सप्तकोशी डेभलपमेन्ट बैंकले एकाएक किन बोलायो विशेष साधारणसभा ?
काठमाडौं । सप्तकोशी डेभलपमेन्ट बैंकले आगामी चैत २७ गते आफ्नो विशेष साधारणसभा बोलाएको छ । संस्थाले सो दिन बिहान ११ बजे बिराटनगरको उद्योग संगठन मोरङमा उक्त सभा बोलाएको हो । यस विकास बैंकले कोबेली विकास बैंकसँग मर्जमा जाने प्रस्ताव सहित सो दिन विशेष साधारणसभा डाकेको हो । साथै, उक्त दुई विकास बैंक एक आपसमा गाभिने प्रयोजनका लागि नेप्सेमा माघ ४ गतेदेखि बुक क्लोज रहेको छ । दुई संस्थाबीच एकीकृत कारोबार नभएसम्मका लागि यस विकास बैंकको बुक क्लोज रहने संस्थाले जनाएको छ । हाल सप्तकोशी डेभलपमेन्ट बैंकको चुक्ता पुँजी ४८ करोड ५३ लाख रुपैयाँ रहेको छ । त्यस्तै, काबेली विकास बैंकका चुक्ता पुँजी २१ करोड ५ लाख ९० हजार रुपैयाँ रहेको छ ।
नेपाल स्टक एक्सचेञ्जमा धर्ना बस्न खोज्ने शेयर लगानीकर्ता पक्राउ
काठमाडौँ । पूँजी बजारको विकासका लागि आफ्ना विभिन्न माग सम्बोधन नभएको भन्दै नेपाल स्टक एक्सचेञ्जको भद्रकालीस्थित कार्यालयमा धर्नामा उत्रिएका शेयर लगानीकर्ता दवाब समूहका प्रतिनिधिलाई प्रहरीले नियन्त्रणमा लिएको छ । समूहका प्रतिनिधिले भोक हडतालको ब्यानरसहित स्टकको प्रवेशद्वारमा धर्ना शुरु गर्न लाग्दा त्यहाँबाट हटाउँदै प्रहरीले १० जनालाई नियन्त्रणमा लिएको हो । सिंहदरबार अगाडिको संवेदनशील र धर्नाका लागि निषेधित क्षेत्र परेको तथा युएन पार्क मार्गको बाटोसमेत अवरोध हुनसक्ने भएकाले उनीहरुलाई पक्राउ गरिएको सो स्थलमा खटिएका नेपाल प्रहरीका प्रहरी उपरीक्षक वासुदेव खतिवडाले जानकारी दिए । समूहका प्रतिनिधि तिलक कोइरालाले पूँजी बजारलाई विशेष क्षेत्र तोकी प्राथमिकता दिनेलगायत विगतमा भएको सहमति अर्थ मन्त्रालयबाट कार्यान्वयन नभएको विषयमा ध्यानाकर्षण गराउन शान्तिपूर्ण धर्नामा बस्दा प्रहरीले बल प्रयोग गरेर नियन्त्रणमा लिएको बताए ।
साताको तेस्रो दिन सुनको मूल्य घट्यो, प्रतितोला ६० हजार ५ सयमा कारोबार
काठमाडौं । साताको तेस्रो दिन सुन प्रतितोला १ सय रुपैयाँ घटेको छ । सोमबार प्रतितोला ६० हजार ६ सय रुपैयाँमा बिक्री भएको सुन मंगलबार ६० हजार ५ सय रुपैयाँमा कारोबार भईरहेको छ । सोमबारको तुलनामा मंगलबार तेजावी सुन पनि प्रतितोला १ सय रुपैयाँ घटेर ६० हजार २ सय रुपैयाँमा कारोबार भईरहेको छ । त्यस्तै चाँदी प्रतितोला ७४० रुपैयाँमा कारोबार भईरहेको छ । चाँदी भने लामो समयदेखि सोही मुल्य कायम गर्दै आएको नेपाल सुनचाँदी संघले जनाएको छ ।
