रौतहटको गढीमाई नगरपालिकाका मेयर र वडाध्यक्ष विद्युत् चोरीमा संलग्न
काठमाडौं । रौतहटको गढीमाई नगरपालिका मेयर र वडाध्यक्ष विद्युत चोरीमा संलग्न रहेको पाइएको छ । नेपाल विद्युत प्राधिकरणको विद्युत चुहावट नियन्त्रण महाशाखा काठमाडौंबाट खटिएको टोलीले मेयर श्यामप्रसाद यादव (ग्राहक नं ००८।१३।०१) र वडा नम्बर ६का वडाध्यक्ष रामसिंघासन यादव (ग्राहक नं ०७।२०।०३ ए) र गरुडा नगरपालिका–१का वडाध्यक्ष सरोज राय यादव (ग्राहक नं १८।०८।१९)ले आफ्नो घरमा विद्युत चोरी गरी प्रयोग गरेको फेला पारेको हो । प्राधिकरणका कार्यकारी निर्देशक कुलमान घिसिङले गौर क्षेत्रमा विद्युत चोरी अत्याधिक रहेको गुनासो आएपछि महाशाखाका इन्जिनियर प्रदिपकुमार शर्माको नेतृत्वमा छड्के चेकजाँच टोली खटाएका थिए । जनताबाट निर्वाचित मेयर र वडाध्यक्ष नै विद्युत चोरीमा संलग्न हुनु दुर्भाग्यपूर्ण रहेको घिसिङले बताए । टोलीले गत १४–२० माघमा रौतहटमा गरेको छड्के चेकजाँचको क्रममा गढीमाई नगरपालिकाको बिनगरमा रहेको दुईवटा घरमा मेयर श्यामप्रसाद यादवले हुकिङ गरी विद्युत् प्रयोग गरिरहेको फेला पारेको हो । टोली प्रमुख शर्माले हुकिङ गरेर प्रयोग गरिएको लाइन काटिएको तर सुरक्षाका कारण मेयरको घरमा राखिएको मिटर खोल्न नसकिएको बताए । ‘घर पछाडि रहेको प्राधिकरणको वितरण लाइनबाट हुकिङ गरेर ल्याएको तारबाट एउटा घरमा बिजुली प्रयोग गरिएको रहेछ, त्योभन्दा अलि पर रहेको अर्को घरमा मिटर छ, त्यहाँबाट पनि चोरी गरेर बत्ति बालिएको घरमा लाइन ल्याइएको छ’, उनले भने,‘त्यो घरमा चोरी गरेको र नगरिएको दुवै लाइन जोडिएको रहेछ, हुकिङ काट्यौं तर चोरीको बत्ति प्रयोग गरिरहेको फेला परेपछि मान्छेको भीड जम्मा भयो उनीहरुले मिटर खोल्न दिएनन् ।’ तर, मेयरले विद्युत चोरी गरेको मुचुल्का तयार गरेको र त्यसमा मेयरका भाइ संजिवकुमार यादवले सही गरेको शर्माले जानकारी दिए । उनले मुचुल्लाको फाइल गौर शाखालाई दिएर विगो तथा त्यसमा लाग्ने जरिवाना लगायतका कानुनी कारबाही गर्न निर्देशन दिइएको बताए । टोलीले गढीमाई नगरपालिकाको वडा नम्बर ६का वडाध्यक्ष रामसिंघासन यादवले आफ्नो घरमा, वडा कार्यालयमा र धरमपुर स्वास्थ्य चौकीमा चोरीको विद्यत् प्रयोग भइरहेको फेला पारेको छ । ‘वडाध्यक्षको घरमा धेरै विद्युत खपत गर्ने सामाग्री प्रयोगमा रहेछन्, मिटरको सर्भिस केबल खोली राखेको तर हुकिङमार्फत घरमा वत्ति प्रयोग गरिएको रहेछ’, शर्माले भने,‘त्यस क्षेत्रमा चोरी अध्याधिक रहेकाले विद्युत आपूर्ति गर्ने टान्सफर्मरबाट लाइन काटेर आएका छौं ।’ गरुडा नगरपालिका १का वडाध्यक्ष्यक्ष सरोज राय यादवले मिटर बाइपास गरी घरमा बिजुली प्रयोग गरेका थिए । टोलीकाअनुसार, वडाध्यक्षले आफ्नो घरमा मात्रै हैन दाजुभाइको घरमासमेत चोरीको विद्युत दिएका थिए । वडाध्यक्षहरुले चोरी गरेको विद्युतको विगो र त्यसमा लाग्ने जरिवाना लगायतका कानुनी कारबाही गौर वितरण केन्द्रले गर्ने छ । प्राधिकरणका कार्यकारी निर्देशक कुलमान घिसिङले विद्युत चुहावट नियन्त्रणलाई उच्च प्राथमिकतामा राखी हरेक बितरण तथा ग्राहक सेवा केन्द्रलाई चुहावट घटाउने टार्गेट दिएका छन् । यसका लागि चोरी नियन्त्रण गर्ने, महशुल बक्यौता असुलीमा कडाई गर्ने, प्राविधिक चुहावट घटाउन ट्रान्सफर्मर तथा बितरण लाइनको सदृढीकरण लगायतका काम अभियानकै रुपमा चलाइएको छ । प्राधिकरणले बढी विद्युत चोरी हुने क्षेत्रमा लोडसेडिङ गर्ने, विद्युतको नियमित आपूर्तिका लागि टान्सफर्मर नथप्ने तथा मर्मत समेत नगर्ने नीति लिएको छ ।
नेकपाले भन्योः भेनेजुयलामाथी हस्तक्षेप हुनुहुन्न
काठमाडौं । नेपाल कम्युनिष्ट पार्टी(नेकपा)ले भेनेजुयलामाथी बाह्य हस्तक्षेप हुनु नहुने धारणा राखेको छ । सोमबार बसेको नेकपा सचिवालय बैठकले भेनेजुयलामा उत्पन्न राजनीतिक संकटको समाधान त्यहिँका जनताले शान्तिपूर्ण माध्यमबाट खोज्नुपर्ने बताएको हो । ‘हाम्रो पार्टीले हरेक देशको सार्वभौमसत्ता, स्वतन्त्रता र भौगोलिक अखण्डतालाई सम्मान गर्दछ । कुनै पनि देशको आन्तरिक मामलामा बाह्य हस्तक्षेप हुन नहुने र कुनै पनि देशमा कुनै प्रकारको समस्या पैदा भएमा त्यसै देशका जनताले स्वतन्त्रतापूर्वक शान्तिपूर्ण बाटोबाट समाधान गर्नुपर्दछ भन्ने मान्यता राख्दछ ।’, नेकपाले विज्ञप्तिमा भनेको छ । नेकपाले आफु संयुक्त राष्ट्र संघको वडापत्र र पञ्चशिलको अवधारणामा अडिक रहेको पनि बताएको छ ।
कक्षा ११ ग्रेडवृद्धि परीक्षाको नतिजा आज आउने
