बिस्कुट, पान पराग, गुट्खा र चाउचाउका खोल सडकमा फाल्नेलाई ५० हजार जरिवाना
काठमाडौं । के तपाई बाटोमा हिड्दा चाउचाउ, बिस्कुट, पान पराग, चकलेट, गुड्खा खानु हुन्छ ? त्यसरी खाएपछि खोल चाँही बाटैमा फाल्नु हुन्छ ? अब सावधान हुनुहोस । अन्यथा ५० हजार जरिवानामा पर्नु हुनेछ । काठमाडौं महानगरपालिकाले केहिदिन भित्रै सडकमा जङक फुडका खोल फाल्नेलाई ५० हजारसम्म जरिवाना गर्ने व्यवस्था कार्यान्वयनमा ल्याउँदैछ । महानगरपालिकाको वातावरण विभागका प्रमुख हरि श्रेष्ठका अनुसार पहिलो चरणमा दरबारमार्ग, रत्नपार्क, शहिदगेट, पुतली सडक र बागबजार लगायतका क्षेत्रमा त्यस्तो व्यवस्था लागु गरिनेछ । पाइलट प्रोजेक्टको सफलतापछि मानिसहरुको धेरै आवतजावत हुने अन्य क्षेत्रमा पनि विस्तार गर्दै लगिने योजना रहेको श्रेष्ठले जानकारी दिए । त्यसका लागि महानगरपालिकाले सडक किनारमा यथेष्ठ मात्रामा फोहर राख्ने डष्टबीनको व्यवस्था गर्नेछ । पसल सञ्चालकहरुलाई पनि आफ्नो पसल अगाडी राखिने डष्टबीनहरुको उचित उपयोगका लागि अनुरोध गरिनेछ । ‘व्यापक मात्रामा जनचेतना फैँलाउँछौं, पसलेहरुलाई पनि जानकारी गराउँछौं, आवश्यक मात्रामा डष्टबीनहरुको व्यवस्था गर्छाै, नटेर्नेलाई कानुन अनुसार कारवाही गर्छाै’, महानगरपालिकाको वातावरण विभागका प्रमुख श्रेष्ठले विकासन्युजसँग भने । घर, पसलबाट फोहोर र फूटपाथमा हिड्ने वटुवाहरुबाट विष्कुटको खोल, पानपराग, गुड्खा, चुरोटको बट्टा आदि सडकमा फालेको पाइएकोले फेला परेपछि महानगरपालिकाले कडाई गरेको हो । नियम उल्लंघन गरेको फेला परेमा महानगरपालिकाको टोलीले ५० हजार रुपैंयासम्म जरिवाना गर्नेछ । फोहोरमैला व्यवस्थापन ऐन, २०६८ दफा ३८ को खण्ड क, ख, ग, घ र ङ बमोजिमको कसुुर गर्नेलाई ५ हजार देखि ५० हजार रुपैयाँसम्म जरिवाना गर्ने व्यवस्था रहेको छ ।
कुमारी बैंकले बढायो २७ प्रतिशत नाफा, सीसीडी खुकुलो बन्दै
काठमाडौं । कुमारी बैंकले यो आर्थिक वर्षको पुस महिनासम्म अघिल्लो वर्षको तुलनामा स्वतन्त्र नाफामा २७ प्रतिशत वृद्धि गरेको छ । बैंकको दोस्रो त्रैमासको लेखापरीक्षण नगरिएको वित्तीय विवरण अनुसार बैंकको नाफा ४८ करोडबाट बढेर ६१ करोड रुपैंया पुगेको छ । खुद नाफा भने बैंकले ५२ करोडबाट वृद्धि गरी ६८ करोड रुपैंया पुगेको छ । तीन महिनाकाे अवधिमा बैंकले रिजर्भमा गत असारको तुलनामा करिब ३३ करोड रुपैंया वृद्धि गरेको छ । बैंकले तीन महिनाको अवधिमा निक्षेपलाई ७२ अर्बबाट बढाएर ७५ अर्ब पुर्याउँदा कर्जा प्रवाह ६७ अर्ब ८२ करोडबाट बढाएर ७० अर्ब ७७ करोड पुर्याएको छ । यो आधारमा सीसीडी अनुपात ७८.०७ प्रतिशत कायम भएको छ । बैंकको पुँजी पर्याइतता अनुपात १२.८१ प्रतिशत, निष्क्रिय कर्जा अनुपात १.२२ प्रतिशत, कस्ट अफ फण्ड ८.१२ प्रतिशत, बेसरेट ११.५५ प्रतिशत र ब्याजको स्प्रडदर ३.३८ प्रतिशत कायम भएको छ । बैंकको चुक्ता पुँजी ७ अर्ब १६ करोड मात्र छ । नेपाल राष्ट्र बैंकले तोकेको चुक्ता पुँजी पुग्न बैंकलाई करिब १२ प्रतिशत पुँजी वृद्धि गर्न बाँकी छ ।
