेयर मूल्य समायोजन भएको छ । नेपाल स्टक एक्स्चेञ्ज(नेप्से)ले संस्थाको १० प्रतिशत बोनस पछिको मूल्य समायोजन गरेको हो । समायोजन पश्चात संस्थाको सेयर कारोबार प्रतिकित्ता ५८२.७३ रुपैयाँ बाट शुरु भएको छ । जसको आधार मूल्य प्रतिकित्ता ४६१.८६ रुपैयाँ रहेकाे छ ।
नेपालगञ्जमा सानिमा जनरल इन्स्योरेन्सको नयाँ शाखा
काठमाडौं । सानिमा जनरल इन्स्योरेन्सको नयाँ शाखा नेपालगञ्ज उद्घाटन भएको छ । कम्पनीका संचालक खेमराज लामिछाने तथा विशेष अतिथी नेपालगञ्ज उद्योग वाणिज्य संघका महासचिव अजय टण्डनको उपस्थितिमा उक्त शाखाको उद्घाटन गरिएको हो । नेपालगञ्ज उप महानगरपालिकाका मेयर डा. धवल शम्शेर राणाबाट उक्त उद्घाटन कार्यक्रम सम्पन्न गरेका थिए । उक्त कार्यक्रमको सभापतित्व कम्पनीका संचालक खेमराज लामिछानेले गरेका थियो भने स्वागत मन्तब्य तथा कम्पनीको वारेमा कम्पनीका सहायक महा प्रबन्धक राजु पौडेलले गरेका हुन् । कम्पनीले सबै प्रकारका निर्जिवन बीमाहरु जस्तैः मोटर, घर, कलकारखाना, जलविधुत, कृषि तथा पशुबीमा, दुर्घटना, सामुद्रिक, हवाई र लघुबीमा मार्फत देशभर बीमाको पहुँच नपुगेका क्षेत्रहरुमा समेत बीमाको सर्वसुलभ पहुँच पुराउने उद्देश्यका साथ यस शाखा कार्यालयको स्थापना गरेको छ । कम्पनीको अधिकृत पूँजी रु.१ अर्ब ५० करोड, जारी पूँजी १ अर्ब र चुक्ता पूँजी रु. ७० करोड रहेको छ । आगामी आर्थिक बर्ष भित्र रु.३० करोड बराबरको शेयर सर्वसाधारणका लागि जारी गरि चुक्ता रु.१ अर्ब पु¥याउने लक्ष्य राखेको छ ।
