गुह्येश्वरी मर्चेन्टको नाफा ३ करोड ३४ लाख, सबै सूचक सुधारात्मक
काठमाडौं । गुह्येश्वरी मर्चेन्ट बैंकिङ एण्ड फाइनान्स कम्पनीले चालु आर्थिक वर्षको पहिलो त्रैमासमा ३ करोड ३४ लाख रुपैंया खुद मुनाफा कमाएको छ । फाइनान्सले अघिल्लो आर्थिक वर्षको सोही अवधिको तुलनामा करिब १० प्रतिशतले नाफा बढाएर सो आकारमा पुर्याएको छ । फाइनान्सले पुस मसान्तसम्म कुल ३२ अर्ब ९६ करोड निक्षेप संकलन गरी ३९ अर्ब ३ करोड रुपैंया कर्जा प्रवाह गर्दा उक्त फाइनान्सको सीसीडी अनुपात ६८.३० प्रतिशतमा सीमित भएको छ । यो अनुपात भनेको फाइनान्सले अझै ठूलो मात्रामा मर्जा लगानी गर्नसक्ने अवस्था हो । उक्त अवधिमा फाइनान्सले ७ करोड ४५ लाख रुपैंया खुद ब्याज आम्दानी गर्दा ५ करोड ५८ लाख रुपैंया बराबरको प्रशासनिक खर्च गरेको छ । फाइनान्सको पुँजी पर्याप्तता अनुपात २६.४० प्रतिशत, निष्क्रिय कर्जा अनुपात ०.६८ प्रतिशत, कस्ट अफ फण्ड १०.३४ प्रतिशत, आधार ब्याजदर १२.७६ प्रतिशत र ब्याजको स्प्रेडदर ४.८१ प्रतिशत रहेको छ ।
गुडविल फाइनान्सको साधारण सभा चैत १० मा, ५.२६ % नगद लाभांश वितरण गरिने
काठमाडौँ । गुडविल फाइनान्स लिमिटेड(वित्तीय संस्था) को २४ औँ वार्षिक साधारण सभा चैत १० गते हुने भएको छ । कम्पनी सञ्चालक समितिको माघ ६ गते बसेको बैठकले साधारण सभाको मिति तय गरेको हो । साधारण सभाको लागि कम्पनीको शेयर नामसारी दाखिल खारेज गर्ने मिति माघ २७ देखि फागुन १० गतेसम्मका लागि बन्द गर्ने निर्णयपनि गरिएको छ । ८० करोड चुक्ता पूँजी रहेको कम्पनीको साधारण सभामा ५.२६३ प्रतिशतका दरले ४ करोड २१ लाख ५ हजार २ सय ६३ रुपैयाँ नगद लाभांश वितरण गर्ने प्रस्ताव प्रस्तुत गरिने छ । साधारण सभाले अध्यक्षको प्रतिवेदन छलफल सहित पारित गर्ने कम्पनी सचिव स्वयम्भु शाक्यले जनाएका छन् ।
चिनियाँ टेलिभिजन बिक्री घट्यो, सन् २०१८ प्रतिकूल
वेइजिङ, चीन । प्रतिस्पर्धात्मक विश्व बजारका कारण चीनको टेलिभिजन उद्योगका लागि सन् २०१८ प्रतिकुल देखिएको गैरसरकारी अध्ययनले जनाएको छ । तथ्याङ्क सेवा प्रदायक संस्था (एभीसी) का अनुसार चीनमा टेलिभिजन सेटको बिक्रीमा सन् २०१७ को तुलनामा सन् २०१८ मा ८.६ प्रतिशतको गिरावट आएको छ । उक्त संस्थाले टेलिभिजन विक्रीबाट भएको औषत आम्दानीमा पनि नौ प्रतिशतको गिरावट आएको जनाएको छ । सन् २०१८ मा चीनले जम्मा १६ करोड टेलिभिजनउत्पादन गरेको थियो भने उत्पादित टेलिभिजनमध्ये ७० प्रतिशत टेलिभिजन विदेश निर्यात भएको तथ्याङ्कमा उल्लेख छ । चिनियाँ भिडियो उद्योग संगठनका उप–महासचिव पेङ जियानफेङले भने, “घरेलु प्रयोजनका लागि गत बर्ष चिनियाँहरूले ४७ करोड ७४ लाख टेलिभिजन खुद्रारूपमा किनेका थिए । यो अघिल्लो बर्षको तुलनामा शुन्य दशमलब पाँच प्रतिशतको वृद्धि हो ।” यसैबीच सन् २०१८ मा निर्यात भएका टेलिभिजनको सङ्ख्या ९७ करोड ३२ लाख रहेको र यो अघिल्लो बर्षको तुलनामा २१ प्रतिशतको वृद्धि हो । चीनले अर्थतन्त्रमा योगदान गर्नका लागि चीनले कार तथा घरायसी सामानहरूको विक्रीलाई प्रोत्साहन गरेको र यी सामानको उपयोगमा वृद्धि गरेको थियो । रासस÷सिन्ह्वा
काठमाडौं महानगरपालिकाले ८ वटा आकाशे पुल बनाउने, लागत १३ अर्ब
काठमाडौँ । काठमाडौँ महानगरपालिकाले चालु आर्थिक वर्षमा पहिलो चरणमा दुई स्थानमा मात्रै आकाशे पुल निर्माण गर्ने भएको छ । यस आर्थिक वर्षमा आठ स्थानमा पुल बनाउने रहे पनि तत्काल यी दुई स्थानमा मात्रै पुन निर्माणको तयारी गर्नेछ । आगामी दिनमा निर्माण गरिने सबै पुल आवश्यकता अनुरूप एक स्थानबाट अन्यत्र सहजै स्थानान्तरण गर्न सकिने किसिमको हुनेछ । पहिलो चरणमा चाबहिल र पुरातत्व विभागको अगाडि पुल निर्माणको काम गर्न लागिएको कामपा प्रवक्ता ईश्वरमान डङ्गोलले जानकारी दिएका छन् । कामपाले चालू आव २०७/७६ का लागि रु १३ अर्ब दुई करोड १२ लाख ३७ हजारको बजेट प्रस्तुत गरेको थियो । जसअन्तर्गत भौतिक पूर्वाधार निर्माण गर्न चालु आर्थिक वर्षमा रु चार अर्ब छ करोड बजेट विनियोजन गरिएको छ । सबैभन्दा बढी महानगरभित्रका सडक विस्तार र मर्मतमा खर्च गरिने छ । दुर्घटना न्यूनीकरण, ट्राफिक व्यवस्थापनसँगै पैदलयात्रुको सहजताका लागि ट्राफिक प्रहरी र सडक विभागको सहकार्यमा कामपाले ती स्थानमा नयाँ किसिमका पुल बनाउन लागेको हो । टेकु भन्सार, त्रिपुरेश्वर, पुतलीसडक, महाराजगञ्ज, कोटेश्वर, गौशाला चोकमा पनि नयाँ पुल निर्माण गर्ने कामपाको योजना रहेको छ । सवारी साधनको अत्यधिक चाप हुने सो क्षेत्रमा त्यस्तो पुलको अभावमा पैदलयात्रुलाई बाटो काट्न समस्या पर्र्दै आएको छ । पैदलयात्रुले जथाभावी बाटो काट्दा सवारी जामको अवस्था देखिँदै आएको छ । अब निर्माण गरिने पुलमा विज्ञापन राख्न नपाइने कामपाले जनाएको छ । कामपाभित्र सुन्धारा, नयाँ सडक, वीरअस्पताल, रत्नपार्क–भोटाहिटी, जमल, रत्नपार्क–बागबजार, पुरानो बसपार्क, भद्रकाली र नयाँ बसपार्कमा आकाशे पुल चालु छन् । भद्रकाली, पुरानो बसपार्क र नयाँ बसपार्कमा केही वर्षअघि निर्माण गरिएको पुल मर्मत गर्न नपर्ने अवस्थामा छ । अन्य स्थानका पुल तत्काल मर्मत गर्नुपर्ने अवस्थामा रहेको छ । वीरअस्पताल अगाडिको पुल अत्यन्त जीर्ण रहेको जनाएको छ ।
बैंकको पदचाप पछ्याउँदै एनआईसी एशिया लघुवित्त, प्रतिशेयर आम्दानी २३ रुपैंया माथि
