कल्याणकारी कोषमा जम्मा भयो २४ करोड, कुन बैंक तथा वित्तीय संस्थाले कति बुझाए ?
काठमाडौं । श्रम, रोजगार तथा सामाजिक सुरक्षा मन्त्रालय अन्तरगतको राष्ट्रियस्तरको कल्याणकारी कोषमा २४ करोड जम्मा भएको छ । पुस २५ गतेदेखि हालसम्म १० वटा बैंक तथा वित्तीय संस्थाले मात्र सो रकम कोषमा बुझाएका हुन् । प्रत्येक आर्थिक बर्षको अन्त्यसँगै कम्पनीहरुले बोनश वितरण गरेपश्चात बाँकी रहेको रकमको ३० प्रतिशत राष्ट्रियस्तरको कल्याणकारी कोषमा बुझाउनु पर्ने हुन्छ । सोही प्रावधान अनुसार सो रकम कोषमा बुझाइएको हो । गत पुस २५ गतेदेखि हालसम्म १० वटा कम्पनीले २४ करोड २९ लाख ११ हजार रुपैयाँ कोषको सचिवालयमा जम्मा भएको छ । यसरी कोषमा नागरिक लगानी कोषले पुस २७ गते ६४ लाख ८६ हजार ८ सय २६ रुपैयाँ बुझाएको छ । त्यसैगरी तिनाउँ विकास बैंकले पुस २८ गते १ लाख ३५ हजार ८ सय ३८ रुपैयाँ बुझाएको छ । यस्तै, लाइफ इन्स्योरेन्स कर्पोरेशन(नेपाल)ले माघ २ गते ५ लाख ६२ हजार ६ सय ९१ रुपैयाँ सचिवालयले जनाएको छ । ग्लोबल आईएमई बैकले माघ २ गते ३ करोड ८३ लाख ४७ हजार ८ सय ४० रुपैयाँ बुझाएको छ भने यसरी नै सिद्धार्थ बैकले माघ ७ गते ५ करोड ५ लाख ८८ हजार ९ सय २७ रुपैयाँ बुझाएको छ । यता, हायात रिजेन्सी होटलले माघ ७ गते १८ लाख ७३ हजार ३१ रुपैयाँ बुझाउँदा अग्नी इन्कर्पोरेट प्रालिले माघ १४ गते ५ करोड ९५ लाख १४ हजार ८ सय ५० रुपैयाँ बुझाएको छ । सञ्चालनमा रहेका सबै कम्पनीले बोनश वितरण गरेर बचेको रकमको ३० प्रतिशत हिस्सा कल्याणकारी कोषमा बुझाउनु पर्ने हुन्छ । तर, बैंक तथा वित्तीय संस्थाभन्दा बाहेकले सो नियमको पालना गरेका छैनन् । नेपाल एसबिआई बैंकले माघ १४ गते ४ करोड ६४ लाख ६९ हजार २ सय ५६ रुपैयाँ बुझाएको छ भने हिमालयन बैंकले माघ १४ गते ३ करोड ५९ लाख ८० हजार ४ सय ६० रुपैयाँ बुझाएको छ । यसैगरी राष्ट्रिय सहकारी बैंकले गत माघ १४ गते २९ लाख ५१ हजार ३ सय ७८ रुपैयाँ बुझाएको छ । राष्ट्रियस्तरको कल्याणकारी कोषकी कार्यक्रम तथा योजना अधिकृत गंगा केसीका अनुसार-‘सञ्चालनमा रहेका सबै कम्पनीले बोनश वितरण गरेर बचेको रकमको ३० प्रतिशत हिस्सा कल्याणकारी कोषमा बुझाउनु पर्ने बताइन् । तर, बैंक तथा वित्तीय संस्थाभन्दा बाहेकले सो नियमको पालना गरेका छैनन् । यसरी रकम बुझाउन ढिलाई गरेमा ५ हजार रुपैयाँसम्म जरिवानाको गर्ने व्यवस्था छ । साथै, अधिकृत केसीले नाफा कमाएर बोनस वितरण गर्ने कम्पनीहरुको