मेलम्चीको ठेक्का आज तोडिँदै, तयार भयो ३ महिने योजना
काठमाडौं । मेलम्ची खानेपानी आयोजनाको ठेक्का आज तोडिने भएको छ । मेलम्ची खानेपानी विकास बोर्डले आज ठेक्का तोडिएको पत्र पठाउन लागेको हो । त्यसका लागि हाल खानेपानी मन्त्रालयमा छलफल भैरहेको छ । ‘मन्त्रालयमा छलफल भैरहेको छ, आज ठेक्का तोडिएको पत्र पठाउँछौं’, मेलम्ची खानेपानी विकास बोर्डका प्रवक्ता राजेन्द्र पन्तले विकासन्युजसँग भने । आयोजनाले ३ महिनाभित्र मेलम्चीको काम सक्ने गरि कार्ययोजना समेत तयार पारेको छ । ठेक्का सम्झौता कुनै एउटा पक्षले १४ दिनसम्म काम नगरेमा ठेक्का रद्धको पत्र पठाउन सकिने व्यवस्था छ । आयोजनाले इटालियन ठेकेदार कम्पनी सिएमसीलाई सम्पर्कमा आउन १४ दिन अघि पत्र पठाएको थियो । सो पत्रको जवाफ नआएपछि आयोजनाले आज ठेक्का तोड्न लागेको हो । आयोजना कसरी अघि बढाउने भन्ने सम्बन्धी कार्ययोजना तयार भैसकेको छ । अब भ्याट बाहेक २ अर्बको काम बाँकी रहेको छ । आगामी ३ महिनाभित्र सुन्दरीजलमा पानी ल्याउने गरि कार्ययोजना तयार भएको प्रवक्ता पन्तले जानकारी दिए । ‘ठेक्का लागेको मितिले ३ महिना भित्र सुन्दरीजलमा पानी झार्ने योजनासहित नयाँ ठेक्का लगाउने तय भएको छ’, पन्तले भने ।
काठमाडौंमा २८४ वटा सार्वजनिक शौचालय थपिने
काठमाडौं । काठमाडौं महानगरभित्र २८४ वटा सार्वजनिक शौचालय सञ्चालन गर्न सकिने अध्ययन प्रतिवेदनले सुझाव दिएको छ । काठमाडौंको सहरी आवश्यकता पूरा गर्न भएकालाई स्तर उन्नति गर्ने, केही नयाँ ठाउँमा थप गर्ने शिफारिस गर्दैै प्रतिवेदनले, शौचालयलाई सशुल्क चलाउने कि निशुल्क चलाउने? भन्ने नीतिगत व्यवस्था गर्नुपर्ने खाँचो देखाएको छ । यस सम्बन्धि अध्ययन गर्न माघ ६ गते गठन भएको कार्यदलले सोमबार, सार्वजनिक शौचालय निर्माणका लागि ठाउँ पहिचान गर्ने, निर्माण तथा सञ्चालन ढाँचा तयार गर्ने अधिकार सम्पन्न समितिका संयोजक एवं काठमाडौं महानगरकी उपप्रमुख हरिप्रभा खड्गी श्रेष्ठलाई बुझाएको प्रतिवेदनले यस्तो खाँचो देखाएको हो । यस प्रतिवेदनले अहिले ५८ वटा सार्वजनिक शौचालय सञ्चालनमा रहेको तथ्यमा टेकेर भएका शौचालयको अवस्था परिवर्तन तथा सुविधा थप गरेर तत्काल महसुस गर्न लायक सुधार आउने प्रतिवेदनको सुझाव दिएको छ । अहिले सञ्चालनमा रहेका शौचालयहरु वरिपरिबाट पसलले घेरिएको अवस्थामा छन् । साधारण मान्छेले शौचालय कहाँ छन् छुट्याउनै सक्दैनन् । कतिपय शौचालय पैसा उठाउन मात्र चलेका छन् । त्यहाँ न सरसफाइ छ । न पानीको प्रबन्ध छ । न उझ्यालो छ । यसरी चलेका शौचालयलाई व्यापारभन्दा सेवाका लागि रुपान्तरण गर्नुपर्छ । प्रतिवेदनमा भनिएको छ —पहिलो चरणमा भएकालाई सुधार गर्ने र त्यसपछि क्रमश नयाँ निर्माण तथा आधुनिक शौचालय थप गर्नुपर्छ । यसमा कर्मचारी सञ्चय कोष, खाद्य संस्थान, सांस्कृतिक