नेपाल रेमिटसँग कामना सेवाको विप्रेषण कारोबार सम्झौता
काठमाडौँ । कामना सेवा विकास बैंक लिमिटेड र नेपाल रेमिट इटरनेशनलप्रा. लि.बीच सोमबार विप्रेषण कारोबार सेवाप्रदानगर्ने गरि सम्झौतापत्रमा हस्ताक्षर भएको छ । सम्झौता अनुसार अब बैंकका ग्राहकहरुले मुलुकभर फैलिएका ६३ वटै शाखाहरुबाट सहज रुपमा नेपाल रेमिट इटरनेशनल प्रा.लि.को विप्रेषण कारोबार सेवा प्रदान गर्न सक्ने छन् । सम्झौतासँगै बैंकको व्यवसाय प्रवर्धनमा सहयोग पुग्नुका साथै ग्राहकहरु लाभान्वित हुने बैंकले जनाएको छ । सम्झौतापत्रमा कामना सेवा विकास बैंकको तर्फबाट डिपोजिट तथा ट्रान्जेक्सन बैकिङ्ग प्रमुखसुवास भट्टराई र नेपाल रेमिट इटरनेशनलप्रा. लिको तर्फबाट कार्यकारी निर्देशकश्री सुमित मित्तलले हस्ताक्षर गरेका छन् । काठमाडौं-३०, ज्ञानेश्वरमा केन्द्रीय कार्यालय रहेको बैंकले देशका विभिन्न भागहरुमा ६३ वटा शाखा तथा १७ वटा एटीएम मार्फत ग्राहकहरुलाई सेवा प्रदान गर्दै आएको छ ।
स्ट्याण्डर्ड चार्टर्ड बैंकको साढे १७ प्रतिशत नगद लाभांश पास
काठमाडौं । स्ट्याण्डर्ड चार्टर्ड बैंक नेपाल लिमिटेडको प्रस्तावित १७.५० प्रतिशत नगद लाभांश पास भएको छ । सोमबार सम्पन्न बैंकको ३२औँ वार्षिक साधारणसभाले कम्पनी सञ्चालक समितिको उक्त प्रस्तावलाई पारित गरेको हो । बैंकले गत आर्थिक वर्षको नाफाबाट सेयरधनीलाई चुक्ता पुँजीको सो मात्राको नगद लाभांश वितरण गर्ने छ । हाल बैंकको चुक्ता पुँजी ८ अर्ब एक करोड रुपैयाँ रहेको छ । एनएफआरएस अनुसार बैंकले कर पछिको खुद मुनाफा अघिल्लो वर्षको तुलनामा ४१ प्रतिशतले वृद्धि गरी २ अर्ब १९ करोड रुपैयाँ पुर्याएको छ । २८ वाणिज्य बैंकहरुमा २ अर्ब बढी नाफा कमाउने ५ कम्पनीमध्ये एक हो । त्यस्तै, कम्पनीको आयमा वृद्धि भई प्रतिसेयर आम्दानी ४.५६ प्रतिशतले बढेर २७.३३ रुपैयाँ पुगेको छ । बैंकको ५० प्रतिशत भन्दा बढी रुपैयाँ जगेडा कोषमा रहेको छ । त्यस्तै, बैंकको खुद ब्याज आम्दानी ७० र आधार दर ८ प्रतिशत रहेको छ ।
१० लाख धरौटी बुझाएर रिहा भए पूर्व गभर्नर तिलक रावल
काठमाडौँ । पोलिमर नोट छपाइमा प्रकरणमा पक्राउ परेका पूर्व गभर्नर तिलक रावल १० लाख रुपैयाँ धरौटीमा रिहा भएका छन् । भ्रष्टचार मुद्दामा पक्राउ परेका रावल सोमबार रिहा भएका हुन् । अख्तियार दुरुपयोग अनुसन्धान आयोगले दायर गरेको मुद्दामा सोमबार हाजिर हुन आएका रावलको बयान र थुनछेक बहसपछि विशेष अदालतले धरौटीमा रिहा गर्ने आदेश दिएको हो । विशेष अदालतका रजिष्ट्रार भीम श्रेष्ठका अनुसार रावलले १० लाख रुपैयाँ नगद नै बुझाएर रिहा भएका छन् । रावलविरुद्ध ९१ लाख रुपैयाँको बिगो दावीसहितको मुद्दा परेको थियो।