हकमा यो नियम लाग्ने भएपनि हालसम्म कसैलाई सजाय नभएको उल्लेख गरिन् । कानूनी प्रावधान पालना नहुँदा कल्याणकारी कोषले सूचना मार्फत सचेत गराउँदै आएको छ । कल्याणकारी कोषमा जम्मा भएको रकम सामाजिक सुरक्षा कोषमा पठाइने बताइएको छ । रकम संकलनमा समस्यापछि राष्ट्रियस्तरको कल्याणकारी कोषको सचिवालयले पुस २५ गते बोनस नियमावली सम्बन्धी सूचनालाई जारी गरेको हो । सो सूचनामा उल्लेख भए अनुसार बोनस नियमावली २०३९ को नियम १२ ले प्रतिष्ठानले बोनस वितरण गरेको विवरण सम्बन्धित श्रम तथा रोजगार कार्यालयमा एक हप्ता भित्र पठाउनु पर्ने उल्लेख गरेको छ । साथै, १ महिना भित्र बोनस ऐनको दफा १३ बमोजिम ३० प्रतिशत रकम राष्ट्रिय स्तरको कल्याणकारी कोषमा जम्मा गर्नु पर्ने उल्लेख गरेको पाईन्छ ।
पोखरा फाइनान्सद्धारा विश्वविद्यालयलाई आधुनिक डस्टविन
काठमाडौं । पोखराको न्यृ्रोडमा प्रधान कार्यालय रहेको पोखरा फाइनान्स लिमिटेडले पोखरा विश्वविद्यालय परिसरको लागि आधुनिक डस्टविन वितरण गरेको छ । संस्थागत सामाजिक उत्तरदायित्व अन्तर्गत पोखरा विश्वविद्यालय परिसरको लागि आधुनिक डस्टविन वितरण गर्ने कार्य सम्पन्न गरेको छ । कार्यक्रममा पोखरा विश्वविद्यालयका व्यवस्थापन संकायका निर्देशक डा. रविन्द्र घिमिरे एवं वित्तीय संस्थाका कार्यकारी प्रमुख रवि चन्द्र गुरुङको उपस्थिति रहेको थियो ।
कारवाहीमा परे ६ हजार ट्याक्सी चालक, यसरी गरियो जरिवाना
काठमाडौँ । महानगरीय ट्राफिक प्रहरी महाशाखाले विभिन्न बहानामा यात्रुलाई ठग्ने छ हजार ६६४ ट्याक्सी चालकलाई कारवाही गरेको छ । महाशाखाको टोलीले चालु आर्थिक वर्षमा कानूनविपरीतका कार्य गरी मिटरमा जान नमान्ने, मिटर बिगार्ने, भाडा अनियमितता गर्ने, बढी भाडा लिने ट्याक्सीका चालकलाई कारवाही गरेको हो । महाशाखाले आव २०७२÷७३ मा दुई हजार ७९५, २०७३र७४ मा चार हजार ५१८ र २०७४÷७५ मा आठ हजार १२० ट्याक्सी चालकलाई कारवाही गरेको थियो । महाशाखाका प्रमुख एवं प्रहरी वरिष्ठ उपरीक्षक वसन्त पन्तले यात्रुसँग मोलमोलाइ गरी बढी भाडा लिने ट्याक्सी चालकका लागि विशेष अभियान सञ्चालन गरी कारवाही गरिएको बताए । “दैनिक ४० देखि ५० ट्राफिक प्रहरीलाई बढी भाडा लिने ट्याक्सी जाँचका लागि पठाउँदै आएका छौँ”, उनले भने । बढी भाडा लिने ट्याक्सी चालकसँग ट्राफिक प्रहरीले तीन हजार जरिवाना गर्ने गरेको छ । त्यस्तै, पाँच पटकभन्दा बढी बढीभाडा लिएर कारवाही पर्ने ट्याक्सी