संस्थान, गुठी संस्थान, त्रिभुवन बिश्वविद्यालयजस्ता निकायसँग समन्वय गर्दा १२ वटा शौचालय थप गर्न सकिने देखाइएको छ भने आयल निगमले सञ्चालन गरेको पेट्रोल पम्पमा ७२ वटा शौचालय थप्न सकिने देखाइएको छ । महानगरभित्रका व्यवसायिक भवनहरु (सपिङ् कम्प्लेक्स र मलहरु) मध्ये ६७ वटामा सार्वजनिक शौचालय सञ्चालन गर्न सम्भव छ । उनीहरुसँग छलफल गर्नुपर्छ, प्रतिवेदनले देखाएको अर्को सम्भावना हो । कार्यदलले महानगरका ५७ स्थानमा शौचालय राख्न सकिने सम्भावना देखाएको छ । वडाध्यक्षहरुसँगको छलफलपछि यो स्थान बढ्न पनि सक्छ । यी स्थानहरुमा शौचालय बनाउँदा आवश्यकतालाई आधार बनाउनु पर्छ । यसरी हेर्दा टेकु चोक, सानेपा पुल, कालीमाटी, कलंकी, सीतापाइला, बालाजु, माछा पोखरी, गोङ्गबु प्रहरी चौकी, महाराजगञ्ज, सुकेधारा, चाबहिल, मित्रपार्क, जयबागेश्वरी पहिलो चरणमा काम गर्नु पर्ने स्थानका रुपमा शिफारिस भएका छन् । यससँगै गौशाला, तीनकुने, कोटेश्वर, नयाँ बानेश्वर, बबरमहल, थापाथली, त्रिपुरेश्वर, सुन्धारा, एनएसि, जुद्ध शालिक आसपास, हनुमान ढोका, जमल, लैन चौर सोह्रखुट्टे, बल्खु र कुलेश्वर पनि पहिलो चरणमा काम गर्नु पर्ने स्थानमा रुपमा शिफारिस छन् । यी बाहेकका स्थानमा दोश्रो चरणमा काम गर्दा चाप व्यवस्थापन हुनेछ । प्रतिवेदन बुझिसकेपछि समितिकी संयोजक एवं महानगरकी उपप्रमुख श्रेष्ठ खड्गीले — कामको थालनी भइरहेका शौचालयको अवस्था र व्यवस्थामा सुधार गरेर अघि बढ्ने बताउनुभयो । मैले समितिका सदस्य १५ वटाका अध्यक्ष ईश्वरमान डंगोल र १८ वटाका अध्यक्ष न्हुच्छकाजी महर्जनसँग छलफल गरिसकेकी छु । शौचालय वरिपरि भएका पसल हटाएर शौचालयलाई टाढैबाट देख्ने बनाउने बिषयमा हाम्रो एउटै मत छ । पहिले शौचालय देखिनुप¥यो, त्यसपछिको खाली ठाउँमा बगैचा बनाउनु प¥यो । त्यसका लागि यस अघि भएका सम्झौताका बुँदाहरु अध्ययन गर्छौं । प्रतिवेदन बुझाउने क्रममा कार्यदलका संयोजक एवं सार्वजनिक निजी साझेदारी इकाइका प्रमुख ध्रुबकुमार काफ्लेले — अहिले चलेका कतिपय शौचालयमा चुकुनल नभएको, साबुनको व्यवस्था नभएको, अपाङ्गमैत्री नभएको, प्रकाशको व्यवस्था नभएको, महिलाहरुलाई स्यानिटरी प्याड फेर्ने तथा फाल्ने ठाउँ नभएको देखिएको उल्लेख गर्दै यी आधारभूत सुविधा नियमन गर्न सके मात्रै पनि तत्काल सुधार देखिने बताउनुभयो । हामीले शौचालय निर्माण सञ्चालन र व्यवस्थापनका लागि ई—ट्वाइलेट, स्मार्ट र इको जस्ता विभिन्न ढाँचा शिफारिस गरेका छौं । निर्णयकर्तालाई सजिलो होस् भनेर निर्माण तथा सञ्चालनतर्फ महानगर आफैले बनाउने तथा चलाउने, निजी क्षेत्रलाई बनाएर चलाउन दिने, सामाजिक उत्तरदायित्व अन्तर्गत बनाउने तथा चलाउन दिनेजस्ता बिकल्प प्रस्ताव गरेका छौं । त्यस्तै महिला, पुरुष, अपाङ्गता भएका व्यक्तिले प्रयोग गर्ने शौचालयका लागि आवश्यक पर्ने न्युनतम पूर्वाधार पनि शिफारिस गरिएको छ, काफ्लेको भनाइ छ ।
