५ वर्षभित्र उत्कृष्ट कम्पनी बन्ने लक्ष्य सहित महालक्ष्मीका ३ नयाँ बीमा योजना
काठमाडौ । महालक्ष्मी लाईफ ईन्स्योरेन्स लिमिटेडले नयाँ बीमा योजना सार्वजनिक गरेको छ । १९ औं बीमा कम्पनीका रुपमा महालक्ष्मीले यही माघ २७ गते बसन्त पञ्चमीका दिनदेखि सेवा शुभारम्भ गर्ने विहीबार पत्रकार सम्मेलन गरी जानकारी गराएको छ । पत्रकार सम्मेलनमा कम्पनीका प्रमुख कार्यकारी अधिकृत(सिइओ) रमेशकुमार भट्टराईले नयाँ बीमा योजना सहित सेवा शुभारम्भका बारेमा जानकारी दिएका हुन् । कम्पनीले महालक्ष्मी डबल सावधिक बीमा, महालक्ष्मी लगानी फिर्ता म्यादी बीमा तथा महालक्ष्मी सावधिक बीमा गरी ३ किमिमका बीमा योजनाहरु सार्वजनिक गरेको छ । योजना बिक्रीका लागि कम्पनीले बीमा समितिबाट स्वीकृती समेत लिइसकेको छ । पत्रकार सम्मेलनमा सिइओ भट्टराई भने-‘हामीले ल्याएका बीमाका योजनाहरु नेपाली बीमा बजारमा विल्कुलै नयाँ छन् , किनकी महालक्ष्मीले सार्वजनिक गरेको जस्तो अफर अहिलेसम्म कुनै कम्पनीले दिएका छैनन । ’ कान्छो कम्पनीका रुपमा आफूहरु आएकाले अवसर र चुनौती दुवैको सामना गर्नुपर्ने अवस्था रहेको उनले बताए । महालक्ष्मी डबल सावधिक बीमा योजनामा बोनसको गणना गर्नै नपर्ने गरी तोकिएको अवधी समाप्ती पछि बीमाङ्कको दोब्बर रकम भुक्तानी गर्ने ग्यारेन्टी गरिएको छ । यस्तै, लगानी फिर्ता म्यादी बीमा योजना अन्तर्गत बीमा शुल्क भुक्तानी पश्चात तोकिएको अवधिमा कुनै घटना भएमा एक मुष्ट बीमाङ्क रकम भुक्तानी पाउने र घटना नभएमा अवधि समाप्तपछि जम्मा गरेको बीमा शुल्क जस्ताको त्यस्तै पाइने छ । साथै, तेस्रो महालक्ष्मी सावधिक बीमा योजनामा भने न्यूनतम बीमा शुल्क सुरक्षा पाईने, बचत हुने र कम्पनीको नाफामा समेत सरिक हुन पाईने अवसरहरु रहेका छन् । कम्पनीले माघ मनिा भित्रै काठमाडौ, वीरगंज र पोखराबाट कारोबार गर्ने शुरु गर्ने पत्रकार सम्मेलनमा बताइयो । फागुनको दोस्रो साता इटहरी, सुर्खेत, धनगढी र कोहलपूरबाट कारोबार सञ्चालनमा ल्याउने प्रयास भईरहेको कम्पनीले जनाएको छ । साथै, सातै प्रदेशमा कार्यालयहरु एकसाथ औपचारिक रुपमा उद्घाटन गरिने छ । कम्पनीले बीमा समितिबाट १३ वटा शाखा कार्यालय सञ्चालको स्वीकृती लिएको छ । कम्पनीको चुक्ता पूँजी २०० करोड रुपैयाँ रहेको छ । संस्थापकहरुबाट १४० करोड रुपैयाँ चुक्ता भईसकेको छ भने ६० करोड रुपैयाँ सर्वसाधारणका लागि छुट्याईएको छ । आगामी असार मसान्तसम्ममा करिब ५० करोड बीमा शुल्क संकलन गर्ने कम्पनीको लक्ष्य रहेको छ । कम्पनी सञ्चालन भएको २ बर्ष भित्र १० वटा नयाँ बीमा कम्पनीहरु मध्ये पहिलो हुने र आगामी ५ बर्ष भित्र सम्पूर्ण बीमा कम्पनी मध्येमा उत्कृष्ट रहने लक्ष्य रहेको सिइओ भट्राईले पत्रकार सम्मेलनमा बताए । कम्पनीको सञ्चालक समितिको अध्यक्ष मनोरञ्जनरमण शर्मा र सञ्चालकहरु उमेशलाल श्रेष्ठ, मोहनराज जोशी र सुरेश सापकोटा रहेका छन् ।
