एनसीसी बैंक र ओम हस्पिटलबीच सेवा सम्बन्धि सम्झौता
काठमाडौं । नेपाल क्रेडिट एण्ड कमर्स बैंक र ओम हस्पिटल एन्ड रिसर्च सेन्टरबीच बैंकका कर्मचारी तथा ग्राहकहरूलाई उपचार शुल्कमा सहुलियत दिने विषयमा सम्झौता भएको छ । सम्झौतापत्रमा नेपाल क्रेडिट एण्ड कमर्स बैंकका तर्फबाट प्रमुख कार्यकारी अधिकृत रमेशराज अर्याल र ओम हस्पिटल एण्ड रिसर्च सेन्टरका तर्फवाट प्रबन्ध निर्देशक बाबुकाजी कार्कीले हस्ताक्षर गरेका थिए । सम्झौता अनुसार, नेपाल क्रेडिट एण्ड कमर्स बैंकका कर्मचारी तथा ग्राहकले ओम हस्पिटल एन्ड रिसर्च सेन्टरका सेवामा विशेष छुट व्यवस्था रहेको छ । बैंकका ग्राहकहरूले उक्त छुट, बैैकको डेबिट अथवा क्रेडिट कार्ड प्रयोग गरी बिल भुक्तानी गर्दा पाउन सक्नेछन् । बैंकले आफ्ना १२२ वटा शाखाहरुबाट बैंकिङ्ग सेवाका साथै ७४ वटा एटिएमहरु सञ्चालनमा रहेको छ ।
लगानीकर्ता संरक्षण कोषमा जम्मा भयो १२ करोड, पूँजी बजारको विकासमा खर्च गर्न सकिने
काठमाडौं । लगानीकर्ता संरक्षण कोषमा १२ करोड ६५ लाख ९ हजार ७१६ रुपैयाँ जम्मा भएको छ । कम्पनी ऐन, २०६३ को दफा १८३ अनुसर स्थापना भएको कोषमा आर्थिक वर्ष २०७४/७५ मा १० करोड ९५ लाख १५ हजार ७२० रुपैंयाँ जम्मा भएको हो । त्यसैगरी चालू आर्थिक वर्षको माघ महिनासम्म १ करोड ६९ लाख ९३ हजार ९९५ रुपैयाँ जम्मा भएको कम्पनी रजिष्ट्रार कार्यालयको तथ्याङ्कमा छ । कम्पनी रजिष्ट्रार कार्यालयका रजिष्ट्रार भुवनहरि अर्यालले लगानीकर्ता संरक्षण कोषमा पैसा जम्मा भैरहेको बताए । लगानीकर्ता संरक्षण कोषमा यो आर्थिक वर्षमा कति कम्पनीबाट कति रकम आयो ? चालू आर्थिक वर्षमा बोटलर्स नेपाल लिमिटेडको ७९ हजार ९१४, सिटिजन्स् इन्टरनेसनल बैंक लिमिटेडको ४० लाख २८ हजार ९३३ , जनता बैँक नेपाल लिमिटेडको १ करोड १९ लाख ५७ हजार ९७ , सिद्धार्थ इन्स्योरेन्स लिमिटेडको ५ लाख १ हजार ७३० र हिमालयन जनरल इन्स्योरेन्स लिमिटेडको ८५ हजार ८७२ रूपैयाँ जम्मा भएको छ । के हो लगानीकर्ता संरक्षण कोष ? क. लगानीकर्ताले आइपिओ खरिदका लागि आवेदन दिएको, तर सेयर नपरेको रकममा ५ वर्षसम्म लगानीकर्ताको दाबी प्रस्तुत हुन नआएको रकम । ख. ५ वर्ष सम्मपनि लगानीकर्ताले बुझि नलिएको लाभांशको रकम । ग. खण्ड (क) तथा (ख) बमोजिमको रकममा प्राप्त ब्याज, लाभाँश वा अन्य प्रकारबाट बढे बढाएको रकम, घ. नेपाल सरकार, कुनै दातृ संस्था