काठमाडौं। राष्ट्रिय परीक्षा बोर्डले कक्षा ११ को ग्रेडवृद्धि परीक्षाको नतिजा सोमबार साँझ प्रकाशित गर्ने तयारी गरेको छ । राष्ट्रिय परीक्षा बोर्डका अध्यक्ष चन्द्रमणी पौडेलका अनुसार सोमबार नतिजा सार्बजनिक तयारी स्वरुप काम भैरहेको बताए । विभिन्न बिषयमा सी वा सो भन्दा कम ग्रेड ल्याउने विद्यार्थीको यहि पौष १४ गते देखि ग्रेडबृद्दी परीक्षा सुरु भएको थियो । नतिजा प्रकाशित भैसकेपछी नतिजा हेर्नको लागि NEB लेखी एउटा स्पेस दिएर 31003 मा म्यासेज पठाइ आफ्नो नतिजा हेर्न सकिनेछ।
हिमालय उर्जाले १४ करोड ८५ लाखको आईपीओ बिक्री गर्ने, पायाे बाेर्डकाे अनुमति
काठमाडौं । हिमालय उर्जा विकास कम्पनीले १४ करोड ८५ लाख रुपैयाँको आईपीओ जारी गर्ने भएको छ । नेपाल धितोपत्र बोर्डले सोमबार मात्र कम्पनीलाई सो मात्राको सेयर जारी गर्न अनुमति दिएको हो । बोर्डको अनुमति अनुसार कम्पनीले सर्वसाधारलाई अंकित मूल्य १०० रुपैयाँको दरले एक लाख ४८ हजार ५०० कित्ता आईपीओ जारी गर्ने छ । कम्पनीको सेयर बिक्री प्रबन्धकमा नबिल इन्भेष्टमेन्ट बैंकिङ रहेको छ ।
केपी ओलीका परराष्ट्र सल्लाहकार भन्छन्ः प्रचण्डको धारणा सरकारको होइन
काठमाडौं । प्रधानमन्त्री केपी ओलीका परराष्ट्र मामिला सल्लाहकार डा. राजन भट्टराईले पार्टी अध्यक्ष प्रचण्डको धारणा नै सरकारको धारणा नभएको स्पष्ट पारेका छन् । भेनेजुयला प्रकरणमा नेकपा अध्यक्ष प्रचण्डले जारी गरेको विज्ञप्तिमा उल्लेख गरिएको धारणा सरकारको धारणा हुन नसक्ने उनले स्पष्ट पारेका हुन् । राजधानीमा आयोजीत एक कार्यक्रममा उनले पार्टी र सरकारको आ आफ्नै सीमा र मर्यादा हुने भएकाले कतिपय पार्टीको धारणलाई सरकारकै आधिकारिक धारणाकै रुपमा बुझ्न नहुने विचार बताए । डा. भट्टराईले सरकार संयुक्त राष्ट्रसंघको बडापत्र, असंलग्नताको सिद्धान्त, पञ्चशीलका सिद्धान्तमा रहेर बनेको विदेश नीतिप्रति प्रतिबद्ध रहेको उल्लेख गर्दै कुनै पनि सार्वभौमसत्ता सम्पन्न देशमा आन्तरिक समस्या आउँदा त्यसको समाधानका लागि निर्णय गर्ने अधिकार त्यहि देशका जनताले पाउनुपर्छ भन्ने धारण नै सरकारको आधिकारिक धारणा रहेको बताए । उनले नेपालको अमेरिकासँग निकै लामो समयदेखि बहुआयमिक र गहिरो सम्बन्ध भएकाले कुनै विषयमा सामान्य मतान्तर रहेपनि त्यसले सदियौ देखिको सुमधुर सम्बन्धमा चिसोपना नआउने बताए ।
उद्योग क्षेत्रमा १५ % लगानी घट्यो, गतवर्ष १६ अर्ब, यसवर्ष १४ अर्ब मात्रै !