आचार्य बालकृष्णले भने-जग्गा उपलब्ध गराउनुुस्, पहिलो चरणमा एकसय करोड लगानी गर्छु
वालिङ । आचार्य बालकृष्णजी महाराजले नेपालमा लगानीका लागि आफू तयार रहेको बताएका छन् । जन्म जिल्ला स्याङ्जाको वालिङमा आयोजित स्वागत तथा सम्मान कार्यक्रममा आचार्य बालकृष्णले शैक्षिक संस्था, जडीबुटी, उद्यान र उद्योगको विकासका लागि पहिलो चरणमा एकसय करोड लगानी गर्ने बताए । मैले यहाँबाट कमाएर लाने पनि होइन यहीको विकासका लागि लगानी गर्छु,” आचार्य बालकृष्णले भने, “तपाईंहरुको माया र स्नेह मात्रै पाए पुग्छ अरू लगानीका लागि कुनै चिन्ता छैन योजना सफल बनाउन एक सय करोड होइन त्यो भन्दा पनि बढी म खर्च गर्छु ।” वालिङ उद्योग वाणिज्य सङ्घले वालिङको विकासका लागि उद्योगधन्दाहरु सञ्चालनका लागि ज्ञापनपत्र उनलाई बुझाएको थियो । आचार्य बालकृष्णले उद्यमशीलताको विकासका लागि तयार रहेको बताउँदै सङ्घलाई जग्गा उपलब्ध गराउन आग्रह गरे । वालिङ नगरपालिका–६ भरुवामा जन्मिनुभएका आचार्य बालकृष्णलाई महोत्सवस्थलमा वालिङ नगरप्रमुख दिलीपप्रताप खाँण र वालिङ उद्योग वाणिज्य सङ्घका अध्यक्ष शोभाकान्त पौडेलले सम्मान गरेका थिए ।
पर्यटन विकास र आधुनिक कृषिका लागि पहल गर्छुः नवनियुक्त राजदुत पाण्डे
काठमाडौं । नेपालको व्यापार प्रबर्दन, लगानी अभिवृद्दी, पर्यटनको विकास र कृषि क्षेत्रको आधुनिकीकरणमा विशेष पहल गर्ने नवनियुक्त राजदुत बताएका छन् । मलेसियाका लागि नेपाली राजदुत उदयराज पाण्डेले नेपाली उद्योगीहरु ब्यापारी मात्र नभएर उत्पादनकर्ता समेत भएको कुरामा जोड दिएका थिए । नेपाल चेम्बर अफ कमर्समा भएको उक्त कार्यक्रममा नेपालको नवनियुक्त राजदुतले चेम्बरले विश्वब्यापी रुपमा नेपालमा बन्दै गएको लगानी मैत्री वातावरणको प्रचार गर्नुपर्ने कुरा उल्लेल्ख गरेका थिए । इजरायलका लागि नेपाली राजदुत डा. अन्जान शाक्यले लगानीकर्ता भित्र्याउन सक्दो पहल गर्ने कुरा बताएका छन् । संयुक्त राष्ट्रसंघका लागि नेपाली प्रतिनिधि अमृत राईले सन् २०२२ सम्ममा अति कम विकसित राष्ट्रबाट विकासशील राष्ट्रमा स्तरोन्नति हुन र सन् २०३० सम्ममा मध्यम आय भएको राष्ट्र बन्न नेपालले आफ्नो व्यापारमा भरि मात्रामा सुधार गर्नु पर्ने कुरा बताएका थिए ।
बजार सामान्य अंकले घट्यो, जोशी हाइड्रोका लगानीकर्ताले गुमाए ८ प्रतिशत