वा कुनै व्यक्ति वा निकायबाट प्राप्त रकम । ङ. अर्थ मन्त्रालयको पूर्व स्वीकृतिमा कुनै बिदेशी दातृसंस्था, व्यक्ति वा निकायबाट प्राप्त हुने रकम । कोषको सवै रकम कुनै बाणिज्य बैंकमा छुट्टै खाता खोली राखिनेछ । रकम जम्मा गर्नु भन्दा अगाडि १ महिनाको म्याद दिई उक्त म्याद भित्र सो रकम बुझ्न आउनु भनि राष्ट्रिय दैनिकमा सूचना प्रकाशन गर्नु पर्नेछ । कोषको मूल खातामा जम्मा रहेको रकम सम्बन्धित व्यक्तिले दाबी गर्न आएमा फिर्ता गर्ने बाहेक अन्य कार्यमा खर्च गर्न नपाउने व्यवस्था छ । तर, मूल खातामा रहेको रकम नमासिने गरी नेपाल राष्ट्र बैंकबाट जारी गरिने ऋणपत्र, कुनै वाणिज्य बैंकको मुद्दती खाता, नागरिक लगानी कोषको एकाङ्क योजना जस्ता ब्याज, लाभाँश वा अन्य आय प्राप्त हुने कार्यमा समितिको निर्णयबाट लगानी गर्न भने पाइनेछ । सो रकमबाट पूँजी बजारको विकास तथा बिस्तारको कामपनि गर्न सकिने कार्यविधिमा उल्लेख छ ।
दक्षिणकाली बोसन महोत्सव माघ १९ गते, ४ होमस्टे उद्घाटन हुँदै
काठमाडौं । दक्षिणकाली नगरपालिले बोसन महोत्सव गर्ने भएको छ । धार्मिक, साँस्कृतिक तथा पर्यटन प्रर्वद्धन गर्नका लागि नगरले महोत्सव गर्न लागेको हो । माघ १९ गते विभिन्न मौलिक सास्कृतिक कार्यक्रम गर्ने नगपालिकाको तयारी छ । स्थानीय स्तरबाटै पर्यटन विकासको काम गर्न दक्षिणकाली नगरपालिका लागि परेको नगर प्रमुख मोहन बस्नेतले बताए । उनका अनुसार महोत्सव उद्घाटन गर्नका लागि प्रदेश ३ मुख्यमन्त्री डोरमणी पौडेललाई बोलाइएको छ । कार्यक्रम बिहान ८ बजेदेखि बेलुका ५ बजेसम्म हुनेछ । महोत्सवमा विभिन्न कलाकारहरुको साँस्कृतिक प्रस्तुतिसँगै स्थानीय परिकारहरुको स्वाद लिन पाइने आयोजकले जनाएको छ । नगरले महोत्सवस्थल पुग्नका लागि ४ वटा बसको समेत व्यवस्था गरको छ । बस बल्खुदेखि कार्यक्रम स्थलसम्म चल्नेछ । समृद्ध पर्यटकिय दक्षिणकाली नगर, कृषि उद्यमी साँस्कृतिक शहर भएकोले नगर पर्यटकहरुले मन पराउने आयोजकले विस्वास लिएको छ । ४ होमस्टे सञ्चालन हुँदै महोत्सवको अवसरमा नगरभित्र ४ वटा होमस्टे उद्घाटन गर्ने कार्यक्रम पनि रहेको छ । मुख्यमन्त्री पौडेलले होमस्टेको उद्घाटन गर्नेछन् । होमस्टेको सबै तयारी सकिसकेको नगर प्रमुख बस्नेतले जानकारी दिए । उनका अनुसार ४ वटा होमस्टेमा फरक खालको मौलिक खानाको स्वाद लिन पाइनेछ । होमस्टे सञ्चालकले नै पर्यटकलाई विविध साँस्कृतिक स्थानहरुमा भ्रमण गराउनेछ । होमस्टेले एकैदिन २ सय व्यक्तिलाई सेवा दिन सक्नेछ ।