मल्लकालिन शैलिमै रानीपोखरीको पुननिर्माण, विद्या सुन्दरको जिम्मेवारी खोसियो
काठमाडौं । सरकारले रानीपोखरी पुनर्निर्माणको जिम्मेवारी राष्ट्रिय पुनर्निर्माण प्राधिकरणलाई प्रदान गरेको छ । माघ १४ गतेको मन्त्रिपरिषद्को बैठकले रानीपोखरी र बालगोपालेश्वर मन्दिर लगायत सो क्षेत्रमा रहेका पुरातात्विक संरचनाहरुको पुनर्निर्माण सम्बन्धी सम्पूर्ण कार्य प्राधिकरणले गर्ने गरी जिम्मेवारी दिने निर्णय गरेको हो । प्राधिकरणका प्रमुख कार्यकारी अधिकृत सुशील ज्ञवालीले पुरातत्व विभाग, काठमाडौं महानगरपालिका, विज्ञ, सरोकारवाला संघसंस्था, स्थानीय समुदाय लगायतसँगको परामर्श र समन्वयमा प्रताप मल्लकालीन शैली, प्रविधि र निर्माण सामग्रीको प्रयोग गरी पुनर्निर्माण गर्ने बताए । ‘परम्परागत शैली र मौलिकतालाई विेशेष ध्यान दिई पुनर्निर्माण कार्यलाई तत्काल अघि बढाइनेछ’, उनले भने । रानीपोखरीमा रहेको बालगोपालेश्वर मन्दिरको पुनर्निर्माण गुम्बज शैलीमा गर्ने कि ग्रन्थकुट।शिखर शैलीमा गर्ने भन्ने विवाद थियो । विज्ञहरुले दिएको सुझाव समेतका आधारमा प्राधिकरणले संस्कृति, पर्यटन तथा नागरिक उडडयन मन्त्रालय, पुरातत्व विभाग एवं काठमाडौं महानगरपालिका लगायतसँग समन्वय तथा सहजीकरण गरी ग्रन्थकुट।शिखर शैलीमा पुनर्निर्माण गर्ने निर्णय गरिसकेको छ । प्राधिकरणले भूगर्भविद्हरुबाट रानीपोखरीमा पानी कसरी जम्मा गर्न सकिन्छ र कसरी अड्याउन सकिन्छ भन्ने अध्ययन गराएको थियो । विज्ञहरुले तीन सय फिट तलबाट पानी निकाल्न सकिने र कालीमाटीको प्रयोग गरी पानी अड्याउन सकिने प्रतिवेदन दिएका छन् । ‘हामीले रानीपोखरीको वरिपरीको भाग पनि प्रताप मल्लकालीन शैलीमा पुनर्निर्माण गर्नेछौ, प्रमुख कार्यकारी अधिकृत ज्ञवालीले भने ।
अर्थमन्त्री डा. खतिवडा भन्छन्ः नेपालमा लगानीका लागि उपयुक्त समय हो
काठमाडौँ । अर्थमन्त्री डा युवराज खतिवडाले नेपालमा लगानीको उपयुक्त वातावरण रहेको बताएका छन् । साउदी अरेबियाका राजदूत मुसैदविन सुलेइमन आइ मारवानसँगको भेटमा मन्त्री डा खतिवडाले नेपालमा लगानीको उचित अवसर भएको बताएका हुन । अर्थमन्त्री खतिवडाले पूर्वाधार तथा औद्योगिक क्षेत्रमा लगानी गर्न आग्रह पनि गरे । नेपालको सिँचाइ, ऊर्जा, भौतिक संरचना विकासका लागि साउदी कोषले सहयोग गरेकोमा साउदी सरकारलाई मन्त्री खतिवडाले धन्यवाद पनि दिए । करीब चार लाख नेपाली कामदार साउदी अरेबियामा कार्यरत भएको भन्दै उनले साउदी सरकारले नेपालीलाई रोजगारी दिएर केही हदसम्म नेपालको गरीबी न्यूनीकरण, शिक्षा, स्वास्थ्य र जनजीवनको सुधारमा महत्वपूर्ण भूमिका खेल्नुका साथै नेपालको अर्थतन्त्रमा समेत सहयोग पु¥याएको बताए । मन्त्री खतिवडाले आगामी