चालकको सवारी चालक अनुमतिपत्र निलम्बनका लागि यातायात व्यवस्था कार्यालयमा सिफारिस गर्ने गरिएको महाशाखाले जनाएको छ । मिटरमा जान नमान्ने, ट्याक्सीको मिटर बिगार्ने र बिग्रेको मिटरसमेत समयमा नबनाउने ट्याक्सी चालकलाई भने ५०० देखि एक हजार ५०० सम्म जरिवाना गर्ने गरिएको पन्तले बताए । ट्याक्सी प्रयोग गर्दा बढी भाडा लिने, मिटरमा जान नमान्ने, यात्रुले चाहेको स्थानमा जान नमानेमा तत्काल खबर गर्न महाशाखाले आग्रहसमेत गरेको छ ।
सांग्रिला डेभलपमेन्ट बैंक र नेपाल मेडिसिटीबीच स्वास्थ्य–उपचार सम्बन्धी सम्झौता
कठमाडौं । सांग्रिला डेभलपमेन्ट बैंक लिमिटेड र नेपाल मेडिसिटीबीच स्वास्थ्य उपचार सम्बन्धी सम्झौता भएको छ । बैंकको तर्फबाट प्रमुख कार्यकारी अधिकृत सुयोग श्रेष्ठ र हस्पिटलको तर्फबाट महा प्रबन्धक विजय रिमालले उक्त सम्झौता पत्रमा हस्ताक्षर गरेका छन् । सम्झौतामा सांग्रिला डेभलपमेन्ट बैंकका कर्मचारी तथा यस विकास बैंकको भिसा डेविट कार्ड प्रयोगकर्ताहरुले बैंकको हाल संचालनमा रहेका ८० वटै शाखाका ग्राकहरुलाई नेपाल मेडिसिटीले प्रदान गर्ने स्वास्थ्य सेवाहरुमा विशेष छुट पाउने छन । यसरी बैंकले आफ्ना ग्राकहरुलाई बैंकिङ्ग सेवाको अतिरीक्त नेपाल मेडिसिटीले प्रदान गर्ने स्वास्थ्य सम्बन्धी विभिन्न उपचारहरुमा पनि विशेष छुटका दिने जनाएको छ ।
क्रिकेट टोलीले विश्वमा नेपालको इज्जत बढाएः प्रचण्ड
काठमाडौँ । नेपाल कम्युनिष्ट पार्टी (नेकपा)का अध्यक्ष पुष्पकमल दाहाल ‘प्रचण्ड’ले नेपाली राष्ट्रिय क्रिकेट टोलीले विश्वमै नेपालको सम्मान र इज्जत बढाएकामा बधाई तथा शुभकामना दिएका छन् । इतिहासमा नाम लेखाउन सफल सो टोलीसँग आज आफ्नै निवास खुमलटामा भेटवार्ताका क्रममा उनले यस्तो सद्भाव व्यक्त गरेका हुन् । अध्यक्ष दाहालले नेपालको ऐतिहासिक जितले आफू र आफ्नो पार्टी खुशी भएको पनि बताएको उनको सचिवालयले जनाएको छ । देश समृद्धिको यात्रामा अघि बढेका बेला राष्ट्रिय एकतालाई मजबुत पार्न क्रिकेट खेलमा भएको प्रगतिले ठूलो भूमिका निर्वाह गरेको उनको भनाइ थियो । अध्यक्ष दाहालले राज्यले खेल क्षेत्रलाई विशेष महत्व दिएको र चितवनमा बन्ने रङ्गशालाबाट क्रिकेट खेलको विकासमा थप योगदान पुग्ने बताए । आफ्नातर्फबाट यो खेलको विकास र खेलाडीको मनोबल उच्च राख्न सक्दो सहयोग गर्नेसमेत उनले बताए । अध्यक्ष दाहाललाई भेट्न पुगेका टोलीमा नेपाल क्रिकेट सङ्घका पदाधिकारी, प्रशिक्षक र कप्तान पारस खड्कासहित अन्य खेलाडीको सहभागिता थियो ।युएइविरुद्ध एकदिवसीय र टि २० अन्तर्राष्ट्रिय शृङ्खलामा नेपाली क्रिकेट टोली विजयी भएको थियो ।