राजश्व परामर्श समितिले थाल्यो आर्थिक ऐन तथा बजेट तर्जुमाको तयारी, माग्यो सुझाव
काठमाडौँ । अर्थमन्त्रालय अन्तरगतको राजश्व परामर्श समितिले आर्थिक वर्ष २०७६/०७७ को लागि आर्थिक ऐन तथा बजेट तर्जुमाको लागि तयारी थालेको छ । समितिले सूचना प्रकाशित गर्दै विद्यमान राजश्व नीति, भन्सार महसुल, मूल्य अभिबृद्धि कर, आयकर, अन्तःशुल्क, गैरकर तथा राजश्ज चुहावट नियन्त्रणका साथै समग्र राजश्व प्रशासन सुधारका लागि सुझाव माग गरेको हो । समितिले २०७६ बैशाख १५ गतेसम्म सम्बन्धित संघसंस्था, सरकारी निकाय, बुद्धिजीवीहरु र सरोकार राख्ने सबैलाई सुझाव पेश गर्न अनुरोध गरेको छ । सुझावहरु नेपाल सरकार अर्थमन्त्रालय, राजश्व परामर्श समितिको कार्यालय सिंहदरबारमा पठाउन सकिनेछ । साथै अर्थमन्त्रालय अन्तरगतका सम्बन्धित विभाग र कार्यालयमा समेत सुझाव पठाउन सकिने समितिले जनाएको छ । विषयगत सुझावहरु आन्तरिक राजश्व उपसमिति, उद्योग वाणिज्य तथा निर्यात प्रवद्र्धन उपसमिति, भन्सार उपसमिति, राजश्व चुहावट तथा सम्पत्ति शुद्धिकरण अनुसन्धान उपसमिति, पूर्वाधार सूचना प्रविधि तथा आर्थिक उपसमिति, कृषि, उर्जा तथा पर्यटन उपसमिति, बैंक, वित्तीय संस्था, बीमा, सहकारी तथा पूँजी बजार उपसमिति, गैरकर उपसमिति, अन्तर सरकारी वित्त व्यवस्थापन उपसमिति, लगानी प्रबद्र्धन उपसमिति र राजश्ज ऐन, नियम तथा प्रशासनिक सुधार उपसमितिमा पठाउन सकिने राजश्व परामर्श समितिले जनाएको छ ।
१५ बुँदे सुझाव बुझाएर नेपाल बैंकबाट बाहिरिए देवेन्द्रप्रताप शाह, ४ वर्षे कार्यकालमा के के गरे ?
काठमाडौं । नेपाल बैंक लिमिटेडबाट प्रमुख कार्यकारी अधिकृत देवेन्द्रप्रताप शाह बाहिरिएका छन् । आफ्नो ४ वर्षे कार्यकाल सोमबार पूरा भएसँगै शाहले बैंकबाट नियमित अवकाश पाएका हुन् । उनको अवकाशसँगै नेपाल बैंकको प्रमुख कार्यकारी अधिकृत पद रिक्त भएको छ । शाहले नेपाल बैंकमा प्रमुख कार्यकारीको हैसियतमा रहँदा वित्तीय रुपमा बिरामी रहेको बैंकलाई उद्धार गर्न सफल भएको दाबी गरेका छन् । उनले बैंकलाई प्रविधि, जनशक्ति र वित्तीय सूचकका हिसाबले देशकै प्रतिस्पर्धी बैंक बनाउन सफल भएको दाबी गरेका हुन् । ‘म आउँदा नेपाल बैंकको प्रविधि म्यानुअल ढंगले चलेको थियो, मैले अत्याधुनिक कम्युटराइज सिस्टम बैंकमा भित्र्याएँ, त्यसैअनुसार कर्मचारीहरुलाई