काठमाडौं । साताको अन्तिम कारोबारको दिन सेयर बजार सामान्य ०.१५ अंकले घटेको छ । उतारचढाव देखिएको बजारमा नेप्से परिसूचक १.०१ प्रतिशतले घटेर ११३९.५७ अंकमा अडिएको छ । बजारमा परिसूचक घटेपनि सेन्सेटिभ इन्डेक्स भने ०.११ अंकले बढेर २४२.६१ अंकमा पुगेको छ । सो दिन १६४ कम्पनीको २५ करोड ७६ लाख रुपैयाँ बराबरको सेयर कारोबार भएको छ । सो मध्ये नेपाल इन्स्योरेन्स कम्पनी र सोल्टी होटलको २ करोड रुपैयाँ बराबरको सेयर किनबेच भएको छ । त्यस्तै, सामुदायिक लघुवित्त वित्तीय संस्था, अपर तामाकोशी र नेपाल इन्भेष्टमेन्ट बैंकको एक करोड बढीको सेयर कारोबार भएको छ । सामान्य अंकले घटेको बजारमा जोशी हाइड्रोपावर डेभलपमेन्ट कम्पनीका लगानीकर्ताले सबैभन्दा बढी अर्थात ८.६४ प्रतिशत गुमाएका छन् । सो दिन यस कम्पनीको सेयर मूल्य अघिल्लो दिनको तुलनामा १९ रुपैयाँले घटेर प्रतिकित्ता २०१ रुपैयाँमा कारोबार भएको छ । सामुदायिक लघुवित्त वित्तीय संस्थाको सेयर मूल्य ८.८१ प्रतिशतले बढेको छ । त्यस्तै, मेरो माइक्रोफाइनान्स वित्तीय संस्थाका लगानीकर्ताले ४.०३ प्रतिशत कमाएका छन् । सबैभन्दा बढी लाइफ इन्स्योरेन्स समूहको सूचक ४३.५७ अंकले घटेको छ । त्यस्तै, बाँकी चार समूह सामान्य अंकले उकालो लागेका छन् भने अन्य ४ समूहको सूचक राताम्मे देखिएको छ ।
१९ हजार सवारी चालकलाई कारवाही, एक करोड ४६ लाख राजश्व संकलन
चितवन । जिल्ला ट्राफिक प्रहरी कार्यालय चितवनले चालू आर्थिक वर्षको पुस मसान्तसम्ममा १९ हजार ७०० सवारी चालकलाई कारवाही गरेको छ । कारवाही पर्नेमा मादक पदार्थ सेवन गर्ने ३८५, क्षमताभन्दा बढी सामान बोक्ने तीन हजार ९८८, सिटबेल्ट नबाँध्ने र हेल्मेट नलगाएका एक हजार १७८, सवारी चलाउँदा आवश्यक पर्ने कागजपत्र नबोकेका तीन हजार ३०८ र सवारी चालक अनुमतिपत्र नभएका दुई हजार ७२६ जना रहेका छन् । यस्तै सवारी साधनमा बत्तीको अवस्था ठिक नभएका १५३, अन्यमा छ हजार ६६९, तीव्रगतिमा सवारी चलाउने ३४२, सिट क्षमताभन्दा बढी यात्रु बोक्ने ६२८ सवारी चालकलाई कारवाही गरिएको हो । जिल्लाको विभिन्न स्थानमा गरिएको जाँचका क्रममा कारवाहीमा परेका उनीहरुबाट एक करोड ४६ लाख ३१ हजार राजश्व सङ्कलन भएको कार्यालयले जनाएको छ । जिल्लामा बढ्दै गएको सवारी दुर्घटना न्यूनीकरणका लागि सञ्चालन गरिएका विभिन्न कार्यक्रम प्रभावकारी बन्दै गएको भए पनि सवारीसाधन लापरवाहीले चलाउनेको सङ्ख्यामा कमी आउन नसकेको जिल्ला ट्राफिक प्रहरी कार्यालय चितवनका प्रमुख वेदप्रसाद गौतमले जानकारी दिए ।
विश्व बैंकका आलोचक माल्पासलाई नै ट्रम्पले गरे नयाँ अध्यक्षमा शिफारिस