पूर्वी चितवनमा जैविक पर्यटकीय पार्कको डिपिआर बन्यो
काठमाडौं । पूर्वी चितवनको राप्ती नगरपालिकामा निर्माण हुन लागेको जैविक पर्यटकीय पार्कको विस्तृत परियोजना प्रतिवेदन (डिपिआर) तयार भएको छ । शिखर हरियाली सामुदायिक वन उपभोक्ता समूहको क्षेत्रभित्र निर्माण हुन लागेको सो पार्कको डिपिआर निर्माण सकिएको हो । डिपिआर निर्माणसँगै एक महीनाभित्र निर्माणको काम शुरु गरिने उपभोक्ता समूहका अध्यक्ष केदार आचार्यले जानकारी दिएका छन् । बहुवर्षीय योजनाको रुपमा रहेको पार्क रु ७ करोड ५० लाख लागतमा पाँच वर्षभित्र निर्माण सम्पन्न गरिने आचार्यले बताए । करीब रु १० लाखको लागतमा स्वराज कन्सल्टेन्टले डिपिआर निर्माणको काम सम्पन्न गरेको हो । निर्माणाधीन अवस्थामा नै तीन वर्षमा पार्क सञ्चालन गर्ने सामुदायिक वनको तयारी छ । घुम्न आउने पर्यटकलाई मनोरञ्जन प्रदान गर्नुका साथै वनस्पतीसम्बन्धी शिक्षा दिनु पार्क निर्माणको मुख्य उद्देश्य भएको आचार्यको भनाई रहेको छ । पार्क निर्माणका लागि प्रदेश नं ३ सरकारले रु तीन करोड विनियोजन गरेको छ भने राप्ती नगरपालिका र सामुदायिक वनले समेत बजेट विनियोजन गरेका छन् । इको टुरिजम पार्कमा आकर्षक बगैँचा, पौडीपोखरी, भोजस्थल, विभिन्न आकर्षक पुल, विश्रामस्थल, चौतारो, टिकट घर, पार्किङस्थल, शौचालय लगायतका भौतिक संरचना निर्माण हुनेछन् । रासस
चन्द्रनिगाहपुरमा अन्तर्राष्ट्रिय कराते प्रतियोगिताको तयारी
काठमाडौँ । एकजना स्वयम् सेवक प्रशिक्षकले रौतहटको चन्द्रनिगाहपुरमा अन्तर्राष्ट्रिय कराते प्रतियोगिताको आयोजना गर्न थालेका छन् । सितोरियो कराते संघ रौतहटका अध्यक्ष तथा स्वयंसेवक प्रशिक्षक पहाडीले विगत १७ वर्षदेखि स्थानीय किशोर किशोरीलाई निःशुल्क प्रशिक्षण दिइरहेका छन् । उनले नियमित प्रशिक्षणको अलावा जिल्लाका बिभिन्न किसिमका प्रतियोगिताको समेत आयोजना गर्दै आएका छन् । स्वयम् सेवक प्रशिक्षक पहाडीको नेतृत्व र बिभिन्न संघ संस्थाको सहयोगमा आउँदो फागुन १६, १७ र १८ गते चन्द्रनिगाहपुरमा अन्तर्राष्ट्रिय कराते प्रतियोगिताको आयोजना गर्न लागिएको छ । प्रतियोगितामा भारत, श्रीलंका, भुटान, बंगलादेश र नेपालका सात प्रदेश र तीन बिभागीय टिमको सहभागिता रहने पहाडीले बताए । पूर्व साँसद रामकुमार