गुराँस लाइफ इन्स्योरेन्स र कामना सेवाविकास बैंकबीच बैंकास्योरेन्स सम्झौता
काठमाडौं । गुराँस लाइफइन्स्योरेन्स कम्पनी र कामना सेवाविकास बैंकबीच बैंकास्योरेन्स सम्झौता भएको छ । बैंकको केन्द्रिय कार्यालय तथा देशभर रहेका शाखा कार्यालयहरु मार्फत गुराँस लाइफ इन्स्योरेन्स कम्पनीको वार्षिक नगदफिर्ता जीवनवीमा सम्बन्धि सम्झौता भएको हो । सम्झौतामा इन्स्योरेन्सको तर्फबाट प्रमुख कार्यकारी अधिकृत नारायणकुमार भट्टराई र बैंकको तर्फबाट निमित्त प्रमुख कार्यकारी अधिकृत प्रविण बस्नेतले हस्ताक्षर गरेका छन् । योजनामा सार्वधिक, आजीवन र पेन्सन जीवनबीमा योजना सहित १२ वटा जीवनबीमा योजना विक्रीगर्ने तथा बीमीतहरुलाई छिटो, छरितो एवं भरपर्दो सेवा पुर्याउने उद्देश्येले दुई संस्थाकाबीच बैंकास्योरेन्स सम्झौता हो । सेवाविकास बैंक लिमिटेडका ग्राहकहरुले बैंकको कुनैपनि शाखाबाट यस कम्पनीको जीवनबीमा सम्बन्धि सम्पूर्ण सेवा सहज रुपले लिन सक्नेछन् । गुराँस लाइफ इन्स्योरेन्स कम्पनीले हालमात्र नेपालको जीवन बीमाबजारमा नौलो र योजनाहरु प्रस्तुत गरेको छ ।
बीमा किन गर्ने, के छन् फाईदा ?
बीमा भनेको भविष्यमा हुने जोखिमको अग्रिम सुरक्षा गर्ने प्रक्रिया हो । यो प्रक्रिया दुईपक्ष बीचमा गरिने करार हो । जसमा एकपक्षको क्षति हुँदा अर्को पक्षले त्यसको क्षतिपूिर्त व्यहोर्छ । यसलाई बीमाको कानुनी परिभाषा मान्दा हुन्छ । सामाजिक रुपमा बुझ्दा बीमा भनेको गुठी बराबर हो । जसमा सबैको योगदान रहन्छ र आवश्यकतामा काम लाग्छ । जस्ले प्रिमियम तिर्छ, उस्को भविष्यको सुरक्षा हुन्छ । बीमा गर्नेहरु नै एक अर्काका सहयोगी जस्ता हुन्छन् । धेरैबाट जम्मा गरेर थोरैलाई दिने कुरापनि बीमाको विशेषता भित्रै पर्छ । बीमा भनेको जोखिमलाई सार्ने हो । यहीँ अर्थमा पनि बीमा भनेको जोखिम हस्तान्तरण हो । बीमाले जोखिम न्यूनीकरण गर्ने नभई हस्तान्तरण गर्ने कार्य गर्दछ । बीमा किन गर्ने ? जीवनमा जोखिमहरु आउने भएकाले बीमा गर्नुपर्छ । जोखिमले हामीलाई सधैँ जसो पिरोलिरहन्छ । यस्ता जोखिमबाट बच्न नसकिने भएकाले आफूलाई सकेसम्म सुरक्षित राख्न बीमा आवश्यक छ । हाम्रो जीवनमा सधैँ एकनास हुँदैन । जीवन धरापमा परेको बेलामा बीमा हाम्रो सहयोगी हुन्छ । जीवन मात्र नभई सम्पत्तिपनि जोखिममा पर्छ । यस्ता जोखिमका कारणले हामी त्रसित र ग्रसित जीवन बिताउन बाध्य हुन्छौँ । भूईँचालोले घर भत्काउन सक्छ, आगो लाग्न सक्छ, बाढी पहिरोले हामीलाई सताउन सक्छ । यस्ता विपत्तको बेलामा पुनस्र्थापना हुन पीडितको क्षमताले भ्याउँदैन । यही जोखिमबाट बच्न बीमा गर्न आवश्यक हुन्छ । हामीले पोलिसी किनेपछि कम्पनीले हामीलाई सुरक्षा दिन्छ । घरको कमाउने मान्छे बिरामी हुँदा परिवारका अन्य सदस्यको बिचल्ली हुन्छ । खेतबारीमा सुख्खापन आउँदा, किरा लाग्दा बर्षभरीको अन्नबाली समेत जोखिममा पर्ने गर्छन् । यस्तै कारणले गर्दा बीमा