वासिङ्टन । अमेरिकी राष्ट्रपति डोनाल्ड ट्रम्पले अमेरिकी अर्थ विभागमा कार्यरत डेभिड माल्पासलाई विश्व बैंकको नयाँ अध्यक्षका लागि सिफारिस गरेका छन् । विश्व बैंकको कार्यशैलीमाथि तिखा टिकाटिप्पणी गर्दै आउनुभएका माल्पासलाई नै राष्ट्रपति ट्रम्पले नियुक्तिका लागि सिफारिस गरेका हुन् । अमेरिकी अर्थ विभागका वरिष्ट अधिकारी माल्पासको छनौट विवादास्पद मानिएको छ, तर बैंकका बहुसंख्यक शेयरहोल्डरहरु, खासगरी युरोपेली मुलुकहरुको समर्थन प्राप्त गर्न राष्ट्रपति ट्रम्प सफल हुनुभयो भने बैंकलाई नयाँ स्वरुपमा ढाल्न ट्रम्पलाई एउटा मौका हुनेछ । ट्रम्पले माल्पासको नाम सार्वजनिक गर्नेक्रममा ह्वाइट हाउसमा आयोजित समारोहमा भने, “माल्पास विलक्षण प्रतिभाका धनी हुनुहुन्छ र यो अति महत्वपूर्ण जिम्मेवारी लिनसक्ने उपयुक्त व्यक्ति पनि हुनुहुन्छ ।” “विश्व बैंकमा सबैभन्दा ठूलो योगदानकर्ता मुलुक अमेरिका हो,” उनले भने, “मेरो प्रशासनले अमेरिकी करदाताले तिरेको पैसा प्रभावकारी र बुद्धिमत्तापूर्वक तरिकाबाट खर्च भएको सुनिश्चित गर्न उच्च प्राथमिकता दिनेछ ।” राष्ट्रपति ट्रम्प र उनको ह्वाइट हाउस प्रशासनले कार्यभार सम्हालेको दुई वर्षदेखि बहुराष्ट्रिय संस्थाहरुमाथि निरन्तर आलोचना गरिरहेका छन् । माल्पासले विश्व बैंक र अन्तर्राष्ट्रिय मुद्रा कोषमाथि आक्रमणको नेतृत्व नै गरिरहेका छन् । माल्पासले अन्तर्राष्ट्रिय वित्तीय संस्थाहरुको ऋण प्रवाह अभ्यास “भ्रष्ट” रहेको बताउँदै चीन र तुलनात्मक रुपमा सम्पन्न मुलुकमा समेत लगानी गरिरहेकामा आपत्ति जनाएका छन् । ह्वाइट हाउसमा आयोजित समारोहमा बोल्दै माल्पासले गत वर्ष स्वीकृत सुधारका योजनाको कार्यान्वयन गरिने स्पष्ट गर्नुभयो । उनले बैंकको लगानीयोग्य रकमलाई १३ अर्ब डलरले वृद्धि गरिने पनि बताए । माल्पासले उच्च आय भएका चीनजस्ता मुलुकलाई प्रदान गरिने ऋणमा कडाई गर्ने तथा त्यस्ता मुलुकमा ऋण प्रवाह गर्दा बढी व्याजदरमा मात्र दिइने बताए । “म निकै आशावादी छु कि अति गरिबीसँग जुध्न तथा विकाशसील मुलुकमा आर्थिक अवसर सिर्जना गर्न हामी सक्षम हुनेछौं,” माल्पासले भने । विश्व बैंकका अध्यक्ष जीम योङ कीमले आश्चर्यजनक रुपमा पाँच वर्षे दोस्रो कार्यकालको बीचमै फेब्रुअरी १ बाट लागू हुनेगरी राजीनामा दिएका थिए । उनको राजीनामासँगै राष्ट्रपति ट्रम्पलाई नयाँ अध्यक्ष चयन गर्न बाटो खुलेको हो । बिहीबारदेखि बैंकको बोर्डले मनोनयनमा परेका व्यक्तिको आवेदन लिनेछ र यो मार्च १४ तारिखसम्म रहनेछ । आगामी अप्रिल १२–१४ सम्म वासिङ्टनमा हुने अन्तर्राष्ट्रिय मुद्रा कोष र विश्व बैंकको संयुक्त बैठक अघि बैंकको नयाँ अध्यक्ष चयन गरिनेछ । बैंकका १८९ सदस्यमध्ये जोकोहीले अध्यक्षका लागि उम्मेदवारी दिन सक्नेछन् । दोस्रो विश्वयुद्धको समाप्तिपछि स्थापना भएको विश्व बैंकका अध्यक्षहरु हालसम्म अमेरिकीहरु नै भइरहेका छन् । विश्वकै सबैभन्दा ठूलो वित्तीय संस्था विश्व बैंकको प्रधान कार्यालय अमेरिकाको वासिङ्टनमा रहेको छ । विश्व बैंकको भगिनी संस्था अन्तर्राष्ट्रिय मुद्रा कोषको नेतृत्व भने युरोपेली मुलुकहरुबाट हुने