भट्टराईको सांसद विकास कोषको रकमबाट चन्द्रनिगाहपुरस्थित तुलसीलाल स्मृति खेल मैदानसँगै बनेको कभर्ड हलमा करातेको नियमित प्रशिक्षण हुने गरेको छ । जिल्लामा राखेपको प्रशिक्षक नभएपनि पहाडीले प्रशिक्षण गराएका खेलाडीले प्रदेश नम्बर २ मै उत्कृष्ट प्रदर्शन गर्दै आएको छ । पछिल्लो समय जिल्लाका खेलाडीले म्याटमा प्रशिक्षण लिने गरेका छन । यसरी नियमित म्याटमा प्रशिक्षण लिने प्रदेश २ को यही जिल्ला मात्र हो । अन्य जिल्लासँग म्याट छैन । राखेपले आयोजना गर्ने विभिन्न प्रतियोगितामा स्वयंसेवक प्रशिक्षकले उत्पादन गरेका खेलाडीहरूले भाग लिने गरेका छन । पूर्व साँसद रामकुमार भट्टराईको सांसद विकास कोषको रकमबाट चन्द्रनिगाहपुरस्थित तुलसीलाल स्मृति खेल मैदानसँगै बनेको कभर्ड हलमा करातेको नियमित प्रशिक्षण हुने गरेको छ । प्रशिक्षणमा साना स्कुले बालबालिका समेत आउने गर्छन् ।
जापानी प्रधानमन्त्री र जर्मन चान्सलरबीच स्वतन्त्र व्यापार सम्बन्धि वार्ता
काठमाडौं । जापानका प्रधानमन्त्री सिन्जो आबे र जापान भ्रमणमा रहेका जर्मन चान्सलरबीच भएको भेटमा जापान र जर्मनीबीच स्वतन्त्र व्यापारका लागि छलफल भएको छ । जापान र यूरोपेली यूनियनबीच भएको सम्झौता अनुरूप स्वतन्त्र व्यापार कार्यान्वयनमा आएको छ । जापान र जर्मनीले स्वतन्त्र तथा खुला आर्थिक प्रणालीलाई स्थापित गर्न र मजबुत पार्न निकटमा रहेर काम गर्नेछन्, जापानी प्रधानमन्त्री आबेले मर्केलसँगको भेटपछि भएको संयुक्त पत्रकार सम्मेलनमा भएको थियो। जापानसँगको स्वतन्त्र व्यापार सहमतिले विश्वलाई महत्वपूर्ण सन्देश दिनेछ,” मर्केलले बताए । भेटमा जापान र जर्मनीका उच्च अधिकारीबीच बेलायतको इयूबाट हुने बहिर्गमन र यसबाट उक्त षेत्रमा पर्ने प्रभावका कारेमा छलफल भएको थियो । बेलायतमा काम गरिरहेका जापानी कम्पनीबारेमा चासो देखाउँदै आवेले मर्केलसँग भने बेलायतको इयूबाट हुने बहिर्गमन (ब्रेक्जिट) सम्झौताबिना नै बेलायतले इयू छोड्नुपर्ने अवस्था आउन नहुने जनाए । यसबाट विश्वव्यापी अर्थतन्त्रमा पर्ने नकारात्मक प्रभावलाई जोगाउनु पर्ने बताए। बेलायतको हाउस अफ कमन्सले गत जनवरीमा इयूसँग बेलायती प्रधानमन्त्री टरिजा मेले गरेको सम्झौता बेलायतको पक्षमा नभएको भन्दै विफल पारिदिएको थियो । संसदले प्रधानमन्त्रीलाई पुनः वार्ताका लागि जनादेश दिएको छ तर जर्मनी, फ्रान्सलगायत यूरोपेली मुलुक थप वार्ताका लागि तयार देखिएका छैनन् । रासस/सिन्ह्वा