काठमाडौं । एनआइएसी एशिया बैंकले उत्साहप्रद वित्तीय विवरण गरेको एनआईशी एसिया बैंकको सहायक कम्पनी एनआईशी एशिया लघुवित्तले चालु आर्थिक वर्षको दोस्रो त्रैमाससम्ममा आश्चर्यजनक प्रगति हासिल गरेको छ । उक्त अवधिमा लघुवित्तले कुल ५ करोड ७७ लाख भन्दा बढी मुनाफा कमाएको छ । यो आकार अघिल्लो त्रैमासको तुलनामा १९१ प्रतिशतले बढी हो । असोज मसान्तमा लघुवित्तको नाफा १ करोड ९७ लाख थियो भने अघिल्लो वर्षको सोही अवधिमा लघुवित्त २३ हजार रुपैंयाले घाटा थियो । लघुवित्तले कमाएको उक्त नाफाको आधारमा प्रतिशेयर आम्दानी २३ रुपैंया ५५ पैसा रहेको छ । उक्त अवधिमा लघुवित्तले ३ अर्ब १३ करोड रुपैंया कर्जा प्रवाह गर्दा बचतकर्ताबाट २७ करोड ९३ लाख संकलन गरेको छ । अघिल्लो वर्ष नकारात्मक रहेको लघुवित्तको रिजर्भ समेत ५ करोडले सकारात्मक देखिएको छ ।
तेस्रो त्रैमासको लागि नयाँ ब्याजदर सार्वजनिक गर्दै बैंकहरु, आधारदरसँगै ऋणकाे ब्याजदर ‘घट्दै’
काठमाडौं । दोस्रो त्रैमासको वित्तीय विवरणसँगै बैंकहरूले आधार ब्याजदर र बचत तथा ऋणमा नयाँ ब्याजदर तालिका सार्वजनिक गर्न थालेका छन् । निक्षेपमा १ महिना अघि नै ब्याजदर घटाए पनि कर्जाको ब्याजदर घटाउन आधार ब्याजदरको गणना आवश्यक भएपछि बैंकहरुले त्यस्तो व्याजदर घटाएका थिएनन् । तर पुस मसान्तसम्मको बैंकहरुको कारोबार एवं गतिविधिका आधारमा आर ब्याजदर तय भएसँगै ऋणको ब्याजदर घटाउँदै नयाँ ब्याजदर सार्वजनिक गर्न चालेका हुन् । वाणिज्य बैंकहरुले ३/३ महिनामा कर्जाको ब्याजदर परिवर्तन गर्नुपर्ने प्रावधान छ । कर्जाको ब्याजदर गणनामा आधार ब्याजदर र लोनको प्रकृति अनुसारको प्रिमियम दरलाई लिने गरिन्छ । बैंकहरुले आधार ब्याजदर मासिक रुपमा प्रकाशन गर्नुपर्ने भए पनि त्रैमाससको अन्तिमको ब्याजदरले ऋणको दरलाई प्रभावित गर्ने भएकोले यसलाई बढी महत्वपूर्ण मानिन्छ । सोमबार कुमारी बैंक, सनराइज बैंक, सानिमा बैंक, सिभिल बैंक, हिमालयन बैंक, माछापुच्छ्रे बैंक लगायतले दोस्रो त्रैमासको अन्त्यको वित्तीय अवस्थाका आधारमा आधार ब्याजदर निर्धारण गरी ऋणमा नयाँ ब्याजदर सार्वजनिक गरेका छन् । त्यस्तै आइतबारमात्रै एभरेष्ट बैंक र एसबीआई बैंकले पनि आधार ब्याजदर सहित नयाँ ब्याजदर सार्वजनिक गरिसकेका छन् । अघिल्लो त्रैमास र यस त्रैमासको आधारमा आधार ब्याजदर सबैभन्दा बढी घटाउनेमा सानिमा बैंक अघि देखिएको छ । अघिल्लो त्रैमासको अन्त्यमा १०.५५ प्रतिशत रहेको बैंकको बेसरेट यस दोस्रो त्रैमासको अन्त्यमा ९.७५ प्रतिशत कायम भएको छ । त्स्तै सेञ्चुरी बैंकले ०.७२ प्रतिशत, सिटिजन्स बैंकले ०.६८ प्रतिशत, नेपाल एबीआईको ०.६१ प्रतिशत, एभरेष्ट बैंकको ०.५९ प्रतिशत आधारदर घटेको छ । मेगा, सिभिल कुमारी बैंकको भने सो दर बढेको छ जसले गर्दा ती बैंकका ऋणीहरुको ब्याजदर अझै महँगो बनेको छ । यद्यपि अधिकतम स्प्रेडदरलाई कायम गर्दै कर्जाको ब्याजदरमा लिने प्रिमियम दरलाई समेत समायोजन गर्न वाणिज्य बैंकहरुलाई छुट छ ।