गर्नु आश्यक छ । के छन् बीमामा फाईदा ? बीमामा अनेकौं फाईदाहरु रहेका छन् । यसलाई शब्दमानै व्याख्या गर्दा जोखिम विरुद्धको सुरक्षण बीमाको राम्रो पक्ष हो । हामीले बीमा गरेपछि एक किसिमको ढुक्क हुने वातावरण पाउछौँ । यो पनि बीमाको सुन्दर पक्षमा पर्छ । बीमा चेतनाको स्तर कस्तो छ ? बीमा चेतनाको स्तर हालसम्म सुधारमूलक अवस्थामा नै रहेको छ । कतिपयलाई अझैपनि बीमाका बारेमा थाहै छैन । बीमा गर्न चाहनेले पनि सुविधाका बारेमा राम्रो जानकारी नलिएको पाइन्छ । जोखिमपूर्ण कतिपय ठाउँमा समेत बीमा नगरेको उदाहरण हामी कहाँ धेरै छन् । यी कुराहरु बीमाका समस्याका रुपमा रहेका छन् । बीमा बुझाउनलाई के गर्नु भएको छ त ? यहीँ माघ १ गतेदेखि बीमा समितिले नयाँ निर्देशिका लागू गरेको छ । सो निर्देशिकामा बीमामा अनिवार्यताका केही शर्तहरु थप गरेको छ । हामीले जनहितका लागि भनेर नै हामीले अग्नि बीमा तथा भुकम्पको बीमामा अनिवार्यता गरेका छौं । यसरी बीमालाई अनिवार्य गर्दा आवश्यक बेलामा पीडितले त्यसको लाभ उठाउन सक्छन् । सर्वसाधारणको हितलाई नै मध्यनजर गरेर बीमा सम्बन्धी यस्ता योजना आउने गरेका छन् । बीमा बाध्यकारी हुनु कस्तो कुरा हो ? बीमालाई बाध्यकारी बनाउनु रामो कुरा होईन । यसमा हामीले करलागी तथा जबरजस्तीका काम गर्न मिल्दैन र गरेका छैनौँपनि । कुरा के हो भने अग्नि तथा भुकम्प जस्ता कुराको बीमा गर्दा त्यसले जनताको हित नै गर्छ । यसरी हित गर्ने कुरा बाध्यता भन्दा आवश्यकताको कुरा हो । चेतनाको स्तरमा वृद्धी गरेर तथा बीमा तालिम सञ्चालन गरेर बीमामा सहभागिता बढाउन सकिन्छ । व्यक्तीले आफैंले बुझेर बीमामा पोलिसी किन्ने हो । बीमा समितिले सामाजिक सुरक्षाको दृष्टिकोणका आधारमा बीमाका पोलिसी अनिवार्य गरेको हो । बीमाका आफ्नै सुन्दर पक्ष रहेकाले हामीले यसको बारेमा अध्ययन, अनुसन्धान गरेर कम्पनीलाई जोखिमको हस्तान्तरण गर्नु आजको आवश्यकता हो । (बीमा विज्ञ शर्मासँग विकासन्यूजका लागि नबिन पोखरेलले गरेको कुराकानीमा आधारित)
सिभिल बैंक र एशियन लाइफ इन्स्योरेन्सबीच सेवा सम्बन्धि सम्झौता
काठमाडौं । सिभिल बैंकले जीवनवीमा सेवालाई विस्तारका लागि एशियन लाइफ इन्स्योरेन्ससंग सम्झौता गरेको छ । उक्त सम्झौतापत्रमा सिभिल बैंकका तर्फबाट प्रमुख कार्यकारी अधिकृत गोविन्द गुरुङ र एशियन लाइफ इन्स्योरेन्सका तर्फबाट प्रमुख कार्यकारी अधिकृत राजेशकुमार श्रेष्ठले हस्ताक्षर गरेका हुन् । अब एशियन लाइफका वीमा सेवालाई विना झन्झट सिभिल बैंकका देशभर छरिएका ७१ शाखाहरु मार्फत उपलब्ध गरी ग्राहक वर्गलाई प्रत्यक्ष रुपमा लाभान्वित हुने कुरा बैंकका प्रमुख कार्यकारी अधिकृत गोविन्द गुरुङले बताए । सिभिल बैंकले यस अघि पनि जीवनवीमा कम्पनीहरु त्था निर्जी वनवीमा कम्पनीहरुसंग सम्झौता गरी जीवन वीमा तथा निर्जीवन वीमा सेवा उपलब्ध गराउँने भएको छ ।