बाक्लो हिमपात भएसँगै दोलखामा पर्यटकको घुइँचो, पहिलाे रोजाइ कालीञ्चोक
काठमाडौं । दोलखाको उच्च भूभागमा केही दिनदेखि बाक्लो हिमपात भएसँगै हिउँ खेल्ने पर्यटकको घुइँचो लागेको छ । जिल्लाको पर्यटकीय क्षेत्र कालीञ्चोक, शैलुङ, खरिढुङ्गा, जिरी, च्योर्दुङ, खावालगायत उच्च भूभागमा बाक्लो हिमपात भएको छ । हिमपात पछि दोलखामा हिउँ खेल्नकै लागि दैनिक हजारौँको सङ्ख्यामा आन्तरिक तथा बाह्य पर्यटक आउने गरेका छन् । जिल्ला आउने अधिकांश पर्यटकको पहिलो रोजाइ कालीञ्चोक परेको छ । पर्यटक प्रायः कालीञ्चोकको कुरी जाने, हिउँसँग रमाउने र केबुलकार चढ्ने उद्देश्यले दोलखा आउने गरेको पाइएको छ । शुक्रबार र शनिबार मात्र करीब १० हजार पर्यटक हिउँ खेल्न दोलखा आएको उद्योग वाणिज्य सङ्घका अध्यक्ष सुन्दर कार्कीले बताएका छन् । कालीञ्चोकको कुरीमा मात्र करीब तीन हजार पर्यटक राख्न सकिने होटल सञ्चालनमा छन् । ती सबै होटल एक सातासम्मका लागि बुकिङ भइसकेको होटल सुनपातीका सञ्चालक हरि ओलीको भनाई रहेको छ । होटल सबै बुकिङ भए पनि बाक्लो हिमपातका कारण गाडी पाँच किमी तलबाटै कुरीसम्म पुग्न नसकेकोलो समस्या भएको जनाएका छन् । हिउँका कारण कुरीसम्म पुग्नका लागि समस्या भएपछि चरिकोटक होटल समेत भरिभराउ छन् । निरन्तर हिउँ परिरहेको हुँदा कालीञ्चोकमा पिउने पानीको सबैभन्दा ठूलो समस्या भएको स्थानीय होटल व्यवसायी सोनाम शेर्पाले बताएका छन् । ट्याङ्करबाट पानी ल्याउने गरिएकामा हिउँका कारण यातायात अवरुद्ध भएकाले खाद्यान्नसमेत अभाव हुन थालेकाले कालीञ्चोकका सबै होटल बन्द गर्नुपर्ने स्थिति आउँन सक्ने बताएका छन् । कालीञ्चोकमा यातयात सञ्चालन गरी खाद्यान्न तथा पानीको आपूर्ति सहज बनाउन प्रयास भइरहेको जिल्ला प्रहरी प्रमुख वासुदेव पाठकले बताए । केही दिनदेखि लगातार हिमपात भएसँगै कुरी तथा कालीञ्चोक मन्दिर आसपासमा तीन फिटभन्दा बढी हिँउ जमेको छ । अठ्तीस हजार बयालिस मिटरको उचाइमा रहेको कालीञ्चोकमा पुसदेखि फागुनसम्म हिमपात हुने गर्छ । राजधानी काठमाडौँबाट १३३ किमी को सडक यातयताबाट चरिकोट पुगेपछि १७ किमी दूरी पार गरेर कालीञ्चोक पुग्न सकिन्छ । हिमपातसँगै सय थुम्का रहेका शैलुङमा पनि हिउँ खेल्न आउने पर्यटको सङ्ख्या वृद्धि भएको शैलुङ गाउँपालिका प्रमुख भरत दुलालले बताएका छन् । जिल्लाको खरीढुङ्गा, च्योर्दुङ, खावा, डाँङ्डगे डाँडालगायत क्षेत्रमा पनि हिउँ खेल्ने आन्तरिक पर्यटकको चाप बढ्दै गएको छ । रासस