विश्वभरि दुर्लभ चन्द्रग्रहण, यसरी हेर्नुहोस् ‘सुपर ब्लड वुल्फ मुन’
काठमाडौं । विश्वभरिका आकासीय पिण्ड अवलोकनकर्ताहरूले आज रातो रङ्गको देखिने सुपर ब्लड वुल्फ मुनु चन्द्रग्रहण हेर्ने तयारी गरिरहेका छन्। निकै चित्ताकर्षक हुनसक्ने यो चन्द्रग्रहणको बेला पृथ्वीको उपग्रहको रूपमा रहेको चन्द्रमा निकै रातो रङ्गको देखिने वैज्ञानिकहरूको भनाइ छ।पूरै चन्द्रग्रहण उत्तर र दक्षिण अमेरिकाका साथै पश्चिम युरोप र उत्तर अफ्रिकाबाट देख्न सकिने छ। पूर्ण चन्द्रग्रहण भनेको के हो ? सूर्य र चन्द्रको ठीक बीचबाट पृथ्वी अघि बढ्दै गर्दा यस्तो खालको ग्रहण देखिन्छ। यस्तो बेला सूर्य पृथ्वीको पछाडि पर्न जान्छ र चन्द्रमा पृथ्वीको छायाभित्र जाने गर्दछ। चन्द्रमा रातो देखिएला ? हो त्यस्तै हुनेछ। केही टिप्पणीकारहरूले आज रातिको पूर्ण चन्द्रग्रहणलाई सुपर ब्लड वुल्फ मुनको संज्ञा दिएका छन् ।सुपर भन्नाले चन्द्रमा पृथ्वीको धेरै नजिक आउने अवस्था र त्यसैकारण चन्द्रमा सामान्यभन्दा निकै ठूलो देखिने अवस्था बुझ्नु पर्दछ। जनवरी महिनामा पर्ने पूर्णिमालाई चाहिँ वुल्फ भन्ने गरिएको छ। अमेरिकाको न्यू योर्क राज्यको सिरक्युज विश्वविद्यालयका सहायक प्राध्यापक वाल्टर फ्रिम्यानले भने, पृथ्वीको वायुमण्डलबाट छरिएको थोरै सूर्यको प्रकाश चन्द्रमामा पुग्न जान्छ। त्यो फेरि पृथ्वीको धार वरिपरि वाङ्गिन जान्छ। त्यस्तो बेला देखिने रातो प्रकाश चन्द्रमामा पर्न गएको हामीले स्पष्ट रूपमा देख्न सक्छौँ। यो कहाँ र कहिले देख्न सकिएला ? चन्द्रग्रहण सोमबार ग्रेनिच समय जीएमटी अनुसार ०२ ३५ देखि ०७ ४९ बजेसम्म देखिने छ। तर पूर्ण चन्द्रग्रहण चाहिँ ०५ १२ जीएमटीमा देख्न सकिनेछ। ब्रिटेनमा चाहिँ चन्द्रग्रहणको लगभग पूरै अवधिमा चन्द्रमा क्षितिजमाथि नै देखिनेछ। यो चन्द्रग्रहण उत्तरपश्चिमी फ्रान्स, उत्तरपश्चिमी स्पेन, पोर्चुगल र पश्चिम अफ्रिकाको केही भाग, पूरै उत्तर र दक्षिण अमेरिका, पूर्वी प्रशान्त क्षेत्र र रुसको उत्तर पूर्वी टुप्पोबाट पनि देख्न सकिनेछ। चन्द्रग्रहण हेर्नु सुरक्षित होला ? सूर्यग्रहणलाई सीधै हेर्नु खतरनाक हुनसक्छ। तर चन्द्रग्रहणको बेला निस्किने प्रकाश निकै मधुरो हुने भएकोले चन्द्रग्रहणलाई कुनै उपकरणको सहयता विना नै हेर्न सकिन्छ। त्यो पूरै सुरक्षित हुन्छ। यस्को महत्त्व के छ ? यो चन्द्रग्रहण देखिने क्षेत्रमा बसोबास गर्ने मानिसले सम्भवत सन् २०२९ सम्ममा फेरि यस्तै खालको चन्द्रग्रहण देख्न सक्ने छैनन्। तर त्यो मौसमी अवस्था कस्तो हुन्छ भन्ने कुरामा निर्भर हुन्छ। बीबीसी