चैत १५ र १६ गते नेपालमा हुन लागेको लगानी सम्मेलनमा साउदी अरेबियाका लगानीकर्तालाई बढीभन्दा बढी सहभागी गराउन दूतावासमार्फत सन्देश प्रवाह गर्नुपर्ने बताए । नेपालमा गौतमबुद्ध अन्तर्राष्ट्रिय विमानस्थल छिट्टै सञ्चालनमा आउन लागेकाले साउदी नागरिकलाई पर्यटकको रुपमा नेपाल भित्र्याउने र नेपाली कामदारलाई सिधै आवतजावत गर्न सहज हुने उल्लेख गरे । भेटमा साउदी अरेबियाका राजदूतले साउदी फण्डमार्फत नेपालमा भूकम्पपछिको पुनःनिर्माण, शिक्षा, स्वास्थ्य र निजी आवास निर्माणमा सहयोग गर्न विभिन्न चरणका छलफल र वार्ता अघि बढेको बताए । नेपालमा लगानी र सहयोग गर्न साउदी अरेबिया तयार रहेको भन्दै राजदूतले दुवै देशबीच उच्चस्तरीय भ्रमण गरी सम्बन्धलाई थप उचाइमा पु¥याउने विश्वास व्यक्त गरे । रासस
एनसीसी बैंकको कमालः नाफा १३७ प्रतिशतले बढेर ६४ करोड
काठमाडौं । एनसीसी बैंकले १३७ प्रतिशतले नाफा वृद्धि गरेको छ । २०७४ पुसमा २७ करोेड नाफा आर्जन गरेको बैंकले २०७५ पुसमा ६४ करोड नाफा कमाएको हो । जुन अघिल्लो पुसको भन्दा ३७ करोड अर्थात १३७ प्रतिशतले बढी हुन आउँछ । २०७४ पुसमा जम्मा ६७ करोड ब्याज आम्दानी गरेको बैंकले यसपाली १ अर्ब ४६ करोड ब्याज आम्दानी गरेको देखिन्छ । बैंकले पछिल्लो ३ महिनामा ६२ अर्बको निक्षेपलाई ६४ अर्ब पुर्याएको छ भने ५६ अर्बको कर्जा लगानीलाई ५८ अर्ब बनाएको छ । बैंकको सिडी रेसियो ७८.२१ प्रतिशत रहेको छ । चुक्ता पुँजी ७ अर्ब १ करोड रहेको बैंकको जगेडा कोषमा ४ अर्ब १७ करोड रुपैंयाँ रहेको छ । बैंकको आधार ब्याजदर १०.८७ प्रतिशत रहँदा प्रति सेयर आम्दानी २१.१२ रुपैँया कायम भएको छ । ३.५३ प्रतिशत खराब कर्जा रहँदा कष्ट अफ फण्ड ७.९५ प्रतिशत रहेको छ ।
नेपाल बंगलादेश बैंकको नाफा ४१.८६ प्रतिशतले वृद्धि
काठमाडौं । नेपाल बंगलादेश बैंकको नाफा ४१.८६ प्रतिशतले वृद्धि भएको छ । २०७४ पुसमा ४३ करोड नाफा गरेको बैंकले २०७५ पुसमा १८ करोड अर्थात ४१.८६ प्रतिशतले वृद्धि गरेर आफ्नो नाफा ६१ करोड पुर्याएको हो । बैंकर्स संघका अध्यक्ष ज्ञानेन्द्र ढुंगाना सिइओ रहेको बैंकले सो मात्रामा नाफा वृद्धि गरेको हो । बैंकको निक्षेप पछिल्लो ३ महिनामा ५ अर्ब निक्षेप वृद्धि गरेको छ । असोज मसान्तमा ४७ अर्ब निक्षेप रहेको बैंकले पुस मसान्तमा ५२ अर्ब पुर्याएको हो । बैंकले सोही अवधीमा कर्जा लगानी ४८ अर्बबाट बढाएर ५१ अर्ब पुर्याएको छ । बैंकको सिडी रेसियो भने ७७.२९ प्रतिशत पुगेको छ । बैंकको खुद ब्याज आम्दानी १ अर्ब ३९ करोड पुगेको छ । नेपाल बंगलादेश बैंकको आधार ब्याजदर १०.८२ प्रतिशत छ भने कष्ट अफ फण्ड ७.५८ प्रतिशत रहेको छ । १.७८ प्रतिशत खराब कर्जा रहेको बैंकको प्रति सेयर आम्दानी १९.६२ रुपैंयाँ रहेको छ ।
ब्रोकर कम्पनीलाई मर्जरमा लैजाने बोर्डको तयारी, ६ जिल्लाकाे कारोबार नेप्सेमार्फत हुँदै