गुडविल फाइनान्सको नाफा ३ करोड २२ लाख
काठमाडौं । गुडविल फाइनान्सले ३ करोड २२ लाख नाफा कमाएको छ । कम्पनीले २०७५ पुस मसान्त अवधीमा कमाएको यो नाफा २०७४ पुसको भन्दा १४ लाखले बढी हो । फाइनान्सले असोज मसान्तमा ५ अर्ब ६० करोडमा रहेको निक्षेपलाई वृद्धि गरेर पुस मसान्त आईपुग्दा ६ अर्ब २६ करोड पुर्याएको छ । कम्पनीले असोजमा ४ अर्ब ९४ करोड रहेको कर्जा लगानीलाई पुसमा वृद्धि गरेर ५ अर्ब ३७ करोड पुर्याएको छ । ८० करोड चुक्ता पुँजी रहेको गुडविल फाइनान्सको जगेडा कोषमा १५ करोड रुपैंयाँ रहेको छ । ७२.९२ प्रतिशत सिडी रेसियो रहेको कम्पनीको खराब कर्जा ०.८५ प्रतिशत मात्रै रहेको छ । आधार ब्याजदर १३.५० प्रतिशत रहेको गुडविलको कस्ट अफ फण्ड १०.५५ प्रतिशत रहेको छ । कम्पनीको प्रति सेयर आम्दानी ८.०६ रुपैंयाँ रहेको छ ।
एभरेष्ट इन्स्योरेन्सको संस्थापक सेयर लिलामीमा, कतिमा भर्ने ?
काठमाडौं । एभरेष्ट इन्स्योरेन्स कम्पनीको संस्थापक सेयर लिलामी हुने भएको छ । कम्पनीले सार्वजनिक सूचना प्रकाशित गरेर १ लाख ९७ हजार ७ सय १७ कित्ता संस्थापक हकप्रद सेयर लिलामी गर्न लागेको जानकारी दिएको हो । एभरेष्ट इन्स्योरेन्सले संस्थापक सेयरधनीहरुका लागि एक कित्ता बराबर १.०५ कित्ताका दरले १४ लाख ३ हजा ३ सय २५ कित्ता हकप्रद सेयर निष्काशन गरेको थियो । सोमध्ये बिक्रि नभएको करिब २ लाख कित्ता सेयर लिलाम बढाबढमा बिक्रि गर्न लागिएको हो । एभरेष्ट इन्स्योरेन्स कम्पनीको संस्थापक सेयर खरिद गर्न चाहने लगानीकर्ताहरुले माघ २८ गतेभित्र न्युनतम १०० कित्ता हुने गरि आवेदन दिन सक्नेछन् । कम्पनीले सिद्धार्थ क्यापिटललाई बिक्रि प्रबन्धक तोकेको छ । कम्पनीको सेयर मूल्य हाल ८४० रुपैंयाँ कायम रहेको छ ।
एनआईसी एशिया बैंकको नयाँ शाखा झापाको दमक चोकमा, वासलात २१८ अर्बको