मेगा नीतिः रणनीतिक साझेदार र आक्रामक बजार विस्तार
काठमाडौं । मेगा बैंकले विदेशी लगानीकर्तालाई रणनीतिक साँझेदारका रुपमा भित्र्याउने र आक्रामक बजार विस्तारको रणनीति अघि सारेको छ । बैंकले रणनीतिक साँझेदार मार्फत पुँजी, प्रबिधि भित्र्याउने र आक्रामक बजार विस्तार गर्ने योजना बनाएको हो । पञ्च वर्षीय योजनाको दोश्रो वर्षमा कुदिरहेको बैंकले तीन वर्ष पछि ३ अर्ब २० करोड रुपैयाँ नाफा कमाउने लक्ष्य तय गरेको छ । गत आर्थिक वर्ष अर्थात २०७४/७५ मा बैंकको नाफा एक अर्ब ३१ करोड रुपैयाँ नाघेको थियो । जुन अघिल्लो वर्षको तुलनामा ६६ प्रतिशत बढी हो । अघिल्लो वर्ष २०७३/०७४ मा बैंकले ७९ करोड रुपैयाँ खुद नाफा कमाएको थियो । बैंकले आर्थिक वर्ष २०७८/७९ मा आफ्नो नाफा १४४ प्रतिशतले वृद्धि गरी ३ अर्ब २० करोड रुपैयाँ पुर्याउने लक्ष्य लिएको छ । चालु आर्थिक वर्षको पहिलो त्रैमासमा बैंकले ४० करोड ४५ लाख रुपैयाँ खुद मुनाफा गरेको छ । जुन गत आर्थिक वर्षको सोही अवधिको तुलनामा ३९४ प्रतिशत बढी हो । गत असाेज मसान्तसम्म बैंकको कूल निक्षेप ६६ अर्ब १२ करोड रुपैयाँ पुगेको छ । त्यस्तै, कर्जा ६२ अर्ब २५ करोड रुपैयाँ पुगेको छ । रणनीतिक योजनाको अवधिमा बैंकले ऋण र निक्षेपलाई २००/२०० प्रतिशत बढाएर २८ वाणिज्य बैंकमध्ये १५औँ स्थान ओगट्ने लक्ष्य लिएको छ । मेगाले टुरिजम डेभलपमेन्ट बैंकलाई गाभेर २०७५ बैशाख ३० गतेदेखि एकिकृत कारोबार शुरु गरेको थियो । टुरिजमलाई गाभेपछि बैंकको व्यवसायको आकार, पुँजीगत आधार, शाखा सञ्जाल, ग्राहक संख्या र प्रतिस्पर्धी क्षमतामा वृद्धि भएको छ । त्यसका साथै, २८ वाणिज्य बैंकमध्ये पुँजीका आधारमा मेगा दोश्रो ठूलो बैंक हो । त्यस्तै, बैंकले व्यवसाय र मुनाफामा उच्च वृद्धि हासिल गरेको छ । एनपीएल(गैर प्रदर्शनकारी ऋण) एक प्रतिशतको हाराहारीमा रहेको छ । पञ्चवर्षीय रणनीतिक योजनाको लक्ष्य पुरा गर्न कम्पनीले दर्जनौँ चुनौतीहरुको सामना गर्नुपर्ने देखिन्छ । निरन्तर बढीरहेको कष्ट अफ फण्ड, घटिरहेको प्रतिसेयर आम्दानी र प्रतिसेयर लाभांश, गैर ब्याज आयको न्यूनता जस्ता चुनौती बैंक सामू छन् । बैंकले लगानी योग्य पुँजीको अभाव, ब्यादरमा भइरहेको तीव्र प्रतिष्पर्धाको चुनौतीलाई पनि चिर्नु पर्ने छ । छोटो समयको नाफालाई निरन्तरता दिँदै बैंकले कम्पनीको दिगो वृद्धिलाई बढी जोड दिनुपर्ने देखिन्छ । बैंकले व्यापार प्रवद्र्धनमा विशेष जोड दिँदै एनपीएको समुचित व्यवस्थापन गरी कृषि, पर्यटन, जलविद्युत, भौतिक पूर्वाधार परियोजना लगायतका क्षेत्रहरुमा थप लगानी गर्ने योजना बनाएको छ । “हलो देखि हाइड्रोसम्म”को नारामार्फत २०६६ सालमा