काठमाडौं । नेपाल धितोपत्र बोर्डले धितोपत्र दलाल व्यवसायी(ब्रोकर कम्पनी)ले अर्को ब्रोकर कम्पनीलाई प्राप्ति गर्ने र गाभ्ने/गाभिने सम्बन्धमा नीतिगत व्यवस्था शुरु गर्ने तयारी गरेको छ । बोर्डले धितोपत्र दलाल व्यवसायलाई थप प्रतिस्पर्धी बनाउन वाणिज्य बैंकको सहायक कम्पनी तथा ब्रोकर कम्पनीहरुबीच मर्जरको कार्यलाई जोड दिएको हो । त्यस्तै, बोर्ड धितोपत्र दलाल व्यवसायी सम्वन्धी विद्यमान इजाजत र संचालन नीतिमा पुनरावलोकन गर्न धितोपत्र व्यवसायी नियमावली, २०६४ संशोधन मस्यौदा तयार गर्ने क्रममा रहेको बोर्डले जारी गरको विज्ञप्तिमा उल्लेख छ । ब्रोकर कम्पनीको शाखा कार्यालय स्थापना कार्यलाई समेत अझ व्यवस्थित बनाउन नियमावलीमा थप व्यवस्था गरे पश्चात सो प्रक्रिया अगाडि बढाइने बोर्डले जनाएको छ । यसबाट धितोपत्रको दोस्रो बजार सबै प्रदेश सदरमुकाममा हुनुका साथै आर्थिक रुपले सक्रिय जिल्ला/स्थानहरुमा बजार विकास हुने छ । यसका साथै, कुल कारोबार संख्यामा समेत वृद्धि हुने बोर्डको अपेक्षा रहेको छ । हाल धितोपत्र दलाल व्यवसायीले शाखाबाट हुने कारोबार सम्वन्धित धितोपत्र दलाल व्यवसायीको केन्द्रीय कार्यालयमा आवद्ध भई नेप्सेको प्रणालीमार्फत हुने व्यवस्था हुन लागेको बोर्डले जनाएको छ । बोर्डले हाल धितोपत्र दलाल व्यवसायीको शाखा नपुगेका जिल्ला/स्थानहरु महेन्द्रनगर (कञ्चनपुर), बिरेन्द्रनगर (सुर्खेत), घोराही, तुलसीपुर (दाङ), भैरहवा (रुपन्देही) र जनकपुर (धनुषा) मा शाखाबाट हुने कारोबार सम्वन्धित धितोपत्र दलाल व्यवसायीको केन्द्रीय कार्यालयमा आवद्ध गराउन धितोपत्र दलाल व्यवसायीलाई निर्देशन दिएको छ । साथै, बोर्डले उक्त स्थानको कारोबार केन्द्रीय कार्यालयमा आवद्ध गराई नेप्सेको प्रणाली मार्फत हुने व्यवस्था गराउन आठ धितोपत्र दलाल व्यवसायीलाई शाखा खोल्न आवश्यक पूर्वाधार तयार गर्न सूचित गरेको छ । यसबाट धितोपत्रको दोस्रो बजार सबै प्रदेश सदरमुकाममा हुनुका साथै आर्थिक रुपले सक्रिय जिल्ला/स्थानहरुमा बजार विकास हुँदै जाने भई कुल कारोबार संख्यामा समेत वृद्धि हुने बोर्डको अपेक्षा रहेको छ ।
हुण्डी कारोबारी रामेश्वर शाहसहित ८ जना विरुद्ध साढे १२ अर्बको मुद्धा
काठमाडौं । हुण्डी कारोबारमा संलग्न रामेश्वर शाहसहित ८ जना विरुद्ध १२ अर्ब ५४ करोडको मुद्धा दायर भएको छ । राजश्व अनुसन्धान विभागले जिल्ला अदालत धनुषमा ८ जना हुण्डी कारोबारी विरुद्ध ४ अर्ब १६ करोड ३३ लाख ९ सय १० रुपैंयाँ विगो र विगाको तेब्बर जरिवाना हुने गरि मुद्धा दायर गरेको महानिर्देशक दिर्घराज मैनालीले जानकारी दिए । विभागले शाहकी पत्नि मिनादेवी साह, विजय यादव, मोख्तर अहमद, सन्तोष महतो, नरेश महतो, सुरज ठाकुर र पप्पु कुमार दास विरुद्ध मुद्धा हालेको हो ।