काठमाडौँ । अर्थतन्त्रको मेरूदण्डका रूपमा रहेको उद्योग क्षेत्रमा लगानी घट्दै गएको छ ।गत आर्थिक वर्षको साउनदेखि पुससम्मको तुलनामा यसवर्षको साउनदेखि पुससम्मको लगानी १५ प्रतिशतले लगानी घटेको छ । २०७४ साउनदेखि पुससम्मको तुलनामा २०७५ साउनदेखि पुससम्ममा ठूला, मझौला तथा साना उद्योगमा लगानी घटेको हो । उद्योग विभागको तथ्याङ्क अनुसार गत वर्षको साउनदेखि पुससम्म ठूला, मझौला तथा साना उद्योगमा १६ अर्ब ६८ करोड ४० लाख लगानी भएको थियो । २०७५ साउनदेखि पुससम्मको ६ महिनामा १४ अर्ब १५ करोड ३० लाख मात्रै उद्योगमा लगानी भएको छ । २०७४ साउनदेखि पुससम्मको तुलनामा यो वर्ष उद्योगमा २ अर्ब ५३ करोड १० लाखको रकम कमि आएको छ । अघिलो वर्षमा ८ वटा ठूला उद्योग दर्ता भएका थिए भने यसवर्ष ५ वटा मात्रै दर्ता भएका छन् । २०७४ साउनदेखी पुुससम्ममा दर्ता भएका उद्योगहरुमा ६ हजार ७५६ जनाले रोजगारी पाएका थिए । यो वर्षको छ महिनामा दर्ता भएका उद्योगहरुमा ७ हजार ४४० जनाले रोजगारी पाउने छन् । २०७४ मा १२ अर्ब ३२ करोड ८० लाखको लागतमा ८ वटा उद्योग विभागमा दर्ता भएको थियो भने यस वर्ष ८ अर्ब २२ करोड ८० लाखको लागतका ५ वटा मात्रै ठूला उद्योग दर्ता भएको छ । २०७४ साउनदेखी पुुससम्ममा ८९ करोड ६० लाखको लागतमा ४ वटा मझौला उद्योग दर्ता भएको थियो भने यो वर्षको २ अर्ब १२ करोड १० लाखको लागतका १० वटा मझौला उद्योग दर्ता भएको छ । २०७४ साउनदेखी पुुससम्म ३ अर्ब ४६ करोडको लागतमा १५६ वटा साना उद्योग दर्ता भएको थियो । २०७५ को साउनदेखी पुुससम्म ३ अर्ब ८० करोड २० लाखको १८० वटा साना उद्योग दर्ता भएको छ । मझौला र साना उद्योगको लगानी घटेपनि संख्यात्मक हिसावमा भने बृद्धि भएको छ । अघिल्लो वर्ष मझौला ४ र साना उद्योग १५६ दर्ता भएका थिए भने यसवर्ष मझौला १० र साना उद्योग १८० दर्ता भएका छन् । उद्योग विभागका महानिर्देशक विनोदप्रकाश सिंहले भने-‘ अघिलो वर्ष हाइड्रो दर्ता भएको थियो, यो वर्ष हाइड्रो दर्ता नभएकाले पनि उद्योगमा लगानी कमी भएको हो ।’ लगानीको संख्या घटेपनि उद्योग स्थापनाको संख्या र रोजगारी पाउने संख्या भने बढेको महानिर्देशक सिंहले बताए ।
काठमाडौंमा आगामी शैक्षिक सत्रदेखि अनिवार्यरूपमा स्थानीय पाठ्यक्रम लागू हुने
काठमाडौं। काठमाडौँ महानगरपालिकाले आगामी शैक्षिक सत्रदेखि अनिवार्य रूपमा स्थानीय पाठ्यक्रम लागू गर्ने भएको छ । कामपका शिक्षा विभाग प्रमुख सीताराम कोइरालाका अनुसार महानगरभित्र रहेका सबै सार्वजनिक, सामुदायिक र संस्थागत विद्यालयमा स्थानीय पाठ्यक्रम लागू गर्न लागिएको जानकारी दिए। नेपाल भाषा, दिगो विकास, वातावरण शिक्षा, ट्राफिक व्यवस्थापन र काठमाडौँको पुरानो भाषा र संस्कृतिसम्बन्धी विषय समावेश गरिने भएको हो । स्थानीय विषयवस्तु, आवश्यकता