गरेको छ । पछिल्ला वर्षहरुमा उदीयमान अर्थतन्त्र रहेका मुलुकहरुले अलिखित यो व्यवस्थाका विरुद्धमा चुनौती दिन थालेका छन् । उनीहरुले बैंकको अध्यक्ष चयन गर्दा बढी खुला, योग्यता–आधारित छनौट प्रक्रिया अवलम्बन गर्न माग गरिरहेका छन् । अमेरिकी पूर्व अर्थ अधिकारीहरुले माल्पास र उनको योग्यतालाई लिएर कडा आलोचना गरिरहेका छन् । उनीहरुले विश्वको वित्तीय सङ्कटका बारेमा यथार्थ विश्लेषण गर्न माल्पास अक्षम रहेको आरोप लगाएका छन् । जर्ज डब्लु बुस प्रशासनका समयमा अर्थ सहायक मन्त्री रहनुभएका टोनी फ्राटोले भने, “विश्व बैंकको अध्यक्षमा डेभिड माल्पासको मनोनयन दुर्भाग्यपूर्ण, विषाक्त छनौट हो ।” संयुक्तराज्य अमेरिका विश्व बैंकको सबैभन्दा ठूलो सेयरहोल्डर हो तर अमेरिकासँग कुनै विशेषाधिकार भने छैन । बोर्डमा बहुमत पु¥याउन अमेरिकालाई युरोपेली मुलुकहरुको समर्थन आवश्यक हुन्छ । अमेरिकी वरिष्ट अधिकारीहरुले अमेरिकी अर्थमन्त्री स्टिभन मन्चिनले राष्ट्रपति ट्रम्पको मनोनयनका पक्षमा समर्थन जुटाउन विश्व बैंकका अरु सेयरहोल्डरसँग छलफल थाल्नुभएको बताए । माल्पास अर्को साता व्यापार वार्ताका लागि बेइजिङको भ्रमणमा जाँदै छन्, र त्यसपछि उनी जापान जानुहुनेछ । जापान विश्व बैंकको दोस्रो ठूलो सेयरहोल्डर हो । रासस/एएफपी
ठमेल व्यवस्थित बनाउने प्रयासः खाली ट्याक्सी निषेध, अरु साधनपनि रोक्ने कि ?
काठमाडौ । पर्यटकीय क्षेत्र ठमेल प्रवेशमा भाडाका खाली ट्याक्सीलाई रोक लगाइएको छ । ३ महिनादेखि थर्ड आई रेष्टुरेन्टको अग्रसरतामा खाली ट्याक्सीलाई रोक लगाइएको हो । खाली ट्याक्सी निषेधले ठमेल क्षेत्रमा सवारी जामको समस्या हटाउन र व्यापार व्यवसायमा सहजता भएको व्यवसायीहरु बताउँछन् । यात्रु बोकेर आउने गरेका टयाक्सीमा भने कुनै रोकतोक गरिएको छैन । सञ्चयकोष चोक तथा क्षेत्रपाटीमा गरी २-२ जनाले टयाक्सी व्यवस्थापनमा सघाउदै आएका छन् । ठमेल क्षेत्रमा झट्ट हेर्दा खाली ट्याक्सी रोकिएको जस्तो देखिएपनि कतिपय चालकले तीब्र गतिमा खाली ट्याक्सी ठमेल भित्र लैजाने गरेका छन् । ट्याक्सी व्यवस्थापन टोलीमा आवद्ध एक यूवा फूर्वा तामाङ भन्छन्-‘ ठमेल क्षेत्रमा गाडीको व्यवस्थापन गर्न सकेमा नेपाली–विदेशी सबैलाई फाईदा हुन्छ । तर हामीलाई झुटा कारण देखाएर ट्याक्सी चालकहरुले माला बेच्नेलाई चढाएको नाटक गरेर झुक्याउने गरेको बताए । ठमेलको त्रिदेवी मार्गमा ट्रेकिङ सामानको व्यवसाय गर्दै आएका सन्तोष पन्त भन्छन्- आजकाल हल्लामा केही कमी भएको छ, यसरी नै धुलो समेत कमी भएको छ, यो राम्रो कुरा हो । पन्तले आफ्नो पसल अगाडी टयाक्सी पार्किङमा कमी हुँदै गएको बताए । अहिले व्यापारमा अफसिजन रहेपनि सरसफाइमा मद्दत पुग्नु व्यापारिक दृष्टीकोणबाट पनि