दमक । एन आई सी एशिया बैंक लि.को दमक नगरपालिका वडा नं. ५, क्याम्पसमोड झापा स्थित दमक चोक शाखाको दमक नगरपालिकाका मेयर रोम नाथ ओलीले उद्घाटन भएको छ । यस शाखाले गत भदौं १६ गतेबाट कारोबार सञ्चालन गर्दै आएको छ । बैंकलाई आम जनमानसले गरेको प्रगाढ विश्वास, अगाध स्नेह र बैंक प्रतिको भरोसाले गर्दा मुलुकभर २७५ शाखा कार्यालयहरु, २८९ एटिएम, ३९ वटा एक्सटेन्सन काउण्टर एव्ं २३ वटा शाखा रहित बैंकिङ्ग ईकाई मार्फत बैंकिङ्ग सेवा प्रदान गर्ने मुलुककै सबैभन्दा ठूलो शाखा सञ्जाल भएको बैंक हुन सफल भएको छ । बैंकको वासलातको आकार रू. २१८ अर्ब भन्दा बढि पुगेको छ भने कुल निक्षेप करिब रू. १७५ अर्ब तथा कर्जा रू. १४९ अर्ब पुगि निजी क्षेत्रबाट स्थापित बैंकहरु मध्ये नेपालको सबैभन्दा ठूलो बैंकको रुपमा आफ्नो पहिचान बनाउन सफल भइसकेको छ । हालसम्म यस बैंकमा ग्राहकको संख्या करिब १४ लाख ५० हजार रहेको छ ।
युराेपकाे १७ देशमा ५०० दरको युरो नोट प्रतिबन्ध, कारका उपभाेक्ताले जनाए विराेध
फ्रान्कफर्ट/युरोपेली केन्द्रीय बैंक (इसीबी) ले ५०० दरको युरो नोट विस्थापन गर्ने तयारी अन्तिम चरणमा पुगेको जनाएको छ । दैनिक जीवनमा कमै प्रयोग हुन थालेपछि इसीबीले उक्त बैंक नोट हटाउन लागेको हो । कतिपय अपराधीहरुले सजिलोका निम्ति यो बैंक नोट प्रयोगमा ल्याएका भए पनि नगदमै कारोबार गर्न रुचाउने जर्मनीका आम नागरिकलाई इसीबीको यो निर्णयले खिन्न बनाएको छ । आइतबारदेखि नै १९ मध्ये १७ वटा युरोपेली मुलुकहरुका केन्द्रीय बैंकहरुले बैजनी रङ्गको ५०० दरको नोट जारी गर्न छाड्नेछन् । जर्मनी र अस्ट्रियाका केन्द्रीय बैंकले मात्र केही समय यो नोट प्रचलनमा ल्याउनेछन् । युरोपेली केन्द्रीय बैंकको विज्ञप्ति अनुसार सहज वातावरण निर्माणका लागि अप्रिल २६ सम्म यी दुई मुलुकले ५०० दरका बैंक नोट प्रयोग गर्नेछन् । जर्मनीको मार्गबर्गका मेडिकल प्राविधिज्ञ रल्फले युरोपको सबैभन्दा ठूलो एकल मुद्रा अर्थात् ५०० दरको नोट विस्थापित गर्न लागेकामा असन्तोष प्रकट गरे । उनले ५०० नोटले कारको किस्ता तिर्ने गरेको अनुभव सुनाए । “मलाई धेरै रकम भुक्तानी गर्नुपर्दा ठूलै बैंक नोट चाहिन्छ, र यो मलाई मन पनि पर्छ । यसको अर्थ म आपराधिक चरित्रको व्यक्ति त होइन ।” इसीबीको यो निर्णयसँगै युरोपेली क्षेत्रका अरु बैंकहरुले पनि विस्तारै यो नोट जारी गर्न र लिन बन्द गर्नेछन् । इसिबीले यसको साटो अरु कम मूल्यका नोटहरुको संख्या बढाउनेछ । तर, घरमा ५०० का नोट राख्दैमा आत्तिनु पर्दैन, किनभने यी सबै नोटको वैधानिकता सुनिश्चित गरिएको छ । याे नाेटकाे प्रयाेग भने कम छ । गत महिना युरो नोटको प्रवाह हुँदा ५०० दरको नोटको हिस्सा करिब २ प्रतिशत मात्र थियो ।