र सामग्री उपयोग हुनेगरी स्थानीय पाठ्यक्रम पढाउनुपर्ने भए पनि यसअघि विद्यालयले लागू नगरेकाले कामपाले यस किसिमको व्यवस्था लागू गर्न लागेको प्रमुख कोइरालाले जानकारी दिए। । विद्यालय व्यस्थापनको जिम्मा स्थानीय तहले पाएसँगै कामपाले यस किसिमको व्यवस्था गर्न लागेको हो । स्थानीयवासीको सबै आवश्यकता केन्द्रीय पाठ्ययक्रमले पूरा गर्न नसक्ने भएकाले पनि स्थानीय पाठ्यक्रम आवश्यक रहेको प्रमुख कोइरला बताउँछन्। कामपाले छनोट गरेको पाँच विषयवस्तुमध्ये इच्छानुरूप विद्यालयले एक विषय छनोट गर्न सक्नेछ । एक विषयको पूर्णाङ्क १०० हुनेछ । हाल कामपामा ९१ सार्वजनिक र करीब ६४३ संस्थागत विद्यालय सञ्चालनमा रहेका छन् । ती विद्यालयमा एक लाख ६५ हजार बालबालिकाले अध्ययन गर्दै आएका छन् । गोर्खा भूकम्पका कारण विद्यालयको भौतिक संरचनामा क्षति पुगेपछि कतिपय विद्यालय एउटै भवनमा बिहान र दिउँसो गरी दुई समयमा सञ्चालन हुँदै आएको छ । निजी विद्यालयले जुन समयमा पनि विद्यार्थी भर्ना लिने गरेको र सार्वजनिक विद्यालयका हकमा हरेक वर्ष चैत १५ गतेअगावै विद्यालयको विज्ञापन गर्न नपाइने र वैशाख पहिलो साता अर्थात् नतिजा प्रकाशन भइसकेपछि मात्र भर्ना लिन पाउने नीतिका कारणले पछिल्लो समय सार्वजनिक विद्यालयमा विद्यार्थीको सङ्ख्यामा कमी आएको छ । गतवर्ष २०७४ असोजदेखि विद्यालय गाभ्ने र नयाँका लागि अनुमति दिने विषयलाई लिएर विद्यालय निरीक्षक र स्रोतव्यक्तिले अनुगमन गरिरहेका छन् । प्रचलित शिक्षा ऐन, नियमावली र निर्देशिकामा रहेर कामपाले नयाँ विद्यालय खोल्न आवश्यक छ कि छैन, भौतिक संरचना, आवश्यक कागजातसहित स्थलगत अनुगमनका आधारमा विद्यालय थप र नयाँ खोल्नेबारेमा स्पष्ट हुन सकिने पनि जनाएको छ । विसं २०११ देखि नक्साङ्कनका आधारमा विद्यालय खोल्न दिनुपर्छ भन्ने अवधारणाका साथ विद्यालय सञ्चालन हुँदै आए पनि विसं २०२८ मा आएको शिक्षा ऐनको आधारमा विद्यालय सञ्चालन गर्ने अनुमति दिने गरिँदै आएको छ । रासस
एनआईसी एशिया बैंकको शाखा पर्वतको वारीवेनीमा
काठमाडौं । एनआईसी एशिया बैंकले वारीवेनी पर्वतस्थित वारीवेनी शाखाको विस्तार गरेको छ । उक्त शाखाको उद्घाटन सोमबार जलजला गाउँपालिकाका अध्यक्ष यामबहादुर मल्लले गरेका हुन् । मिति २०७५ वैशाख १९ गतेबाट कारोबार शुरु भएको उक्त शाखाको उद्घाटन समारोहमा मल्लले दुर्गम तथा ग्रामीण भेगमा समेत आफ्नाउपस्थिति सबल बनाउदै गएको यस बैंकको प्रशंसा गरेका छन् । हाल बैंकले २७५ शाखा कार्यालयहरु, २८९ एटिएम, ३९ वटा एक्सटेन्सन काउण्टर एव्ं २३ वटा शाखा रहित बैंकिङ्ग ईकाई मार्फत बैंकिङ्ग सेवा प्रदान गर्दै आएको छ । बैंकको वासलातको आकार २१८ अर्ब रुपैयाँभन्दा बढि पुगेको छ । कुल निक्षेप करिब १७५ अर्ब तथा कर्जा १४९ अर्ब रुपैयाँ पुगेको छ ।