पनि नयाँ प्रविधिसँग काम गर्न सक्षम बनाएँ । त्यससँगै भिसा कार्ड पनि लन्च गर्न सफल भयौं’ – शाहले विकासन्यूजसँग भने । उनले वित्तीय सूचकहरुमा समेत ठूलो उपलब्धि हासिल गर्न सफल भएको बताए । ‘म आउँदा बैंक वित्तीय रुपमा बिरामी थियो, ननफण्ड बिजिनेस थोरै थियो, त्यसमा सुधार भएको छ । ४ प्रतिशतमा सीमित रहेको पुँजी पर्याप्तता अनुपात बढाएर लगानीका लागि ठूलो फण्डको सिर्जना गरेको तथा नकारात्मक रहेको रिजर्भको आकारलाई सकारात्मक बनाउन पहल गरेको दाबी गरेका छन् । नेपाल बैंकबाट बाहिरिनुअघि आफूले गर्न बाँकी रहेका कामहरुको १५ बुँदे सूचि तयार गरेर सञ्चालक समितिलाई बुझाएको भन्दै आफ्ना उत्तराधिकारीहरुले त्यसलाई निरन्तरता दिने विश्वास समेत उनले व्यक्त गरे । २०७१ साल चैत १३ गते नेपाल बैंकमा शाह प्रमुख कार्यकारी अधिकृत नियुक्त भएसँगै चैत मसान्तमा प्रकाशित वित्तीय विवरणमा बैंकको रिजर्भ २ अर्ब ७५ करोड रुपैंया घाटामा देखिएको थियो । गत पुस मसान्तमा १ अर्ब ९६ करोड सकारात्मक देखिएको छ । त्यो बेला बैंकको निष्क्रिय कर्जा अनुपात नै १०.५ प्रतिशत पुगेको थियो । अहिले यो दर २.७४ प्रतिशतमा सीमित भएको छ जुन अन्य सरकारी लगानीका बैंकहरुको भन्दा राम्रो हो । यो अवधिमा आइपुग्दा बैंकले निक्षेप र कर्जाको आकार, कस्ट अफ फण्ड, आधार दर र नाफाका हिसाबले समेत उत्कृष्ठ बैंकहरुसँग प्रतिस्पर्धी हैसियत बनाउन सफल भएका छ । यद्यपि एफपीओ जारी गर्ने बेलामा प्रतिबद्धता गरिएको लाभांश वितरण गर्न भने शाह असफल भएका छन् । ३२ प्रतिशतसम्म बोनस शेयर दिनसक्ने घोषणा गरे पनि राष्ट्र बैंकले रिजर्भमा रहेको ठूलो रकम कर्मचारीको दायित्वमा समायोजन गरिदिएपछि शाहको कार्यकालमा नेपाल बैंकका शेयरधनीले लाभांश पाउने अवसरबाट वञ्चित भएका हुन् ।
लगानी सम्मेलन प्रभावित पार्नेगरी विप्लवको नेपाल बन्द घाेषणा
काठमाडौं । नेपालले तामझामका साथ लगानी सम्मेलन गर्ने तयारी गरिरहँदा प्रतिबन्धित नेत्रविक्रम चन्द (विप्लव) नेतृत्वको नेपाल कम्युनिष्ट पार्टीले बन्दको आह्वान गरेको छ । उक्त समूहले १६ गतेका दिन नेपाल बन्दको आह्वान गरेको हो । पक्राउ परेका आफ्ना कार्यकर्ताहरुको रिहाइ र सरकारले लगाएको प्रतिबन्ध फुकुवाको माग गर्दै १३ गतेदेखि २४ गतेसम्म चरणवद्ध आन्दोलनको घोषणा गरेको विप्लव समूहले १६ गते बन्दको आह्वान गरेको हो । अघिल्लो बन्दको घोषणाको आंशिक प्रभाव परेकोमा अबको बन्द भने शनिबारका लागि घोषणा गरिएको छ । यसले गर्दा सवारी आवतजावतमा असर गरे पनि कार्यालय, प्रतिष्ठान र शिक्षण संस्थाका हकमा भने यसको प्रभाव हुनेछैन । यद्यपि लगानी सम्मेलनमा आएका पाहुनाहरुमा भने यसले लगानी प्रतिवद्धतामा मनोवैज्ञानिक असर गर्ने देखिएको छ ।