स्थापना भएको बैंकले उर्जा र पर्यटन क्षेत्रलाई विशेष महत्व दिएको छ । फाईभ स्टार बैंकिङ्को अवधारणामा आएको बैंकमा महिला प्रमुख कार्यकारी अधिकृतले नेतृत्व गरिरहेकी छिन् । बैंकले महिला मात्रै कर्मचारी रहेको शाखा सञ्चालन गरिरहेको छ । सामाजिक उत्तरदायित्वमा पनि बैंकले आफूलाई अब्बल साबित गर्दै आइरहेको छ । बैंकले शिक्षा क्षेत्रलाई विशेष जोड दिँदै “गर्ल चाइल्ड एजुकेसन” नामक कार्यक्रम संचालन गर्दै छ । उक्त कार्यक्रम अन्तर्गत बैंकले प्रत्येक शाखाबाट एक/एक जना नारीलाई निःशुल्क शिक्षा प्रदान गर्ने योजना बनाएको छ । १०२ वटा शाखा रहेको बैंकले १०२ जना चेलीहरुलाई १२ कक्षासम्म निःशुल्क अध्ययनको व्यवस्था मिलाउने छ । त्यस्तै, स्वास्थ्य क्षेत्रमा महिलाहरुको स्तन क्यान्सरको चेक जाँच तथा निःशुल्क स्वास्थ्य उपचार, आँखा शिविर लगायतका कार्यक्रम सञ्चालन गर्ने छ । यस्ता कार्यक्रमहरु मार्फत बैंकले नागरिकसँगको सम्बन्धलाई सुमधुर बनाई व्यवसाय विस्तारमा समेत जोड्ने प्रयास गरिहेको देखिन्छ । बैंकले आफ्ना कर्मचारीहरुको क्षमता अभिवृद्धि र सुशासनका लागि “मेगा लर्निङ्ग” सेन्टर सञ्चालन गर्दै छ । सेन्टरको माध्यमबाट कर्मचारीलाई तालिम, सेमिनार, अन्तर्क्रियामा सहभागि गराएर गुणस्तरीय सेवा प्रदान गर्ने प्रकृया अघि बढाएको छ । दीर्घकालिन लगानी बढाउँदै बैंकले आफ्नो लगानीलाई दीर्घकालिन प्रकृतिका क्षेत्रमा समेत विस्तार गरिरहेको छ । रेमिट्यान्स कम्पनी, ब्रोकर कम्पनी र मर्चेन्ट बैंकिङमा हात हालिसकेको छ । बैंकले मेगा रेमिटको सञ्जाललाई विदेशमा समेत विस्तार गर्दै व्यवसायमा विविधिकरण गर्दै जाने बताएको छ । बैंकले सेयर ब्रोकर कम्पनी खोल्ने प्रक्रिया अघि बढाएको छ । बैंकले “मेगा सेयर क्यापिटल” नामको मर्चेन्ट बैंकिङ कम्पनी खोल्ने प्रक्रिया पनि अघि बढाएको छ । २० करोड चुक्ता पुँजीको कम्पनीले बैंकको आम्दानीको दायरा बढाउने अपेक्षा गरिएको छ । रोजगारीका अवसरहरु सृजना गर्ने उत्पादनमूलक व्यवसाय र क्षेत्रहरुमा लगानी वृद्धि गर्ने बैंकको नीति रहेको छ । साथै, नेपाल सरकारको राष्ट्रिय ढुकुटीलाई मजबुत बनाउन सुशासन र कर भुक्तानीमा थप योगदान दिने कम्पनीले बताएको छ । गत आर्थिक वर्षमा बैंक तथा वित्तीय संस्थातर्फ मेगाले सबैभन्दा बढी कर तिरेको थियो । बैंकले कम्पनीमा कार्यरत कर्मचारीहरुलाई सम्पत्तिको रुपमा लिई मानव संसाधनको शीप, दक्षता एवं नेतृत्व सक्षमता बढाउने कृयाकलापहरुलाई उच्च प्राथमिकता राखेको छ । बैंकले “मेगा संस्कृति” नामक नयाँ कार्यक्रम संचालन गर्दै छ । जसले कर्मचारीहरुमा संस्थाप्रतिको अपनत्वको भावना, मूल्य र मान्यतालाई अनुसरण गर्ने वातावरण सृजना गर्नेछ ।