राम्रो रहेको बताए । साथै, विदेशी पर्यटकले शान्त वातावरण रुचाउने भन्दै उनले आगामी दिनमा ट्याक्सीको प्रवेशलाई निषेध गर्नु पर्ने जानकारी दिए । विगत ४ बर्षदेखी ठमेलमा रुमन हयाण्डी क्राष्टको व्यवसाय गर्दै आएका मना श्रेष्ठले पछिल्लो समय सवारीका कारण व्यापार चौपट भएको भन्दै निराशा व्यक्त गरे । उनले आफ्नो पसल अगाडि रहेको एटीएममा पैसा झिक्न आउनेले पसल ढाक्ने गरेर सवारी राख्ने गरेको आफू मारमा परेको बताए । उनले भाडाको ट्याक्सी रोक्नका लागि सरकारी निकायबाटै उचित कदम चालिनु पर्ने बताए । नर्सिङ चोकको टिवेट हाउसमा कार्यरत थान्का व्यापारी अर्जुन दवाडी भन्छन्– सवारीको आवगमन रोक्दा कहीँ असुविधा त हुन्छ नै, तर यस्को प्रभाव भने राम्रो छ । सकेसम्म ठमेललाई सवारी निषेधित क्षेत्रकै रुपमा घोषणा गर्न सकेमा पर्यटकीय आकर्षणमा मद्दत पुग्ने दवाडीको तर्क छ । क्षेत्रपाटी चोकमा विगत १५ बर्षदेखि प्रतिष्ठा फार्मेसी सञ्चालन गर्दै आएका शुशिल प्रधान भन्छन्– सवारीको सन्दर्भमा गरिएको प्रयास ठीक हो । तर, यस्को कार्यान्वयन अझै व्यवस्थित बनाउन जरुरी छ । ठमेलका सातघुम्ती चोक, जेपि स्कूल मार्ग, केजिएच चोक लगायतका स्थानमा भने पूर्ण रुपमा सवारी साधनको निषेध गरिएको छ । बाधक बन्दैन ठमेल टुरिजम डेभलपमेण्ट काउन्सिल ठमेल टुरिजम काउन्सिलका अध्यक्ष समिर गुरुङ्का अनुसार– पर्यटकीय क्षेत्र भएकाले गाडीको व्यवस्थापन गर्नु राम्रो कुरा हो, तर चालकको मर्मलाई सम्बोधन नगर्नाले उनीहरु मारमा परेका छन् । पछिल्लो समय सोही कुरालाई लिएर आलोचना समेत धेरै हुने गरेको पाईन्छ । सामाजिक संघ संस्थाको सल्लाह अनुरुप जाँदा सबैको हित हुन्थ्यो । तर, ट्याक्सी रोक्ने काम थर्ड आई नामक होटलले गर्दै आएको छ । आगामी दिनमा निजी, सामुदायिक तथा सरकारी विभाग एक ठाउँमा रहेर निष्कर्ष निकाल्न जरुरी छ । अहिले यो परीक्षण कै अवस्थामा भएपनि जनसमुदायको हितमा काउन्सिलले बाधा नपुर्याउने गुरुङको तर्क रहेको छ ।
तीन संस्थाको ३२ लाख कित्ता सेयर सूचिकृत, कुन कुनको कति ?
काठमाडौं । बिहीबार विभिन्न तीन संस्थाको ३२ लाख १८ हजार १३७ कित्ता सेयर नेपाल स्टक एक्स्चेञ्ज(नेप्से)मा सूचिकृत भएको छ । नयाँ नेपाल लघुवित्त वित्तीय संस्था, सिटी एक्स्प्रेस फाइनान्स कम्पनी र हाम्रो विकास बैंकको बोनस र हकप्रद गरी सो मात्राको सेयर नेप्सेमा सूचिकृत भएको हो । सो मध्ये नयाँ नेपाल लघुवित्त र सिटी एक्स्प्रेस फाइनान्सको हकप्रद र हाम्रो विकास बैंकको बोनस सेयर नेप्सेमा थपिएको हो । नयाँ नेपाल लघुवित्तको ६ लाख र सिटी एक्स्प्रेसको २५ लाख कित्ता हकप्रद थपिएको छ । त्यस्तै, हाम्रो विकास बैंकको एक लाख १८ हजार १३७ कित्ता बोनस सेयर नेप्सेमा सूचिृकत भएको छ ।