लगानी सम्मेलनमा १३ अर्ब लागतको आइएमई सिमेन्ट परियोजनापनि प्रस्तुत हुँदै
काठमाडौँ । चैत १५ र १६ मा हुने लगानी सम्मेलनमा निजी क्षेत्रको १८ वटा परियोजना प्रस्तुत हुने भएको छ । ती परियोजना मध्ये आइएमई सिमेन्ट पनि परेको छ । लगानी सम्मेलन मार्फत आईएमई प्रालिले पनि विदेशी लगानी खोजेको छ । प्रस्तावित सिमेन्ट कम्पनीले नवलपरासी जिल्लाको मध्याविन्दु नगरपालिका, गान्धीमा कम्पनी स्थापनाको प्रस्ताव गरिएको छ । यो सिमेन्ट कम्पनीको खनिज क्षेत्रका लागि पाल्पा जिल्लाको मदनपुर, निसीडी ग्रामीण नगरपालिलाई प्रस्ताव गरिएको छ । सिमेन्टको खनिज क्षेत्र १५ वर्ग किलोमिटर, कच्चा पद्धार्थ ०.२३७ वर्ग किलोमिटर, कोनेस्टोनको रिजर्व २००० टिपीडी, १८.७२ लाख टन उत्पादन गर्ने सो परियोजना प्रूतावमा उल्लेख छ । पूर्वपश्चिम राजमार्गबाट ५ किलोमिटर भित्र सो सिमेन्ट स्थापना गर्ने परियोजना प्रस्तावमा उल्लेख छ । परियोजना लागत नेपाली रुपैयाँ १३ अर्बको रहेको छ । प्रतिफलको आन्तरिक दर २० प्रतिशत रहेको छ । लगानी सम्मेलनमा १३ करोड डलरको गरुड सिमेन्टको परियोजना पनि प्रस्तुत हुँदैछ । चैत १५ र १६ मा हुने लगानी सम्मेलनका लागि सरकारी र निजी क्षेत्रबाट गरी कुल ७१ वटा परियोजना प्रस्ताव प्रस्तुत हुँदैछन् । लगानी बोर्डका अनुसार यस सम्मेलनमा सरकारका तर्फबाट ५३ र निजी क्षेत्रबाट १८ वटा गरी कुल ७१ वटा प्रस्ताव पेस हुनेछ ।
होली मिलन कार्यक्रममा खानेपानी मन्त्री बिना मगर रानाथारू पहिरनमा
कंचनपुर । कंचनपुरको लालझाडी गाउँपालिकाले आयोजना गरेको राना थारूहरुको होली मिलन कार्यक्रममा प्रमुख अतिथिका रूपमा सहभागी भएकी खानेपानी मन्त्री बिना मगरले लगाएको पहिरन देख्दा धेरै जना छ्क्क परे । खानेपानी मन्त्रीको यो पहिरनमा राना थारुहरुको संस्कृति र पहिचान झल्किएको देखिन्थ्यो । अल्पसंख्यक राना थारू समुदायको कला संस्कृति र भेषभुषाको जगेर्ना गर्न आफुले पहिरन लगाएको स्पष्ट पारिन् । देशभर रहेका यस्ता थुप्रै अल्पसंख्यक जातजातिको कला संस्कृति र पहिचानको संरक्षण गर्नु राज्यको दायित्व भएको उनको भनाइ थियोे ।
